Pagpakosog kan Satong Kompiansa sa Katanosan nin Dios

“Tanganing ika magkompiar ki Jehova mismo tinawan taka . . . nin kaaraman.”—TALINHAGA 22:19.

1, 2. (a) Taano an Mga Saksi ni Jehova ta nagpapaheling nin kompiansa ki Jehova? (Talinhaga 22:​19) (b) Ano an nagpapaheling na an nagkapirang indibiduwal nagkakaipong pakosogon an saindang kompiansa ki Jehova?

AN TUNAY na mga Kristiano binendisyonan nin tamang kaaraman dapit ki Jehova asin sa saiyang mga katuyohan. An “fiel asin madonong na oripon” mamomoton na nagtatao sa sainda nin espirituwal na “kakanon sa igong panahon.” (Mateo 24:45) An kaaraman na nakukua ninda nagtatao sa sainda nin masarig na pundasyon na pasisikadan kan kompiansa sa Dios. Sa siring, bilang grupo, an Mga Saksi ni Jehova nagpapaheling nin pambihirang kompiansa ki Jehova asin sa saiyang katanosan.

² Minsan siring, minalataw na bilang mga indibiduwal an nagkapirang Saksi tibaad nagkakaipong pakosogon an kompiansang iyan. Sa panapanahon an Sosyedad nakareresibi nin mga surat na nagpapahayag nin pagduwaduwa manongod sa mga paliwanag na itinatao sa mga publikasyon kaiyan. An mga pagduwaduwang ini tibaad reaksion sa mga pagliliwat sa pakasabot, o tibaad manongod iyan sa mga bagay na nakakaapektar sa naghahapot, nangorogna sa emosyonal na paagi.​—Ikomparar an Juan 6:​60, 61.

 3. Ano an puedeng mangyari maski sa fiel na mga lingkod ni Jehova, asin taano?

³ Maski an tunay na mga lingkod ni Jehova nakaeeksperyensia kan pagigin totoo kan Eclesiastes 9:​11: “Nagbalik ako tanganing maheling sa sirong nin aldaw na mayo sa mabagsik an paorumbasan, ni sa makokosog an ralaban, ni sa madonong man an kakanon, ni sa mga may pakasabot man an kayamanan, ni duman man sa mga may kaaraman an biyaya; huli ta an panahon asin pagkanorongod nangyayari sa sainda gabos.” Paano ini puedeng magin totoo sa ekstendido, o espirituwal, na sentido? Tibaad may midbid kitang mga Kristiano na marikas sa pag-aplikar kan hatol sa Biblia, makosog sa pagdepensa kan katotoohan, madonong sa pag-aplikar kan mga prinsipyo sa Biblia, asin maigot sa paghanap kan tamang kaaraman. Pero, huli sa “panahon asin pagkanorongod,” tibaad iniisip ngonyan nin nagkapira na sinda limitado bilang resulta nin sarong aksidente o paggurang. Tibaad iniisip-isip ninda kun baga sinda makalalaog sa bagong kinaban nin Dios na dai na maagi nin kagadanan.

4, 5. Taano an mga Kristiano ta mayo nin ano man na rason na mawaran nin kompiansa sa katanosan ni Jehova?

⁴ Kun an sarong Kristiano magadanan nin agom, grabe an kolog asin pakamate nin kawaran. Tibaad dakol na taon o dekada pa ngani na magkaibanan sindang naglingkod ki Jehova bilang mag-agom. Aram kan nabayaan na agom na pinuputol nin kagadanan an bogkos nin pag-agom.a (1 Corinto 7:39) Ngonyan, tanganing dai manluya an saiyang kompiansa, dapat na kontrolon nia an saiyang mga emosyon.​—Ikomparar an Marcos 16:8.

⁵ Madonong nanggad na mansayon an pagkagadan nin agom, magurang, aki, o dayupot na Kristianong katood bilang oportunidad na ipaheling an kompiansa sa katanosan ni Jehova! Dawa sa ibong nin personal na kawaran, makakokompiar kita na si Jehova bakong daing katanosan. Makakokompiar kita na an gabos na magkakamit nin buhay na daing katapusan​—baga man paagi sa pakaligtas o paagi sa pagkabuhay liwat—​magigin maogma. Dapit sa Dios, an salmista nagsasabi: “Binibiklad mo an saimong kamot asin pinaninigoan an mawot nin lambang bagay na may buhay. Si Jehova matanos sa gabos niang dalan asin maimbod sa gabos niang gibo. Si Jehova harani sa gabos na nag-aarang sa saiya, sa gabos na nag-aapod sa saiya sa katotoohan. Ootobon nia an mawot kan mga natatakot sa saiya, asin dadangogon nia an agrangay ninda na tabangan, asin sinda saiyang ililigtas.”​—Salmo 145:​16-19.

Mga Pakamate nin Dai Kinakaipuhan na Pag-agi nin Sakit

6, 7. (a) Taano ta tibaad laen na ngonyan an pakasabot nin nagkapirang Saksi na nag-agi nin sakit kan nakaagi? (b) Taano ta dai niato maninigong mansayon na si Jehova bakong matanos huli sa pagtogot sa siring na sakit kan nakaagi?

⁶ Kan nakaagi, an nagkapirang Saksi nag-agi nin sakit huli sa pagsayumang makikabtang sa sarong aktibidad na tibaad tinotogotan na ngonyan kan saindang konsensia. Halimbawa, tibaad ini pagpili ninda kaidtong dakol na taon na an nakaagi manongod sa nagkapirang klase nin serbisyo sibilyan. Tibaad isipon ngonyan nin sarong tugang na puede na niang gibohon sono sa konsensia an siring na dai linalapas an saiyang Kristianong neutralidad mapadapit sa presenteng palakaw nin mga bagay.

⁷ Nagin bakong makatanosan daw si Jehova sa pagtogot sa saiya na umagi nin sakit huli sa pagsayuma sa tibaad puede na niang gibohon ngonyan na mayo nin magigin mga epekto? Bakong arog kaiyan an iisipon kan kadaklan na nakaeksperyensia kaiyan. Imbes, sinda naggagayagaya na nagkaoportunidad sinda na ipaheling nin hayag asin malinaw na sinda determinadong magin marigon sa isyu nin unibersal na soberaniya. (Ikomparar an Job 27:5.) Ano an puedeng magin rason nin siisay man na pagbasolan an pagsunod sa saiyang konsensia sa paninindogan nin marigon apabor ki Jehova? Paagi sa maimbod na pagsuportar sa Kristianong mga prinsipyo siring sa pagkasabot ninda kaiyan o paagi sa paghimate sa mga pagtudok kan konsensia, sinda napatunayan na angay sa pakipagkatood ni Jehova. Sierto nanggad, madonong na likayan an sarong gawe na makapupurisaw sa konsensia nin saro o posibleng makapasingkog sa iba. Maiisip niato sa bagay na ini an halimbawa na itinao ni apostol Pablo.​—1 Corinto 8:​12, 13; 10:​31-​33.

 8. Taano an mga Kristianong Judio, na dati nagsusunod sa Ley, ta mayo nin rason na kustionon an katanosan ni Jehova?

⁸ Tanganing mapaogma si Jehova, hinagad sa mga Judio na kuyogon an Sampulong Togon asin siring man an laen-laen na mga 600 pang ley. Kan huri, sa irarom kan Kristianong areglo, an pagkuyog sa mga ley na ini bilang siring bako nang kahagadan para sa paglilingkod ki Jehova, ni maski sa mga Judio sa laman. Kaiba sa mga ley na bako nang obligatoryo idtong mga may koneksion sa pagturi, pag-otob sa Sabbath, pagdolot nin mga atang na hayop, asin pagsunod sa nagkapirang pangangalad sa pagkakan. (1 Corinto 7:​19; 10:25; Colosas 2:​16, 17; Hebreo 10:​1, 11-​14) An mga Judio​—kabale an mga apostol—​na nagin mga Kristiano nakabutas na sa obligasyon na otobon an mga ley na ipinapakuyog sa sainda kan sinda sakop pa kan tipan nin Ley. Nagreklamo daw sinda na an areglo nin Dios bakong matanos sa pag-obligar sa sainda kaidto kan mga bagay na dai na kaipuhan? Dai, sinda naggayagaya sa pinahiwas na pakasabot sa mga katuyohan ni Jehova.​—Gibo 16:​4, 5.

 9. Ano an totoo dapit sa nagkapirang Saksi, alagad taano ta mayo sinda nin dahelan na magbasol?

⁹ Sa presenteng mga panahon, may mga Saksi na nagin estriktong marhay sa saindang punto de vista dapit sa gusto o habo nindang gibohon. Sa rason na iyan mas nag-agi sinda nin sakit kisa sa iba. Kan huri, an nadugangan na pakasabot nakatabang sa sainda na pahiwason an saindang punto de vista sa mga bagay. Alagad mayo sinda nin rason na pagbasolan an iginawe ninda kan enot kaoyon sa saindang konsensia, dawa kun ini posibleng nagbunga nin dagdag na sakit. Totoong kaomaw-omaw na ipinaheling ninda an saindang pagigin andam na mag-agi nin sakit huli sa pagigin fiel ki Jehova, na ‘gibohon an gabos na bagay para sa kapakanan kan maogmang bareta.’ Binebendisyonan ni Jehova an siring kaiyan na klase nin diosnon na debosyon. (1 Corinto 9:23; Hebreo 6:​10) Si apostol Pedro nagsurat na may pakarorop: “Kun, mantang kamo naggigibo nin marahay kamo nagtitios, tinatagalan nindo iyan, ini nakakapaogma sa Dios.”​—1 Pedro 2:20.

Pakanood ki Jonas

10, 11. Paano si Jonas nagpaheling nin kadaihan nin kompiansa ki Jehova (a) kan sia asignaran na dumuman sa Ninive? (b) kan dai laglagon nin Dios an mga taga Ninive?

¹⁰ Kan pagbotan na magduman sa Ninive, si Jonas nagpaheling nin kadaihan nin pag-apresyar sa kompiansa sa saiya ni Jehova. Pakatapos nin makatatakot na eksperyensia bunga kan saiya mismong pagduwaduwang kumuyog, nakapag-isip-isip si Jonas, narealisar an saiyang sala, inako an asignasyon sa saiya sa ibang lugar, asin pinatanidan an mga taga Ninive dapit sa nagdadangadang na kalaglagan. Dangan nangyari an dai linalaoman: Huli sa pagsolsol kan mga taga Ninive, si Jehova nagdesisyon na dai na sinda laglagon.​—Jonas 1:​1–​3:10.

¹¹ An reaksion ni Jonas? Maraot an boot, nagreklamo sia sa Dios sa pamibi. Ini an laog kan saiyang reklamo: ‘An paghona ko arog kaini an mangyayari. Kaya habo kong magduman sa Ninive kan primero. Ngonyan, pakatapos kan gabos na inagihan ko, kabale an grabeng takot asin kasopganan na halonon nin dakulang sira, asin pakatapos kan masakit na pagpatanid ko sa mga taga Ninive dapit kan madali nang kalaglagan, iyo ini! Daing halaga an gabos kong ginibo asin tinios! Marahay pang nagadan na ako!’​—Jonas 4:​1-3.

12. Ano an manonodan ta sa eksperyensia ni Jonas?

¹² Igwa daw nin balidong rason si Jonas sa pagreklamo? Si Jehova daw bakong matanos sa pagpaheling nin pagkaherak sa nagsosolsol na mga parakasala? An totoo, maninigong naggayagaya kutana si Jonas; manampulong ribo katawo an dai na gagadanon! (Jonas 4:​11) Alagad an saiyang daing galang, mareklamong kaisipan nagpaheling na sia dai nagpapahayag nin hararom na kompiansa sa katanosan ni Jehova. An saiyang sadiri sana an inisip nia asin bakong an iba. Makanood kita ki Jonas paagi sa pagpadanay kan satong sadiri asin kan satong personal na mga saboot na segunda sana. Magin kombensido kita na an pagkuyog ki Jehova, pagsunod sa mga instruksion na itinatao paagi sa saiyang organisasyon asin pag-ako sa saiyang mga desisyon, iyo an tamang gibohon. Kombensido kita na “marahay an mangyayari sa mga natatakot sa tunay na Dios.”​—Eclesiastes 8:12.

Ngonyan Na an Panahon na Pakosogon an Satong Kompiansa!

13. Paano niato gabos mapakokosog an satong kompiansa ki Jehova?

¹³ n pagpakosog kan satong kompiansa ki Jehova iyo an madonong na gibohon. (Talinhaga 3:​5-8) Siempre, an dapat niatong gibohon bako sanang pagpamibi na logod tabangan kita ni Jehova na magin orog na kompiado. An kompiansa nagtatalubo basado sa tamang kaaraman, kaya dapat na gibohon niato an personal na pag-adal sa Biblia, na binabasa pareho an Biblia asin mga literatura na nagpapaliwanag kan Biblia, na kabtang kan satong pan-aroaldaw na rutina. Mahalagang marhay an regular na pag-atender sa Kristianong mga pagtiripon, siring man an marahay na pag-andam asin pakikikabtang sagkod sa mahihimo. An paggibong ugale na ihiras sa iba an mga katotoohan sa Biblia, na mataktikang pinapangganahan an mga pagkontra, nagpapararom man kan satong kompiansa ki Jehova asin sa saiyang Tataramon. Sa siring kita nagigin orog na harani sa saiya sa aroaldaw.

14. Taano an banwaan nin Dios ta hahagadan sa dai na mahahaloy na ipaheling an saindang kompiansa ki Jehova nin orog kisa kasuarin pa man?

¹⁴ Sa harani nang ngapit, biglang mapoon an pinakadakulang panahon nin kahorasaan na dai pang kaagid na mangyayari sa rasa nin tawo. (Mateo 24:21) Kun mangyari iyan, orog kisa kasuarin pa man na an mga lingkod nin Dios magkakaipong magpaheling nin kompiansa sa katanosan ni Jehova asin sa paggiya na itinatao kan saiyang organisasyon. Sa simbolikong paagi, sa panahon na iyan kukuyogon ninda na may kompiansa an pagboot nin Dios: “Lakaw, banwaan ko, lumaog ka sa panlaog mong mga kuarto, asin pintoan mo an mga tata sa likod mo. Magtago ka nin kadikit sanang panahon sagkod na makalihis an kabangisan.” (Isaias 26:20) Nagralaog na sinda sa nagpoprotehir na kamugtakan kan labing 85,000 na kongregasyon sa 232 na kadagaan. Ano man an tibaad iiba pa sa pagboot na “lumaog ka sa panlaog mong mga kuarto,” makakokompiar kita na tatabangan kita ni Jehova na gibohon iyan.

15. Paano idinoon an kompiansa durante kan 1998, asin taano ta tama nanggad iyan?

¹⁵ Kaipuhan na pakosogon niato an satong kompiansa ngonyan. Kun mayo an kompiansa sa satong Kristianong mga tugang, sa organisasyon ni Jehova asin, orog sa gabos, ki Jehova mismo, magigin imposible an pakaligtas. Kaya angay nanggad na durante kan 1998, an Mga Saksi ni Jehova sa bilog na kinaban paorootrong pinagigirumdom, paagi sa mga tataramon kan saindang teksto kan taon, na “an gabos na nag-aapod sa ngaran ni Jehova maliligtas”! (Roma 10:13) Dapat kitang padagos na magin kompiado dian. Kun marisa niato an dawa saditon na pagduwaduwa sa kompiansang ini, maninigo kitang maghingoa na itanos iyan ngonyan, iyo, ngonyan.

An Paghokom ni Jehova Magigin Matanos

16. Ano an puedeng mangyari sa kompiansa kun iyan dai pinatatalubo, asin paano niato malilikayan na mangyari ini?

¹⁶ Sa Hebreo 3:​14, an linahidan na mga Kristiano pinatatanidan: “Kita nagigin sanang kadamay kan Cristo kun pangaptan niato nin masarig an kompiansa na nasa sato sa kapinonan na marigon sagkod sa katapusan.” Sa pundamental, an mga tataramon na ini aplikado man sa mga Kristiano na igwa nin daganon na paglaom. An enot na kompiansa puedeng luway-luway na maraot kun iyan dai pinatatalubo. Mahalagang marhay nanggad na kita magpadagos sa paghanap kan tamang kaaraman, na paagi kaiyan pinakokosog niato an pundasyon na napasisikadan kan satong kompiansa!

17. Taano ta makakokompiar kita na kun dapit sa kaligtasan, tama an magigin paghokom ni Jesus?

¹⁷ An gabos na nasyon madali nang siyasaton ni Cristo tanganing ‘mapagbulagbulag nia an mga tawo, kun paanong ibinubulag nin pastor an mga karnero sa mga kanding.’ (Mateo 25:​31-33) Makakokompiar kita na si Cristo magigin matanos sa paghokom kun siisay an angay sa kaligtasan. Tinawan sia ni Jehova kan kadonongan, pakarorop, asin iba pang kinakaipuhan na mga kualidad tanganing “hokoman an ineerokan na daga sa katanosan.” (Gibo 17:​30, 31) An satong kombiksion magin logod kapareho kan ki Abraham, na nagsabi: “Dai ko man lamang pinaghona dapit sa saimo [Jehova] na ika naghihiro sa paaging ini na gadanon an matanos na tawo kaiba kan maraot tanganing an mangyayari sa matanos na tawo kapareho kan nangyayari sa maraot! Iyan dai ko man lamang pinaghona dapit sa saimo. Dai daw magibo kan tama an Hokom sa bilog na daga?”​—Genesis 18:25.

18. Taano ta maninigong dai kita mahadit nin labi-labi manongod sa tibaad dai niato aram sa presente?

¹⁸ May lubos na kompiansa sa katanosan ni Jehova, dai kita kaipuhan na mahadit manongod sa paghanap nin simbag sa mga hapot na arog kan: ‘Paano hohokoman an mga omboy asin saradit na aki? Posible daw na kadakol na tawo an dai pa napapaabotan kan maogmang bareta pagdatong kan Armagedon? Paano man an mga may diperensia sa isip? Paano man an . . . ?’ Totoo, sa presente tibaad dai niato aram kun paano reresolberan ni Jehova an mga isyung ini. Minsan siring, gigibohon nia iyan sa matanos asin maheherakon na paagi. Maninigo na nungkang pagdudahan niato iyan. Sa katunayan, tibaad mapangalas asin maogma kita na masdan siang rineresolberan iyan sa paagi na nungka ngani niatong inisip.​—Ikomparar an Job 42:3; Salmo 78:​11-​16; 136:​4-9; Mateo 15:31; Lucas 2:​47.

19, 20. (a) Taano ta bakong sala an rasonableng mga hapot? (b) Noarin itatao ni Jehova an kinakaipuhan na mga simbag?

¹⁹ Dai dinedesganar kan organisasyon ni Jehova an sinsero, napapanahon na mga hapot, siring kan salang hinihingako nin mga paratumang. (1 Pedro 1:​10-​12) Minsan siring, may hatol an Biblia na likayan ta an mangmang, mapagbanabanang mga hapot. (Tito 3:9) An rasonableng mga hapot asin pagsiyasat sa Tataramon nin Dios saka sa Kristianong mga publikasyon tanganing makua an Makakasuratan na simbag makadudugang sa satong tamang kaaraman asin sa siring makapakokosog sa satong kompiansa ki Jehova. Sinusunod kan organisasyon an halimbawa ni Jesus. Dai nia kinokomentohan an mga hapot na para dian dai pa nag-abot an tamang panahon sa pagsimbag. Sia nagpaliwanag: “Igwa pa ako nin dakol na isasabi saindo, alagad ta dai pa nindo iyan kaya ngonyan.” (Juan 16:12) Inadmitir man nia na may mga bagay na sia mismo dai nakakaaram kan panahon na idto.​—Mateo 24:36.

²⁰ Dakol pang ihahayag si Jehova. Madonong nanggad na maghalat sa saiya, na kompiado na an pagigin nasa panahon kan paghayag nia kan saiyang mga katuyohan magigin tama tanganing ikatao an mga pangangaipo sa panahon na iyan. Makakokompiar kita na oras na dumatong an itinalaan na panahon ni Jehova, maggagayagaya kita sa pagkamit nin dugang pang pakarorop sa saiyang mga dalan. Iyo, babalosan kita, basta absoluto an satuyang pagkompiar ki Jehova asin sa organisasyon na saiyang ginagamit. Sinisierto sa sato kan Talinhaga 14:26: “Sa pagkatakot ki Jehova yaon an makosog na kompiansa, asin para sa saiyang mga aki magkakaigwa nin pailihan.”

[Nota sa Ibaba]

Ano an Paghona Nindo?

◻ Taano ta bakong madonong na togotan an mga emosyon na paluyahon an satong kompiansa ki Jehova?

◻ Ano an manonodan niato sa eksperyensia ni Jonas?

◻ Taano ta mahalagang marhay an pag-adal sa Biblia asin pag-atender sa mga pagtiripon?

[Retrato sa pahina 16]

Dawa napapaatubang sa personal na kawaran, makakokompiar kita na si Jehova matanos

[Mga retrato sa pahina 18]

Segurado daw kamo na an saindong kompiansa yaon ki Jehova?