Talaga daw na Posible an Buhay na Daing Katapusan?

“Paratokdo, anong karahayan an dapat kong gibohon tanganing magkamit nin buhay na daing katapusan?”—MATEO 19:16.

 1. Ano an masasabi manongod sa lawig kan buhay nin tawo?

SI Hadeng Jerjes I nin Persia, na midbid sa Biblia bilang Assuero, iniinspeksion an saiyang mga tropa bago makipaglaban kan taon 480 B.C.E. (Ester 1:1, 2) Segun sa Griegong historyador na si Herodoto, napaluha an hade mantang minamasdan nia an saiyang mga tawohan. Taano? “Namomondo ako,” an sabi ni Jerjes, “kun hinohorophorop ko an halipot na buhay nin tawo. Huli ta sa gabos na tawong ini, mayo ni saro an buhay pa sanggatos na taon poon ngonyan.” Posibleng narisa man nindo na an buhay makaheherak an kalipotan asin na mayo nin siisay man na gustong gumurang, maghelang, asin magadan. Ay, kun puede pa sana kutana kitang mabuhay na may salud asin kaogmahan nin pagkahoben!—Job 14:1, 2.

 2. Ano an linalaoman nin dakol, asin taano?

² Makahulogan nanggad, itinampok kan The New York Times Magazine na Setyembre 28, 1997, an artikulong “Gusto Nindang Mabuhay.” Kinotar kaiyan an sarong parasiyasat na nagkagsing: “Talagang naniniwala ako na kita puedeng magin an enot na henerasyon na nabubuhay sagkod lamang”! Tibaad kamo man naniniwala na posible an buhay na daing katapusan. Tibaad iyan an paniwala nindo huli ta an Biblia nanunuga na kita puedeng mabuhay sagkod lamang digdi sa daga. (Salmo 37:29; Kapahayagan 21:3, 4) Pero, may mga tawong naniniwala na an buhay na daing katapusan posible apuera sa mga dahelan na yaon sa Biblia. An pag-estudyar sa duwa kan mga dahelan na ini matabang sa sato na masabotan na an buhay na daing katapusan talagang posible.

Dinisenyo na Mabuhay Sagkod Lamang

3, 4. (a) Taano ta naniniwala an nagkapira na kita mabubuhay sagkod lamang? (b) Ano an sinabi ni David manongod sa pagkahaman sa saiya?

³ An sarong dahelan na dakol an naniniwala na an mga tawo mabubuhay sagkod lamang igwa nin koneksion sa makangangalas na paagi nin pagkagibo sa sato. Halimbawa, totoong milagroso kun paano kita pinorma sa laog kan matris kan satong ina. An sarong bantog na eksperto manongod sa paggurang nagsurat: “Pakatapos na gibohon an mga milagro na nagdara sa sato hale sa pangingidam pasiring sa pagkamundag dangan sa seksuwal na pagtalubo asin pagkaadulto, dai pinagmarhay kan naturalesa na magdisenyo nin garo baga mas simpleng proseso tanganing papagdanayon na sana sagkod lamang an mga milagrong iyan.” Iyo, kun hohorophoropon an milagrosong pagkagibo sa sato, yaon pa man giraray an hapot, Taano ta kaipuhan kitang magadan?

⁴ Kaidtong kadakol nang taon an nakaagi inestudyaran kan kagsurat sa Biblia na si David an mga milagro mismong iyan, maski ngani dai nia aktuwal na naheheling an laog kan matris na ngonyan naheheling na kan mga sientista. Inisip-isip ni David an manongod sa pagkahaman mismo sa saiya kan, siring kan isinurat nia, sia ‘itinago sa tulak kan saiyang ina.’ Kan panahon na idto, sabi nia, ‘an saiyang mga bato hinaman.’ Isinaysay man nia an manongod sa paghaman sa saiyang “mga tolang” kan, siring kan sabi nia, ‘ginibo ako sa hilom.’ Dangan nanabihan ni David an “sakuyang embrion” asin nagtaram sia may koneksion sa embrion na iyan sa laog kan matris kan saiyang ina: “Nasusurat . . . an gabos na kabtang kaiyan.”—Salmo 139:13-16.

 5. Anong mga milagro an kalabot sa pagkahaman niato sa laog nin matris?

⁵ Malinaw nanggad, mayo nin literal na nasusurat na plano para sa pagkahaman ki David sa laog kan matris kan saiyang ina. Alagad sa paghorophorop ni David dapit sa pagkagibo sa saiyang “mga bato,” saiyang “mga tolang,” asin sa iba pang kabtang kan saiyang hawak, para sa saiya an pagkahaman kan mga ini garo baga sono sa plano—na an gabos, sabi ngani, “nasusurat.” Garo baga na an pertilisadong selula sa laog kan saiyang ina igwa nin dakulang kuarto na pano nin mga libro na may detalyadong mga instruksion sa kun paano popormahon an omboy na tawo asin an komplikadong mga instruksion na ini ipinasa sa kada nahahaman na selula. Sa siring, ginagamit kan magasin na Science World an metapora nin ‘kada selula sa sarong nagdadakulang embrion na igwa nin kompletong kabinet nin mga plano.’

 6. Ano an ebidensia na, siring kan isinurat ni David, “makangangalas an pagkagibo” sa sato?

⁶ Naisip na lamang daw nindo an manongod sa milagrosong pagpunsionar kan satong hawak? An biologong si Jared Diamond nagsabi: “Sinasalidahan ta an pinakahapin kan satong bituka makasaro kada nagkapirang aldaw, an mga pinakahapin sa butog makasaro kada duwang bulan, asin an satong mga selula nin pulang dugo makasaro kada apat na bulan.” Sia nagkonklusyon: “Pinagsusuruhaysuhay kita kan naturalesa asin ibinabalik aroaldaw.” Ano man nanggad an boot sabihon kaiyan? Iyan nangangahulogan na maski pirang taon na kitang nabuhay—baga man 8, 80, o maski 800—an satong pisikal na hawak nagdadanay na hoben na marhay. An sarong sientista sarong beses nagkalkulo: “Pakalihis nin sarong taon an mga 98 porsiento kan mga atomo na yaon sa sato ngonyan sasalidahan nin ibang mga atomo na ilinalaog niato hale sa satong doros, kakanon, asin inomon.” Tunay nanggad, siring kan irinukyaw ni David, “makangangalas an pagkagibo” sa sato.—Salmo 139:14.

 7. Basado sa disenyo kan satong pisikal na hawak, ano an ikinonklusyon nin nagkapira?

⁷ Basado sa disenyo kan satong pisikal na hawak, an sarong eksperto manongod sa paggurang nagsabi: “Bakong malinaw kun taano ta nangyayari an paggurang.” Talagang garo baga kita puedeng mabuhay sagkod lamang. Asin ini an dahelan kun taano ta pinagmamaigotan nin mga tawo na aboton an pasohan na ini paagi sa saindang teknolohiya. Dai pang gayo nahahaloy, si Dr. Alvin Silverstein kompiadong nagsurat sa saiyang librong Conquest of Death: “Madidiskobre niato an kahulogan nin buhay. Masasabotan niato . . . kun paano naggugurang an tawo.” Na may anong mga resulta? Sia patienot na nagsabi: “Mayo nang mga tawong ‘gurang,’ huli ta an kaaraman na mapangyari sa pagkadaog kan kagadanan matao man nin daing sagkod na pagkahoben.” Kun iisipon an presenteng panahon na sientipikong pagsiyasat sa pagkahaman nin tawo, garo daw harayong marhay na mangyari an ideya nin buhay na daing katapusan? Igwa nin saro pa na mas makosog pa nganing dahelan na maniwala na posible an buhay na daing katapusan.

An Pagmawot na Mabuhay Sagkod Lamang

8, 9. Ano an nagin natural na kamawotan nin mga tawo sa bilog na kasaysayan?

⁸ Narisa na daw nindo na an mabuhay sagkod lamang sarong natural na pagmawot nin tawo? An sarong doktor nagsurat sa sarong peryodiko sa Alemania: “An pangatorogan na buhay na daing katapusan kagubay gayod nin katawohan.” Sa pagladawan kan mga paniniwala nin nagkapirang suanoy na Europeo, an The New Encyclopædia Britannica nagsasabi: “An mahalagang mga tawo mabubuhay sagkod lamang sa sarong makinang na tiriponan na may dekorasyon na bulawan.” Asin kanigoan na medyos na an ginibo kan mga tawo sa paghihingoang panigoan an pundamental na pagmawot na iyan na mabuhay na daing katapusan!

⁹ An The Encyclopedia Americana nagsasabi na sa Tsina kaidtong labing 2,000 na taon na an nakaagi, “an mga emperador asin pati an [komun] na mga tawo, sa pangengenot kan mga pading Taoista, tinalikdan an mga trabaho tanganing hanapon an pampalawig nin buhay”—an soboot burabod nin pagkahoben. Tunay nanggad, sa bilog na kasaysayan, an mga tawo naniwala na paagi sa pagtumar nin laen-laen na tinimpla, o paagi pa ngani sa pag-inom nin sarong klase nin tubig, sinda puedeng magdanay na hoben.

10. Anong mga pagprobar sa presenteng panahon an ginibo tanganing mapalawig an buhay?

¹⁰ Pambihira man an mga paghihingoa sa presenteng panahon na probaran na panigoan an natural nang pagmawot nin tawo na mabuhay na daing katapusan. An sarong lataw na halimbawa iyo an pagpreserbar sa yelo sa sarong tawo na nagagadan huli sa helang. Ginibo ini sa paglaom na ikabalik an buhay pag-abot nin panahon sa ngapit kun madiskobre na an bolong para sa helang na iyan. An sarong nagproponer kaini, na inaapod na cryonics, nagsurat: “Kun mapatunayan an samong optimismo asin manodan kun paano bobolongon o hihirahayon an gabos na danyos—kabale an mga kaluyahan nin paggurang—kun siring an mga ‘nagagadan’ ngonyan magkakaigwa nin daing sagkod na lawig nin buhay sa ngapit.”

11. Taano ta mawot kan mga tawo na mabuhay sagkod lamang?

¹¹ Tibaad ihapot nindo, Taano ta nakatanom na marhay sa satong kaisipan an pagmawot na ini na mabuhay na daing katapusan? Huli daw ta “[an Dios] ibinugtak sa isip nin tawo an panahon na daing sagkod”? (Eclesiastes 3:11, Revised Standard Version) Dapat ining tawan nin seryosong paghorophorop! Isip-isipa na sana: Taano ta magkakaigwa kita nin natural nang pagmawot na mabuhay na daing sagkod—sagkod lamang—kun bakong katuyohan kan satong Kaglalang na panigoan an pagmawot na ini? Asin mamomoton daw para sa saiya na lalangon kitang igwa kan pagmawot na mabuhay na daing katapusan dangan desganaron kita paagi sa nungkang pagtogot sa sato na makamit an pagmawot na iyan?—Salmo 145:16.

Siisay an Maninigo Niatong Pagtiwalaan?

12. Anong kompiansa an yaon sa nagkapira, alagad naniniwala daw kamo na iyan may masarig na basehan?

¹² Saen, o sa ano, kita maninigong magtiwala sa pagkamit kan buhay na daing katapusan? Sa ika-20 o ika-21 siglong teknolohiya nin tawo? An artikulo sa The New York Times Magazine na “Gusto Nindang Mabuhay” nanabihan an “dios: teknolohiya” asin an “entusiasmo manongod sa potensial nin teknolohiya.” An sarong parasiyasat sinabi pa ngani na “maogmang nagkokompiar . . . na sa igong panahon makokontrol na an mga gene tanganing iligtas [kita] paagi sa pagpapondo sa paggurang, tibaad baliktadon iyan.” Pero an totoo an mga paghihingoa nin tawo napatunayan na biyong dai nag-aaser sa pagpapondo sa paggurang o sa pagdaog sa kagadanan.

13. Paano ipinaheheling kan estruktura kan satong hotok na kita intension na mabuhay sagkod lamang?

¹³ Nangangahulogan daw ini na mayo nin paagi na makamtan an buhay na daing katapusan? Dai man! Igwang paagi! An estruktura kan satong hotok, kaiba an haros daing limitasyon na kapasidad kaiyan sa pakanood, maninigong makakombensir sa sato kaini. An biologo sa molekula na si James Watson inapod an satong hotok na “an pinakakomplikadong bagay na dai pa niato nadidiskobre sa satong uniberso.” Asin an neurologo na si Richard Restak nagsabi: “Saen man na lugar sa aram na uniberso mayo nin ano man na nakakaagid man lamang nin kadikit dian.” Taano ta igwa pa kita nin hotok na may kapasidad na magsaray asin magsabot nin haros daing limitasyon na impormasyon asin hawak na dinisenyong magpunsionar sagkod lamang kun bakong intension na kita mabuhay na daing katapusan?

14. (a) Anong konklusyon manongod sa buhay nin tawo an itinotokdo kan mga kagsurat sa Biblia? (b) Taano ta maninigo kitang magtiwala sa Dios asin bakong sa tawo?

¹⁴ Kun siring, ano an dapat na magin solamenteng rasonable, totoong konklusyon niato? Bako daw na kita dinisenyo asin linalang nin sarong makapangyarihan sa gabos, intelihenteng Kaggibo tanganing kita mabuhay sagkod lamang? (Job 10:8; Salmo 36:9; 100:3; Malaquias 2:10; Gibo 17:24, 25) Kun siring, dai daw niato maninigong himateon na may kadonongan an ipinasabong na pagboot kan salmista sa Biblia: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan”? Taano ta dai dapat magtiwala sa tawo? Huli ta, siring sa isinurat kan salmista, “an saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.” Tunay nanggad, sa ibong kan potensial na mabuhay sagkod lamang, an mga tawo daing maginibo kun napapaatubang sa kagadanan. An salmista nagkonklusyon: “Maogma idtong . . . an paglaom yaon ki Jehova na saiyang Dios.”—Salmo 146:3-5.

Talaga daw na Iyan an Katuyohan nin Dios?

15. Ano an nagpapaheling na katuyohan nin Dios na kita mabuhay sagkod lamang?

¹⁵ Alagad tibaad ihapot nindo, Talaga daw na katuyohan ni Jehova na kita mabuhay na daing katapusan? Iyo nanggad! Kadakol na beses na iyan ipinanunuga kan saiyang Tataramon. “An regalo na itinatao nin Dios buhay na daing katapusan,” an sinisierto sa sato kan Biblia. An lingkod nin Dios na si Juan nagsurat: “Iyo ini an panuga na ipinanuga [nin Dios] mismo sa sato, an buhay na daing katapusan.” Bakong makangangalas na an sarong hoben na lalaki naghapot ki Jesus: “Paratokdo, anong karahayan an dapat kong gibohon tanganing magkamit nin buhay na daing katapusan?” (Roma 6:23; 1 Juan 2:25; Mateo 19:16) Sa katunayan, si apostol Pablo nagsurat manongod sa “paglaom sa buhay na daing katapusan na ipinanuga nin Dios, na dai makakapagputik, bago an mga panahon na daing sagkod.”—Tito 1:2.

16. Sa ano daw na sentido na nanuga an Dios nin buhay na daing katapusan “bago an mga panahon na daing sagkod”?

¹⁶ Ano an boot sabihon na an Dios nanuga nin buhay na daing katapusan “bago an mga panahon na daing sagkod”? May mga naghohona na an boot sabihon ni apostol Pablo iyo na bago linalang an enot na mag-agom, si Adan asin Eva, katuyohan na nin Dios na an mga tawo mabuhay sagkod lamang. Minsan siring, kun an boot sabihon ni Pablo iyo an panahon pakatapos na lalangon an mga tawo asin kan ikapahayag ni Jehova an saiyang katuyohan, malinaw pa man giraray na kabale sa kabotan nin Dios an buhay na daing katapusan para sa mga tawo.

17. Taano si Adan saka si Eva ta ilinuwas sa tatamnan nin Eden, asin taano ta nagbugtak nin mga kerubin sa agihan palaog?

¹⁷ An Biblia nagsasabi na sa tatamnan nin Eden, “pinatubo ni Jehova Dios hale sa daga . . . an kahoy nin buhay.” An dahelan kaya ilinuwas si Adan sa tatamnan iyo na tanganing dai nia “ikaunat an saiyang kamot asin magkua man nanggad nin bunga sa kahoy nin buhay asin magkakan patin mabuhay”—iyo, sagkod lamang! Pakatapos na pahaleon si Adan asin Eva sa tatamnan nin Eden, ibinugtak ni Jehova “an mga kerubin asin an naglalaad na espada na naglalabadlabad tanganing bantayan an dalan pasiring sa kahoy nin buhay.”—Genesis 2:9; 3:22-24.

18. (a) Ano kutana an nagin kahulogan ki Adan asin Eva kan pagkakan sa kahoy nin buhay? (b) Ano an irinepresentar kan pagkakan sa kahoy na idto?

¹⁸ Kun si Adan saka si Eva tinogotan na kumakan sa kahoy na idto nin buhay, ano kutana an nagin kahulogan kaidto sa sainda? Tara, an pribilehio na mabuhay sagkod lamang sa Paraiso! An sarong intelektuwal sa Biblia nagtaong ispekulasyon: “An kahoy nin buhay siertong igwa nin birtud na paagi kaiyan an hawak nin tawo papagdadanayon na dai manluluya huli sa paggurang, o malalapa na natatapos sa kagadanan.” Hiningako pa ngani nia na “igwa nin birtud na hale sa tinanom sa paraiso na may kakayahan na labanan an mga epekto” nin paggurang. Minsan siring, dai sinasabi kan Biblia na an kahoy nin buhay mismo igwa nin mga kualidad na nagtataong-buhay. Imbes, an kahoy na iyan nagrepresentar sana sa garantiya nin Dios na buhay na daing katapusan sa saro na totogotan na kumakan kan bunga kaiyan.—Kapahayagan 2:7.

Dai Naliwat an Katuyohan nin Dios

19. Taano si Adan ta nagadan, asin taano kita, na saiyang mga gikan, ta nagagadan man?

¹⁹ Kan magkasala si Adan, nawara nia an diretso na mabuhay na daing katapusan para sa saiyang sadiri asin para sa gabos niang dai pa namumundag na gikan. (Genesis 2:17) Kan sia magin parakasala huli sa saiyang kasumbikalan, sia nagkaigwang depekto, bakong sangkap. Poon kan panahon na idto, an hawak ni Adan garo man sana iprinograma na magadan. Siring sa sinasabi kan Biblia, “an ibinabayad nin kasalan kagadanan.” (Roma 6:23) Dugang pa, an bakong sangkap na mga gikan ni Adan iprinograma man na magadan, bakong mabuhay na daing katapusan. An Biblia nagpapaliwanag: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Roma 5:12.

20. Ano an nagpapaheling na an mga tawo katuyohan na mabuhay sagkod lamang digdi sa daga?

²⁰ Alagad ano kun dai nagkasala si Adan? Ano kun dai sia nakisuway sa Dios asin tinogotan siang magkakan sa kahoy nin buhay? Saen kutana nia kakamtan an balaog nin Dios na buhay na daing katapusan? Sa langit? Bako! Mayong sinabi an Dios manongod sa pagdara ki Adan sa langit. An iinasignar na trabaho sa saiya digdi sa daga. An Biblia nagpapaliwanag na “pinatubo ni Jehova Dios hale sa daga an lambang kahoy na magayon na paghelingon asin masiram na kakanon,” asin sinasabi kaiyan: “Kinua ni Jehova Dios an tawo asin ibinugtak sia sa tatamnan nin Eden tanganing babolon iyan asin atamanon iyan.” (Genesis 2:9, 15) Pakalalanga ki Eva bilang agom ni Adan, an duwa inasignaran nin dugang pang trabaho digdi sa daga. Sinabihan sinda nin Dios: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an mga gamgam sa kalangitan patin an lambang nabubuhay na hayop na naghihiro sa ibabaw kan daga.”—Genesis 1:28.

21. Anong makangangalas na mga paglaom an yaon sa enot na mga tawo?

²¹ Isip-isipa an makangangalas na daganon na mga paglaom na binuksan para ki Adan asin Eva kan mga instruksion na iyan hale sa Dios! Sinda mapadakula nin sangkap an salud na mga aking lalaki asin babae sa daganon na Paraiso. Mantang nagdadakula an saindang namomotan na mga aki, an mga ini makikikabtang sa sainda sa pagigin mabunga asin sa maogmang pagtrabaho sa tatamnan tanganing manteneron an Paraisong iyan. Kaiba an gabos na hayop na sakop ninda, an katawohan makokontentong marhay. Isip-isipa an kagayagayahan nin pagpahiwas kan mga pagdolonan kan tatamnan nin Eden tanganing pag-abot nin panahon an enterong daga magin paraiso! Boot daw nindong mabuhay na may sangkap na mga aki sa siring kagayon na erokan na daga, na mayo nang ano man na ikinahahadit manongod sa paggurang asin pagkagadan? Pabayae an natural na tendensia kan saindong puso na iyong sumimbag sa hapot na iyan.

22. Taano ta makaseseguro kita na dai liniwat nin Dios an saiyang katuyohan para sa daga?

²² Bueno, kun siring, kan makisuway si Adan asin Eva asin ilinuwas sa tatamnan nin Eden, liniwat daw nin Dios an saiyang katuyohan na an mga tawo mabuhay sagkod lamang sa Paraiso digdi sa daga? Dai man! Huli ta an paggibo kaiyan nin Dios magigin pag-admitir nin pagkadaog kun dapit sa saiyang kakayahan na gibohon an saiyang orihinal na katuyohan. Makaseseguro kita na ginigibo nin Dios an saiyang ipinanunuga, siring kan ipinahayag nia mismo: “Magigin siring man an sakong tataramon na magluwas sa sakong ngoso. Dai iyan mabalik sa sako na daing laog, kundi gigibohon nanggad kaiyan an sakong boot, asin iyan siertong magigin mapanggana sa sakuyang sinobolan kaiyan.”—Isaias 55:11.

23. (a) Ano an nagpapatunay giraray na katuyohan nin Dios na mabuhay sagkod lamang digdi sa daga an mga may matanos na tendensia? (b) Ano an sunod niatong pag-oolayan?

²³ Na an katuyohan nin Dios para sa daga dai naliwat lininaw sa Biblia, kun saen an Dios nanunuga: “An mga matanos mismo magmamana kan daga, asin sinda mag-eerok dian sagkod lamang.” Pati si Jesu-Cristo nagsabi sa saiyang Sermon sa Bukid na an mga mahoyo magmamana kan daga. (Salmo 37:29; Mateo 5:5) Pero, paano niato makakamtan an buhay na daing katapusan, asin ano an dapat niatong gibohon tanganing kamtan an siring na buhay? Ipaliliwanag ini sa minasunod na artikulo.

Ano an Isisimbag Nindo?

◻ Taano ta dakol an naniniwala na posible an buhay na daing katapusan?

◻ Ano an maninigong makakombensir sa sato na kita katuyohan na mabuhay sagkod lamang?

◻ Ano an orihinal na katuyohan nin Dios para sa katawohan asin sa daga?

◻ Taano ta makaseseguro kita na ootobon nin Dios an saiyang orihinal na katuyohan?