LEKSIYON 29
Ano an Nangyayari sa Sato Pag Kita Nagadan?
Nagadanan ka na daw nin mahal sa buhay? Sa mamunduon na panahon na iyan, tibaad maisip mo: ‘Ano daw an nangyayari sa sato pag kita nagadan? Mahihiling ta pa daw an mga mahal ta sa buhay na nagadan?’ Sa leksiyon na ini saka sa sunod, pag-uulayan ta an nakakarangang simbag diyan kan Bibliya.
1. Ano an nangyayari sa sato pag kita nagadan?
Ikinumparar ni Jesus an kagadanan sa nanok na pagturog. Pag nanok an turog nin sarong tawo, dai siya nag-aaram sa nangyayari sa palibot niya. Paano an kagadanan nakakaagid sa pagturog? Pag gadan na an saro, dai na siya nakakamati nin kulog. Saka dai na siya napupungaw sa mga amigo saka kapamilya niya gurano man niya kapadangat sinda. “An mga gadan dai na lamang nin naaaraman,” an sabi kan Bibliya.—Basahon an Eclesiastes 9:5.
2. Ano an pakinabang kun aram ta an katotoohan manungod sa kagadanan?
Dakul an takot sa kagadanan—pati ngani sa mga gadan! Pero makakatabang saimo an sinasabi kan Bibliya manungod sa kagadanan. Sinabi ni Jesus: “An katotoohan mapatalingkas sa saindo.” (Juan 8:32) Bakong arog kan sinasabi kan ibang mga relihiyon, dai itinutukdo kan Bibliya na may imortal na kalag an tawo na padagos na nabubuhay pagkagadan. Kaya pag nagadan an saro, dai na man siya nagsasakit. Saro pa, huling dai na man nin pakaaram an mga gadan, dai man ninda kita makukulgan. Kaya dai ta man kaipuhan na sambahon an mga gadan o gumibo nin mga bagay na makakapaugma sa sainda, saka dai ta man sinda kaipuhan ipamibi.
May mga nagsasabi na kaya nindang makaulay an mga gadan. Pero imposible iyan. Arog kan nanudan ta, “dai na lamang nin naaaraman” an mga gadan. Hinuhuna kan iba na su mga mahal sa buhay nindang nagadan an nakakaulay ninda. Pero an totoo, mga demonyo talaga idto na nagsasagin na mga nagadan na mahal sa buhay. Kaya pag aram ta an katotoohan manungod sa kagadanan, dai kita madadaya kan mga demonyo. Pinapatanidan kita ni Jehova na dai makikomunikar sa mga gadan ta aram niya na peligroso an ano man na pakikikomunikar sa mga demonyo.—Basahon an Deuteronomio 18:10-12.
ARAMON PA
Aramon pa an itinutukdo kan Bibliya manungod sa kagadanan, asin pakusugon an saimong pagtubod sa mamumuton na Diyos na dai nagpapasakit sa mga gadan.
3. An tunay na kamugtakan kan mga gadan
Sa bilog na kinaban, iba-iba an paniniwala nin mga tawo sa kun ano an nangyayari sa sato pag kita nagadan. Siyempre, dai puwedeng totoo an gabos na paniniwalang iyan.
Sa lugar nindo, ano an mga paniniwala manungod sa kamugtakan kan mga gadan?
Para mahiling an itinutukdo kan Bibliya, i-play an VIDEO.
Basahon an Eclesiastes 3:20, dangan pag-ulayan an mga hapot na ini:
Base sa bersikulong iyan, ano an nangyayari pag nagadan an sarong tawo?
Sinasabi daw kan bersikulong iyan na pag nagadan an sarong tawo, padagos na nabubuhay an saiyang kalag o espiritu?
Mababasa sa Bibliya an manungod sa pagkagadan ni Lazaro na sarong dayupot na amigo ni Jesus. Mantang binabasa an Juan 11:11-14, mangnuhon kun ano an sinabi ni Jesus manungod sa kamugtakan ni Lazaro. Dangan pag-ulayan an mga hapot na ini:
Sain ikinumparar ni Jesus an kagadanan?
Ano an itinutukdo sato kan pagkumparar na iyan kun manungod sa kamugtakan kan mga gadan?
Ano an masasabi mo sa sinasabi kan Bibliya manungod sa kamugtakan kan mga gadan?
4. Makikinabang kita kun aram ta an katotoohan manungod sa kagadanan
Pag aram ta an talagang kamugtakan kan mga gadan, dai kita matatakot sainda. Basahon an Eclesiastes 9:10, dangan pag-ulayan an hapot na ini:
Kaya daw kitang kulgan kan mga gadan?
Pag aram ta an katotoohan hali sa Bibliya, dai kita madadaya kan mga paniniwala na an mga gadan dai dapat mapaanggot o na dapat sambahon an mga gadan. Basahon an Isaias 8:19 asin Kapahayagan 4:11, dangan pag-ulayan an hapot na ini:
Sa hiling mo, ano daw an namamatian ni Jehova sa tawong nagsasamba o naghahagad nin tabang sa mga gadan?
Pag aram ta an katotoohan manungod sa kagadanan, malilikayan ta an mga tradisyon o kaugalian na dai inuuyunan ni Jehova
5. Mararanga kita kun aram ta an katotoohan manungod sa kagadanan
Napatubod an dakul na tawo na pag nagadan sinda, papasakitan sinda huli sa maraot na mga ginibo ninda. Pero nakakarangang maaraman na dai man pinapasakitan an mga gadan—maski pa marauton siyang tawo. Basahon an Roma 6:7, dangan pag-ulayan an hapot na ini:
Kun sinasabi kan Bibliya na an gadan absuwelto na sa kasalan, sa hiling mo nagsasakit pa daw siya dahil sa mga kasalan niya?
Pag mas namidbid ta pa si Jehova, mas masasabutan ta na dai niya nuarin man papasakitan an mga gadan. Basahon an Deuteronomio 32:4 asin 1 Juan 4:8, dangan pag-ulayan an mga hapot na ini:
Kun an Diyos igwa kan mga kuwalidad na sinambit sa teksto, matugot daw siya na pasakitan an mga gadan?
Para saimo, nakakaranga daw maaraman an katotoohan manungod sa kagadanan? Taano?
MAY MGA NAGSASABI: “Nakakatakot isipon kun ano an mangyayari sa sato pag nagadan kita.”
Anong nakakarangang mga teksto sa Bibliya an puwede mong sabihon?
SUMARYO
Pag nagadan an sarong tawo, tapos na an buhay niya. An mga gadan dai na nagsasakit saka dai na ninda kayang mangulog.
Rebyu
Ano an nangyayari sa sato pag kita nagadan?
Ano an pakinabang pag aram ta an katotoohan manungod sa kagadanan?
Taano ta nakakarangang maaraman an katotoohan manungod sa kagadanan?
HILINGON MAN
Hilingon kun ano talaga an kahulugan sa Bibliya kan terminong “kalag.”
Aramon kun pinapadusahan daw talaga nin Diyos an mga maraot sa impiyerno.
Dapat daw kitang matakot sa mga gadan?
Aramon kun paano naranga an sarong lalaki kan maaraman niya an katotoohan manungod sa nangyayari sa sato pag nagadan kita.