Kun Paano Kita Tinatabangan ni Jehova na Maisagibo an Satong Ministeryo

1. Ano an inaasahan ta, asin sa ano kita makakasigurado?

INAASAHAN niyato na mapapaatubang kita sa pagkontra mantang isinasagibo ta an satong paghuhulit. An pagkontrang iyan posibleng marhay na maggrabe pa sa maabot na panahon. (Dan. 11:44; 2 Tim. 3:12; Kap. 16:21) Dawa arog kaiyan, makakasigurado kita na itatao sa sato ni Jehova an tabang na kinakaipuhan ta. Taano? Pirming tinatabangan ni Jehova an saiyang mga lingkod na maisagibo an saindang mga asignasyon—gurano man iyan kasakit. Tanganing iilustrar, pag-ulayan ta an nagkapirang pangyayari sa buhay ni propeta Ezekiel, na naghulit sa mga Judiong idinistiyero sa Babilonya.

2. Paano ilinadawan ni Jehova an mga tawo sa teritoryo ni Ezekiel, asin ano an pag-uulayan ta sa artikulong ini? (Ezekiel 2:3-6)

² Anong klaseng mga tawo an yaon sa hinuhulitan na teritoryo ni Ezekiel? Ilinadawan sinda ni Jehova na “sutil,” “matagas an puso,” asin ‘rebelyoso.’ Arog sinda kapeligroso kan matunok na mga tanom asin kan mga eskorpiyon. Iyan an dahilan kaya pauruutrong sinabi ni Jehova ki Ezekiel: “Dai ka matakot”! (Basahon an Ezekiel 2:3-6.) Naisagibo ni Ezekiel an pagbuot sa saiya na maghulit huling siya (1) isinugo ni Jehova, (2) pinakusog kan espiritu nin Diyos, asin (3) pinakusog kan mga tataramon nin Diyos. Paano nakatabang ki Ezekiel an tulong bagay na iyan? Asin paano iyan nakakatabang sa sato ngunyan?

3. Anong mga tataramon an siguradong nakapakusog ki Ezekiel, asin paano siya inasigurar ni Jehova na tatabangan Niya siya?

³ Sinabi ni Jehova ki Ezekiel: “Isinusugo taka.” (Ezek. 2:3, 4) Siguradong napakusog si Ezekiel kan mga tataramon na iyan. Taano? Daing duda na nagirumduman niya na ginamit ni Jehova an arog kaiyan na mga tataramon kan isugo Niya si Moises asin Isaias bilang Saiyang mga propeta. (Exo. 3:10; Isa. 6:8) Aram man ni Ezekiel kun paano tinabangan ni Jehova an duwang propetang iyan na mapangganahan an mga kadipisilan. Kaya kan sabihon ni Jehova ki Ezekiel nin duwang beses: “Isinusugo taka,” may marahay na dahilan an propeta na magtiwala sa suporta ni Jehova. Apuwera kaiyan, sa libro nin Ezekiel, dakul na beses tang mababasa an mga tataramon na ini: “Uminabot sako an tataramon ni Jehova.” (Ezek. 3:16) Dugang pa, pauruutrong ginamit an mga tataramon na “Nag-abot giraray sa sako an tataramon ni Jehova.” (Ezek. 6:1) Siguradong kumbinsido si Ezekiel na isinugo siya ni Jehova. Saro pa, bilang aki nin saserdote, posibleng marhay na tinukduan si Ezekiel kan saiyang ama kun paano inaasigurar ni Jehova, sa bilog na kasaysayan, an Saiyang mga propeta na tatabangan Niya sinda. Sinabi ni Jehova ki Isaac, Jacob, asin Jeremias: “Kaibanan mo ako.”—Gen. 26:24; 28:15; Jer. 1:8.

4. Ano an nakaranga ki Ezekiel na siguradong nakapakusog sa saiya?

⁴ Ano an magigin reaksiyon kan kadaklan na Israelita sa paghuhulit ni Ezekiel? Sinabi ni Jehova: “An banwaan nin Israel dai madangog sa saimo, huling habo nindang magdangog sako.” (Ezek. 3:7) Sa pagsikwal kan banwaan ki Ezekiel, si Jehova an isinisikwal ninda. An mga tataramon na idto nag-asigurar ki Ezekiel na an pagsikwal sa saiya kan banwaan dai nangangahulugan na dai siya nagin mapanggana bilang sarong propeta. Inasigurar man ni Jehova si Ezekiel na pag nagkatotoo na an mga paghukom na ipinahayag niya, “maaaraman nanggad [kan banwaan] na nagkaigwa nin propeta sa tahaw ninda.” (Ezek. 2:5; 33:33) Nakaranga iyan ki Ezekiel asin siguradong natawan siya kaiyan kan kusog na kaipuhan niya para mautob an saiyang ministeryo.

5. Sigun sa Isaias 44:8, sain kita nagkukua nin kusog?

⁵ Napapakusog man kita huling aram ta na isinugo kita ni Jehova. Tinatawan niya kita nin onra paagi sa pag-apod sa sato na saiyang “mga saksi.” (Isa. 43:10) Dakula nanggad na pribilehiyo iyan! Kun paanong dinagka ni Jehova si Ezekiel: “Dai ka matakot,” dinadagka man kita ni Jehova: “Dai kamo matakot nin grabe.” Taano ta mayo kitang dahilan na matakot sa mga nagkokontra sa sato? Arog ni Ezekiel, isinugo kita ni Jehova asin yaon an pagsuportar Niya sa sato.—Basahon an Isaias 44:8.

6. (a) Paano kita inaasigurar ni Jehova na susuportaran niya kita? (b) Sa ano kita nararanga asin napapakusog?

⁶ Inaasigurar kita ni Jehova na susuportaran niya kita. Halimbawa, bago sabihon ni Jehova: “Kamo an sakuyang mga saksi,” sinabi niya: “Pag mag-agi ka sa katubigan, makakaibanan mo ako, asin pag magbalyo ka sa mga salog, dai ka masasanop kan mga iyan. Pag maglakaw ka sa kalayo, dai ka mapapaso, ni masisirob ka man kan laad kaiyan.” (Isa. 43:2) Mantang isinasagibo ta an satong ministeryo, kun minsan, napapaatubang kita sa arog bahang mga ulang asin sa arog kalayong mga pagbalo. Dawa arog kaiyan, sa tabang ni Jehova, padagos kitang naghuhulit. (Isa. 41:13) Arog kan panahon ni Ezekiel, an kadaklan na tawo ngunyan isinisikwal an mensahe. Ginigirumdom ta na an pagsikwal ninda dai nangangahulugan na dai kita nagin mapanggana bilang mga Saksi nin Diyos. Nararanga kita asin napapakusog huling aram ta na nauugma si Jehova pag may kaimbudan tang ipinapadagos an pagpahayag kan saiyang mensahe. Sinabi ni apostol Pablo: “An lambang tawo maako kan balos niya sigun sa saiyang sadiring gibo.” (1 Cor. 3:8; 4:1, 2) Sarong haluyan nang payunir na sister an nagsabi: “Nagtatao sa sako nin kaugmahan an pakaaram na binabalusan ni Jehova an satong mga paghihinguwa.”

7. Kada hinuhurop-hurop ni Ezekiel an bisyon na nahiling niya, ano an siguradong nagin epekto kaiyan sa saiya? (Hilingon an ritrato sa cover.)

⁷ Nahiling ni Ezekiel kun gurano kamakapangyarihan an espiritu nin Diyos. Sa bisyon, nahiling niya an banal na espiritu na nagtatabang sa makapangyarihan na mga espiritung linalang asin nagpapahiro sa dakulaon na mga ruweda nin sarong langitnon na karwahe. (Ezek. 1:20, 21) Ano an nagin reaksiyon ni Ezekiel? Isinurat niya kun ano an nangyari. “Kan mahiling ko iyan, suminubsob ako.” Sa grabeng paghanga ni Ezekiel suminubsob siya sa daga. (Ezek. 1:28) Paghaloy-haloy, kada hinuhurop-hurop ni Ezekiel an kahanga-hangang bisyon na iyan, siguradong napakusog kaiyan an saiyang kumbiksiyon na sa tabang kan espiritu nin Diyos, maisasagibo niya an saiyang ministeryo.

8-9. (a) Ano an epekto ki Ezekiel kan pagbuot na itinao sa saiya ni Jehova? (b) Paano urog pang pinakusog ni Jehova si Ezekiel para sa masakit na teritoryo kaini?

⁸ Pinagbutan ni Jehova si Ezekiel: “Aki nin tawo, tumindog ka tanganing makaulay taka.” An pagbuot na iyan saka an espiritu nin Diyos nagtao ki Ezekiel kan kusog na kaipuhan niya para makabuhat. Isinurat ni Ezekiel: “Uminabot sa sako an espiritu asin pinatindog ako kaiyan.” (Ezek. 2:1, 2) Kan huri asin sa bilog na ministeryo ni Ezekiel, giniyahan siya kan “kamot” nin Diyos—an buot sabihon, kan banal na espiritu nin Diyos. (Ezek. 3:22 nota sa ibaba; 8:1; 33:22; 37:1; 40:1) Pinakusog si Ezekiel kan espiritu nin Diyos para sa gibuhon na inako niya—an paghuhulit sa “matagas an payo saka matagas an puso” na mga tawo sa saiyang teritoryo. (Ezek. 3:7) Sinabi ni Jehova ki Ezekiel: “Ginibo kong kasingtagas kan lalawgon ninda an lalawgon mo asin kasingtagas kan angog ninda an angog mo. An angog mo ginibo kong garo diyamante, na mas matagas kisa sa matagason na gapo. Dai ka matakot sa sainda o sa saindang mga lalawgon.” (Ezek. 3:8, 9) Garo man sana sinabi ni Jehova ki Ezekiel: ‘Dai mo pagtugutan na an katagasan kan payo ninda makapaluya sa saimo. Papakusugon taka.’

⁹ Pakatapos kaiyan, dinara si Ezekiel kan espiritu nin Diyos sa teritoryo na saiyang huhulitan. Isinurat ni Ezekiel: “Pinahiro nanggad ako kan kamot ni Jehova.” Kinaipuhan nin sarong semana kan propeta para lubos niyang masabutan an mensahe na kaipuhan niyang ipaabot asin para maihulit niya iyan na may kumbiksiyon. (Ezek. 3:14, 15, nota sa ibaba) Dangan sinabi ni Jehova sa saiya na magpasiring sa kapatagan sa kababan na diyan “nag-abot sa [saiya] an espiritu.” (Ezek. 3:23, 24) Andam na si Ezekiel na punan an saiyang ministeryo.

10. Anong tabang an kaipuhan ta para maisagibo an satong mga aktibidad sa paghuhulit, asin taano?

¹⁰ Anong tabang an kaipuhan ta para maisagibo an satong paghuhulit? Para masimbag iyan, hurop-hurupon kun ano an nangyari ki Ezekiel. Bago niya punan an saiyang paghuhulit, itinao sa saiya kan espiritu nin Diyos an kusog na kaipuhan niya. Sa ngunyan, arog ki Ezekiel, maisasagibo ta sana an satong paghuhulit sa tabang kan espiritu nin Diyos. Taano? Huling nakikipaglaban sa sato si Satanas tanganing papunduhon kita sa satong mga aktibidad sa paghuhulit. (Kap. 12:17) Sa pagmansay nin tawo, garo baga mayo kitang kalaban-laban ki Satanas. Pero paagi sa satong gibuhon na pagpapatotoo, dinadaog nanggad niyato siya! (Kap. 12:9-11) Sa paanong paagi? Pag nakikikabtang kita sa ministeryo, ipinapahiling ta na dai kita natatakot sa mga patakot ni Satanas. Kada maghulit kita, nadadaog si Satanas. Kaya ano an nagigin malinaw sa sato pag naisasagibo ta an satong mga aktibidad sa paghuhulit sa ibong nin pagkontra? Masasabi ta na pinakusog kita kan banal na espiritu asin na yaon sa sato an pag-uyon ni Jehova.—Mat. 5:10-12; 1 Ped. 4:14.

11. Ano an gigibuhon para sa sato kan espiritu nin Diyos, asin paano kita padagos na mag-aako kaiyan?

¹¹ Sa anong paagi pa kita naaasigurar kan pakaaram na piguratibong pinatagas ni Jehova an lalawgon asin angog ni Ezekiel? An espiritu nin Diyos tatawan kita kan kusog na kaipuhan niyato para makayanan an ano man na kadipisilan na tibaad mapaatubang sa sato sa satuyang ministeryo. (2 Cor. 4:7-9) Kun siring, ano an puwede tang gibuhon para masigurado na padagos kitang mag-aako kan espiritu nin Diyos? Kaipuhan tang padagos na hagadon iyan paagi sa pamibi, na nagtitiwala na dadangugon ni Jehova an satong mga pamibi. Itinukdo ni Jesus sa saiyang mga disipulo: “Padagos na maghagad, . . . padagos na maghanap, . . . padagos na magtuktok.” Bilang simbag, “matao [si Jehova] nin banal na espiritu sa mga naghahagad sa saiya.”—Luc. 11:9, 13; Gibo 1:14; 2:4.

12. Base sa Ezekiel 2:9–3:3, sain hali an rolyo asin ano an laog kaiyan?

¹² Si Ezekiel pinakusog bako lang kan espiritu nin Diyos kundi pati man kan mga tataramon nin Diyos. Sa bisyon, nahiling ni Ezekiel an sarong kamot na may kapot na rolyo. (Basahon an Ezekiel 2:9–3:3.) Sain hali an rolyo? Ano an laog kaiyan? Paano kaiyan pinakusog si Ezekiel? Aramon ta. An rolyo hali sa trono nin Diyos. Posibleng marhay na ginamit ni Jehova an saro sa apat na anghel na inot nang nahiling ni Ezekiel tanganing itao sa saiya an rolyo. (Ezek. 1:8; 10:7, 20) Nakasurat sa rolyo an mga tataramon nin Diyos—sarong halabang mensahe nin paghukom na kaipuhan na ipaabot ni Ezekiel sa rebelyosong mga nadistiyero. (Ezek. 2:7) An mensaheng iyan nakasurat sa atubangan saka sa likod kan rolyo.

13. Ano an sinabi ni Jehova na gibuhon ni Ezekiel sa rolyo, asin taano ta mahamis iyan?

¹³ Sinabi ni Jehova sa saiyang propeta na kakanon an rolyo asin ‘panuon kaiyan an saiyang tulak.’ Sinunod iyan ni Ezekiel, inubos niyang kinakan an rolyo. Ano an buot sabihon kan kabtang na ini kan bisyon? Kaipuhan na lubos na masabutan ni Ezekiel an mensahe na ipapaabot niya. Kaipuhan na magin parte niya iyan, an buot sabihon, magkaigwa nin epekto sa kauruirarumi niyang pagmati. Dangan may makangangalas na nangyari. An rolyo nagin “kasinghamis . . . nin tangguli” kan kakanon iyan ni Ezekiel. (Ezek. 3:3) Taano? Para ki Ezekiel, an onra na irepresentar si Jehova sarong mahamis, o sarong marahayon, na eksperyensiya. (Sal. 19:8-11) Nagpapasalamat na marhay siya na inaprubaran siya ni Jehova na maglingkod bilang saiyang propeta.

14. Ano an nakatabang ki Ezekiel na magin andam na isagibo an saiyang asignasyon?

¹⁴ Kan huri, sinabi ni Jehova ki Ezekiel: “Isapuso mo saka dangugon mo an gabos na sinasabi ko saimo.” (Ezek. 3:10) Sa instruksiyon na iyan, sinabi ni Jehova ki Ezekiel na girumdumon an mga tataramon na nakasurat sa rolyo asin na hurop-hurupon iyan. Napakusog si Ezekiel sa paggibo kaiyan. Nagtao man iyan sa saiya nin sarong mapuwersang mensahe na ipapaabot sa banwaan. (Ezek. 3:11) Kan lubos na masabutan ni Ezekiel an mensahe nin Diyos, nagin andam na siyang isagibo asin utubon an saiyang asignasyon.—Ikumparar an Salmo 19:14.

15. Para makatagal, ano an kaipuhan na “isapuso” ta?

¹⁵ Tanganing makatagal sa satong ministeryo, kaipuhan man na padagos kitang napapakusog kan mga tataramon nin Diyos. Kaipuhan na “isapuso” ta an gabos na sinasabi sa sato ni Jehova. Sa ngunyan, nagtataram sa sato si Jehova paagi sa saiyang nasusurat na Tataramon, an Bibliya. Paano ta masisigurado na an Tataramon nin Diyos padagos na nagkakaigwa nin epekto sa satong kaisipan, pagmati, asin motibasyon?

16. Ano an dapat tang gibuhon sa Tataramon nin Diyos, asin paano ta iyan maisasapuso?

¹⁶ Kun paanong napapakusog kita sa pisikal pag nagkakakan kita nin kakanon asin tinutunaw iyan sa tulak, napapakusog kita sa espirituwal pag nag-aadal kita kan Tataramon nin Diyos asin hinuhurop-hurop iyan. Ginigirumdom ta an leksiyon manungod sa rolyo. Kun manungod sa Tataramon nin Diyos, gusto ni Jehova na ‘panuon ta kaiyan an satuyang tulak,’ an buot sabihon, sabuton iyan. Magigibo ta iyan paagi sa pagpamibi, pagbasa, asin paghurop-hurop. Inot, namimibi kita para andamon an satuyang puso sa pag-ako kan mga kaisipan nin Diyos. Dangan, nagbabasa kita nin teksto sa Bibliya. Sunod, minapundo kita tanganing maghurop-hurop, o pag-isipan na marhay, an manungod sa binasa ta. Ano an magigin resulta? Mantang mas naghuhurop-hurop kita, mas masasabutan kan piguratibong puso ta an Tataramon nin Diyos.

17. Taano ta mahalagang marhay na hurop-hurupon ta an binasa ta sa Bibliya?

¹⁷ Taano ta mahalagang marhay na basahon an Bibliya asin hurop-hurupon an satong binasa? An paggibo kaiyan nagtatao sa sato kan panglaog na kusog na kaipuhan ta para ihulit ngunyan an mensahe kan Kahadian asin ipahayag an makulog na mensahe nin paghukom na posibleng ipaabot ta sa madali nang panahon. Siring man, pag hinuhurop-hurop ta an magayon na mga kuwalidad ni Jehova, an satong relasyon sa saiya lalong makusog. Bilang resulta, magkakaigwa kita nin sarong bagay na talagang mahamis, o marahayon—an panglaog na katuninungan asin pagkakontento.—Sal. 119:103.

18. Ano an kaipuhan na akuon kan mga tawo sa satuyang teritoryo, asin taano?

¹⁸ Bako kitang arog ni Ezekiel, na pinasabngan na magpropesiya sa mga tawo. Pero, determinado kitang padagos na ipaabot an ipinasabong na tataramon na iningatan ni Jehova sa saiyang nasusurat na Tataramon sagkod na sabihon niya na tapos na an gibuhon na paghuhulit. Pag nag-abot na an panahon nin paghukom, an mga tawo sa satuyang teritoryo dai magkakaigwa nin dahilan na sabihon na dai sinda pinatanidan o na linipasan sinda nin Diyos. (Ezek. 3:19; 18:23) Imbes, kaipuhan nindang midbidon na an mensaheng ihinuhulit ta hali sa Diyos.

19. Ano an matao sa sato kan kusog para utubon an satuyang ministeryo?

¹⁹ Ano an matao sa sato kan kusog para utubon an satuyang ministeryo? Iyan iyo an tulong bagay na nakapakusog man ki Ezekiel. Padagos kitang naghuhulit huling aram ta na isinugo kita ni Jehova, na pinakusog kita kan banal na espiritu nin Diyos, asin na pinakusog kita kan Tataramon nin Diyos. Sa tabang ni Jehova, motibado kita na isagibo an satuyang ministeryo asin na magtagal “sagkod sa katapusan.”—Mat. 24:13.