Hula ni Isaias—Liwanag Para sa Bilog na Katawohan II

Kapitulo Kuatro: “Kamo an Sakong mga Saksi”!

Isaias 43:1-28

 1. Paano ginagamit ni Jehova an paghula, asin paano dapat maghimate an saiyang banwaan sa naotob na hula?

AN KAKAYAHAN na patienot na isabi an ngapit sarong bagay na nagpapamidbid kan kalaenan kan tunay na Dios sa gabos na falsong dios. Alagad kun si Jehova naghuhula, an nasa isip nia bako sanang patunayan an saiyang pagka-Dios. Siring kan ipinaheheling sa Isaias kapitulo 43, ginagamit ni Jehova an paghula tanganing patunayan an saiyang pagka-Dios sagkod an saiyang pagkamoot sa saiyang katipan na banwaan. Sa ibong na kampi, dai basta mamansayon kan saiyang banwaan an naotob na hula asin masilensio na sana; kaipuhan nindang magpatotoo sa saindang naheling. Iyo, kaipuhan sindang magin mga saksi ni Jehova!

 2. (a) Ano an espirituwal na kamugtakan kan Israel kan panahon ni Isaias? (b) Paano binuksan ni Jehova an mga mata kan saiyang banwaan?

² Makamomondo, kaidtong panahon ni Isaias an Israel nasa makaheherak na kamugtakan kaya an banwaan ibinilang ni Jehova na biadi sa espirituwal. “Iluwas mo an sarong banwaan na buta dawa may mga mata, asin an mga bungog dawa sinda may mga talinga.” (Isaias 43:8) Paano daw makapaglilingkod ki Jehova bilang saiyang buhay na mga saksi an mga tawong buta asin bungog sa espirituwal? May saro sanang paagi. Kaipuhan na milagrosong buksan an saindang mga mata asin talinga. Asin talagang binuksan ni Jehova an mga ini! Paano? Enot, nagtao si Jehova nin estriktong disiplina​—an mga nag-eerok sa kahadean nin Israel sa amihanan idinistiero kan 740 B.C.E., asin an mga nag-eerok sa Juda, kan 607 B.C.E. Pagkatapos, ginamit ni Jehova an kapangyarihan para sa saiyang banwaan paagi sa pagpatalingkas sa sainda saka pagpabalik sa pinabagsik sa espirituwal asin nagsosolsol na natatada sa saindang dagang tinuboan kan 537 B.C.E. Sa katunayan, kompiadong marhay si Jehova na an saiyang katuyohan mapadapit digdi dai puedeng olangon kaya mga 200 na taon antes pa, nagtataram sia manongod sa pakatalingkas kan Israel na garo baga nangyari na ini.

 3. Anong pamparigon sa boot an itinao ni Jehova sa magigin mga desterrado?

³ “Ini an isinabi ni Jehova, an saimong Kaglalang, O Jacob, asin an saimong Kaggibo, O Israel: ‘Dai ka matakot, huli ta ika tinubos ko. Inapod taka sa saimong ngaran. Sadiri taka. Kun ika mag-agi sa katubigan, ako masasakaibanan mo; asin sa mga salog, dai ka masasanop kaiyan. Kun ika lumakaw sa kalayo, dai ka mapapaso, ni masisirob ka man kan laad. Huli ta ako si Jehova na saimong Dios, an Banal kan Israel na saimong Paraligtas.’”​—Isaias 43:1-3a.

 4. Paano nangyaring si Jehova an Kaglalang kan Israel, asin anong pagpasarig sa boot an itinao nia sa saiyang banwaan mapadapit sa saindang pagbalik sa saindang dagang tinuboan?

⁴ Si Jehova may espesyal na interes sa Israel huli ta rogaring nia an nasyon. Sia mismo an personal na naglalang kaiyan bilang kaotoban kan Abrahamikong tipan. (Genesis 12:1-3) Sa siring, an Salmo 100:3 nagsasabi: “Arama nindo na si Jehova Dios. Sia an naggibo sa sato, asin bakong kita mismo. Kita an saiyang banwaan asin an mga karnero kan saiyang pasabsaban.” Bilang Kaglalang asin Paratubos kan Israel, ligtas na ibabalik ni Jehova an saiyang banwaan sa saindang dagang tinuboan. An mga kaolangan, arog baga nin katubigan, nagbabahang mga salog, asin mainiton na mga desierto, dai makakaolang o makakadanyar sa sainda, kun paanong an kaparehong mga bagay dai nakaolang sa saindang mga apoon sa pagpasiring sa Dagang Panuga sangribong taon na bago kaini.

 5. (a) Paano nakaranga sa espirituwal na Israel an mga tataramon ni Jehova? (b) Sairisay an kaiba kan espirituwal na Israel, asin ipinanganino sinda niisay?

⁵ An mga tataramon ni Jehova nagtao man nin karangahan sa natatada kan espirituwal na Israel sa presenteng aldaw, na an mga miembro kaini pinaniaki nin espiritu na “bagong linalang.” (2 Corinto 5:17) Huling pusoan na naglakaw sa atubangan kan “katubigan” nin katawohan, nakamtan ninda an mamomoton na proteksion nin Dios sa piguratibong mga baha. An kalayo na hale sa saindang mga kaiwal dai nakadanyar sa sainda kundi, imbes, duminalisay sa sainda. (Zacarias 13:9; Kapahayagan 12:15-17) An pangangataman ni Jehova ipinaabot man sa “dakulang kadaklan” nin “ibang karnero,” na nakiiba sa espirituwal na nasyon nin Dios. (Kapahayagan 7:9; Juan 10:16) An mga ini ipinanganino kan “sarong dakulang kadaklan na manlaenlaen” na uminiba sa mga Israelita sa Lagdoan na Pagharale sa Egipto asin siring man kan mga bakong Judio na nagbaralik kaiba kan pinatalingkas na mga desterrado hale sa Babilonya.​—Exodo 12:38; Esdras 2:​1, 43, 55, 58.

 6. Paano ipinaheling ni Jehova na sia Dios nin hustisya mapadapit sa pagtubos sa (a) Israel sa laman? (b) espirituwal na Israel?

⁶ Ipinanuga ni Jehova na ililigtas nia an saiyang banwaan hale sa Babilonya paagi sa mga hukbo nin Media asin Persia. (Isaias 13:17-19; 21:​2, 9; 44:28; Daniel 5:28) Bilang Dios nin hustisya, babayadan ni Jehova an saiyang Medo-Persianong “mga empleyado” nin angay na pantubos karibay kan Israel. “Itinao ko an Egipto bilang tubos sa saimo, an Etiopia asin Seba na karibay mo. Huli ta ika nagin pinakamahal sa sakuyang mga mata, ika ibinilang na kagalanggalang, asin namotan taka. Asin itatao ko an mga tawo na karibay mo, asin an mga nasyon na karibay kan saimong kalag.” (Isaias 43:3b, 4) Pinatutunayan kan kasaysayan na talagang kinongkistar kan Imperyo nin Persia an Egipto, Etiopia, asin an kaharaning Seba, siring kan ihinula nin Dios. (Talinhaga 21:18) Kaagid kaiyan, kan 1919 paagi ki Jesu-Cristo, pinatalingkas ni Jehova an natatada kan espirituwal na Israel sa pagkabihag. Minsan siring, dai kaipuhan ni Jesus an balos sa saiyang paglilingkod. Bako siang paganong namamahala. Asin an pinatalingkas nia iyo an saiya mismong espirituwal na mga tugang. Apuera kaiyan, kan 1914, itinao na ni Jehova sa saiya an “mga nasyon bilang [saiyang] mana asin an kaporoporohi kan daga bilang [saiyang] mga sadiri.”​—Salmo 2:8.

 7. Ano an namatean ni Jehova para sa saiyang banwaan, kan suanoy sagkod sa presenteng mga panahon?

⁷ Mangnoha kun paano hayag na ipinahayag ni Jehova an saiyang mamomoton na mga pagmate sa binalukat na mga desterrado. Sinabi nia sa sainda na sinda “pinakamahal” asin “kagalanggalang” para sa saiya asin na ‘namomotan’ nia sinda. (Jeremias 31:3) Siring man kaiyan an namamatean nia​—asin orog pa ngani​—sa saiyang maimbod na mga lingkod ngonyan. An linahidan na mga Kristiano nagkaigwa nin relasyon sa Dios, bakong huli sa pagkamundag, kundi huli sa paghiro kan banal na espiritu nin Dios kasunod kan saindang personal na pagdusay sa saindang Kaglalang. Dinagka ni Jehova an mga ini sa saiyang Aki asin sa saiyang sadiri asin isinurat an saiyang mga ley asin prinsipyo sa saindang mapaghimateng puso.​—Jeremias 31:31-34; Juan 6:44.

 8. Anong pagpakosog liwat sa boot an itinao ni Jehova sa mga desterrado, asin ano an mamamatean ninda manongod sa pagligtas sa sainda?

⁸ Sa pagtao nin orog pang pagpakosog liwat sa boot sa mga desterrado, idinugang ni Jehova: “Dai ka matakot, huli ta kaibanan mo ako. Hale sa sirangan dadarahon ko an saimong banhi, asin hale sa solnopan titiponon taka. Sasabihan ko an amihanan, ‘Itao mo!’ asin an timog, ‘Dai ka magpogol. Daraha an sakuyang mga aking lalaki hale sa harayo, asin an sakuyang mga aking babae hale sa poro kan daga, an gabos na inaapod sa ngaran ko asin na linalang ko para sa sakong sadiring kamurawayan, na hinaman ko, iyo, na ginibo ko.’” (Isaias 43:5-7) Dawa an pinakaharayong mga lugar sa daga kayang aboton ni Jehova kun dumatong na an panahon na patalingkason an saiyang mga aking lalaki asin babae asin ibalik sinda sa saindang namomotan na marhay na dagang tinuboan. (Jeremias 30:​10, 11) Daing duwa-duwa, sa saindang pagheling malalabihan kan pagpatalingkas na ini an naenot na pagligtas kan nasyon hale sa Egipto.​—Jeremias 16:​14, 15.

 9. Sa anong duwang paagi iinasosyar ni Jehova sa saiyang ngaran an saiyang mga pagliligtas?

⁹ Paagi sa pagpagirumdom sa saiyang banwaan na sinda inaapod sa saiyang ngaran, kinompirmar ni Jehova an saiyang panuga na ililigtas an Israel. (Isaias 54:​5, 6) Dugang pa, iinasosyar ni Jehova an saiyang ngaran sa saiyang mga panuga na pagpatalingkas. Sa paggibo kaini, sinesegurado nia na sia an maako kan kamurawayan kun maotob na an saiyang makahulang tataramon. Minsan an kongkistador kan Babilonya mayong deretso sa onra na para sana sa saro asin solamenteng nabubuhay na Dios.

Binibista an mga Dios

10. Anong angat an iinatubang ni Jehova sa mga nasyon asin sa saindang mga dios?

¹⁰ Ngonyan ginagamit ni Jehova an saiyang panuga na patatalingkason an Israel bilang basehan nin sarong unibersal na kaso sa husgado na dian binibista nia an mga dios kan mga nasyon. Mababasa niato: “Matiripon an gabos na nasyon sa sarong lugar, asin magsararo an mga banwaan. Siisay sa sainda [sa saindang mga dios] an makapagsasabi kaini? O ikapadadangog daw ninda sa sato minsan an enot na mga bagay? Itao ninda [kan saindang mga dios] an saindang mga saksi, tangani sindang ikapahayag na matanos, o magdangog sinda asin magsabi, ‘Iyan an katotoohan!’” (Isaias 43:9) Iinaatubang ni Jehova an sarong magabat na angat sa mga nasyon sa kinaban. Garo man sana sinasabi nia: ‘Patunayan kan saindong mga dios na sinda dios paagi sa eksaktong paghula kan ngapit.’ Mantang an tunay na Dios sana an daing kasalasalang makapaghuhula, ibubuyagyag kan pagbalong ini an gabos na impostor. (Isaias 48:5) Alagad idinadagdag kan Makakamhan sa Gabos an saro pang legal na kahagadan: An gabos na naghihingako na tunay na dios dapat na magpaluwas nin mga saksi, sa saindang mga prediksion sagkod sa kaotoban kan mga ini. Naturalmente, dai ipinupuera ni Jehova an saiyang sadiri sa legal na kahagadan na ini.

11. Anong pagnombra an itinao ni Jehova sa saiyang lingkod, asin ano an ihinayag ni Jehova manongod sa saiyang pagka-Dios?

¹¹ Huling daing kosog, dai makakapaluwas nin mga saksi an falsong mga dios. Huli kaini, makasusupog na nagdadanay na bakante an puesto para sa testigo. Alagad duminatong na ngonyan an panahon ni Jehova na patunayan an saiyang pagka-Dios. Nakaheling sa saiyang banwaan, sia nagsasabi: “Kamo an sakong mga saksi, . . . an sakong lingkod na sakong pinili, tanganing mamidbid nindo ako asin magtubod kamo, asin tanganing masabotan nindo na ako iyo an Saro na iyo man sana. Bago sa sako dai nin nahaman na Dios, asin mayo man giraray sa hurihan ko. Ako​—ako si Jehova, asin laen sa sako dai nin paraligtas. Ako mismo an nagsabi asin nagligtas asin nagpangyari na iyan madangog, kaidtong mayo sa tahaw nindo nin ibang dios. Kaya kamo an sakong mga saksi, . . . asin ako an Dios. Siring man, sa gabos na panahon ako iyo an Saro na iyo man sana; asin mayo nin siisay man na nakapagliligtas hale sa sakong kamot. Mahiro ako, asin siisay an makapopogol [sa sakong kamot]?”​—Isaias 43:10-13.

12, 13. (a) Anong abundang patotoo an ikaaatubang kan banwaan ni Jehova? (b) Paano nagin midbid na marhay an ngaran ni Jehova sa presenteng mga panahon?

¹² Bilang simbag sa mga tataramon ni Jehova, an puesto para sa testigo dai nahaloy nagsopay sa magayagayang kaburunyogan nin mga saksi. An saindang patotoo klaro asin dai makukuestion. Siring ki Josue, pinatototoohan ninda na ‘gabos na itinaram ni Jehova nangyari. Mayo ni sarong tataramon an nasudya.’ (Josue 23:14) Nag-aaningal pa sa mga talinga kan banwaan ni Jehova an mga tataramon ni Isaias, Jeremias, Ezequiel, asin iba pang propeta na, siring sa sarong tingog, naghula kan pagkadistiero kan Juda asin kan milagrosong pagliligtas sa sainda sa pagkadistiero. (Jeremias 25:​11, 12) An paraligtas kan Juda, si Ciro, nginaranan na haloy pa bago pa ngani sia ipinangaki!​—Isaias 44:26–​45:1.

¹³ Huli sa gabukid na ebidensiang ini, siisay an makadedehar na si Jehova an iyo sanang tunay na Dios? Bakong arog kan paganong mga dios, si Jehova sana an dai linalang; sia sana an tunay na Dios.a Bilang resulta, an banwaan na nagdadara kan ngaran ni Jehova igwa nin daing kaagid asin nakapupukaw sa boot na pribilehio na isaysay an saiyang makangangalas na mga gibo sa maabot na mga kapag-arakian asin sa iba pa na naghahapot manongod sa saiya. (Salmo 78:5-7) Sa kaagid na paagi, an Mga Saksi ni Jehova sa presenteng aldaw igwa kan pribilehio na ipahayag an ngaran ni Jehova sa bilog na daga. Kan mga taon nin 1920 orog na nasabotan kan Mga Estudyante sa Biblia an hararom na kahulogan kan ngaran nin Dios, an Jehova. Dangan, kan Hulyo 26, 1931, sa sarong kombension sa Columbus, Ohio, iinatubang kan presidente kan Sosyedad, si Joseph F. Rutherford, an sarong resolusyon na may titulong “Sarong Bagong Ngaran.” An mga tataramon na, “Kamawotan niamo na mamidbid asin apodon sa ngaran na, arin na baga, mga saksi ni Jehova,” nakapukaw sa boot kan mga kombensionista, na nag-oyon sa resolusyon paagi sa nag-aaningal na “Iyo!” Poon kaidto, nagin midbid na marhay an ngaran ni Jehova sa bilog na kinaban.​—Salmo 83:18.

14. Ano an ipinagirumdom ni Jehova sa mga Israelita, asin taano ta napapanahon an pagirumdom na ini?

¹⁴ Pinangangatamanan ni Jehova an mga nagdadara kan saiyang ngaran sa onorableng paagi, na minamansay sinda na siring “sa tawo-tawo kan saiyang mata.” Ipinagirumdom nia ini sa mga Israelita, na sinasabi sa sainda kun paano nia sinda ilinigtas sa Egipto asin ligtas na giniyahan sa kaawagan. (Deuteronomio 32:​10, 12) Kan panahon na idto mayo nin ibang dios sa tahaw ninda, huli ta naheling kan sainda mismong mga mata an biyong pagkapasupog kan gabos na dios nin Egipto. Iyo, an gabos na minimidbid na dios nin Egipto dai nakaprotehir sa Egipto ni nakaolang sa paghale kan Israel. (Exodo 12:12) Kaagid kaiyan, an makapangyarihan na Babilonya, na an tanawon sa siudad napangingibabawan kan kisuerra 50 templo para sa falsong mga dios, dai makapopogol sa kamot kan Makakamhan sa Gabos kun patalingkason na nia an saiyang banwaan. Malinaw nanggad, “dai nin paraligtas” apuera ki Jehova.

Napukan an mga Kabayong Panguerra, Nabukasan an mga Bilanggoan

15. Ano an ihinula ni Jehova may labot sa Babilonya?

¹⁵ “Iyo ini an sinabi ni Jehova, an saindong Paratubos, an Banal kan Israel: ‘Para sa kapakanan nindo masugo ako sa Babilonya asin pababagsakon ko an mga pamarat kan mga bilanggoan, asin an mga Caldeo sa mga barko na nag-aagrangay na may kapurisawan. Ako si Jehova na saindong Banal, an Kaglalang kan Israel, an saindong Hade.’ Iyo ini an sinabi ni Jehova, an Saro na naggigibo nin dalan sa mismong dagat asin nin tinampo dawa sa makosog na katubigan, an saro na nagluluwas kan karuwahe de guerra asin kan kabayo, kan puersa militar asin kan makokosog nin sarabay: ‘Sinda mahigda. Dai sinda mabangon. Sinda siertong gagadanon. Paparongon sinda na siring sa linong mitsa.’”​—Isaias 43:14-17.

16. Ano an mangyayari sa Babilonya, sa mga negosyanteng Caldeo, asin sa siisay man na masurog sa Babilonya?

¹⁶ An Babilonya garo sarong bilanggoan para sa mga desterrado huli ta inoolang sinda kaiyan na makabalik sa Jerusalem. Alagad an mga depensa kan Babilonya bakong olang sa Makakamhan sa Gabos, an Saro na naggibo kaidto “nin dalan sa mismong [Dagat na Pula] asin nin tinampo dawa sa makosog na katubigan”​—na minalataw na an sa Jordan. (Exodo 14:16; Josue 3:13) Sa kaagid na paagi, pasisibogon kan instrumento ni Jehova, si Ciro, an dakulaon na Eufrates, tanganing makalaog sa siudad an saiyang mga guerrero. An mga negosyanteng Caldeo na nagpapabalikbalik sa mga kanal nin Babilonya​—mga agihan na tubig para sa rinibong barkong pankomersio asin para sa mga lantsang sinasakayan kan mga dios nin Babilonya​—maagrangay sa kamondoan kun bumagsak na an saindang makapangyarihan na kabisera. Kapareho kan mga karuwahe ni Faraon sa Dagat na Pula, daing magigibo an marikas na mga karuwahe nin Babilonya. Dai sia ikaliligtas kan mga iyan. Siring kadali nin pagparong sa linong mitsa nin lamparang de lana, tataposon kan nananakyada an buhay nin siisay man na masurog sa saiya.

Ligtas na Ginigiyahan ni Jehova an Saiyang Banwaan Papuli

17, 18. (a) Anong “bagong” bagay an ihinula ni Jehova? (b) Sa paanong paagi dai na gigirumdomon kan banwaan an dating mga bagay, asin taano?

¹⁷ Ikinokomparar an mga pagliligtas na ginibo nia kaidto sa gigibohon nia ngonyan, si Jehova nagsasabi: “Dai nindo girumdomon an enot na mga bagay, asin an mga dating bagay dai nindo pag-isipon. Uya! Naggigibo ako nin sarong bagong bagay. Ngonyan malataw iyan. Maaaraman nindo iyan, bako daw? Tunay nanggad, sa kaawagan mabugtak ako nin dalan, sa desierto mga salog. Pamumurawayon ako kan layas na hayop sa langtad, kan layas na mga ayam asin kan avestruz; huli ta matao ako nin tubig dawa sa kaawagan, nin mga salog sa desierto, tanganing painomon ko an sakong banwaan, an sakong pinili, an banwaan na ginibo ko para sa sakuyang sadiri, tanganing isaysay ninda an sakong kaomawan.”​—Isaias 43:18-21.

¹⁸ Sa pagsabing, “dai nindo girumdomon an enot na mga bagay,” dai isinusuherir ni Jehova na haleon kan saiyang mga lingkod sa saindang isip an mga pagliligtas na ginibo nia kaidto. Sa katunayan, an dakol kaini kabtang kan ipinasabong nin Dios na kasaysayan kan Israel, asin ipinagboot ni Jehova na girumdomon taon-taon sa selebrasyon kan Paskua an pagdulag hale sa Egipto. (Levitico 23:5; Deuteronomio 16:1-4) Minsan siring, gusto ni Jehova ngonyan na pamurawayon sia kan saiyang banwaan huli sa “sarong bagong bagay”​—sarong bagay na maeeksperyensiahan ninda mismo. Bako sana an saindang pagkaligtas hale sa Babilonya an kaiba digdi kundi siring man an saindang milagrosong pagbaklay papuli, tibaad sa pag-agi sa mas deretsong ruta sa desierto. Sa alang na dagang iyan, magibo si Jehova “nin dalan” para sa sainda asin magibo nin makapangyarihan na mga gibo na magpapagirumdom kan saiyang ginibo para sa mga Israelita kan kaaldawan ni Moises​—tunay nanggad, pakakakanon nia sa desierto an mga nagbabaralik asin hahaleon nia an saindang pagkapaha paagi sa totoong mga salog. Magigin abundang marhay an mga probisyon ni Jehova kaya pati layas na mga hayop pamumurawayon an Dios asin dai sasalakayon an mga tawo.

19. Paanong naglalakaw sa “Dalan nin Kabanalan” an natatada kan espirituwal na Israel asin an saindang kairiba?

¹⁹ Kaagid kaiyan, kan 1919 an natatada kan espirituwal na Israel pinatalingkas sa pagkabihag sa Babilonya, asin nagpoon sindang lumakaw sa sarong ruta na inandam ni Jehova para sa sainda, an “Dalan nin Kabanalan.” (Isaias 35:8) Bakong arog kan mga Israelita, dai na ninda kinaipuhan na umagi sa mainiton na desierto paghale sa sarong geograpikong lugar pasiring sa saro pa, asin an saindang pagbaklay dai natapos sa laog nin pira sanang bulan kan makaabot sinda sa Jerusalem. Minsan siring, an “Dalan nin Kabanalan” talagang naggiya sa natatada kan linahidan na mga Kristiano pasiring sa espirituwal na paraiso. Sa saindang kaso, sinda nagdadanay sa “Dalan nin Kabanalan” na iyan, huling kaipuhan pa nindang magbaklay sa sistemang ini nin mga bagay. Sagkod na nagdadanay sinda sa dalan​—sagkod na sinusunod ninda an mga pamantayan nin Dios sa kalinigan asin kabanalan​—nagdadanay sinda sa espirituwal na paraiso. Asin kanigoan an kagayagayahan ninda na ibanan nin sarong dakulang kadaklan nin kairibang “bakong Israelita”! Kabaliktaran nanggad kan mga nag-aasa sa sistema ni Satanas, an natatada sagkod an saindang kairiba padagos na nagkakamit nin mayaman na espirituwal na bangkete sa kamot ni Jehova. (Isaias 25:6; 65:​13, 14) Huli sa pakamansay kan bendisyon ni Jehova sa saiyang banwaan, dakol na garo hayop na tawo an nagbago kan saindang ugale asin nagpamuraway sa tunay na Dios.​—Isaias 11:6-9.

Ipinaaram ni Jehova na Sia Nakolgan

20. Paano nagkulang ki Jehova an Israel kan kaaldawan ni Isaias?

²⁰ Kan suanoy na mga panahon an ibinalik na natatada kan Israel sarong nabagong banwaan kun ikokomparar sa maraot na kapag-arakian ni Isaias. May labot sa huri, si Jehova nagsasabi: “Dai ka nag-apod sa sako, O Jacob, huli ta napagal ka sa sako, O Israel. Dai mo dinara sa sako an mga karnero kan bilog na mga dolot na tinotong, asin paagi sa saimong mga atang dai mo ako pinamuraway. Dai ko ika pinirit na maglingkod sa sako na may darang balaog, ni pinagal ko ika huli sa kamangyan. Dai mo ako ibinakal nin mahamis na gaho sa ano man na kantidad; asin sa taba kan saimong mga atang dai mo ako binasog. Sa katunayan pinirit mo ako na maglingkod huli sa saimong mga kasalan; pinagal mo ako huli sa saimong mga sala.”​—Isaias 43:22-24.

21, 22. (a) Taano ta masasabi na bakong nakapagagabat an mga kahagadan ni Jehova? (b) Paanong ginibo kan banwaan na garo man sana si Jehova an pinapaglingkod ninda sa sainda?

²¹ Sa pagsabing, “Dai ko ika pinirit na maglingkod sa sako na may darang balaog, ni pinagal ko ika huli sa kamangyan,” dai isinusuherir ni Jehova na bakong kahagadan an atang asin kamangyan (sarong sangkap nin banal na insenso). Sa katunayan, an mga ini mahalagang kabtang kan tunay na pagsamba sa irarom kan tipan nin Ley. Totoo man iyan sa “gaho,” na nanonongod sa mahamot na kalamo, sarong sangkap nin banal na lanang panlahid. Napapabayaan na kan mga Israelita an paggamit kaini sa paglilingkod sa templo. Alagad nakapagagabat daw an siring na mga kahagadan? Dai nanggad! An mga kahagadan ni Jehova magian kun ikokomparar sa mga kahagadan kan falsong mga dios. Halimbawa, hinagad kan falsong dios na si Moloc an pag-atang nin aki​—bagay na nungkang hinagad ni Jehova!​—Deuteronomio 30:11; Miqueas 6:​3, 4, 8.

²² Kun may espirituwal na pakarisa lamang kutana an mga Israelita, dai kutana sinda ‘napagal ki Jehova.’ Paagi sa pagsiyasat sa saiyang Ley, maheheling ninda an saiyang hararom na pagkamoot sa sainda asin maoogmang itao sa saiya an “taba,” an pinakamarahay na kabtang kan saindang mga atang. Imbes, may kahanaban nindang itinago an taba para sa saindang sadiri. (Levitico 3:9-11, 16) Pinagal nanggad si Jehova kan maraot na nasyon na ini huli sa gabat kan saindang mga kasalan​—kaya garo man sana sia an pinapaglingkod ninda sa sainda!​—Nehemias 9:28-30.

May Ibinubunga an Disiplina

23. (a) Taano ta maninigo sana nanggad an disiplina ni Jehova? (b) Ano an kalabot sa pagdisiplina nin Dios sa Israel?

²³ Minsan ngani estrikto, asin maninigo sana nanggad, an disiplina ni Jehova nagbubunga kan minamawot na mga resulta, na ginigibong posible an pagkaherak. “Ako​—ako an Saro na nagpapara kan saimong mga paglapas huli sa sakuya, asin an saimong mga kasalan dai ko gigirumdomon. Pagirumdomon mo ako; magkaiba niatong ibugtak an satong sadiri sa paghokom; sabihon mo an saimong salaysay dapit dian tanganing mamugtak ka sa tama. An sadiri mong ama, an enot, nagkasala, asin an sadiri mong mga representante sa pagtaram [“mga interprete,” nota sa ibaba] na naglapas tumang sa sako. Kaya ibababa ko an mga prinsipe kan banal na lugar, asin itatao ko si Jacob na siring sa sarong tawong lalaglagon asin an Israel sa mga tataramon na mapan-abuso.” (Isaias 43:25-28) Arog kan gabos na nasyon sa kinaban, an Israel naggikan ki Adan, “an enot.” Huli kaini, mayo nin Israelita na makapagpapatunay na sia nasa “tama.” Dawa an “mga representante sa pagtaram” kan Israel​—an saiyang mga paratokdo, o mga interprete, kan Ley​—nagkasala tumang ki Jehova asin nagtokdo nin mga kaputikan. Huli kaini, itatao ni Jehova an saiyang bilog na nasyon sa ‘kalaglagan’ asin “sa mga tataramon na mapan-abuso.” Ibababa man nia an mga nangengenot sa saiyang “banal na lugar,” o santuaryo.

24. Sa anong pangenot na dahelan patatawadon ni Jehova an saiyang banwaan​—kan suanoy asin sa presenteng panahon​—pero, ano an namamatean nia para sa sainda?

²⁴ Pero mangnohon na an ibinungang pagkaherak nin Dios bako sanang huli sa pagbasol kan Israel; iyan huli ki Jehova man sana. Iyo, napapalabot an saiyang ngaran. Kun pababayaan nia an Israel na magin permanenteng desterrado, oolog-ologon kan mga nagmamasid an saiya mismong ngaran. (Salmo 79:9; Ezequiel 20:8-10) Siring man ngonyan, an kaligtasan nin mga tawo segunda sana sa pagkasantipikar kan ngaran ni Jehova asin sa pagkabindikar kan saiyang soberaniya. Minsan siring, namomotan ni Jehova an mga lubos na inaako an saiyang disiplina asin nagsasamba sa saiya sa espiritu asin katotoohan. Ipinaheheling nia an saiyang pagkamoot sa mga ini​—linahidan man o ibang karnero​—paagi sa pagpara kan saindang mga paglapas basado sa atang ni Jesu-Cristo.​—Juan 3:16; 4:​23, 24.

25. Anong nakapupukaw nin may pagkangirhat na paggalang an gigibohon ni Jehova sa harani nang ngapit, asin paano niato ikapaheheling an satong pag-apresyar ngonyan?

²⁵ Dugang pa, sa dai na mahahaloy ipaheheling ni Jehova an saiyang pagkamoot sa sarong dakulang kadaklan kan saiyang maimbod na mga parasamba kun gumibo na sia nin sarong bagong bagay para sa sainda paagi sa pagligtas sa sainda sa “dakulang kahorasaan” pasiring sa sarong lininig na “bagong daga.” (Kapahayagan 7:14; 2 Pedro 3:13) Maheheling mismo ninda an pinakamakangingirhat na paghayag kan kapangyarihan ni Jehova na naheling nin mga tawo kasuarin man. An siertong paghalat sa pangyayaring iyan an dahelan kaya an linahidan na natatada asin an gabos na makompuesto kan dakulang kadaklan naggagayagaya asin namumuhay kada aldaw kaoyon kan halangkawon na pagnombrang iyan: “Kamo an sakong mga saksi”!​—Isaias 43:10.

[Nota sa Ibaba]