Si Jesus na matrayumpong naglaog sa Jerusalem sakay nin sarong asno

Pinapatunayan Daw kan mga Hula sa Bibliya na si Jesus an Mesiyas?

An simbag kan Bibliya

Iyo. Mantang nasa daga si Jesus, nautob saiya an dakul na hula manungod sa “Mesiyas na Lider,” an saro na magigin “paraligtas kan kinaban.” (Daniel 9:25; 1 Juan 4:14) Asin dawa pagkagadan ni Jesus, padagos na nautob saiya an mga hula manungod sa Mesiyas.—Salmo 110:1; Gibo 2:34-36.

Ano an buot sabihon kan “Mesiyas”?

An termino sa Hebreo na Ma·shiʹach (Mesiyas) asin an katumbas kaiyan na Griegong tataramon na Khri·stos (Cristo) parehong nangangahulugan na “Linahidan.” Kaya an “Jesu-Cristo” nangangahulugan na “Jesus na Linahidan,” o “Jesus na Mesiyas.”

Kan mga panahon kan Bibliya, pag an sarong tawo ninonombrahan sa sarong espesyal na posisyon nin awtoridad, linalahidan siya paagi sa pagbubo nin lana sa saiyang payo. (Levitico 8:12; 1 Samuel 16:13) Ninombrahan nin Diyos si Jesus na magin Mesiyas—sarong posisyon na may dakulang awtoridad. (Gibo 2:36) Pero imbes na lana, linahidan nin Diyos si Jesus paagi sa banal na espiritu.—Mateo 3:16.

Posible daw na bako sanang sa sarong tawo nautob an mga hula manungod sa Mesiyas?

Dai. Kun paanong an fingerprint midbidan nin saro sanang tawo, an kautuban man kan mga hula sa Bibliya nagtutukdo sa saro sanang Mesiyas, o Cristo. Pero, nagpapatanid an Bibliya na “maralataw an mga bakong tunay na Cristo saka mga bakong tunay na propeta, asin magibo sinda nin darakulang tanda saka ngangalásan tanganing ilagalag, kun posible, pati an mga pinili.”—Mateo 24:24.

Malataw daw an Mesiyas sa maabot na panahon?

Dai. Ihinula kan Bibliya na an Mesiyas magigin gikan ni Hading David kan Israel. (Salmo 89:3, 4) Pero, mayo na an rekord nin ginikanan kan mga Judio puon kan panahon ni David, minalataw na naraot iyan kan sakupon kan mga Romano an Jerusalem kan 70 C.E.a Puon kan panahon na iyan, imposible na para sa siisay man na patunayan na hali siya sa maharlikang pamilya ni David. Sa kabaliktaran, dawa yaon pa kan panahon ni Jesus an mga rekord na iyan nin ginikanan, dai nanigaran dawa kan mga kaiwal niya na gikan siya ni David.—Mateo 22:41-46.

Pirang hula manungod sa Mesiyas an yaon sa Bibliya?

Imposibleng masabi kun pira an eksaktong bilang kan mga hula sa Bibliya manungod sa Mesiyas. Halimbawa, puwedeng iba-iba an paagi nin pagbilang nin mga hula dawa sa mga teksto na malinaw na hula manungod sa Mesiyas. Sa Isaias 53:2-7 mababasa ta an nagkapirang makahulang paglaladawan manungod sa Mesiyas. Puwedeng bilangon kan iba an bilog na rekord na ini bilang sarong hula, mantang an iba puwedeng bilangon ini na magkakasuway na hula.

Mga hula manungod sa Mesiyas na nautob ki Jesus

Hula	Mababasa sa	Kautuban
Gikan ni Abraham	Genesis 22:17, 18	Mateo 1:1
Naggikan sa aki ni Abraham na si Isaac	Genesis 17:19	Mateo 1:2
Ipinangaki sa Israelitang tribo nin Juda	Genesis 49:10	Mateo 1:1, 3
Hali sa linya nin mga hadi na gikan ki Hading David	Isaias 9:7	Mateo 1:1
Ipinangaki nin sarong birhen	Isaias 7:14	Mateo 1:18, 22, 23
Namundag sa Betlehem	Mikas 5:2	Mateo 2:1, 5, 6
Inapod sa pangaran na Immanuelb	Isaias 7:14	Mateo 1:21-23
Simple an pinaghalian	Isaias 53:2	Lucas 2:7
Ginadan an mga aki pagkatapos siyang ipangaki	Jeremias 31:15	Mateo 2:16-18
Inapod hali sa Ehipto	Oseas 11:1	Mateo 2:13-15
Inapod na Nazarenoc	Isaias 11:1	Mateo 2:23
May mensaherong nainot saiya	Malakias 3:1	Mateo 11:7-10
Linahidan bilang Mesiyas kan 29 C.E.d	Daniel 9:25	Mateo 3:13-17
Minidbid nin Diyos bilang Saiyang Aki	Salmo 2:7	Gibo 13:33, 34
Maigot para sa harong nin Diyos	Salmo 69:9	Juan 2:13-17
Parabalangibog kan maugmang bareta	Isaias 61:1	Lucas 4:16-21
Ministeryo sa Galilea sarong dakulang liwanag	Isaias 9:1, 2	Mateo 4:13-16
Naggibo nin mga milagro arog ni Moises	Deuteronomio 18:15	Gibo 2:22
Arog ni Moises, an sinasabi niya iyo an kaisipan nin Diyos	Deuteronomio 18:18, 19	Juan 12:49
Pinaumayan niya an hilang kan dakul	Isaias 53:4	Mateo 8:16, 17
Bako siyang mapagpasikat	Isaias 42:2	Mateo 12:17, 19
Nagpahiling nin pagmalasakit sa mga nasasakitan	Isaias 42:3	Mateo 12:9-20; Marcos 6:34
Ipinahiling an hustisya nin Diyos	Isaias 42:1, 4	Mateo 12:17-20
Sarong Makangangalas na Parakonseho	Isaias 9:6, 7	Juan 6:68
Ipinahayag an pangaran ni Jehova	Salmo 22:22	Juan 17:6
Nagtaram gamit an mga ilustrasyon	Salmo 78:2	Mateo 13:34, 35
Sarong Lider	Daniel 9:25	Mateo 23:10
Dakul an dai nagtubod sa saiya	Isaias 53:1	Juan 12:37, 38
Gapong singkugan	Isaias 8:14, 15	Mateo 21:42-44
Isinikwal nin mga tawo	Salmo 118:22, 23	Gibo 4:10, 11
Ikinaungis na mayo nin dahilan	Salmo 69:4	Juan 15:24, 25
Matrayumpong naglaog sa Jerusalem sakay nin sarong asno	Zacarias 9:9	Mateo 21:4-9
Inumaw kan mga aki	Salmo 8:2	Mateo 21:15, 16
Nag-abot sa ngaran ni Jehova	Salmo 118:26	Juan 12:12, 13
Trinaydor nin sarong pinagkakatiwalaan na kaiba-iba	Salmo 41:9	Juan 13:18
Trinaydor karibay nin 30 pidasong pirake	Zacarias 11:12, 13	Mateo 26:14-16; 27:3-10
Binayaan kan mga amigo niya	Zacarias 13:7	Mateo 26:31, 56
Nagtestigo laban saiya an putikon na mga testigo	Salmo 35:11	Mateo 26:59-61
Nagsilensiyo sa atubangan kan mga nag-aakusar	Isaias 53:7	Mateo 27:12-14
Linutaban	Isaias 50:6	Mateo 26:67; 27:27, 30
Pinukpok sa payo	Mikas 5:1	Marcos 15:19
Hinampak	Isaias 50:6	Juan 19:1
Dai naglaban sa mga naghampak saiya	Isaias 50:6	Juan 18:22, 23
Nagkurumplutan an mga lider nin gobyerno laban saiya	Salmo 2:2	Lucas 23:10-12
Ipinako sa harigi an saiyang mga kamot saka mga bitis	Salmo 22:16	Mateo 27:35; Juan 20:25
Nagburunutan (nagsugal) an mga tawo para sa saiyang gubing	Salmo 22:18	Juan 19:23, 24
Ibinilang na kaiba kan mga parakasala	Isaias 53:12	Mateo 27:38
Linait, ininsulto	Salmo 22:7, 8	Mateo 27:39-43
Nagsakit para sa mga parakasala	Isaias 53:5, 6	1 Pedro 2:23-25
Garo baga pinabayaan nin Diyos	Salmo 22:1	Marcos 15:34
Tinawan nin sukà asin apdo para inumon	Salmo 69:21	Mateo 27:34
Napaha bago magadan	Salmo 22:15	Juan 19:28, 29
Ipinagkatiwala an espiritu sa Diyos	Salmo 31:5	Lucas 23:46
Itinao an saiyang buhay	Isaias 53:12	Marcos 15:37
Itinao an pantubos para halion an kasalan	Isaias 53:12	Mateo 20:28
Dai nabari an mga tulang	Salmo 34:20	Juan 19:31-33, 36
Tinusok	Zacarias 12:10	Juan 19:33-35, 37
Ilinubong kaiba kan mga mayaman	Isaias 53:9	Mateo 27:57-60
Ibinangon hali sa mga gadan	Salmo 16:10	Gibo 2:29-31
Sinalidahan an nagtraydor	Salmo 109:8	Gibo 1:15-20
Nagtukaw sa may tuo nin Diyos	Salmo 110:1	Gibo 2:34-36

a An Cyclopedia ni McClintock asin Strong nagsasabi: “Siguradong naraot an rekord nin ginikanan kan mga tribo asin pamilya kan mga Judio kan wasakon an Jerusalem, bakong bago kaiyan.”

b An Hebreong pangaran na Immanuel, na nangangahulugan na “Yaon sa Sato an Diyos,” angay nanggad na deskripsiyon sa papel ni Jesus bilang an Mesiyas. An presensiya niya digdi sa daga asin an mga ginibo niya patunay na an Diyos kaiba kan Saiyang mga parasamba.—Lucas 2:27-32; 7:12-16.

c An terminong “Nazareno” minalataw na hali sa Hebreong tataramon na neʹtser, na nangangahulugan na “supang.”

d Para sa mga detalye kan kronolohiya kan Bibliya na nagtutukdo sa 29 C.E. bilang an taon kan pag-abot kan Mesiyas, hilingon an artikulong “Kun Paano Isinabi kan Hula ni Daniel an Pagdatong kan Mesiyas.”

e An hulang ini yaon sa libro nin Zacarias, pero an kagsurat kan Bibliya na si Mateo nagsabi na iyan “sinabi paagi ki Jeremias na propeta.” (Mateo 27:9) Minalataw na an libro nin Jeremias kun minsan ilinalaag sa inutan na seksiyon kan Kasuratan na inaapod na “mga Propeta.” (Lucas 24:44) Malinaw na an sinasabi ni Mateo kan gamiton niya an “Jeremias” iyo an bilog na koleksiyon nin mga librong iyan, kaiba na an libro nin Zacarias.