Hula ni Isaias—Liwanag Para sa Bilog na Katawohan II

Kapitulo Desisiete: Tinitipon an mga Taga Ibang Daga sa Harong nin Pamibi nin Dios

Isaias 56:1-12

1, 2. Anong nakapupukaw sa boot na paisi an itinao kan 1935, asin kabtang ini nin ano?

KAN Biernes, Mayo 31, 1935, nagpahayag si Joseph F. Rutherford sa sarong kadaklan na nasa kombension sa Washington, D.C. Ipinaliwanag nia an midbidan kan “dakulang kadaklan,” o “dakulang kaburunyogan,” na naheling ni apostol Juan sa bisyon. Sa kulminasyon kan pahayag ni Tugang na Rutherford, naghapot sia: “Puede daw tumindog tabi an gabos na may paglaom na mabuhay sagkod lamang digdi sa daga?” Segun sa saro na kabilang sa mga nag-atender, “labing kabanga kan mga nagdadangog an nagtirindog.” Dangan sinabi kan espiker: “Uya! An dakulang kaburunyogan!” Nagigirumdoman nin saro pa na presente kaidto: “Nagkaigwa nguna nin pagsilensio, dangan nin maogmang kurahaw, asin makosog saka halawig an pag-upak na nagkukururahaw.”​—Kapahayagan 7:9; King James Version.

² Sarong pambihirang panahon iyan sa padagos na pagkaotob nin sarong hula na isinurat mga 2,700 na taon na an nakaagi asin minalataw bilang an Isaias kapitulo 56 sa satong mga Biblia. Siring kan dakol na iba pang hula sa Isaias, igwa ini nin nakararangang mga panuga sagkod mapuersang mga patanid. Sa enot na kaotoban, iyan para sa katipan na banwaan nin Dios kan kaaldawan mismo ni Isaias, alagad an kaotoban kaiyan nakaabot sa dakol na siglo sagkod sa satong kaaldawan.

Kun Ano an Kahagadan Para sa Kaligtasan

 3. Kun gusto kan mga Judio na magkamit nin kaligtasan hale sa Dios, ano an dapat nindang gibohon?

³ An Isaias kapitulo 56 nagpopoon paagi sa pagtao nin konseho sa mga Judio. Minsan siring, maninigong himateon kan gabos na tunay na parasamba an isinurat kan propeta. Mababasa niato: “Iyo ini an isinabi ni Jehova: ‘Susoga nindo nin fiel an hustisya, banwaan, asin giboha nindo an matanos. Huli ta an sakong pagliligtas harani nang dumatong, asin an sakong katanosan mahayag. Maogma an magagadanon na tawo na naggigibo kaini, asin an aki nin katawohan na nangangapot dian, na fiel na sinususog an sabbath tangani na dai iyan malanghadan, asin iniingatan an saiyang kamot tangani na dai makagibo nin ano man na klase nin karatan.’ ” (Isaias 56:​1, 2) An mga nag-eerok sa Juda na gustong magkamit nin kaligtasan hale sa Dios dapat na sumunod sa Ley ni Moises, na inootob an hustisya asin namumuhay nin matanos. Taano? Huli ta si Jehova mismo matanos. Nakakamtan kan mga nagsusunod sa katanosan an kaogmahan na bunga kan pag-oyon ni Jehova.​—Salmo 144:15b.

 4. Taano ta mahalaga sa Israel an pag-otob kan Sabbath?

⁴ Itinatampok kan hula an pag-otob sa Sabbath huli ta an Sabbath sarong mahalagang kabtang kan Ley ni Moises. Sa katunayan, an saindang pagpabaya sa Sabbath saro sa mga dahelan kun taano ta sa kahurihurihi nadistiero an mga nag-eerok sa Juda. (Levitico 26:​34, 35; 2 Cronica 36:​20, 21) An Sabbath sarong tanda kan espesyal na relasyon ni Jehova sa mga Judio, asin an mga nag-ootob kan Sabbath nagpapaheling na pinahahalagahan ninda an relasyon na iyan. (Exodo 31:13) Dugang pa, an pag-otob kan Sabbath magpapagirumdom sa mga katemporanyo ni Isaias na si Jehova an Kaglalang. An pag-otob na iyan magpapagirumdom man kan mga pagkaherak nia sa sainda. (Exodo 20:8-11; Deuteronomio 5:12-15) Ultimo, an pag-otob kan Sabbath magpapangyari nin regular, organisadong areglo sa pagsamba ki Jehova. An pagpahingalo sa saindang regular na trabaho sarong beses kada semana magtatao nin oportunidad sa mga nag-eerok sa Juda na mamibi, mag-adal, asin maghorophorop.

 5. Bilang prinsipyo, paano ikaaaplikar kan mga Kristiano an konseho na otobon an Sabbath?

⁵ Pero kumusta man an mga Kristiano? Aplikado daw sainda an pag-enkaminar na otobon an Sabbath? Dai man direktang aplikado, huli ta an mga Kristiano dai sakop kan Ley asin kun siring dai hinahagadan na otobon an Sabbath. (Colosas 2:​16, 17) Pero, ipinaliwanag ni apostol Pablo na igwa nin “pagpahingalo sa sabbath” para sa fiel na mga Kristiano. Kalabot sa “pagpahingalo sa sabbath” na ini an pagkaigwa nin pagtubod sa atang na pantubos ni Jesus para sa kaligtasan asin pag-ontok sa pagsarig sa mga gibo sana. (Hebreo 4:6-10) Huli kaini, an mga tataramon sa hula ni Isaias mapadapit sa Sabbath nagpapagirumdom sa mga lingkod ni Jehova ngonyan kan mahalagang marhay na pangangaipo na magtubod sa areglo nin Dios para sa kaligtasan. Marahay na pagirumdom man iyan sa pangangaipong kultibaron an haraning relasyon ki Jehova asin sunodon an dalan nin regular, daing liwat-liwat na pagsamba.

Karangahan Para sa mga Taga Ibang Daga Asin sa mga Kapon

 6. Anong duwang grupo an tinatawan nin atension ngonyan?

⁶ Kaolay ngonyan ni Jehova an duwang grupo na gustong maglingkod sa saiya alagad segun sa Ley ni Moises dai kualipikadong lumaog sa kongregasyon nin mga Judio. Mababasa niato: “Dai magsabi an taga ibang daga na nakisumaro ki Jehova, ‘Daing duwa-duwa na isusuhay ako ni Jehova sa saiyang banwaan.’ Ni sabihon man kan kapon, ‘Uya! Ako kahoy na alang.’ ” (Isaias 56:3) Natatakot an taga ibang daga na sia isusuway sa Israel. Nahahadit an kapon na sia dai noarin man magkakaigwa nin mga aki tanganing papagdanayon an saiyang ngaran. An duwang grupong iyan maninigong kosogan an saindang boot. Bago niato aramon kun taano, estudyaran niato kun ano an kamugtakan ninda sa irarom kan Ley may koneksion sa nasyon nin Israel.

 7. Anong mga limite an ibinugtak kan Ley sa mga taga ibang daga sa Israel?

⁷ An mga bakong turi na taga ibang daga dai tinotogotan na makikabtang sa pagsamba kaiba kan Israel. Halimbawa, dai sinda tinotogotan na makikabtang sa Paskua. (Exodo 12:43) An mga taga ibang daga na dai man hayag na naglalapas sa mga ley kan daga nagkakamit nin hustisya asin pag-istimar, alagad mayo sinda nin permanenteng relasyon sa nasyon. Siempre, an nagkapira maogmang inako nin lubos an Ley, asin bilang tanda kaini, an mga lalaki nagpaturi. Dangan sinda nagigin proselita, na may pribilehiong magsamba sa patyo kan harong ni Jehova asin ibinibilang na kabtang kan kongregasyon nin Israel. (Levitico 17:10-14; 20:2; 24:22) Minsan siring, dawa an mga proselita dai biyong kabale sa tipan ni Jehova sa Israel, asin mayo nin pamanang daga sa sainda sa Dagang Panuga. An nagkapirang taga ibang daga puedeng umatubang sa templo tanganing mamibi, asin minalataw na puede sindang magdolot nin mga atang paagi sa mga saserdote basta an mga atang komporme sa Ley. (Levitico 22:25; 1 Hade 8:41-43) Alagad an mga Israelita dai dapat makiasosyar nin dayupot sa sainda.

An mga Kapon Nag-ako nin Sarong Ngaran Sagkod sa Panahon na Daing Talaan

 8. (a) Sa irarom kan Ley, paano minamansay an mga kapon? (b) Paano ginamit kaidto an mga kapon sa paganong mga nasyon, asin sa ano kun beses nanonongod an terminong “kapon”?

⁸ An mga kapon, dawa pa ipinangaki nin mga Judiong magurang, dai tinotogotan na magin lubos an pagkamiembro sa nasyon nin Israel.a (Deuteronomio 23:1) Sa nagkapirang paganong nasyon kaidtong mga panahon kan Biblia, an mga kapon may espesyal na kabtang asin nagin kostumbre nang kaponon an nagkapira sa mga aking nabihag sa guerra. An mga kapon ninonombrahan kaidto bilang mga opisyal sa mga palasyo. An sarong kapon puedeng magin “bantay sa mga babae,” “bantay sa mga sambay,” o katabang kan reyna. (Ester 2:​3, 12-15; 4:4-6, 9) Mayong ebidensia na sinunod kan mga Israelita an siring na mga kaugalean o na an mga kapon partikularmenteng hinahanap tanganing maglingkod sa mga hadeng Israelita.b

 9. Anong nakararangang mga tataramon an sinabi ni Jehova sa mga kapon sa pisikal?

⁹ Apuera sa pagigin limitado sana kan saindang pakikikabtang sa pagsamba sa tunay na Dios, an mga kapon sa pisikal sa Israel nag-aagi nin grabeng kasusupgan huli sa pagkadaing kakayahan na magkaaki na madara kan ngaran nin pamilya ninda. Kun siring, nakararanga nanggad an sunod na mga tataramon kan hula! Mababasa niato: “Siring an sabi ni Jehova sa mga kapon na nag-ootob kan sakong mga ­sabbath asin nagpili kan sakong naogmahan patin nangangapot sa sakong tipan: ‘Tatawan ko sinda sa sakong harong asin sa laog kan sakong mga lanob nin girumdoman asin ngaran, bagay na mas marahay kisa mga aking lalaki asin aking babae. Ngaran sagkod sa panahon na daing talaan an itatao ko sainda, saro na dai puputolon.’ ”​—Isaias 56:​4, 5.

10. Kasuarin naliwat an situwasyon kan mga kapon, asin anong pribilehio an nabukasan sa sainda poon kaidto?

¹⁰ Iyo, maabot an panahon na dawa an pagigin kapon sa pisikal dai na magigin kaolangan tanganing biyong akoon bilang lingkod ni Jehova. Kun makinuyog, an mga kapon magkakaigwa “nin girumdoman,” o sarong lugar, sa harong ni Jehova asin nin ngaran, na mas marahay kisa mga aking lalaki asin aking babae. Noarin ini mangyayari? Pagkagadan sana ni Jesu-Cristo. Kan panahon na idto an daan na Tipan nin Ley sinalidahan kan bagong tipan, asin an Israel sa laman sinalidahan kan “Israel nin Dios.” (Galacia 6:16) Poon kaidto, an gabos na nagtutubod puede nang magtao nin inaakong pagsamba sa Dios. Bako nang mahalaga an mga pagkakalaen sa laman asin kamugtakan sa pisikal. An mga makatatagal nin fiel, ano man an saindang kamugtakan sa pisikal, magkakaigwa nin “ngaran sagkod sa panahon na daing talaan . . . saro na dai puputolon.” Dai sinda lilingawan ni Jehova. An saindang ngaran isusurat sa saiyang “libro nin girumdoman,” asin sa itinalaan na panahon nin Dios, maako sinda nin buhay na daing katapusan.​—Malaquias 3:16; Talinhaga 22:1; 1 Juan 2:17.

An mga Taga Ibang Daga Nagsasamba sa Kaibahan kan Banwaan nin Dios

11. Tanganing umako nin mga bendisyon, ano an inenkaminar na gibohon kan mga taga ibang daga?

¹¹ Pero kumusta man an mga taga ibang daga? Binabalikan ngonyan kan hula an mga ini, asin si Jehova may mga tataramon nin dakulang karangahan para sa sainda. Si Isaias nagsurat: “An mga taga ibang daga na nagdorolok ki Jehova tanganing maglingkod sa saiya asin kamotan an ngaran ni Jehova, tanganing magin mga lingkod nia, an gabos na nag-ootob kan sabbath tanganing dai iyan malanghadan asin nangangapot sa sakong tipan, dadarahon ko man sinda sa sakong banal na bukid asin pagagayagayahon ko sinda sa laog kan sakong harong nin pamibi. An saindang bilog na mga dolot na tinotong asin an saindang mga atang aakoon sa sakong altar. Huli ta an sadiri kong harong aapodon na harong nin pamibi para sa gabos na banwaan.”​—Isaias 56:​6, 7.

12. Ano an dating pakasabot mapadapit sa hula ni Jesus manongod sa “ibang karnero”?

¹² Luway-luway na naglataw an “mga taga ibang daga” sa satong kapanahonan. Bago an enot na guerra mundial, nasabotan na mas dakol an kabilangan kan mga indibiduwal na maako nin kaligtasan kisa kabilangan kan mga may paglaom na mamahala sa langit kaiba ni Jesus​—an mga rinerekonoser niato ngonyan bilang an Israel nin Dios. Aram kan mga Estudyante sa Biblia an mga tataramon ni Jesus na nakasurat sa Juan 10:16: “Igwa pa ako nin ibang karnero, na bakong sa toril na ini; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.” Nasabotan na an “ibang karnero” na ini sarong grupong daganon. Alagad an kadaklan sa mga estudyante sa Biblia naniwala na malataw an ibang karnero durante kan Milenyal na Paghade ni Jesu-Cristo.

13. Taano ta ipinangatanosan na an mga karnero sa Mateo kapitulo 25 dapat na lumataw sa ultimong mga aldaw kan sistemang ini nin mga bagay?

¹³ Pag-abot nin panahon, orog pang nasabotan an sarong konektadong teksto na nagtataram manongod sa mga karnero. Sa Mateo kapitulo 25, nakarekord an sarong parabola ni Jesus kan mga karnero asin kanding. Segun sa parabolang iyan, an mga karnero nag-aako nin buhay na daing katapusan huli ta sinusuportaran ninda an mga tugang ni Jesus. Huli kaini, sinda sarong grupo na siblag asin napapalaen sa linahidan na mga tugang ni Cristo. Kan 1923, durante nin sarong kombension sa Los Angeles, California, E.U.A., ipinaliwanag na an mga karnerong idto dapat na lumataw, bakong sa panahon kan Milenyo, kundi durante kan ultimong mga aldaw kan sistemang ini nin mga bagay. Taano? Huli ta itinao ni Jesus an parabola bilang kabtang kan saiyang simbag sa hapot na: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan sistema nin mga bagay?”​—Mateo 24:3.

14, 15. Paano orog na nasabotan an kamugtakan kan ibang karnero sa panahon kan katapusan?

¹⁴ Durante kan mga taon nin 1920, nagsaboot an nagkapirang indibiduwal na asosyado sa Mga Estudyante sa Biblia na dai nagpapatotoo sa sainda an banal na espiritu ni Jehova na sinda may langitnon na pag-apod. Pero sinda maigot na mga lingkod kan Kaharohalangkaweng Dios. Kan 1931 mas nasabotan an kamugtakan kan mga ini kan ipublikar an librong Vindication. Bilang kabtang kan bersikulo-por-bersikulong pagtokar kan libro sa Biblia na Ezequiel, ipinaliwanag kan Vindication an bisyon kan “lalaki” na may tintero nin parasurat. (Ezequiel 9:1-11) An “lalaki” na ini maheheling na naglilibot sa Jerusalem asin nagbubugtak nin tanda sa angog kan mga nag-aaragagha asin nag-aaragrangay huli sa makababaldeng mga bagay na ginigibo duman. “An lalaki” nagrerepresentar sa mga tugang ni Jesus, an natatada kan linahidan na mga Kristiano na nabubuhay sa daga durante kan panahon nin paghokom sa antitipikong Jerusalem, an Kakristianohan. An mga tinatandaan iyo an ibang karnero na nabubuhay durante kan panahon na iyan. Sa bisyon ilinigtas sinda kan gibohon kan mga parakastigo ni Jehova an pamamalos sa apostatang siudad na iyan.

¹⁵ Kan 1932, ipinarisa nin mas hararom na pakasabot sa makahulang drama manongod ki Hadeng Jehu nin Israel asin ki Jonadab, sarong bakong Israelita na parasuportar, kun paano mahiro an ibang karnerong ini bilang pagsuportar sa linahidan na mga tugang ni Cristo​—kun paanong si Jonadab uminiba asin sinuportaran si Jehu sa saiyang paglaglag sa pagsamba ki Baal. Sa katapustapusi, kan 1935, an ibang karnero na nabubuhay durante kan panahon kan katapusan kan sistemang ini nin mga bagay namidbid bilang iyo an dakulang kadaklan na naheling sa bisyon ni apostol Juan. Ipinaliwanag ini nin enot sa nasambit na kombension sa Washington D.C., kan itokdo ni Joseph F. Rutherford an mga may daganon na paglaom bilang iyo “an dakulang kaburunyogan.”

16. Anong mga pribilehio asin paninimbagan an yaon sa “mga taga ibang daga”?

¹⁶ Sa siring luway-luway na naheling na may dakulang kabtang “an mga taga ibang daga” sa mga katuyohan ni Jehova durante kan mga huring aldaw na ini. Minadolok sinda sa Israel nin Dios tanganing sambahon si Jehova. (Zacarias 8:23) Kaiba kan espirituwal na nasyon na iyan, sinda nagtatao nin inaakong mga atang sa Dios asin minalaog sa kapahingaloan sa sabbath. (Hebreo 13:​15, 16) Dugang pa, sinda nagsasamba sa espirituwal na templo nin Dios, na sarong “harong nin pamibi para sa gabos na nasyon,” siring kan templo sa Jerusalem. (Marcos 11:17) Nagtutubod sinda sa atang na pantubos ni Jesu-Cristo, na ‘hinuhugasan an saindang mga gubing asin pinapuputi iyan sa dugo kan Kordero.’ Asin dayaday sindang naglilingkod ki Jehova, na “nagtatao sa saiya nin sagradong paglilingkod aldaw asin banggi.”​—Kapahayagan 7:​14, 15.

17. Paano nangangapot sa bagong tipan an mga taga ibang daga sa presenteng aldaw?

¹⁷ An mga taga ibang daga na ini sa presenteng aldaw nangangapot sa bagong tipan sa sentido na paagi sa pakikiasosyar sa Israel nin Dios, nakakamtan ninda an mga pakinabang asin bendisyon na ibinubunga kan bagong tipan. Minsan ngani bako sindang kabale sa tipan na iyan, bilog na puso sindang nagpapasakop sa mga ley na konektado dian. Sa siring nasa puso ninda an ley ni Jehova, asin namimidbid ninda si Jehova bilang langitnon na Ama ninda asin an supremong Soberano.​—Jeremias 31:​33, 34; Mateo 6:9; Juan 17:3.

18. Anong pagtitipon an ginigibo durante kan panahon kan katapusan?

¹⁸ An hula ni Isaias nagpapadagos: “Ini an sabi kan Soberanong Kagurangnan na Jehova, na nagtitipon kan mga nagkasuruway sa Israel: ‘Titiponon ko sa saiya an iba pa apuera sa mga natipon na dian sa saiya.’ ” (Isaias 56:8) Durante kan panahon nin katapusan, natipon na ni Jehova an “mga nagkasuruway sa Israel,” an mga kabilang sa linahidan na natatada. Dugang pa, tinitipon nia an iba, an mga kabilang sa dakulang kadaklan. Sinda iribang nagsasamba na may katoninongan asin pagkaoroyon sa irarom kan pangangataman ni Jehova asin kan saiyang pinatukaw sa tronong Hade, si Cristo Jesus. Huli sa saindang kaimbodan sa gobyerno ni Jehova paagi ki Cristo, pinagsaro sinda kan Marahay na Pastor tangani na magin nagkakasararo, magayagayang aripompon.

Butang mga Bantay, Pulang mga Ayam

19. Anong pangagda an ipinaabot sa mabangis na mga hayop sa langtad asin kadlagan?

¹⁹ An nasambitan sa enotan na mga tataramon na nakapaoogma asin nakapakokosog sinundan nin nakaaapod nin atension asin biyong nakakukubhan na kabaliktaran. Si Jehova andam na humiro na may pagkaherak sa mga taga ibang daga asin kapon. Alagad an dakol na naghihingakong miembro kan kongregasyon nin Dios kinokondenar asin nakatagama sa paghokom. Labi pa dian, dai ngani sinda angay sa disenteng lubong asin bagay sanang sibaon nin naninibang mabangis na mga hayop. Sa siring, mababasa niato: “Kamo gabos na mabangis na hayop sa mahiwas na langtad, madia kamo tangani na kumakan, kamo gabos na mabangis na hayop sa kadlagan.” (Isaias 56:9) Sa ano magpapainggusto an mabangis na mga hayop na ini? Ipaliliwanag ini kan hula. Sa paggibo kaiyan, puedeng ipagirumdom ­kaiyan sa sato an kaaabtan kan mga nagkokontra sa Dios sa nagdadangadang na guerra nin Armagedon, na an bangkay kan mga ginaradan pababayaan na sibaon kan mga gamgam sa langit.​—Kapahayagan 19:​17, 18.

20, 21. Anong mga pagkukulang an dahelan kan pagigin daing serbing mga giya sa espirituwal kan mga namomoon sa relihion?

²⁰ An hula nagpapadagos: “An mga bantay nia buta. Mayo nin siisay man sa sainda an nagtaong atension. Sinda gabos pulang mga ayam; dai sinda makabatok, naghahalhal, naghihigda, mahilig magtungka. Mga ayam pa ngani sinda na makosog an mawot kan kalag; dai sinda tataong mabasog. Mga pastor man sinda na dai nakanood na makasabot. Sinda gabos buminirik sa sadiri nindang dalan, an balang saro sa saiyang madayang ganansia sa saiyang sadiring linderos: ‘Madia kamo! Makua ako nin arak; asin uminom kita nin nakabuburat na arak sagkod na mainggustohan. Asin nuodma magigin siring nanggad ngonyan na aldaw, dakula sa nangongorog na marhay na paagi.’ ”​—Isaias 56:10-12.

²¹ An mga namomoon sa relihion sa Juda naghihingako na nagsasamba ki Jehova. Sinda daa an “mga bantay nia.” Alagad sinda buta, pula, asin tinutungka sa espirituwal. Kun dai sinda padagos na magbabantay asin magpapatanid dapit sa peligro, ano pa an serbi ninda? An siring na relihiosong mga bantay mayong pakasabot, mayo sa kamugtakan na magtao nin espirituwal na paggiya sa mga tawong arog-karnero. Apuera dian, sinda maraot. Dai naiinggustohan an saindang maimot na mga mawot. Imbes na sunodon an paggiya ni Jehova, sinusunod ninda an saindang sadiring dalan, naghahanap nin madayang ganansia, nagpapangana sa nakabuburat na arak, asin ineenkaminar an iba na gibohon man iyan. Sinda daing pagrisa nanggad sa nagdadangadang na paghokom nin Dios kaya sinasabi ninda sa banwaan na mayo sinda nin dapat ikahadit.

22. Paanong an mga namomoon sa relihion kan kaaldawan ni Jesus kapareho man sana kan sa suanoy na Juda?

²² Sa naenot na kabtang kan saiyang hula, naggamit si Isaias nin kaagid na piguratibong pagtaram tanganing iladawan an bakong fiel na mga namomoon sa relihion sa Juda​—burat, tungka, asin daing pakasabot sa espirituwal. Pinagabatan ninda an banwaan nin mga tradisyon nin tawo, nagtaram nin mga kaputikan manongod sa relihion, asin nagtiwala sa Asir­ia para sa tabang imbes na umasa sa Dios. (2 Hade 16:5-9; Isaias 29:​1, 9-14) Malinaw na mayo sindang nanodan. Makamomondo, igwa man nin siring na klase nin mga namomoon kan enot na siglo. Imbes na maogmang akoon an maogmang bareta na dara sa sainda kan mismong Aki nin Dios, hinaboan ninda si Jesus asin nakipagkasapakat tangani na ipagadan sia. Prankang inapod sinda ni Jesus na “butang mga parakabit,” na nagsasabi pa na kun “an buta magkabit sa buta, pareho sinda mahoholog sa kotkot.”​—Mateo 15:14.

Mga Bantay Ngonyan

23. Anong hula ni Pedro mapadapit sa relihiosong mga namomoon an naotob?

²³ Nagpatanid si apostol Pedro na malataw man an falsong mga paratokdo tanganing ilagalag an mga Kristiano. Sia nagsurat: “Nagkaigwa man nin falsong mga propeta sa tahaw kan banwaan [nin Israel], kun paanong magkakaigwa man nin falsong mga paratokdo sa tahaw nindo. An mga ini mismo hilom na magdadara sa laog nin nakalalaglag na mga sekta asin magpapainda minsan sa kagsadiri na buminakal sa sainda, na nagdadara sa sainda man sana nin marikas na pagkalaglag.” (2 Pedro 2:1) Ano an nagin resulta kan falsong mga katokdoan asin sektaryanismo kan siring na falsong mga paratokdo? An Kakristianohan, na an mga namomoon sa relihion kaini ngonyan namimibi na bendisyonan nin Dios an saindang mga katood sa politika dangan nanunuga nin maogmang ngapit. An relihiosong mga namomoon sa Kakristianohan napatunayan na buta, pula, asin torog mapadapit sa espirituwal na mga bagay.

24. Anong pagkasararo an yaon sa pag-oltanan kan espirituwal na Israel asin kan mga taga ibang daga?

²⁴ Minsan siring, dinadara ni Jehova sa saiyang dakulang espirituwal na harong nin pamibi an minilyon na taga ibang daga tanganing sumamba kaiba kan ultimong mga kabilang sa Israel nin Dios. An mga taga ibang daga na ini, minsan ngani hale sa dakol na nasyon, rasa, asin tataramon, may pagkasararo sa tahaw ninda asin sa kaibahan kan Israel nin Dios. Kombensido sinda na an kaligtasan puede sanang maggikan ki Jehova Dios paagi ki Jesu-Cristo. Motibado nin pagkamoot ki Jehova, nakikiiba sinda sa linahidan na mga tugang ni Cristo sa pagtaram manongod sa saindang pagtubod. Asin sinda narangang marhay kan mga tataramon kan pinasabngan na apostol na nagsurat: “Kun ika magpahayag sa publiko kan ‘tataramon sa saimong sadiring ngoso,’ na si Jesus Kagurangnan, asin gumibo ka nin pagtubod sa saimong puso na binuhay sia liwat nin Dios hale sa mga gadan, ika maliligtas.”​—Roma 10:9.

[Mga Nota sa Ibaba]