‘Temporaryong mga Residente’ na Nagkakasararo sa Tunay na Pagsamba

 1. Ano an paghiling nin ibang tawo sa mga dayuhan, pero taano ta bako iyan makatanosan?

SEGUN sa nakaaging artikulo, ginagamit kan mga tawo an tataramon na “dayuhan” sa mapagmenos na paagi, na nagpaparisa nin paghamak, biyong pagkauyam pa ngani. Pero, kadaihan nin galang na isipon nin saro na an mga taga ibang nasyon hababa kisa mga kanasyon nia. Saka tanda iyan na dai niato aram an katunayan. An publikasyon na The Races of Mankind nagsasabi: “An mga tawo sa manlaenlaen na rasa, sabi kan Biblia, magturugang.” An magturugang sa parate medyo magkakalaen, pero magturugang pa man giraray sinda.

2, 3. Ano an pagmansay ni Jehova sa mga dayuhan?

² Siempre, saen man na nasyon kita, igwang mga dayuhan. Arog man kaiyan an suanoy na mga Israelita, na paagi sa tipan na Ley nagkaigwa nin espesyal na relasyon ki Jehova Dios. Medyo limitado an mga deretso kan mga bakong Israelita, alagad kahagadan sa mga Israelita na trataron sinda nin pantay asin may paggalang. Marahayon nanggad na halimbawa na dapat niatong sunodon! An pagpaorog o pagpalaenlaen mayong lugar sa tunay na mga Kristiano. Taano? Si apostol Pedro nagsabi: ‘Sa katotoohan ako nakakaisi na an Dios dai nagpapalaen nin mga tawo. Alagad sa arin man na nasyon, an natatakot saiya asin naggigibo nin katanosan iyo an inaako nia.’—Gui. 10:34, 35.

³ An mga dayuhan sa suanoy na Israel nakinabang sa pakikiibaiba ninda sa mga Israelita. Nahihiling digdi an pagmansay ni Jehova sa mga dayuhan, kaya pakalihis nin dakol na taon si apostol Pablo naghapot dapit ki Jehova: ‘An Dios, Dios nin mga Judio sana? Bakong Dios man sia nin mga Gentil? Oho, nin mga Gentil man.’—Roma 3:29; Joel 2:32.

 4. Taano ta masasabi na mayong dayuhan sa “Israel nin Dios”?

⁴ Paagi sa bagong tipan, an literal na Israel nasalidahan kan kongregasyon nin linahidan na mga Kristiano bilang nasyon na magkakaigwa nin espesyal na relasyon sa Dios. Kaya inaapod iyan na “Israel nin Dios.” (Gal. 6:16) Asin siring sa ipinaliwanag ni Pablo, sa bagong nasyon na ini ‘dai magkakaigwa nin Griego asin Judio, tinuri asin dai tinuri, [dayuhan], Escita, oripon, [talingkas]; kundi si Cristo iyo an gabos asin nasa gabos.’ (Col. 3:11) Huli kaiyan, mayong dapat ibilang na dayuhan sa Kristianong kongregasyon.

5, 6. (a) Ano an tibaad ihapot mapadapit sa Isaias 61:5, 6? (b) Sairisay an “mga saserdote ni Jehova” asin “an mga dayuhan” na sinambit ni Isaias? (c) Ano an pagkakapareho kan duwang grupo?

⁵ Alagad, tibaad may maghapot dapit sa Isaias kapitulo 61, na igwa nin hula na naootob sa Kristianong kongregasyon. Nasambit sa bersikulo 6 kan kapitulong iyan an mga maglilingkod bilang “mga saserdote ni Jehova.” Pero sa bersikulo 5, nasambit an mga “dayuhan” na makikipagtabangan sa mga ‘saserdoteng’ idto. Paano ini dapat saboton?

⁶ Nasasabotan niato na an “mga saserdote ni Jehova” iyo an linahidan na mga Kristiano na kaiba sa “enot na pagkabuhay liwat” saka ‘magigin mga saserdote nin Dios asin ni Cristo, patin maghahade sa kaibahan nia sa laog nin sangribong taon.’ (Kap. 20:6) Siring man, dakol na maimbod na Kristiano an may daganon na paglaom. Sa piguratibong paagi, sinda mga dayuhan, dawa ngani kaasosyar asin nakikipagtabangan sinda sa mga maglilingkod sa langit. Maogma sindang nagsusuportar asin nagtatabang bilang “mga paraoma” asin “mga paraataman sa ubasan” kan “mga saserdote ni Jehova.” Iyo, nagtatabang sinda sa pagkultibar nin espirituwal na mga bunga sa ikakamuraway nin Dios, na nag-aataman asin nag-aani nin mga tawo. Tunay nanggad, hinahanap kan mga linahidan saka kan ‘ibang mga karnero’ an sadiosan na mga tawo na gustong maglingkod sa Dios sagkod lamang dangan mamomoton na pinapastoran ninda sinda.—Juan 10:16.

 7. Taano ta masasabi na an mga Kristiano ngonyan kapareho ni Abraham asin kan ibang maimbod na tawo kan suanoy?

⁷ Arog sa ipinaliwanag sa sinundan na artikulo, an tunay na mga Kristiano kapareho nin mga dayuhan, o temporaryong mga residente, sa maraot na kinaban ni Satanas. Sa bagay na iyan, kapareho sinda kan maimbod na mga tawo kan suanoy—kabilang si Abraham—na sinasabing “mga estranghero asin temporaryong residente sa daga.” (Heb. 11:13) Ano man an satong paglaom, pribilehio niato na magkaigwa nin relasyon ki Jehova na kapareho kan ki Abraham. Ipinaliwanag ni Santiago na “si Abraham nagtubod sa Dios, asin iyan ibinilang sa saiya na katanosan; asin sia inapod na katood nin Dios.”—Sant. 2:23.

 8. Ano an ipinanuga ki Abraham, asin ano an nagin saboot nia sa kaotoban kaiyan?

⁸ Nanuga an Dios na paagi ki Abraham asin sa saiyang banhi, bebendisyonan an gabos na pamilya sa daga—bako sanang sarong nasyon. (Basahon an Genesis 22:15-18.) Minsan ngani haloy pa bago maotob an panugang iyan nin Dios, si Abraham danay na nagsarig sa kaotoban kaiyan. Sa labing kabanga kan saiyang buhay, sia saka an saiyang pamilya nagpabarobalyo nin lugar. Sa gabos na panahon na iyan, si Abraham nagdanay na katood ni Jehova.

9, 10. (a) Sa anong mga paagi niato maarog an halimbawa ni Abraham? (b) Anong imbitasyon an puede niatong ipaabot sa iba?

⁹ Minsan ngani dai aram ni Abraham kun gurano sia kahaloy mahalat bago mahiling an kaotoban kan paglaom nia, nungkang nagluya an pagkamoot asin debosyon nia ki Jehova. Nagdanay siang nakapokus dian, na dai namuhay bilang permanenteng residente sa sarong nasyon. (Heb. 11:14, 15) Madonong nanggad na sunodon niato an halimbawa ni Abraham paagi sa pamumuhay nin simple asin dai pagparaisip dapit sa materyal na mga bagay, karera, o pagigin midbid! Taano ta magmamaigot pang magkaigwa nin sinasabing normal na buhay sa sistemang ini na madali nang matapos? Taano ta mamomoot nin labi-labi sa mga bagay na temporaryo man sana? Kapareho ni Abraham, may hinahalat kita na orog karahay. Andam kitang magtiaga, na naghahalat sagkod na maotob an satong paglaom.—Basahon an Roma 8:25.

¹⁰ Sagkod ngonyan, iniimbitaran ni Jehova an mga tawo sa gabos na nasyon na akoon an mga bendisyon na itatao paagi sa banhi ni Abraham. Asin an linahidan na “mga saserdote ni Jehova,” saka an “mga dayuhan” na ibang mga karnero, iyo an nagpapaabot kan imbitasyon na ini sa mga tawo sa bilog na kinaban sa labing 600 na lenguahe.

11. Ano an nasambitan ni Salomon na gigibohon bako sana kan mga Israelita?

¹¹ Sa inagurasyon kan templo kan 1026 B.C.E., asin kaoyon kan panuga ni Jehova ki Abraham, nasambitan ni Salomon na an mga tawo sa gabos na nasyon mairiba sa pag-omaw ki Jehova. Sa sarong odok sa pusong pamibi, sia nagsabi: ‘Siring man sana an [dayuhan], na bakong taga dian sa banwaan mong Israel, na naghali sa hararayong daga nin huli kan saimong ngaran, huli ta makakadangog sinda kan saimong dakulang ngaran, asin kan makusog mong kamot, asin kan unat mong takyag: asin pumadigdi sia sa harong na ini sa pagpamibi; ika magdadangog sa kalangitan asin sa erokan nin saimong ontokan, asin gigibohon mo an siring sa gabos na bagay na [iyo an dahilan] na an [dayuhan] kuminurahaw sa saimo: tanganing an gabos na banwaan sa daga makamidbid kan saimong ngaran, asin matakot sinda sa saimo, siring kan saimong banwaan na Israel.’—1 Ha. 8:41-43.

12. Taano ta kakaiba o garo “mga dayuhan” an hiling kan ibang mga tawo sa mga Saksi ni Jehova?

¹² Sa pangenot, an dayuhan sarong tawo na yaon sa nasyon na bako nia o sarong tawo na yaon sa komunidad o grupo na bako nia. Arog nanggad kaiyan an mga Saksi ni Jehova. An solamenteng sinusuportaran ninda iyo an langitnon na gobyerno, an Kahadean nin Dios na nasa pamamahala ni Cristo. Huli kaini, nagdadanay sindang biyong neutral sa politikal na mga bagay, minsan ngani sa hiling kan nagkapira kakaiba sindang marhay sa komunidad.

13. (a) Taano ta masasabi na nasa isip sana nin saro an ideya nin pagigin “dayuhan”? (b) Kaiba daw sa orihinal na katuyohan ni Jehova an ideya nin pagigin dayuhan? Ipaliwanag.

¹³ Sa parate, an mga dayuhan may mga karakteristikong laen sa iba, arog kan saindang lenguahe, mga kostumbre, pisikal na itsura, pati ngani estilo o paagi nin pagbado. Pero, an mga pagkakapareho ninda sa gabos na iba pang mga tawo, ano man an nasyonalidad, iyo an mas importante kisa sa ano man na kalaenan ninda. Kaya an totoo, dayuhan an paghiling sa sarong tawo huli sana sa nagkapirang kalaenan nia sa iba. Kun manonodan niatong halion sa isip an totoo o an nasa isip sanang mga kalaenan na ini, mawawaran nin kahulogan an terminong “dayuhan.” Kun gabos na tawo sa daga sakop nin saro sanang gobyerno, mayo nin magigin dayuhan base sa politikal na kahulogan kan terminong iyan. An totoo, orihinal na katuyohan ni Jehova na an gabos na tawo magkasararo bilang sarong pamilya sa irarom nin sarong pamamahala—an saiyang pamamahala. Posible daw ngonyan na magin arog kaiyan an mga tawo sa gabos na nasyon?

14, 15. Ano an nagibo kan mga Saksi ni Jehova bilang grupo?

¹⁴ Sa makasadiri asin nasyonalistikong kinaban, nakakaogma na makanompong nin mga tawong kayang halion asin talagang hinahali sa isip an kalaenan kan mga taga ibang nasyon. Totoo, depisil gibohon iyan. An kag-establisar kan television network na CNN, si Ted Turner, nagsabi manongod sa matibay na mga personaheng nakatrabaho nia hali sa manlaenlaen na nasyon: “Sarong pambihirang eksperyensia na makabisto an mga tawong ini. Nanodan kong trataron an mga taga ibang nasyon na ini bako bilang ‘mga dayuhan,’ kundi bilang mga kapwa siudadano kan kinaban. Nagin negatibo para sako an tataramon na ‘dayuhan’ kaya naggibo ako nin reglamento sa CNN na an tataramon na iyan dai puedeng gamiton sa aire man o sa mga orolay sa opisina. Imbes, an tataramon na ‘internasyonal’ an dapat gamiton.”

¹⁵ Sa bilog na kinaban, mga Saksi ni Jehova sana bilang grupo an nag-aarog sa kaisipan nin Dios. Huling nanodan nindang arogon an pagmansay ni Jehova sa mga bagay-bagay, nahali ninda sa saindang isip asin saboot an kalaenan kan mga taga ibang nasyon. Imbes na magin mapagdiskompiar, mapagsuspetsa, o maongis pa ngani sa mga taga ibang nasyon, nanodan nindang apresyaron an pagkakalaenlaen kan mga karakteristiko asin abilidad kan mga tawong ini. Napag-isip-isip mo na daw an nagibo nindang ini asin kun paano iyan personal na nakatabang sa pagtratar mo sa iba?

16, 17. Ano an puedeng magin kahulogan sa saimo mismo kan kaotoban kan Kapahayagan 16:16 asin Daniel 2:44?

¹⁶ Dai na mahahaloy, an gabos na nasyon maatubang ki Jesu-Cristo asin sa saiyang langitnon na hukbo sa pangultimong ralaban tumang sa pamamahala nin Dios, an ralaban na ‘sa Hebreo inaapod na Armagedon.’ (Kap. 16:14, 16; 19:11-16) Labing 2,500 na taon na an nakaagi, pinasabngan si propeta Daniel na ihula an mangyayari sa mga gobyerno nin tawo na kontra sa katuyohan nin Dios, na sinasabi: ‘Sa mga aldaw kan mga hadeng ini, mapatindog an Dios sa langit nin sarong kahadean na dai malalaglag: asin an kahadean na ini dai iwawalat sa ibang banwaan; iyan an matipak asin maubos kan gabos na ining mga kahadean, asin magdadanay iyan sagkod noarin pa man.’—Dan. 2:44.

¹⁷ Naiimahinar mo daw kun ano an magigin kahulogan sa saimo mismo kan kaotoban kaiyan? Ngonyan, an gabos na tawo nagigin dayuhan huli sa linderos kan mga nasyon. Pero mawawara na iyan. Dawa ngani tibaad may pagkakalaenlaen pa man giraray sa itsura o yaon pa an dating normal na pisikal na mga karakteristiko, magpapatunay sana iyan kan makangangalas na pagkakalaenlaen kan mga linalang nin Dios. An nakakaogmang paglaom na iyan maninigong magmotibar sa sato gabos na padagos na omawon asin tawan nin onra an satong Kaglalang, si Jehova Dios, sa abot kan satong makakaya.

18. Anong dai pa sana nahahaloy na pangyayari an nagpapahiling na puedeng mahali an ideya nin pagigin “dayuhan”?

¹⁸ Realistiko daw na magtubod na mangyayari an pagbabagong iyan sa bilog na kinaban? Iyo, rasonable nanggad na tubodon iyan. An mismong ideya nin pagigin “dayuhan” haros mayo nang kahulogan sa mga Saksi ni Jehova, na daing gayo naghihiling sa nasyonalidad kan mga kabilang sa sainda. Halimbawa, dai pa sana nahahaloy, nagkapira sa saradit na sangang opisina ninda an pinagsararo tanganing mapasimple an pangangataman asin magin mas episiente an paghuhulit kan maogmang bareta kan Kahadean. (Mat. 24:14) An pagsararong iyan dai ibinasar sa linderos nin mga nasyon, apuera na sana kun hinahagad kan ley. Saro pang patunay iyan na hinahali ni Jesu-Cristo, na Tagapamahalang ninombrahan ni Jehova, an mga olang sa pag-oltanan nin mga tawo, asin dai na mahahaloy, tataposon nia an saiyang ‘pandadaog’!—Kap. 6:2.

19. Ano an nagin posible huli sa dalisay na lenguahe nin katotoohan?

¹⁹ Minsan ngani magkakalaen an nasyon asin lenguahe, an mga Saksi ni Jehova nagmamaigot na suportaran an dalisay na lenguahe nin katotoohan. Nagbubunga ini nin bugkos nin pagkasararo na imposibleng mapatod. (Basahon an Sofonias 3:9.) Saro sindang internasyonal na pamilya na yaon, pero siblag, sa presenteng maraot na sistema. An nagkakasararong pamilyang ini panamit sana kan maabot na kinaban—sarong kinaban na mayo nang dayuhan. Dangan, an gabos na nabubuhay maogmang maoyon na totoo an sinabi kan publikasyon na kinotar sa enotan: “An mga tawo sa manlaenlaen na rasa, sabi kan Biblia, magturugang.”—The Races of Mankind.