Hula ni Isaias—Liwanag Para sa Bilog na Katawohan II

Kapitulo Beinte-Kuatro: Si Jehova Naggibo nin Mamuraway na Ngaran Para sa Saiya Man Sana

Isaias 63:1-14

1, 2. (a) May anong personal na interes an mga Kristiano sa nagdadangadang na “aldaw ni Jehova”? (b) Anong dakulang isyu an kalabot sa pagdatong kan aldaw ni Jehova?

SA LAOG nin haros duwang ribong taon, “hinahalat asin pinapagdadanay [kan mga Kristiano] na harani sa isip an presensia kan aldaw ni Jehova.” (2 Pedro 3:12; Tito 2:13) Natural sanang galaga sinda sa pagdatong kan aldaw na iyan. Total, iyan magigin senyal kan kapinonan kan saindang pakaginhawa sa mga danyos nin pagkabakong sangkap. (Roma 8:22) Mangangahulogan man iyan kan katapusan kan mga kasakitan na inaagihan ninda durante kan “delikadong mga panahon na masakit pakibagayan.”​—2 Timoteo 3:1.

² Minsan siring, minsan ngani an aldaw ni Jehova matao nin kaginhawahan sa mga matanos, iyan mangangahulogan man nin kalaglagan para sa “mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.” (2 Tesalonica 1:​7, 8) Nakapapepensar nanggad ini kun iisipon. Talaga daw na lalaglagon nin Dios an mga maraot tangani sanang isalbar an saiyang banwaan sa makamomondong mga kamugtakan? Ipinaheheling kan ika-63 na kapitulo kan Isaias na may mas dakula pang isyu na kalabot, iyo na ngani, an pagsantipikar sa ngaran nin Dios.

An Pagmartsa kan Mapangganang Guerrero

3, 4. (a) Ano an eksena kan hula sa Isaias kapitulo 63? (b) Siisay an naheheling ni Isaias na nagmamartsa pasiring sa Jerusalem, asin siisay daw iyan segun sa nagkapirang intelektuwal?

³ Sa Isaias kapitulo 62, mababasa niato an pakabutas kan mga Judio sa pagkabihag sa Babilonya asin an saindang pagkabalik sa saindang dagang tinuboan. Naturalmente, minabangon an hapot: Kaipuhan daw na matakot an ibinalik na natatadang mga Judio sa dugang pang grabeng pandedestroso nin ibang kaiwal na mga nasyon? Dakula an nagibo kan bisyon ni Isaias tanganing haleon an saindang takot. An hula nagpoon sa pagsabi: “Siisay an sarong ini na hale sa Edom, an saro na an mga gubing subida an mga kolor hale sa Bosra, an sarong ini na onorable sa saiyang gubing, na nagmamartsa sa abundansia kan saiyang kapangyarihan?”​—Isaias 63:1a.

⁴ Naheling ni Isaias an sarong guerrero, mabagsik asin mapanggana, na nagmamartsa pasiring sa Jerusalem. Ipinaririsa kan saiyang kahangahangang gubing na sia an may pinakahalangkaw na ranggo. Sia minagikan sa direksion kan pinakaprominenteng siudad kan Edom, an Bosra, na nagsusuherir na sia nagkaigwa nin dakulang kapangganahan sa kaiwal na dagang iyan. Siisay man nanggad daw an guerrerong ini? Sinasabi nin nagkapirang iskolar na sia si Jesu-Cristo. Naniniwala an iba na sia an Judiong namomoon sa militar na si Judas Macabeo. Minsan siring, ipinarisa kan guerrero mismo kun siisay sia kan simbagon nia an hapot na nasambitan sa enotan paagi sa pagsabi: “Ako, an Saro na nagtataram sa katanosan, an Saro na abunda sa kapangyarihan na magligtas.”​—Isaias 63:1b.

 5. Siisay an guerrero na naheling ni Isaias, asin taano ta siring an simbag nindo?

⁵ Daing duwa-duwa na an guerrerong ini iyo si Jehova Dios mismo. Sa iba pang kabtang, sia ilinaladawan na igwa nin “abundansia nin dinamikong enerhiya” asin na “nagtataram kan matanos.” (Isaias 40:26; 45:​19, 23) An kahangahangang mga gubing kan guerrero nagpapagirumdom sa sato kan mga tataramon kan salmista: “O Jehova na sakong Dios, dakula ka nanggad. Naggugubing ka nin dignidad asin kamurawayan.” (Salmo 104:1) Minsan ngani si Jehova an Dios nin pagkamoot, ipinaheheling kan Biblia na isinusulot nia an gubing nin sarong guerrero kun kaipuhan.​—Isaias 34:2; 1 Juan 4:16.

 6. Taano ta pabalik si Jehova hale sa sarong ralaban sa Edom?

⁶ Pero taano ta pabalik si Jehova hale sa sarong ralaban sa Edom? An mga Edomita, na padagos na nagtatanom nin kaanggotan na nagpoon sa saindang apoon, si Esau, haloyon nang kaiwal kan katipan na banwaan nin Dios. (Genesis 25:24-34; Bilang 20:14-21) An labi-labing pagkaongis kan Edom sa Juda nangorognang nagin risa durante kan pagkagaba kan Jerusalem kan an mga Edomita nanutsot pa sa mga soldados nin Babilonya. (Salmo 137:7) Ibinilang ni Jehova an pagkaanggot na iyan na kasalan tumang sa saiya mismo. Bakong makangangalas na nagdesisyon sia na iluwas an saiyang espada nin pamalos tumang sa Edom!​—Isaias 34:5-15; Jeremias 49:7-22.

 7. (a) Paano enot na naotob an hula tumang sa Edom? (b) Ano an isinisimbolisar kan Edom?

⁷ Kun siring an bisyon ni Isaias dakulang pamparigon sa boot para sa mga Judio na nagbaralik sa Jerusalem. Sinisierto kaiyan sa sainda na ligtas sindang mag-eerok sa saindang bagong harong. Tunay nanggad, kan kaaldawan ni propeta Malaquias, ginibo nin Dios na “mapungaw na kagabaan [an kabukidan nin Edom] asin an saiyang pamana para sa mga layas na ayam kan kaawagan.” (Malaquias 1:3) Kun siring, nangangahulogan daw ini na an hula ni Isaias naotob na nin biyo kan kaaldawan ni Malaquias? Dai, huli ta sa ibong kan gabang kamugtakan kaiyan, determinado an Edom na itogdok liwat an gabang mga lugar kaiyan, asin padagos na inaapod ni Malaquias an Edom na “an teritoryo nin karatan” asin “an banwaan na idinenunsiar ni Jehova sagkod sa panahon na daing talaan.”a (Malaquias 1:​4, 5) Minsan siring, sa makahulang paagi, bako sanang mga gikan ni Esau an minakompuesto kan Edom. Iyan nagseserbing simbolo kan gabos na nasyon na nagigin mga kaiwal kan mga nagsasamba ki Jehova. An mga nasyon kan Kakristianohan nagin partikularmenteng prominente sa bagay na ini. Ano an mangyayari sa Edom na ini sa presenteng aldaw?

An Pugaan nin Ubas

8, 9. (a) Ano an ginigibo kan guerrero na naheling ni Isaias? (b) Noarin asin paano titimaktimakan an simbolikong pugaan nin ubas?

⁸ Hinapot ni Isaias an pabalik na guerrero: “Taano ta mapula an saimong bado, asin an saimong mga gubing siring kan sa nagtitimak sa pugaan nin ubas?” Si Jehova minasimbag: “An tangkeng arakan tinimaktimakan ko nin solo, mantang mayo akong kaibang tawo hale sa mga banwaan. Asin padagos ko sindang tinimakan sa sakong kaanggotan, asin padagos ko sindang binatayan sa sakong kabangisan. Asin padagos na natipsikan kan saindang nagtutuprik na dugo an sakong mga gubing, asin naatian ko an bilog kong bado.”​—Isaias 63:​2, 3.

⁹ Ilinaladawan kan klarong mga tataramon na ini an lagdoan na pagpabolos nin dugo. Tara, minsan an eleganteng mga gubing nin Dios nadigtaan, siring sa mga gubing nin nagtitimak sa pugaan nin ubas! An pugaan nin ubas angay na simbolo kan daing madudulagan na kamugtakan kan mga kaiwal ni Jehova Dios kun humiro na sia tanganing laglagon sinda. Noarin titimaktimakan an pugaan nin ubas na ini? An mga hula ni Joel asin ni apostol Juan nagtataram man manongod sa sarong simbolikong pugaan nin ubas. Titimaktimakan an pugaan nin ubas sa mga hulang idto kun batayan na ni Jehova an saiyang mga kaiwal sagkod na malaglag sa Armagedon. (Joel 3:13; Kapahayagan 14:18-20; 16:16) An makahulang pugaan nin ubas sa Isaias nagtotokdo sa iyo man sanang panahon sa ngapit.

10. Taano ta sinasabi ni Jehova na tinimaktimakan nia nin solo an pugaan nin ubas?

¹⁰ Pero taano ta sinabi ni Jehova na tinimaktimakan nia nin solo an pugaan nin ubas na ini, mantang mayo sia nin kaibang tawo hale sa mga banwaan? Bako daw na si Jesu-Cristo, bilang representante nin Dios, an mangengenot sa pagtimaktimak sa pugaan nin ubas? (Kapahayagan 19:11-16) Iyo, alagad an sinasabi ni Jehova mga tawo, bakong mga espiritung linalang. An boot niang sabihon mayo nin tawo na kayang haleon sa daga an mga parasunod ni Satanas. (Isaias 59:​15, 16) An Dios na Makakamhan sa Gabos an padagos na makatitimaktimak kaiyan sa saiyang kaanggotan, sagkod na sinda biyo nang maronot.

11. (a) Taano ta pangyayarihon ni Jehova an sarong “aldaw nin pamamalos”? (b) Sairisay an “mga binalukat” kan suanoy na mga panahon, asin sairisay sinda ngonyan?

¹¹ Ipinaliliwanag pa ni Jehova kun taano ta personal niang ginigibo an gibohon na ini, na nagsasabi: “An aldaw nin pamamalos nasa sakong puso, asin an mismong taon kan sakong mga ­binalukat nagdatong na.” (Isaias 63:4)b Si Jehova sana an may deretso na magsagibo nin pamamalos sa mga nagpapahamak sa saiyang banwaan. (Deuteronomio 32:35) Kan suanoy na mga panahon an “mga binalukat” iyo an mga Judio na nagdusa sa kamot kan mga Babilonyo. (Isaias 35:10; 43:1; 48:20) Sa presenteng mga panahon, sinda an linahidan na mga natatada. (Kapahayagan 12:17) Siring kan saindang suanoy na mga katimbang, sinda binalukat hale sa relihiosong pagkabihag. Asin siring kan mga Judiong idto, an mga linahidan, saka an saindang mga kaiba na “ibang karnero,” nagin mga biktima nin paglamag asin pagtumang. (Juan 10:16) Sa siring sinisierto kan hula ni Isaias sa mga Kristiano ngonyan na sa itinalaan na panahon nin Dios, Sia mainterbenir sa kapakanan ninda.

12, 13. (a) Sa anong paagi na si Jehova mayo nin paratabang? (b) Paano nagtatao nin kaligtasan an takyag ni Jehova, asin paano sia sinusuportaran kan saiyang kabangisan?

¹² Si Jehova nagpapadagos: “Padagos akong nagheheling, alagad mayo nin paratabang; asin nagpoon akong magngalas, alagad mayo nin nag-aalok nin suporta. Kaya nagtao sa sako nin kaligtasan an sakong takyag, asin an sakong kabangisan an nagsuportar sako. Asin padagos kong kinumpagan an mga banwaan sa sakong kaanggotan, asin binurat ko sinda kan sakong kabangisan asin ibinubo ko sa daga an saindang nagtutuprik na dugo.”​—Isaias 63:​5, 6.

¹³ Mayo nin tawong paratabang an puedeng kumua kan kredito sa dakulang aldaw nin pamamalos ni Jehova. Ni kaipuhan man ni Jehova an ano man na suporta nin tawo tanganing gibohon an saiyang kabotan.c An saiyang labi-labi kamakapangyarihan na takyag nin kakosogan igo na para sa gibohon. (Salmo 44:3; 98:1; Jeremias 27:5) Dugang pa, sinusuportaran sia kan saiyang kabangisan. Paano? Sa bagay na an kabangisan nin Dios bakong daing kontrol na emosyon kundi matanos na gurobgutob. Huling si Jehova pirmeng naghihiro basado sa saiyang matanos na mga prinsipyo, sinusuportaran asin minomotibar sia kan saiyang kabangisan na ‘ibubo sa daga’ an “nagtutuprik na dugo” kan saiyang mga kaiwal, sa pagkapasupog asin kadaogan ninda.​—Salmo 75:8; Isaias 25:10; 26:5.

An Mamomoton na Kabootan nin Dios

14. Anong angay na mga pagirumdom an itinao ngonyan ni Isaias?

¹⁴ Kaidtong mga panahon na nakaagi, madaling nawaran nin pag-apresyar an mga Judio sa mga bagay na ginibo ni Jehova para sa sainda. Kun siring, angay sana na ipinagigirumdom sa sainda ni Isaias kun taano ta ginibo ni Jehova an siring na mga bagay. Ipinahayag ni Isaias: “Sasambiton ko an mamomoton na mga kabootan ni Jehova, an mga kaomawan ki Jehova, sono sa gabos na ginibo ni Jehova sa satuya, minsan an kadakoldakol na karahayan sa harong ni Israel na ginibo nia sa sainda segun sa saiyang mga pagkaherak asin segun sa kadakolan kan saiyang mamomoton na kabootan. Asin sinabi nia: ‘Segurado na sinda an sakong banwaan, mga aki na dai magdadaya.’ Kaya sa sainda na sia nagin Paraligtas. Sa bilog na panahon kan saindang kasakitan sia nasakitan man. Asin an saiyang personal na mensahero nagligtas sa sainda. Huli sa saiyang pagkamoot asin huli sa saiyang pagkaludok sia mismo an buminalukat sa sainda, asin inalsa nia sinda saka kinarga sinda sa gabos na aldaw kan suanoy.”​—Isaias 63:7-9.

15. Paano asin taano ta nagpaheling si Jehova nin mamomoton na kabootan sa mga gikan ni Abraham sa Egipto?

¹⁵ Pambihira nanggad na halimbawa an itinao ni Jehova sa pagpaheling nin mamomoton na kabootan, o maimbod na pagkamoot! (Salmo 36:7; 62:12) Si Jehova nagkaigwa nin mamomoton na pagkamuya ki Abraham. (Miqueas 7:20) Nanuga sia sa patriarka na paagi sa saiyang banhi, o gikan, an gabos na nasyon sa daga magbebendisyon kan saindang sadiri. (Genesis 22:​17, 18) Pinanindogan ni Jehova an panugang iyan, na nagpaheling nin kadakoldakol na karahayan sa harong ni Israel. An pinakabantog sa saiyang mga gibo nin kaimbodan iyo an saiyang pagsalbar sa mga gikan ni Abraham sa kaoripnan sa Egipto.​—Exodo 14:30.

16. (a) Ano an punto de vista ni Jehova kan makipagtipan sia sa Israel? (b) Paano tinatratar nin Dios an saiyang banwaan?

¹⁶ Kasunod kan Lagdoan na Pagharale, dinara ni Jehova an Israel sa Bukid nin Sinai asin nanuga kaini: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri . . . Asin kamo mismo magigin kahadean nin mga saserdote asin banal na nasyon para sa sako.” (Exodo 19:​5, 6) Nagin mapandaya daw si Jehova sa iinalok niang ini? Dai, huli ta ihinayag ni Isaias na sinabi ni Jehova sa saiyang sadiri: “Segurado na sinda an sakong banwaan, mga aki na dai magdadaya.” An sarong intelektuwal nagsasabi: “An ‘segurado’ bakong huli ta ini itinalaga na nia bilang soberano o huli ta aram na nia iyan antes pa: iyan an paglaom asin kompiansa nin huli sa pagkamoot.” Iyo, nakipagtipan si Jehova na marahay an intension, na sinserong nagmamawot na magin mapanggana an saiyang banwaan. Sa ibong kan saindang risang-risa na mga pagkukulang, nagpaheling sia nin kompiansa sa sainda. Marahayon nanggad na sambahon an sarong Dios na may siring na pagtitiwala sa mga nagsasamba sa saiya! Dakulaon an nagigibo kan kamagurangan ngonyan na pakosogon an mga ipinagkatiwala sa sainda kun ipinaheheling ninda an kaagid na kompiansa sa pundamental na karahayan kan banwaan nin Dios.​—2 Tesalonica 3:4; Hebreo 6:​9, 10.

17. (a) Anong prueba an itinao ni Jehova tanganing patunayan an saiyang pagkamoot sa mga Israelita? (b) Anong kompiansa an puedeng mapasato ngonyan?

¹⁷ Minsan siring, an salmista nagsasabi mapadapit sa mga Israelita: “Liningawan ninda an Dios na saindang Paraligtas, an Paragibo nin darakulang bagay sa Egipto.” (Salmo 106:21) An saindang pagigin suwayan, matagas an liog sa parate nagdara sa sainda sa kapahapahamak na mga kamugtakan. (Deuteronomio 9:6) Nagpondo na daw si Jehova sa pagpaheling nin mamomoton na kabootan sa sainda? Sa kabaliktaran, isinaysay ni Isaias na “sa bilog na panahon kan saindang kasakitan sia nasakitan man.” Kanigoan kan empatiya ni Jehova! Siring sa siisay man na mamomoton na ama, nakokolgan an Dios na maheling na nagdudusa an saiyang mga aki, dawa kun an pagdusa huli sa sadiri nindang kamangmangan. Siring kan ihinula asin bilang ebidensia kan saiyang pagkamoot, isinugo nia an saiyang “personal na mensahero,” na posibleng marhay na si Jesus bago sia nagin tawo, tangani na pangenotan sinda pasiring sa Dagang Panuga. (Exodo 23:20) Sa siring kinarga ni Jehova an nasyon asin dinara iyan, “siring sa pagdara nin sarong tawo sa saiyang aki.” (Deuteronomio 1:31; Salmo 106:10) Ngonyan makakokompiar kita na aram man ni Jehova an satong mga pagdusa asin na namamatean nia an namamatean niato kun kita nasa masakit na kamugtakan. May kompiansa niatong ‘ikabubugtak an gabos niatong kahaditan sa saiya, huli ta sia may pagmakolog sa sato.’​—1 Pedro 5:7.

Nagin Kaiwal an Dios

18. Taano ta si Jehova nagin kaiwal kan saiyang banwaan?

¹⁸ Pero, dai niato noarin man maninigong aprobetsaran an mamomoton na kabootan nin Dios. Si Isaias nagpapadagos: “Sinda mismo nagrebelde asin pinagsentir an saiyang banal na espiritu. Sia ngonyan nagin kaiwal ninda; sia mismo nakipaglaban tumang sa sainda.” (Isaias 63:10) Nagpatanid si Jehova na minsan ngani sia sarong Dios na maheherakon asin maugayon, “dai nanggad sia magpapalibre sa padusa.” (Exodo 34:​6, 7) Ilinilinya kan mga Israelita an saindang sadiri para sa padusa paagi sa paorootrong pagrebelde. “Dai mo paglingawan kun paano mo prinobokar si Jehova na saimong Dios sa kaawagan,” an ipinagirumdom ni Moises. “Poon kan aldaw na ika luminuwas sa daga nin Egipto sagkod sa pag-abot nindo sa lugar na ini kamo nagin rebelde sa saindong gawe-gawe ki Jehova.” (Deuteronomio 9:7) Paagi sa pagkontra sa nakararahay na mga epekto kan espiritu nin Dios, pinagsentir, o pinamondo, ninda iyan. (Efeso 4:30) Pinuersa ninda si Jehova na magin kaiwal ninda.​—Levitico 26:17; Deuteronomio 28:63.

19, 20. Anong mga bagay an nagirumdoman kan mga Judio, asin taano?

¹⁹ Mantang sinda nagsasakit, may nagkapirang Judio na napahirong horophoropon an nakaagi. Si Isaias nagsasabi: “An saro nagpoon na girumdomon an mga aldaw kaidtong suanoy, si Moises na saiyang lingkod: ‘Haen an Saro na naghawas sa sainda sa dagat kaiba kan mga pastor kan saiyang aripompon? Haen an Saro na nagbugtak sa saiya kan Saiyang banal na espiritu? An Saro na nagpangyari na an Saiyang mamuraway na takyag umiba sa toong kamot ni Moises; an Saro na nagpabuka kan tubig sa atubangan ninda tanganing gumibo nin daing sagkod na ngaran para sa saiyang sadiri; an Saro na nagpangyari na sinda lumakaw sa nag-uulakbong tubig tanganing, arog nin kabayo sa kapatagan, dai lamang ­sinda nasingkog? Siring sa paghilig nin sarong hayop sa kaplanodohan sa kababan, an mismong espiritu ni Jehova pinapahingalo sinda.’ ”​—Isaias 63:11-14.d

²⁰ Iyo, huling pinagdudusahan an mga bunga nin pakisuway, hinihimuyawot kan mga Judio an mga aldaw na si Jehova an Paraligtas ninda imbes na an kaiwal ninda. Nagigirumdoman ninda kun paano sinda ligtas na giniyahan kan saindang “mga pastor,” si Moises asin Aaron, paibong sa Dagat na Pula. (Salmo 77:20; Isaias 51:10) Nagigirumdoman ninda kaidto na imbes na pasentiron an espiritu nin Dios, ginigiyahan sinda kaiyan paagi ki Moises asin iba pang kamagurangan na lalaki na ninombrahan nin espiritu. (Bilang 11:​16, 17) Nagigirumdoman man ninda na naheling ninda an “mamuraway na takyag” nin kakosogan ni Jehova na ginagamit sa kapakanan ninda paagi ki Moises! Pag-abot nin panahon, ilinuwas sinda nin Dios sa dakula asin makangingirhat na kaawagan asin giniyahan sinda pasiring sa sarong daga na binubulosan nin gatas asin tangguli​—sarong lugar nin kapahingaloan. (Deuteronomio 1:19; Josue 5:6; 22:4) Pero ngonyan, nagdudusa an mga Israelita huli ta iwinara ninda an saindang paborableng relasyon sa Dios!

‘Sarong Mamuraway na Ngaran Para sa Saiya Man Sana’

21. (a) Anong dakulang pribilehio an nakamtan kutana kan Israel may koneksion sa ngaran nin Dios? (b) Ano an pangenot na dahelan nin Dios sa pagpatalingkas sa mga gikan ni Abraham hale sa Egipto?

²¹ Pero, an kapierdihan kan mga Israelita sa materyal sadit nanggad kun ikokomparar sa pagkawara kan pribilehio na hinaboan ninda, arin na baga, an pakikikabtang sa pagpamuraway kan ngaran nin Dios. Nanuga si Moises sa mga Israelita: “Papatindogon ka ni Jehova bilang banal na banwaan para sa saiya man sana, siring sa saiyang isinumpa sa saimo, huli ta padagos mong kinukuyog an mga togon ni Jehova na saimong Dios, asin ika naglakaw sa saiyang mga dalan. Asin maheheling kan gabos na banwaan kan daga na an ngaran ni Jehova pinag-aapod sa saimo, asin sinda tunay na matatakot sa saimo.” (Deuteronomio 28:​9, 10) Kan si Jehova humiro tanganing idepensa an mga gikan ni Abraham, na isinasalbar sinda sa kaoripnan sa Egipto, dai nia iyan ginibo tangani sanang gibohon na mas kombenyente o nakaoogma an buhay para sa sainda. Sia huminiro para sa mas mahalaga nanggad na bagay​—an saiyang ngaran. Iyo, sinierto nia na an saiyang ngaran “ikapahayag sa bilog na daga.” (Exodo 9:​15, 16) Asin kan an Dios nagpaheling nin pagkaherak pakatapos kan pagrebelde kan Israel sa kaawagan, an saiyang dahelan sa paggibo kaiyan bako sanang huli sa sentimiento. Si Jehova mismo nagsabi: “Naghiro ako para sa sakong ngaran tanganing dai ini malanghadan sa pagheling kan mga nasyon.”​—Ezequiel 20:8-10.

22. (a) Sa ngapit, taano ta makikipaglaban giraray an Dios para sa saiyang banwaan? (b) Sa anong mga paagi naaapektaran kan satong pagkamoot sa ngaran nin Dios an satong mga paghiro?

²² Kun siring kanigoan kamapuersang konklusyon an itinao ni Isaias sa hulang ini! Sia nagsasabi: “Kaya giniyahan mo an saimong banwaan tanganing gumibo ka nin mamuraway na ngaran para sa saimo man sana.” (Isaias 63:14b) Malinaw nanggad na maheheling ngonyan kun taano si Jehova ta nakikipaglaban sa bilog na kaigotan sa kapakanan kan saiyang banwaan. Ini tanganing makagibo nin mamuraway na ngaran para sa saiya man sana. Sa siring an hula ni Isaias nagseserbing mapuersang pagirumdom na an pagdara kan ngaran ni Jehova sarong ekstraordinaryong pribilehio sagkod dakulang paninimbagan. Namomotan kan tunay na mga Kristiano ngonyan an ngaran ni Jehova nin labi pa sa sainda mismong buhay. (Isaias 56:6; Hebreo 6:10) Habo nindang gumibo nin ano man na bagay na tibaad makatao nin katuyawan sa sagradong ngaran na iyan. Naghihimate sinda sa maimbod na pagkamoot nin Dios paagi sa pagdanay na maimbod sa saiya. Asin huling namomotan ninda an mamuraway na ngaran ni Jehova, hinihimuyawot ninda an aldaw na titimaktimakan nia an saiyang mga kaiwal sa pugaan nin ubas kan saiyang kaanggotan​—bako sanang huli ta pakikinabangon sinda kaiyan kundi huli ta iyan maresulta sa pagkapamuraway kan ngaran nin Dios na namomotan ninda.​—Mateo 6:9.

[Mga Nota sa Ibaba]