‘Pilion an Buhay Tanganing Makapagpadagos na Mabuhay’

“Ibinugtak ko an buhay asin kagadanan sa atubangan mo, an bendisyon asin an maldisyon; asin dapat na pilion mo an buhay tanganing makapagpadagos kang mabuhay.”—DEUTERONOMIO 30:19.

1, 2. Sa anong mga paagi na an tawo linalang sa ladawan nin Dios?

“GIBOHON niato an tawo sa satong ladawan, kasugad niato.” An tataramon na iyan nin Dios nakasurat sa enot na kapitulo kan Biblia. Kaya, “linalang nin Dios an tawo sa saiyang ladawan, sa ladawan nin Dios linalang nia sia,” an sinasabi kan Genesis 1:26, 27. Sa siring napalaen an enot na tawo sa gabos na iba pang linalang sa daga. Kapareho nia an saiyang Kaglalang, na may kakayahan na ipabanaag an diosnon na aktitud sa pangangatanosan, sa pagpaheling nin pagkamoot, hustisya, kadonongan, asin kapangyarihan. Igwa sia nin konsensia na matabang sa saiya na gumibo nin mga desisyon na mataong pakinabang sa saiya asin makakapaogma sa saiyang langitnon na Magurang. (Roma 2:15) Sa halipot, si Adan igwa nin libreng kabotan. Sa pag-obserbar sa pagkagibo sa saiyang daganon na aki, ini an nagin paghusgar ni Jehova sa saiyang ginibo: “Uya! [iyan] marahayon.”—Genesis 1:31; Salmo 95:6.

² Bilang mga gikan ni Adan, kita man ginibo sa ladawan asin kasugad nin Dios. Minsan siring, talaga daw na makakapamili kita kun ano an gigibohon niato? Minsan ngani si Jehova may kakayahan na maaraman an mangyayari antes pa, dai nia dineterminaran antes pa an satong mga aksion asin kaaabtan bilang indibiduwal. Dai nia noarin man tinotogotan na makontrol nin pagtalaga antes pa an saiyang daganon na mga aki. Tanganing matabangan kitang masabotan an halaga nin paggamit kan satong libreng kabotan sa pagpili kan tama, enot sa gabos dapat kitang makanood nin leksion sa nasyon nin Israel.—Roma 15:4.

May Katalingkasan na Pumili an Israel

 3. Ano an enot na kabtang kan Sampulong Togon, asin paano pinili kan maimbod na mga Israelita na iyan kuyogon?

³ “Ako si Jehova na saimong Dios, na nagdara sa saimo paluwas sa daga kan Egipto, paluwas sa harong nin mga oripon,” an sabi ni Jehova sa mga Israelita. (Deuteronomio 5:6) Kan 1513 B.C.E., naeksperyensiahan kan nasyon nin Israel an milagrosong pagliligtas hale sa kaoripnan sa Egipto asin kun siring mayo sinda nin dahelan na pagdudahan an mga tataramon na iyan. Sa enot na kabtang kan Sampulong Togon, sinabi ni Jehova paagi sa saiyang representante sa pagtaram na si Moises: “Dai ka magkaigwa nin ibang mga dios tumang sa sakong lalauogon.” (Exodo 20:1, 3) Sa panahon na idto, pinili kan nasyon nin Israel na kumuyog. Gikan sa boot nindang itinao ki Jehova an saindang dai nababangang debosyon.—Exodo 20:5; Bilang 25:11.

 4. (a) Anong pagpipilian an ibinugtak ni Moises sa atubangan kan Israel? (b) Anong pagpipilian an yaon sa sato ngonyan?

⁴ Pakalihis nin mga 40 taon, mapuersang ipinagirumdom ni Moises sa saro pang kapag-arakian nin mga Israelita an pagpili na dapat nindang gibohon. “Kinukua ko an kalangitan asin an daga bilang mga saksi tumang sa saindo ngonyan,” an sabi nia, “na ibinugtak ko an buhay asin kagadanan sa atubangan mo, an bendisyon asin an maldisyon; asin dapat na pilion mo an buhay tanganing makapagpadagos kang mabuhay, ika asin an saimong aki.” (Deuteronomio 30:19) Kaagid kaiyan ngonyan, puede man kitang pumili. Iyo, puede niatong pilion na maimbod na paglingkodan si Jehova na may tinatanaw na buhay na daing katapusan, o puede niatong pilion na makisuway sa saiya asin saparon an mga resulta kaiyan. Estudyare an duwang halimbawa nin mga tawo na magkalaen an pinili.

5, 6. Ano an pinili ni Josue, asin ano an resulta?

⁵ Kan 1473 B.C.E., giniyahan ni Josue an mga Israelita palaog sa Dagang Panuga. Sa sarong mapuersang sadol na itinaram nia bago sia magadan, si Josue nakimaherak sa bilog na nasyon: “Ngonyan kun maraot sa saindong pagheling na maglingkod ki Jehova, pumili kamo ngonyan kun siisay an saindong paglilingkodan, kun baga an mga dios na pinaglingkodan kan saindong mga apoon na nasa ibong kan Salog o an mga dios kan mga Amorreo na sa saindang daga kamo nag-eerok.” Dangan, nagtataram manongod sa saiyang pamilya, sia nagpadagos: “Kun para sa sako asin sa sakong kasararo sa harong, kami maglilingkod ki Jehova.”—Josue 24:15.

⁶ Bago kaiyan, sinadol ni Jehova si Josue na magmakosog an boot asin magpakakosog, na pinagbobotan sia na dai sumuway sa pagkuyog sa Ley nin Dios. Imbes, paagi sa pahinghing na pagbasa kan libro kan Ley aldaw asin banggi, magigibo ni Josue na mapanggana an saiyang dalan. (Josue 1:7, 8) Asin iyan nanggad an nangyari. An pinili ni Josue nagbunga nin mga bendisyon. “Mayo ni sarong panuga an nasudya sa gabos na marahay na ipinanuga ni Jehova sa kamag-anakan nin Israel,” an sinabi ni Josue. “Iyan gabos naotob.”—Josue 21:45.

 7. Kan kaaldawan ni Isaias, ano an pinili kan nagkapirang Israelita, asin may anong mga resulta?

⁷ Sa kabaliktaran, estudyare an situwasyon sa Israel mga 700 na taon pakalihis kaiyan. Kan panahon na idto, dakol na Israelita an nagsusunod sa paganong mga kostumbre. Halimbawa, sa ultimong aldaw kan taon, an banwaan nagtitiripontipon para sa sarong bangkete na may laen-laen na masisiram na kakanon asin mahamis na arak. Bako ining ordinaryong pagtiripontipon nin pamilya. Idto sarong relihiosong seremonya na nagtataong onra sa duwang paganong dios. Isinurat ni propeta Isaias an pagmansay nin Dios sa kadaihan nin kaimbodan na ini: “Kamo an mga nagbabaya ki Jehova, an mga nakakalingaw sa sakong banal na bukid, an mga nagpupuesto nin lamesa para sa dios nin Suerte asin an mga nagtitigis nin hinalong arak para sa dios nin Kapaladan.” Naniniwala sinda na an ani sa bilog na taon nakadepende, bakong sa pag-ako kan bendisyon ni Jehova, kundi sa pagsirosiro sa “dios nin Suerte” asin sa “dios nin Kapaladan.” Pero, an totoo, an saindang pagrebelde asin may katagasan nin payong pagpili an nagdeterminar kan saindang kaaabtan. “Itatalaga ko kamo sa espada,” an sinabi ni Jehova, “asin kamo gabos maduko tanganing gadanon; sa dahelan na nag-apod ako, alagad dai kamo suminimbag; nagtaram ako, alagad dai kamo naghinanyog; asin padagos nindong ginigibo an maraot sa sakong mga mata, asin pinili nindo an bagay na dai ko ikinakaogma.” (Isaias 65:11, 12) An saindang bakong madonong na pagpili nagbunga kan saindang kalaglagan, asin an dios nin Kapaladan asin nin Suerte daing kapangyarihan na olangon iyan.

An Pagpili kan Tama

 8. Segun sa Deuteronomio 30:20, ano an kalabot sa pagpili kan tama?

⁸ Kan sinasadol ni Moises an Israel na pilion an buhay, sinabi nia an tolong bagay na maninigo nindang gibohon: “Paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya.” (Deuteronomio 30:20) Siyasaton niato an balang saro kaini tanganing makapili kita kan tama.

 9. Paano niato ikakapaheling an satong pagkamoot ki Jehova?

⁹ Paagi sa pagkamoot ki Jehova na satong Dios: Pinili niatong paglingkodan si Jehova huli ta namomotan niato sia. Huli sa paghimate sa nagpapatanid na mga halimbawa kan kaaldawan kan Israel, linalabanan niato an gabos na sugot na magkomiter nin inmoralidad asin rinarayoan niato an mga estilo nin pamumuhay na puedeng magin dahelan na kita umirarom sa kumunoy nin materyalismo kan kinaban. (1 Corinto 10:11; 1 Timoteo 6:6-10) Kita nangangapot ki Jehova asin inootob niato an saiyang mga regulasyon. (Josue 23:8; Salmo 119:5, 8) Bago lumaog sa Dagang Panuga an mga Israelita, sinadol sinda ni Moises: “Uya, tinokdoan ko kamo nin mga regulasyon asin hudisyal na mga desisyon, siring sa ipinagboot sa sako ni Jehova na sakuyang Dios, tanganing siring an gibohon nindo sa tahaw kan daga na saindong padudumanan tanganing sadirihon iyan. Asin otobon nindo asin gibohon nindo iyan, huli ta ini kadonongan nindo asin pakasabot nindo sa mata kan mga banwaan na makakadangog manongod sa gabos na regulasyon na ini.” (Deuteronomio 4:5, 6) Ngonyan na an panahon na ipaheling niato an satong pagkamoot ki Jehova paagi sa pag-enot niato ki Jehova sa satong buhay. Seguradong bebendisyonan kita kun pipilion niato an paggibo kaiyan.—Mateo 6:33.

10-12. Anong mga leksion an manonodan niato sa pag-estudyar kan nangyari kan mga aldaw ni Noe?

¹⁰ Paagi sa paghinanyog sa tingog nin Dios: Si Noe “sarong parahulit nin katanosan.” (2 Pedro 2:5) Haros gabos na tawo bago kan Baha preokupado sa ibang bagay asin ‘dai nagmangno’ sa mga patanid ni Noe. An resulta? ‘Nagdatong an baha asin iinanod sinda gabos.’ Si Jesus nagpatanid na magigin siring man kaiyan an satong kaaldawan durante kan “presensia kan Aki nin tawo.” An nangyari kan kaaldawan ni Noe nagseserbing mapuersang patanid para sa mga tawo ngonyan na pinipiling dai maghimate sa mensahe nin Dios.—Mateo 24:39.

¹¹ An mga nag-oolog-olog sa mga patanid nin Dios na ipinapahayag kan mga lingkod nin Dios sa presenteng aldaw maninigong makarealisar kun ano an magigin resulta kan dai ninda paghimate sa mga patanid. Mapadapit sa siring na mga paraolog-olog, si apostol Pedro nagsabi: “Oyon sa saindang kabotan, an katotoohan na ini dai ninda namamangno, na igwa nin kalangitan poon kan suanoy asin sarong daga na dusok na nagtitindog hale sa tubig asin sa tahaw nin tubig paagi sa tataramon nin Dios; asin sa mga paaging iyan an kinaban kan panahon na idto nalaglag kan iyan malantopan nin tubig. Alagad sa iyo man sanang tataramon an kalangitan asin an daga na yaon ngonyan itinatagama sa kalayo asin irinereserba sa aldaw nin paghokom asin kalaglagan kan bakong diosnon na mga tawo.”—2 Pedro 3:3-7.

¹² Ikomparar nindo an kalaenan kaini sa ginibong pagpili ni Noe asin kan saiyang kasararo sa harong. “Huli sa pagtubod si Noe, pakatapos na matawan nin patanid nin Dios dapit sa mga bagay na dai pa naheheling, nagpaheling nin diosnon na takot asin naggibo nin arka.” An paghimate nia sa patanid nagbunga nin kaligtasan kan saiyang kasararo sa harong. (Hebreo 11:7) Kita logod magin listo kun dapit sa pagdangog kan mensahe nin Dios dangan makinuyog na himateon iyan.—Santiago 1:19, 22-25.

13, 14. (a) Taano ta mahalagang marhay an ‘pagdadanay ki Jehova’? (b) Paano niato maninigong togotan na moldehon kita ni Jehova, an ‘satong Parakoron’?

¹³ Paagi sa pagdadanay ki Jehova: Sa ‘pagpili kan buhay tanganing makapagpadagos na mabuhay,’ bako sana na dapat niatong kamotan si Jehova asin maghinanyog sa saiya kundi dapat man kitang ‘magdanay ki Jehova,’ an boot sabihon, magprosegir sa paggibo kan saiyang kabotan. “Huli sa saindong pakatagal makakamtan nindo an saindong kalag,” an sabi ni Jesus. (Lucas 21:19) An totoo, ihinahayag kan pagpili niato sa bagay na ini kun ano an nasa puso niato. “Maogma an tawo na danay na natatakot, alagad an nagpapatagas sa saiyang puso mahuhulog sa kapahamakan,” an sabi kan Talinhaga 28:14. Si Faraon kan suanoy na Egipto sarong halimbawa kaini. Mientras na saro-sarong sinasapo kan Egipto an Sampulong Damat, pinatagas ni Faraon an saiyang puso imbes na magpaheling nin diosnon na takot. Dai pinuersa ni Jehova si Faraon na makisuway kundi pinabayaan niang pumili an mapalangkaw na namamahalang iyan. Sa paano man, naotob an kabotan ni Jehova, siring kan ipinaliwanag ni apostol Pablo mapadapit sa pagmansay ni Jehova ki Faraon: “Sa dahelan mismong ini ika pinabayaan kong magdanay, tanganing mapadapit sa saimo ikapaheling ko an sakong kapangyarihan, asin tanganing an sakong ngaran ikabalangibog sa bilog na daga.”—Roma 9:17.

¹⁴ Dakol na siglo pakatapos na makalda an Israel sa kontrol ni Faraon, si propeta Isaias nagpahayag: “O Jehova, ika an samuyang Ama. Kami an dalipay, asin ika an samong Parakoron; asin kami gabos ginibo kan saimong kamot.” (Isaias 64:8) Mantang tinotogotan niato si Jehova na moldehon kita paagi sa satong personal na pag-adal asin pag-aplikar kan saiyang Tataramon, luway-luway niatong isinusulog an bagong personalidad. Kita orog na nagigin mahoyo asin madaling moldehon, kaya mas pasil para sa sato na maimbod na magdanay ki Jehova huli ta odok sa boot na gusto niatong paogmahon sia.—Efeso 4:23, 24; Colosas 3:8-10.

“Ipaaram Mo Iyan”

15. Segun sa Deuteronomio 4:9, anong duwang paninimbagan an ipinagirumdom ni Moises sa Israel?

¹⁵ Sa nagkatiripon na nasyon nin Israel na andam nang lumaog sa Dagang Panuga, si Moises nagsabi: “Ingatan mo sana an saimong sadiri asin atamanon mong marhay an saimong kalag, tanganing dai mo malingawan an mga bagay na naheling kan saimong mga mata asin dai iyan mapasuhay sa saimong puso sa gabos na aldaw kan saimong buhay; asin ipaaram mo iyan sa saimong mga aki asin sa saimong mga makoapo.” (Deuteronomio 4:9) Tanganing makamtan an bendisyon ni Jehova asin magin mapanggana sa daga na madali na nindang manahon, kaipuhan na otobon kan banwaan an duwang paninimbagan sa atubangan ni Jehova na saindang Dios. Dai ninda dapat lingawan an naheling nindang makangangalas na mga bagay na ginibo ni Jehova, asin dapat nindang itokdo iyan sa masurunod na kapag-arakian. Bilang banwaan nin Dios ngonyan, iyan man an dapat na gibohon niato kun gusto niatong ‘pilion an buhay asin magpadagos na mabuhay.’ Ano an naheling kan satong mga mata na ginibo ni Jehova para sa sato?

16, 17. (a) Ano an nahaman sa paghuhulit kan Kahadean kan mga misyonerong sinanay sa Gilead? (b) Anong mga halimbawa nin dai nainaan na kaigotan an aram nindo?

¹⁶ Napapalukso an satong puso na maheling na binebendisyonan nanggad ni Jehova an satong paghuhulit asin paggibo nin mga disipulo. Poon kan buksan an Paadalan sa Biblia kan Watchtower sa Gilead kan 1943, pinangenotan kan mga misyonero an paggibo nin mga disipulo sa dakol na nasyon. Sagkod sa presente, an enot na mga naggradwar sa paadalan na ini nagdadanay na maigot sa paghuhulit kan Kahadean, minsan ngani may edad na sinda asin an nagkapira may pisikal na mga limitasyon na. An saro sa marahayon na halimbawa iyo si Mary Olson, na naggradwar sa Gilead kan 1944. Naglingkod sia bilang misyonera enot sa Uruguay, dangan sa Colombia, asin ngonyan sa Puerto Rico. Minsan ngani medyo nalilimitaran na nin mga problema sa pisikal huli sa pagkagurang, napagdadanay ni Tugang na Olson an saiyang entusiasmo sa paghuhulit. Ginagamit an saiyang kaaraman sa lenguaheng Kastila, nag-iiskedyul sia nin panahon kada semana na makaiba sa lokal na mga parahayag sa ministeryo sa langtad.

¹⁷ Dawa balo na ngonyan, si Nancy Porter, na naggradwar sa Paadalan nin Gilead kan 1947, naglilingkod pa sa Bahamas. Sia saro pang misyonera na padagos na sibot sa paghuhulit. “An pagtokdo sa iba kan katotoohan sa Biblia nagin nangongorog na gikanan nin kagayagayahan,” an sabi ni Tugang na Porter sa saiyang estorya nin buhay.a “Iyan nagtatao nin aregladong espirituwal na rutina na ginibong organisado asin marigon an sakong buhay.” Kun ginigirumdom ni Tugang na Porter asin kan iba pang maimbod na mga lingkod an nakaagi, dai ninda nalilingawan an ginibo ni Jehova. Kumusta man kita? May pag-apresyar daw na pinagmamasdan niato kun paano binebendisyonan ni Jehova an gibohon na pan-Kahadean sa satong pagtaraed?—Salmo 68:11.

18. Ano an manonodan niato sa pagbasa kan estorya nin buhay kan mga misyonero?

¹⁸ Hanga kitang marhay sa ginigibo asin nagigibo pa kan mga haloyan nang ini sa paglilingkod. An pagbasa kan saindang mga estorya nin buhay ginigikanan nin pamparigon sa boot para sa sato huli ta kun naheheling niato kun ano an ginibo ni Jehova para sa mga maimbod na ini, napapakosog an satong determinasyon na paglingkodan si Jehova. Binabasa daw nindo nin regular an siring na nakakapukaw sa boot na mga estorya na ipinupublikar sa An Torrengbantayan asin hinohorophorop an mga iyan?

19. Paano magagamit nin tama kan Kristianong mga magurang an mga estorya nin buhay na isinurat sa An Torrengbantayan?

¹⁹ Ipinagirumdom ni Moises sa mga Israelita na dai ninda dapat lingawan an gabos na bagay na ginibo ni Jehova para sa sainda asin na an mga bagay na ini dai maninigong mapasuhay sa saindang puso sa gabos na aldaw kan saindang buhay. Dangan idinugang nia an saro pang bagay: “Ipaaram mo iyan sa saimong mga aki asin sa saimong mga makoapo.” (Deuteronomio 4:9) An tunay na mga estorya may espesyal na pan-akit. An nagdadakulang mga hoben nangangaipo nin marahay na mga halimbawa. An mga tugang na babae na daing agom puedeng makanood nin mga leksion sa maimbod na halimbawa nin mas may edad na mga tugang na babae na an estorya nin buhay isinasaysay sa An Torrengbantayan. An paglilingkod sa teritoryo na iba an lenguahe sa sainda mismong nasyon nagtatao nin pinahiwas na mga oportunidad sa mga tugang na lalaki sagkod babae na magin sibot sa paghuhulit kan maogmang bareta. Kamo na Kristianong mga magurang, taano ta dai gamiton an mga eksperyensia nin maimbod na mga misyonero hale sa Gilead asin nin iba pa sa pagtao nin pan-enganyar sa saindong mga aki na pilion an buhay na nasa bilog na panahon na paglilingkod?

20. Ano an dapat niatong gibohon tanganing ‘pilion an buhay’?

²⁰ Kun siring, paano ‘pipilion’ kan lambang saro sa sato “an buhay”? Paagi sa paggamit kan makangangalas na balaog nin libreng kabotan sa pagpaheling niato ki Jehova na namomotan niato sia asin paagi sa padagos na paggibo kan pinakamakakaya niato sa paglilingkod sa saiya sagkod na itinotogot nia sa sato an pribilehiong iyan. “Huli ta,” siring kan sabi ni Moises, si Jehova “an saimong buhay asin an kahalawigan kan saimong mga aldaw.”—Deuteronomio 30:19, 20.

[Nota sa Ibaba]

Nagigirumdoman daw Nindo?

• Ano an nanodan nindo sa mga halimbawa nin magkalaen na mga pagpili na tinokar niato?

• Anong mga bagay an dapat niatong gibohon tanganing ‘pilion an buhay’?

• Sinasadol kitang otobon an anong duwang paninimbagan?

[Ritrato sa pahina 26]

“Ibinugtak ko an buhay asin kagadanan sa atubangan mo”

[Ritrato sa pahina 29]

An paghinanyog sa tingog nin Dios nagbunga nin kaligtasan para ki Noe asin sa saiyang pamilya

[Ritrato sa pahina 30]

Si Mary Olson

[Ritrato sa pahina 30]

Si Nancy Porter