Pakanompong nin Paglaom sa Sarong Kinaban na Pano nin Kapurisawan

“AN ORDINARYONG mga siudadano igwa nin orog na kakayahan na gumibo nin ikakarahay kan publiko asin resolberan an lakop na mga problema kisa kasuarin man sa kasaysayan nin tawo.” Sinabi iyan kan dating Presidente kan Estados Unidos na si Bill Clinton durante nin sarong komperensia sa Ottawa, Canada, kan Marso 2006. Sinabi nia bilang konklusyon na an tendensia pasiring sa internasyonal na pagpaheling nin marahay na boot nagtatalubo poon kan tsunami kan 2004 asin nagsabi, na nagsusuherir nin pagkapositibo, na an kinaban yaon ngonyan sa “panahon nin pagsinarigan na dai pa nangyari kaidto.”

Maaasahan daw niato na papahiroon nin natural na mga kalamidad an mga tawo sa gabos na lugar na magmaigot para sa mas marahay na ngapit? Masasarigan daw na basehan an “pagsinarigan na dai pa nangyari kaidto” para sa paglaom sa ngapit na may tunay na katoninongan asin nagdadanay na katiwasayan?

Gikanan nin Tunay na Paglaom

An halawig na rekord kan paghihingoa nin katawohan sa labing anom na milenyo nagpapatunay na paorootrong nasusudya nin mga tawo an lambang saro. Kun siring, may marahay na dahelan na an ipinasabong na Kasuratan nagsasadol sa sato: “Dai ka magtiwala sa mga noble, ni sa aki nin daganon na tawo, na sa sainda mayo nin kaligtasan.” (Salmo 146:3) An paglaom niato sa mga organisasyon sa kinaban na ini, sa materyal na mga bagay kaiyan, asin sa mga ambisyon kaiyan nagbubunga sana nin pagkadesganar. Taano? Huli ta “an kinaban malihis sana asin siring man an mawot kaiyan.”—1 Juan 2:17.

Minsan siring, sa bilog na nag-aging mga siglo, an Dios an nagin seguradong paglaom nin matanos na mga tawo. Inaapod sia kan Biblia na “an paglaom nin [suanoy na] Israel” asin “an pinaglalaoman kan . . . mga apoon [nin Israel],” asin dakol an kapahayagan nin paglaom, tiwala, asin kompiansa sa saiya. (Jeremias 14:8; 17:13; 50:7) Sa katunayan, pinaparigon an satong boot kan Kasuratan na “maglaom . . . ki Jehova.”—Salmo 27:14.

Sinasadol kita kan Talinhaga 3:5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Nasa saindo an gabos na dahelan na lubos na manarig sa siring na panuga huli ta si Jehova Dios dai nagliliwat, masasarigan, asin totoo sa saiyang tataramon. (Malaquias 3:6; Santiago 1:17) Gusto nia an pinakamarahay para sa saindo, asin kun pirme nindong hinihimate an sinasabi sa saiyang Tataramon, an Biblia, mapanggana kamong gigiyahan kaiyan sa makatatakot na mga panahon na ini.—Isaias 48:17, 18.

An tawong bilog na pusong nagsusunod sa paggiya nin Dios makakasarig sa panugang ini: “Dai ka matakot, huli ta ako nasa saimo. Dai ka mangalagkalag, huli ta ako an saimong Dios. Papakosogon taka. Talagang tatabangan taka. Talagang kakapotan taka nin marigon kan sakong toong kamot nin katanosan.” (Isaias 41:10) An odok na pamibi kaiba an paghorophorop sa pag-asegurar na ini nakakarangang marhay sa gabos na talagang namomoot ki Jehova Dios, huli ta iyan nakakatabang sa sainda na makaya an depisil na mga kamugtakan asin kahaditan.

Isipon nindo si Andrea, saro sa Mga Saksi ni Jehova asin ina nin duwang aki. Sabi nia: “Solamenteng paagi sa pamibi asin paghorophorop sa mga panuga ni Jehova na igwa ako nin kosog na makabawi kun ako nag-aagi nin mga peryodo nin kadaihan nin kasegurohan. Kun pinagdadanay ko si Jehova sa sakong buhay, mas nagigin pasil nanggad na papagdanayon an karigonan.”

Pasarigon an Saindong Paglaom ki Jehova

Idinodoon an kahalagahan nin paglaom ki Jehova, an sarong salmista nagsabi: “An abundang katoninongan nasa mga namomoot sa saimong ley, asin sa sainda mayo nin masisingkogan.” (Salmo 119:165) An sinserong pag-adal sa Tataramon nin Dios makakatabang na marhay na panoon an saindong isip asin puso nin kapakipakinabang sa espirituwal asin positibong ‘mga bagay na totoo, seryoso, matanos, malinig, madaling kamotan, marahay an dangog, may moral na karahayan, asin kaomaw-omaw.’ Kun maingat kamong maghihingoa na magdangog, makanood, mag-ako, asin mag-aplikar kan siring na mga bagay, “mapapasaindo an Dios nin katoninongan.”—Filipos 4:8, 9.

Nagtataram basado sa personal na eksperyensia sa laog nin mga dekada, si John nagsasabi: “Tanganing mabago an mga saboot ko manongod sa ngapit, mahalagang maaraman na kaipuhan an dakulang pagbago sa sakong personalidad asin kaisipan bago ko laoman na mapatalubo an relasyon sa sangkap, dai naheheling na Dios. An solamenteng paagi na maestablisar ko an relasyon na iyan iyo an pagigin espirituwal na tawo. Kalabot dian an pagbago pasiring sa pagigin maki-Dios, na igwa kan kaisipan nin Dios sa mga bagay-bagay paagi sa pagbasa kan saiyang ipinasabong na Tataramon asin paghorophorop kaiyan.”

Kun iinomon nindo an nakakaginhawa asin nagtatao nin buhay na tubig nin katotoohan na nasa ipinasabong na Kasuratan, garo man sana sinusunod nindo an epektibo asin naprobaran nang paagi tanganing kontrahon an daing katapusan asin kadakol na maraot na bagay na ipinepresentar aroaldaw paagi sa media. An pag-aplikar kan sinasabi sa Biblia makakapakosog man sa bogkos kan saindong pamilya asin makakatabang na inaan an kahaditan. Dugang pa, an Dios nanunuga na andam siang “ipaheling an saiyang kosog para duman sa mga kompleto an puso para sa saiya.” (2 Cronica 16:9) Reresolberan nia an mga bagay-bagay sa paagi na talagang mayo kamo nin ano man na ikakatakot.

Si Phinehas, na nabuhay sa tahaw nin guerra asin lagdoan na paggadan, nagsasabi: “Nakanood ako na itiwala an sakong buhay sa mapagmakolog na kamot ni Jehova. An pagsusog sa mga prinsipyo sa Biblia ilinikay ako sa dakol na problema.” Kun talagang nagtitiwala kamo ki Jehova Dios, makakatabang sia sa saindo na pangganahan an ano man na garo lanob na problema. (Salmo 18:29) An sarong sadit na aki na may dayupot na relasyon sa saiyang mga magurang biyong nagtitiwala sa sainda asin nakakamate na tiwasay sa pag-asikaso ninda dawa kun sia may helang o medyo napupurisaw. Puede kamong magkaigwa nin kaagid na pagmate kun hihingoahon asin aakoon nindo an pangagda na maglaom ki Jehova.—Salmo 37:34.

Sarong Seguradong Pundasyon Para sa Paglaom

Sinabi ni Jesu-Cristo sa mga parasunod nia: “Mamibi kamo nin arog kaini: ‘Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an kabotan mo, kun paano sa langit, siring man sa daga.’” (Mateo 6:9, 10) An langitnon na Kahadean na iyan—sarong gobyerno sa kamot ni Jesu-Cristo—iyo an paagi nin Dios sa paghayag kan Saiyang lehitimong soberaniya sa daga.—Salmo 2:7-12; Daniel 7:13, 14.

An dakol na aspekto nin takot na nakakaapektar sa gabos na kabtang nin buhay ngonyan malinaw na nagpaparisa na kaipuhan an pangongoltanan nin Dios. Nakakaogma ta harani na an pangongoltanan na iyan! Pinatukaw na ngonyan nin Dios sa trono bilang Mesiyanikong Hade, si Jesu-Cristo pinagkatiwalaan nin autoridad na ibindikar an soberaniya ni Jehova asin pakangbanalon an Saiyang ngaran. (Mateo 28:18) Sa dai na mahahaloy, isesentro kan pamamahala kan Kahadean an atension kaiyan sa daga tanganing haleon an gabos na dahelan nin takot asin kahaditan. Sinasambit sa Isaias 9:6 an mga kredensial na nagpapatunay na si Jesus iyo an maninigong mamahala na kayang haleon an satong takot. Halimbawa, inaapod sia na “Amang Daing Sagkod,” “Makangangalas na Parahatol,” asin “Prinsipe nin Katoninongan.”

Isip-isipa an kawiliwiling mga tataramon na “Amang Daing Sagkod.” Bilang siring, si Jesus igwa nin kapangyarihan asin autoridad—saka kamawotan—na itao sa makinuyog na mga tawo an paglaom na mabuhay nin daing sagkod sa daga paagi sa merito kan saiyang atang na pantubos. Ini nangangahulogan na sa katapustapusi sinda makakatalingkas sa kasalan asin pagkabakong sangkap na minana sa makasalan na enot na tawo, si Adan. (Mateo 20:28; Roma 5:12; 6:23) Gagamiton man ni Cristo an saiyang tao nin Dios na autoridad tanganing buhayon liwat an dakol na nagadan.—Juan 11:25, 26.

Kan yaon sa daga, si Jesus nagin “Makangangalas na Parahatol.” Huli sa saiyang kaaraman sa Tataramon nin Dios asin ekstraordinaryong pakasabot sa naturalesa nin tawo, aram ni Jesus kun paano reresolberan an mga problema sa pan-aroaldaw na buhay. Poon kan patukawon sia sa trono sa langit, si Cristo nagdadanay na “Makangangalas na Parahatol,” na naglilingkod bilang pangenot na pinakapaagihan sa pagkomunikar ni Jehova sa katawohan. An hatol ni Jesus, na nakarekord sa Biblia, pirmeng madonong asin daing kasalasala. An pakaaram kaini asin pagtubod digdi puedeng magtao sa saindo nin buhay na may kasegurohan asin mayo nin nakakaparalisar na takot.

Ipinapamidbid man kan Isaias 9:6 si Jesus bilang an “Prinsipe nin Katoninongan.” Sa katongdan na iyan, dai na mahahaloy gagamiton ni Cristo an saiyang kapangyarihan tanganing haleon an gabos na kawaran nin pagkapantaypantay—politikal, sosyal, asin pinansial. Paano? Paagi sa pagbugtak kan katawohan sa irarom kan solamenteng matoninong na pamamahala kan Mesiyanikong Kahadean.—Daniel 2:44.

Sa irarom kan pamamahala kan Kahadean, mangingibabaw an nagdadanay na katoninongan sa bilog na daga. Taano ta makakasierto kamo sa bagay na ini? An dahelan ihinayag sa Isaias 11:9, kun saen mababasa niato: “Dai sinda [mga sakop kan Kahadean] magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakakatahob sa mismong kadagatan.” Pag-abot nin panahon, an lambang tawo sa daga magkakaigwa nin tamang kaaraman dapit sa Dios asin magigin makinuyog sa saiya. An posibilidad daw na iyan nagpapaogma sa saindong puso? Kun iyo, dai mag-atraso sa paglaog sa isip nin mahalagang marhay na “kaaraman dapit ki Jehova.”

Puede nindong aprobetsaran an nakakaparigon nin pagtubod asin nagtatao nin buhay na kaaraman dapit sa Dios paagi sa pagsiyasat kun ano man nanggad an itinotokdo kan Biblia manongod sa mga pangyayari sa satong panahon asin sa maogmang ngapit na ipinanuga sa Biblia. Kun siring, sinasadol mi kamo na aprobetsaran an areglo nin daing bayad na pag-adal sa Biblia na iinaalok kan mga Saksi ni Jehova sa saindong komunidad. Ini sarong paagi na mawara an takot asin makanompong nin tunay na paglaom sa sarong kinaban na pano nin kapurisawan.

[Kahon/Mga Ritrato sa pahina 7]

Kun Taano ta Nakakapukaw nin Paglaom an Gobyernong Kahadean

Si Jesu-Cristo, bilang Hade kan Kahadean nin Dios, tinawan kan kakayahan asin kan deretso na gumamit nin kapangyarihan sa bilog na uniberso. (Mateo 28:18) Ibabalik nia sa sangkap na pagkatimbang an ekolohiya (ecology) kan daga. Igwa man sia nin autoridad sa helang. An makapangyarihan na mga ginibo ni Jesus sa daga patanaw sa ngapit kan mas dakula pa nganing mga bendisyon na maabot durante kan saiyang pamamahala bilang sangkap asin mapagtitiwalaan na Hade. Anong mga kualidad kan Mesiyanikong Hade na ini na nakalista sa ibaba an nangorognang nakakaakit sa saindo?

▪ Madaling dolokon.—Marcos 10:13-16.

▪ Rasonable asin mayong ipinapaorog.—Marcos 10:35-45.

▪ Responsable asin bakong maimot.—Mateo 4:5-7; Lucas 6:19.

▪ Matanos asin makatanosan.—Isaias 11:3-5; Juan 5:30; 8:16.

▪ Maasikaso, makonsiderasyon, asin mapakumbaba.—Juan 13:3-15.

[Ritrato sa pahina 4]

Ikakatadom sa sato kan pagbasa asin paghorophorop sa Biblia an paglaom ki Jehova