Hula ni Isaias—Liwanag Para sa Bilog na Katawohan I

Kapitulo Trese: Pagkaligtas Asin Paggayagaya sa Pagreynar kan Mesiyas

Isaias 11:1–​12:6

 1. Iladawan an espirituwal na kamugtakan kan katipan na banwaan nin Dios kan kaaldawan ni Isaias.

KAN kaaldawan ni Isaias, maraot an espirituwal na kamugtakan kan katipan na banwaan nin Dios. Dawa kan namamahala an fiel na mga hade, arog ki Uzias asin Jotam, dakol sa banwaan an nagsamba sa haralangkaw na lugar. (2 Hade 15:1-4, 34, 35; 2 Cronica 26:​1, 4) Kan nagin hade si Ezequias, kinaipuhan niang haleon sa daga an mga bagay asin gibohon na konektado sa pagsamba ki Baal. (2 Cronica 31:1) Bakong makangangalas na sinadol ni Jehova an saiyang banwaan na bumalik sa saiya asin pinatanidan manongod sa maabot na disiplina!

2, 3. Anong pamparigon sa boot an itinatao ni Jehova sa mga nagmamawot na paglingkodan sia sa ibong nin lakop na pagigin bakong fiel?

² Pero, bako man gabos biyong rebelde. Si Jehova may fiel na mga propeta, asin posibleng marhay na may nagkapirang Judio na naghinanyog sa sainda. Si Jehova may nakararangang mga tataramon para sa mga ini. Pakatapos iladawan an teribleng pagkagaba na aagihan kan Juda durante kan pagsalakay kan Asirio, si propeta Isaias pinasabngan na isurat an saro sa pinakamagayon na halipot na kabtang sa bilog na Biblia, sarong paglaladawan kan mga bendisyon na maabot sa pagreynar kan Mesiyas.a An nagkapirang aspekto kan mga bendisyon na ini nagkaigwa nin sadit na kaotoban kan nagpuli an mga Judio hale sa pagkabihag sa Babilonya. Alagad an hula sa kabilogan igwa nin mayor na kaotoban ngonyan. Totoo, si Isaias asin an iba pang fiel na mga Judio kan panahon nia dai nabuhay tanganing maheling an mga bendisyon na ini. Alagad inantisipar ninda iyan na may pagtubod asin maheheling ninda an sarong kaotoban kan mga tataramon ni Isaias pakatapos kan pagkabuhay liwat.​—Hebreo 11:35.

³ An banwaan ni Jehova sa presenteng aldaw nangangaipo man nin pamparigon sa boot. An marikas an pagraot na mga pamantayan sa moral sa kinaban, maisog na pagtumang sa mensahe kan Kahadean, asin personal na mga kaluyahan nagtatao nin kadepisilan sa sainda gabos. An makangangalas na mga tataramon ni Isaias manongod sa Mesiyas asin sa saiyang pagreynar puedeng makapakosog asin makatabang sa banwaan nin Dios na makaya an mga kadepisilan na ini.

An Mesiyas​—Sarong May Kakayahan na Namomoon

4, 5. Ano an ihinula ni Isaias mapadapit sa pagdatong kan Mesiyas, asin anong pag-aplikar sa mga tataramon ni Isaias an minalataw na ginibo ni Mateo?

⁴ Dakol na siglo bago kan panahon ni Isaias, itinokdo kan iba pang Hebreo na kagsurat nin Biblia an pagdatong kan Mesiyas, an tunay na Namomoon, na isusugo ni Jehova sa Israel. (Genesis 49:10; Deuteronomio 18:18; Salmo 118:​22, 26) Ngonyan paagi ki Isaias, si Jehova nagtao nin dugang pang mga detalye. Si Isaias nagsurat: “May maluwas na sanga sa pungo ni Jese; asin hale sa saiyang mga gamot an sarong supang magigin mabunga.” (Isaias 11:1; ikomparar an Salmo 132:11.) An “sanga” asin “supang” pareho nagpaparisa na an Mesiyas magigin gikan ni Jese paagi sa saiyang aking si David, na linahidan nin lana bilang hade kan Israel. (1 Samuel 16:13; Jeremias 23:5; Kapahayagan 22:16) Kun dumatong na an tunay na Mesiyas, an “supang” na ini, gikan sa kamag-anakan ni David, mapaluwas nin marahay na bunga.

⁵ An ipinanugang Mesiyas iyo si Jesus. An kagsurat nin ebanghelyo na si Mateo nanabihan an mga tataramon sa Isaias 11:1 kan sabihon nia na an pag-apod ki Jesus na “Nazareno” inotob an mga tataramon kan mga propeta. Huli ta sia pinadakula sa banwaan nin Nazaret, si Jesus inapod na Nazareno, sarong ngaran na minalataw na konektado sa termino sa Hebreo na ginamit sa Isaias 11:1 para sa “supang.”b​—Mateo 2:​23, nota sa ibaba; Lucas 2:​39, 40.

 6. Ihinula na magigin anong klaseng namamahala an Mesiyas?

⁶ Magigin anong klaseng namamahala an Mesiyas? Sia daw magigin arog kan maringis, matagas an boot na Asirio na nanlaglag sa sampulong tribong kahadean nin Israel sa amihanan? Siempre bako. Manongod sa Mesiyas, si Isaias nagsasabi: “Sa saiya matogdon an espiritu ni Jehova, an espiritu nin kadonongan asin nin pakasabot, an espiritu nin hatol asin nin kakosogan, an espiritu nin kaaraman asin nin takot ki Jehova; asin maoogma sia sa pagkatakot ki Jehova.” (Isaias 11:​2, 3a) An Mesiyas linahidan, bako nin lana, kundi nin banal na espiritu nin Dios. Nangyari ini sa pagbautismo ki Jesus, kan maheling ni Juan na Bautisador na naghihilig ki Jesus an banal na espiritu nin Dios sa pormang salampati. (Lucas 3:22) An espiritu ni Jehova ‘nagtogdon’ ki Jesus, asin nagtao sia nin ebidensia kaini kan sia huminiro na may kadonongan, pakasabot, hatol, kakosogan, asin kaaraman. Kanigoan karahay na mga kualidad nin sarong namamahala!

 7. Ano an ipinanuga ni Jesus sa saiyang fiel na mga parasunod?

⁷ An mga parasunod ni Jesus puede man umako nin banal na espiritu. Sa saro kan saiyang mga diskurso, ipinahayag ni Jesus: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Lucas 11:13) Huli kaini, dai kita noarin man maninigong mag-alangan na humagad nin banal na espiritu sa Dios, ni kita maninigong umontok sa pagkultibar kan nakararahay na bunga kaiyan​—“pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” (Galacia 5:​22, 23) Nanunuga si Jehova na sisimbagon an kahagadan kan mga parasunod ni Jesus na tawan sinda nin “kadonongan hale sa itaas” tanganing tabangan sinda na mapangganang atubangon an mga problema sa buhay.​—Santiago 1:5; 3:17.

 8. Paano naoogma si Jesus sa pagkatakot ki Jehova?

⁸ Ano an pagkatakot ki Jehova na ipinaheheling kan Mesiyas? Si Jesus dai nanggad nasisindak sa Dios, na natatakot sa saiyang pagkondenar. Imbes, an Mesiyas may magalang na pagkangirhat sa Dios, sarong mamomoton na reberensia sa saiya. An sarong matatakton sa Dios pirmeng nagmamawot na ‘gibohon an mga bagay na nakapaoogma sa saiya,’ arog kan ginigibo ni Jesus. (Juan 8:29) Paagi sa tataramon asin halimbawa, itinotokdo ni Jesus na mayo nang maorog na kagayagayahan kisa lumakaw aroaldaw na may nakararahay na pagkatakot ki Jehova.

Sarong Matanos Asin Maheherakon na Hokom

 9. Anong halimbawa an itinao ni Jesus sa mga hinagadan na maghokom sa mga bagay sa Kristianong kongregasyon?

⁹ Ihinula ni Isaias an dakol pang karakteristiko kan Mesiyas: “Dai sia maghohokom oyon sa pakaheling sana kan saiyang mga mata, o magsasagwe oyon sana sa nadadangog kan saiyang mga talinga.” (Isaias 11:3b) Kun kamo kaipuhan na umatubang sa sarong husgado, bako daw na kamo magpapasalamat na igwa nin sarong hokom na siring kaiyan? Sa saiyang katongdan bilang Hokom kan bilog na katawohan, an Mesiyas dai napadadara sa falsong mga argumento, tusong mga taktika sa husgado, huringhuding, o panluwas na mga bagay, arog baga nin kayamanan. Naririsa nia an panloloko asin naheheling an nasa likod kan bakong paborableng panluwas na mga itsura, na namamansayan “an natatagong persona kan puso,” “an natatagong tawo.” (1 Pedro 3:​4, nota sa ibaba) An daing kabaing na halimbawa ni Jesus nagseserbing arogan para sa gabos na hinahagadan na maghokom sa mga bagay sa Kristianong kongregasyon.​—1 Corinto 6:1-4.

10, 11. (a) Sa paanong paagi itinatanos ni Jesus an saiyang mga parasunod? (b) Anong paghokom an itinatao ni Jesus sa mga maraot?

¹⁰ Paano maiimpluwensiahan kan daing kabaing na mga kualidad kan Mesiyas an saiyang hudisyal na mga desisyon? Ipinaliliwanag ni Isaias: “Sa katanosan dapat niang hokoman an mga hamak, asin sa pagkatanos dapat siang magsagwe para sa mga mahoyo kan daga. Asin lulugadon nia an daga sa sogkod kan saiyang ngoso; asin sa espiritu kan saiyang mga ngabil gagadanon nia an maraot. Asin an katanosan an magigin habay kan saiyang piad, asin an pagigin fiel an habay kan saiyang habayan.”​—Isaias 11:​4, 5.

¹¹ Kun nangangaipo nin pagtatanos an saiyang mga parasunod, itinatao iyan ni Jesus sa paaging pinakakapakipakinabang para sa sainda​—sarong marahayon na halimbawa para sa Kristianong kamagurangan. Sa ibong na lado, an mga naggigibo nin karatan makaaasa nin makuring paghokom. Kun panimbagon na nin Dios an sistemang ini nin mga bagay, “lulugadon [kan Mesiyas] an daga” paagi sa saiyang may autoridad na tingog, na nagpapaluwas nin paghokom na kalaglagan para sa gabos na maraot. (Salmo 2:9; ikomparar an Kapahayagan 19:15.) Sa kahurihurihi, mayo nang matatadang maraot na tawo na madisturbo sa katoninongan kan katawohan. (Salmo 37:​10, 11) Si Jesus, na an piad asin habayan nahahagkosan nin katanosan asin pagigin fiel, may kapangyarihan na gibohon ini.​—Salmo 45:3-7.

Binagong mga Kamugtakan sa Daga

12. Ano an puedeng ikahadit nin sarong Judio kun hinohorophorop nia an pagpuli sa Dagang Panuga hale sa Babilonya?

¹² Imahinara an sarong Israelita na nakaaram pa sana kan dekreto ni Ciro na an mga Judio pumuli sa Jerusalem asin itogdok liwat an templo. Babayaan daw nia an seguridad sa Babilonya tangani na magbiahe nin harayo papuli? Durante kan 70 taon na pagkawara kan Israel, an binayaan na mga oma natahoban na nin mga doot. An mga lobo, leopardo, leon, asin oso talingkas na ngonyan na naglalagawlagaw sa mga omang idto. Inistaran na man iyan nin mga rimoranon. An mapuling mga Judio kaipuhan na magdepende sa magarong mga hayop tanganing mabuhay​—an mga aripompon asin pugro an pagkukuanan nin gatas, lana, asin karne, saka an mga bakang kapon an maguyod sa arado. An mga ini daw mabibiktima nin mga naniniba? Matutuka daw nin mga halas an mga aking sadang? Kumusta man an peligro na abatan mantang nagbabaklay?

13. (a) Anong nakaoogmang kamugtakan an ilinaladawan ni Isaias? (b) Paano ta naaaraman na an katoninongan na ilinadawan ni Isaias labi pa an kalabot kisa pagigin ligtas sana sa mabangis na mga hayop?

¹³ Ilinaladawan ngonyan ni Isaias an sarong nakaoogmang mga kamugtakan na pangyayarihon nin Dios sa daga. Sia nagsasabi: “An lobo totoong mag-eerok sa kadikit na panahon na kasaro kan kordero, asin an leopardo maghihigdang kadorog kan ogbon na kanding, asin an ogbon na baka saka an may bunday na ogbon na leon saka an hayop na basog nag-iiriba; asin sarong aking sadang an mangengenot sa sainda. Asin an baka saka an oso magsasabsab; an saindang mga ogbon maghihirigdang dororog. Asin minsan an leon magkakakan nin dagami kapareho kan toro. Asin an aking pasusohon magkakawat nanggad sa lungib kan rimoranon; asin sa ibabaw kan lungib nin kamandagan na halas totoong ibubugtak nin bagong butason sa pagsuso an saiyang kamot. Dai sinda magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:6-9) Bako daw na nakapaoogma sa puso an mga tataramon na ini? Mangnoha na an katoninongan na ilinadawan digdi resulta kan kaaraman dapit ki Jehova. Huli kaini, labi pa an kalabot kisa pagigin ligtas sana sa mabangis na mga hayop. An kaaraman dapit ki Jehova dai makakapabago sa mga hayop, alagad magkakaigwa iyan nin epekto sa mga tawo. Dai na kaipuhan na matakot an mga Israelita sa mabangis na mga hayop o garo hayop na mga tawo mantang nasa dalan papuli ni sa saindang ibinalik sa dating daga.​—Esdras 8:​21, 22; Isaias 35:8-10; 65:25.

14. Ano an mas dakulang kaotoban kan Isaias 11:6-9?

¹⁴ Minsan siring, an hulang ini igwa nin mas dakulang kaotoban. Kan 1914, si Jesus, an Mesiyas, pinatukaw sa trono sa langitnon na Bukid nin Sion. Kan 1919 an mga natatada kan “Israel nin Dios” nakaeksperyensia nin pagkabutas sa Babilonikong pagkabihag asin nakikabtang sa pagbabalik kan tunay na pagsamba. (Galacia 6:16) Bilang resulta, nabukasan an dalan para sa kaotoban sa presenteng aldaw kan hula ni Isaias dapit sa Paraiso. An “tamang kaaraman,” an kaaraman dapit ki Jehova, nakapabago nin mga personalidad. (Colosas 3:​9, 10) An dating madahas na mga tawo nagin toninong. (Roma 12:2; Efeso 4:17-24) An mga pangyayaring ini nagkaigwa na nin epekto ngonyan sa minilyon huli ta nakaiba na sa hula ni Isaias an marikas nang nagdadakol na kabilangan nin mga Kristiano na may daganon na paglaom. (Salmo 37:29; Isaias 60:22) An mga ini nakanood na maghalat sa panahon na an bilog na daga ibabalik sa dati bilang sarong tiwasay, matoninong na paraiso, segun sa orihinal na katuyohan nin Dios.​—Mateo 6:​9, 10; 2 Pedro 3:13.

15. Rasonable daw na laoman ta na magkakaigwa nin literal na kaotoban an mga tataramon ni Isaias sa bagong kinaban? Ipaliwanag.

¹⁵ Sa ibinalik na Paraiso na iyan, magkakaigwa daw nin dugang pa, tibaad mas literal, na kaotoban an hula ni Isaias? Garo rasonableng isipon iyan. An hula nagtatao sa gabos na mabubuhay sa pamamahala kan Mesiyas kan iyo man sanang garantiya na itinao kaiyan sa nagpuling mga Israelita; sinda asin an saindang mga aki dai makamamate nin takot sa ano man na gikanan nin peligro​—tawo o hayop. Sa pamamahala kan Kahadean kan Mesiyas, an gabos na nag-eerok sa daga magkakaigwa nin matoninong na kamugtakan kapareho kan nakamtan ni Adan asin Eva sa Eden. Siempre, dai ihinayag kan Kasuratan an gabos na detalye kun anong klase an pamumuhay kaidto sa Eden​—o kun anong klase an magigin pamumuhay sa Paraiso. Pero, kita puedeng magin kompiado na sa madonong asin mamomoton na pamamahala kan Hadeng Jesu-Cristo, an gabos magigin sono sa maninigong mangyari.

Ibinalik na Dalisay na Pagsamba Paagi sa Mesiyas

16. Ano an nagserbing senyal para sa banwaan nin Dios kan 537 B.C.E.?

¹⁶ An dalisay na pagsamba enot na sinalakay sa Eden kan mapangganang naimpluwensiahan ni Satanas si Adan asin Eva na sumuway ki Jehova. Sagkod sa aldaw na ini, dai pa uminontok si Satanas sa saiyang katuyohan na irayo sa Dios an pinakadakol na mapupuede. Alagad nungkang totogotan ni Jehova na mawara sa daga an dalisay na pagsamba. Imbuelto an saiyang ngaran, asin may pagmakolog sia sa mga naglilingkod sa saiya. Huli kaini, paagi ki Isaias nagtao sia nin nakaaapod nin atension na panuga: “Mangyayari sa aldaw na iyan na malataw an gamot ni Jese na matindog bilang sarong senyal para sa mga banwaan. Sa saiya pati an mga nasyon madolok na may paghapot, asin an saiyang pahingaloan kaipuhan na magin mamuraway.” (Isaias 11:10) Kaidtong 537 B.C.E., an Jerusalem, an siudad na ginibo ni David na kabisera kan nasyon, nagserbing senyal, na nangangapodan sa sarong fiel na natatada kan wararak na Judiong banwaan na pumuli asin itogdok liwat an templo.

17. Paano si Jesus ‘nagtindog na mamamahala sa mga nasyon’ kan enot na siglo asin sa satong kaaldawan?

¹⁷ Minsan siring, labi pa dian an pinanonongdan kan hula. Siring kan naheling na, iyan nanonongod sa pamamahala kan Mesiyas, an sarong tunay na Namomoon para sa mga tawo kan gabos na nasyon. Kinotar ni apostol Pablo an Isaias 11:10 tanganing ipaheling na sa saiyang kaaldawan an mga tawo kan mga nasyon magkakaigwa nin lugar sa Kristianong kongregasyon. Kinokotar an traduksion kan Septuaginta sa bersikulong ini, sia nagsurat: “Si Isaias nagsasabi: ‘May maabot na gamot ni Jese, asin may sarong matindog na mamamahala sa mga nasyon; sa saiya ibubugtak nin mga nasyon an saindang paglaom.’” (Roma 15:12) Dugang pa, mas harayo pa ngani an naabot kan hula​—sagkod sa satong kaaldawan na an mga tawo kan mga nasyon nagpapaheling kan saindang pagkamoot ki Jehova paagi sa pagsuportar sa linahidan na mga tugang kan Mesiyas.​—Isaias 61:5-9; Mateo 25:31-40.

18. Sa satong kaaldawan, paano nagin pinakatanda si Jesus?

¹⁸ Sa presenteng aldaw na kaotoban, an “aldaw na iyan” na nasambitan ni Isaias nagpoon kan an Mesiyas patukawon sa trono bilang Hade kan langitnon na Kahadean nin Dios kan 1914. (Lucas 21:10; 2 Timoteo 3:1-5; Kapahayagan 12:10) Poon kaidto, si Jesu-Cristo nagin malinaw na senyal, o pinakatanda, para sa espirituwal na Israel asin para sa mga tawo kan gabos na nasyon na naghihimuyawot nin matanos na gobyerno. Sa paggiya kan Mesiyas, an maogmang bareta kan Kahadean ipinaabot na sa gabos na nasyon, siring kan ihinula ni Jesus. (Mateo 24:14; Marcos 13:10) An maogmang bareta na ini igwa nin mapuersang epekto. “Sarong dakulang kadaklan, na dai nin siisay man na makabibilang, hale sa gabos na nasyon” an nagpapasakop sa Mesiyas paagi sa pakikiiba sa linahidan na natatada sa dalisay na pagsamba. (Kapahayagan 7:9) Mantang dakol na bagohan an padagos na nakikiasosyar sa natatada sa espirituwal na “harong nin pamibi” ni Jehova, sinda nakadadagdag sa kamurawayan kan “pahingaloan” kan Mesiyas, an dakulang espirituwal na templo nin Dios.​—Isaias 56:7; Haggeo 2:7.

Sarong Nagkakasararong Banwaan an Naglilingkod ki Jehova

19. Sa anong duwang pangyayari na ibinalik ni Jehova an sarong natatada kan saiyang banwaan na nakawarak sa bilog na daga?

¹⁹ Sumunod ipinagirumdom ni Isaias sa mga Israelita na kaidto si Jehova nagtao na nin kaligtasan sa sainda kan an nasyon napaatubang sa pan-aapi nin sarong makapangyarihan na kaiwal. An kabtang na iyan kan kasaysayan nin Israel​—an pagbutas ni Jehova sa nasyon hale sa pagkabihag sa Egipto​—nagin mahal sa puso kan gabos na fiel na mga Judio. Isinurat ni Isaias: “Mangyayari sa aldaw na iyan na iaabot giraray ni Jehova an saiyang kamot, nin ikaduwang beses, tanganing kuanon an natatada kan saiyang banwaan na mawawalat hale sa Asiria asin hale sa Egipto asin hale sa Patros asin hale sa Cus asin hale sa Elam asin hale sa Sinar asin hale sa Hamat patin hale sa mga isla kan dagat. Asin iiitaas nanggad nia an sarong senyal para sa mga nasyon asin titiponon nia an mga nagkasuruway hale sa Israel; asin an mga nakawarak hale sa Juda pagsasararoon nia hale sa apat na poro kan daga.” (Isaias 11:​11, 12) Garo man sana kinakabit sinda, gigiyahan ni Jehova an sarong fiel na natatada kan Israel sagkod kan Juda paluwas sa mga nasyon na nawarakan ninda asin ligtas sindang ipupuli. Sa sadit na paagi, nangyari ini kan 537 B.C.E. Pero, mas mamuraway nanggad an mayor na kaotoban! Kan 1914, iinitaas ni Jehova an pinatukaw sa trono na si Jesu-Cristo bilang “sarong senyal para sa mga nasyon.” Poon kan 1919 an mga nawawalat kan “Israel nin Dios” nagpoon na magburunyog sa senyal na ini, na galagang makikabtang sa dalisay na pagsamba sakop kan Kahadean nin Dios. An daing kaagid na espirituwal na nasyon na ini “hale sa lambang tribo asin tataramon asin banwaan patin nasyon.”​—Kapahayagan 5:9.

20. Anong pagkasararo an makakamtan kan banwaan nin Dios pagpuli ninda hale sa Babilonya?

²⁰ Ilinaladawan ngonyan ni Isaias an pagkasararo kan ibinalik na nasyon. Sa pag-apod sa kahadean sa amihanan bilang Efraim asin sa kahadean sa timog bilang Juda, sia nagsasabi: “Mawawara an pag-imon nin Efraim, asin popohoon dawa an mga nakikilaban sa Juda. An Efraim mismo dai mag-iimon sa Juda, ni makikilaban an Juda sa Efraim. Asin sinda malupad sa abaga kan mga Filisteo sa may solnopan; magkaibanan nindang sasalakaton an mga aki kan Sirangan. An Edom asin Moab iyo an mga bibikyawan ninda kan saindang kamot, asin an mga aki ni Amon an magigin sakop ninda.” (Isaias 11:​13, 14) Pagpuli kan mga Judio hale sa Babilonya, dai na sinda mababanga sa duwang nasyon. An mga miembro kan gabos na tribo nin Israel mabalik na nagkakasararo sa saindang daga. (Esdras 6:17) Dai na sinda maaanggot asin makikilaban sa lambang saro. Bilang nagkakasararong banwaan, sinda mapangganang maninindogan tumang sa saindang mga kaiwal sa nakapalibot na mga nasyon.

21. Paanong lataw nanggad an pagkasararo kan banwaan nin Dios ngonyan?

²¹ Orog pang kaomaw-omaw an pagkasararo kan “Israel nin Dios.” An 12 simbolikong tribo nin espirituwal na Israel nagkaigwa nin pagkasararo sa laog nin haros 2,000 nang taon basado sa pagkamoot sa Dios asin sa saindang espirituwal na mga tugang na lalaki asin babae. (Colosas 3:14; Kapahayagan 7:4-8) Ngonyan, an banwaan ni Jehova​—an espirituwal na mga Israelita sagkod an mga may daganon na paglaom​—igwa nin katoninongan asin pambilog na kinaban na pagkasararo sa pamamahala kan Mesiyas, mga kamugtakan na dai aram sa mga iglesia nin Kakristianohan. An Mga Saksi ni Jehova igwa nin nagkakasararong espirituwal na paninindogan tumang sa mga paghihingoa ni Satanas na olangon an saindang pagsamba. Bilang sarong banwaan, ginigibo ninda an sugo ni Jesus na ihulit asin itokdo an maogmang bareta kan Kahadean kan Mesiyas sa gabos na nasyon.​—Mateo 28:​19, 20.

Mapanggaganahan an mga Kaolangan

22. Paano ‘puputolon ni Jehova an pinakadila kan dagat nin Egipto’ asin ‘iwawasiwas an saiyang kamot sa may Salog’?

²² Igwa nin dakol na kaolangan, literal sagkod piguratibo, sa pagpuli kan mga Israelita hale sa pagkadistiero. Paano iyan mapanggaganahan? Si Isaias nagsasabi: “Puputolon nanggad ni Jehova an pinakadila kan dagat nin Egipto, asin iwawasiwas an saiyang kamot sa may Salog sa namumulang init kan saiyang espiritu. Asin hahampakon nia iyan sa pitong masulog na sapa kaiyan, asin totoong palalakawon nia an mga tawo na nakasandalyas.” (Isaias 11:15) Si Jehova an mahale kan gabos na kaolangan sa pagpuli kan saiyang banwaan. Dawa an kaolangan na siring kan masakit agihan na pinakadila kan Dagat na Pula (arog kan Golpo nin Suez) o siring kan dai mababalyo na Salog nin Eufrates maaalang, sabi ngani, kaya an saro puedeng bumalyo na dai na tinatangkas an saiyang sandalyas!

23. Sa anong paagi na “magkakaigwa nin sarong tinampo hale sa Asiria”?

²³ Kan kaaldawan ni Moises, nag-andam si Jehova nin dalan tanganing an Israel makadulag hale sa Egipto asin makamartsa pasiring sa Dagang Panuga. Magibo man sia nin kaagid kaiyan ngonyan: “Magkakaigwa nin sarong tinampo hale sa Asiria para sa natatada kan saiyang banwaan na mawawalat, kun paanong nagkaigwa man para sa Israel kan aldaw na sia luminuwas hale sa Egipto.” (Isaias 11:16) Gigiyahan ni Jehova an papuling mga desterrado na garo sinda naglalakaw sa sarong tinampo hale sa pinagdistierohan sa sainda pasiring sa saindang dagang tinuboan. Hihingoahon nin mga paratumang na papondohon sinda, alagad an saindang Dios, si Jehova, masasakaibahan ninda. An linahidan na mga Kristiano asin an saindang kairiba ngonyan maisog na sinasalakay man, alagad sinda nag-aabante na may kosog nin boot! Sinda nagluwas sa presenteng panahon na Asiria, an kinaban ni Satanas, asin tinatabangan ninda an iba na gibohon man iyan. Aram ninda na an dalisay na pagsamba magigin mapanggana asin maoswag. Iyan bakong gibo nin tawo, kundi nin Dios.

Daing Katapusan na Paggayagaya Para sa mga Sakop kan Mesiyas!

24, 25. Paagi sa anong mga kapahayagan nin pag-omaw asin pagpasalamat makagsing an banwaan nin Dios?

²⁴ Sa magayagayang pananaram ilinaladawan ngonyan ni Isaias an labi-labing kagayagayahan kan banwaan ni Jehova huli sa kaotoban kan Saiyang tataramon: “Sa aldaw na iyan ika siertong masabi: ‘Pasasalamatan taka, O Jehova, huli ta minsan ngani ika naanggot sa sako, an saimong kaanggotan luway-luway na nawara, asin rinanga mo ako.’” (Isaias 12:1) Estrikto an disiplina ni Jehova sa saiyang sumbikalan na banwaan. Alagad nahaman kaiyan an katuyohan na parahayon an relasyon kan nasyon sa saiya asin ibalik sa dati an dalisay na pagsamba. Pinakosog liwat ni Jehova an boot kan fiel na mga nagsasamba sa saiya na sa katapustapusi ililigtas nia sinda. Bakong makangangalas na nagpahayag sinda nin pag-apresyar!

²⁵ Biyong sinegurado kan ibinalik na mga Israelita an saindang kompiansa ki Jehova, asin sinda nagkagsing: “‘Uya! an Dios iyo an sakong kaligtasan. Magtitiwala ako asin dai ako matatakot; huli ta si Jah Jehova iyo an sakong kakosogan asin an sakong poder, asin sia an nagin sakong kaligtasan.’ Sa kaogmahan kamo siertong masakdo nin tubig sa mga burabod nin kaligtasan.” (Isaias 12:​2, 3) An termino sa Hebreo na trinadusir na “poder” sa bersikulo 2 minalataw bilang “pag-omaw” sa bersion kan Septuaginta. An mga nagsasamba nagkurahaw nin mga awit nin pag-omaw huli sa pagligtas ni “Jah Jehova.” Bilang pinalipot na porma kan ngaran na Jehova, an “Jah” ginagamit sa Biblia tanganing ipahayag an mas makosog na mga pagmate nin pag-omaw asin pagpasalamat. An paggamit kan pananaram na “Jah Jehova”​—na dinodoble an ngaran nin Dios​—dinadagdagan an puersa nin pag-omaw sa Dios sa mas halangkaw pa nganing grado.

26. Sairisay ngonyan an naghahayag kan mga ginibo nin Dios sa mga nasyon?

²⁶ Dai kayang sadirihon na sana kan tunay na mga nagsasamba ki Jehova an saindang kagayagayahan. Ihinuhula ni Isaias: “Sa aldaw na iyan siertong masarabi kamo: ‘Magpasalamat kamo ki Jehova, banwaan! Mag-apod kamo sa saiyang ngaran. Ipaaram nindo sa mga banwaan an saiyang mga ginibo. Sambiton nindo na an saiyang ngaran halangkaw. Umawit kamo nin melodiya ki Jehova, huli ta sia naggibo nin mga bagay na daing kaagid. Ini ipinamareta sa bilog na daga.’” (Isaias 12:​4, 5) Poon kan 1919, an linahidan na mga Kristiano​—paghaloyhaloy sa tabang kan saindang kairibang “ibang karnero”​—‘ipinahayag nin mahiwas an mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ Sinda “rasang pinili, sarong . . . banal na nasyon” na itinagama para sa katuyohan na ini. (Juan 10:16; 1 Pedro 2:9) Ipinahahayag kan mga linahidan na an banal na ngaran ni Jehova halangkaw asin nakikikabtang sa pagpamidbid kaiyan sa bilog na daga. Pinangengenotan ninda an gabos na nagsasamba ki Jehova sa paggayagaya sa saiyang pagtao nin kaligtasan sa sainda. Kapareho iyan kan ikinagsing ni Isaias: “Mag-awit ka asin magkurahaw sa kaogmahan, O babaeng nag-eerok sa Sion, huli ta dakula sa tahaw mo an Banal kan Israel”! (Isaias 12:6) An Banal nin Israel iyo si Jehova Dios mismo.

Magtanaw sa Ngapit na May Kompiansa!

27. Mantang hinahalat an pagkaotob kan saindang paglaom, sa ano kompiado an mga Kristiano?

²⁷ Ngonyan minilyon an nagburunyog na sa “senyal para sa mga banwaan”​—si Jesu-Cristo na pinatukaw na sa trono sa Kahadean nin Dios. Naggagayagaya sinda na magin sakop kan Kahadean na iyan asin napapalukso an puso na mamidbid si Jehova Dios asin an saiyang Aki. (Juan 17:3) Nakanonompong sinda nin dakulang kaogmahan sa saindang nagkakasararong Kristianong asosasyon asin nagmamaigot na marhay na ingatan an katoninongan na tanda kan tunay na mga lingkod ni Jehova. (Isaias 54:13) Kombensido na si Jah Jehova Dios na inootob an saiyang mga panuga, kompiado sinda sa saindang paglaom asin nakanonompong nin dakulang kaogmahan sa paghiras kaiyan sa iba. Logod na an lambang nagsasamba ki Jehova padagos na gamiton an bilog niang kosog sa paglilingkod sa Dios asin sa pagtabang sa iba na gibohon man iyan. Logod na isapuso kan gabos an mga tataramon ni Isaias asin maggayagaya sa kaligtasan paagi sa Mesiyas ni Jehova!

[Mga Nota sa Ibaba]