An Pagdangog sa Patanid Puwede Mong Ikaligtas!

KAN Disyembre 26, 2004, yinugyog nin 9.1-magnitude na linog an Simeulue, sarong isla sa amihanan-sulnupan na baybayon kan Sumatra, Indonesia. Nakahiriling sa dagat an gabos na nasa baybayon. Tapos, nariparo ninda na bakong normal an pag-atí kan tubig sa dagat. Nagdaralagan tulos an gabos pasakat sa kabubuldan asin nagkukururahaw nin “Smong! Smong!,” an apod ninda sa tsunami. Sa laog nin 30 minutos, nag-arabot an makusugon na mga alon sa baybayon asin dakul na harong asin baryo an dinestroso kaiyan.

An Isla nin Simeulue an inot na tinamaan kan mapandestrosong tsunaming iyan. Pero sa 78,000 na residente, pito sana an nagadan. Taano ta dikiton sana?a May kasabihan sa isla: ‘Pag may makusog na linog tapos nag-atí an dagat, dumalagan sa kabubuldan ta may maabot na darakulaon na alon sa baybayon.’ Base sa nangyari kaidto, naaraman kan mga taga Simeulue na may padangadang na tsunami paagi sa pag-obserbar sa mga pagbabago sa dagat. Naligtas sinda dahil nagdangog sinda sa patanid.

May sinasabi man an Bibliya manungod sa sarong padangadang na kalamidad, sarong ‘dakulang kahurasaan na dai pang kaagid na nangyari magpuon sa kapinunan nin kinaban sagkod ngunyan, ni minsan nuarin pa man.’ (Mateo 24:21) Pero bako iyan katapusan kan planetang Daga huli sa kapabayaan nin mga tawo o sarong kapaha-pahamak na natural na kalamidad—ta katuyuhan nin Diyos na an daga magdanay sagkod lamang. (Parahulit 1:4) Imbes, an padangadang na kahurasaan an paagi nin Diyos para ‘laglagon an mga naglalaglag kan daga.’ Iyan an magigin katapusan kan gabos na karatan asin kasakitan. (Kapahayagan 11:18; Talinhaga 2:22) Magayunon na bendisyon nanggad iyan!

Apuwera kaiyan, bakong arog nin mga tsunami, linog, o pagtuga nin bulkan, dai madadamay an inosenteng mga tawo sa padangadang na kalaglagan na iyan. Sabi kan Bibliya ‘an Diyos pagkamuot,’ asin an Diyos na iyan na an ngaran Jehova, nanunuga na ‘an mga [matanos sasadirihon an] daga, asin mabubuhay sagkod lamang diyan.’ (1 Juan 4:8; Salmo 37:29) Pero, ano daw an kaipuhan mong gibuhon para makaligtas sa dakulang kahurasaan asin magkamit kan ipinanugang mga bendisyon? Kaipuhan mong magdangog sa patanid!

Dai ta masasabi kun nuarin eksaktong maabot an katapusan kan gabos na karatan asin kasakitan, huli ta sinabi ni Jesus: ‘Dapit kan aldaw asin kan oras na iyan, daing nakakaisi, minsan an mga anghel sa langit, ni an Aki, kundi an Ama sana.’ Pero, dinadagka pa man giraray kita ni Jesus na ‘magpuka.’ (Mateo 24:36; 25:13) Para sain? Sinasabi kan Bibliya an magigin mga kamugtakan sa kinaban bago ipaabot nin Diyos an katapusan. Kun paanong an biglang pag-atí kan dagat nagin patanid para sa mga taga Simeulue na may padangadang na tsunami, an mga pagbabagong sarabay na nangyayari sa kinaban nagigin patanid man para sato na harani na an katapusan. Mahihiling sa kahon an nagkapira sa mga pagbabagong iyan na sinasabi kan Bibliya.

Totoo na minsan paano, nangyari na nin pasaro-saro an nagkapira sa mga pangyayari o mga kamugtakan na nasa kahon. Pero sinabi ni Jesus na pag mahiling na niyato an “gabos na bagay” na ini, maaaraman tang harani na an katapusan. (Mateo 24:33) Haputon an sadiri, ‘Kasuarin sa kasaysayan na an gabos na bagay na ini nangyari (1) sa bilog na kinaban, (2) nin sarabay, asin (3) padagos na naggagrabe?’ Malinaw na nabubuhay na kita sa panahon na iyan.

“An mga warning system . . . talagang nakakapagligtas nin buhay,” an sabi nin sarong dating presidente kan E.U. Pagkatapos kan tsunami kan 2004, nagbugtak nin warning system sa apektadong mga lugar para dai na mautro an arog kaidto kagrabeng trahedya kun magka-tsunami giraray. Nagtao man nin probisyon an Diyos para patanidan an mga tawo bago mag-abot an katapusan. Ihinula kan Bibliya: ‘Ining ebanghelyo nin Kahadian ihuhulit sa bilog na kinaban sa pagpatotoo sa gabos na nasyon; dangan madatong an katapusan.’—Mateo 24:14.

Kan nakaaging taon sana, labing 1.9 bilyon na oras an ginamit kan mga Saksi ni Jehova sa paghuhulit kan maugmang bareta sa 240 kadagaan asin sa labing 700 na lengguwahe. An pangyayaring ini sa presenteng panahon makusog na patunay na harani na an katapusan. Huli sa pagkamuot sa saindang kapwa, ginigibo kan mga Saksi ni Jehova an saindang bilog na makakaya para patanidan an iba dapit sa marikas na nagdadangadang na aldaw nin paghukom nin Diyos. (Mateo 22:39) Kapahayagan nin pagkamuot ni Jehova an bagay na itinatao niya sa saimo an impormasyon na ini. Tandaan, an Diyos ‘dai nagmamawot na an siisay man mapahamak, kundi na an gabos makaabot sa pagsulsol.’ (2 Pedro 3:9) Aakuon mo daw an pagkamuot nin Diyos asin dadangugon an patanid?

Girumdumon na nagdulag pasiring sa mas halangkaw na lugar an mga nakaistar sa mga baryo sa baybayon kan Simeulue pakahiling ninda na nag-atí an tubig; dai na ninda iyan hinalat pa na bumalik. Nailigtas sinda kan pagigin alisto ninda. Para makaligtas sa nagdadangadang na kahurasaan, kaipuhan mo man na dumulag pasiring sa mas halangkaw na lugar, bago mahuri an gabos. Paano? Pinasabngan si Isaias na isurat an dapit sa nakakapahirong imbitasyon na itatao sa ‘huring mga [aldaw],’ an panahon na kinabubuhayan na niyato. An sabi kaiyan: ‘Madya kamo, asin magsarakat kita sa bukid ni Jehova. Tutukduan niya kita kan saiyang mga dalan, asin magraralakaw kita sa saiyang mga dana.’—Isaias 2:2, 3.

Mantang patukad ka sa tuktok nin sarong bukid, mas nagrarayo an natatanaw mo asin mas nagigin ligtas ka. Sa kaagid na paagi, an pag-aram kan mga dalan nin Diyos paagi sa Bibliya nakakatabang sa minilyon na tawo sa bilog na kinaban sa ngunyan na gumibo nin kapaki-pakinabang na mga pagbabago sa saindang buhay. (2 Timoteo 3:16, 17) Sa paggibo kaiyan, nagpupuon na sindang maglakaw sa ‘mga dana [nin Diyos]’ asin mag-ako kan saiyang pag-uyon asin proteksiyon.

Aakuon mo daw an imbitasyon na iyan asin an mamumuton na proteksiyon nin Diyos sa delikadong mga aldaw na ini? Dinadagka mi kamo na maingat na siyasaton an mga ebidensiyang basado sa Bibliya na yaon sa kahon sa artikulong ini na tanda na nabubuhay na kita sa ‘huring mga [aldaw].’ Kun gusto mo, mauugma an mga Saksi ni Jehova sa saindong lugar na tabangan ka na mas masabutan an mga teksto diyan pati na kun paano ka makikinabang diyan. O puwede mong aramon an simbag sa mga hapot mo paagi sa samuyang website na www.jw.org/tl. Hilingon sa TURO NG BIBLIYA > SAGOT SA MGA TANONG SA BIBLIYA.