Hula ni Isaias—Liwanag Para sa Bilog na Katawohan I
Kasumpay kan Kapitulo Beinte-Dos: Ihinula ni Isaias an ‘Misteryosong Gibo’ ni Jehova
An ‘Misteryosong Gibo’ ni Jehova
16. Ano an ‘misteryosong gibo’ ni Jehova, asin taano ta pambihira an gibong ini?
16 An pangultimong resulta kan mga bagay-bagay magigin biyong kabaliktaran kan linalaoman kan mga namomoon sa relihion sa Juda. Magibo si Jehova nin misteryosong bagay sa espirituwal na mga paraburat sa Juda. “Si Jehova matindog na siring kaidto sa Bukid nin Perasim, sia mariribok na siring kaidto sa hababang kaplanodohan na harani sa Gabaon, tangani na magibo nia an saiyang gibo—an saiyang gibo misteryoso—asin tangani na magibo nia an saiyang trabaho—an saiyang trabaho pambihira.” (Isaias 28:21) Sa kaaldawan ni Hadeng David, si Jehova nagtao sa saiyang banwaan nin bantog na mga kapangganahan tumang sa mga Filisteo sa Bukid nin Perazim asin sa hababang kaplanodohan nin Gabaon. (1 Cronica 14:10-16) Kan kaaldawan ni Josue, pinapangyari pa ngani nia na umontok an saldang sa Gabaon tanganing magin biyo an kapangganahan kan Israel tumang sa mga Amorreo. (Josue 10:8-14) Pambihira nanggad iyan! Ngonyan si Jehova makikilaban giraray alagad sa panahon na ini tumang sa mga naghihingakong banwaan nia. Igwa pa daw nin mas misteryoso o pambihira? Mayo na kun iisipon an bagay na an Jerusalem iyo an sentro nin pagsamba ki Jehova asin an siudad kan linahidan na hade ni Jehova. Sagkod ngonyan, an sa hadeng pamilya ni David sa Jerusalem dai pa noarin man nadaog. Minsan siring, siertong gigibohon ni Jehova an saiyang ‘misteryosong gibo.’—Ikomparar an Habacuc 1:5-7.
17. Ano an magigin epekto kan panunuya sa kaotoban kan hula ni Isaias?
17 Kun siring, si Isaias nagpapatanid: “Dai nindo ipagpaheling an saindong sadiri na paratuya, tangani na dai kumosog an saindong mga gapos, huli ta may madatong na kalaglagan, sarong bagay na nadesisyonan na, na sakong nadangog sa Soberanong Kagurangnan, si Jehova nin mga hukbo, para sa bilog na daga.” (Isaias 28:22) Minsan ngani nanunuya an mga namomoon, totoo an mensahe ni Isaias. Nadangog nia iyan ki Jehova, na sa saiya may pakipagtipan an mga namomoon na idto. Kaagid kaiyan ngonyan, an mga namomoon sa relihion sa Kakristianohan nagtutuya kun nadadangog ninda an ‘misteryosong gibo’ ni Jehova. Nambubulyaw asin nangyayamyam pa ngani sinda. Alagad totoo an mensahe na ibinabalangibog kan Mga Saksi ni Jehova. Yaon iyan sa Biblia, an libro na hinihingakong irinerepresentar kan mga namomoon na idto.
18. Paano ilinadawan ni Isaias an pagigin balanse ni Jehova kun nagtatao nin disiplina?
18 Kun manongod sa sinserong mga indibiduwal na dai nagsusunod sa mga namomoon na idto, papakarhayon giraray asin ibabalik sinda ni Jehova sa saiyang pabor. (Basahon an Isaias 28:23-29.) Kun paanong an sarong paraoma naggagamit nin mas suabeng mga paagi sa pagginik nin mas delikadong grano, siring baga kan komino, ibinabagay man ni Jehova an saiyang disiplina segun sa indibiduwal asin mga sirkunstansia. Sia nungkang daing pakundangan o maringis kundi naghihiro na may pagkonsiderar sa potensial na pagbago kan mga napapasala. Iyo, kun hinihimate kan mga indibiduwal an pakiolay ni Jehova, igwa nin paglaom. Siring man ngonyan, minsan ngani an kaaabtan kan Kakristianohan sa kabilogan dai na mababago, an siisay man na indibiduwal na nagpapasakop sa Kahadean ni Jehova makakalikay sa nagdadangadang na bakong paborableng paghokom.
Herak Man sa Jerusalem!
19. Sa anong paagi na nagin “alisabwan sa altar” an Jerusalem, asin kasuarin asin paano ini nangyari?
19 Pero ano an sinasabi ngonyan ni Jehova? “Herak man kan Ariel, kan Ariel, an banwaan na pinagkampohan ni David! Dugangi an taon nin taon; pabalikbalikon an mga kapiestahan. Asin gigipiton ko an Ariel, asin magkakaigwa nin pagmondo asin pananangis, asin para sa sako sia magigin garo an alisabwan sa altar nin Dios.” (Isaias 29:1, 2) An “Ariel” posibleng nangangahulogan “An Alisabwan sa Altar nin Dios,” asin digdi iyan minalataw na nanonongod sa Jerusalem. Yaon dian an templo asin an altar nin atang kaiyan. Sinusunod kan mga Judio an rutina nin pagselebrar nin mga kapiestahan asin pagdolot nin mga atang duman, alagad dai naoogma si Jehova sa saindang pagsamba. (Oseas 6:6) Imbes, idinekreto nia na an siudad mismo magigin “alisabwan sa altar” sa laen na sentido. Siring sa sarong altar, iyan bobolosan nin dugo asin kakalayohan. Ilinadawan pa ngani ni Jehova kun paano ini mangyayari: “Makampo ako sa gabos na lado tumang sa saimo, asin sasalikopan taka nin kudal nin mga taldok asin mapatindog ako nin mga estrukturang pansalikop tumang sa saimo. Asin ika magigin hababa kaya ika mataram gikan sa daga mismo, asin magigin maluya an saimong pagtaram na garo naggigikan sa kabokabo.” (Isaias 29:3, 4) Naotob ini para sa Juda asin Jerusalem kan 607 B.C.E. kan salikopan asin laglagon kan hukbo nin Babilonya an siudad asin soloon an templo. An Jerusalem ibinaba sagkod sa daga na tinogdokan kaiyan.
20. Ano an ultimong kaaabtan kan mga kaiwal nin Dios?
20 Antes kan kapahapahamak na panahon na iyan, sa panapanahon an Juda nagkaigwa nin hade na nagkukuyog sa Ley ni Jehova. Ano kun siring? Si Jehova nakikipaglaban para sa saiyang banwaan. Minsan ngani lakopan kan kaiwal an daga, sinda magigin siring sa “pinong alpog” asin “ata.” Sa saiyang itinalaan na panahon, iwawarak sinda ni Jehova “na may kaibang dagoldol asin pagkunogkunog patin makosog na rinagobrob, doros nin bagyo asin unos, asin laad nin nakatutumtom na kalayo.”—Isaias 29:5, 6.
21. Ipaliwanag an ilustrasyon sa Isaias 29:7, 8.
21 Tibaad biyong inaantisipar kan antipatikong mga hukbo na samsaman an Jerusalem asin magpangana sa mga samsam sa guerra. Alagad sinda mapapagmata sa katotoohan! Siring sa sarong nagugutom na tawo na nangangatorogan na sia nasa bangkete dangan napapagmata na orog pang nagugutom, dai makakamtan kan mga kaiwal kan Juda an bangkete na biyong inaantisipar ninda. (Basahon an Isaias 29:7, 8.) Estudyare an nangyari sa hukbo nin Asiria na sakop ni Senaquerib kan humaon kaiyan an Jerusalem kan kaaldawan kan fiel na si Hadeng Ezequias. (Isaias, kapitulo 36 asin 37) Sa sarong banggi, na mayo ni sarong kamot nin tawo an ibinikyaw, pinaatras an makangingirhat na makinarya de guerra kan Asiria—185,000 kan maisog na mga guerrero kaiyan an ginadan! An mga pangarap na mangongkistar masusudya liwat kun an makinarya de guerra ni Gog nin Magog humiro na tumang sa banwaan ni Jehova sa harani nang ngapit.—Ezequiel 38:10-12; 39:6, 7.
22. Paano nakaapektar sa Juda an saiyang pagkaburat sa espirituwal?
22 Kan panahon na itinataram ni Isaias an kabtang na ini kan saiyang hula, an pagtubod kan mga namomoon sa Juda bakong kapareho kan ki Ezequias. Binurat ninda an saindang sadiri sagkod na mawaran nin animo sa espirituwal paagi sa saindang pakialyansa sa maraot na mga nasyon. “Ontok kamo asin pagngalas; magpakabuta kamo, asin mabuta. Sinda naburat, alagad bakong sa arak; sinda nagripaydipay, alagad bakong huli sa nakabuburat na arak.” (Isaias 29:9) Huling burat sa espirituwal, dai namamansayan kan mga namomoon na ini an kahulogan kan bisyon na itinao sa tunay na propeta ni Jehova. Si Isaias nagsasabi: “Ibinubo sa saindo ni Jehova an sarong espiritu nin nanok na pagtorog; asin pinirong nia an saindong mga mata, an mga propeta, asin tinahoban nia an saindo nganing mga payo, an mga bisyonaryo. Asin para sa saindo an bisyon kan gabos na bagay nagigin siring sa mga tataramon sa libro na sinerahan nin tatak, na itinatao ninda sa saro na nakababasa kan surat, na nagsasabi: ‘Basaha tabi ini nin makosog,’ asin sia masabi: ‘Dai ko iyan mababasa, huli ta iyan sinerahan nin tatak’; asin an libro itatao sa saro na dai nakababasa nin surat, na may nagsasabi: ‘Basaha tabi ini nin makosog,’ asin sia masabi: ‘Dai lamang ako nakababasa nin surat.’”—Isaias 29:10-12.
23. Taano ta papaninimbagon ni Jehova an Juda, asin paano nia iyan gigibohon?
23 An mga namomoon sa relihion kan Juda naghihingako na may diskresion sa espirituwal, alagad binayaan ninda si Jehova. Imbes, an itinotokdo ninda sadiri nindang biribid na mga ideya nin tama asin sala, na ipinangangatanosan an saindang kadaihan nin pagtubod asin inmoral na mga aktibidad patin an pagdara ninda sa banwaan pasiring sa pagdesaprobar nin Dios. Paagi sa “sarong bagay na makangangalas”—an saiyang ‘misteryosong gibo’—papaninimbagon sinda ni Jehova sa saindang pagsaginsagin. Sia nagsasabi: “Sa dahelan na an banwaan na ini ruminani paagi sa saindang ngoso, asin inomaw ninda ako paagi sana sa saindang mga ngabil, asin irinayo nanggad ninda an saindang puso sa sako, asin an saindang pagkatakot sa sako nagigin pagboot nin mga tawo na itinotokdo, kun siring uya ako, an Saro na mahiro giraray nin makangangalas sa banwaan na ini, sa makangangalas na paagi asin paagi sa sarong bagay na makangangalas; asin an kadonongan kan saindang mga madonong mapapara, asin an mismong pakasabot kan saindang mga lalaking may diskresion matago.” (Isaias 29:13, 14) An kadonongan asin pakasabot daa kan Juda mawawara kun maniobrahon na ni Jehova an mga bagay-bagay tanganing an bilog na apostatang relihiosong sistema kaini paraon kan Kapangyarihan Pankinaban nin Babilonya. Nangyari man iyan kan enot na siglo pakatapos na an nasyon ilagalag kan madonong daang mga namomoon sa mga Judio. Kaagid kaiyan an mangyayari sa satong kaaldawan sa Kakristianohan.—Mateo 15:8, 9; Roma 11:8.
24. Paano ihinahayag kan mga Judeano an saindang kadaihan nin diosnon na takot?
24 Minsan siring, mientras tanto an nananagsag na mga namomoon sa Juda naniniwala na matibayon sinda kaya malulusotan ninda an saindang pagparaot sa tunay na pagsamba. Kaya daw ninda? Hinale ni Isaias an saindang maskara, na ibinubuyagyag sinda bilang daing tunay na takot sa Dios asin sa siring mayo nin tunay na kadonongan: “Herak man kan mga minararom na marhay sa pagtago ki Jehova mismo kan planong gibohon, asin an mga gibo nangyari sa madiklom na lugar, mantang sinda nagsasabi: ‘Siisay an nakakaheling sato, asin siisay an nakaaaram manongod sa sato?’ An pagkabaliktad nindo! Maninigo daw na ibilang an paragibo nin koron na arog sana kan dalipay? Huli ta maninigo daw na an bagay na ginibo magsabi dapit sa kaggibo kaiyan: ‘Dai nia ako ginibo’? Asin an bagay daw na hinaman minasabi dapit sa naghaman kaiyan: ‘Dai sia nagpaheling nin pakasabot’?” (Isaias 29:15, 16; ikomparar an Salmo 111:10.) Gurano man sinda katago sa paghona ninda, sinda “huba asin bukas” sa mata nin Dios.—Hebreo 4:13.
“An mga Bungog Makakadangog Nanggad”
25. Sa anong sentido na makakadangog an “mga bungog”?
25 Minsan siring, may kaligtasan para sa mga indibiduwal na naggigibo nin pagtubod. (Basahon an Isaias 29:17-24; ikomparar an Lucas 7:22.) An “mga bungog makakadangog . . . kan mga tataramon sa libro,” an mensahe hale sa Tataramon nin Dios. Iyo, bako ining pagpaomay nin pisikal na pagkabungog. Iyan pagpaomay sa espirituwal. Sa giraray itinotokdo ni Isaias an pag-establisar sa ngapit kan Mesiyanikong Kahadean asin an pagbabalik sa dati kan tunay na pagsamba sa daga paagi sa pamamahala kan Mesiyas. Nangyayari na ini sa satong kapanahonan, asin minilyon na sinserong tawo an tinotogotan si Jehova na ikorehir an saindang sadiri asin nakakanood na omawon sia. Kanigoan kanakapupukaw sa boot na kaotoban! Sa katapustapusi, madatong an aldaw na an gabos, an lambang bagay na naghahangos, mag-oomaw ki Jehova asin sasantipikaron an saiyang banal na ngaran.—Salmo 150:6.
26. Anong espirituwal na mga pagirumdom an nadadangog kan “mga bungog” ngonyan?
26 Ano an nanonodan kan siring na “mga bungog” na nagdadangog sa Tataramon nin Dios ngonyan? Na an gabos na Kristiano, nangorogna an mga minimirar na halimbawa kan kongregasyon, dapat na maingat na lumikay na ‘malagalag huli sa nakabuburat na arak.’ (Isaias 28:7) Dugang pa, dapat na nungka kitang magsawa sa pagdangog sa mga pagirumdom nin Dios, na nakatatabang sa sato na magkaigwa nin espirituwal na punto de vista sa gabos na bagay. Minsan ngani tama sanang nagpapasakop sa mga autoridad nin gobyerno an mga Kristiano asin inaasahan na sinda magtao nin nagkapirang serbisyo, an kaligtasan naggigikan, bakong sa sekular na kinaban, kundi ki Jehova Dios. Siring man, nungka niatong lingawan na siring kan paghokom sa apostatang Jerusalem, an paghokom nin Dios sa kapag-arakian na ini dai madudulagan. Sa tabang ni Jehova ikakapadagos niato na ibalangibog an saiyang patanid sa ibong nin pagkontra, siring kan ginibo ni Isaias.—Isaias 28:14, 22; Mateo 24:34; Roma 13:1-4.
27. Anong mga leksion an puedeng manodan kan mga Kristiano sa hula ni Isaias?
27 An kamagurangan asin magurang puedeng makanood sa paagi nin pagtao ni Jehova nin disiplina, na pirmeng naghihingoang ibalik sa pabor nin Dios an paragibo nin sala, bako sanang kastigohon sinda. (Isaias 28:26-29; ikomparar an Jeremias 30:11.) Asin ipinagigirumdom sa sato gabos, kaiba an mga hoben, kun gurano kahalaga na paglingkodan si Jehova nin hale sa puso, bako sanang nagsasaginsagin na Kristiano tanganing panigoan an mga tawo. (Isaias 29:13) Dapat niatong ipaheling na bakong arog kan daing pagtubod na mga nag-eerok sa Juda, kita igwa nin nakararahay na takot ki Jehova asin hararom na paggalang sa saiya. (Isaias 29:16) Dugang pa, kaipuhan niatong ipaheling na kita andam na magpakorehir asin makanood ki Jehova.—Isaias 29:24.
28. Paano minamansay kan mga lingkod ni Jehova an saiyang mga pagliligtas?
28 Mahalaga nanggad na magkaigwa nin pagtubod asin kompiansa ki Jehova asin sa saiyang paagi nin paggibo nin mga bagay! (Ikomparar an Salmo 146:3.) Para sa kadaklan, an nagpapatanid na mensahe na satong ihinuhulit garo pan-aki. An linalaoman na pagkalaglag nin sarong organisasyon, an Kakristianohan, na naghihingako na naglilingkod sa Dios sarong misteryoso, pambihirang ideya. Alagad gigibohon ni Jehova an saiyang ‘misteryosong gibo.’ Mayong duda sa bagay na iyan. Huli kaini, sa huring mga aldaw kan sistemang ini nin mga bagay, an mga lingkod nin Dios lubos na nagtitiwala sa saiyang Kahadean asin sa saiyang ninombrahan na Hade, si Jesu-Cristo. Aram ninda na an mga pagliligtas ni Jehova—na ginibo kaiba kan saiyang ‘pambihirang gibo’—matao nin daing sagkod na bendisyon sa gabos na makinuyog na katawohan.