An Paghokom ni Jehova Tumang sa Falsong mga Paratokdo

“Sa mga propeta nin Jerusalem nakaheling ako nin labi-labi karaot na mga bagay, na naggigibo nin pagsambay asin naglalakaw sa kaputikan . . . Para sa sako sinda gabos nagin garo Sodoma, asin an mga nag-eerok sa saiya garo Gomorra.”​—JEREMIAS 23:14.

1. Taano an saro na naggigibo nin banal na pagtotokdo ta igwa nin magabaton na paninimbagan?

AN SIISAY man na naggigibo nin banal na pagtotokdo igwa nin magabaton na paninimbagan. An Santiago 3:1 nagpapatanid: “Dai maninigong magin paratokdo an kadaklan sa saindo, mga tugang, sa pakaaram na kita magkakamit nin orog kagabat na silot.” Iyo, an mga paratokdo kan Tataramon nin Dios nasa irarom nin orog kaseryosong responsibilidad na manimbag nin maninigo kisa sa mga Kristiano sa pankagabsan. Ano an magigin kahulogan kaini para duman sa napapatunayan na falsong mga paratokdo? Satong helingon an situwasyon kan kaaldawan ni Jeremias. Maheheling niato kun paano ipinanganino kaiyan an nangyayari ngonyan.

2, 3. Anong paghokom an ginibo ni Jehova paagi ki Jeremias manongod sa falsong mga paratokdo sa Jerusalem?

² Kan 647 B.C.E., an ika-13 taon kan paghade ni Hadeng Josias, si Jeremias sinugo bilang propeta ni Jehova. May reklamo si Jehova tumang sa Juda, kaya sinugo nia si Jeremias na ipahayag iyan. An falsong mga propeta, o mga paratokdo, sa Jerusalem naggigibo nin “labi-labi karaot na mga bagay” sa pagheling nin Dios. An saindang karatan grabe nanggad kaya iinagid nin Dios an Jerusalem asin Juda sa Sodoma asin Gomorra. An Jeremias kapitulo 23 nagsasaysay sato dapit kaini. An bersikulo 14 nagsasabi:

³ “Sa mga propeta nin Jerusalem nakaheling ako nin labi-labi karaot na mga bagay, na naggigibo nin pagsambay asin naglalakaw sa kaputikan; asin pinakosog ninda an mga kamot kan mga paragibo nin maraot tanganing dai sinda magbakle, an lambang saro sa saiyang karatan. Para sa sako sinda gabos nagin garo Sodoma, asin an mga nag-eerok sa saiya garo Gomorra.”

4. Paano an maraot na halimbawa sa moral kan mga paratokdo sa Jerusalem may kaagid sa Kakristianohan ngonyan?

⁴ Iyo, an mga propetang ini, o mga paratokdo, nagtao mismo nin maraoton na halimbawa sa moral asin garo baga dinagka an mga tawo na umarog. Helinga an mga kamugtakan sa Kakristianohan ngonyan! Bako daw kapareho man sana iyan kan kaaldawan ni Jeremias? Ngonyan an mga klero pinapagdadanay kaiba ninda an mga parasambay asin homoseksuwal asin tinotogotan pa ngani na mangenot sa mga seremonya sa simbahan. Makangangalas daw na an kadakol na nakalistang miembro sa iglesya mga inmoral man?

5. Taano an inmoral na kamugtakan nin Kakristianohan ta labi pa kan sa Sodoma asin Gomorra?

⁵ Ibinaing ni Jehova an mga nag-eerok sa Jerusalem sa mga tagaduman sa Sodoma asin Gomorra. Pero an inmoral na kamugtakan nin Kakristianohan labi pa karaot kisa kan sa Sodoma asin Gomorra. Iyo, iyan orog pang maninigo sa pagsagwe sa pagheling ni Jehova. An saiyang mga paratokdo binabasangbasang an Kristianong pamantayan sa moral. Asin ini dahelan nin pagraot sa moral na dian yaon an gabos na klase nin tusong pan-akit na gumibo nin maraot. An situwasyon na ini sa moral lakop na marhay kaya normal an pagheling ngonyan sa karatan.

“Naglalakaw sa Kaputikan”

6. Ano an isinabi ni Jeremias manongod sa karatan kan mga propeta nin Jerusalem?

⁶ Mangnoha ngonyan an sinasabi kan bersikulo 14 manongod sa mga propeta sa Jerusalem. Sinda ‘naglakaw sa kaputikan.’ Asin an huring kabtang kan bersikulo 15 nagsasabi: “Gikan sa mga propeta nin Jerusalem an apostasiya luminuwas sa bilog na daga.” Dangan idinudugang kan bersikulo 16: “Iyo ini an isinabi ni Jehova kan mga hukbo: ‘Dai kamo maghinanyog sa mga tataramon kan mga propeta na naghuhula sa saindo. Ginigibo ninda kamong maabhaw. An kapahayagan kan saindang puso an saindang itinataram​—bakong gikan sa ngoso ni Jehova.’”

7, 8. Taano an klero kan Kakristianohan ta arog kan falsong mga propeta nin Jerusalem, asin paano ini nakaapektar sa mga parasimba?

⁷ Arog kan falsong mga propeta nin Jerusalem, an klero nin Kakristianohan naglalakaw man sa kaputikan, nagpapalakop nin apostatang mga doktrina, mga katokdoan na mayo sa Tataramon nin Dios. Ano an pira sa falsong mga katokdoan na ini? An inmortalidad kan kalag, an Trinidad, purgatoryo, asin kalayo sa impierno para sa daing sagkod na pagpasakit sa mga tawo. Ginigirok man ninda an talinga kan saindang mga paradangog paagi sa paghuhulit kan gustong dangogon nin mga tawo. Saindang inoorootro na mayo daa nin kalamidad na napapaatubang sa Kakristianohan huling yaon saiya an katoninongan nin Dios. Pero an mga klero nagtataram kan “kapahayagan kan saindang puso.” Iyan falso. Idtong mga nagtutubod sa siring na mga kaputikan hinihilo sa espirituwal. Dinadaya sinda sa saindang ikalalaglag!

⁸ Horophoropa an sinasabi ni Jehova dapit sa falsong mga paratokdong ini sa bersikulo 21: “Dai ako nagsugo nin mga propeta, alagad ta sinda nagdaralagan. Dai ako nagtaram sa sainda, alagad ta sinda naghurula.” Siring man ngonyan, an mga klero dai isinugo nin Dios, ni sainda man na itinotokdo an saiyang mga katotoohan. An resulta? May grabeng kamangmangan sa Biblia an mga parasimba huling kinabanon na mga pilosopiya an ipinapakakan sa sainda kan saindang mga ministro.

9, 10. (a) Anong klase an mga pangatorogan kan falsong mga paratokdo nin Jerusalem? (b) Paano an klero kan Kakristianohan nagtokdo man nin “putik na mga pangatorogan”?

⁹ Dugang pa, an mga klero ngonyan nagpapalakop nin falsong mga paglaom. Mangnoha an bersikulo 25: “Nadangog ko an isinabi kan mga propetang naghuhula nin kaputikan sa sakuyang ngaran, na nagsasabing, ‘Nangatorogan ako! Nangatorogan ako!’” Anong klase nin mga pangatorogan idto? Sinasabi sato kan bersikulo 32: “‘Uya ako tumang sa mga propeta nin putik na mga pangatorogan,’ an sabi ni Jehova, ‘na nagsasaysay kaiyan asin ilinalagalag an sakong banwaan huli sa saindang mga kaputikan asin huli sa saindang kapaabhawan. Alagad ta ako dai nagsugo sa sainda o nagboot sa sainda. Kaya dai sinda nin ikakataong pakinabang sa banwaan na ini,’ an sabi ni Jehova.”

¹⁰ Anong putik na mga pangatorogan, o paglaom, an itinokdo kan klero? Tara, na an solamenteng paglaom nin tawo para sa katoninongan asin katiwasayan ngonyan iyo an Naciones Unidas. Sa nag-agi pa sanang mga taon inapod ninda an NU na “ultimong paglaom sa pagkaoroyon asin katoninongan,” “an supremong katiriponan sa katoninongan asin hustisya,” “an pangenot na sekular na paglaom para sa pankinaban na katoninongan.” Kanigoan kasalang paghona! An solamenteng paglaom para sa katawohan iyo an Kahadean nin Dios. Alagad an mga klero dai ihinuhulit asin itinotokdo an katotoohan manongod sa langitnon na gobyernong iyan, na iyo an pinakatema kan paghuhulit ni Jesus.

11. (a) Ano an maraot na epekto sa ngaran nin Dios kan falsong mga paratokdo nin Jerusalem? (b) Kabaliktaran sa grupong Jeremias, ano an ginibo kan falsong relihiyosong mga paratokdo ngonyan manongod sa ngaran nin Dios?

¹¹ An bersikulo 27 may sinasabi pa sato. “Nag-iisip sindang palingawon an sakong banwaan sa sakuyang ngaran paagi kan saindang mga pangatorogan na ipinagsasaysay ninda sa lambang saro, siring man sana kan pagkalingaw kan saindang mga ama sa sakong ngaran paagi ki Baal.” Pinangyari kan falsong mga propeta nin Jerusalem na malingawan kan banwaan an ngaran nin Dios. Bako daw na pareho man an ginibo kan falsong relihiyosong mga paratokdo ngonyan? Mas maraot pa, itinatago ninda an ngaran nin Dios, an Jehova. Saindang itinotokdo na dai kaipuhan na gamiton iyan, asin hinahale ninda iyan sa saindang mga traduksion kan Biblia. Makosog nindang tinutumang an siisay man na nagtotokdo sa mga tawo na an ngaran nin Dios Jehova. Alagad an grupong Jeremias, an natatada sa linahidan kan espiritung mga Kristiano, pati an saindang kairiba, ginibo an siring kan ginibo ni Jesus. Minilyon an saindang tinokdoan dapit kan ngaran nin Dios.​—Juan 17:6.

Pagbuyagyag kan Saindang Kasagwean

12. (a) Taano ta igwang dakulang kasalan sa dugo an falsong relihiyosong mga paratokdo? (b) Ano an nagin kabtang kan klero sa duwang guerra mundial?

¹² An grupong Jeremias paorootrong ibinubuyagyag an klero na falsong mga paratokdo na ginigiyahan an saindang aripompon pasiring sa mahiwas na dalan nin kalaglagan. Iyo, lininaw kan natatada kun taano an mga parapangatorogan na idto ta maninigo sa silot ni Jehova. Halimbawa, an mga lingkod ni Jehova parateng itinotokdo an Kapahayagan 18:​24, na nagsasabi na sa Dakulang Babilonya nakua an dugo “kan gabos na ginadan sa daga.” Isip-isipa an gabos na guerrang dahelan sa relihiyosong mga iriwal. Dakulaon nanggad an kasalan sa dugo kan falsong relihiyosong mga paratokdo! An saindang mga katokdoan nagcausa nin pagkabaranga asin pinagrabe an pagkaongis kaidtong nagkakalaenlaen an mga pagtubod asin nasyonalidad. Manongod sa Guerra Mundial I, an librong Preachers Present Arms nagsasabi: “An mga klerigo itinao sa guerra an malaad na espirituwal na kahulogan asin motibasyon kaiyan. . . . An iglesya kun siring nagin kabtang asin kalabot na marhay sa palakaw nin guerra.” Totoo man iyan sa Guerra Mundial II. An klero biyong sinuportaran an naggeguerrang mga nasyon asin binendisyonan an mga tropa kaiyan. Duwang guerra mundial an nagpoon sa Kakristianohan na dian an mga magkakarelihiyon naggaradanan. An sekular asin relihiyosong mga grupo sa laog kan Kakristianohan padagos na nagpapabolos nin dugo sagkod ngonyan na panahon. Labi-labi karaot nanggad an mga epekto kan saindang falsong mga katokdoan!

13. Paano pinatutunayan kan Jeremias 23:22 na an klero nin Kakristianohan mayo nin relasyon ki Jehova?

¹³ Tabi mangnohon an Jeremias kapitulo 23, bersikulo 22: “Kun sinda nagtindog sa sakong dayupot na grupo, kun siring ipinadangog kutana ninda sa sakong banwaan an sakong sadiring mga tataramon, asin napatalikod kutana ninda sinda sa saindang maraot na dalan asin sa karatan kan saindang mga gibo.” Kun an relihiyosong mga propeta nin Kakristianohan nagtindog sa dayupot na grupo ni Jehova, sa haraning relasyon sa saiya na arog baga sa sarong maimbod asin madonong na oripon, namuhay man kutana sinda sono sa mga pamantayan nin Dios. Sainda man kutanang ipinadangog sa mga tawo kan Kakristianohan an sadiring mga tataramon nin Dios. Imbes, an falsong mga paratokdo sa modernong aldaw ginibo an saindang mga parasunod na magin butang mga lingkod kan Kaiwal nin Dios, si Satanas na Diablo.

14. Anong mapuwersang pagbuyagyag sa klero nin Kakristianohan an ipinaluwas kan 1958?

¹⁴ Mapuwersa an pagbuyagyag kan grupong Jeremias sa klero. Halimbawa, sa 1958 Banal na Kabotan na Internasyonal na Asamblea kan mga Saksi ni Jehova sa Siudad nin Nueva York, an bise presidente kan Watch Tower Society iinatubang an sarong pahayag na nagsabi sa sarong kabtang: “Daing kalibogan o pag-alangan na ipinapahayag niamo na an pinakacausang ini kan gabos na krimen, delingkuwensia, kaongisan, iriwal, pagpalaenlaen, . . . asin buang pagkaribaraw iyo an salang relihiyon, falsong relihiyon; na an nasa likod kaiyan iyo an dai naheheling na kaiwal nin tawo, si Satanas na Diablo. An mga tawong pinakaresponsable sa kamugtakan kan kinaban iyo an relihiyosong mga paratokdo asin namomoon; asin an pinakamaninigong sagweon sa mga ini iyo an relihiyosong klero nin Kakristianohan. . . . Sa gabos na taon na ini magpoon kan Guerra Mundial I, an Kakristianohan namumugtak sa sarong relasyon sa Dios na kaagid kan sa Israel kan kaaldawan ni Jeremias. Iyo, an Kakristianohan napapaatubang sa sarong kapahamakan na mas makatatakot asin mapanlaglag kisa kan naheling ni Jeremias na nangyari sa Jerusalem.”

An Paghokom sa Falsong mga Paratokdo

15. Anong mga hula dapit sa katoninongan an ginibo kan klero? Maootob daw an mga iyan?

¹⁵ Apesar kan patanid na ini, paano guminawe an klero poon kaidto? Siring kan ibinabareta kan bersikulo 17: “Sinda paorootrong nagsasabi sa mga daing paggalang sa sako, ‘Si Jehova nagsabi: “Magkakaigwa kamo nin katoninongan.”’ Asin sa lambang saro na naglalakaw sa katagasan kan saiyang puso sinda nagsasabi, ‘Dai nin maabot na kapahamakan sa saindo.’” Totoo daw ini? Bako! Si Jehova ibubuyagyag an kaputikan kan mga hulang ini kan klero. Dai nia ootobon an sinasabi ninda sa saiyang ngaran. Minsan siring, an putik na pag-asegurar kan klero nin katoninongan sa Dios mapandayang marhay!

16. (a) Ano an kamugtakan sa moral kan kinaban na ini, asin sairisay an may paninimbagan kaiyan? (b) Ano an ginigibo kan grupong Jeremias manongod sa maraot na mga punto-de-vista sa moral kan kinaban na ini?

¹⁶ Naghohona daw kamo, ‘Ano, ako madadaya kan putik na mga katokdoan kan klero? Nungka!’ Bueno, dai pakaseguro! Girumdomon na an falsong mga katokdoan kan klero nagpalakop nin tuso, labi-labi karaot na situwasyon sa moral. An saindang mapagkonsinteng mga katokdoan ipinangangatanosan haros an gabos, gurano man kainmoral. Asin an raot na kamugtakan na ini sa moral lakop sa gabos na langtad nin aling-alingan, pelikula, TV, magasin, asin musika. Kun siring, kita kaipuhan na mag-ingat na marhay, kun habo niatong maholog sa impluwensia kaining raot pero tusong nakaaakit na kamugtakan sa moral. An mga hobenes puwedeng masiod kan nakararaot na mga video asin musika. Girumdomon na an puwede-minsan-ano na ugale kan mga tawo ngonyan direktang bunga kan falsong mga katokdoan kan klero asin kan dai ninda pakasuportar sa matanos na mga pamantayan nin Dios. Linalabanan kan grupong Jeremias an inmoral na mga punto-de-vistang ini asin tinatabangan an mga lingkod ni Jehova na isikwal an karatan na nakalalamos sa Kakristianohan.

17. (a) Oyon ki Jeremias, anong paghokom an madatong sa maraot na Jerusalem? (b) Ano an sa dai na mahahaloy mangyayari sa Kakristianohan?

¹⁷ Anong paghokom an aakoon kan falsong mga paratokdo nin Kakristianohan hale ki Jehova, an dakulang Hokom? Minasimbag an bersikulo 19, 20, 39, asin 40: “Uya! An bagyo ni Jehova, an kabangisan mismo, siertong maluwas, pati an garo buwawing unos. Sa payo kan mga maraot iyan mag-iitok. An kaanggotan ni Jehova dai mahale sagkod na saiyang magibo asin sagkod na saiyang maotob an mga ideya kan saiyang puso. . . . Itatao ko kamo sa kamugtakan na pinabayaan, na lubos, asin tatalikdan ko kamo asin an siudad na itinao ko sa saindo asin sa saindong mga magurang​—hale sa sakong atubangan. Asin bubugtakan ko kamo nin langhad sagkod sa panahon na daing katapusan asin nin kasopganan sagkod sa panahon na daing katapusan, na dai malilingawan.” Iyan gabos nangyari sa maraot na Jerusalem asin sa templo kaiyan, asin ngonyan an kaagid na kapahamakan sa dai mahahaloy mangyayari sa maraot na Kakristianohan!

Pagpahayag kan “Pasan ni Jehova”

18, 19. Anong “pasan ni Jehova” an ipinaisi ni Jeremias sa Juda, na may anong mga kahulogan?

¹⁸ Kaya, ano an paninimbagan kan grupong Jeremias asin kan saindang kairiba? Sinasabi sato kan bersikulo 33: “Kun an banwaan na ini o an propeta o an saserdote maghapot sa saimo, na nagsasabi, ‘Ano an pasan ni Jehova?’ sabihon mo man sa sainda, ‘“Kamo banwaan​—O anong pasan! Asin babayaan ko kamo,” an sabi ni Jehova.’”

¹⁹ An termino sa Hebreo para sa “pasan” igwang dobleng kahulogan. Puwedeng manongod iyan sa sarong magabat na kapahayagan nin Dios o sa sarong bagay na nagpapagabat sa saro asin nakakapagal sa saro. Digdi an ekspresyon na “pasan ni Jehova” nanonongod sa sarong magabat na hula​—an kapahayagan na an Jerusalem nakatalagang malaglag. Nagustohan daw kan banwaan an siring kagabat na makahulang mga tataramon hale ki Jehova na paorootrong itinao sainda ni Jeremias? Dai, an banwaan tinuya si Jeremias: ‘Ano an hula (pasan) mo ngonyan? Segurado mi na an hula mo saro na naman na mapagal na pasan!’ Pero ano an isinabi sainda ni Jehova? Ini: “Kamo banwaan​—O anong pasan! Asin babayaan ko kamo.” Iyo, an mga tawong ini sarong pasan ki Jehova, asin saiyang hahaleon sinda na dai na makapagabat sa saiya noarin pa man.

20. Ano an “pasan ni Jehova” ngonyan?

²⁰ Ano an “pasan ni Jehova” ngonyan? Iyan an magabat na makahulang mensahe gikan sa Tataramon nin Dios. Iyan pano nin silot, na nagpapahayag kan nagdadangadang na pagkalaglag kan Kakristianohan. Kun manongod sa banwaan ni Jehova, igwa kitang magabat na paninimbagan na ipahayag ining “pasan ni Jehova.” Mantang naghaharani an katapusan, dapat niatong sabihan an gabos na an bikong mga tawo sa Kakristianohan sarong “pasan,” iyo, “O anong pasan!” para ki Jehova Dios, asin na sa dai na mahahaloy hahaleon nia sa saiya an “pasan” na ini paagi sa pagpabaya na mapahamak an Kakristianohan.

21. (a) Taano ta linaglag an Jerusalem kan 607 B.C.E.? (b) Pakalaglaga sa Jerusalem, ano an nangyari sa falsong mga propeta asin sa tunay na propeta ni Jehova, na nagtatao sato nin anong kasegurohan ngonyan?

²¹ An paghokom ni Jehova ginibo kan kaaldawan ni Jeremias kan an mga Babilonyo laglagon an Jerusalem kan 607 B.C.E. Siring kan pagkahula, idto sarong langhad asin pagkapasopog para sa sutil, bakong maimbod na mga Israelita. (Jeremias 23:​39, 40) Ipinaheling kaiyan sa sainda na si Jehova, na paorootro nindang dai tinawan nin onra, sa katapustapusi pinabayaan sinda sa mga resulta kan saindang karatan. An mga ngoso kan saindang pangahas na falsong mga propeta nasilensio sa kahurihurihi. Alagad, an ngoso ni Jeremias padagos na naghuhula. Dai sia binayaan ni Jehova. Arog kan halimbawang ini, si Jehova dai babayaan an grupong Jeremias kun an saiyang magabat na desisyon sumagkod sa pagpara sa klero kan Kakristianohan asin sa mga nagtutubod sa saindang mga kaputikan.

22. Sa anong kamugtakan dadarahon kan mga paghokom ni Jehova an Kakristianohan?

²² Iyo, an gaba, dai ineerokan na kamugtakan kan Jerusalem pakalihis kan 607 B.C.E. iyo mismo an magigin itsura kan relihiyosong Kakristianohan pakatapos na hubaan sia kan saiyang kayamanan asin makasosopog na ibuyagyag. Ini an maninigong paghokom na ipinahayag ni Jehova tumang sa falsong mga paratokdo. An paghokom na iyan dai masusudya. Kun paanong naotob kan nakaagi an gabos na ipinasabong na nagpapatanid na mga mensahe ni Jeremias, an mga iyan magkakatotoo sa modernong aldaw na kaotoban kaiyan. Kaya kita logod magin arog ni Jeremias. Daing takot na ipahayag niato sa mga tawo an makahulang pasan ni Jehova, tanganing maaraman ninda kun taano an biyong gabat kan saiyang matanos na paghokom ta madatong sa gabos na falsong relihiyosong paratokdo!

Mga Hapot sa Pagrepaso

◻ Gurano karaot an suanoy na Jerusalem sa punto-de-vista ni Jehova?

◻ Sa anong mga paagi an Kakristianohan ‘naglakaw sa kaputikan’?

◻ Paano ibinuyagyag an kasagwean kan klero sa modernong aldaw?

◻ Anong “pasan ni Jehova” an ipinahahayag ngonyan?

[Ritrato sa pahina 8]

An mga propeta sa Jerusalem naggibo nin “labi-labi karaot na mga bagay”

[Ritrato sa pahina 9]

“An kapahayagan kan saindang puso an saindang itinataram”

[Ritrato sa pahina 10]

An Jerusalem pakatapos kan saiyang kalaglagan nag-iilustrar kan ultimong kaaabtan kan Kakristianohan