An Pakikipag-iwal ni Jehova sa mga Nasyon

“An tinagongtong siertong malinaw na maabot sagkod sa pinakaharayong parte kan daga, huli ta igwa nin pakikipag-iwal si Jehova sa mga nasyon.”​—JEREMIAS 25:31.

1, 2. (a) Ano an nangyari sa Juda pagkagadan ni Hadeng Josias? (b) Siisay an ultimong hade sa Juda, asin paano sia nagsakit huli sa dai nia pagigin maimbod?

AN DAGA nin Juda napaatubang sa delikadong mga panahon na masakit pakibagayan. An sarong marahay na hade, si Josias, paramientras na ikinapadigson an naglalaad na kaanggotan ni Jehova. Pero ano an suminunod kan gadanon si Josias kan 629 B.C.E.? An mga hadeng suminalihid sa saiya dai iginalang si Jehova.

² An ultimong hade nin Juda, si Zedequias, an ikaapat na aki ni Josias, nagpadagos, siring sa sinasabi kan 2 Hade 24:​19, “sa paggibo kan maraot sa mga mata ni Jehova, sono sa gabos na ginibo ni Joaquim [na saiyang matuang tugang].” An resulta? Si Nabucodonosor nagdatong tumang sa Jerusalem, binihag si Zedequias, ginadan an saiyang mga aking lalaki sa atubangan nia, binuta sia, asin dinara sia sa Babilonya. Dugang pa, sinamsam kan mga Babilonyo an mga lalagan na ginamit sa pagsamba ki Jehova, na sinolo an templo asin an siudad. An mga nakaligtas nagin desterrado sa Babilonya.

3. Anong peryodo an nagpoon sa pagkalaglag nin Jerusalem kan 607 B.C.E., asin ano an nakatalaan na mangyari sa katapusan kan peryodong iyan?

³ An taon na idto, 607 B.C.E., nagtanda bako sana sa ultimong paggaba sa Jerusalem kundi sa kapinonan man kan “itinalaan na mga panahon kan mga nasyon,” na sinambit sa Lucas 21:24. An peryodong ini nin 2,520 taon nagtapos sa satong siglo, kan taon 1914. Kan panahon na iyan nagdatong na an panahon na si Jehova, paagi sa saiyang natutukaw sa tronong Aki, si Jesu-Cristo, na orog na dakula ki Nabucodonosor, magpahayag asin magsagibo nin paghokom sa maraot na kinaban. An paghokom na ini nagpoon sa modernong katimbang kan Juda, sarong katimbang na naghihingakong nagrerepresentar sa Dios asin ki Cristo digdi sa daga.

4. Anong mga hapot an pinalataw ngonyan manongod sa hula ni Jeremias?

⁴ May naheheling daw kitang pagkakaagid sa kariribokan durante kan ultimong mga taon nin Juda sa irarom kan mga hade kaini​—na may kapahapahamak na mga pangyayaring nakaaapektar man sa kataraed na nasyon—​asin sa kariribokan sa Kakristianohan ngonyan? Tunay na may naheheling kita! Ano, kun siring, an ipinaririsa kan hula ni Jeremias manongod sa kun paano aatubangon ni Jehova an mga bagay-bagay ngonyan? Helingon niato.

5, 6. (a) Magpoon kan 1914, paano an situwasyon sa Kakristianohan nakaagid kan sa Juda bago kan pagkalaglag kaiyan? (b) Anong mensahe an dinara kan modernong Jeremias sa Kakristianohan?

⁵ An Britanong matematiko asin pilosopong si Bertrand Russell nagkomento kaidtong mga 40 taon na an nakaagi: “Magpoon kan 1914, an gabos na nakaaaram sa mga kamugtakan sa kinaban napurisaw na gayo kan garo baga kapaladan na asin dati nang dineterminaran na pagmartsa pasiring sa mas dakulang kapahamakan.” Asin an Aleman na estadistang si Konrad Adenauer nagsabi: “An katiwasayan asin katrangkilohan nawara na sa buhay nin mga tawo magpoon kan 1914.”

⁶ Ngonyan, siring kan kaaldawan ni Jeremias, an pagdangadang sa katapusan nin sarong palakaw nin mga bagay tinandaan kan pagpabolos nin kadakol na dugo nin mga daing sala, orog na sa duwang guerra mundial sa siglong ini. Sa kadaklan, an mga guerrang ini pinaglabanan kan mga nasyon nin Kakristianohan, na naghihingakong nagsasamba sa Dios kan Biblia. Pagsaginsagin nanggad! Bakong makangangalas na isinugo sa sainda ni Jehova an saiyang mga Saksi, na nagsasabi, paagi kan mga tataramon sa Jeremias 25:​5, 6: “Tumalikod tabi an lambang saro sa saiyang maraot na dalan asin sa karatan kan saindong mga gibo . . . Asin dai kamo sumunod sa ibang mga dios tanganing maglingkod sa sainda asin dumoko sa sainda, tanganing dai nindo ako mapaanggot paagi sa gibo kan saindong mga kamot, asin tanganing dai ako magpangyari nin kapahamakan sa saindo.”

7. Ano an ebidensia na inignoro kan Kakristianohan an mga patanid ni Jehova?

⁷ Alagad, an mga nasyon nin Kakristianohan dai tuminalikod. Naheling ini sa orog pa nindang paggibo nin mga atang sa dios nin guerra sa Korea asin Vietnam. Asin padagos nindang pinangangapitalan an mga negosyante nin kagadanan, an mga paragibo nin mga armas. An kadagaan nin Kakristianohan nagtao kan kadaklan sa haros sarong trilyon na dolyar na ginasto sa mga armas taon-taon durante kan mga taon nin 1980. Poon 1951 sagkod 1991, an gasto sa militar kan Estados Unidos sana luminabi sa netong mga ganansia kan gabos na pinagsararong korporasyon sa Amerika. Magpoon kan makosog na iprinoklamar na katapusan kan Malipot na Guerra, an mga pagbawas ginibo sa luma nang mga armas nuklear, pero an darakulang arsenal kan ibang nakagagadan na mga armas nagdadanay asin padagos na pinaooswag. Pag-abot nin panahon an mga ini puwedeng gamiton.

Paghokom Tumang sa Mapagkonsinteng Rona kan Kakristianohan

8. Paano an mga tataramon sa Jeremias 25:​8, 9 maootob sa Kakristianohan?

⁸ An dugang pang mga tataramon ni Jehova, na yaon sa Jeremias 25:​8, 9, espisipikong minaaplikar ngonyan sa Kakristianohan, na dai nahimong makapamuhay kaoyon kan Kristianong mga pamantayan sa katanosan: “Kaya ini an isinabi ni Jehova kan mga hukbo, ‘Sa dahelan na dai nindo kinuyog an sakong mga tataramon, uya masugo ako asin kukuanon ko an gabos na pamilya sa amihanan,’ an sabi ni Jehova, ‘masugo ako ki Nabucodonosor na hade nin Babilonya, na sakong lingkod, asin dadarahon ko sinda tumang sa dagang ini asin tumang sa mga nag-eerok dian patin tumang sa gabos na ining nasyon sa palibot; asin itatao ko sinda sa kalaglagan asin gigibohon sindang magin bagay na pinagngangalasan asin sarong bagay na pinagtataghoyan patin mga lugar na gaba sagkod sa panahon na daing katapusan.’” Sa siring, an dakulang kahorasaan mapoon sa naghihingakong banwaan nin Dios, an Kakristianohan, na sa katapustapusi malakop sa bilog na daga, sa ‘gabos na nasyon sa palibot.’

9. Sa anong mga paagi orog na ruminaot an espirituwal na kamugtakan kan Kakristianohan sa satong panahon?

⁹ May panahon kaidto sa Kakristianohan na an Biblia iginalang, na an pag-agom asin buhay pampamilya pinagheling kan haros gabos bilang gikanan nin kaogmahan, na an mga tawo nagbangon nin amay asin nakontento sa saindang trabaho sa aroaldaw. An dakol rinepreskohan an saindang sadiri paagi sa pagbasa asin pag-adal kan Tataramon nin Dios paagi sa liwanag nin ilawan kun banggi. Pero ngonyan, an seksuwal na pakikidorog minsan kiisay, diborsio, pag-abuso sa droga asin pagbuburat, delingkuwensia, kahanaban, kahugakan sa trabaho, pagkaadikto sa TV, asin iba pang bisyo nakaraot sa buhay sagkod sa makatatakot na sokol. Introduksion ini sa panlaglag na gigibohon ni Jehova Dios sa mapagkonsinteng rona kan Kakristianohan.

10. Iladawan an kamugtakan kan Kakristianohan pakatapos na gibohon an mga paghokom ni Jehova.

¹⁰ Si Jehova nagpapahayag, arog kan satong mababasa sa Jeremias kapitulo 25, bersikulo 10 asin 11: “Hahaleon ko sa sainda an tanog nin kaogmahan asin an tanog nin kagayagayahan, an tingog kan nobyo asin an tingog kan nobya, an tanog kan gilingan asin an liwanag kan ilawan. Asin an bilog na dagang ini magigin gaba, bagay na pinagngangalasan.” Tunay nanggad na magigin makangangalas kun an makokosog na templo asin maluhong mga palasyo kan Kakristianohan magkagaraba. Magigin gurano kahiwas an paglaglag na ini? Kan panahon ni Jeremias, an pagkalaglag kan Juda asin kataed na mga nasyon naglawig sagkod sa 70 taon, na sinasabi kan Salmo 90:10 na normal na lawig nin panahon. An paghokom ni Jehova ngonyan magigin biyo, sagkod lamang.

Paghokom Tumang sa Dakulang Babilonya

11. Siisay an gagamiton sa paglaglag sa Kakristianohan? Taano?

¹¹ Siring kan ihinula sa Kapahayagan 17:​12-17, an panahon maabot na poponan ni Jehova an saiyang pambihirang akto paagi sa pagbugtak sa puso kan “sampulong sungay”​—an militarisadong mga miembro kan Naciones Unidas—​“na otobon an saiyang kaisipan” na laglagon an pankinaban na imperyo nin falsong relihiyon. Paano ini mangyayari? Kadakol kan paagi na an “sampulong sungay” sa Kapahayagan kapitulo 17 puwedeng, sono sa mga tataramon sa bersikulo 16, ‘maongis sa patotot asin lubos siang soloon sa kalayo.’ Totoo na nagdakol an mga armas nuklear asin padagos pang nagdadakol sa dakol na lugar sa daga na may huma nin guerra. Pero dapat kitang maghalat asin helingon kun paano ibubugtak ni Jehova sa puso kan politikal na mga poon na isagibo an saiyang pamalos.

12. (a) Ano an nangyari sa Babilonya pakalaglaga kaini sa Jerusalem? (b) Ano an mangyayari sa mga nasyon pagkalaglag kan Kakristianohan?

¹² Kan suanoy na mga panahon an Babilonya naman an nakamate kan naglalaad na kaanggotan ni Jehova. Kaya, magpoon sa Jeremias kapitulo 25, bersikulo 12, an hula hineling an mga bagay sa sarong huri, binagong punto-de-vista. Bako nang bilang Parakastigo ni Jehova, si Nabucodonosor asin an Babilonya kaiba na ngonyan sa gabos na kinabanon na nasyon. Kaagid ini kan situwasyon ngonyan. An “sampulong sungay” kan Kapahayagan kapitulo 17 gagabaon an falsong relihiyon, pero sa huri sinda mismo maagi nin kalaglagan kaiba kan gabos na iba pang “mga hade sa daga,” na ilinadawan sa Kapahayagan kapitulo 19. An Jeremias 25:​13, 14 ilinaladawan kun paano an Babilonya, kaiba kan “gabos na nasyon” na nanraot sa banwaan ni Jehova, hohokoman. Ginamit ni Jehova si Nabucodonosor bilang parakastigo sa pagpadusa sa Juda. Alagad sia asin an huring mga hade nin Babilonya parareho nagpalangkaw kan saindang sadiri tumang ki Jehova mismo, arog kan ipinaheling, halimbawa, kan paglapastangan sa mga lalagan sa templo ni Jehova. (Daniel 5:​22, 23) Asin kan laglagon kan mga Babilonyo an Jerusalem, an kataraed na nasyon nin Juda​—an Moab, Amon, Tiro, Edom, asin iba pa—​naogma asin pinag-olog-olog an banwaan nin Dios. Sinda dapat man na mag-ani kan maninigong balos hale ki Jehova.

Paghokom Tumang sa “Gabos na Nasyon”

13. Ano an kahulogan kan “kopang ini kan arak nin kabangisan,” asin ano an nangyayari sa mga minainom sa kopa?

¹³ Kaya, si Jeremias nagpapahayag, arog kan nakasurat sa kapitulo 25, bersikulo 15 asin 16: “Ini an isinabi sa sako ni Jehova na Dios nin Israel: ‘Kuana sa sakong kamot an kopang ini kan arak nin kabangisan, asin painomon mo dian an gabos na nasyon na sosobolan ko sa saimo. Asin sinda mairinom asin pagtatarakigan patin mahiro siring sa mga rungaw na tawo huli sa minasbad na ipadadara ko sa tahaw ninda.’” Taano ini ta ‘kopa kan arak nin kabangisan ni Jehova’? Sa Mateo 26:​39, 42 asin Juan 18:​11, nagtaram si Jesus dapit sa sarong “kopa” na nagsisimbolo sa kabotan nin Dios para sa saiya. Kaagid kaiyan, an kopa ginagamit na simbolo kan kabotan ni Jehova na an mga nasyon uminom kan saiyang banal na pamalos. Ilinilista kan Jeremias 25:​17-26 an mga nasyon na ini na ipinapanganino an mga nasyon ngonyan.

14. Sono sa hula ni Jeremias, siisay an mainom sa kopa kan arak nin kabangisan ni Jehova, asin ano an isinisimbolo kaini sa satong aldaw?

¹⁴ Pakatapos na an Kakristianohan, siring kan Juda, gibohon na “gabang lugar, bagay na pinagngangalasan, sarong bagay na pinagtataghoyan patin panumpa,” an kalaglagan natatagama sa natatada pa kan pankinaban na imperyo nin falsong relihiyon. Sunod, an bilog na kinaban, na isinisimbolo kan Egipto, kaipuhan na uminom sa kopa kan arak nin kabangisan ni Jehova! Iyo, an “gabos na hade kan amihanan na harani asin harayo, sunod-sunod, asin an gabos na iba pang kahadean kan daga na nasa ibabaw kan daga” dapat na uminom. Sa katapustapusi, “an hade nin Sesac mismo mainom pakatapos ninda.” Asin siisay ining “hade nin Sesac”? An Sesac sarong simbolikong ngaran, sarong representasyon, o senyal, para sa Babilonya. Kun paanong si Satanas an dai naheheling na hade sa Babilonya, sia man an “poon kan kinaban” sagkod ngonyan, siring sa ipinarisa ni Jesus. (Juan 14:30) Sa siring, an Jeremias 25:​17-26 kaagid kan Kapahayagan kapitulo 18 sagkod 20 sa pagpaliwanag kan pagkasurunodsunod kan mga pangyayari mantang ilinilibot an kopa nin kabangisan ni Jehova. Enot, an pankinaban na imperyo nin falsong relihiyon kaipuhan na laglagon, sunod an politikal na mga kapangyarihan, dangan si Satanas mismo ihoholog sa bungaw.​—Kapahayagan 18:8; 19:​19-21; 20:​1-3.

15. Ano an mangyayari kun madangog na an kurahaw nin “katoninongan asin katiwasayan”?

¹⁵ Kadakol kan pag-orolay dapit sa katoninongan asin katiwasayan magpoon kan an Malipot na Guerra natapos na daa, na saro na sana an natatadang pinakamakapangyarihan. Siring kan sinabi sa Kapahayagan 17:​10, an pinakamakapangyarihan na iyan, an ikapitong payo kan mabangis na hayop, kaipuhan na ‘magdanay nin halipot na panahon.’ Pero an “halipot na panahon” na iyan nagdadangadang na sa katapusan kaiyan. Dai mahaloy, an gabos na kurahaw nin politikal na “katoninongan asin katiwasayan” matao nin lugar sa “biglang pagkalaglag [na] madaling maabot sainda.” Iyan an sabi ni apostol Pablo.​—1 Tesalonica 5:​2, 3.

16, 17. (a) Kun an siisay man magprobar na dumulag sa paghokom ni Jehova, ano an ibubunga? (b) Sa anong mapanlaglag na paagi maootob sa dai na mahahaloy an kabotan ni Jehova digdi sa daga?

¹⁶ An bilog na palakaw sa kinaban ni Satanas, poon sa Kakristianohan, kaipuhan na uminom sa kopa nin pamalos ni Jehova. An dugang pa niang pagboot ki Jeremias, na nasusurat sa kapitulo 25, bersikulo 27 sagkod 29, pinatutunayan ini: “Sabihan mo sinda, ‘Ini an isinabi ni Jehova kan mga hukbo, an Dios nin Israel: “Inom kamo asin maburat patin magdigwak saka mapukan tanganing dai kamo makatindog huli kan minasbad na ipadadara ko sa tahaw nindo.”’ Asin mangyayari na kun habo nindang kuanon an kopa sa saimong kamot tanganing uminom, sabihan mo man sinda, ‘Ini an isinabi ni Jehova kan mga hukbo: “Mairinom nanggad kamo. Huli ta, uya! sa siudad na dian inaarang an sakong ngaran na minapoon akong magdara nin kapahamakan, asin kamo daw mismo sa ano man na paagi palilibrehon sa padusa?”’ ‘Dai kamo palilibrehon sa padusa, huli ta igwa akong minasbad na aapodon tumang sa gabos na nag-eerok sa daga,’ an sabi ni Jehova kan mga hukbo.”

¹⁷ Makosog na mga tataramon idto​—tunay nanggad, makangingirhat na mga tataramon, huling itinaram iyan kan Soberanong Kagurangnan kan bilog na uniberso, si Jehova Dios. Sa laog nin rinibong taon, mapasensia niang tinagalan an mga langhad, pagtuya, asin pagkaongis na itinambak sa saiyang banal na ngaran. Minsan siring, sa katapustapusi nagdatong na an panahon na saiyang sisimbagon an pamibi na itinokdo kan saiyang namomotan na Aki, si Jesu-Cristo, sa saiyang mga disipulo mientras na uya pa digdi sa daga: “Kaya mamibi kamo nin arog kaini: ‘Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.’” (Mateo 6:​9, 10) Kabotan ni Jehova na si Jesus humiro bilang Saiyang minasbad sa pagsagibo kan pamalos.

18, 19. (a) Siisay an nangangabayo sa pandaog sa ngaran ni Jehova, asin ano an saiyang hinahalat bago tapuson an saiyang pandaog? (b) Kun butasan na kan mga anghel an maunos na doros kan kabangisan ni Jehova, anong makatatakot na mga pangyayari an mangyayari digdi sa daga?

¹⁸ Sa Kapahayagan kapitulo 6, enot niatong mababasa an dapit sa pagsakay ni Jesus sa sarong maputing kabayo “sa pandaog asin sa pagtapos kan saiyang pandadaog.” (Bersikulo 2) Nagpoon ini kan pagtukaw nia sa trono bilang langitnon na Hade kan 1914. An iba pang kabayo asin nangangabayo kasunod nia, na nagpapaheling kan lakop na ralaban, gutom, asin peste na nandamat poon kaidto sa satong daga. Alagad noarin matatapos an gabos na kariribokan na ini? Pinapaaram kita kan Kapahayagan kapitulo 7 na may apat na anghel na nagpopogol sa “apat na doros kan daga” sagkod na an espirituwal na Israel asin sarong dakulang kadaklan hale sa gabos na nasyon magkatiripon na para sa kaligtasan. (Bersikulo 1) Dangan ano na?

¹⁹ An Jeremias kapitulo 25, sa bersikulo 30 asin 31, nagpapadagos: “‘Si Jehova mag-uungal hale sa kaitaasan, asin hale sa saiyang banal na erokan sia mapaluwas kan saiyang tingog. Sia mag-uungal duman sa saiyang ontokan. An kurahaw na siring sa kurahaw kan mga paraligis nin ubas saiyang ikukurahaw tumang sa gabos na nag-eerok sa daga. An tinagongtong siertong malinaw na maabot sagkod sa pinakaharayong parte kan daga, huli ta igwa nin pakikipag-iwal si Jehova sa mga nasyon. Kaipuhan na ibugtak nia an saiyang sadiri sa paghokom sa gabos na laman. Kun manongod sa mga maraot, kaipuhan na itao nia sinda sa minasbad,’ an sabi ni Jehova.” Mayo nin nasyon na makakalibre sa siring na pag-inom kan kopa nin kabangisan ni Jehova. Kun siring, apurado nanggad na an gabos na matanos an pusong mga tawo sumiblag sa karatan kan mga nasyon bago butasan kan apat na anghel an maunos na doros kan kabangisan ni Jehova. Maunos nanggad, huli ta nagpapadagos an hula ni Jeremias sa bersikulo 32 asin 33:

20. Anong pangyayari an nagdodoon kan pagigin estrikto kan paghokom ni Jehova, pero taano ta kaipuhan an paghirong ini?

²⁰ “Ini an isinabi ni Jehova kan mga hukbo, ‘Uya! May maluwas na kapahamakan sa surunodsunod na nasyon, asin malataw an sarong dakulang bagyo hale sa kaporoporohi kan daga. Asin an pangagaradanon ni Jehova sa aldaw na iyan paghale sa sarong poro kan daga sagkod sa ibong na poro kan daga. Dai sinda tatangisan, ni sasarayon o ilolobong. Magigin sindang garo odo sa ibabaw kan daga.’” Tunay nanggad na sarong nakapangigirabong pangyayari, pero an paghirong ini kaipuhan tanganing linigan an daga kan gabos na karatan bago darahon an Paraiso na panuga nin Dios.

An mga Pastor Mag-uurungal Asin Magtatarangis

21, 22. (a) Sa Jeremias 25:​34-36, sairisay an “mga pastor” sa Israel, asin taano ta napiritan sindang mag-urungal? (b) Arin na modernong mga pastor an maninigo sa kaanggotan ni Jehova, asin taano ta biyong maninigo?

²¹ An bersikulo 34 sagkod 36 may itinataram pa dapit sa paghokom ni Jehova, na nagsasabi: “Pag-urungal kamo, mga pastor, asin pagtarangis kamo! Asin pagturubog kamo, mga pinakamahal sa kahayopan, huli ta natapos na an saindong mga aldaw para sa pagbono asin sa saindong pagkawararak, asin dapat kamong mapukan na siring sa magayon na lalagan! Asin an lugar na madudulagan napara sa mga pastor, asin an sarong paagi sa pagdulag sa mga pinakamahal sa kahayopan. Paghinanyog kamo! An tinangis kan mga pastor, asin an inungal kan mga pinakamahal sa kahayopan, huli ta pinoho ni Jehova an saindang mga pasabsaban.”

²² Sairisay an mga pastor na ini? Bako sinda an relihiyosong mga namomoon, na nakainom na kan kaanggotan ni Jehova. Sinda an militaristikong mga pastor, na ilinadawan man sa Jeremias 6:​3, na tiniripon an saindang mga hukbo sa darakulang grupo sa pakisuway ki Jehova. Sinda an politikal na mga poon, na yuminaman dawa sa ikararaot kan mga sinasakopan. Kadaklan kaini tusong mga negosyante asin politiko, mga eksperto sa karatan. Maluway sinda sa pagresolber sa gutom na guminadan sa bilog na mga banwaan sa daing sukat na mga nasyon. Saindang pinayayaman an “pinakamahal sa mga kahayopan,” siring baga kan makapangyarihan na mga negosyante nin mga armas asin mahanab na mga pararaot kan palibot, mantang nagsasayumang tumao kan medikal na tabang asin masustansiang kakanon na sa hababaon na kantidad ikaliligtas an manampulong milyon na magagadanon nang kaakian.

23. Iladawan an kamugtakan kan nasasakopan ni Satanas pakatapos kan mga panlaglag ni Jehova.

²³ Bakong makangangalas na an Jeremias kapitulo 25 natatapos, sa bersikulo 37 asin 38, sa pagsabi manongod sa mga ini na paslong naghahanap nin katoninongan para sa sainda sana: “An matoninong na mga erokan ginibong daing buhay huli kan naglalaad na kaanggotan ni Jehova. Binayaan nia an saiyang tagoan na siring sa ogbon na leon, huli ta an saindang daga nagin bagay na pinagngangalasan huli kan nagpapasakit na minasbad asin huli kan saiyang naglalaad na kaanggotan.” Makangangalas nanggad! Alagad, an naglalaad na kaanggotan ni Jehova siertong ipahahayag paagi kan Saro na ilinadawan sa Kapahayagan 19:​15, 16 na “Hade nin mga hade asin Kagurangnan nin mga kagurangnan,” na nagpapastor sa mga nasyon paagi sa sogkod na batbat. Asin ano an masunod?

24. Anong mga bendisyon an dadarahon sa matanos na katawohan kan paglaglag sa falsong relihiyon asin sa iba pang kabtang kan kinaban ni Satanas?

²⁴ Nakaeksperyensia na daw kamo nin sarong bagyo? Puwedeng makatatakot na eksperyensia iyan. Pero pagkaaga, minsan ngani naheheling nindo an mga naraot sa palibot, an aire parate na maaliwalas asin an pagkakalmado nakagiginhawang marhay kaya makapasasalamat kamo ki Jehova huli kan pambihira kagayon na aldaw. Kaagid kaiyan, mantang nagkakalma an maunos na doros kan dakulang kahorasaan, puwede kamong mangalagkalag sa daga na may pagpasalamat na kamo buhay asin andam na makikabtang sa dugang pang gibohon ni Jehova na paggibo sa lininigan na daga na magin sarong mamuraway na paraiso. An pakikipag-iwal ni Jehova sa mga nasyon mamuraway na natapos, na pinapakangbanal an saiyang ngaran asin nagtatao nin lugar na maotob an saiyang kabotan digdi sa daga sa irarom kan Milenyal na Paghade kan Mesiyanikong Kahadean. Dumatong na logod tolos an Kahadean na iyan!

Pagrerepaso sa parapo 5-24 kan artikulong ini

◻ Anong mapagsaginsagin na mga gibo kan Kakristianohan an nagdatong na ngonyan sa paghokom?

◻ Anong pinahiwas na pagmansay manongod sa paghokom an ipinaliliwanag sa Jeremias 25:​12-38?

◻ Anong kopa nin pamalos an ilinilibot sa gabos na nasyon?

◻ Sairisay an mga pastor na nag-uurungal asin nagtatarangis, asin taano ta nariribok sinda?

[Ritrato sa pahina 18]

Si Jehova an nagpili kan instrumento sa paglaglag sa Kakristianohan

[Ritrato sa pahina 23]

Pakatapos kan maunos na doros kan dakulang kahorasaan, maheheling an sarong lininigan na daga