Kahadean nin Dios—An Bagong Pamamahala sa Daga

“An kahadean . . . an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.”—DANIEL 2:44.

 1. Ano an masasarigan ta sa Biblia?

AN Biblia an kapahayagan nin Dios sa mga tawo. Si apostol Pablo nagsurat: “Kan akoon nindo an tataramon nin Dios, na nadangog nindo sa samo, iyan inako nindo, bakong siring sa mga tataramon nin tawo, kundi, siring sa iyo man nanggad, siring sa tataramon nin Dios.” (1 Tesalonica 2:13) Nasa Biblia an kaipuhan tang maaraman manongod sa Dios: impormasyon manongod sa saiyang personalidad, sa saiyang mga katuyohan, asin sa saiyang mga kahagadan sa sato. Yaon dian an pinakamarahay na hatol dapit sa buhay pampamilya asin aroaldaw na paggawe. Idinedetalye kaiyan an mga hula na naotob kan nakaagi, naootob ngonyan, asin maootob sa ngapit. Iyo, “an gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa lambang marahay na gibo.”—2 Timoteo 3:16, 17.

 2. Paano idinoon ni Jesus an tema kan Biblia?

² An pinakamahalaga sa Biblia iyo an tema kaiyan: an pagbindikar sa soberaniya nin Dios (an saiyang diretso na mamahala) paagi sa saiyang langitnon na Kahadean. Ginibo iyan ni Jesus na pinakasentro kan saiyang ministeryo. “Si Jesus nagpoon na maghulit asin magsabi: ‘Magsorolsol kamo, banwaan, huli ta an kahadean kan kalangitan harani na.’” (Mateo 4:17) Ipinaheling nia kun ano an maninigo na magin lugar kaiyan sa satong buhay, na nagsasadol: “Kun siring, padagos na hanapon nguna an kahadean asin an saiyang katanosan.” (Mateo 6:33) Ipinaheling man nia kun gurano iyan kahalaga paagi sa pagtokdo sa saiyang mga parasunod na mamibi sa Dios: “Dumatong logod an kahadean mo. Gibohon logod an boot mo, kun paano sa langit, siring man sa daga.”—Mateo 6:10.

An Bagong Pamamahala sa Daga

 3. Taano an Kahadean nin Dios ta direktang mahalaga para sa sato?

³ Taano an Kahadean nin Dios ta siring kadakula an halaga para sa mga tawo? Huli ta iyan madali nang humiro na maliwat sagkod lamang sa pamamahala sa dagang ini. An hula sa Daniel 2:44 nagsasabi: “Sa mga aldaw kan mga hadeng idto [na namamahala ngonyan sa daga] an Dios nin kalangitan mapatindog nin sarong kahadean [sarong gobyerno sa langit] na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean [mga gobyerno sa daga], asin iyan mismo magdadanay sagkod sa mga panahon na daing talaan.” Kun an langitnon na Kahadean nin Dios biyo nang mamahala, nungka na giraray na kokontrolon nin mga tawo an daga. An nakababanga asin dai nakapaninigong pamamahala nin tawo sagkod lamang nang magigin bagay kan nakaagi.

4, 5. (a) Taano ta si Jesus an pinakakualipikadong magin Hade sa Kahadean? (b) Ano an magigin asignasyon ni Jesus sa harani nang ngapit?

⁴ An Poon na Namamahala sa langitnon na Kahadean, sa irarom kan direktang pagdirehir ni Jehova, iyo an pinakakualipikado—si Cristo Jesus. Bago nagdigdi sa daga, sia nag-eksister na sa langit bilang “pangenot na trabahador” nin Dios, na iyo an enot sa gabos na linalang nin Dios. (Talinhaga 8:22-31) “Sia an ladawan kan Dios na dai naheheling, an panganay sa gabos na linalang; huli ta paagi sa saiya an gabos na iba pang bagay linalang sa kalangitan asin sa daga.” (Colosas 1:15, 16) Asin kan si Jesus sugoon nin Dios sa daga, ginibo nia an kabotan nin Dios sa gabos na panahon. Tinios nia an pinakamasakit na pagbalo asin nagadan na fiel sa saiyang Ama.—Juan 4:34; 15:10.

⁵ Huli sa saiyang kaimbodan sa Dios dawa sagkod sa kagadanan, si Jesus binalosan. Binuhay sia liwat nin Dios sa langit asin itinao sa saiya an diretso na magin Hade sa langitnon na Kahadean. (Gibo 2:32-36) Bilang Hade sa Kahadean, si Cristo Jesus magkakaigwa kan nakapupukaw nin may pagkangirhat na paggalang na asignasyon hale sa Dios tanganing pangenotan an manampulong ribong makapangyarihan na espiritung linalang sa paghale sa pamamahala nin tawo digdi sa daga asin paghale kan gabos na karatan sa satong globo. (Talinhaga 2:21, 22; 2 Tesalonica 1:6-9; Kapahayagan 19:11-21; 20:1-3) Dangan an langitnon na Kahadean nin Dios na sakop ni Cristo iyo an magigin bagong namamahalang autoridad, an solamenteng gobyerno sa bilog na daga.—Kapahayagan 11:15.

 6. Anong klaseng pamamahala an maaasahan ta sa Hade kan Kahadean?

⁶ An Tataramon nin Dios nagsasabi dapit sa bagong Namamahala sa daga: “Sa saiya itinao an pamamahala asin kamahalan patin kahadean, tanganing an mga banwaan, mga grupo nasyonal asin mga lenguahe gabos maglingkod sa saiya.” (Daniel 7:14) Huling aarogon ni Jesus an pagkamoot nin Dios, dakula an magigin katoninongan asin kaogmahan sa pamamahala nia. (Mateo 5:5; Juan 3:16; 1 Juan 4:7-10) “Sa pag-oswag kan saiyang gobyerno asin nin katoninongan dai magkakaigwa nin kasagkodan, . . . tanganing suportaran iyan paagi sa hustisya asin paagi sa katanosan.” (Isaias 9:7, Revised Standard Version) Kanigoan na bendisyon an magkaigwa nin Namamahala na namamahalang may pagkamoot, hustisya, asin katanosan! Sa siring, an 2 Pedro 3:13 naghuhula: “Igwa nin bagong kalangitan [an langitnon na Kahadean nin Dios] asin sarong bagong daga [sarong bagong sosyedad sa daga] na satong hinahalat oyon sa saiyang panuga, asin sa mga ini magdadanay an katanosan.”

 7. Paano naootob ngonyan an Mateo 24:14?

⁷ Sierto nanggad na an Kahadean nin Dios an pinakamarahay na bareta para sa gabos na namomoot sa tama. Iyan an dahelan kaya, bilang kabtang kan tanda na kita nabubuhay na ngonyan sa “huring mga aldaw” kan maraot na sistemang ini, naghula si Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (2 Timoteo 3:1-5; Mateo 24:14) Naootob na ngonyan an hulang iyan, ta an mga anom na milyon na Saksi ni Jehova sa 234 kadagaan nagdudusay nin labi sa sarong bilyon na oras kada taon sa pagsabi sa iba kan manongod sa Kahadean nin Dios. Tamang-tama, an kada saro kan saindang mga pinagtitiriponan para sa mga 90,000 na kongregasyon sa bilog na kinaban inaapod na Kingdom Hall. Iyan an dinudumanan kan mga tawo tanganing makanood manongod sa madatong na bagong gobyerno.

Asosyadong mga Namamahala

8, 9. (a) Saen magikan an kairibang namamahala ni Cristo? (b) Ano an masasarigan ta sa pamamahala kan Hade asin kan saiyang kairibang namamahala?

⁸ Magkakaigwa nin asosyadong mga namamahala kaiba ni Cristo Jesus sa langitnon na Kahadean nin Dios. Ihinula kan Kapahayagan 14:1-4 na 144,000 katawo an ‘babakalon hale sa katawohan’ asin bubuhayon liwat sa langitnon na buhay. Kabale digdi an mga lalaki asin babae na, imbes na paglingkodan, mapakumbabang naglingkod sa Dios asin mga kapwa tawo. “Sinda magigin mga saserdote nin Dios asin kan Cristo, patin mamamahala bilang mga hade sa kaibanan nia sa laog kan sangribong taon.” (Kapahayagan 20:6) An saindang kabilangan mas sadit nanggad kisa “dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon” na makaliligtas sa katapusan kan sistemang ini. An mga ini nagtatao man sa Dios nin “sagradong paglilingkod aldaw asin banggi,” alagad mayo sinda nin langitnon na pag-apod. (Kapahayagan 7:9, 15) Sinda an sentro kan bagong daga bilang mga sakop kan langitnon na Kahadean nin Dios.—Salmo 37:29; Juan 10:16.

⁹ Sa pagpili sa mga mamamahala kaiba ni Cristo sa langit, si Jehova nagpili nin fiel na mga tawo na nakaeksperyensia nin buhay kaiba an gabos na problema kaiyan. Haros mayo nin inagihan an mga tawo na dai man naeksperyensiahan kan mga hade-saserdoteng ini. Kaya an saindang buhay sa daga makadadagdag sa saindang kakayahan na mamahala sa mga tawo. Maski si Jesus mismo “nakanood nin pagkuyog hale sa mga bagay na saiyang tinios.” (Hebreo 5:8) Si apostol Pablo nagsabi dapit sa saiya: “An satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog sa sato, alagad dai nin kasalan.” (Hebreo 4:15) Kanigoan kanakararangang maaraman na sa matanos na bagong kinaban nin Dios, an mga tawo pamamahalaan nin mamomoton, madinamayon na mga hade asin saserdote!

Kaiba daw sa Katuyohan nin Dios an Kahadean?

10. Taano an Kahadean nin langit ta bakong kabtang kan orihinal na katuyohan nin Dios?

¹⁰ Kabtang daw kan orihinal na katuyohan nin Dios an langitnon na Kahadean kan lalangon nia si Adan asin Eva? Sa rekord nin paglalang sa Genesis, mayong nasambitan na sarong Kahadean na mamamahala sa katawohan. Si Jehova mismo an Namamahala sa sainda, asin sagkod na kinukuyog ninda sia, dai kinaipuhan an arin man na ibang pamamahala. An Genesis kapitulo 1 nagpapaheling na si Jehova, posibleng marhay na paagi sa saiyang panganay na langitnon na Aki, nakipag-olay ki Adan asin Eva. An pagkasaysay naggagamit kan pananaram na arog kan “sinabihan sinda nin Dios” asin “an Dios padagos na nagsabi” sa sainda.—Genesis 1:28, 29; Juan 1:1.

11. Ano an nagin sangkap na kapinonan kan katawohan?

¹¹ An Biblia nagsasabi: “Naheling nin Dios an gabos niang ginibo asin, uya! idto marahayon.” (Genesis 1:31) An gabos na yaon sa tatamnan nin Eden sangkap nanggad. Si Adan asin Eva nag-erok sa sarong paraiso. Igwa sinda nin sangkap na isip asin sangkap na hawak. Puede sindang magkomunikar sa saindang Kaglalang asin sia sa sainda. Asin paagi sa pagdadanay na fiel, sangkap an saindang magigin mga aki. Dai kutana kaipuhan an sarong bagong langitnon na gobyerno.

12, 13. Mantang nagdadakol kaidto an sangkap na mga tawo, taano an Dios ta makakapagkomunikar pa man giraray sa sainda?

¹² Mantang nagdadakol an pamilya nin tawo, paano makomunikar sa sainda gabos an Dios? Estudyare an mga bitoon sa langit. Sinda grupo-grupo sa islang mga uniberso na inaapod galaksia. An nagkapirang galaksia igwa nin sarong bilyon na bitoon. An iba igwa man nin mga sarong trilyon. Asin kinakalkulo nin mga sientista na igwa nin mga 100 na bilyon na galaksia sa naheheling na uniberso! Pero, an Kaglalang nagsasabi: “Tingagan an saindong mga mata asin helinga nindo. Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa kabilangan, na gabos inaapod nia sa mismong ngaran. Huli sa kadakolan nin dinamikong kosog, mantang sia man makosog sa kapangyarihan, ni saro sa sainda mayong nawawara.”—Isaias 40:26.

¹³ Mantang nasusubaybayan nin Dios an gabos na langitnon na bagay na ini, sierto na bakong problema para sa saiya an pagsubaybay sa orog kasadit na kabilangan nin mga tawo. Maski ngonyan, an minilyon na lingkod nia namimibi sa saiya aroaldaw. An mga pamibi na iyan tolos-tolos na nakakaabot sa Dios. Kaya an pagkomunikar sa gabos na sangkap na tawo dai kutana nagin problema para sa saiya. Dai nia kutana kaipuhan an sarong langitnon na Kahadean tanganing subaybayan sinda. Kanigoan kamakangangalas na areglo—na si Jehova an magin Namamahala niato, na direktang makapagkomunikar sa saiya, asin magkaigwa kan paglaom na nungka nang magadan, mabuhay sagkod lamang sa sarong paraisong daga!

“Bakong Kapot nin Tawo”

14. Taano an mga tawo ta sagkod lamang na mangangaipo kan pamamahala ni Jehova?

¹⁴ Minsan siring, an mga tawo—dawa an mga sangkap—sagkod lamang na mangangaipo kan pamamahala ni Jehova. Taano? Huli ta dai sinda linalang ni Jehova na igwa kan kakayahan na magin mapanggana sa pagigin independiente sa saiyang pamamahala. Ley iyan sa katawohan, na inadmitir ni propeta Jeremias: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad. Tanosan ako, O Jehova.” (Jeremias 10:23, 24) Kabalisngagan an maghona an mga tawo na kaya nindang palakawon nin mapanggana an sosyedad na dai sinda pinamamahalaan ni Jehova. Sarongat iyan sa pagkalalang sa sainda. An pagigin independiente sa pamamahala ni Jehova sierto nanggad na maresulta sa kapasloan, pagkaongis, karingisan, kadahasan, guerra, asin kagadanan. ‘An tawo masakop sa tawo sa saiyang ikararaot.’—Eclesiastes 8:9.

15. Ano an nagin mga epekto kan salang desisyon kan satong enot na mga magurang?

¹⁵ Makamomondo, an enot niatong mga magurang nagdesisyon na dai ninda kaipuhan an Dios bilang Namamahala sa sainda, asin pinili nindang mamuhay nin independiente sa saiya. Bilang resulta, dai na sinda sinusteniran nin Dios sa pagkasangkap. Kapareho na sinda ngonyan nin sarong kasangkapan na de-koryente na hinugkot sa saksakan kaiyan. Kaya pag-abot nin panahon, sinda maluwayluway asin mapondo—sa kagadanan. Sinda nagin siring sa may depektong padron, asin an kamugtakan na iyan iyo sana an ikapamamana ninda sa saindang mga aki. (Roma 5:12) “An Gapo [si Jehova], sangkap an saiyang gibo, huli ta an gabos niang dalan hustisya. . . . Sinda guminawe nin kapahapahamak sa sadiri ninda; sinda bako niang mga aki, an kakundian sadiri ninda.” (Deuteronomio 32:4, 5) Totoo, si Adan asin Eva inimpluwensiahan kan rebeldeng espiritung linalang na nagin si Satanas, alagad igwa sinda nin sangkap na isip asin puede kutanang sayumahan an saiyang salang mga suhestion.—Genesis 3:1-19; Santiago 4:7.

16. Paano pinatotoohan kan kasaysayan an resulta kan pagigin independiente sa Dios?

¹⁶ Bastante an patotoo kan kasaysayan sa resulta kan pagigin independiente sa Dios. Sa laog nin rinibong taon, prinobaran na nin mga tawo an gabos na klase nin gobyerno nin tawo, gabos na sistema ekonomiko asin sosyal. Pero, an karatan padagos na ‘orog na nagraraot.’ (2 Timoteo 3:13) Pinatunayan iyan kan ika-20 siglo. Iyan nagin pano nin maringis na mga pagkaongis asin pinakagrabeng kadahasan, guerra, gutom, kadukhaan, asin pagdusa sa ano man na panahon sa kasaysayan. Asin gurano man an nagin mga pag-oswag sa medisina, maabot an panahon na an gabos magagadan. (Eclesiastes 9:5, 10) Paagi sa paghingoang giyahan an sadiri nindang mga lakad, tinogotan nin mga tawo na sinda magin biktima ni Satanas asin kan saiyang mga demonyo, kaya ngani inaapod kan Biblia si Satanas na an “dios kan sistemang ini nin mga bagay.”—2 Corinto 4:4.

An Balaog na Libreng Kabotan

17. Paano dapat gamiton an balaog nin Dios na libreng kabotan?

¹⁷ Taano ta totogotan ni Jehova an mga tawo na gumibo kan gusto ninda? Huli ta linalang nia sinda na igwa kan makangangalas na balaog na libreng kabotan, an kakayahan nin libreng pagpili. “Kun saen an espiritu ni Jehova, yaon an katalingkasan,” sabi ni apostol Pablo. (2 Corinto 3:17) Mayo nin gustong magin robot, na may iba na iyo an pirmeng nagdedesisyon kun ano an sasabihon o gigibohon nia. Alagad kahagadan ni Jehova sa mga tawo na gamiton sa responsableng paagi an balaog na iyan na libreng kabotan, na masabotan an kadonongan sa paggibo kan saiyang kabotan asin pagdadanay na sakop nia. (Galacia 5:13) Kaya an katalingkasan bakong absoluto, ta iyan maresulta sa anarkiya. Dapat na igwa nin pagkontrol kaiyan oyon sa itinotogot kan maboot na mga ley nin Dios.

18. Ano an ipinaheling nin Dios paagi sa pagtogot sa tawo na gumamit nin libreng kabotan?

¹⁸ Paagi sa pagtogot sa pamilya nin tawo na gumibo kan gusto ninda, ipinaheling nin Dios, nin sararoan sana, na kaipuhan niato an saiyang pamamahala. An saiyang paagi nin pamamahala, an saiyang soberaniya, iyo an solamenteng tamang paagi. Iyan nagbubunga kan pinakadakulang kaogmahan, pagkakontento, asin kaginhawahan. Ini huli ta an satong isip asin hawak dinisenyo ni Jehova na magpunsionar nin pinakamarahay kun kaoyon kan saiyang mga ley. “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” (Isaias 48:17) An libreng pagpili oyon sa itinotogot kan mga ley nin Dios dai magigin nakapagagabat kundi maresulta sa nakaoogmang marhay na pagkalaenlaen nin kakanon, harong, arte, asin musika. Kun tama an pagkagamit, an libreng kabotan nagbunga kutana nin marahayon, pirmeng kawiliwiling buhay sa sarong paraisong daga.

19. Anong ahensia an ginagamit nin Dios tanganing ipakipag-ulian an mga tawo sa saiya?

¹⁹ Alagad huli sa saindang salang pagpili, an mga tawo isiniblag an saindang sadiri ki Jehova, na nagin bakong sangkap, nagluluya, asin nagagadan. Kaya kaipuhan sindang balukaton sa mamondong kamugtakan na iyan asin ibalik sa tamang relasyon sa Dios bilang saiyang mga aking lalaki asin babae. An ahensiang pinili nin Dios tanganing gibohon ini iyo an Kahadean, asin an Parabalukat iyo si Jesu-Cristo. (Juan 3:16) Paagi sa areglong ini, an totoong mga nagsosolsol—arog kan gastador na aki sa ilustrasyon ni Jesus—makakapakipag-ulian sa Dios asin aakoon nia liwat bilang saiyang mga aki.—Lucas 15:11-24; Roma 8:21; 2 Corinto 6:18.

20. Paano ootobon kan Kahadean an katuyohan nin Dios?

²⁰ Sierto nanggad, maootob an kabotan ni Jehova sa daga. (Isaias 14:24, 27; 55:11) Paagi sa saiyang Kahadean na pinamamahalaan ni Cristo, lubos na ibibindikar (patutunayan) nin Dios an saiyang diretso bilang satuyang Soberano. Tataposon kan Kahadean an pamamahala nin tawo asin demonyo sa dagang ini, asin iyan an solamenteng mamamahala gikan sa langit sa laog nin sangribong taon. (Roma 16:20; Kapahayagan 20:1-6) Alagad durante kan panahon na iyan, paano ipaheheling an pagigin nakalalabi kan paagi nin pamamahala ni Jehova? Asin pakalihis kan sangribong taon, ano an magigin papel kan Kahadean? Eestudyaran kan minasunod na artikulo an mga hapot na ini.

Mga Punto Para sa Repaso

• Ano an tema kan Biblia?

• Sairisay an minakompuesto sa bagong pamamahala sa daga?

• Taano an pamamahala nin tawo na independiente sa Dios ta nungkang magigin mapanggana?

• Paano dapat gamiton an libreng kabotan?

[Ritrato sa pahina 10]

Idinoon kan pagtotokdo ni Jesus an pamamahala nin Dios paagi sa Kahadean

[Mga Ritrato sa pahina 12]

Sa gabos na kadagaan an Kahadean an pangenot na itinotokdo kan Mga Saksi ni Jehova

[Mga Ritrato sa pahina 14]

Pinatotoohan kan kasaysayan an mamondong mga resulta kan pagigin independiente sa Dios

[Credit Lines]

Mga soldados kan Guerra Mundial I: Retrato kan U.S. National Archives; kampo de konsentrasyon: Oświęcim Museum; aki: UN PHOTO 186156/J. Isaac