Kun an Dios Nagpapatawad nin Kasalan, Linilingawan daw Nia Iyan?

AN DIREKTANG simbag iyo. Mapadapit sa mga inooyonan nia, si Jehova nanunuga: ‘Ipapatawad ko an saindang karatan, asin dai ko na gigirumdomon an saindang kasalan.’ (Jeremias 31:34) Sa siring, sinisierto sa sato ni Jehova na kun pinapatawad nia an mga nagsosolsol, dai na nia ginigirumdom an mga kasalan ninda. Pero, nangangahulogan daw iyan na dai kayang girumdomon kan Kaglalang kan uniberso an mga kasalan na ipinatawad nia? An mga tataramon ni Ezequiel nagtatao nin liwanag sa kun paano an Dios nagpapatawad nin kasalan asin linilingawan iyan.—Basahon an Ezequiel 18:19-22.

Paagi ki propeta Ezequiel, na nagserbing tagapagtaram, nagpahayag si Jehova nin paghokom sa bakong maimbod na Juda asin Jerusalem. Binayaan kan nasyon sa pangkagabsan an pagsamba ki Jehova asin pinano nin karatan an daga. Ihinula ni Jehova na lalaglagon kan mga Babilonyo an Jerusalem. Pero kasabay kaiyan, nagtao man si Jehova nin mensahe nin paglaom. An lambang indibiduwal may pagpipilian; an kada saro maninimbag sa sadiri niang paggawe.—Bersikulo 19, 20.

Paano kun magbago an sarong maraot? Si Jehova nagsabi: ‘Kun an maraot na tawo sumuway sa gabos na kasalan na saiyang ginibo, asin magkuyog kan gabos na ipinagboboot ko, asin maggibo nin matanos asin kabanalan, totoong gayong sia mabubuhay; dai sia magagadan.’ (Bersikulo 21) Iyo, si Jehova andam na ‘magpatawad’ sa parakasala na nagbakle sa maraot niang pamumuhay asin tunay na nagsosolsol.—Salmo 86:5.

Paano man an mga kasalan na nagibo nia? Si Jehova nagsabi: ‘An gabos niang kasumbikalan na ginibo dai magigirumdoman sa saiya [“dai gigirumdomon tumang sa saiya,” NW].’ (Bersikulo 22) Mangnohon na an mga kasalan kan nagsosolsol “dai gigirumdomon tumang sa saiya.” Taano ta mahalaga ini?

Sa Biblia, an Hebreong tataramon na trinadusir na “girumdomon” puedeng mangahulogan bako sana nin basta pag-isip giraray kan nakaagi. Mapadapit sa tataramon na ini, an sarong reperensia nagsabi: ‘Sa katunayan, parate ining nagpaparisa nin paghiro o ginagamit kaiba nin verb.’ Kaya, an tataramon na “girumdomon” puedeng mangahulogan na “humiro.” Huli kaini, kun sinasabi ni Jehova na an mga kasalan nin nagsosolsol na parakasala “dai gigirumdomon tumang sa saiya,” an boot Niang sabihon dai na Sia mahiro tumang sa indibiduwal na iyan huli sa mga kasalan na idto, arog baga nin pag-akusar o pagpadusa sa saiya.a

Nakakapukaw sa boot an pagkaladawan kan Ezequiel 18:21, 22 manongod sa kun gurano kalubos magpatawad an Dios. Kun pinatawad na ni Jehova an mga kasalan ta, nungka na niang uungkaton pa iyan tumang sa sato. Imbes, ibinubugtak nia sa saiyang likodan an mga kasalan kan nagsosolsol. (Isaias 38:17) Garo man sana pinapara nia iyan.—Guibo 3:19.

Bilang bakong perpektong mga tawo, kaipuhan niato an pagkaherak nin Dios. Ini huli ta dakol na beses kitang nagkakasala. (Roma 3:23) Pero, gustong ipaaram sa sato ni Jehova na kun sinsero kitang nagsosolsol, andam siang magpatawad. Asin kun sia nagpapatawad, linilingawan nia iyan—an boot sabihon, dai na nia noarin man uungkaton pa an satong mga kasalan tanganing akusaran o padusahan kita. Nakakaranga nanggad iyan! Napapahiro ka daw kan pagkaherak nin Dios na orog pang rumani sa saiya?

Isinusuherir na babasahon sa Biblia para sa Hulyo:

◼ Ezequiel 6-20

[Nota sa Ibaba]