Kun Paano Kamo Pinaglilingkodan nin Kristianong mga Pastor

SA DAKOL na lugar puedeng maobserbaran kun paano nag-aataman nin aripompon an mga pastor. Saindang ginigiyahan, pinoprotehiran, asin pinakakakan an mga karnero. Interesante ini para sa Kristianong kamagurangan, huling kabale sa saindang gibohon an mga aktibidad na pagpastor. Iyo nanggad, responsibilidad ninda na “pastoran an kongregasyon nin Dios” asin ‘ingatan an bilog na aripompon.’​—Gibo 20:28.

Kun kamo miembro kan Kristianong kongregasyon, paano makapaglilingkod sa saindo an espirituwal na mga pastor? Asin ano an maninigong magin reaksion nindo sa saindang mga paghihingoa para sa saindo? Taano ta kaipuhan kan kongregasyon an saindang tabang?

Proteksion Tumang sa Ano?

Kan suanoy na mga panahon an mga leon asin iba pang mabangis na hayop nagsasapeligro kan mga aripompon asin sinisiba an indibiduwal na karnero. Kinaipuhan kan mga pastor na magtao nin proteksion. (1 Samuel 17:​34, 35) Bueno, si Satanas na Diablo “naglalakaw na siring sa nagngangarob na leon, na naghahanap nin masisiba.” (1 Pedro 5:8) Sia may pagkaanggot na nakikilaban bako sanang tumang sa daganon na organisasyon ni Jehova sa kabilogan kundi tumang man sa indibiduwal na lingkod nin Dios. Ano an katuyohan ni Satanas? Gusto niang paluyahon an boot kan banwaan ni Jehova asin olangon pa ngani sinda sa ‘pagkuyog sa mga togon nin Dios’ asin sa paggibo kan “gibohon nin pagpatotoo ki Jesus.”​—Kapahayagan 12:17.

An pangobyernong mga pastor sa suanoy na Israel inakusar ni Jehova nin kapabayaan huli ta an saiyang mga karnero nagin “kakanon nin gabos na mabangis na hayop kan kapatagan.” (Ezequiel 34:8) Minsan siring, an Kristianong kamagurangan odok sa puso an pagmawot na protehiran an mga nasa kongregasyon tanganing mayo nin mawara dahelan sa kapabayaan o huli sa impluwensia ni Satanas, kan kinaban, o kan apostatang “mga lobo.” (Gibo 20:​29, 30) Paano tinatabangan kan mga pastor an gabos na miembro kan aripompon na mapagdanay na toltol an saindang kaisipan asin magin puka? An sarong paagi iyo an pagtao nin inandam na marhay na Makakasuratan na mga pahayag sa plataporma kan Kingdom Hall. An saro pa iyo an positibo, nakaparirigon sa boot na mga pakipag-olay bago asin pakatapos kan mga pagtiripon. An saro pang epektibong paagi iyo an personal na pagdalaw sa “mga karnero” sa harong. (Ikomparar an Salmo 95:7.) Alagad ano an pagsongko sa pagpastor? Paano maninigong gibohon an siring na pagdalaw? Asin siisay an maninigong dalawon?

Ano an Pagsongko sa Pagpastor?

An pagsongko sa pagpastor bako sanang sosyal na pagdalaw na manongod sa bakong gayong mahalagang mga bagay an orolay. An sarong magurang sa kongregasyon nagkomento: “An kadaklan na parahayag lubos na naoogma sa pagbasa nin teksto o pag-orolay sa sarong partikular na karakter sa Biblia. Siempre, an magurang sa kongregasyon bakong iyo na sana an nagpaparataram. An parahayag kan Kahadean na dinadalaw natural nang naoogma na magpahayag kan saiyang mga kaisipan manongod sa Biblia, asin an paggibo kaini nakapakokosog sa saiyang pagtubod. An magurang sa kongregasyon puedeng magdara nin magasin na Torrengbantayan o Awake! tanganing ipakipag-olay an sarong nakaparirigon na artikulo. Posible na an espirituwal na orolay na ini an kalaenan kan pagsongko sa pagpastor sa sosyal na pagsongko.”

An saro pang may kabatidan na magurang sa kongregasyon nagkomento: “Bago kan pagdalaw, iniisip-isip kan magurang sa kongregasyon an parahayag na sosongkoon nia. Ano daw an makaparirigon sa parahayag? An sinserong komendasyon sarong mahalagang kabtang nin mga pagsongko sa pagpastor, ta pinakokosog kaiyan na makatagal an saro.” Iyo, an pagsongko sa pagpastor bako sanang makikatood na pagdalaw na magigibo nin siisay man sa kongregasyon.

Taano ta Sinosongko Kamo nin Sarong Pastor?

Kun minadalaw sa harong an sarong magurang sa kongregasyon, sia andam na parigonon an boot kan mga kapagtubod asin tabangan sindang magin marigon sa pagtubod. (Roma 1:11) Kaya kun gusto kamong dalawon nin saro o duwang magurang sa kongregasyon, ano an reaksion nindo? Sabi nin sarong nagbibiaheng paraataman: “Kun an mga pagsongko sa pagpastor ginigibo sana kun medyo may problema, an enot na reaksion sa planong pagdalaw tibaad, ‘Anong sala an nagibo ko?’” An mamomoton na espirituwal na mga pastor inaarog si Jehova, na inataman an salmista asin perming ‘pinaginhawa an saiyang kalag,’ nangorogna sa mga panahon nin kasakitan asin espesyal na pangangaipo.​—Salmo 23:​1-4.

An katuyohan kan pagsongko sa pagpastor ‘magparigon, bakong mangaba.’ (2 Corinto 13:10) Tunay nanggad na nakaparirigon sa boot an pag-apresyar sa pakatagal, kaigotan, asin fiel na gibo kan dinadalaw. An sarong magurang sa kongregasyon nagkomento: “Sa pagsongko sa pagpastor, bakong marahay na tumao nin impresyon na an saro nagbisita na an intension diskobrehon asin pag-olayan an mga problema. Siempre, an parahayag mismo tibaad gustong magtaram dapit sa sarong partikular na problema. Asin kun an sarong karnero mabublay o isinusuhay an saiyang sadiri sa aripompon, an magurang sa kongregasyon kaipuhan na gumibo nin paagi na makatabang.”

An Kristianong mga pastor daing duwa-duwa na matao nin espesyal na pag-asikaso sa siisay man na kapareho kan mga ilinaladawan sa mga tataramon na ini: “Hahanapon ko [ni Jehova] an nawara, asin ibabalik ko an nalagalag, asin bubugkosan ko an nabarian asin pakokosogon ko an naghehelang.” (Ezequiel 34:16) Iyo, an mga karnero tibaad kaipuhan na hanapon, ibalik, bugkosan, o pakosogon. An mga pastor sa Israel nagpabaya sa mga responsibilidad na ini. An paggibo nin siring nagkakaipo na an pastor rumani sa sarong karnero asin asikasohon an mga pangangaipo kaiyan. Sa pundamental, ini an maninigong magin nagpapamidbid na karakteristiko nin kada pagsongko sa pagpastor ngonyan.

An mga Karnerong Marahay an Salud Nangangaipo nin Pag-ataman

Maninigo daw niatong ikonklusyon na an espirituwal na mga pastor sa presenteng aldaw dai na kaipuhan na magin mapagbantay sa mga karnero na marahay an salud? Bueno, kun magkaproblema an sarong literal na karnero, mas pasil an pagtabang dian kun iyan may kompiansa sa pastor. An sarong libro nagkomento na “an mga karnero natural na minarayo sa mga tawo, asin bakong perming pasil na makua an saindang tiwala.” Kabale sa iba pang bagay, isinusuherir kan libro man sanang iyan an pundamental na giyang ini tanganing makua an kompiansa nin karnero: “Kaolayon nin regular an mga hayop. Natotood sinda sa boses, na nag-aasegurar sa sainda. Parateng dalawon an mga karnero sa sabsaban.”​—Alles für das Schaf. Handbuch für die artgerechte Haltung (Gabos na Bagay Para sa mga Karnero. Libro Dapit sa Kun Paano Sinda Aatamanon nin Tama).

Kaipuhan kun siring an personal na pagkomunikar tanganing magkaigwa nin may pagtitiwalang relasyon sa pag-oltanan kan pastor asin karnero. Totoo man iyan sa Kristianong kongregasyon. An sarong magurang sa kongregasyon nagsabi: “An pagigin midbid sa kongregasyon bilang sarong magurang sa kongregasyon na regular na nagdadalaw sa mga karnero mas nagpapapasil sa pagsongko sa saro na may mga problema.” Huli kaini, dai maninigong hingoahon kan espirituwal na mga pastor na pakakanon asin asikasohon an mga karnero sa Kingdom Hall sana. Sagkod na itinotogot nin mga kamugtakan, an mga karnero maninigong mamidbid kan kamagurangan paagi sa pagsongko sa pagpastor sa saindang harong. Nagigirumdoman nin sarong Kristiano na kan sia bago pa sanang manombrahan na magurang sa kongregasyon, an nangengenot na paraataman inapodan sia sa telepono asin ipinadalaw saka ipinaranga sa saiya an sarong tugang na lalaki na nagadanan pa sana nin aking babae huli sa sarong makatatakot na aksidente sa kotse. An magurang sa kongregasyon nag-admitir: “Namondo akong marhay, huling dai pa ako noarin man nakasosongko sa tugang asin dai ko ngani aram an saiyang iniistaran! Nakaginhawa ako kan an sarong maygurang na magurang sa kongregasyon nag-alok na umiba sa sako.” Iyo, an kamagurangan nagtitinarabangan sa mga pagsongko sa pagpastor.

Sa pag-andam para sa asin paggibo nin mga pagsongko sa pagpastor, an sarong magurang sa kongregasyon puedeng ibanan nin sarong ministeryal na lingkod na naghihingoang maabot an “marahay na gibo” nin sarong paraataman. (1 Timoteo 3:​1, 13) Kanigoan an pag-apresyar nin ministeryal na lingkod na maheling kun paano an magurang sa kongregasyon naglilingkod sa mga karnero sa mga pagsongko sa pagpastor! Sa siring an kamagurangan asin ministeryal na mga lingkod orog na napaparani sa gabos sa kongregasyon, na pinakokosog an bogkos nin Kristianong pagkamoot asin pagkasararo.​—Colosas 3:14.

Pagplano nin Panahon Para sa mga Pagsongko sa Pagpastor

Kan itao nin sarong grupo nin kamagurangan an responsibilidad na pagsongko sa pagpastor sa mga nangengenot sa Pag-adal sa Libro kan Kongregasyon, an gabos na parahayag sa ibang grupo nadalaw sa laog nin anom na bulan, alagad mayo nin nasongko sa ibang mga grupo. Nakapahiro ini sa sarong magurang sa kongregasyon na magsabi: “Minalataw na an nagkapirang kamagurangan nagsasadiring boot asin parateng nagpapastor, alagad an iba nangangaipo kan pagparigon sa boot kan saindang kapwa kamagurangan na gibohon iyan.” Kaya an ibang grupo nin kamagurangan nag-aareglo na an gabos na parahayag madalaw kan mga pastor sa laog nin depinidong peryodo nin panahon.

Siempre, an magurang sa kongregasyon o siisay man na ibang parahayag puedeng dalawon an saro sa kongregasyon na dai na naghahalat nin espesyal na mga areglo. Bago magsongko sa pagpastor, an sarong magurang sa kongregasyon minaapod sa telepono asin nagsasabi, “Nagsosongko ako sa sarong pamilya kada bulan. Puede daw akong dumalaw sa saindo sa laog nin mga sarong oras sa sunod na bulan? Noarin daw ini kombenyente para sa saindo?”

Mga Bendisyon nin Pagsongko sa Pagpastor

Mantang padagos na nag-oorog an mga pangigipit kan maraot na palakaw na ini, an nakaparirigon sa boot na mga pagdalaw nin mapagsabot na mga pastor nagigin orog na kapakipakinabang. Kun an gabos na yaon sa aripompon naparirigon an boot asin natatabangan paagi sa mga pagsongko sa pagpastor, an lambang karnero nakamamateng ligtas asin tiwasay.

Mapadapit sa sarong kongregasyon na dian an gabos na parahayag kan Kahadean regular na dinadalaw kan mga pastor, an report: “An mga parahayag nagin positibong marhay manongod sa mga pagsongko sa pagpastor. Parate kang makaheheling nin sarong parahayag na minadolok sa saro kan kamagurangan tanganing ihapot kun noarin sia otro masongko, ta an naghahapot naogma sa nakaparirigon na orolay durante kan nakaaging pagdalaw. An mga pagsongko sa pagpastor sarong bagay na nakatabang sa pagpaoswag sa espiritu kan kongregasyon.” An ibang report nagpaparisa na kun an mga pastor mamomoton na naglilingkod sa siring na paagi, an kongregasyon mag-ooswag sa pagkamoot, pagkasararo, asin entusiasmo. Pambihira nanggad na bendisyon!

An Kristianong mga pastor nagsosongko tanganing paoswagon an espirituwal na kamugtakan kan mga karnero. Mawot kan kamagurangan na parigonon an boot kan asin pakosogon an saindang mga kapagtubod. Kun may lumataw na sarong magabat na problema na nagkakaipo nin hatol durante nin pagdalaw, tibaad pinakamarahay na mag-areglo nin pag-orolay sa ibang panahon, nangorogna kun an magurang sa kongregasyon may kaibang ministeryal na lingkod. Ano man an mangyari, angay an pamibi tanganing taposon an pagdalaw sa pagpastor.

An saro daw na espirituwal na pastor gustong sumongko sa saindong harong sa harani nang ngapit? Kun iyo, maogmang antisiparon an pagparigon sa boot na naghahalat sa saindo. Mabisita sia tanganing maglingkod sa saindo asin pakosogon kamo sa saindong desisyon na magdanay sa dalan na pasiring sa buhay na daing katapusan.​—Mateo 7:​13, 14.

[Kahon sa pahina 26]

Mga Suhestion Para sa mga Pagsongko sa Pagpastor

◻ Makipag-olay kun noarin: Parateng marahay na makipag-olay kun noarin. Kun pinaplano kan magurang sa kongregasyon na husayon an sarong magabat na problema, angay na ipaaram ini nin patienot sa parahayag.

◻ Pag-andam: Konsideraron an naturalesa asin situwasyon kan saro. Tumao nin odok sa pusong komendasyon. Magin pasohan nindo na makahiras nin nakaparirigon sa boot, nakapakokosog sa pagtubod na “espirituwal na balaog.”​—Roma 1:​11, 12.

◻ Kun siisay an iiiba: Saro man na magurang o kualipikadong ministeryal na lingkod.

◻ Durante kan pagdalaw: An magurang maninigong pamugtak an boot, mamomoton, positibo, asin madaling makibagay. Kumustahon an pamilya, kamugtakan kaiyan, asin iba pa. Maghinanyog nin maingat. Kun may lumataw na magabat na problema, tibaad pinakamarahay na mag-areglo nin espesyal na pagsongko sa pagpastor.

◻ Lawig kan pagsongko: Sunodon an napagkaoyonan na oras, asin humale mantang an saindong dinadalaw naoogma sa saindong pagdalaw.

◻ Pagtapos sa pagdalaw: Angay asin tunay na inaapresyar an pamibi.​—Filipos 4:​6, 7.

[Mga retrato sa pahina 24]

An Kristianong mga pastor nagtatao nin espirituwal na proteksion

[Mga retrato sa pahina 26]

An mga pagsongko sa pagpastor nagtatao nin marahay na mga oportunidad para sa espirituwal na pagparigon sa boot