An Kahadian nin Diyos Namamahala Na!

1. Sa ano kita makakasigurado, asin taano?

PAG nahihiling mo an mga kamugtakan sa kinaban, nasasakitan ka daw na mapagdanay mo an positibong pananaw? An pagkamuot kan magkakapamilya bako nang arog kan dati. An kadaklan sa mga tawo mas nagigin bayolente, makasadiri, asin agresibo. Dakul an nasasakitan na magtiwala sa mga may awtoridad. Pero an mismong mga kamugtakan na ini makakapagtao saimo nin kumpiyansa. Taano? Huling an iginagawi kan mga tawo iyo mismo an sinabi sa pambihirang propesiya manungod sa “huring mga aldaw.” (2 Tim. 3:1-5) An kautuban kan mga propesiyang ini, na dai nanggad maninigaran kan siisay man na sinserong tawo, nagtatao nin patunay na si Cristo Jesus namamahala na bilang Hadi kan Kahadian nin Diyos. Pero saro lang ini sa dakul na propesiya manungod sa Kahadian. An pagsiyasat ta sa iba pang propesiya na nagkaurutob sa nag-aging mga taon makakapakusog kan satong pagtubod.

2. Ano an pag-uulayan ta sa artikulong ini, asin taano? (Komentuhan an ritrato sa cover.)

² Sa artikulong ini, pag-uulayan ta (1) an propesiya na makakatabang sa sato na masabutan kun kasuarin naestablisar an Kahadian, (2) an mga propesiya na makakatabang sa sato na maaraman na yaon na an dai nahihiling na presensiya ni Jesus bilang Hadi kan Kahadian nin Diyos, asin (3) an mga propesiya na nagsasabi kun paano lalaglagon an mga kaiwal kan Kahadian nin Diyos. Mahihiling ta na an mga propesiyang ini nagsusurugpunan siring sa mga pidaso nin jigsaw puzzle na nagtatao sa sato nin malinaw na ladawan kun hain na kita sa iskedyul ni Jehova nin mga pangyayari.

3. Anong asigurasyon an itinatao sa sato kan propesiya sa Daniel 7:13, 14 manungod sa Hadi kan Kahadian nin Diyos?

³ An propesiya na yaon sa Daniel 7:13, 14 nag-aasigurar sa sato na si Cristo Jesus an pinakaangay na Tagapamahala kan Kahadian nin Diyos. An mga tawo sa gabos na nasyon mauugmang “maglingkod sa saiya,” asin mayo na nin masalida sa saiya bilang Tagapamahala. Sinabi sa saro pang propesiya sa libro nin Daniel na aakuon ni Jesus an saiyang Kahadian sa katapusan kan propetikong peryodo nin pitong panahon. Posible daw na maaraman kun kasuarin nangyari an maugmang pangyayaring iyan?

4. Ipaliwanag kun paano an Daniel 4:10-17 nakakatabang sa sato na maaraman kun anong taon nagtukaw si Cristo bilang Hadi. (Hilingon man an nota sa ibaba.)

⁴ Basahon an Daniel 4:10-17. An “pitong panahon” nagrerepresentar sa sarong peryodo nin panahon na may 2,520 taon. An peryodong iyan nin panahon nagpuon kan 607 B.C.E. kan halion kan mga Babilonyo an huring hadi sa trono ni Jehova sa Jerusalem. Natapos iyan kan 1914 C.E. kan patukawon ni Jehova sa trono si Jesus—“an saro na may legal na deretso”—bilang Hadi kan Kahadian nin Diyos.b—Ezek. 21:25-27.

5. Ano an sarong paagi na makikinabang kita sa propesiya manungod sa “pitong panahon”?

⁵ Paano kita nakikinabang sa propesiyang ini? An pakaaram manungod sa “pitong panahon” nag-aasigurar sa sato na inuutob ni Jehova an saiyang mga panuga sa tamang panahon. Kun paanong nagtalaan siya nin panahon para sa pag-establisar kan saiyang Kahadian, sisiguraduhon man niya na an gabos na iba pang propesiya mauutob uyon sa saiyang iskedyul. Iyo, an aldaw ni Jehova ‘dai mahuhuri.’—Hab. 2:3.

6. (a) Ano an nahihiling na ebidensiya kan dai nahihiling na pamamahala ni Cristo sa langit? (b) Paano an ebidensiyang iyan pinapatunayan kan propesiya na yaon sa Kapahayagan 6:2-8?

⁶ Kan madali nang matapos an ministeryo ni Jesus digdi sa daga, ihinula niya an nagkapirang pangyayari sa kinaban na makakatabang sa saiyang mga parasunod na maaraman na nagpuon na siyang mamahala sa langit. An nagkapira sa mga sinambit niya iyo an mga giyera, tiggutom, asin linog. Ihinula man niya na magkakaigwa nin “sunod-sunod” na epidemya, o hilang, “sa manlain-lain na lugar”—sarong halimbawa diyan an COVID-19 na pandemya. An mga pangyayaring ini kabtang kan inaapod kan Bibliya na “tanda” kan presensiya ni Cristo. (Mat. 24:3, 7; Luc. 21:7, 10, 11) Labing 60 taon pagkatapos na magadan si Jesus asin magbalik sa langit, tinawan niya si apostol Juan nin dagdag na patunay na an mga bagay na ini mangyayari. (Basahon an Kapahayagan 6:2-8.) An gabos na iyan nangyari puon kan magin Hadi si Jesus kan 1914.

7. Taano ta nagin makahihirak an daga puon kan mamahala si Jesus?

⁷ Taano ta mas naggrabe an mga kamugtakan sa kinaban kan magin Hadi si Jesus? An Kapahayagan 6:2 nagtatao nin mahalagang detalye—an inot na ginibo ni Jesus bilang bagong pinatukaw na Hadi iyo an makigiyera. Laban kiisay? Laban sa Diyablo asin sa saiyang mga demonyo. Sigun sa Kapahayagan kapitulo 12, nadaog si Satanas sa ralaban, asin ihinulog siya sa daga kaiba kan saiyang mga demonyo. Angguton na marhay si Satanas, asin ibinaling niya an saiyang kaanggutan sa mga tawo, kaya bilang resulta “hirak man kan daga.”—Kap. 12:7-12.

8. Paano kita nakikinabang mantang nahihiling tang nauutob an mga propesiya manungod sa Kahadian?

⁸ Paano kita nakikinabang sa mga propesiyang ini? An mga pangyayari sa kinaban asin an risang-risang pagbabago sa ugali kan mga tawo makakatabang sato na maaraman na nagin Hadi na si Jesus. Kaya imbes na mapurisaw kita pag nakakahiling kita nin mga tawo na makasadiri asin maringis, ginigirumdom ta na an mga iginagawi ninda kautuban kan propesiya sa Bibliya. An Kahadian nin Diyos namamahala na! (Sal. 37:1) Asin aasahan ta na mas magrabe pa an mga kasakitan sa kinaban mantang mas nagrarani na an Armagedon. (Mar. 13:8; 2 Tim. 3:13) Nagpapasalamat ka daw sa satong mamumuton na Ama sa langit huling tinatabangan niya kita na masabutan kun taano ta dakulon nin problema sa kinaban na ini?

9. Paano ilinadawan kan propesiya sa Daniel 2:28, 31-35 an ultimong pambilog na kinaban na kapangyarihan, asin kasuarin iyan nagpuon na mamahala?

⁹ Basahon an Daniel 2:28, 31-35. Nahihiling ta na nauutob sa ngunyan an propesiyang ini. Ipinaparisa sa pangaturugan ni Nabucodonosor kun ano an mangyayari “sa huring kabtang kan mga aldaw” pakatapos na magpuon an pamamahala ni Cristo. Magigin kaiba sa mga kaiwal ni Jesus digdi sa daga an ultimong pambilog na kinaban na kapangyarihan na ihinula sa Bibliya, an saro na irinerepresentar kan “mga bitis . . . na gibo sa lansang asin dalipay.” An pambilog na kinaban na kapangyarihan na ini namamahala na. Nagpuon iyan na mamahala durante kan Giyera Mundiyal I kan magin magkasurog an Britania asin Estados Unidos, an alyansang Anglo-Amerikano. Sa pangaturugan ni Nabucodonosor manungod sa imahen, ihinula man an kisiyera duwang bagay na diyan napapalain an pambilog na kinaban na kapangyarihan na ini sa sinundan na mga kahadian.

10. (a) Paano eksaktong ilinadawan sa propesiya ni Daniel an alyansang Anglo-Amerikano? (b) Sa anong peligro kita dapat mag-ingat? (Hilingon an kahon na “Mag-ingat sa Dalipay!”)

¹⁰ Inot, bakong arog sa sinundan na mga pambilog na kinaban na kapangyarihan na sinambit sa bisyon, an alyansang Anglo-Amerikano dai nagrerepresentar sa sarong solidong metal arog nin bulawan o plata, kundi nin pinagsalak na lansang asin dalipay. An dalipay nagrerepresentar sa “mga aki kan katawuhan,” o mga ordinaryong tawo. (Dan. 2:43, nota sa ibaba.) Arog kan malinaw na nahihiling ngunyan, an saindang impluwensiya sa mga eleksiyon, mga kampanya para sa deretso sibil, mga protesta, asin mga unyon nin mga trabahador nagpapaluya sa kakayahan kan pambilog na kinaban na kapangyarihan na ini na mag-implementar kan mga palisiya kaini.

11. Paano an pamamahala kan Pambilog na Kinaban na Kapangyarihan na Anglo-Amerikano nagpapakusog kan satong pagtitiwala na nabubuhay na kita sa panahon kan katapusan?

¹¹ Ikaduwa, arog kan irinerepresentar kan bitis kan dakulaon na imahen, an Anglo-Amerika iyo an ultimong pambilog na kinaban na kapangyarihan na ihinula sa Bibliya. Mayo na nin masunod diyan na iba pang pulitikal na kapangyarihan. Imbes, bigla iyan na lalaglagon kan Kahadian nin Diyos sa Armagedon, kaiba na an gabos na iba pang mga gobyerno nin tawo.c—Kap. 16:13, 14, 16; 19:19, 20.

12. Anong dagdag na ebidensiya an itinatao kan propesiya ni Daniel na nagtatao sa sato nin karangahan asin paglaom?

¹² Paano kita nakikinabang sa propesiyang ini? An propesiya ni Daniel nagtatao nin dagdag na ebidensiya na nabubuhay na kita sa panahon kan katapusan. Labing 2,500 na taon na an nakaagi, ihinula ni Daniel na pagkatapos kan Babilonya, apat na iba pang pambilog na kinaban na kapangyarihan an magkakaigwa nin dakulang epekto sa banwaan nin Diyos. Dugang pa, sinabi niya na an ultimo sa mga ini iyo an Pambilog na Kinaban na Kapangyarihan na Anglo-Amerikano. Nagtatao ini sato nin karangahan asin paglaom na dai na mahahaloy tatapuson kan Kahadian nin Diyos an pamamahala nin tawo asin lubos kaiyan na papamahalaan an daga.—Dan. 2:44.

13. Sa ano nagrerepresentar an “ikawalong hadi” asin an “sampulong hadi” na sinambit sa Kapahayagan 17:9-12, asin paano nautob an propesiyang ini?

¹³ Basahon an Kapahayagan 17:9-12. Dahil sa nagin destroso kan Giyera Mundiyal I, nagkaigwa nin pangyayari na nagresulta sa kautuban kan saro pang propesiya sa Bibliya manungod sa huring mga aldaw. Gusto kan mga lider kan kinaban na magkaigwa nin katuninungan sa bilog na daga. Kaya kan Enero 1920, inestablisar ninda an League of Nations, na sinalidahan kan United Nations kan Oktubre 1945. Inaapod an organisasyon na ini na “an ikawalong hadi.” Pero bako iyan pambilog na kinaban na kapangyarihan. An kusog asin impluwensiya kaiyan nakadepende sa pulitikal na mga kapangyarihan na nagsusuportar diyan. Inaapod kan Bibliya an mga kapangyarihan na iyan na “sampulong hadi.”

14-15. (a) Ano an ihinahayag kan Kapahayagan 17:3-5 manungod sa “Dakulang Babilonya”? (b) Ano an nangyayari sa suporta para sa palsong relihiyon?

¹⁴ Basahon an Kapahayagan 17:3-5. Sa paggiya nin Diyos, nahiling ni apostol Juan sa bisyon an sarong hostes, an “Dakulang Babilonya,” na nagrerepresentar sa pambilog na kinaban na imperyo nin palsong relihiyon. Ano an ihinahayag kan bisyon? Sa halawig na panahon, nakikipagtabangan an palsong relihiyosong mga organisasyon sa pulitikal na mga kapangyarihan kan kinaban asin sinusuportaran ninda ini. Alagad, dai na mahahaloy, ilalaag ni Jehova sa puso kan pulitikal na mga kapangyarihan “na isagibo an saiyang kaisipan.” Ano an magigin resulta? An pulitikal na mga kapangyarihan na iyan, an “sampulong hadi,” sasalakayon an palsong relihiyon asin pupuhuon iyan.—Kap. 17:1, 2, 16, 17.

¹⁵ Paano ta naaraman na madali na an katapusan kan Dakulang Babilonya? Tanganing masimbag iyan, makakatabang kun gigirumdumon ta na an suanoy na siyudad nin Babilonya protektado kan katubigan kan dakulang Salog nin Eufrates. Sa libro nin Kapahayagan, an milyon-milyon na nagsusuportar sa Dakulang Babilonya ikinukumparar sa nagpoprotektar na “katubigan.” (Kap. 17:15) Pero sinasabi man kaiyan na an katubigan ‘mamamara,’ na nagpaparisa na an pambilog na kinaban na imperyo nin palsong relihiyon mawawaran nin dakulon na nagsusuportar digdi. (Kap. 16:12) Bilang kautuban kan propesiyang iyan, dakul na tawo ngunyan an binabayaan na an palsong relihiyon asin kun sain-sain naghahanap nin solusyon sa saindang mga problema.

16. Paano kita nakikinabang sa pakasabot ta sa mga propesiya manungod sa pag-establisar kan United Nations asin sa katapusan kan Dakulang Babilonya?

¹⁶ Paano kita nakikinabang sa mga propesiyang ini? An pag-establisar kan United Nations asin pagluya kan suporta sa palsong relihiyon nagpapatunay man na nabubuhay na kita sa huring mga aldaw. Maski ngani dakul na tawo an dai na nagsusuportar sa Dakulang Babilonya, bako iyan an magigin paagi kan pagpuho sa palsong mga relihiyon. Arog kan nasambit kasubago, ilalaag ni Jehova sa puso kan “sampulong hadi”—an pulitikal na mga kapangyarihan na nagsusuportar sa United Nations—“na isagibo an saiyang kaisipan.” Biglang pupuhuon kan mga nasyon na iyan an palsong relihiyon, na ikakabigla kan bilog na kinaban.d (Kap. 18:8-10) An kalaglagan kan Dakulang Babilonya, magkakaigwa nin dakulang epekto sa bilog na kinaban asin madara nin mga kasakitan. Pero an banwaan nin Diyos magkakaigwa nin kisiyera duwang dahilan para mag-ugma. An haloy nang kaiwal na ini kan Diyos na Jehova mawawara na sagkod lamang, asin makakamtan ta na an satong kaligtasan sa maraot na sistemang ini nin mga bagay!—Luc. 21:28.

17-18. (a) Paano ta padagos na mapapakusog an satong pagtubod? (b) Ano an pag-uulayan ta sa sunod na artikulo?

¹⁷ Ihinula ni Daniel na “magigin abunda an tunay na kaaraman.” Asin nagin abunda talaga iyan! Nasasabutan ta na ngunyan an mga propesiya manungod sa satong panahon. (Dan. 12:4, 9, 10) An pagigin eksakto kan mga propesiyang ini urog na nagpapararom kan satong paggalang asin paghanga ki Jehova asin sa saiyang ipinasabong na Tataramon. (Isa. 46:10; 55:11) Kaya padagos na pakusugon an saimong pagtubod paagi sa maigot na pag-adal kan Kasuratan asin pagtabang sa iba na magkaigwa nin inuuyunan na relasyon ki Jehova. Iingatan niya an gabos na lubos na nananarig sa saiya, asin tatawan niya sinda nin “dagos-dagos na katuninungan.”—Isa. 26:3.

¹⁸ Sa sunod na artikulo, mapokus kita sa mga propesiya manungod sa Kristiyanong kongregasyon sa panahon kan katapusan. Arog kan maaaraman ta, an mga propesiyang ini biyo nanggad na kauyon kan gabos na propesiya manungod sa huring mga aldaw. Mahihiling ta an dagdag na ebidensiya na si Jesus—an satong namamahalang Hadi—aktibong ginigiyahan an saiyang maimbod na mga parasunod.