“Dai Kamo Matakot, Sadangoton na Aripompon”

“Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.”​—LUCAS 12:32.

1. Ano an basihan kan mga tataramon ni Jesus na: “Dai kamo matakot, sadangoton na aripompon”?

‘PADAGOS nindong hanapon an kahadean nin Dios.’ (Lucas 12:31) Kan sabihon ni Jesus an mga tataramon na ini sa saiyang mga disipulo, ipinahayag nia an sarong prinsipyo na naggiya sa kaisipan kan mga Kristiano poon kan saiyang kaaldawan sagkod sa satong kaaldawan. An Kahadean nin Dios dapat na may pinakaenot na lugar sa satong buhay. (Mateo 6:33) Alagad, sa tala ni Lucas si Jesus nagtaram pa nin mamomoton asin nakapakokosog sa boot na mga tataramon sa sarong espesyal na grupo nin mga Kristiano. Sia nagsabi: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.” (Lucas 12:32) Bilang an Marahay na Pastor, aram ni Jesus na may masakit na mga panahon na maabot sa saiyang dayupot na mga disipulo. Pero mayong dahelan na matakot sinda kun padagos nindang hinahanap an Kahadean nin Dios. Kaya, an sadol ni Jesus bakong maisog na pagboot. Imbes, iyan sarong mamomoton na panuga na nakapukaw nin kompiansa asin kapusoan.

2. Sairisay an minakompuwesto sa sadangoton na aripompon, asin taano sinda ta may espesyal na pribilehiyo?

² Kinakaolay ni Jesus an saiyang mga disipulo, asin inapod nia sindang “sadangoton na aripompon.” Kinakaolay man nia an mga ‘tatawan ni Jehova kan kahadean.’ Kun ikokomparar sa dakulang mga kadaklan na maako ki Jesus sa huring mga panahon, an grupong ini talagang kakadikit an bilang. Ibinilang man sindang mahalaga huli ta pinili sinda para sa sarong pambihirang ngapit, tanganing gamiton sa makahadeng paglilingkod. An saindang Ama, an Dakulang Pastor, si Jehova, inaapod an sadangoton na aripompon sa katuyohan na sinda mag-ako nin langitnon na mana may koneksion sa Mesiyanikong Kahadean ni Cristo.

An Sadangoton na Aripompon

3. Anong mamuraway na bisyon dapit sa sadangoton na aripompon an naheling ni Juan?

³ Sairisay, kun siring, an minakompuwesto sa sadangoton na aripompon na ini na igwa kan siring kamakangangalas na paglaom? An mga parasunod ni Jesu-Cristo na nag-aako nin paglahid kan banal na espiritu. (Gibo 2:​1-4) Naheheling sinda bilang langitnon na mga paraawit na may kapot na arpa sa saindang kamot, si apostol Juan nagsurat: “Ako nagheling, asin, uya! an Kordero nagtitindog sa Bukid nin Sion, asin sa kaibanan nia an sanggatos may apat na polo may apat na ribo na igwa kan saiyang ngaran asin kan ngaran kan saiyang Ama na nasusurat sa saindang angog. An mga ini iyo an dai nagpadigta sa mga babae; sa katunayan, sinda mga birhen. An mga ini iyo an padagos na nagsusunod sa Kordero minsan sia magsaen. An mga ini binakal hale sa katawohan bilang enot na mga bunga sa Dios asin sa Kordero, asin mayo nin kaputikan na nakua sa saindang ngoso; sinda mayo nin kaninan.”​—Kapahayagan 14:​1, 4, 5.

4. Ano an katongdan kan sadangoton na aripompon digdi sa daga ngonyan?

⁴ Poon kan Pentecostes 33 C.E., an mga linahidan, pinaniaki sa espiritung ini naglingkod bilang mga embahador ni Cristo digdi sa daga. (2 Corinto 5:20) Ngonyan, an natatada na sana sainda an nawalat, na iribang naglilingkod bilang an grupong maimbod asin madonong na oripon. (Mateo 24:45; Kapahayagan 12:17) Partikularmente poon kan taon 1935, inibanan sinda kan “ibang karnero,” mga Kristiano na daganon an paglaom, na ngonyan minilyon na an bilang. An mga ini nagtatabang sa paghuhulit kan maogmang bareta sa bilog na daga.​—Juan 10:16.

5. Ano an kaisipan kan mga nawawalat pa sa sadangoton na aripompon, asin taano ta dai sinda kaipuhan na matakot?

⁵ Ano an kaisipan kan mga nawawalat pa sa sadangoton na aripompon na ini na uya pa digdi sa daga? Nakakaaram na sinda mag-aako nin “Kahadean na dai matatanyog,” itinatao ninda an saindang banal na paglilingkod na may diosnon na takot asin paghanga. (Hebreo 12:28) Mapakumbaba nindang nasasabotan na nasa sainda an dai masokol na pribilehiyo na nagbubunga nin daing sagkod na kagayagayahan. Nakua ninda an “sarong perlas na dakulaon an halaga” na nasambitan ni Jesus kan sia magtaram manongod sa Kahadean. (Mateo 13:46) Mantang nagdadangadang an dakulang kahorasaan, an mga linahidan nin Dios nagtitindog na daing takot. Sa ibong kan mangyayari sa kinaban nin katawohan durante kan “dakula asin mamuraway na aldaw ni Jehova,” mayo sinda nin nangingiring pagkatakot sa ngapit. (Gibo 2:​19-21) Taano man ta matatakot sinda?

Nag-ina an Bilang

6, 7. (a) Taano ta sadit sana an kabilangan kan sadangoton na aripompon na yaon pa digdi sa daga? (b) Paano maninigong mansayon kan kada indibiduwal an paglaom na yaon sa saiya?

⁶ Sa nag-agi pa sanang mga taon an bilang kan sadangoton na aripompon na yaon pa digdi sa daga suminadit nanggad. Maheheling ini sa report kan Memorial kan 1994. Sa mga 75,000 na kongregasyon kan banwaan ni Jehova sa bilog na kinaban, 8,617 sana an nagpahayag kan saindang paghihingako na miembro kan natatada paagi sa pakikikabtang sa mga emblema. (Mateo 26:​26-30) Sa kabaliktaran, 12,288,917 an total na nag-atender. An linahidan na mga Kristiano nakakaaram na ini an dapat na laoman. Nagtalaan si Jehova nin sarong limitadong bilang, 144,000, na makompuwesto sa sadangoton na aripompon, asin tinitipon nia iyan poon pa kan Pentecostes 33 C.E. Makatanosan nanggad, an pag-apod sa sadangoton na aripompon matatapos kun an bilang makokompleto na, asin an ebidensia iyo na an pankagabsan na pagtipon sa mga espesyal na binendisyonan na ini natapos kan 1935. Alagad, an ibang karnero sa panahon kan katapusan ihinulang madakol na magin “sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon.” Poon kan 1935 ginibo ni Jehova an pankagabsan na pagtipon sa dakulang kadaklan na ini, na an paglaom buhay na daing katapusan sa sarong paraisong daga.​—Kapahayagan 7:9; 14:​15, 16; Salmo 37:29.

⁷ An kadaklan kan kabilang sa sadangoton na aripompon na yaon pa digdi sa daga mga 70, 80, asin 90 anyos na ngonyan. An nagkapira luminihis na sa saindang ika-100 na taon nin buhay. Sinda gabos, ano man an saindang edad, nakakaaram na paagi sa langitnon na pagkabuhay liwat, sa katapustapusi makakasaro sinda ni Jesu-Cristo asin maghahade kaiba nia sa saiyang mamuraway na Kahadean. An mga kabilang sa dakulang kadaklan magigin daganon na mga sakop ni Cristo na Hade. An lambang saro maggayagaya sa itinagama ni Jehova para sa mga namomoot sa saiya. Bakong kita an mapili kun anong paglaom an gusto ta. Si Jehova an madeterminar kaiyan. An duwang grupo puwedeng mag-ogma sa saindang paglaom para sa sarong maogmang ngapit, baga man iyan sa langitnon na Kahadean o sa sarong paraisong daga sakop kan Kahadean na iyan.​—Juan 6:​44, 65; Efeso 1:​17, 18.

8. Gurano kamadali nang matapos an pagtatak sa 144,000, asin ano an mangyayari kun iyan kompleto na?

⁸ An 144,000 gabos na sadangoton na aripompon iyo an “Israel nin Dios,” na suminalida sa Israel sa laman sa mga katuyohan nin Dios. (Galacia 6:16) Kaya, an natatada iyo an nawawalat pa sa espirituwal na nasyon na iyan na yaon pa digdi sa daga. An mga nawawalat pang iyan tinatatakan para sa pangultimong pag-aprobar ni Jehova. Sa sarong bisyon, naheling ini ni apostol Juan na nangyayari, asin sia nagbareta: “Ako nakaheling nin saro pang anghel na nag-iitaas hale sa sirangan, na igwa nin tatak kan buhay na Dios; asin sia nagkurahaw sa halangkaw na tingog sa apat na anghel na tinogotan na magratak kan daga asin kan dagat, na an sabi: ‘Dai nindo pagratakan an daga o an dagat o an mga kahoy, sagkod na dai pa niamo natatatakan an mga oripon kan satong Dios sa saindang angog.’ Asin nadangog ko an kabilangan kan mga tinatakan, sanggatos may apat na polo may apat na ribo, na tinatakan hale sa lambang tribo kan mga aki [nin espirituwal na] Israel.” (Kapahayagan 7:​2-4) Mantang an pagtatak na ini sa espirituwal na Israel malinaw na madali nang matapos, ipinaheheling na madali nang maotob an maogmang mga pangyayari. Enot, an “dakulang kahorasaan,” na an apat na doros nin kalaglagan bubutasan na sa daga, seguradong haranihon na.​—Kapahayagan 7:14.

9. Paano minamansay kan sadangoton na aripompon an nagdadakol na bilang kan dakulang kadaklan?

⁹ Minilyon an bilang kan natipon nang mga kabilang sa dakulang kadaklan. Nakaoogma nanggad ini sa puso kan natatada! Minsan ngani an mga miembro kan sadangoton na aripompon na yaon pa digdi sa daga padagos na nag-iina an bilang, sinanay asin inandam ninda an kuwalipikadong mga lalaki kan dakulang kadaklan na magpasan nin mga paninimbagan may koneksion sa nag-ooswag na daganon na organisasyon nin Dios. (Isaias 61:5) Siring kan ipinarisa ni Jesus, igwa nin mga makakaligtas sa dakulang kahorasaan.​—Mateo 24:22.

“Dai Kamo Matakot”

10. (a) Anong pag-atake an nakatalaan na ilansar sa banwaan nin Dios, asin sa ano iyan magiya? (b) Ano an mga ihinahapot sa kada saro sato?

¹⁰ Si Satanas asin an saiyang mga demonyo ihinolog na sa palibot kan daga. Sia asin an saiyang mga kampon minamaniobra tanganing gibohon an saindang pinakamakosog na pag-atake sa banwaan ni Jehova. An pag-atakeng ini, na ihinula sa Biblia, ilinaladawan na pag-atake ni Gog nin Magog. Kiisay espisipikong ipinupunteriya kan Diablo an saiyang pag-atake? Bako daw na sa ultimong mga miembro kan sadangoton na aripompon, an espirituwal na Israel nin Dios, na matoninong na nag-eerok “sa tahaw kan daga”? (Ezekiel 38:​1-12) Iyo, pero an natatada sa maimbod na grupong linahidan, asin an saindang maimbod na kairiba, an ibang karnero, makakaheling kun paano an pag-atake ni Satanas magpapangyari nin dramatikong reaksion ni Jehova Dios. Makikilabot sia bilang pagsorog sa saiyang banwaan, asin ini an poponan kan biglang pagdatong kan “dakula asin makatatakot na aldaw ni Jehova.” (Joel 2:31) Ngonyan, an maimbod asin madonong na oripon naggigibo nin mahalaga, nagliligtas-buhay na paglilingkod, na nagpapatanid dapit kaining maabot na pakikilabot ni Jehova. (Malaquias 4:5; 1 Timoteo 4:16) Aktibo daw nindong sinusuportaran an paglilingkod na iyan, na nakikikabtang sa paghuhulit kan maogmang bareta kan Kahadean ni Jehova? Padagos daw nindong gigibohon iyan bilang daing takot na parabalangibog kan Kahadean?

11. Taano ta mahalaga ngonyan an mapusong kaisipan?

¹¹ Huli sa presenteng situwasyon sa kinaban, napapanahon nanggad para sa sadangoton na aripompon na himateon an mga tataramon ni Jesus na para sa sainda: “Dai kamo matakot, sadangoton na aripompon”! Mahalaga an siring na mapusong kaisipan huli kan gabos na naootob ngonyan kaoyon sa katuyohan ni Jehova. Bilang indibiduwal, nasasabotan kan kada saro sa sadangoton na aripompon an pangangaipong magtagal sagkod sa katapusan. (Lucas 21:19) Kun paanong si Jesu-Cristo, an Kagurangnan kan sadangoton na aripompon, nagtagal asin nagmaimbod sagkod na matapos an saiyang buhay sa daga, an kada saro sa natatada dapat man na magtagal asin magmaimbod.​—Hebreo 12:​1, 2.

12. Paano sinadol ni Pablo, arog ni Jesus, an linahidan na mga Kristiano na dai matakot?

¹² An gabos na linahidan dapat na magkaigwa kan pagmansay na arog kan ki apostol Pablo. Mangnoha kun paanong an saiyang mga tataramon bilang linahidan na parabalangibog sa publiko kan pagkabuhay liwat kaoyon kan sadol ni Jesus na dai matakot. Si Pablo nagsurat: “Girumdoma na si Jesu-Cristo binuhay liwat sa mga gadan asin banhi ni David, sono sa maogmang bareta na sakong ihinuhulit; na mapadapit kaiyan ako nagtitios nin maraot sagkod sa mga gapos nin bilanggoan bilang paragibo nin maraot. Minsan siring, an tataramon nin Dios dai nagagapos. Huli kaini ako padagos na nagtatagal kan gabos na bagay para sa mga pinili, tangani na sinda man magkamit kan kaligtasan na kasaro ni Cristo Jesus kaiba an daing katapusan na kamurawayan. Tunay an pagkasabi: Talagang kun kita iribang magadan, iriba man kitang mabubuhay; kun padagos kitang magtagal, kita man iribang maghahade; kun kita magpainda, papaindahan man nia kita; kun kita bakong maimbod, sia nagdadanay na maimbod, huli ta dai nia mapaiindahan an saiyang sadiri.”​—2 Timoteo 2:​8-13.

13. Ano an hararom na mga paniniwala kan mga miembro kan sadangoton na aripompon, asin pinahihiro sinda kaini na gibohon an ano?

¹³ Arog ni apostol Pablo, an nawawalat pang mga miembro kan linahidan na sadangoton na aripompon andam na magtios nin kasakitan mantang ipinahahayag ninda an mapuwersang mensahe na nasusurat sa Tataramon nin Dios. An saindang marigon na mga paniniwala hararom na nakagamot mantang padagos sindang nagsasarig sa mga panuga nin Dios na kaligtasan asin pagtao sainda kan “korona nin buhay” kun patutunayan ninda na sinda maimbod sagkod sa kagadanan. (Kapahayagan 2:10) Paagi sa pakaeksperyensia nin tolos-tolos na pagkabuhay liwat asin pagkaliwat, sinda isasaro ki Cristo, tanganing maghade sa kaibanan nia. Kanigoan na kapangganahan huli sa saindang pagdadanay sa integridad bilang mga nandaog sa kinaban!​—1 Juan 5:​3, 4.

Sarong Pambihirang Paglaom

14, 15. Paanong pambihira an paglaom na pagkabuhay liwat kan sadangoton na aripompon?

¹⁴ Pambihira an paglaom na pagkabuhay liwat na pinangangaptan kan sadangoton na aripompon. Sa anong mga paagi? Enot, maeenot iyan sa pankagabsan na pagkabuhay liwat ‘kan mga matanos asin kan mga bakong matanos.’ (Gibo 24:15) Sa aktuwal, an pagkabuhay liwat kan mga linahidan nasa sarong pagkasunodsunod sono sa importansia, siring kan malinaw na pinatutunayan kan mga tataramon na ini na yaon sa 1 Corinto 15:​20, 23; “Si Cristo binuhay na liwat hale sa mga gadan, an enot na bunga kan mga natorog sa kagadanan. Alagad an lambang saro sa saiyang sadiring ranggo: si Cristo an enot na bunga, dangan an mga rogaring ni Cristo sa panahon kan saiyang presensia.” Paagi sa pagkaigwa kan klase nin pakatagal asin pagtubod na ipinaheling ni Jesus, an sadangoton na aripompon nakakaaram kun ano an natatagama para sa sainda mantang tinatapos ninda an saindang buhay sa daga, partikularmente poon kan an tunay na Kagurangnan dumatong sa saiyang templo para sa paghokom kan 1918.​—Malaquias 3:1.

¹⁵ Si Pablo nagtatao sato nin dugang pang dahelan na ibilang na pambihira an pagkabuhay liwat na ini. Siring kan nasusurat sa 1 Corinto 15:​51-53, sia nagsurat: “Uya! sasabihon ko sa saindo an sarong banal na hilom: Bakong kita gabos matotorog sa kagadanan, kundi kita gabos maliliwat, sa panale, sa sarong pagpirok nin mata, sa panahon kan huring trumpeta. . . . Huli ta ining malalapaon kaipuhan na maggubing nin pagkadaing kalapaan, asin ining magagadanon kaipuhan na maggubing nin pagkadaing kagadanan.” An mga tataramon na ini minaaplikar sa mga kabilang sa sadangoton na aripompon na nagadan durante kan presensia ni Cristo. Dai na kaipuhan na magtorog nin halawig na panahon sa kagadanan, sinda ginugubingan nin pagkadaing kagadanan, “sa panale, sa sarong pagpirok nin mata.”

16, 17. Mapadapit sa saindang paglaom na pagkabuhay liwat, paanong espesyal na binendisyonan an linahidan na mga Kristiano ngonyan?

¹⁶ Sa liwanag kan pagsabot na ini, masasabotan ta an kahulogan kan mga tataramon ni apostol Juan na yaon sa Kapahayagan 14:​12, 13. Sia nagsurat: “‘Digdi nangangaipo nin pakatagal sa mga banal, an mga nag-ootob sa mga pagboot nin Dios asin sa pagtubod ni Jesus.’ Asin nakadangog ako nin tingog hale sa langit na nagsabi: ‘Isurat mo: Maogma an mga gadan na nagagadan na kasaro kan Kagurangnan poon sa panahon na ini padagos. Iyo, sabi kan espiritu, magpahingalo na sinda sa saindang mga pagpapagal, huli ta an mga bagay na saindang ginibo kaibanan ninda.’”

¹⁷ Pambihira nanggad na balos an natatagama para sa natatada sa sadangoton na aripompon! An saindang pagkabuhay liwat madatong sa panale, pagtorog tolos ninda sa kagadanan. Kanigoan kapambihirang pagkaliwat an saindang maeeksperyensiahan mantang ginigibo ninda an saindang asignasyon sa rona nin mga espiritu! Mantang nangyayari na an pagpamuraway na iyan sa sadangoton na aripompon asin madali nang matapos an kaotoban kan pangenot na mga hula sa Biblia, an ultimong nawawalat pang mga miembro kan sadangoton na aripompon tunay nanggad na “dai [kaipuhan na] matakot.” Asin an saindang kadaihan nin takot nagseserbing pampakosog sa mga kabilang sa dakulang kadaklan, na maninigong magpatalubo nin kaparehong kaisipan nin kadaihan nin takot mantang nag-aantisipar sinda nin kaligtasan durante kan pinakamaribok na panahon na aagihan kan kinaban kasuarin pa man.

18, 19. (a) Taano ta apurado an panahon na kinabubuhayan ta? (b) Taano ta dai maninigong matakot kapwa an mga linahidan asin an ibang karnero?

¹⁸ An pagsaysay kan mga aktibidad kan sadangoton na aripompon nagpapangyari sa sainda asin sa dakulang kadaklan na padagos na matakot sa tunay na Dios. Nagdatong na an oras kan saiyang paghokom, asin mahalagang marhay an natatadang panahon. Limitado na nanggad an panahon na humiro an iba. Alagad, dai niato ikinatatakot na masusudya an katuyohan nin Dios. Iyan siertong maootob!

¹⁹ An makosog na mga tingog sa langit nadangog nang nagsabi: “An kahadean kan kinaban nagin nang kahadean kan satong Kagurangnan asin kan saiyang Cristo, asin sia maghahade sagkod lamang.” (Kapahayagan 11:15) Sierto nanggad, an Dakulang Pastor, si Jehova, ginigiyahan an gabos niang karnero sa “mga dalan nin katanosan huli sa saiyang ngaran.” (Salmo 23:3) An sadangoton na aripompon daing pagsaltong ginigiyahan pasiring sa saindang langitnon na balos. Asin an ibang karnero ililigtas sa dakulang kahorasaan tanganing magkamit nin buhay na daing sagkod sa daganon na rona kan mamuraway na Kahadean nin Dios sa irarom kan paghade ni Cristo Jesus. Kaya, minsan ngani an mga tataramon ni Jesus isinabi sa sadangoton na aripompon, sierto nanggad na an gabos na lingkod nin Dios digdi sa daga igwang dahelan na maghinanyog sa saiyang mga tataramon: “Dai kamo matakot.”

Ikapaliliwanag daw Nindo?

◻ Taano ta maninigo niatong laoman na mag-iina an nawawalat pang bilang kan sadangoton na aripompon?

◻ Ano an kamugtakan kan linahidan na natatada ngonyan?

◻ Taano an mga Kristiano ta dai maninigong matakot, sa ibong kan nagdadangadang na pag-atake ni Gog nin Magog?

◻ Taano ta pambihira an paglaom na pagkabuhay liwat kan 144,000, nangorogna ngonyan?