Girumdomon an Aldaw ni Jehova

“An aldaw ni Jehova harani na sa hababang kaplanodohan kan desisyon.”​—JOEL 3:14.

1. Taano an nagdadangadang na banal na guerra na idineklarar ni Jehova ta laen man sa “banal” na mga guerra nin katawohan?

“IBALANGIBOG nindo ini, kamo banwaan, sa mga nasyon, ‘Pakangbanala an ralaban!’” (Joel 3:9) Ini daw nangangahulogan nin banal na guerra? Kun gigirumdomon an mga Krusada, relihiyosong mga guerra, asin an duwang guerra mundial​—na dian nangenot an Kakristianohan—​tibaad magtakig na kita sa takot sa pag-isip-isip sana sa “banal” na guerra. Pero, an banal na guerra sa hula ni Joel bakong guerra sa pag-oltanan nin mga nasyon. Iyan bakong pano nin pagkaongis na labanan para sa teritoryo o mga rogaring, na ginagamit na sarahotan an relihiyon. Iyan matanos na guerra. Iyan an guerra nin Dios tanganing haleon sa daga an kapasloan, iriwal, karatan, asin pan-aapi. Ibibindikar kaiyan an may diretsong soberaniya ni Jehova sa bilog na sakop kan saiyang mga linalang. Bubukasan kan guerrang iyan an dalan na an katawohan darahon kan Kahadean ni Cristo sa Milenyo nin unibersal na katoninongan, prosperidad, asin kaogmahan na ihinula kan mga propeta nin Dios.​—Salmo 37:​9-11; Isaias 65:​17, 18; Kapahayagan 20:6.

2, 3. (a) Ano an “aldaw ni Jehova” na ihinula sa Joel 3:14? (b) Taano ta maninigo sa mga nasyon an aatubangon ninda sa aldaw na iyan?

² Kun siring, ano an “aldaw ni Jehova” na ihinula sa Joel 3:14? “Herak man kan aldaw,” sabi mismo ni Jehova, “huli ta harani na an aldaw ni Jehova, asin siring sa pananamsam gikan sa Makakamhan sa gabos na Saro iyan madatong!” Paano na iyan pananamsam? Ipinaliwanag sa huri kan propeta: “Igwa nin mga kadaklan, kadaklan sa hababang kaplanodohan kan desisyon, ta an aldaw ni Jehova harani na sa hababang kaplanodohan kan desisyon.” (Joel 1:15; 3:14) Iyo ini an aldaw na gigibohon ni Jehova an saiyang hudisyal na desisyon sa daing-dios na mga kadaklan nin katawohan na nagsisikwal sa saiyang may diretsong soberaniya sa langit asin daga. Desisyon ni Jehova na halean nin mga rogaring an satanikong palakaw nin mga bagay na haloyon nang kinurapotan an katawohan.​—Jeremias 17:​5-7; 25:​31-33.

³ Kaipuhan na atubangon kan maraot na palakaw digdi sa daga an desisyon na iyan. Pero talaga daw na maraot an palakaw sa kinaban? Igo na an pagsalimbad sa rekord kaiyan! Isinabi ni Jesus an sarong prinsipyo sa Mateo 7:16: “Paagi sa saindang mga bunga mamimidbid nindo sinda.” Bako daw na an darakulang siudad kan kinaban nagin garo poso-negro nin mga droga, krimen, makuring takot, inmoralidad, asin polusyon? Sa dakol na kadagaan an bagong kamtan na mga katalingkasan napopogolan nin politikal na karibarawan, kakulangan sa pagkakan, asin kadukhaan. Labing sarong bilyon katawo an haros nagkukulang sa pagkakan. Saro pa, an epidemya nin AIDS, na pinagagrabe nin droga asin inmoral na pamumuhay, nagtatao nin dakulang kamondoan sa dakulang kabtang kan daga. Partikularmente poon kan pumutok an Guerra Mundial I kan 1914, ruminaot na an gabos na parte nin buhay sa bilog na kinaban.​—Ikomparar an 2 Timoteo 3:​1-5.

4. Ano an angat ni Jehova sa mga nasyon?

⁴ Minsan siring, tinitipon ni Jehova hale sa gabos na nasyon an sarong banwaan na maogmang nag-aako nin pagtotokdo manongod sa saiyang mga dalan asin naglalakaw sa saiyang mga dana. An banwaan na ini na lakop sa bilog na globo ginibo nang mga tarom nin arado an mga minasbad, na tinatalikdan an madahas na mga gibo kan kinaban. (Isaias 2:​2-4) Iyo, ginibong tarom nin arado an mga minasbad! Alagad ta bako daw na ini an kabaliktaran kan kurahaw na ipinababalangibog ni Jehova sa Joel 3:​9, 10? Dian satong mababasa: “Ibalangibog nindo ini, kamo banwaan, sa mga nasyon, ‘Pakangbanala an ralaban! Pukawa an makokosog! Paraniha sinda! Pasakata sinda, an gabos na lalaking parapakilaban! Giboha nindong minasbad an saindong mga tarom nin arado asin garod an saindong mga sanggot.’” A, digdi inaangat ni Jehova an mga hade sa kinaban na ilaban sa saiya an pinag-iriba nindang hukbo sa Armagedon. Pero dai sinda manggagana! Sinda biyong madadaog!​—Kapahayagan 16:16.

5. Ano an ibubunga kun anihon na an “poon nin ubas kan daga”?

⁵ Bilang paglaban sa Soberanong Kagurangnan na Jehova, an makapangyarihan na mga namomoon naggibo nin makatatakot na mga armas​—alagad ta sayang sana! Nagboot si Jehova sa Joel 3:13: “Tigpasan an kagot, ta hinog na an anihon. Madia kamo, hilig kamo, ta an ligisan nin arak pano na. Naglilipwas an mga tangke kan ligisan; huli ta dakol an saindang karatan.” An mga tataramon na iyan nakaaagid sa Kapahayagan 14:​18-20, na dian an sarong anghel na may kapot na matarom na kagot pinagbotan na “gunoa an mga bagikoy kan poon nin ubas kan daga, ta hinog na an mga ubas kaiyan.” Itinigpas kan anghel an saiyang kagot asin ihinolog an nakikilaban na mga nasyon na idto “sa dakulang ligisan kan kaanggotan nin Dios.” Sa piguratibong paagi, an dugo nagluwas sa ligisan sagkod sa mga busal kan mga kabayo, sa rayong 1,600 na estadio​—mga 300 kilometros! Makatatakot nanggad na ngapit para sa mga nasyon na naglalapastangan ki Jehova!

Mga Siudadanong Makinuyog sa Ley

6. Ano an pagheling kan mga Saksi ni Jehova sa mga nasyon asin sa mga namomoon dian?

⁶ Ini daw nangangahulogan na an mga Saksi ni Jehova daing galang sa mga nasyon asin sa mga namomoon dian? Dai man! Sainda sanang ipinagmomondo an karatan na malinaw na naheheling nin gabos, asin sinda nagpapatanid manongod sa marikas an pagdangadang na aldaw ni Jehova para sa pag-otob kan saiyang desisyon. Kadungan kaiyan, mapakumbaba nindang kinukuyog an pagboot ni apostol Pablo sa Roma 13:1: “An lambang kalag magpasakop sa haralangkaw na kapangyarihan.” Sa mga namomoon na tawong ini, sinda nagtatao nin maninigong onra pero bakong pagsamba. Bilang mga siudadanong makinuyog sa ley, sinusunod ninda an mga pamantayan kan Biblia sa pagkasadiosan, pagtaram nin katotoohan, asin kalinigan saka tinotokdoan nin marahay na moral an sadiri nindang pamilya. Tinatabangan ninda an iba na makanood kun paano man ninda ini magigibo. Sinda namumuhay na may pakipagkatoninongan sa gabos na tawo, na dai nakilalabot sa mga demonstrasyon o politikal na rebolusyon. An mga Saksi ni Jehova naghihingoang magin arogan sa pagkuyog sa mga ley kan mga tawong haralangkaw na kapangyarihan, mantang hinahalat ninda an Supremong Kapangyarihan, an Soberanong Kagurangnan na Jehova, na ibalik an sangkap na katoninongan asin matanos na gobyerno sa dagang ini.

Pag-otob kan Saiyang Desisyon

7, 8. (a) Sa anong paagi na an mga nasyon magkukunogkunog asin madiklom? (b) Siisay an ilinaladawan ngonyan ni Joel, asin bakong arog kan kinaban sa kagabsan, paano binibendisyonan an mga ini?

⁷ Sa buhay na piguratibong pagtaram, itinatao ni Jehova an dugang pang paglaladawan na ini sa pag-otob sa saiyang desisyon: “An aldaw asin bulan madiklom, asin an mismong mga bitoon hahaleon an saindang liwanag. Asin hale sa Sion si Jehova mag-uungal, asin hale sa Jerusalem ipadadangog nia an saiyang tingog. Asin magkukunogkunog an langit asin daga; alagad ta si Jehova magigin pailihan kan saiyang banwaan, asin kuta para sa mga aki ni Israel.” (Joel 3:​15, 16) An garo baga maliwanag, maasensong kamugtakan nin katawohan magigin madiklom, purisaw, asin an nagkakaburulagbulag na palakaw na ini sa kinaban magkukunogkunog sagkod na mapara, na garo linaglag nin makosog na linog!​—Haggeo 2:​20-22.

⁸ Mangnoha an maogmang panuga na si Jehova magigin pailihan asin kuta kan saiyang banwaan! Taano? Huli ta sinda sana an banwaan​—internasyonal na banwaan—​na nagkuyog sa mga tataramon ni Jehova: “Kamo makamimidbid na ako si Jehova na saindong Dios.” (Joel 3:17) Mantang an ngaran ni Joel nangangahulogan “Si Jehova Dios,” angay na sia naglaladawan sa linahidan na mga Saksi ni Jehova sa modernong mga panahon, na mapusong naglilingkod sa pagbalangibog kan soberaniya ni Jehova. (Ikomparar an Malaquias 1:11.) Sa pagheling sa enot na mga tataramon kan hula ni Joel, maheheling niato kun paano nia buhay na ihinula an aktibidad kan banwaan nin Dios ngonyan.

Kaburonyogan nin mga Doron

9, 10. (a) Anong damat an ihinula ni Joel? (b) Paano inotro kan Kapahayagan an hula ni Joel manongod sa sarong damat, asin ano an epekto kan damat na ini sa Kakristianohan?

⁹ Dangoga ngonyan “an tataramon ni Jehova na uminabot ki Joel”: “Dangoga nindo ini, kamagurangan na lalaki, asin paghinanyog kamo, gabos na mga nag-eerok sa daga. Nangyari daw ini sa saindong kaaldawan, o kun baga man sa kaaldawan kan saindong mga apoon? Dapit kaini mag-osip kamo sa saindong mga aki, asin an saindong mga aki sa saindang mga aki, asin an saindang mga aki sa minasunod na kapag-arakian. Si natada kan lipay, kinakan kan doron; asin si natada kan doron, kinakan kan nagkakanap, daing pakpak na doron; asin si natada kan nagkakanap, daing pakpak na doron, kinakan kan kuratsa.”​—Joel 1:​1-4.

¹⁰ Ini daing kaagid na kampanya, saro na gigirumdomon sagkod lamang. An daga lalaglagon nin sunod-sunod na pagsalakay nin mga insekto, nangorogna nin mga doron. Ano an boot sabihon kaini? An Kapahayagan 9:​1-12 nagtataram man manongod sa damat na mga doron, na isinugo ni Jehova sa pangengenot nin “sarong hade, an anghel kan bungaw,” na daing iba kundi si Cristo Jesus. An ngaran niang Abaddon (Hebreo) asin Apollyon (Griego) nangangahulogan “Kalaglagan” asin “Paralaglag.” An mga doron na ini naglaladawan sa linahidan na natatada nin mga Kristiano na, ngonyan sa aldaw kan Kagurangnan, minaabante sa panraot sa mga sabsaban kan Kakristianohan paagi sa biyong pagbuyagyag sa falsong relihiyon asin pagbalangibog kan pagbalos dian ni Jehova.

11. Paano tinatabangan an modernong mga doron na ini, asin sa partikular siisay an pinatatamaan kan saindang mga pagsalakay?

¹¹ Arog kan ipinaheheling kan Kapahayagan 9:​13-21, an damat na mga doron susundan nin dakulang damat na hukbo nin mga parakabayo. Totoong gayo ini ngonyan, mantang an pirang ribong natatadang linahidan na mga Kristiano tinatabangan nin labing apat na milyon na “ibang karnero” na magkaiba minakompuwesto sa sarong dai malabanan na hukbo nin mga parakabayo! (Juan 10:16) Nagsasararo sinda sa pagbalangibog kan malanit na mga paghokom ni Jehova sa mga parasamba sa ladawan kan Kakristianohan asin sa mga ‘habong pagsolsolan an saindang mga paggadan o an saindang espiritistikong mga gibo o an saindang pakikisaro o an saindang mga paghabon.’ An klero​—kapwa Katoliko asin Protestante—​na aktibong nagsuportar sa mapangadan na mga guerra sa siglong ini, saka an mga pading paralugos nin mga aki asin maraot na mga ebanghelista sa TV, kabilang sa pinatatamaan kan mga mensaheng ini nin paghokom.

12. Taano an mga namomoon sa Kakristianohan ta maninigong mag-ako nin mga mensahe nin paghokom, asin ano an madali nang mangyari sa sainda, kaiba an gabos na miembro nin Dakulang Babilonya?

¹² Sa marigsok na mga klerigong iyan, nag-aaningal an pangapodan ni Jehova: “Pagmata kamo, mga paraburat, asin pagtangis kamo; asin pangag-ungal kamo, gabos na mga parainom nin arak, huli sa mahamis na arak, huli ta iyan hinale sa saindong ngoso.” (Joel 1:5) Sa ika-20 siglong ini, isinalida kan relihiyon nin Kakristianohan an pagkakonsintidor kan kinaban sa maraot sa malinig na moral na mga prinsipyo kan Tataramon nin Dios. Garo mahamis sa falsong relihiyon asin sa mga parasimba dian an pag-inom sa mga dalan kan kinaban, pero an inani ninda kanigoan na espirituwal asin pisikal na helang! Sa dai na mahahaloy, arog kan sinasabi sa Kapahayagan 17:​16, 17, magigin “kaisipan” nin Dios na an politikal na mga kapangyarihan birikon an bilog na pankinaban na imperyo nin falsong relihiyon, an Dakulang Babilonya, asin laglagon sia. Sa panahon sanang iyan, mantang pinagheheling nia na an desisyon ni Jehova inootob tumang sa saiya, na sia ‘mapapagmata’ sa kaburatan nia.

“Sarong Banwaan na Dakula Asin Makosog”

13. Sa anong paagi na an kaburonyogan nin doron garo “dakula asin makosog” sa pagheling kan Kakristianohan?

¹³ Dangan ilinadawan kan propeta ni Jehova na an kaburonyogan nin doron “sarong banwaan na dakula asin makosog,” sa pagheling kan Dakulang Babilonya. (Joel 2:2) Halimbawa, an klero kaiyan nag-aagrangay na an mga relihiyon nin Kakristianohan dai nakakua nin mga nakombertir sa Budhistang Hapon. Pero, ngonyan, binuburunyogan nin labing 160,000 na Hapon na mga Saksi ni Jehova an nasyon na iyan asin pinangengenotan an personal na pag-adal sa Biblia sa labing 200,000 na harong kan mga tawo. Sa Italia an 180,000 na mga Saksi ni Jehova ngonyan minimidbid na segunda na sa Katoliko sa kabilangan. Daing nangyari sa agrangay nin sarong monsenyor na Romano Katoliko sa Italia manongod sa bagay na kinukua kan mga Saksi ni Jehova sa iglesya an ‘kisuerra 10,000 na maimbod na Katoliko’ kada taon.a An mga Saksi naoogmang akoon an siring na mga tawo.​—Isaias 60:​8, 22.

14, 15. Paano ilinaladawan ni Joel an kaburonyogan nin doron, asin sa anong paagi ini naotob ngonyan?

¹⁴ Sa paglaladawan sa kaburonyogan nin mga doron na linahidan na mga Saksi, an Joel 2:​7-9 nagsasabi: “Siring sa pusuan na mga lalaki sinda madaralagan. Siring sa mga parapakilaban sinda masarakat sa lanob. Asin an balang saro malakaw sa saiyang mga dalan, asin dai sinda nagsusurukisuki sa saindang mga dalan. Asin an kada saro dai nagtuturuludan. Siring sa makosog na tawo sa saiyang dalan, padagos sindang nag-aabante; asin kun may nagkapirang mapukan sa mga bosog, an iba dai minapondo. Maduruman sinda sa siudad. Madaralagan sinda sa lanob. Masarakat sinda sa mga harong. Maaragi sinda sa mga bintana na siring sa parahabon.”

¹⁵ Buhay na pagkaladawan nanggad sa hukbo nin linahidan na mga “doron,” na ngonyan inibanan nin labing apat na milyon na kairiba, an ibang karnero! Mayo nin “lanob” nin relihiyosong pakikiiwal an makaoolang sa mga ini. Mapuso, sinda ‘padagos na naglalakaw na husay sa iyo man sanang paagi’ nin pagpatotoo sa publiko asin iba pang Kristianong aktibidad. (Ikomparar an Filipos 3:16.) Imbes na makikompromiso, andam sindang atubangon an kagadanan, arog kan rinibong Saksi na ‘napukan sa mga bosog’ ta habo nindang omawon an Katolikong Hitler kan Nazing Alemania. An kaburonyogan nin mga doron nagtao nin lubos na patotoo sa “siudad” nin Kakristianohan, na sinasakat an gabos na kaolangan, na garo nakalalaog siring sa parahabon sa mga harong mantang ikinawaras ninda an binilyon na babasahon sa Biblia paagi sa saindang pagharongharong. Kabotan ni Jehova na ikatao an patotoong ini, asin mayo nin kapangyarihan sa langit o sa daga na makaoolang kaiyan.​—Isaias 55:11.

“Nagkaparano nin Banal na Espiritu”

16, 17. (a) Kasuarin nagkaigwa nin pambihirang kaotoban an mga tataramon kan Joel 2:​28, 29? (b) Anong makahulang mga tataramon ni Joel an dai lubos na naotob kan enot na siglo?

¹⁶ Sinasabihan ni Jehova an saiyang mga Saksi: “Mamimidbid nindo na ako nasa tahaw nin [espirituwal na] Israel, asin na ako si Jehova na saindong Dios asin mayo na nin iba.” (Joel 2:27) An mahalagang pagkamidbid na ini nakamtan kan saiyang banwaan kan ponan na otobon ni Jehova an saiyang mga tataramon sa Joel 2:​28, 29: “Mangyayari na ibububo ko an sakong espiritu sa gabos na klase nin laman, asin an saindong mga aking lalaki asin an saindong mga aking babae maghuhurula.” Nangyari ini kan Pentecostes 33 C.E., kan an tiripon na disipulo ni Jesus linahidan “asin sinda gabos nagkaparano nin banal na espiritu.” Sa kapangyarihan kan banal na espiritu, sinda naghulit, asin sa saro sanang aldaw, “mga tolong ribong kalag an nakadugang.”​—Gibo 2:​4, 16, 17, 41.

¹⁷ Sa maogmang okasyon na idto, kinotar man ni Pedro an Joel 2:​30-32: “Matao ako nin mga ngangalasan sa kalangitan asin sa daga, dugo asin kalayo patin mga hariging aso. An aldaw magigin kadikloman, asin an bulan magigin dugo, bago an pagdatong kan dakula asin makatatakot na aldaw ni Jehova. Asin mangyayari na an gabos na mag-arang sa ngaran ni Jehova makaliligtas.” An mga tataramon na iyan nagkaigwa nin parsial na kaotoban kan laglagon an Jerusalem kan 70 C.E.

18. Kasuarin nagpoon na mangyari an mas dakulang kaotoban kan Joel 2:​28, 29?

¹⁸ Pero, magkakaigwa nin dugang pang aplikasyon an Joel 2:​28-32. An totoo, an hulang ini nagkaigwa nin pambihirang kaotoban poon kan Setyembre 1919. Kan panahon na idto ginibo an dai malilingawan na kombension kan banwaan ni Jehova sa Cedar Point, Ohio, E.U.A. Malinaw na yaon an espiritu nin Dios, asin an saiyang linahidan na mga lingkod napahirong gibohon an panglobong paghuhulit na nagpapadagos sagkod sa presenteng aldaw. Kanigoan kadakulang pag-oswag an ibinunga! An labi sa 7,000 na nag-atender sa kombension na idto sa Cedar Point nagin nang 10,650,158 na nag-atender sa Memorial kan kagadanan ni Jesus kan Marso 30, 1991. Sa mga ini, 8,850 sana an nagsasabing linahidan na mga Kristiano. Kanigoan an kagayagayahan kan gabos na ini sa pakaheling sa panglobong bunga na pinaluwas kan dinamikong espiritu ni Jehova!​—Isaias 40:​29, 31.

19. Huli sa kaharanihan kan aldaw ni Jehova, ano an maninigong magin kaisipan kan lambang saro sa sato?

¹⁹ Nasa eroenotan na sana “an pagdatong kan dakula asin makatatakot na aldaw ni Jehova” na malaglag sa palakaw nin mga bagay ni Satanas. (Joel 2:31) Makaoogma, “an lambang nag-aapod sa ngaran ni Jehova maliligtas.” (Gibo 2:21) Paano? Sinasabi sato ni apostol Pedro na “an aldaw ni Jehova madatong siring sa parahabon” dangan idinugang: “Mantang an gabos na bagay na ini tutunawon nin siring, kamo maninigong magin anong klaseng mga tawo sa banal na mga gawe asin gibo nin diosnon na debosyon, na naghahalat asin naggigirumdom sa presensia kan aldaw ni Jehova.” Ginigirumdom na harani na an aldaw ni Jehova, maggagayagaya man kita na maheling an kaotoban kan panuga ni Jehova na matanos na “bagong kalangitan asin sarong bagong daga.”​—2 Pedro 3:​10-13.

[Nota sa Ibaba]

Ikapaliliwanag daw Nindo?

◻ Ano an “aldaw ni Jehova”?

◻ Paano aanihon an “poon nin ubas kan daga,” asin taano?

◻ Sa anong paagi na an damat nin mga doron nagpasakit sa Kakristianohan poon kan 1919?

◻ Paano ibinubo an espiritu ni Jehova sa saiyang banwaan kan 33 C.E., dangan kan 1919?