An Pagbaklay Pasiring sa Betlehem

Bako sanang si Maria asin Jose an nagbabaklay. Nagboot pa sana si Cesar Augusto na magkaigwa nin rehistrasyon sa nasyon, asin kaipuhan na an mga tawo magbaklay pasiring sa saindang ginikanan na banwaan bilang pagsunod. Ano an nagin reaksion ni Jose? An salaysay nagsasabi: “Siempre, si Jose nagtukad man hale sa Galilea, hale sa siudad nin Nazaret, pasiring sa Judea, sa siudad ni David, na inaapod na Betlehem, dahelan sa saiyang pagigin miembro kan kamag-anakan asin pamilya ni David.”​—Lucas 2:1-4.

Bakong nagkanorongod sana na sa panahon na ini nagpaluwas nin dekreto si Cesar. Sarong hula na isinurat mga pitong siglo bago kaini an nagsabi na mamumundag an Mesiyas sa Betlehem. Nangyari kaidto na igwa nin sarong banwaan na an ngaran Betlehem na 11 kilometros sana an rayo sa Nazaret. Minsan siring, malinaw na sinabi kan hula na mamumundag an Mesiyas sa “Betlehem Efrata.” (Miqueas 5:2) Ngonyan, mga 150 kilometros na kabubuldan an rayo kan Nazaret sa sadit na baryong iyan sa timog. Iyan an Betlehem na kaipuhan na dumanan ni Jose, huling iyan an istaran kan mga apoon ni Hadeng David​—an pamilya na kinabibilangan ni Jose sagkod kan saiyang agom.

Ano pa daw an nagmotibar ki Maria na kumuyog? Aram daw nia an hula manongod sa Betlehem bilang an lugar na duman mamumundag an Mesiyas? Daing sinasabi an Biblia. Posible na aram nia an manongod sa hula, huling minalataw na an bagay na iyan aram kan gabos na namomoon sa relihion asin dawa kan mga tawo sa pangkagabsan. (Mateo 2:1-7; Juan 7:40-42) Kun mapadapit sa Kasuratan, may kaaraman dian si Maria. (Lucas 1:46-55) Ano man an dahelan, baga man si Maria nagdesisyon na magbaklay tanganing kuyogon an saiyang agom, an sekular na pagboot, o an mismong hula ni Jehova​—o huli sa kombinasyon kan mga iyan—​sia nagtao nin marahayon na halimbawa. Pinapahalagahan na marhay ni Jehova an pagigin mapakumbaba asin makinuyog nin mga lalaki sagkod babae. Sa panahon niato, na an pagpapasakop sa parate garo baga saro sa moral na mga karahayan na dai pinapahalagahan, an halimbawa ni Maria nakakaparigon sa boot para sa maimbod na mga tawo sa gabos na lugar.