Humale sa Lugar nin Peligro!

TRABAHO nin mga bulkanologo na mag-obserbar asin ebalwaron an ebidensia dangan magpatanid manongod sa maabot na mga pagtuga nin bulkan. (Kan tumuga na an Bukid nin Fugen, kinaipuhan kan mga pulis na pahaleon an mga tawo sa lugar nin peligro.) Kaagid kaiyan, inoobserbaran kan mga estudyante sa Biblia an tanda “kan pagtatapos kan sistema nin mga bagay” asin pinatatanidan an iba dapit sa nagdadangadang na peligro.—Mateo 24:3.

Sa iyo man sanang kapitulo kan Biblia na nagpapatanid manongod sa nagdadangadang na grabeng kapahamakan na lakop sa globo, mababasa ta an paglaladawan na ini kan enot na mga pangyayari: “An nasyon matindog tumang sa nasyon asin an kahadean tumang sa kahadean, asin magkakaigwa nin mga kakulangan nin kakanon asin mga linog sa surunodsunod na lugar. . . . Dakol na falsong propeta an malataw asin ilalagalag an dakol; asin huli sa pag-orog nin katampalasanan an pagkamoot nin dakol malipot. . . . Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:7-14.

Dai na kita kaipuhan na magin paraanalisar nin mga bareta tanganing mamansayan an presenteng kaotoban kan hulang ini. Nangorogna poon kan 1914, naeksperyensiahan na niato iyan. An siglong ini nag-agi nin duwang guerra mundial, dakol na guerra sibil, lokal na guerra, asin iriwal nin rasa asin relihion. An katawohan nag-agi nin mga kakulangan nin kakanon bilang resulta kan mga guerrang iyan, apuera sa mga kakulangan sa ikabubuhay na bunga kan natural na mga kalamidad. Dakol na buhay an hinalon nin mga linog. Nagburutwa an mga kulto na dudoso an mga lider asin panatiko an mga parasunod. An “pag-orog nin katampalasanan” irinayo an mga tawo sa pagpaheling nin pagkamoot, asin an pakikipagkapwa-tawo bako nang uso.

An pambilog na kinaban na paghuhulit, na saro pang aspekto kan tanda, tunay nanggad na nagigibo. Balikan na sana nindo an tutob kan magasin na ini, asin maheheling nindo an mga tataramon na “Nagpapahayag kan Kahadean ni Jehova” bilang kabtang kan titulo. An Torrengbantayan, na ipinupublikar sa 132 na tataramon asin may sirkulasyon na labi sa 22 milyones, sarong mayor na instrumento para sa mga nagpapahayag kan “maogmang baretang ini kan kahadean” sa bilog na ineerokan na daga. Kabale sa maogmang bareta na iyan an mensahe na an Kaglalang kan uniberso, si Jehova Dios, pinatindog na an langitnon na Kahadean na malaglag sa maraot na sistema nin mga bagay asin mapangyari nin paraiso digdi sa daga. Tunay nanggad, an tanda na an Dios madali nang humiro risang-risa na ngonyan, na nagpapaheling na nasa peligro an buhay nin mga tawo na yaon sa sistemang ini nin mga bagay.​—Ikomparar an 2 Timoteo 3:​1-5; 2 Pedro 3:​3, 4; Kapahayagan 6:​1-8.

An Makangingirhat na Aldaw ni Jehova

Ano an mangyayari kun panahon nang maghokom nin biyo si Jehova? Hinanyoga an saiya mismong klarong paglaladawan kan mangyayari sa panahon na iyan: “Matao ako nin mga ngangalasan sa kalangitan asin sa daga, dugo asin kalayo patin mga hariging aso. An aldaw mismo magigin kadikloman, asin an bulan magigin dugo, bago an pagdatong kan dakula asin makangingirhat na aldaw ni Jehova.”—Joel 2:30, 31.

An aldaw na iyan, na orog na makatatakot asin mapanlaglag kisa ano man na lokal na pagtuga nin bulkan o linog, madali na. Si propeta Sofonias nagsasabi: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan. . . . Paagi sa kalayo kan saiyang kaigotan an bilog na daga matototong, huli ta magibo sia nin pagpoho, nin totoong gayong makangingirhat, sa gabos na nag-eerok sa daga.” Minsan ngani “an saindang pirak o an saindang bulawan dai makapagliligtas sa sainda sa aldaw kan kabangisan ni Jehova,” igwa nin paagi na makaligtas sa makangingirhat na aldaw na iyan.—Sofonias 1:14-18.

Ipinaheheling kun paano, si Sofonias nagsasabi: “Bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga . . . Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” (Sofonias 2:2, 3) Makapaiili kita paagi sa ‘paghanap ki Jehova, paghanap nin katanosan, asin paghanap nin kahoyoan.’ Sairisay ngonyan an naghahanap ki Jehova?

Daing duda na ikinokonektar nindo an tataramon na “Jehova” sa Mga Saksi ni Jehova huli sa saindang paghuhulit. Tibaad inako nindo an magasin na ini sa saro sa sainda. Sinda midbid bilang may moral na mga siudadano na namumuhay nin tanos. Sinda naghihingoa na magsolog nin “bagong personalidad,” na kabale an pagpatalubo nin kahoyoan. (Colosas 3:8-10) Ini, inaadmitir ninda, resulta kan pagigin tinotokdoan kan naheheling na organisasyon ni Jehova, na sa bilog na daga irinerepresentar kan lokal na mga kongregasyon kan Mga Saksi ni Jehova. Iyo, makapaiili kamo kaiba kan ‘bilog na kasararoan nin mga tugang’ sa tahaw kan Mga Saksi ni Jehova sa bilog na kinaban.—1 Pedro 5:9.

Magpaili na Ngonyan

Tanganing makapaili paagi sa paghanap ki Jehova, kita kaipuhan na magin saiyang katood. Ano an kalabot dian? An Biblia minasimbag: “Dai nindo naaaraman na an pakikikatood sa kinaban pakikienemigo sa Dios? An siisay man, kun siring, na boot na magin katood kan kinaban ginigibo an saiyang sadiri na enemigo nin Dios.” (Santiago 4:4) Tanganing magin katood nin Dios, dapat na haleon niato sa satong sadiri an ano man na emosyonal na pagkamuya sa presenteng maraot na kinaban, na midbid sa pagkaigwa nin rebeldeng aktitud sa Dios.

Sinasadol kita kan Biblia: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban​—an mawot kan laman asin an mawot kan mga mata asin an pagpaabaw-abaw kan kaya sa buhay—​bakong gikan sa Ama, kundi gikan sa kinaban. Apuera kaini, an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:15-17) An kadaklan na tawo ngonyan motibado nin mga mawot nin laman—daing kontrol na hilig sa sekso, mahanab na paghanap nin kuarta, asin mapan-abusong paggamit nin kapangyarihan. Alagad tanganing mapasa kampi ni Jehova, dapat na haleon nin saro an siring na mga kamawotan.​—Colosas 3:​5-​8.

Tibaad sa panapanahon nababasa nindo an magasin na ini, asin tibaad oyon kamo sa pag-aplikar kaiyan kan mga hula sa Biblia. Pero, tibaad nagduduwaduwa kamo na gibohon an orog pang lakdang na pag-asosyar sa Mga Saksi ni Jehova. Minsan siring, kun kita napapaatubang sa sarong kalamidad, igo na daw na basta sana dangogon an patanid? Siring kan maheheling niato sa nangyari sa pagtuga kan Bukid nin Fugen, kita kaipuhan na humiro oyon sa patanid. Girumdomon, kisuerra 15 parabareta asin retratista na desididong kumua nin interesanteng impormasyon an nagadan. Sa katunayan, an sarong retratista nagadan na an saiyang moro yaon pa sa shutter kan saiyang kamera. An sarong bulkanologo—na nagsabing, “Kun sarong aldaw ako magagadan, gusto ko na mangyari iyan sa gilid nin bulkan”—nagadan sono sa pinagmawot nia. Sinda gabos dusay sa saindang trabaho asin sa saindang mga okupasyon. Pero, ibinayad ninda an saindang buhay—an karibay kan pagpalimanliman sa patanid.

Dakol ngonyan an nakadadangog kan mensahe manongod sa desisyon nin Dios na laglagon an maraot na sistemang ini nin mga bagay asin nakamamansay, minsan paano, sa pagigin balido kan patanid. ‘Puedeng dumatong iyan pag-abot nin panahon,’ an tibaad irason ninda, ‘alagad bako ngonyan na aldaw.’ Idinigson ninda nin kombenyente an aldaw ni Jehova tanganing dai sinda madisturbo sa garo baga mas importante sa pagheling ninda sa presente.

Iyan an nagin problema ni Baruc. Mantang sia an sekretaryo kan suanoy na propetang si Jeremias, si Baruc makosog an boot na nagpatanid sa mga Israelita dapit sa nagdadangadang na kalaglagan nin Jerusalem. Pero, sarong beses nalangkag sia sa sugo sa saiya. Sa puntong iyan, itinanos sia ni Jehova: “Kun para sa saimo, nagpaparahanap ka nin darakulang bagay para sa saimo man sana. Dai ka magparahanap.” Baga man iyan kayamanan, pagkaprominente, o materyal na seguridad, si Baruc dai dapat na ‘maghanap nin darakulang bagay para sa saiya man sana.’ Sia dapat na interesado sa sarong bagay, an paggibo kan kabotan nin Dios na tabangan an mga tawo na manindogan sa Saiyang kampi. Bilang resulta, aakoon nia an ‘saiyang kalag bilang sinamsaman.’ (Jeremias 45:1-5) Kaagid kaiyan, imbes na ‘maghanap nin darakulang bagay para sa sato man sana,’ maninigo na hanapon ta si Jehova, na puedeng magresulta sa pagkaligtas kan sato mismong buhay.

Sa Bukid nin Fugen, labing sarong dosenang pulis asin boluntaryong bombero an nasa oras nin trabaho kan tamaan sinda kan grabe kainit na itinuga kan bulkan. Hinihingoa ninda na tabangan asin protehiran an mga tawong namemeligro. Kapareho sinda nin mga lalaki asin babaeng may marahay na intension na bangkag sa pagparahay sa kamugtakan kan kinaban na ini. Pero gurano man kanoble kan saindang motibo, “an ginibong biko dai ikatatanos.” (Eclesiastes 1:15) An bikong sistema nin mga bagay dai puedeng itanos. Makatanosan daw na gibohon nin saro an saiyang sadiri na “katood kan kinaban” paagi sa paghingoang isalbar an sarong pambilog na kinaban na sistema na desidido an Dios na paraon?

Oras na Nakadulag Na Kamo, Magdanay na Harayo

Madali sana an dumulag sa namemeligrong sistema, alagad iba nang orolay an magdanay sa nagpoprotehir na pangangataman kan “bilog na kasararoan nin mga tugang.” (1 Pedro 2:17) Dai niato paglingawan an mga paraoma na, pakatapos na eebakwit, nagbaralik tanganing helingon an saindang oma harani sa Bukid nin Fugen. Posible na gustong-gusto ninda na bumalik sa “normal” na buhay na kinatodan ninda. Alagad narerealisar nindo na bakong madonong an saindang desisyon na bumalik. Tibaad bako idto an enot na pagprobar ninda na lumaog sa lugar nin peligro. Tibaad naglaog sinda sa peligrosong lugar sa laog sana nin kadikit na panahon asin mayo nin ano man na nangyari. Kan sumunod, tibaad naglaog sinda nin mas harohalawig, asin mayo pa man giraray nin nangyari. Posible na dai nahaloy natuod sinda sa pagbalyo sa nagpoprotehir na lugar asin dai na natakot na maghaloy sa namemeligrong lugar.

Si Jesu-Cristo may sinambit na kaparehong situwasyon na mangyayari durante “kan pagtatapos kan sistema nin mga bagay.” Sia nagsabi: “Kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.”—Mateo 24:3, 38, 39.

Mangnoha na nasambitan ni Jesus an pagkakan, pag-inom, asin pag-agom. Mayo nin sala sa mismong mga bagay na iyan sa pagheling ni Jehova. Ano kun siring an sala? An mga tawo kan kaaldawan ni Noe ‘dai nagmangno,’ na an pamumuhay nakasentro sa saindang regular na pinagkatodan. Sa oras nin emerhensia, an saro dai puedeng mamuhay nin “normal.” Oras na kamo duminulag, o suminiblag, sa presenteng kinaban na seguradong malalaglag, dapat nindong labanan an ano man na kamawotan na bumalik tanganing aprobetsaran an ano man na makukua dian. (1 Corinto 7:​31) Tibaad mahimo nindo na maglagawlagaw sa luwas kan lugar na ligtas sa espirituwal asin bumalik na dai naano na mayo ngani nin siisay man na nakariparo kaiyan. Minsan siring, posible na mahahale kaiyan an saindong takot asin magreresulta sa pagbalik giraray nindo sa kinaban, na orog na naghahaloy dian. Dai mahahaloy matalubo an aktitud na ini: “An katapusan dai pa madatong ngonyan na aldaw.”

Siring man, isip-isipa an tolong tsuper nin taksi na nagadan na naghahalat sa mga parabareta asin retratista kan uminulakbo paibaba sa bakilid an itinuga kan bulkan. An nagkapira ngonyan tibaad umiba sa iba na nangahas na bumalik sa kinaban. Ano man an rason, malinaw na bakong bawi an peligrong itatao kan pagigin naaagyat na bumalik sa peligrosong lugar.

An gabos na biktima kan pagtuga kan Bukid nin Fugen luminuwas sa ligtas na lugar asin luminaog sa lugar nin peligro. Minsan ngani linaoman ninda na maabot an panahon na matuga an bukid, mayo ni saro na nag-isip na iyan mangyayari kan aldaw na iyan. Paagi sa pag-obserbar sa tanda kan pagtatapos kan sistema nin mga bagay, dakol an naglalaom na an aldaw ni Jehova madatong sa maabot na panahon alagad posible na bakong madali na. An nagkapira naghohona pa ngani na an aldaw na iyan nungkang “ngonyan na aldaw.” An siring na aktitud tunay nanggad na peligroso.

“An aldaw ni Jehova madatong siring sa parahabon,” an patanid ni apostol Pedro. Kaipuhan kitang magin mapagbantay, “na hinahalat asin pinapagdadanay na harani sa isip an presensia kan aldaw ni Jehova,” na ginigibo an satong ‘bilog na makakaya na sa katapustapusi makua niang daing digta asin dai nin kanawayan patin nasa katoninongan.’ (2 Pedro 3:10-14) Pakalaglaga kan presenteng maraot na sistema nin mga bagay, sarong paraisong daga na sakop kan Kahadean nin Dios an naghahalat. Nungka logod kitang matentaran na magprobar na lumaog sa lugar nin peligro huli sa ano man na tibaad irason kan satong isip, huling an aldaw na kita bumalik sa kinaban puedeng iyo man an aldaw ni Jehova.

Magpaili kaiba kan banwaan ni Jehova asin magdanay sa kaibanan ninda.

[Mga Ritrato sa pahina 7]

Magpaili kaiba kan banwaan ni Jehova asin magdanay sa kaibanan ninda

[Picture Credit Line sa pahina 4]

Iwasa/Sipa Press