Siisay an Makaliligtas sa “Panahon nin Kasakitan”?

“An gabos na mag-arang sa ngaran ni Jehova makaliligtas.”​—JOEL 2:32.

1. Sono ki Daniel asin Malaquias, ano an mga kuwalidad kan mga nalilinyang maligtas sa nagdadangadang na “panahon nin kasakitan”?

SA PAGTANAW sa satong kaaldawan, si propeta Daniel nagsurat: “Mangyayari an panahon nin kasakitan na dai pa nangyari poon na magkaigwa nin nasyon sagkod sa panahon na iyan. Asin sa panahon na iyan an saimong banwaan maliligtas, an lambang saro na nasusurat sa libro.” (Daniel 12:1) Nakararanga nanggad na mga tataramon! An inoyonan na banwaan ni Jehova gigirumdomon nia, arog kan sabi man kan Malaquias 3:16: “Sa panahon na iyan idtong mga nagkakatarakot ki Jehova nag-orolay-olay, an lambang saro sa saiyang kaibanan, asin si Jehova padagos na nagdangog asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.”

2. Ano an ibinubunga kan paghorophorop sa ngaran ni Jehova?

² An paghorophorop sa ngaran ni Jehova nagbubunga nin tamang kaaraman manongod sa saiya, sa saiyang Cristo, asin sa gabos niang makangangalas na katuyohan sa Kahadean. Kaya, an saiyang banwaan nakanonood na igalang sia, lumaog sa dayupot na dusay na relasyon sa saiya, asin kamotan sia ‘sa bilog nindang puso asin sa bilog nindang pakasabot asin sa bilog nindang kosog.’ (Marcos 12:33; Kapahayagan 4:11) Ginibo ni Jehova an maheherakon na probisyon, paagi sa atang ni Jesu-Cristo, na an mga mahoyo sa daga makanompong nin buhay na daing katapusan. Kaya, puwede nindang otrohon na may pagsarig an isinabi kan langitnon na hukbo na nag-omaw sa Dios kaidtong mamundag si Jesus, na sinasabi: “Kamurawayan sa Dios sa kaitaasan, asin sa daga katoninongan sa mga tawo na igwa nin marahay na boot.”​—Lucas 2:14.

3. Bago dumatong sa daga an katoninongan, anong gigibohon ni Jehova an kaipuhan ngunang mangyari?

³ An katoninongan na iyan mas harani kisa paghona nin kadaklan na tawo. Pero kaipuhan na umabot nguna an paghokom ni Jehova sa maraot na kinaban. An propeta niang si Sofonias nagsasabi: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan.” Anong klaseng aldaw iyan? An hula nagpapadagos: “An tanog kan aldaw ni Jehova mapait. Duman an makosog na tawo minakuragrit. An aldaw na iyan aldaw nin kabangisan, aldaw nin kasakitan asin nin panangis, aldaw nin bagyo asin nin pangaba, aldaw nin kadikloman asin nin paglomlom, aldaw nin pagdagom asin nin pagdiklom, aldaw nin amodyong asin nin pagkurahaw, tumang sa mga siudad na posog asin tumang sa haralangkaw na bantayan. Asin pasasakitan ko an katawohan, asin sinda magraralakaw na garo mga buta; huli ta tumang ki Jehova na sinda nagkasala.”​—Sofonias 1:​14-17; helingon man an Habacuc 2:3; 3:​1-6, 16-19.

4. Siisay ngonyan an naghihimate sa pangagda na midbidon asin maglingkod sa Dios?

⁴ Makaoogma, minilyon ngonyan an sinisimbag an pangagda na midbidon asin maglingkod sa Dios. Manongod sa linahidan na mga Kristiano, na pinalaog sa bagong tipan, ihinula: “‘Sinda gabos makamimidbid na sa sako, pagpoon sa pinakasadit sa sainda sagkod sa pinakadakula sa sainda,’ an sabi ni Jehova.” (Jeremias 31:34) An mga ini nangenot sa paghuhulit sa modernong aldaw. Asin ngonyan mantang padakol nang padakol sa linahidan na natatada an natatapos an daganon na buhay, an “dakulang kadaklan” nin “ibang karnero” nagpresentar na ‘magtao sa Dios nin banal na paglilingkod aldaw-banggi’ sa saiyang garo-templong areglo. (Kapahayagan 7:​9, 15; Juan 10:16) Saro daw kamo na nagkakamit kan daing kaagid na pribilehiyong ini?

Kun Paano Minalaog “an Kawiliwiling mga Bagay”

5, 6. Bago yugyugon sagkod na malaglag an gabos na nasyon, anong pagliligtas an nangyayari?

⁵ Buksan niato an Haggeo 2:​7, na dian si Jehova naghula manongod sa saiyang espirituwal na harong nin pagsamba. Sabi nia: “Yuyugyugon ko an gabos na nasyon, asin an kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini.” Ipinaheheling kan mga hula sa Biblia na ‘an pagyugyug sa mga nasyon’ nanonongod sa paghokom ni Jehova sa mga nasyon. (Nahum 1:​5, 6; Kapahayagan 6:​12-17) Kaya, an gigibohon ni Jehova na ihinula sa Haggeo 2:7 matatapos sa pagyugyug sa mga nasyon sagkod na mawara​—mapara. Pero kumusta man an “kawiliwiling mga bagay kan gabos na nasyon”? Kaipuhan daw sindang maghalat sa mapanlaglag na ultimong pagyugyug na iyan tanganing mapalaog? Dai man.

⁶ An Joel 2:32 nagsasabi na “an gabos na mag-arang sa ngaran ni Jehova makaliligtas; huli ta sa Bukid nin Sion asin sa Jerusalem magkakaigwa kan mga nakaligtas, arog kan isinabi ni Jehova, asin sa tahaw kan nagkatarada, na inapod ni Jehova.” Pinaluluwas sinda ni Jehova, asin sinda nag-aapod sa saiyang ngaran na may pagtubod sa atang ni Jesus bago an pangultimong pagyugyug sa dakulang kahorasaan. (Ikomparar an Juan 6:44; Gibo 2:​38, 39.) Makaoogma, an mahal na dakulang kadaklan, na ngonyan labi nang apat na milyon an kabilangan, ‘minalaog’ sa harong ni Jehova para sa pagsamba bilang paghalat sa saiyang ‘pagyugyug sa gabos na nasyon’ sa Armagedon.​—Kapahayagan 7:​9, 10, 14.

7. Ano an kalabot sa ‘pag-apod sa ngaran ni Jehova’?

⁷ Paano nag-aarapod sa ngaran ni Jehova an nagkataradang ini? An Santiago 4:8 nagtatao sato nin ideya, na sinasabi: “Rumani kamo sa Dios, asin sia marani sa saindo. Hanawe nindo an saindong mga kamot, kamong mga parakasala, asin linigi nindo an saindong mga puso, kamo na mga nagduduwaduwa.” Kapareho kan linahidan na natatada na nangenot, an mga naglalaom na makabilang sa dakulang kadaklan nin mga makaliligtas sa Armagedon kaipuhan na humiro nin desidido. Kun kamo naglalaom na makaligtas, kaipuhan na uminom kamo nin dakol kan nakalilinig na Tataramon ni Jehova asin iaplikar sa saindong buhay an saiyang matanos na mga pamantayan. Kaipuhan na kamo desidido sa pagdusay kan saindong buhay ki Jehova, na sinisimbolohan ini paagi sa bautismo sa tubig. An may pagtubod na pag-apod nindo ki Jehova kaiba man an pagpatotoo para sa saiya. Kaya, sa Roma kapitulo 10, bersikulo 9 asin 10, si Pablo nagsurat: “Kun ika magpahayag sa publiko kan ‘tataramon sa saimong sadiring ngoso,’ na si Jesus Kagurangnan, asin magsagibo ka nin pagtubod sa saimong puso na binuhay sia liwat nin Dios hale sa mga gadan, ika maliligtas. Huli ta paagi sa puso an saro nagsasagibo nin pagtubod para sa katanosan, alagad ta paagi sa ngoso na an saro nagpapahayag sa publiko para sa kaligtasan.” Dangan, sa bersikulo 13, kinotar kan apostol an hula ni Joel, na idinodoon na “an gabos na nag-aapod sa ngaran ni Jehova maliligtas.”

‘Hanapa, Hanapa, Hanapa’

8. (a) Sono ki propeta Sofonias, ano an hinahagad ni Jehova para sa kaligtasan? (b) Anong patanid an ipinahahayag sato kan terminong “tibaad” sa Sofonias 2:3?

⁸ Sa pagbukas sa libro kan Biblia na Sofonias, kapitulo 2, bersikulo 2 asin 3, mababasa niato an hinahagad ni Jehova para sa kaligtasan: “Bago umabot sa saindo an naglalaad na kaanggotan ni Jehova, bago umabot sa saindo an aldaw kan kaanggotan ni Jehova, hanapa nindo si Jehova, kamo gabos na mahoyo sa daga, na naggibo kan Saiyang hatol. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” Mangnoha an terminong “tibaad.” Bako iyan na oras na maligtas, permi nang ligtas. An pagkatago sato sa aldaw na iyan depende sa satong pagpapadagos na gibohon an tolong bagay na iyan. Kaipuhan na hanapon niato si Jehova, hanapon an katanosan, asin hanapon an kahoyoan.

9. Paano binabalosan an mga naghahanap nin kahoyoan?

⁹ Makangangalas nanggad an balos sa paghanap nin kahoyoan! Sa Salmo 37, bersikulo 9 sagkod 11, mababasa niato: “Idtong mga naglalaom ki Jehova iyo an magmamana kan daga. Dai na mahahaloy, asin ta an maraot mawawara na . . . Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan.” Asin kumusta man an paghanap nin katanosan? An bersikulo 29 nagsasabi: “An mga matanos mismo magmamana kan daga, asin sinda mag-eerok dian sagkod lamang.” Kun dapit sa paghanap ki Jehova, sinasabi sato kan bersikulo 39 asin 40: “An kaligtasan kan mga matanos nasa ki Jehova; sia an saindang pailihan sa panahon nin kasakitan. Asin sinda tatabangan ni Jehova asin tatawan sinda nin dudulagan. Padudulagon nia sinda hale sa maraot na mga tawo asin ililigtas sinda, huli ta sinda nagpaili sa saiya.”

10. Siisay an risang marhay sa saindang pagsayuma na hanapon si Jehova asin hanapon an kahoyoan?

¹⁰ An mga sekta kan Kakristianohan nagkulang sa paghanap ki Jehova. Isinisikwal pa ngani kan saindang klero an saiyang mahalagang ngaran, na may kapangahasan na hinahale iyan sa saindang mga pagtradusir kan Biblia. Mas gusto nindang sambahon an sarong daing ngaran na Kagurangnan o Dios asin an sarong paganong Trinidad. Saro pa, an Kakristianohan dai naghahanap nin katanosan. An dakol niang miembro naggigibo o nagpapalakop nin mapagkonsinteng pamumuhay. Imbes na hanapon an kahoyoan kapareho ni Jesus, sinda nagpapasikat, halimbawa sa telebisyon, kan maluho asin sa parate inmoral na pamumuhay. An mga klerigo nagpapataba karibay kan kapierdihan kan saindang mga aripompon. Sa pagkasabi kan Santiago 5:​5, sinda “namuhay sa luho sa daga asin nagpangana sa kasingawan sa laman.” Mantang nagrarani an aldaw ni Jehova, segurado na manonompongan ninda na aplikado sa sainda an ipinasabong na mga tataramon: “An mahahalagang bagay magigin daing kamanungdanan sa aldaw nin kabangisan.”​—Talinhaga 11:4.

11. Siisay an tawo nin katampalasanan, asin paano sia nagtambak nin grabeng kasalan sa dugo?

¹¹ Kan enot na siglo C.E., arog kan isinasaysay ni apostol Pablo sa ikaduwa niang surat sa mga taga-Tesalonica, an ibang Kristiano nagin sobra kaentusiastiko, na naghohona na nag-abot na sa sainda an aldaw ni Jehova. Pero nagpatanid si Pablo na enot kaipuhan ngunang umabot an dakulang apostasiya, asin kaipuhan na mahayag “an tawo nin katampalasanan.” (2 Tesalonica 2:​1-3) Ngonyan, sa ika-20 siglong ini, masasabotan niato an hiwas kan apostasiyang iyan asin kun gurano katampalasan kan klero nin Kakristianohan sa pagheling nin Dios. Sa huring mga aldaw na ini poon kan 1914, an klero nagtambak nin grabeng kasalan sa dugo paagi sa pagsuportar sa ‘paggibong minasbad sa mga tarom nin arado.’ (Joel 3:10) Nagpadagos man sinda sa pagtotokdo nin falsong mga doktrina, arog baga kan inmortalidad kan kalag nin tawo, purgatoryo, pagpasakit sa impiernong may kalayo, pagbunyag sa omboy, Trinidad, asin kaagid na mga bagay. Ano an magigin kamugtakan ninda kun gibohon na ni Jehova an saiyang hudisyal na desisyon? Sinasabi kan Talinhaga 19:5: “Sia na nagtataram nin mga kaputikan dai makadudulag.”

12. (a) Ano an sa-tawong “kalangitan” asin “daga” na madali nang paraon? (b) Ano an manonodan niato sa nagdadangadang na paglaglag sa maraot na kinaban na ini?

¹² Sa 2 Pedro 3:​10, mababasa niato: “An aldaw ni Jehova madatong siring sa parahabon, na dian an kalangitan mawawara na may makosog na sagitsit, alagad an mga elemento mantang labi-labi kainit matutunaw, asin an daga asin an mga gibo-gibo dian mahahayag.” An maraot na mga pamamahala na biyong nakatakop na garo kalangitan sa katawohan, kaiba an gabos na elemento na minakompuwesto sa lapang sosyedad nin tawo, paparaon sa daga nin Dios. An mga paragibo asin negosyante nin mga armas sa pagkatunaw kan kinaban, tikason, parasaginsagin na mga relihiyonista asin an saindang klero, mga promotor nin karigsokan, kadahasan, asin krimen​—sinda gabos mapapara. Tutunawon sinda kan kabangisan ni Jehova. Pero sa bersikulo 11 asin 12, idinugang ni Pedro an patanid na ini sa mga Kristiano: “Mantang an gabos na bagay na ini tutunawon nin siring, kamo maninigong magin anong klaseng mga tawo sa banal na mga gawe asin gibo nin diosnon na debosyon, na naghahalat asin naggigirumdom sa presensia kan aldaw ni Jehova.”

Si Miguel Mahiro!

13, 14. Siisay an dakulang Parabindikar sa paghade ni Jehova, asin paano sia nagin aktibo poon kan 1914?

¹³ Paano maliligtas an siisay man sa “panahon nin kasakitan” ni Jehova? An Ahente nin Dios sa pagtao nin kaligtasan iyo an arkanghel na si Miguel, na an ngaran nangangahulogan “Siisay an Kabaing nin Dios?” Kaya, tamang-tama, sia an Saro na nagbibindikar sa paghade ni Jehova, na sinusuportaran si Jehova bilang an solamenteng tunay na Dios asin may diretsong Soberanong Kagurangnan sa bilog na uniberso.

¹⁴ Kanigoan kamakangangalas na mga pangyayari an ilinaladawan kan Kapahayagan kapitulo 12, bersikulo 7 sagkod 17, manongod sa “aldaw kan Kagurangnan” poon kan 1914! (Kapahayagan 1:10) Iinapon kan arkanghel na si Miguel an rebeldeng si Satanas hale sa langit pasiring sa daga. Dangan, arog kan ilinaladawan sa Kapahayagan kapitulo 19, bersikulo 11 sagkod 16, an sarong inaapod na “Maimbod asin Totoo” “binabatayan man . . . an ligisan kan kaanggotan kan kabangisan nin Dios na Makakamhan sa gabos.” An makapangyarihan na langitnon na guerrerong ini inaapod na “Hade nin mga hade asin Kagurangnan nin mga kagurangnan.” Ultimo, an Kapahayagan kapitulo 20, bersikulo 1 asin 2, nagsasaysay manongod sa sarong dakulang anghel na ihinolog si Satanas sa bungaw asin ibinilanggo sia duman sa laog nin sangribong taon. Malinaw, an gabos na kasuratan na ini nagtotokdo sa sarong Parabindikar sa soberaniya ni Jehova, an Kagurangnan na Jesu-Cristo, na pinatukaw ni Jehova sa saiyang mamurawayon na langitnon na trono kan 1914.

15. Sa anong espesyal na paagi “matindog” si Miguel?

¹⁵ Si Miguel “nagtitindog,” arog kan sabi sa Daniel 12:​1, para sa banwaan ni Jehova poon kan sia patukawon na Hade kan 1914. Pero sa dai na mahahaloy si Miguel “matindog” sa espesyal na gayong sentido​—bilang Ahente ni Jehova sa paghale sa daga kan gabos na karatan asin bilang Paraligtas sa panglobong sosyedad kan banwaan nin Dios. Ipinaririsa kan mga tataramon ni Jesus sa Mateo 24:​21, 22 kun gurano kagrabe kan “panahon nin kasakitan” na iyan: “Sa panahon na iyan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray. Sa katotoohan, kun dai pahalipoton an mga aldaw na iyan, mayong laman na makaliligtas; alagad huli sa mga pinili an mga aldaw na iyan pahahalipoton.”

16. Anong laman an maliligtas sa dakulang kahorasaan?

¹⁶ Kanigoan an kaogmahan niato na may laman na ililigtas sa panahon na iyan! Bako, bakong arog kan rebelyosong mga Judio na nalaom sa Jerusalem kan 70 C.E., na an iba dinara sa Roma bilang mga oripon. Imbes, an mga makaliligtas sa “panahon kan katapusan” magigin arog kan Kristianong kongregasyon na nakadulag na hale sa Jerusalem kan pumoon an ultimong pagsalikop. Sinda an sadiring banwaan nin Dios, an minilyon sa dakulang kadaklan kaiba an siisay man na linahidan na tibaad yaon pa sa daga. (Daniel 12:4) An dakulang kadaklan “nagluwas sa dakulang kahorasaan.” Taano? Huli ta “hinugasan ninda an saindang mga gubing asin pinaputi iyan sa dugo kan Kordero.” Sinda nagtutubod sa nakatutubos na kapangyarihan kan pinabolos na dugo ni Jesus asin ipinaheheling an pagtubod na iyan paagi sa maimbod na paglilingkod sa Dios. Ngonyan pa, si Jehova, “an Saro na nakatukaw sa trono,” binibiklad an saiyang nagpoprotehir na tabernakulo sa ibabaw ninda, mantang an Kordero, si Cristo Jesus, pinapastoran asin ginigiyahan sinda sa mga burabod nin tubig nin buhay.​—Kapahayagan 7:​14, 15.

17. An dakulang kadaklan partikularmente pinakokosog na gumawe nin paano tanganing matago sa nagdadangadang na aldaw nin kasakitan?

¹⁷ Sa paghanap ki Jehova, sa katanosan, asin kahoyoan, an minilyon sa dakulang kadaklan nungka na dapat palipoton an saindang enot na pagkamoot sa katotoohan! Kun saro kamo sa mga arog-karnerong ini, ano an dapat nindong gibohon? Arog kan sinasabi sa Colosas kapitulo 3, bersikulo 5 sagkod 14, kaipuhan na lubos nindong ‘haleon an daan na pagkatawo asin an mga gibo kaiyan.’ Hinahagad an tabang nin Dios, magmaigot na ‘ikasolog nindo an bagong pagkatawo, na basado sa tamang kaaraman.’ Sa kahoyoan, parigonon asin papagdanayon an kaigotan sa pag-omaw ki Jehova asin sa pagpamidbid sa iba kan saiyang makangangalas na mga katuyohan. Sa siring, tibaad kamo ikatago sa “panahon nin kasakitan,” an aldaw kan “naglalaad na kaanggotan ni Jehova.”

18, 19. Sa anong paagi na an pakatagal kaipuhan para sa kaligtasan?

¹⁸ Harani na an aldaw na iyan! Iyan naghihidale pasiring sa sato. Mga 57 taon na ngonyan an ilinawig kan pagtipon sa mga indibiduwal kan dakulang kadaklan. An nagkapira sa mga ini nagadan na asin naghahalat kan saindang pagkabuhay liwat. Pero ipinanunuga sato kan hula sa Kapahayagan na bilang sarong grupo an dakulang kadaklan maluwas sa dakulang kahorasaan bilang an pundasyon kan sosyedad na “bagong daga.” (Kapahayagan 21:1) Yaon daw kamo duman? Posible iyan, ta sinasabi ni Jesus sa Mateo 24:13: “An makatagal sagkod sa katapusan iyo an maliligtas.”

¹⁹ An mga kagipitan na inaagihan kan banwaan ni Jehova sa daan na palakaw na ini tibaad magpadagos na grumabe. Asin kun umabot na an masakit na dakulang kahorasaan, tibaad mag-agi kamo nin mga kadepisilan. Pero magdanay na harani ki Jehova asin sa saiyang organisasyon. Magpuka! “‘Halata ako nindo,’ an sabi ni Jehova, ‘sagkod sa aldaw na ako mabuhat sa samsam, huli ta an sakuyang paghokom iyo na tiriponon an mga nasyon, sararoon an mga kahadean, tanganing ibubo sa sainda an sakong kabangisan, an gabos kong naglalaad na kaanggotan; huli ta mauubos an bilog na daga kan kalayo nin sakuyang kaigotan.’”​—Sofonias 3:8.

20. Mantang orog na nagdadangadang an kulminasyon na “panahon nin kasakitan,” ano an kaipuhan niatong gibohon?

²⁰ Para sa proteksion niato asin pagpakosog sa sato, maheherakon na itinao ni Jehova sa saiyang banwaan an “malinig na tataramon,” na dian kaiba an mamuraway na mensahe manongod sa saiyang nagdadangadang na Kahadean, “tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) Mantang naghihidali sa pagdangadang an kulminasyon na “panahon nin kasakitan,” kita logod maglingkod na may kaigotan, na tinatabangan an ibang mahoyo na ‘mag-apod sa ngaran ni Jehova’ para sa kaligtasan.

Nagigirumdoman daw Nindo?

◻ Anong gigibohon ni Jehova an maeenot sa pagtao nin katoninongan sa daga?

◻ Sono ki Joel, ano an dapat na gibohon nin saro tanganing maligtas?

◻ Sono ki Sofonias, paano makanonompong nin proteksion an mga mahoyo sa naglalaad na kaanggotan ni Jehova?

◻ Siisay “an tawo nin katampalasanan,” asin paano sia nagtambak nin kasalan sa dugo?

◻ Gurano kahalaga kan pakatagal sa kaligtasan?