Nagkakasararong Magturugang

SA LAOG nin mga 1,500 na taon, an nasyon nin Israel ibinilang nin Diyos na Jehova na saiyang banwaan. Dangan “itinao [ni Jehova] an saiyang atensiyon sa mga nasyon tanganing kumua hali sa sainda nin sarong banwaan para sa saiyang pangaran.” (Gibo 15:14) An banwaan na nagdadara kan pangaran ni Jehova magigin mga saksi niya, na nagkakasararo sa isip asin gibo sain man na parte kan kinaban sinda nakaistar. An pagkaigwa nin nagkakasararong banwaan na nagdadara kan pangaran nin Diyos resulta kan sugo ni Jesus sa mga parasunod niya: “Padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda sa ngaran kan Ama asin kan Aki asin kan banal na espiritu, na tinutukduan sinda na utubon an gabos na bagay na ipinagbuot ko sa saindo.”—Mat. 28:19, 20.

² Kan idusay mo an saimong sadiri ki Jehova asin magpabawtismo, nagin disipulo ka ni Jesu-Cristo. Kabilang ka na sa pambilog na kinaban na Kristiyanong magturugang, na nagkakasararo dawa iba-iba an nasyonalidad, tribo, o estado sa buhay. (Sal. 133:1) Kaya, namumutan asin iginagalang mo an saimong Kristiyanong mga tugang sa kongregasyon. An iba sa sainda tibaad iba an lahi, nasyonalidad, o natapos na edukasyon, asin tibaad dati habo mong makiiba-iba sa mga arog ninda. Pero ngunyan, an pagkaminuruutan nindo bilang magturugang mas makusog pa sa pagigin mag-aramigo, magkakarelihiyon, o magkakapamilya.—Mar. 10:29, 30; Col. 3:14; 1 Ped. 1:22.

³ Kun may mga nadidipisilan na halion sa saindang isip an diskriminasyon huli sa lahi, pulitika, estado sa buhay, o iba pang nakagamot nang mga kaisipan, puwede nindang isipon an mga Judiong Kristiyano kaidto, na kinaipuhan man na halion sa saindang isip an pagdiskriminar kan mga Judio sa mga taga ibang nasyon. Kan sabihan si Pedro na magduman sa harong kan Romanong senturyon na si Cornelio, mabuot na inandam ni Jehova si Pedro para sa asignasyon na iyan.—Gibo, kap. 10.

⁴ Sa sarong bisyon, sinabihan si Pedro na magbuno asin magkakan nin nagkapirang klase nin hayop na ibinibilang kan mga Judio na maati sa seremonyal na paagi. Kan magsayuma siya, sarong boses hali sa langit an nagsabi sa saiya: “Dai mo na pag-apudon na maati an mga bagay na lininig na nin Diyos.” (Gibo 10:15) Kaipuhan na itanos nin Diyos an kaisipan ni Pedro tanganing makondisyon ini sa itataong asignasyon sa saiya—dumanan an sarong tawo na bakong Judio. Sinunod ni Pedro si Jehova asin ipinahayag niya sa mga nagkakatiripon duman: “Aram na aram nindo na sala nanggad sa samuyang Katugunan na an sarong Judio makiiba-iba o magrani sa bako niyang kalahi, pero ipinahiling nin Diyos sa sako na dai ko dapat sabihon na maati o bakong malinig an siisay man na tawo. Iyan an dahilan na dai ako nagsayuma kan pakiulayan akong magdigdi.” (Gibo 10:28, 29) Pagkatapos kaiyan, nahiling mismo ni Pedro an ebidensiya kan pag-uyon ni Jehova ki Cornelio asin sa mga kairiba kaini sa harong.

⁵ Si Saulo nin Tarso, sarong Fariseo na halangkaw an inadalan, kinaipuhan man na magpakumbaba asin makiiba-iba sa mga dating habo niyang makaiba-iba. Kinaipuhan pa ngani niyang sumunod sa mga instruksiyon ninda. (Gibo 4:13; Gal. 1:13-20; Fil. 3:4-11) Siguradong pinagmaigutan man kan mga tawong arog ki Sergio Paulo, Dionisio, Damaris, Filemon, Onesimo, asin iba pa na itanos an saindang kaisipan kan akuon ninda an maugmang bareta saka magin mga disipulo ni Jesu-Cristo.—Gibo 13:6-12; 17:22, 33, 34; Filem. 8-20.

⁶ Siguradong nakatabang saimo an pagkamuot kan mga tugang sa laog kan kongregasyon para maparani ka ki Jehova asin sa organisasyon niya. Hiling-hiling mo an pagkamuot na malinaw na midbidan kan tunay na mga disipulo ni Jesu-Cristo, arog kan sinabi niya: “Tinatawan ko kamo nin sarong bagong tugon, na kamutan nindo an lambang saro; kun paanong namutan ko kamo, kamutan man nindo an lambang saro. Paagi kaini maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:34, 35) Asin lalo mo pang napahalagahan si Jehova saka an organisasyon niya kan maaraman mo na an pagkamuot sa laog kan kongregasyon iyo man an pagkamuot na ipinapahiling kan mga tugang sa bilog na kinaban. Naeeksperyensiyahan mo an kautuban kan hula sa Bibliya manungod sa pagtipon sa mga tawo sa huring mga aldaw para sumamba ki Jehova na may katuninungan asin pagkasararo.—Miq. 4:1-5.

⁷ Dakul sa ngunyan an nagkakawsa nin pagkabaranga kan mga tawo kaya siisay baya an mahuna na puwedeng magkasararo an mga tawo “hali sa gabos na nasyon asin tribo asin banwaan saka lengguwahe”? (Kap. 7:9) Isipa na sana an mga pagkakalain kan mga tawong naggagamit nin modernong teknolohiya saka kan mga tawong nagsusunod pa sa suanoy na mga kaugalian nin tribo. Makakahiling ka man nin mga nag-iiriwal huli sa relihiyon dawa magkapareho sinda nin lahi asin nasyonalidad. Miyentras na nagkukusog an nasyonalismo, lalo man na nagkakabaranga an mga tawo ngunyan dahil sa pulitika. Saka kun iisipon mo an mga pagkakalain dahil sa estado sa buhay asin dakul na iba pang bagay na nagkakawsa nin pagkabaranga, saro nanggad na milagro na mapagkasararo sa pagkamuot asin katuninungan an mga tawo sa gabos na nasyon, lengguwahe, asin grupo—milagro na solamenteng an Diyos na Makakamhan sa Gabos an makakagibo.—Zac. 4:6.

⁸ Pero totoong nangyayari an pagkasararo na iyan, asin nagin parte ka kaiyan kan ika magin nagdusay asin bawtisadong Saksi ni Jehova. Huling nakikinabang ka sa pagkasararong iyan, may paninimbagan kang tumabang sa pagpapadanay kaiyan. Magigibo mo ini kun susunudon mo an sinabi ni apostol Pablo sa Galacia 6:10: “Sagkod na igwa kita nin oportunidad, gumibo kita nin marahay sa gabos, alagad lalo na sa satuyang mga tugang sa pagtubod.” Sinusunod ta man an konsehong ini: “Likayan nindo an paggibo nin ano man na bagay dahil sa hilig na makipagdaugan o dahil sa pagigin mapagpaimportante sa sadiri, kundi may kapakumbabaan nindong ibilang an iba na mas urog kisa saindo, mantang tinatawan nindo nin atensiyon bako sana an sadiri nindong kapakanan, kundi an kapakanan man kan iba.” (Fil. 2:3, 4) Kun hinihinguwa niyato na hilingon an mga tugang nin arog kan paghiling sa sainda ni Jehova asin bakong base sa nahihiling kan satong mata, padagos na magigin matuninong asin maugma an relasyon ta sa sainda.—Efe. 4:23, 24.

⁹ Arog kan deskripsiyon ni apostol Pablo, an kongregasyon bakong baranga. Imbes, an gabos na kabilang diyan igwa nin malasakit sa lambang saro. (1 Cor. 12:14-26) Baga man an mga tugang niyato nasa ibang parte kan kinaban, nagmamakulog kita sa kapakanan ninda. Kun may mga tugang na pigpepersegir, nahahadit kita gabos. Kun may mga nangangaipo nin materyal na tabang o inagihan nin kalamidad, giyera, o iriwal-sibil, naghahanap tulos kita nin paagi para makatao nin espirituwal asin materyal na tabang.—2 Cor. 1:8-11.

¹⁰ Dapat tang ipamibi aroaldaw an satong mga tugang. May mga napapaatubang sa sugot na gumibo nin maraot. An iba man nag-aagi nin mga kasakitan na posibleng aram ta. May mga pigkokontra kan mga katrabaho asin bakong Saksing kapamilya na tibaad dai ta naaaraman. (Mat. 10:35, 36; 1 Tes. 2:14) Iniisip ta sinda huling kabilang kita sa pambilog na kinaban na magturugang. (1 Ped. 5:9) May mga tugang na mahigos sa paglilingkod ki Jehova, na nanginginot sa paghuhulit asin sa mga kongregasyon. Yaon man an mga inasignaran na mangataman sa pambilog na kinaban na gibuhon. Kaipuhan kan gabos an satong mga pamibi, na paagi kaiyan naipapahiling ta an satong pagkamuot asin tunay na pagmalasakit, na kun minsan tibaad iyan sana an satong maitatabang.—Efe. 1:16; 1 Tes. 1:2, 3; 5:25.

¹¹ Huli sa gabos na kariribukan sa kinaban sa huring mga aldaw na ini, dapat na magin andam an mga lingkod ni Jehova na magtinarabangan. Kun minsan, huli sa mga kalamidad na arog nin linog asin baha, kaipuhan na mag-organisar nin mahiwas na pagtao nin ayuda asin materyal na tabang. Marahay na ehemplo sa bagay na ini an mga Kristiyano kan inot na siglo. Bilang pagsunod sa konseho ni Jesus, an mga disipulo sa Antioquia maugmang nagpadara nin materyal na tabang sa mga tugang sa Judea. (Gibo 11:27-30; 20:35) Pagkatapos kaidto, dinagka man ni apostol Pablo an mga taga Corinto na suportaran an ginibong areglo sa pagtao nin ayuda. (2 Cor. 9:1-15) Sa presenteng panahon man, pag an mga tugang ta nasa masakit na sitwasyon asin nangangaipo nin materyal na tabang, an organisasyon saka an indibidwal na mga Kristiyano minahiro tulos para itao an kinakaipuhan na tabang.

¹² Inoorganisar kita bilang nagkakasararong magturugang sa bilog na kinaban para gibuhon an kabutan ni Jehova. Sa panahon na ini, kabutan niyang ihulit an maugmang bareta kan Kahadian sa bilog na kinaban bilang patotoo sa gabos na nasyon. (Mat. 24:14) Mantang naghuhulit kita, gusto ni Jehova na gumawi kita kauyon kan saiyang halangkaw na mga pamantayan sa moral. (1 Ped. 1:14-16) Dapat na andam kitang magpasakop sa lambang saro asin magmaigot para sa pagpalakop kan maugmang bareta. (Efe. 5:21) Bako nang panahon ini para inuton sa buhay an satong personal na mga kagustuhan kundi para inuton an Kahadian nin Diyos. (Mat. 6:33) Kun isasaisip niyato ini mantang nagtatarabangan kita sa paghuhulit kan maugmang bareta, makakamati kita nin kaugmahan asin satispaksiyon ngunyan asin magkakamit nin daing sagkod na mga bendisyon sa maabot.

¹³ Napapalain nanggad kitang mga Saksi ni Jehova. Ilinain kita hali sa katawuhan bilang malinig na banwaan na maigot sa paglilingkod sa satong Diyos. (Tito 2:14) Napapalain kita huli sa satong pagsamba ki Jehova. Bako sanang nagtatarabangan kita kan satong mga tugang sa bilog na kinaban kundi nagtataram man kita kan saro sanang lengguwahe nin katotoohan asin minagawi kita kauyon kaiyan. Ihinula ini ni Jehova paagi sa propeta niyang si Sofonias: “An lengguwahe kan mga banwaan sasalidahan ko nin dalisay na lengguwahe, tanganing gabos sinda mag-apod sa pangaran ni Jehova, para maglingkod sinda sa saiya na may pagkasararo.”—Sof. 3:9.

¹⁴ Dangan, pinasabngan ni Jehova si Sofonias para sabihon an manungod sa pambilog na kinaban na magturugang na nagkakatotoo na sa ngunyan: “An mga natatada sa Israel dai magibo nin bagay na bakong matanos; dai sinda maputik, asin dai man ninda gagamiton an saindang dila para mandaya; makakan sinda saka mahigda, asin mayo nin matakot sa sainda.” (Sof. 3:13) Huling nasabutan niyato an katotoohan sa Tataramon ni Jehova asin binago ta an satong pag-iisip tapos isinabuhay ta an mga pamantayan niya, igwa kita nin pagkasararo. Nahahaman ta an bagay na garo baga imposible sa paghiling nin mga tawo. Iyo, saro nanggad kitang napapalain na banwaan, banwaan nin Diyos, na nagtatao nin onra sa saiya sa bilog na kinaban.—Miq. 2:12.