An Makangingirhat na Aldaw ni Jehova Harani Na

“An sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.”​—MALAQUIAS 3:16.

1, 2. Dapit sa anong makangingirhat na aldaw nagpapatanid si Malaquias?

MAKANGINGIRHAT! Mantang minasirang an aldaw kan Agosto 6, 1945, sarong dakulang siudad an bigla na sanang napara. Mga 80,000 an nagadan! Manampulong ribo an nalugadan nin grabe! Daing kontrol an kalayo! Nahaman kan bomba nuklear an trabaho kaiyan. Kumusta an mga Saksi ni Jehova durante kan kalamidad na idto? Saro sana an Saksi sa Hiroshima​—na nalalaom sa nagpoprotehir na mga lanob nin sarong bilanggoan huli sa saiyang Kristianong integridad. Biyong narumpag an bilanggoan, alagad dai naano an satong tugang. Siring kan sinabi nia, ilinuwas sia nin bomba atomika sa bilanggoan​—na posibleng iyo sana an marahay na nagibo kan bomba.

² Minsan ngani makatatakot an pagputok na iyan nin bomba, iyan nawawaran nin halaga kun ikokomparar sa “dakula asin makangingirhat na aldaw ni Jehova” na madali nang dumatong. (Malaquias 4:5) A, iyo, nagkaigwa na nin makangingirhat na mga aldaw kan mga nakaagi, alagad an aldaw na ini ni Jehova makalalabi sa gabos na iyan.​—Marcos 13:19.

3. Anong pagkakalaen an maririsa sa pag-oltanan kan “gabos na laman” asin kan pamilya ni Noe bago kan Delubyo?

³ Kan kaaldawan ni Noe “linaglag nin gabos na laman an daga,” asin an Dios nagpahayag: “An daga pano nin kadahasan huli sa sainda; asin uya lalaglagon ko sinda kaibahan kan daga.” (Genesis 6:12, 13) Siring kan nasusurat sa Mateo 24:39, si Jesus nagsabi na an mga tawo ‘dai nagmangno sagkod na magdatong an baha asin iinanod sinda gabos.’ Alagad an maimbod na si Noe, “sarong parahulit nin katanosan,” kaiba an saiyang pamilya na matatakton sa Dios, nakaligtas sa Delubyong idto.​—2 Pedro 2:5.

4. Anong nagpapatanid na halimbawa an itinao kan Sodoma asin Gomorra?

⁴ “Siring man,” an pagsaysay kan Judas 7, “an Sodoma asin Gomorra patin an mga siudad sa palibot ninda, pagkatapos na sinda . . . naggibo nin labi-labing pakikisaro asin nagsunod sa laman para sa kagamitan na bakong natural, iinatubang sa sato bilang panalmingan paagi sa pag-agi sa silot na kalayong daing katapusan.” Napara an maraot na mga tawong idto huli sa saindang makababalde na maating estilo nin buhay. Mapatanidan logod an makiseksong mga komunidad sa modernong kinaban na ini! Alagad mangnohon na an matatakton sa Dios na si Lot asin an saiyang mga aking babae ilinigtas na buhay durante kan kapahamakan na idto, kun paanong an mga parasamba ni Jehova iingatan durante kan marikas nang nagdadangadang na dakulang kahorasaan.​—2 Pedro 2:​6-9.

5. Ano an satong manonodan sa mga paghokom na ginibo sa Jerusalem?

⁵ Dangan horophoropa an itinaong nagpapatanid na mga halimbawa kan gamiton ni Jehova an nananakop na mga hukbo tanganing paraon an Jerusalem, an mamuraway na siudad na dati nagin “an kaogmahan kan bilog na daga.” (Salmo 48:2) An kapahapahamak na mga pangyayaring ini naotob, enot kan 607 B.C.E. asin sa giraray kan 70 C.E., huli ta binayaan kan naghihingakong banwaan nin Dios an tunay na pagsamba. Makaoogma, nakaligtas an maimbod na mga lingkod ni Jehova. An kalaglagan kan 70 C.E. (na ipinaheheling sa ibaba) sinasabing “kahorasaan na dai pang kaagid na nangyari poon sa kapinonan kan mga linalang na linalang nin Dios sagkod sa panahon na iyan.” Biyong hinale kaiyan an apostatang Judiong palakaw nin mga bagay, asin tunay na kun dapit sa bagay na iyan iyan “dai na mangyayari giraray.” (Marcos 13:19) Alagad maski an paghokom na ini nin Dios anino sana kan “dakulang kahorasaan” na ngonyan hinuhuma an bilog na palakaw nin mga bagay sa kinaban.​—Kapahayagan 7:14.

6. Taano ta tinotogotan ni Jehova an mga kapahamakan?

⁶ Taano ta tinotogotan nin Dios an makatatakot na mga kapahamakan, na dakolon an nagagadan? Sa kaso ni Noe, kan Sodoma asin Gomorra, asin kan Jerusalem, si Jehova naghokom duman sa mga naglaglag kan daga, sa mga inatian an magayon na planetang ini nin literal na polusyon asin moral na pagraot, asin nag-apostata sa, o isinikwal an, tunay na pagsamba. Ngonyan kita napapaatubang na sa paghokom sa gabos na magigin lakop sa bilog na kinaban.​—2 Tesalonica 1:​6-9.

“Sa Huring mga Aldaw”

7. (a) Ano an ihinuhula kan suanoy na mga paghokom nin Dios? (b) Anong mamuraway na paglaom an maabot?

⁷ An mga kalaglagan na idto kan suanoy na mga panahon naghuhula kan makangingirhat na dakulang kahorasaan na ilinadawan sa 2 Pedro 3:​3-13. An apostol nagsasabi: “Aramon nguna nindo ini, na sa huring mga aldaw an mga paraolog-olog madatong na may pag-olog-olog, na maglalakaw sono sa saindang mga horot.” Dangan isinisentro an atension sa kaaldawan ni Noe, si Pedro nagsurat: “An kinaban kan panahon na idto nalaglag kan iyan nalantopan nin tubig. Alagad sa iyo man sanang tataramon an kalangitan asin daga ngonyan itinagama sa kalayo asin inaandam sa aldaw nin paghokom asin kalaglagan kan maraot na mga tawo.” Kasunod kan pinakadakula sa gabos na kahorasaan, an haloy nang hinahalat na pamamahala kan Mesiyas sa Kahadean mahiwas an sakop​—“bagong kalangitan asin sarong bagong daga . . . , asin dian an katanosan an magdadanay.” Abaa kagayagayang paglaom!

8. Paano an mga pangyayari sa kinaban minapasiring sa kulminasyon?

⁸ Durante kan satong ika-20 siglo, an mga pangyayari sa kinaban progresibong naghiro pasiring sa kulminasyon. Minsan ngani an paglaglag sa Hiroshima bakong aldaw nin pagsiyasat nin Dios, puwedeng kabale iyan sa “maheheling na mga makangingirhat” na ihinula ni Jesus para sa panahon kan katapusan. (Lucas 21:11) Iyan naglansar nin nuklear na huma na sagkod ngonyan garo panganoron nin bagyo sa ibabaw kan katawohan. Kaya, an titulo kan pangenot na bareta sa The New York Times kan Nobyembre 29, 1993 nagsasabi: “The Guns May Be a Bit Rusty but the Nuclear Arms Are Still Polished” (sa Bicol, “An mga Badil Puwedeng Medyo May mga Takla Na Pero an mga Armas Nuklear Makintab Pa”). Mientras tanto, an mga guerra nin mga nasyon, rasa, asin tribo padagos na nangagadan nin makatatakot sa kadakolan. Kan nakaaging mga guerra an dakulang mayoriya nin mga nagadan mga soldados. Ngonyan, 80 porsiento kan mga nagagadan sa guerra sinasabing mga sibilyan, apuwera kan minilyon na nagharale sa saindang sadiring mga lugar bilang mga dulag.

9. Paano an mga namomoon sa relihiyon nagpaheling nin pakipagkatood sa kinaban?

⁹ An mga namomoon sa relihiyon parateng nagpaheling, asin padagos na nagpapaheling, nin “pakipagkatood sa kinaban” paagi sa aktibong pakikilabot sa mga guerra asin madugong mga rebolusyon. (Santiago 4:4) An iba nakipagkasapakat sa mahanab na mga lider sa kinaban nin komersio mantang an mga ini lagduan na nagpoprodusir nin mga armamento asin nagtitindog nin mga imperyo nin droga. Halimbawa, sa pagbareta kan pag-asesinar sa sarong lider sa negosyo nin droga sa Amerika del Sur, an The New York Times nagsabi: “Sa pagtago kan saiyang negosyo sa droga sa likod kan mga paghihingako na iyan lehitimong kayamanan sa negosyo asin kan reputasyon nin sarong paratao, nagkaigwa sia nin sadiring programa sa radyo asin parateng may kaibang mga pading Katoliko Romano.” An The Wall Street Journal nagbareta na dugang pa sa pagraot sa buhay kan minilyon na nagin mga adikto sa droga, an lider na ini sa negosyo nin droga personal na dinirehiran an paggadan sa rinibo. An The Times sa Londres nagkomento: “An mga paragadan parateng nagbabayad nin sarong espesyal na Misa sa pagpasalamat . . . kadungan kan ginigibong misa sa lobong kan biktima sa ibang lugar.” Kanigoan na karatan!

10. Paano ta maninigong mansayon an pagraot kan mga kamugtakan sa kinaban?

¹⁰ Siisay an nakakaaram kun ano pang panraraot an gigibohon sa dagang ini kan mga tawong pinasabngan nin demonyo? Arog sa sinasabi kan 1 Juan 5:​19, “an bilog na kinaban namumugtak sa kapangyarihan kan maraot,” si Satanas na Diablo. Ngonyan “herak man kan daga asin kan dagat, huli ta huminilig na dian saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Alagad nakaoogma na inaasegurar kita kan Roma 10:13 na “an gabos na nag-aapod sa ngaran ni Jehova maliligtas.”

An Dios Minarani sa Paghokom

11. Anong mga kamugtakan sa Israel an nagin dahelan kan hula ni Malaquias?

¹¹ Kun manongod sa harani nang ngapit kan katawohan, an hula ni Malaquias nagtatao nin liwanag sa madali nang mangyari. Si Malaquias an ultimo sa lista kan dakol na suanoy na Hebreong propeta. Naeksperyensiahan kan Israel an paggaba sa Jerusalem kan 607 B.C.E. Alagad pakalihis nin 70 taon si Jehova nagpaheling nin maheherakon na mamomoton na kabootan na ibalik an nasyon sa daga kaiyan. Alagad, sa laog nin mayo pang sarong gatos na taon an Israel pabalik na naman sa apostasiya asin karatan. An mga tawo binabasangbasang an ngaran ni Jehova, iniignoro an saiyang matanos na mga pagboot, asin inaatian an saiyang templo paagi sa pagdara nin buta, pilay, asin may helang na mga hayop para sa pag-atang. Idinidiborsio ninda an agom kan saindang pagkabarobata tanganing makaagom sinda nin mga babaeng tagaibang banwaan.​—Malaquias 1:​6-8; 2:​13-16.

12, 13. (a) Anong pagdalisay an kinaipuhan para sa linahidan na grupo nin mga saserdote? (b) Paano man nakikinabang sa paglinig an dakulang kadaklan?

¹² Kaipuhan an pagdalisay. Ilinaladawan iyan sa Malaquias 3:​1-4. Arog kan suanoy na Israel, an mga Saksi ni Jehova sa modernong aldaw kaipuhan na linigan, kaya an pagdalisay na ilinadawan ni Malaquias puwedeng iaplikar sa sainda. Mantang naghihinanapos an enot na guerra mundial, an nagkapirang Estudyante sa Biblia, na apod kaidto sa mga Saksi, dai nagpadanay nin estriktong neutralidad sa mga gibo-gibo kan kinaban. Kan 1918, isinugo ni Jehova an Saiyang “mensahero kan tipan,” si Cristo Jesus, sa Saiyang areglo sa espirituwal na templo tanganing linigan sa kinabanon na mga digta an sadit na grupo kan Saiyang mga parasamba. Sa makahulang paagi, si Jehova naghapot: “Siisay an makatatagal sa aldaw kan . . . pagdatong [kan mensahero], asin siisay an makatitindog kun sia pumaheling? Huli ta sia magigin siring sa kalayo nin paradalisay asin siring sa sabon kan mga paralinig nin gubing. Asin sia matukaw bilang paradalisay asin paralinig nin pirak asin lilinigan an mga aking lalaki ni Levi [linahidan na grupo nin mga saserdote]; asin dadalisayon nia sinda na siring sa bulawan asin siring sa pirak, asin sinda nanggad magigin para ki Jehova banwaan na nagdodolot nin dolot na regalo na may katanosan.” Bilang dinalisay na banwaan, iyan mismo an saindang ginibo!

¹³ An linahidan na grupo nin mga saserdote may bilang sanang 144,000. (Kapahayagan 7:​4-8; 14:​1, 3) Alagad kumusta an ibang dusay na mga Kristiano ngonyan? Nagdadakol ngonyan sa minilyon, an mga ini minabilog nin “sarong dakulang kadaklan” na kaipuhan man na linigan sa kinabanon na mga gibo, na ‘hinuhugasan an saindang mga gubing asin pinapaputi iyan sa dugo kan Kordero.’ (Kapahayagan 7:​9, 14) Kaya, paagi sa paggibo nin pagtubod sa pantubos na atang kan Kordero, si Cristo Jesus, nakakapagpadanay sinda nin malinig na kamugtakan sa atubangan ni Jehova. Pinanugaan sinda nin kaligtasan sa bilog na dakulang kahorasaan, an makangingirhat na aldaw ni Jehova.​—Sofonias 2:​2, 3.

14. Anong mga tataramon an maninigong himateon kan banwaan nin Dios ngonyan mantang nagpapadagos sindang magpatalubo kan bagong personalidad?

¹⁴ Kaiba kan natatadang mga saserdote, an dakulang kadaklan na ini dapat na maghimate sa dugang pang mga tataramon nin Dios: “Ako marani sa saindo para sa paghokom, asin ako magigin maliksing saksi tumang sa mga salamangkero, asin tumang sa mga parasambay, asin tumang sa mga nagsusumpa nin putik, asin tumang sa mga nandadaya sa mga tangdan nin parapatangdan, sa balo asin sa ilo, asin sa mga pinahahale an nakikihimanwa, mantang dai sinda natatakot sa sako . . . Huli ta ako si Jehova; dai ako nagliliwat.” (Malaquias 3:​5, 6) Dai, an mga pamantayan ni Jehova dai nagliliwat, kaya may pagkatakot ki Jehova, an saiyang banwaan ngonyan dapat na isikwal an gabos na klase nin idolatriya asin magin totoo, sadiosan, asin matinao mantang padagos nindang pinatatalubo an Kristianong personalidad.​—Colosas 3:​9-14.

15. (a) Anong maheherakon na imbitasyon an ipinaaabot ni Jehova? (b) Paano ta puwedeng malikayan an ‘paghabon’ ki Jehova?

¹⁵ Si Jehova nagpapaabot nin imbitasyon sa siisay man na tibaad tuminalikod sa saiyang matanos na mga dalan, na nagsasabi: “Pagbalik kamo sa sakuya, asin ta ako mabalik sa saindo.” Kun an mga ini maghapot: “Sa anong paagi kami mabalik?” sia masimbag: “Kamo naghahabon sa sakuya.” Asin bilang simbag sa dugang pang hapot: “Sa anong paagi mi ika hinahabonan?” si Jehova nagsasabi na hinahabonan sia ninda paagi sa dai pagdara kan saindang pinakamarahay bilang mga dolot para sa paglilingkod sa saiyang templo. (Malaquias 3:​7, 8) Huli sa pagigin kabtang kan banwaan ni Jehova, tunay na maninigo niatong booton na idusay an pinakamarahay na kabtang kan satong kosog, kakayahan, asin materyal na mga rogaring sa paglilingkod ki Jehova. Kaya, imbes na habonan an Dios, kita ‘padagos na naghahanap nguna kan kahadean asin kan saiyang katanosan.’​—Mateo 6:33.

16. Anong pagpakosog an satong manonompongan sa Malaquias 3:​10-12?

¹⁶ Igwa nin dakulang balos para sa gabos na tinatalikdan an mapagpanigo sa sadiri, materyalistikong mga dalan kan kinaban, siring sa ipinaririsa kan Malaquias 3:​10-12: “‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’” Para sa gabos na nagpapahalaga, si Jehova nanunuga nin espirituwal na prosperidad asin abundansia. Idinagdag nia: “An gabos na nasyon ipapahayag kamong maogma, huli ta kamo mismo magigin daga na may kaogmahan.” Bako daw na napatunayan iyan na totoo sa tahaw kan minilyon na nagpapasalamat sa banwaan nin Dios sa bilog na daga ngonyan?

Mga Nagdadanay sa Integridad sa Libro nin Buhay

17-19. (a) Paano an kariribokan sa Rwanda nakaapektar sa satong mga tugang duman? (b) May anong kombiksion na an gabos na maimbod na ini nagpadagos?

¹⁷ Sa puntong ini, puwede kitang magkomento dapit sa integridad kan satong mga tugang na lalaki asin babae sa Rwanda. Permi nindang dinadara an pinakamarahay na espirituwal na mga dolot sa espirituwal na harong nin pagsamba ki Jehova. Halimbawa, sa saindang “Banal na Pagtotokdo” na Pandistritong Kombension kan Disyembre 1993, an saindang 2,080 parahayag kan Kahadean nagkaigwa nin total na nag-atender na 4,075. Igwa nin nabautismohan na 230 bagong Saksi, asin sa mga ini, haros 150 an nagpalista sa paglilingkod bilang auxiliary payunir kan suminunod na bulan.

¹⁸ Kan an etnikong pagkaongis pumutok kan Abril 1994, kisuerra 180 Saksi, kabale an paraataman kan siudad sa Kigali, an kabesera, asin an saiyang bilog na pamilya, an ginadan. An anom na paratradusir sa opisina kan Watch Tower sa Kigali, na an apat sa sainda Hutu asin an duwa Tutsi, padagos na nagtrabaho sa laog nin nagkapirang semana minsan ngani grabe an mga huma, sagkod na kinaipuhan na dumulag an mga Tutsi, pero ginadan man sana sa sarong checkpoint. Sa katapustapusi, dara-dara an mga nawalat sa saindang komputer, an apat na natada nagdulag pasiring sa Goma, sa Zaire, kun saen sinda maimbod na nagpadagos sa pagtradusir kan An Torrengbantayan sa tataramon na Kinyarwanda.​—Isaias 54:17.

¹⁹ An dulag na mga Saksing ini, minsan ngani nasa masakit na mga kamugtakan, perming enot na hinahagad an espirituwal na kakanon kisa sa materyal na mga probisyon. May dakulang pagsasakripisyo, nahimo kan mamomoton na mga tugang hale sa nagkapirang kadagaan na makapadara sa sainda nin mga suplay. Paagi sa pagtaram asin paagi sa saindang pagigin areglado mantang nasa masakit na kamugtakan, an mga dulag na ini nakatao nin makangangalas na patotoo. Tunay na sinda padagos na nagdara kan saindang pinakamarahay sa pagsamba ki Jehova. Ipinaheling ninda an kombiksion na arog kan ki Pablo na ipinahayag sa Roma 14:8: “Kun kita mabuhay, nabubuhay kita para ki Jehova, asin kun kita magadan, nagagadan kita para ki Jehova. Kaya baga man kita mabuhay o magadan, sadiri kita ni Jehova.”

20, 21. (a) Kiisay na mga ngaran an dai nasusurat sa libro nin girumdoman ni Jehova? (b) Kiisay na ngaran an maheheling sa libro, asin taano?

²⁰ Si Jehova igwa nin rekord kan gabos na naglilingkod sa saiya na may integridad. An hula ni Malaquias nagpapadagos: “Sa panahon na iyan idtong mga nagkakatarakot ki Jehova nag-orolay-olay, an lambang saro sa saiyang kaibanan, asin si Jehova padagos na nagdangog asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.”​—Malaquias 3:16.

²¹ Importante nanggad ngonyan na kita magpaheling nin diosnon na takot sa pagtao nin onra sa ngaran ni Jehova! Sa paggibo kaiyan, dai kita maagi nin silot, arog kan mga may paghangang nagsusuportar sa mga palakaw kan kinaban na ini. Sinasabi kan Kapahayagan 17:8 na “an saindang ngaran dai isinurat sa balumbon nin buhay.” Siyempre, an pangenot na ngaran na nasusurat sa libro nin buhay ni Jehova iyo an ngaran kan Pangenot na Ahente nin buhay, an mismong Aki nin Dios, si Jesu-Cristo. An Mateo 12:21 nagpapahayag: “An totoo, sa saiyang ngaran maglalaom an mga nasyon.” An pantubos na atang ni Jesus naggagarantiya nin buhay na daing katapusan para sa gabos na nagtutubod dian. Kanigoan na pribilehiyo na an satong indibiduwal na ngaran ikadagdag sa ngaran ni Jesus sa balumbon na iyan!

22. Anong pagkakalaen an maheheling kun si Jehova maghokom na?

²² Ano an mangyayari sa mga lingkod nin Dios sa paghokom? Si Jehova minasimbag sa Malaquias 3:17, 18: “Ako maheherak sa sainda, siring sa pagkaherak nin sarong tawo sa saiyang aki na naglilingkod sa saiya. Asin maheheling giraray nindo an kalaenan kan matanos asin maraot, kan naglilingkod sa Dios asin kan dai naglingkod sa saiya.” An pagbanga magigin malinaw sa gabos: an mga maraot, ibubulag para sa daing katapusan na pagkapara, asin an mga matanos, ooyonan para sa buhay na daing katapusan sa rona kan Kahadean. (Mateo 25:31-46) Kaya sarong dakulang kadaklan nin arog-karnerong mga tawo an makakaligtas sa dakula asin makangingirhat na aldaw ni Jehova.

Nagigirumdoman daw Nindo?

◻ Anong mga paghokom an ginibo ni Jehova kan mga panahon sa Biblia?

◻ Paano an mga kamugtakan ngonyan nakakaagid sa suanoy na mga panahon?

◻ Anong pagdalisay an nangyayari bilang kaotoban kan hula ni Malaquias?

◻ Kiisay na mga ngaran an nasusurat sa libro nin girumdoman nin Dios?