Sadiri Kita ni Jehova

 1. Taano ta may deretso si Jehova na sabihon na sadiri niya an gabos na bagay? (Hilingon an ritrato sa itaas.)

AN GABOS na bagay sadiri ni Jehova! Sadiri niya ‘an kalangitan, asin an kalangitan kan kalangitan, asin an daga asin an gabos na bagay na yaon diyan.’ (Deut. 10:14; Kap. 4:11) Huling an mga tawo linalang ni Jehova, gabos kita sadiri niya. (Sal. 100:3) Pero, sa bilog na kasaysayan nin tawo, may pinili an Diyos na partikular na mga grupo nin tawo tanganing magin saiyang pagsadiri sa espesyal na paagi.

 2. Sairisay an sinambit sa Bibliya na pagsadiri ni Jehova sa espesyal na paagi?

² Halimbawa, sa Salmo 135 inapod ni Jehova na “saiyang espesyal na pagsadiri” an maimbod niyang mga parasamba sa suanoy na Israel. (Sal. 135:4, NW) Ihinula man sa libro nin Oseas na igwa nin mga bakong Israelita na mapapabilang sa banwaan ni Jehova. (Os. 2:23) Nautob an propesiyang iyan kan iiniba ni Jehova an mga bakong Judio sa mga pinili niyang magigin kaibang tagapamahala ni Cristo. (Gibo 10:45; Roma 9:23-26) An “banal na nasyon” na ini “espesyal na pagsadiri” ni Jehova sa pambihirang paagi huling an mga miyembro kaiyan linahidan nin banal na espiritu asin pinili tanganing mabuhay sa langit. (1 Ped. 2:9, 10) Kumusta man an kadaklan sa maimbod na mga Kristiyano ngunyan na an paglaom mabuhay digdi sa daga? Inapod man sinda ni Jehova na saiyang ‘banwaan’ asin saiyang ‘mga pinili.’—Isa. 65:22.

 3. (a) Sairisay ngunyan an igwa nin espesyal na relasyon ki Jehova? (b) Ano an pag-uulayan sa artikulong ini?

³ Ngunyan, an “sadit na aripumpon,” na may langitnon na paglaom, asin an “ibang mga karnero,” na may daganon na paglaom, an minakompuwesto sa “sarong aripumpon” na pinapahalagahan na marhay ni Jehova bilang saiyang banwaan. (Luc. 12:32; Juan 10:16) Siyertong gusto niyatong ipahiling an dakulang pasasalamat ta ki Jehova sa pagtao sa sato kan siring kaespesyal na relasyon sa Saiya. Pag-uulayan sa artikulong ini kun paano ta maipapahiling an satong pasasalamat ki Jehova sa pagtao sa sato kan espesyal na onrang iyan.

 4. Ano an sarong paagi na mapapasalamatan niyato si Jehova sa ginibo niyang paagi para magkaigwa kita nin marahay na relasyon sa saiya, asin paano man iyan ginibo ni Jesus?

⁴ Ipinapahiling ta an satong pasasalamat ki Jehova paagi sa bilog na pusong pagdusay kan satong sadiri sa saiya. Paagi sa pagpabawtismo sa tubig, pormal asin hayagan tang ipinapamidbid na sadiri kita ni Jehova asin andam kitang magpasakop sa saiya. (Heb. 12:9) May ginibong kaagid kaiyan si Jesus kan bawtismuhan siya. Garo man sana niya sinabi ki Jehova: “An paggibo kan kabutan mo, O Diyos ko, iyo an ikinakaugma kong marhay.” (Sal. 40:7, 8, NW) Iprinesentar ni Jesus an saiyang sadiri tanganing gibuhon an kabutan ni Jehova, dawa ngani puon kan mamundag siya parte na siya kan nasyon na dusay sa Diyos.

5, 6. (a) Ano an reaksiyon ni Jehova kan bawtismuhan si Jesus? (b) Iilustrar kun taano ta pinapahalagahan ni Jehova an satong pagdusay sa saiya, dawa ngani sadiri niya an gabos na bagay.

⁵ Ano an reaksiyon ni Jehova kan bawtismuhan si Jesus? Sinasabi sa Bibliya: “Pagkatapos mabawtismuhan, naghawas tulos si Jesus sa tubig; asin uya! nabuksan an kalangitan, asin nahiling niya an espiritu nin Diyos na nagbababa na arog nin salampati asin pasiring sa saiya. Siring man, sarong boses hali sa kalangitan an nagsabi: ‘Ini an sakuyang Aki, an namumutan, na sakong inuuyunan.’” (Mat. 3:16, 17) Dawa dati nang sadiri si Jesus kan saiyang Ama sa langit, naugmang marhay si Jehova sa pagigin andam kan saiyang Aki na gamiton an saiyang buhay para sana sa paggibo kan kabutan Niya. Nauugma man si Jehova na akuon an satong pagdusay, asin tatawan niya kita nin onra paagi sa pagtao sa sato nin bendisyon.—Sal. 149:4.

⁶ Bilang halimbawa, sarong lalaki an nagtanom nin dakul na magagayon na burak sa saiyang hardin. Sarong aldaw, nagkua diyan nin sarong burak an aki niyang babayi asin itinao iyan sa saiya bilang regalo. Bako daw na dati nang sadiri kan lalaki an burak na iyan? Taano man ta itatao kan aki sa saiyang ama an sarong bagay na dati nang sadiri kaini? Dai lamang iisipon nin sarong mamumuton na ama an arog kaiyan na mga hapot. Imbes, mauugma siyang marhay na akuon an regalo huling ipinapahiling kaiyan na namumutan siya kan saiyang aki. Siguradong papahalagahan niyang marhay an burak na iyan kisa sa gabos na burak sa hardin niya. Kaagid kaiyan, nauugmang marhay si Jehova pag gikan sa buot niyatong idinudusay an satong sadiri sa saiya.—Ex. 34:14.

 7. Paano idinuon ni Malaquias an namamatian ni Jehova sa mga naglilingkod sa saiya nin gikan sa buot?

⁷ Basahon an Malaquias 3:16. Kun dai ka pa nagdusay asin nagpabawtismo, pag-isipan an kahulugan kan paggibo kan lakdang na iyan. An totoo, puon kan nag-eksister ka, sadiri ka na ni Jehova, pati na an gabos na tawo. Pero isipa na sana an kaugmahan na mamamatian ni Jehova kun idudusay mo sa saiya an saimong sadiri asin gigibuhon an saiyang kabutan huling minimidbid mo an saiyang soberaniya. (Tal. 23:15) Asin midbid man ni Jehova an gikan sa buot na mga naglilingkod sa saiya, saka isinusurat niya an saindang pangaran sa saiyang ‘libro nin girumduman.’

8, 9. Ano an kahagadan ni Jehova sa mga tawong an pangaran nakasurat sa saiyang ‘libro nin girumduman’?

⁸ Kun gusto niyatong magdanay an satong pangaran sa ‘libro nin girumduman’ ni Jehova, may partikular na mga bagay kitang dapat gibuhon. Espesipikong sinambit ni Malaquias na dapat kitang ‘matakot ki Jehova asin hurop-hurupon an saiyang pangaran.’ Kun masamba kita sa siisay man o sa ano pa man, hahalion an satong pangaran sa libro ni Jehova.—Ex. 32:33; Sal. 69:28.

⁹ Kaya an satong pagdusay ki Jehova bako lang sarong sagradong panuga na gigibuhon ta an saiyang kabutan asin na mapabawtismo kita sa tubig. Ginigibo an mga iyan sa halipot sanang panahon asin madali sanang minalihis. An pagkampi niyato ki Jehova bilang saiyang banwaan hinahagad sa sato na padagos kitang magin makinuyog sa saiya ngunyan asin sa maabot na panahon sagkod na kita nabubuhay.—1 Ped. 4:1, 2.

10. Anong malinaw na pagkakalain an dapat na mahiling sa mga naglilingkod asin sa mga dai naglilingkod ki Jehova?

¹⁰ Tinukar sa sinusundan na artikulo an istorya sa Bibliya dapit ki Cain, Solomon, asin mga Israelita. Gabos sinda naghingakong sinasamba ninda si Jehova, pero an totoo bakong bilog an debosyon ninda sa saiya. Malinaw na itinutukdo sa sato kan mga halimbawang ini na an mga indibidwal na talagang sadiri ni Jehova dapat na marigon na naninindugan para sa katanusan asin laban sa karatan. (Roma 12:9) Angay sana na pagkatapos sambiton ni Malaquias an ‘libro nin girumduman,’ sinambit ni Jehova an dapit sa ‘pagkakalain kan [matanos] asin kan maraot na tawo, kan naglilingkod sa Diyos asin kan dai sa saiya naglilingkod.’—Mal. 3:18.

11. Taano ta dapat na malinaw na mahiling kan iba na si Jehova sana an satong sinasamba?

¹¹ May saro pang paagi na maipapahiling ta an satong pasasalamat ki Jehova sa pagpili niya sato na magin banwaan niya. An satong pag-uswag sa espirituwal dapat na “malinaw na mahiling kan gabos.” (1 Tim. 4:15; Mat. 5:16) Haputon an sadiri: ‘Malinaw daw na nahihiling kan iba na bilog an debosyon ko ki Jehova? Naghahanap daw ako nin mga oportunidad para magpamidbid na saro ako sa Mga Saksi ni Jehova?’ Ikakamundo nanggad ni Jehova kun magduduwa-duwa kitang magpamidbid na sadiri niya kita pagkatapos niya kitang pilion na magin banwaan niya.—Sal. 119:46; basahon an Marcos 8:38.

12, 13. Paano pinadipisil kan iba na mamidbid sinda bilang saro sa Mga Saksi ni Jehova?

¹² Makamumundo, pinadipisil kan iba na marisa kun baga ‘naglilingkod sinda sa Diyos o dai’ huling inaarog ninda an “espiritu kan kinaban.” (1 Cor. 2:12) An espiritung iyan an nag-iimpluwensiya sa saro na magpokus sa ‘mga mawot nin laman.’ (Efe. 2:3) Halimbawa, sa ibong kan gabos na konseho na itinao manungod sa pagbado, igwa pa man giraray nin mga tugang na bakong mabini an pagbado asin pagpakarhay sa sadiri. Nagsusulot sinda nin yapit asin mapang-akit na bado, dawa sa Kristiyanong mga pagtiripon. O inaarog ninda an mga istilo nin buhok na bako nanggad angay sa sarong Kristiyano. (1 Tim. 2:9, 10) Kaya pag nasa kadaklan, dipisil maaraman kun siisay an sadiri ni Jehova asin kun siisay an “amigo kan kinaban.”—Sant. 4:4.

¹³ May iba pang paagi na diyan dai lubos na isinisikwal kan nagkapirang Saksi an kinabanon na paggawi. An pagbayle asin paggawi ninda sa mga pagtiripon-tipon minalampas na sa kun ano an maninigo para sa mga Kristiyano. Nagpo-post sinda sa social media nin mga ritrato kan sadiri ninda asin naglalaag nin mga comment na bako nang maninigo para sa sarong tawong espirituwal. Posibleng dai man sinda matawan nin disiplina sa Kristiyanong kongregasyon huli sa magabat na kasalan, pero puwede sindang magin maraot na impluwensiya sa iba na naghihinguwang mapagdanay an marahay na paggawi sa banwaan ni Jehova.—Basahon an 1 Pedro 2:11, 12.

14. Ano an dapat niyatong gibuhon tanganing maprotektaran an satong espesyal na pakikiamigo ki Jehova?

¹⁴ Pinapalakop na marhay kan kinaban “an kamawutan kan mga mata saka an pagpasikat nin saro kan mga bagay na igwa siya.” (1 Juan 2:16) Pero huling sadiri kita ni Jehova, sinasadol kita na “isikwal an bakong diyosnon na paggawi saka kinabanon na mga pagmawot asin na mamuhay na tultol an isip asin matanos saka may debosyon sa Diyos sa tahaw kan presenteng sistemang ini nin mga bagay.” (Tito 2:12) Sa satong pagtaram, ugali sa pagkakan asin pag-inom, pagbado asin pagpakarhay sa sadiri, ugali sa trabaho—sa gabos na ginigibo ta—dapat na masabi kan mga nagmamasid sa sato na si Jehova sana an satong sinasamba.—Basahon an 1 Corinto 10:31, 32.

15. Taano ta dapat niyatong trataron nin may kabuutan asin pagkamuot an satong mga kapwa parasamba?

¹⁵ An satong pag-apresyar sa espesyal na pakikiamigo sa sato ni Jehova mahihiling sa pagtratar ta sa satong mga kapwa parasamba. Sinda sadiri man ni Jehova. Kun pirmi niyatong tatandaan an katotoohan na iyan, pirmi niyatong tatrataron nin may kabuutan asin pagkamuot an satong mga tugang. (1 Tes. 5:15) Sinabi ni Jesus sa saiyang mga parasunod: “Paagi kaini maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.”—Juan 13:35.

16. Anong halimbawa sa Katugunan ni Moises an nagpapahiling kan pagkamuot ni Jehova sa saiyang banwaan?

¹⁶ Mapadapit sa kun paano niyato dapat trataron an lambang saro sa kongregasyon, pag-isipan ini: An mga kasangkapan sa templo ni Jehova ginagamit, o nakatagama, para sana sa dalisay na pagsamba. Detalyadong sinambit sa Katugunan ni Moises kun paano gagamiton saka isasaray an mga kasangkapan na ini, asin an mga dai diyan masunod gagadanon. (Bil. 1:50, 51) Kun iningatan nganing marhay ni Jehova an mayong buhay na mga kasangkapan na idto na ginamit sa pagsamba saiya, lalo nang mas poprotektaran niya an saiyang dusay asin maimbod na mga parasamba na pinili niya na magin saiyang banwaan! Kan kaulay niya an saiyang banwaan, sinabi ni Jehova na kun an ‘siisay man magtikwil sa sainda nagtitikwil man sa [alintataw] kan saiyang mata.’—Zac. 2:8.

17. Sa ano si Jehova ‘nagtatao nin atensiyon asin naghihinanyog’?

¹⁷ Interesanteng maaraman na sinambit ni Malaquias na si Jehova ‘nagtatao nin atensiyon asin naghihinanyog’ kun paano tinatratar kan Saiyang mga lingkod an lambang saro. (Mal. 3:16) Iyo, “midbid ni Jehova kun sairisay an saiya.” (2 Tim. 2:19) Aram niyang marhay an lambang ginigibo asin sinasabi ta. (Heb. 4:13) Kun bako kitang mabuot sa satong kapwa mga parasamba, si Jehova ‘nagtatao nin atensiyon asin naghihinanyog.’ Kun kita mapag-istimar, bukas-palad, mapagpatawad, asin mabuot sa lambang saro, makakasigurado kita na naririsa man iyan ni Jehova.—Heb. 13:16; 1 Ped. 4:8, 9.

18. Paano niyato maipapahiling an satong pasasalamat sa onra na magin banwaan ni Jehova?

¹⁸ Siguradong gustong-gusto niyatong ipahiling an satong pasasalamat ki Jehova sa onra na magin saiyang banwaan. Nahihiling niyato kun taano ta sarong kadunungan na ipamidbid niyato na sadiri niya kita paagi sa gikan sa buot na pagdusay kan satong sadiri sa saiya. Dawa “napapalibutan [kita] nin sarong maraot asin makasalan na henerasyon,” gusto niyatong mahiling kan mga tawo na kita “daing katuyawan asin dalisay an puso” asin “nagliliwanag bilang mga ilaw sa kinaban.” (Fil. 2:15) Marigon kitang naninindugan laban sa karatan. (Sant. 4:7) Saka namumutan asin iginagalang niyato an satong kapwa mga parasamba, huling aram tang sadiri man sinda ni Jehova.—Roma 12:10.

19. Paano binabalusan ni Jehova an mga tawong sadiri niya?

¹⁹ Nanunuga an Bibliya: ‘Dai nanggad papabayaan ni Jehova an saiyang banwaan.’ (Sal. 94:14) An garantiyang ini siyerto nanggad na mauutob ano man na kasakitan an agihan niyato. Maski an kagadanan dai makakaulang sa pagkamuot ni Jehova sa sato. (Roma 8:38, 39) “Kun kita nabubuhay, nabubuhay kita para ki Jehova, asin kun kita magagadan, magagadan kita para ki Jehova. Kaya mabuhay man kita o magadan, ki Jehova kita.” (Roma 14:8) Hinahalat-halat na niyatong marhay an aldaw na bubuhayon liwat ni Jehova an gabos niyang maimbod na amigo. (Mat. 22:32) Dawa ngunyan, nag-aako na kita nin dakul na bendisyon. Arog kan sinasabi kan Bibliya, “maugma an nasyon na an Diyos iyo si Jehova, an banwaan na pinili niya bilang saiyang pagsadiri.”—Sal. 33:12, NW.