Ano Talaga an Nagpapaati sa Sarong Tawo?

Mantang paparani an Paskuwa kan 32 C.E., si Jesus sibot sa pagtutukdo sa Galilea. Dangan posibleng nagpa-Jerusalem siya para sa Paskuwa, arog kan hinahagad kan Katugunan nin Diyos. Minsan siring, ginibo niya iyan nin maingat huling pighihinguwa siyang gadanon kan mga Judio. (Juan 7:1) Pagkatapos kaiyan nagbalik siya sa Galilea.

Posibleng nasa Capernaum si Jesus kan may mga Fariseo asin mga eskriba na magduruman sa saiya hali sa Jerusalem. Taano ta nagbaklay sinda? Naghahanap sinda nin basehan para akusaran si Jesus nin pagbalga sa relihiyon. Naghapot sinda: “Taano ta pigbabalga kan mga disipulo mo an tradisyon kan mga tawo kan inot na mga panahon? Halimbawa, dai sinda naghuhugas nin kamot pag makakan.” (Mateo 15:2) Nungkang sinabihan nin Diyos an saiyang banwaan na sunudon an ritwal na ini na ‘paghugas kan saindang mga kamot abot sa siko.’ (Marcos 7:3) Pero para sa mga Fariseo, sarong seryosong pagkakasala an dai paggibo kaiyan.

Imbes na direktang simbagon an akusasyon ninda, sinabi ni Jesus kun paano ninda tuyong binabalga an Katugunan nin Diyos. “Taano ta pigbabalga nindo an pagbuot nin Diyos dahil kan saindong tradisyon?” an hapot niya sa sainda. “Halimbawa, sinabi nin Diyos, ‘Tawan mo nin onra an saimong ama saka an saimong ina,’ asin, ‘An siisay man na nagmamaldisyon sa saiyang ama o ina dapat na gadanon.’ Pero an sinasabi nindo, ‘An siisay man na magsabi sa saiyang ama o ina: “Ano man na bagay na igwa ako na mapapakinabangan nindo, iyan sarong dulot na idinusay sa Diyos,” dai na niya kaipuhan na tawan pa nin onra an saiyang ama.’”—Mateo 15:3-6; Exodo 20:12; 21:17.

Hinihingako kan mga Fariseo na solamenteng para sa templo an kuwarta, pagsadiri, o ano man na idinusay sa Diyos bilang dulot, kaya dai iyan puwedeng gamiton sa ibang katuyuhan. Pero an totoo, yaon pa sa indibidwal an idinusay na dulot. Halimbawa, puwedeng sabihon nin sarong aki na an kuwarta niya o pagsadiri “corban,” sarong dulot na idinusay sa Diyos o sa templo, na garo baga dai na iyan puwedeng gamiton sa ibang katuyuhan apuwera sa templo. An kuwarta o pagsadiri kapot pa kan aki, pero sinasabi niya na dai na iyan puwedeng gamiton para sa saiyang may edad nang mga magurang na nangangaipo. Kaya linilikayan sana niya an saiyang responsabilidad sa sainda.—Marcos 7:11.

Tama sana na maanggot si Jesus sa pagbiribid na ini sa Katugunan nin Diyos asin magsabi: “Ginibo nindong daing saysay an tataramon nin Diyos dahil kan saindong tradisyon. Kamo na mga parasagin-sagin, tama nanggad an propesiya ni Isaias manungod sa saindo kan sabihon niya: ‘An banwaan na ini nagtataong onra sa sakuya paagi kan saindang mga ngabil, alagad an saindang mga puso harayuon sa sako. Daing kamanungdanan an padagos na pagsamba ninda sa sakuya, huli ta itinutukdo ninda an mga pagbuot nin mga tawo bilang mga doktrina.’” Daing naisimbag an mga Fariseo sa mapuwersang pagtuyaw ni Jesus. Kaya inapod niya an mga tawo para magrani. “Magdangog kamo asin sabuton ini,” an sabi niya. “Bako an minalaog sa nguso nin tawo an nagpapaati sa saiya, kundi an minaluwas sa nguso niya iyo an nagpapaati sa saiya.”—Mateo 15:6-11; Isaias 29:13.

Dai nahaloy kan yaon sinda sa sarong harong, nagharapot an mga disipulo ki Jesus: “Aram mo daw na nagkaaranggot an mga Fariseo kan madangog ninda su sinabi mo?” Nagsimbag siya: “An lambang tanom na dai itinanom kan sakuyang langitnon na Ama gagabuton. Pabayai sinda. Mga buta sindang parakabit. Kaya, kun tawong buta an makabit sa sarong buta, pareho sindang mahuhulog sa kalot.”—Mateo 15:12-14.

Minalataw na nagngalas si Jesus kan si Pedro makiulay para sa mga disipulo na linawon niya an manungod sa kun ano an nagpapaati sa sarong tawo. Nagsimbag si Jesus: “Dai nindo aram na an ano man na minalaog sa nguso minaagi sa tulak asin ilinuluwas sa kasilyasan? Alagad, an ano man na minaluwas sa nguso minagikan sa puso, asin an mga bagay na iyan nagpapaati sa sarong tawo. Halimbawa, gikan sa puso minaluwas an maraot na mga pangangatanusan, mga paggadan, mga pakikisambay, seksuwal na imoralidad, mga paghabon, putik na mga kapahayagan, mga paglanghad. An mga bagay na ini an nagpapaati sa tawo; pero an pagkakan na dai naghugas nin kamot dai nagpapaati sa tawo.”—Mateo 15:17-20.

Dai man sinasabi ni Jesus na dai na kaipuhan na magin malinig sa sadiri, ni nangangatanusan man siya na an sarong tawo dai na kaipuhan maghugas nin kamot bago magpreparar nin pagkakan o bago magkakan. Imbes, kinokondenar niya an pagsagin-sagin kan mga lider nin relihiyon na naghihinguwang lusutan an matanos na mga katugunan nin Diyos paagi sa pagsunod sa mga tradisyon nin tawo. An totoo, an maraot na mga gibo na minagikan sa puso an nagpapaati sa sarong tawo.