Harani Na an Milagrosong Pagpaomay sa Katawohan

“DAI pa kami nakaheling kasuarin man nin arog kaini.” Iyan an sabi kan mga nakaheling mismo kan milagroso, tolos-tolos na pagpaomay ni Jesus sa sarong tawong paralitiko. (Marcos 2:12) Pinaomayan man ni Jesus an mga buta, pula, asin pilay, asin siring man kaiyan an ginibo kan saiyang mga parasunod. Paagi sa anong kapangyarihan na ginibo iyan ni Jesus? Ano an nagin kabtang kan pagtubod? Anong liwanag an itinatao kan mga eksperyensiang ini kan enot na siglo sa milagrosong pagpaomay ngonyan?​—Mateo 15:​30, 31.

“An Saimong Pagtubod Iyo an Nagpaomay sa Saimo”

An mga nagpapaomay ngonyan paagi sa pagtubod gustong-gustong sitaron an sinabi ni Jesus sa sarong babae na 12 taon nang inaawasan nin dugo na nagdolok sa saiya tanganing maomayan: “An saimong pagtubod iyo an nagpaomay sa saimo.” (Lucas 8:​43-48) Ipinarisa daw kan tataramon ni Jesus na an pagkaomay nia nasasarig sa saiyang pagtubod? Idto daw sarong halimbawa nin “pagpaomay paagi sa pagtubod” siring sa ginigibo ngonyan?

Kun maingat niatong binabasa an rekord kan Biblia, naheheling niato na sa kadaklan na okasyon si Jesus asin an saiyang mga disipulo dai naghagad na an mga naghehelang magpahayag kan saindang pagtubod bago paomayan. An babaeng nasambitan sa enotan nagdatong asin, mayo man lamang nin sinasabi ki Jesus, daing girong na dinuotan an saiyang gubing sa likodan asin “tolos man napongpong an pag-awas kan saiyang dugo.” Sa saro pang okasyon, pinaomayan ni Jesus an sarong lalaki na kabilang duman sa mga nagdatong tanganing arestaron sia. Pinaomayan pa ngani nia an sarong lalaki na mayo man lamang nin ideya kun siisay si Jesus.​—Lucas 22:​50, 51; Juan 5:​5-9, 13; 9:​24-​34.

Ano, kun siring, an nagin kabtang nin pagtubod? Kan si Jesus asin an saiyang mga disipulo nasa distrito nin Tiro asin Sidon, an sarong babaeng taga-Fenicia nagdatong asin nagkurahaw: “Maherak ka sa sako, Kagurangnan, Aki ni David. An sakong aking babae makuring sinasaniban nin demonyo.” Imahinara an saiyang pagkadesesperar mantang sia nakikimaherak: “Kagurangnan, tabangi ako!” Pano nin pagkaherak, si Jesus nagsimbag: “O babae, dakula an saimong pagtubod; mangyari logod sa saimo siring sa saimong pinagmamawot.” Asin an saiyang aking babae naomayan “poon kan oras na idto.” (Mateo 15:​21-28) Malinaw na kalabot an pagtubod, alagad kiisay na pagtubod? Mangnoha na an pagtubod kan ina, bakong kan aking naghehelang, an inomaw ni Jesus. Asin pagtubod sa ano? Paagi sa pag-apod ki Jesus na “Kagurangnan, Aki ni David,” hayag na minimidbid kan babae na si Jesus an ipinanugang Mesiyas. Idto bako sanang simpleng kapahayagan nin pagtubod sa Dios o pagtubod sa kapangyarihan kan nagpapaomay. Kan sabihon ni Jesus, “An saimong pagtubod iyo an nagpaomay sa saimo,” boot niang sabihon na kun dai nin pagtubod sa saiya bilang an Mesiyas, an mga nasasakitan nin makuri dai kutana madolok sa saiya tanganing maomayan.

Sa mga halimbawang ini sa Kasuratan, maheheling niato na an pagpaomay ni Jesus laen na marhay sa komun na naheheling o hinihingako ngonyan. Mayo nin makosog na emosyonal na pasale​—pagkurahaw, pagkanta, panangis, pagkadismayo, asin iba pa—​an kadaklan asin mayo nin dramatikong pagkataranta sa parte ni Jesus. Dugang pa, nungkang nasudya si Jesus sa pagpaomay sa may kamatean huli sa sarahotan na sinda kulang nin pagtubod o kulang an itinaong dolot.

Mga Pagpaomay Paagi sa Kapangyarihan nin Dios

Paano nangyari an mga pagpaomay ni Jesus asin kan saiyang mga disipulo? “An kapangyarihan ni Jehova yaon tangani na sia magpaomay,” an simbag kan Biblia. (Lucas 5:17) Pakatapos nin sarong pagpaomay, sabi kan Lucas 9:​43, “sinda gabos nagpoon na magngalas nin labi-labi sa nakagugulat na kapangyarihan nin Dios.” Angay nanggad, dai inapod ni Jesus an atension sa saiyang sadiri bilang an nagpapaomay. Sa sarong okasyon sinabi nia sa sarong lalaki na pinatalingkas nia sa panriribok nin demonyo: “Pumuli ka sa saimong mga paryente, asin ibareta mo sa sainda an gabos na bagay na ginibo sa saimo ni Jehova asin an pagkaherak nia sa saimo.”​—Marcos 5:19.

Mantang si Jesus asin an mga apostol nagpaomay paagi sa kapangyarihan nin Dios, pasil na masabotan kun taano an pagtubod kan binobolong ta dai perming kaipuhan para sa pagpaomay. Minsan siring, kaipuhan an makosog na pagtubod kan nagpapaomay. Huli kaini, kan an mga parasunod ni Jesus dai mapahale an sarong pambihira kamakapangyarihan na demonyo, sinabi sa sainda ni Jesus an rason: “Huli sa saindong kadikit na pagtubod.”​—Mateo 17:20.

An Katuyohan nin Milagrosong Pagpaomay

Minsan ngani dakol na pagpaomay an ginibo ni Jesus sa bilog na ministeryo nia digdi sa daga, an pangenot na ginigibo nia bakong ‘ministeryo sa pagpaomay.’ An saiyang milagrosong pagpaomay​—na para dian nungkang siningil nia an mga tawo o hinagadan nin ano man na donasyon—​segunda sa pangenot niang interes, an ‘paghuhulit kan maogmang bareta kan kahadean.’ (Mateo 9:35) An rekord nagsasabi na sa sarong okasyon “sia maboot na nag-ako sa sainda asin nagtaram sa sainda dapit sa kahadean nin Dios, asin pinaomayan nia an mga nangangaipo nin pagpaomay.” (Lucas 9:11) Sa mga pagkasaysay sa Ebanghelyo, si Jesus parateng inaapod na “Paratokdo” alagad nungka na “Parapaomay.”

Taano, kun siring, ta naggibo si Jesus nin milagrosong mga pagpaomay? Sa pangenot tanganing patunayan na sia an ipinanugang Mesiyas. Kan si Juan na Bautisador ikarsel sa bakong makatanosan na paagi, boot nia nin garantiya na naotob nia an isinugo nin Dios na gibohon nia. Pinaduman nia ki Jesus an saiyang mga disipulo asin naghapot: “Ano ika na an Sarong Madatong, o maghahalat pa kami nin iba?” Mangnoha an sinabi ni Jesus sa mga disipulo ni Juan: “Paduman kamo asin ibareta nindo ki Juan an saindong nadadangog asin naheheling: An mga buta nakaheheling na liwat, asin an mga pilay naglalakaw, an mga daoton nalilinigan asin an mga bongog nakadadangog, asin an mga gadan binubuhay liwat, asin an mga dukha pinapahayagan kan maogmang bareta.”​—Mateo 11:​2-5.

Iyo, an katunayan na bako sanang mga pagpaomay an ginibo ni Jesus kundi pati an iba pang milagrosong mga gibo na irinekord sa mga Ebanghelyo marigon na nagpapatunay na sia “an Sarong Madatong,” an ipinanugang Mesiyas. Dai na kaipuhan na an siisay man ‘maghalat pa nin iba.’

Milagrosong mga Pagpaomay Ngonyan?

Kun siring, maninigo daw niatong laoman na patunayan nin Dios an saiyang kapangyarihan ngonyan paagi sa mga pagpaomay? Dai. Paagi sa milagrosong mga ginibo nia paagi sa kapangyarihan nin Dios, pinatunayan ni Jesus sa dai mapagdududahan na paagi na sia an Mesiyas na ipinanuga nin Dios na madatong. An mapangyaring mga gibo ni Jesus irinekord sa Biblia tanganing mabasa kan gabos. Dai na kaipuhan na patunayan iyan nin Dios paagi sa pag-otro kan siring na mga gibo sa lambang kapag-arakian nin mga tawo.

Interesante na an mga pagpaomay asin iba pang milagrosong mga gibo nakakokombensir sana sa sarong limitadong sokol. Minsan an ibang nakaheling mismo kan mga milagro ni Jesus dai naniwala na sinusuportaran sia kan saiyang langitnon na Ama. “Minsan sia guminibo nin kadakoldakol na tanda sa atubangan ninda, dai sinda minatubod sa saiya.” (Juan 12:37) Iyan an dahelan kun taano ta, pakatapos na ipaliwanag an laen-laen na milagrosong balaog​—paghula, pagtaram sa laen-laen na tataramon, pagpaomay, asin iba pa—​na itinao nin Dios sa manlaenlaen na miembro kan Kristianong kongregasyon kan enot na siglo, si apostol Pablo pinasabngan na magsabi: “Minsan kun igwang mga balaog nin paghula, iyan mapapara; minsan igwang mga tataramon, iyan maontok; minsan igwang kaaraman, iyan mahahale. Huli ta kita igwa nin kadikit na kaaraman asin kita naghuhula nin kadikit; alagad kun an sangkap dumatong na, idtong kadikit mawawara na.”​—1 Corinto 12:​28-​31; 13:​8-10.

Siempre, an pagkaigwa nin pagtubod sa Dios mahalagang marhay sa satong ikararahay. Minsan siring, an pagbasar kan pagtubod nin saro sa falsong mga panuga na pagpaomay magbubunga sana nin pagkadesganar. Saro pa, mapadapit sa panahon kan katapusan, itinao ni Jesus an patanid na ini: “May malataw na mga falsong Cristo asin falsong propeta asin magtatao nin darakulang tanda asin ngangalasan tanganing ilagalag, kun sukat, minsan an mga pinili.” (Mateo 24:24) Apuera sa panloloko asin mga pandadaya, may mga maheheling man na kapangyarihan nin demonyo. Bilang resulta, dai kita maninigong magngalas sa hinihingakong dai ikapaliwanag na mga pangyayari, asin an mga ini segurado nanggad na bakong basehan para sa tunay na pagtubod sa Dios.

Mantang mayo ngonyan nin nagpapaomay na arog kan ginibo ni Jesus, may disbentaha daw sa sato? Dai man. An totoo, idtong mga pinaomayan ni Jesus puedeng maghelang liwat pag-abot nin panahon. Sinda gabos naggurang asin nagadan. An mga pakinabang sa pagpaomay na inako ninda medyo temporaryo sana. Pero, an milagrosong mga pagpaomay ni Jesus igwa nin nagdadanay na kahulogan ta ipinanganino kaiyan an mga bendisyon sa ngapit.

Huli kaini, pakasiyasat sa Tataramon nin Dios, an Biblia, si Alexandre asin Benedita, na nasambitan kasubago, dai na nagtutubod sa presenteng pagpaomay paagi sa pagtubod asin espiritistikong mga pagbolong. Minsan siring, kombensido sinda na an milagrosong mga pagpaomay bakong mga bagay na kaidto sanang nakaagi. Taano ta siring? Arog kan minilyon sa bilog na kinaban, tinatanaw ninda sa enotan an mga bendisyon na pagpaomay sa pagsakop kan Kahadean nin Dios.​—Mateo 6:​10.

Mayo Nang Helang Asin Kagadanan

Siring sa naheling niato kasubago, an pangenot na katuyohan kan ministeryo ni Jesus bakong tanganing magpaomay sa mga may helang asin gumibo nin iba pang milagro. Imbes, ginibo niang pangenot na trabaho an paghuhulit kan maogmang bareta kan Kahadean nin Dios. (Mateo 9:​35; Lucas 4:​43; 8:1) An Kahadean na iyan iyo an instrumento na paagi kaiyan gigibohon nin Dios an milagrosong pagpaomay sa katawohan asin hahaleon an gabos na danyos na dinara kan kasalan asin pagkabakong sangkap sa pamilya nin katawohan. Paano asin noarin nia gigibohon ini?

Sa pagtanaw sa harayong ngapit, tinawan ni Cristo Jesus nin sarong makahulang bisyon an saiyang apostol na si Juan: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo!” (Kapahayagan 12:10) An gabos na ebidensia nagpapaheling na poon kan 1914 an dakulang paratumang sa Dios, si Satanas, ihinolog na sa palibot kan daga, asin an Kahadean nagpupunsionar na ngonyan bilang sarong katunayan! Si Jesus pinatukaw na bilang an Hade kan Mesiyanikong Kahadean asin andam na ngonyan na gumibo nin dakulang mga pagliliwat sa daga.

Sa haranihon nang ngapit, an langitnon na gobyerno ni Jesus mamamahala sa sarong matanos na bagong sosyedad nin tawo, na garo baga “sarong bagong daga.” (2 Pedro 3:​13) Paano daw an magigin mga kamugtakan sa panahon na iyan? Uya an sarong mamuraway na patanaw: “Naheling ko an bagong langit asin bagong daga; huli ta nakalihis na an dating langit asin an dating daga . . . Asin papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:​1, 4.

Naiimahinar daw nindo kun paano an magigin buhay kun magkatotoo na an milagrosong pagpaomay sa katawohan? “Mayo nin nag-eerok na masabi: ‘Naghehelang ako.’ An mga tawo na nag-eerok sa daga iyo an mga pinatawad sa saindang kasalan.” Iyo, gigibohon nin Dios an dai noarin man magigibo nin mga nagpapaomay paagi sa pagtubod. “Hahalonon nia an kagadanan sagkod lamang.” Sa katunayan, “papahidon kan Soberanong Kagurangnan na si Jehova an mga luha sa gabos na lalauogon.”​—Isaias 25:8; 33:24.

[Retrato sa pahina 7]

Sa pagsakop kan Kahadean nin Dios an katawohan paoomayan sa milagrosong paagi