Maimbod Siya sa Ibong nin mga Pagbalo

1, 2. Ano an posibleng inaasahan ni Pedro kan nagpapahayag si Jesus sa Capernaum, alagad ano an nangyari?

PIGMAMASDAN ni Pedro an mga nagdadangog ki Jesus. Nasa sinagoga sinda sa Capernaum. Taga digdi si Pedro; digdi an hanapbuhay niyang paninira, sa amihanan na baybayon kan Dagat nin Galilea; digdi nakaistar an dakul sa mga katuod, paryente, asin kairiba niya sa hanapbuhay. Daing duda na inaasahan niya na mimidbidon man kan saiyang mga kahimanwa si Jesus bilang Mesiyas asin mauugma sindang manudan sa pinakanangungurog na paratukdong iyan an dapit sa Kahadian nin Diyos. Pero, bako iyan an nangyari.

² Dakul an dai na naghinanyog. May mga naggurumod-gumod asin nagkontra sa mensahe ni Jesus. Pero, an ikinakahadit na gayo ni Pedro iyo an reaksiyon kan nagkapira sa mismong mga disipulo ni Jesus. Bako na sindang maugma na mag-ako nin kaliwanagan, bagong kaaraman, asin katotoohan. Nauuyam na sinda, angguton pa ngani. May mga nagsabi na nakakakubhan an pananaram ni Jesus. Huling habo na nindang maghinanyog, naghali sinda sa sinagoga—asin dai na man nagsunod sa saiya.—Basahon an Juan 6:60, 66.

 3. Paano dakul na beses na nakatabang ki Pedro an pagtubod niya?

³ Masakit idto para ki Pedro asin sa saiyang mga kapwa apostol. Dai niya lubos na nasabutan an sinabi ni Jesus kan aldaw na iyan. Daing duda na aram niya kun taano ta garo nakakaanggot an sinabi ni Jesus kun sasabuton nin literal. Ano an gigibuhon ni Pedro? Bako ini an inot na beses na nabalo an kaimbudan niya sa saiyang Kagurangnan, asin bako man ini an huri. Hilingon ta kun paano nakatabang sa saiya an pagtubod niya na mapangganahan an siring na mga pagbalo asin magdanay na maimbod.

4, 5. Paano naghiro si Jesus na lain sa inaasahan sa saiya kan mga tawo?

⁴ Parating nabibigla si Pedro sa ginigibo asin sinasabi ni Jesus. Kun minsan, an ginigibo asin sinasabi kan saiyang Kagurangnan lain sa inaasahan sa Saiya kan mga tawo. Sarong aldaw pa sana an nakaagi, milagrosong pinakakan ni Jesus an rinibo katawo. Huli kaiyan, pinurbaran nindang gibuhon siyang hadi. Alagad, nabigla an dakul huli ta naghali siya asin sinabihan an mga disipulo na magsakay sa baroto para magpa-Capernaum. Sa paglayag kan mga disipulo kan bangging iyan, nabigla giraray sinda ki Jesus kan maglakaw siya sa maalon na Dagat nin Galilea, na diyan nakanuod si Pedro nin mahalagang leksiyon dapit sa pagtubod.

⁵ Pagkaaga, naaraman tulos ninda na sinundan sinda kan mga tawo. Pero, malinaw na an gusto sana kan mga ini pakakanon giraray sinda ni Jesus paagi sa milagro, bakong makanuod nin espirituwal na mga katotoohan. Sinaway sinda ni Jesus huli sa pagigin materyalistiko ninda. (Juan 6:25-27) Nagpadagos an pag-urulay na iyan sa sinagoga sa Capernaum, na duman nagtukdo giraray si Jesus nin sarong mahalaga pero dipisil sabuton na katotoohan—na lain na naman sa inaasahan ninda.

 6. Anong ilustrasyon an itinao ni Jesus, asin ano an reaksiyon kan mga naghihinanyog sa saiya?

⁶ Gusto ni Jesus na magduman sa saiya an mga tawo, bakong huli sa pisikal na kakanon, kundi huli ta siya an espirituwal na probisyon nin Diyos na matao nin buhay na daing sagkod sa mga matubod sa saiya. Kaya nagtao siya nin ilustrasyon, na iinagid an sadiri niya sa manna, an tinapay na hali sa langit kan panahon ni Moises. Kan may mga magkontra, naggamit siya nin klarong ilustrasyon, na ipinapaliwanag na para magkamit nin buhay kaipuhan nindang magkakan kan laman niya asin mag-inom kan dugo niya. Lalo pa sindang naanggot. Nagsabi an nagkapira: ‘[Nakakakubhan] na tataramon ini; siisay an makakadangog kaiyan?’ Dakul sa mga disipulo mismo ni Jesus an dai na nagsunod sa saiya.a—Juan 6:48-60, 66.

7, 8. (a) Ano an dai pa nasasabutan ni Pedro dapit sa papel ni Jesus? (b) Ano an simbag ni Pedro sa hapot ni Jesus sa mga apostol?

⁷ Ano an gigibuhon ni Pedro? Siguradong naribaraw man siya sa sinabi ni Jesus. Dai pa niya nasasabutan na kaipuhan magadan si Jesus para mautob an kabutan nin Diyos. Pero, naisip daw niyang magpundo na man arog kan mga disipulong paburubago an isip na nagbaya ki Jesus kan aldaw na idto? Dai; may mahalaga siyang pagkakalain sa sainda. Ano iyan?

⁸ Naghiling si Jesus sa mga apostol niya asin nagsabi: “Mabaraya man kamo?” (Juan 6:67) An 12 an kinakaulay niya, pero si Pedro an nagtaram. Parati siyang arog kaiyan huling posible na siya an pinakamatua sa sainda. Ano man an dahilan, siya nanggad an pinakaprangka sa grupo; garo bihira siyang mag-alangan na sabihon an nasa isip niya. An nasa isip niya ngunyan iyo an magayon asin dai malilingawan na mga tataramon na ini: ‘Kagurangnan, kiisay pa kami maduman? Ika an igwa kan mga tataramon nin buhay na daing katapusan.’—Juan 6:68.

 9. Paano ipinahiling ni Pedro an kaimbudan ki Jesus?

⁹ Dai ka daw napapahiro kaiyan? An pagtubod ni Pedro ki Jesus nakatabang sa saiya na mapatalubo an mahalagang kuwalidad—kaimbudan. Malinaw na nasabutan niya na si Jesus an solamenteng Paraligtas na itinao ni Jehova asin na nagliligtas si Jesus paagi sa saiyang mga tataramon—an katukduan dapit sa Kahadian nin Diyos. Aram ni Pedro na dawa may mga bagay na dai niya nasasabutan, mayo na siyang madudumanan kun gusto niyang magkamit kan pabor nin Diyos asin kan bendisyon na buhay na daing katapusan.

10. Paano ta maaarog ngunyan an kaimbudan ni Pedro?

¹⁰ Arog ka man daw kaiyan? Makamumundo na dakul sa kinaban ngunyan an nagsasabing namumutan si Jesus pero bako man maimbod sa saiya. Tanganing magin tunay na maimbod ki Cristo, kaipuhan tang arugon an pagmansay ni Pedro sa mga katukduan ni Jesus. Kaipuhan tang manudan iyan, masabutan an kahulugan kaiyan, asin mamuhay uyon diyan—dawa pa lain iyan sa inaasahan o gusto niyato. Makakamtan ta sana an paglaom na buhay na daing katapusan na gusto ni Jesus para sa sato kun magigin maimbod kita.—Basahon an Salmo 97:10.

11. Sain iiniba ni Jesus an mga parasunod niya? (Hilingon man an nota sa ibaba.)

¹¹ Dai nahaloy pagkatapos kan sibot na panahon na iyan, iiniba ni Jesus an mga apostol asin nagkapirang disipulo sa halawig na pagbaklay paamihanan. Kun minsan naaaninaw dawa sa malinaw na katubigan kan Dagat nin Galilea an natatakupan nin niyebeng alituktok kan Bukid nin Hermon, na nasa pinakaamihanan na linderos kan Dagang Panuga. Garo lalong naglalangkaw an bukid mantang parani an grupo, na nagtutukad sagkod na makaabot sa mga baryo harani sa Cesarea Filipos.b Sa magayon na lugar na ini, na natatanaw an haros bilog na Dagang Panuga sa timog, may importanteng ihinapot si Jesus sa mga parasunod niya.

12, 13. (a) Taano ta naghapot si Jesus kun ano an sabi kan kadaklan dapit sa saiya? (b) Sa sinabi ni Pedro ki Jesus, paano siya nagpahiling nin tunay na pagtubod?

¹² “Ano an sabi kan kadaklan, siisay daa ako?” an gusto niyang maaraman. Maiimahinar ta si Pedro na nakahiling sa marigmat na mga mata ni Jesus, kaya narisa niya giraray an kabuutan asin pambihirang intelihensiya kan saiyang Kagurangnan. Interesado si Jesus na maaraman kun ano an pakamidbid sa saiya kan mga tawo basado sa nahiling asin nadangog ninda. Sinimbag kan mga disipulo ni Jesus an hapot, na sinasabi giraray an nagkapira sa lakop asin salang mga ideya dapit sa kun siisay siya. Pero may gusto pang maaraman si Jesus. Sala man daw an iniisip kan pinakadayupot na mga parasunod niya? “Alagad kamo, ano an sabi nindo, siisay ako?” an hapot niya.—Luc. 9:18-20.

¹³ Sa giraray, nagsimbag tulos si Pedro. Sinabi niya nin malinaw asin direkta kun ano an nasa puso kan dakul na yaon duman. ‘Ika iyo an Cristo, an Aki nin Diyos na buhay,’ an sabi niya. Maiimahinar ta an pag-uyon ni Jesus ki Pedro paagi sa maugmang komendasyon sa saiya. Ipinagirumdom ni Jesus ki Pedro na si Jehova—bakong siisay man na tawo—an naghayag kan mahalagang katotoohan na ini sa mga may tunay na pagtubod. Natabangan nanggad si Pedro na masabutan an saro sa pinakanangungurog na mga katotoohan na ihinayag na ni Jehova—kun siisay an haloy nang ipinanugang Mesiyas, o Cristo!—Basahon an Mateo 16:16, 17.

14. Anong mahahalagang pribilehiyo an itinao ni Jesus ki Pedro?

¹⁴ An Cristong ini iyo an inaapod sa suanoy na hula na sarong gapo na isisikwal kan mga paratugdok. (Sal. 118:22; Luc. 20:17) Huling nasa isip ni Jesus an mga hulang iyan, ihinayag niya na maestablisar si Jehova nin kongregasyon sa mismong gapo na sinambit pa sana ni Pedro kun siisay. Dangan itinao niya ki Pedro an nagkapirang mahalagang pribilehiyo sa kongregasyon na iyan. Dai niya ilinangkaw si Pedro sa ibang mga apostol, arog kan paghuna nin nagkapira, kundi tinawan niya ini nin mga paninimbagan. Itinao niya ki Pedro ‘an mga liyabe kan kahadian.’ (Mat. 16:19) Pribilehiyo ni Pedro na buksan an paglaom na makalaog sa Kahadian nin Diyos an tulong grupo nin mga tawo—mga Judio nguna, dangan mga Samaritano, asin ultimo mga Hentil, o bakong mga Judio.

15. Taano asin paano sinaway ni Pedro si Jesus?

¹⁵ Minsan siring, sinabi ni Jesus pagkatapos kaini na an tinawan nin dakul maninimbag man nin dakul, asin totoo iyan ki Pedro. (Luc. 12:48) Padagos na ihinayag ni Jesus an mahahalagang katotoohan dapit sa Mesiyas, kaiba na an pagigin siyerto kan nagdadangadang na pagsakit asin kagadanan niya sa Jerusalem. Nahadit si Pedro kan madangog iyan. Kinabig niya si Jesus asin sinaway: ‘Kagurangnan, irayo lugod ini sa saimo: dai nanggad ini mangyayari sa saimo.’—Mat. 16:21, 22.

16. Paano itinanos ni Jesus si Pedro, asin anong praktikal na sadol an manunudan ta sa sinabi ni Jesus?

¹⁶ Siguradong marahay an intensiyon ni Pedro, kaya talagang nabigla siya sa reaksiyon ni Jesus. Tuminalikod si Jesus sa saiya, naghiling sa iba pang mga disipulo—na posibleng pareho man an iniisip—asin nagsabi: ‘Padiyan ka sa likudan ko, Satanas, ika sarong singkugan sa sako: huli ta dai mo iniisip an mga bagay nin Diyos, kundi an sa mga tawo.’ (Mat. 16:23; Mar. 8:32, 33) May praktikal na sadol sa sato gabos an sinabi ni Jesus. Madalion kitang maimpluwensiyahan kan kaisipan nin tawo kisa kan kaisipan nin Diyos. Kaya dawa kun an intensiyon ta makatabang, tibaad dai niyato naririsa na sinusuportaran ta na palan an katuyuhan ni Satanas imbes na an sa Diyos. Pero, ano an reaksiyon ni Pedro?

17. Ano an buot sabihon ni Jesus kan sabihan niya si Pedro na ‘padiyan ka sa likudan ko’?

¹⁷ Siyertong aram ni Pedro na bakong literal an pag-apod sa saiya ni Jesus na Satanas na Diyablo. Kun sa bagay, an pagkaulay ni Jesus ki Pedro bakong arog kan pagkaulay niya ki Satanas. Ki Satanas, an sabi ni Jesus: ‘Humali ka’; ki Pedro, an sabi niya: ‘Padiyan ka sa likudan ko.’ (Mat. 4:10) Dai pinahali ni Jesus an apostol na ini na nahilingan niya nin dakul na marahay na kuwalidad, kundi itinanos sana niya an salang kaisipan kaini. Malinaw na dai dapat manginutan si Pedro sa Kagurangnan niya asin magin singkugan, kundi dapat na siya nasa likod ni Jesus bilang mapagsuportar na parasunod.

18. Paano nagpahiling nin kaimbudan si Pedro, asin paano ta siya maaarog?

¹⁸ Nakiargumento daw, naanggot, o nagraot an buot ni Pedro? Dai; mapakumbaba niyang inako an pagtatanos. Huli kaini, nagpahiling giraray siya nin kaimbudan. Gabos na nagsusunod ki Cristo kaipuhan na itanos kun minsan. Padagos kitang magigin mas dayupot ki Jesu-Cristo asin ki Jehova solamente kun mapakumbaba tang inaako an disiplina saka nakakanuod diyan.—Basahon an Talinhaga 4:13.

19. Ano an nakakabiglang sinabi ni Jesus, asin ano an tibaad naisip ni Pedro?

¹⁹ Dai nahaloy, may nakakabigla pang sinabi si Jesus: ‘Sa katotoohan ako nagsasabi saindo, Igwa nin nagkapira sa mga uya digdi na sa ano man na paagi dai makakanamit nin kagadanan, sagkod na mahiling ninda an Aki nin tawo na minadigdi sa saiyang kahadian.’ (Mat. 16:28) Daing duda na interesado si Pedro diyan. Ano daw an posibleng buot sabihon ni Jesus? Tibaad naisip ni Pedro na huli sa seryosong pagtatanos pa sana sa saiya, dai na niya makakamtan an siring na espesyal na mga pribilehiyo.

20, 21. (a) Iladawan an bisyon na nahiling ni Pedro. (b) Paano an pag-uulay kan mga nasa bisyon nakatabang na itanos si Pedro?

²⁰ Minsan siring, pakalihis nin mga sarong semana, iiniba ni Jesus si Santiago, Juan, asin Pedro sa ‘sarong halangkaw na bukid’—tibaad sa Bukid nin Hermon, na pirang kilometro sana an rayo. Posibleng banggi kaidto, huling tungkaon an tulo. Pero mantang namimibi si Jesus, may nangyari na nakahali kan tungka ninda.—Mat. 17:1; Luc. 9:28, 29, 32.

²¹ Nahiling ninda na nagbago an itsura ni Jesus. Nagkintab an saiyang lalawgon, nagliwanag, sagkod na nagin nakakasula arog kan aldaw. Nagkikinang man sa kaputian an bado niya. Dangan may duwa nang kaiba si Jesus, na nagrerepresentar ki Moises asin ki Elias. Nakipag-ulay sinda sa saiya dapit sa ‘saiyang [paghali] na uutubon sa Jerusalem’—minalataw na nanunungod sa kagadanan asin pagkabuhay liwat niya. Malinaw nanggad na sala si Pedro kan sabihon niya na dai makakaeksperyensiya si Jesus nin siring na pagsakit!—Luc. 9:30, 31.

22, 23. (a) Paano si Pedro nagpahiling nin pagigin entusiyastiko asin mabuot? (b) Ano pang balos an itinao ki Pedro, Santiago, asin Juan kan bangging iyan?

²² Gusto ni Pedro na magin kabtang minsan paano kan pambihirang bisyon na ini—asin tanganing pahaluyon pa gayod iyan. Garo baga mahali na si Moises asin Elias. Kaya nagsabi si Pedro: ‘Kagurangnan, marahay na digdi [lang] kita: asin maggiribo kita nin tulong [tolda], saro sa saimo, saro ki Moises, asin saro ki Elias.’ Siyempre, dai nagkakaipo nin tolda an duwang representasyon na ini sa bisyon huli ta sinda haloy nang gadan na mga lingkod ni Jehova. Dai talaga aram ni Pedro an sinasabi niya. Pero, bako daw na napaparani an buot nindo sa tawong ini na entusiyastiko asin mabuot?—Luc. 9:33.

²³ Si Pedro, Santiago, asin Juan tinawan nin saro pang balos kan bangging iyan. Mantang nasa bukid, nagkaigwa nin panganuron na luminindong sa sainda. May nadangog sindang tingog hali diyan—tingog ni Jehova! Siya nagsabi: ‘Ini iyo an sakong Aki, an sakong pinili: hinanyugon nindo siya.’ Pagkatapos kan bisyon, sinda na sana an nawalat kaiba ni Jesus sa bukid.—Luc. 9:34-36.

24. (a) Paano nakatabang ki Pedro an bisyon kan transpigurasyon? (b) Paano man iyan makakatabang sa sato ngunyan?

²⁴ Regalo nanggad para ki Pedro—asin para sa sato—an bisyon kan transpigurasyon! Pakalihis nin mga dekada, isinurat niya an dapit sa nagin pribilehiyo niya kan bangging iyan, an aktuwal na mahiling nin patiinot si Jesus bilang mamuraway na langitnon na Hadi asin magin saro sa ‘mga saksing nakahiling kan saiyang kadakulaan.’ Pinatunayan kan bisyon na iyan an dakul na hula sa Tataramon nin Diyos asin pinakusog kaiyan an pagtubod ni Pedro para sa mga pagbalong aatubangon pa niya. (Basahon an 2 Pedro 1:16-19.) Magigin totoo man iyan sa sato kun, arog ni Pedro, magdadanay kitang maimbod sa Kagurangnan na ninombrahan ni Jehova na manginot sa sato, na nakakanuod sa saiya, inaako an disiplina asin pagtatanos niya, saka mapakumbabang nagsusunod sa saiya aroaldaw.