Arogon an Saindang Pagtubod

Sia Maimbod sa Ibong nin mga Pagbalo

MAY paghadit na pinagmasdan ni Pedro an lalawgon kan mga nagdadangog ki Jesus. Sinda nasa sinagoga sa Capernaum. Nasa banwaan na ini an harong ni Pedro; yaon digdi an saiyang negosyong paninira, na nasa baybayon kan Dagat nin Galilea; nag-iistar digdi an dakol sa saiyang mga katood, paryente, asin kamidbid sa trabaho. Daing duda na gustong-gusto ni Pedro na mansayon man kan saiyang mga kahimanwa si Jesus arog kan pagmansay nia, na mamatean man ninda an kaogmahan nia kan manodan nia sa pinakadakula sa gabos na paratokdo an manongod sa Kahadean nin Dios. Pero, garo baga bakong arog kaiyan an mangyayari sa kamugtakan na ini.

Dakol an dai na naghihinanyog. An nagkapira nadadangog na naggugurumodgumod, na kinokontra an mensahe ni Jesus. Pero, an nakapapurisaw na gayo ki Pedro iyo an nagin reaksion kan nagkapira sa mga disipulo mismo ni Jesus. Dai na maheheling sa saindang lalawgon an kaogmahan huli sa pagkamit nin kaliwanagan asin an kagayagayahan huli sa pakanood kan katotoohan. Ngonyan, an maheheling sa sainda iyo an pagkaaburido o pagkaanggot pa ngani. May mga nagtaram, na nagsabing labi-labi kanakakakubhan an mga tataramon ni Jesus. Sa pagsayumang maghinanyog pa ki Jesus, sinda naghale sa sinagoga—saka dai na nagsunod sa saiya.

Iyan masakit na panahon para ki Pedro asin sa mga kapwa apostol nia. Dai lubos na nasabotan ni Pedro an sinabi ni Jesus kan aldaw na iyan. Daing duda na nasasabotan nia kun taano ta bakong marahay na pagdangogon an mga tataramon ni Jesus kun dai iyan ipapaliwanag. Pero, ano an gigibohon ni Pedro? Bako iyan an enot na beses na nabalo an kaimbodan nia sa saiyang Kagurangnan, asin bako man iyan an huri. Helingon niato kun paano an pagtubod ni Pedro nakatabang sa saiya na mapangganahan an siring na mga pagbalo asin magdanay na maimbod.

Maimbod Dawa an Iba Bako Nang Maimbod

Si Pedro parateng nabibigla sa mga ginigibo ni Jesus. An saiyang Kagurangnan paorootrong naghiro asin nagtaram sa paagi na kontra sa inaasahan sa Saiya nin mga tawo. Sarong aldaw sana bago kaidto, milagrosong pinakakan ni Jesus an rinibong tawo. Huli kaiyan, prinobaran nindang gibohon siang hade. Pero, an dakol nabigla huli sa saiyang paghale asin pagpirit sa mga disipulo nia na magsakay sa baroto asin maglayag pasiring sa Capernaum. Mantang naglalayag an mga disipulo kan bangging iyan, nabigla giraray sinda kan si Jesus maglakaw sa binabagyong Dagat nin Galilea, na nagtao ki Pedro nin mahalagang leksion dapit sa pagtubod.a

Kan mag-aga na, naaraman ninda na an mga tawong idto nagsunod sa sainda sa ibong kan danaw. Pero, minalataw na an nagpahiro sa mga tawo, bako an pagkagutom sa espirituwal na mga katotoohan, kundi an pagmawot na maheling si Jesus na milagrosong nagpapakakan giraray. Sinaway sinda ni Jesus huli sa saindang pagigin materyalistiko. An pag-orolay na iyan nagpadagos sa sinagoga sa Capernaum, na duman an ginibo ni Jesus laen giraray sa inaasahan kan mga tawo sa paghihingoang magtokdo nin mahalagang marhay alagad hararom na katotoohan.

Gusto ni Jesus na mansayon sia kan mga tawo, bako bilang gikanan nin pisikal na kakanon sana, kundi bilang espirituwal na probisyon hale sa Dios, bilang an saro na an buhay asin kagadanan bilang tawo magpapagin posible kan buhay na daing sagkod para sa iba. Kaya nagtao sia nin ilustrasyon, na ikinokomparar an saiyang sadiri sa manna, an tinapay na naghilig hale sa langit kan panahon ni Moises. Kan magkontra an nagkapira, naggamit sia nin buhay na marhay na ilustrasyon, na ipinapaliwanag na tanganing magkamit nin buhay, kaipuhan nindang magkakan kan laman nia asin mag-inom kan dugo nia. Sa puntong ini, nagin daing ontok na an mga pagkontra. An nagkapira nagsabi: “Labi-labi kanakakakubhan an mga tataramon na ini; siisay an puedeng maghinanyog kaiyan?” Dakol sa mga disipulo mismo ni Jesus an dai na nagsunod sa saiya.b—Juan 6:48-60, 66.

Ano an gigibohon ni Pedro? Sia seguradong naribong man sa mga sinabi ni Jesus. Dai pa nia nasasabotan na si Jesus kaipuhan na magadan tanganing maotob an kabotan nin Dios. Pero, nasugotan daw si Pedro na dai na magsunod ki Jesus arog kan pabarobagong mga disipulong iyan na nagbaya ki Jesus kan aldaw na idto? Dai; may sarong mahalagang bagay na nagin dahelan na mapalaen si Pedro sa mga lalaking idto. Ano iyan?

Inatubang ni Jesus an saiyang mga apostol asin sinabi nia: “Kamo, gusto man nindong maghale?” (Juan 6:67) An 12 an kinakaolay nia, alagad si Pedro an nagtaram. Parateng arog kaiyan an nangyayari. Si Pedro gayod an pinakamatua sa sainda. Ano man an dahelan, siertong sia an pinakaprangka sa grupo; garo baga bihirang mag-alangan si Pedro na sabihon an nasa isip nia. Sa kamugtakan na ini, an nasa isip nia iyo an magayon asin dai malilingawan na mga tataramon na ini: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan.”—Juan 6:68.

Dai daw napapahiro an saindong puso kan mga tataramon na iyan? An pagtubod ni Pedro ki Jesus nakatabang sa saiya na pataluboon an marahayon na kualidad—kaimbodan. Malinaw na nasabotan ni Pedro na mayo na nin ibang Paraligtas apuera ki Jesus asin na si Jesus nagliligtas paagi sa saiyang mga sinasabi—an mga katokdoan nia manongod sa Kahadean nin Dios. Aram ni Pedro na dawa may mga bagay na nadedepisilan siang saboton, mayo na nin ibang madudumanan kun boot niang magkamit kan pabor nin Dios asin kan bendisyon na buhay na daing katapusan.

Arog daw kaiyan an namamatean nindo? Makamomondo, dakol sa kinaban ngonyan an nagsasabing namomoot ki Jesus alagad bako talagang maimbod. An tunay na kaimbodan ki Cristo nangangahulogan na an pagmansay niato sa mga katokdoan ni Jesus dapat na arog kan ki Pedro. Kaipuhan niatong manodan an mga iyan, masabotan an kahulogan kaiyan, asin mamuhay oyon dian—dawa kun makabigla iyan sa sato huli ta laen iyan sa inaasahan o gusto niato. Magkakaigwa sana kita kan paglaom na buhay na daing katapusan na gusto ni Jesus na kamtan niato, kun kita mapapatunayan na maimbod.

Maimbod Dawa Itinanos

Dai naghaloy pagkatapos kan sibot na panahon na iyan, giniyahan ni Jesus an saiyang mga apostol asin an nagkapirang disipulo sa halawig na pagbaklay paamihanan. Kun beses, an natatakopan nin niebe na alitoktok kan Bukid nin Hermon, na nasa pinakaamihanan na linderos kan Dagang Panuga, natatanaw dawa kun an saro nasa malinaw na katubigan kan Dagat nin Galilea. Luway-luway, an bukid na iyan garo orog na naglalangkaw mantang nagrarani an grupo, na minatukad pasiring sa mga baryo harani sa Cesarea Filipos.c Sa magayon na lugar na ini, na heling-heling sa ibaba an haros bilog na Dagang Panuga sa timog, hinapot ni Jesus an saiyang mga parasunod nin importanteng bagay.

“Siisay daa ako sabi kan mga kadaklan?” an gusto niang maaraman. Maiimahinar nanggad niato si Pedro na nagheheling sa mapagrisang mga mata ni Jesus, na naheheling giraray an kabootan kan saiyang Kagurangnan asin an mapuersa saka klarong intelihensia nia. Interesado si Jesus sa magigin kongklusyon kan mga nagdadangog sa saiya basado sa saindang naheling asin nadangog. Sinimbag kan mga disipulo ni Jesus an hapot, na sinabi giraray an nagkapira sa lakop na salang mga pagsabot mapadapit sa kun siisay si Jesus. Alagad may gusto pang maaraman si Jesus. Sala man daw an iniisip kan saiyang pinakadayupot na mga parasunod? “Pero, para sa saindo siisay ako?” an hapot nia.—Lucas 9:18-22.

Sa giraray, nagsimbag tolos si Pedro. Sinabi nia sa malinaw asin direktang paagi an kongklusyon na nasa puso kan dakol na yaon duman. “Ika an Cristo, an Aki kan buhay na Dios,” an sabi nia. Maiimahinar niato si Jesus na nag-ooyon ki Pedro mantang maogma niang kinokomendaran ini. Ipinagirumdom ni Jesus ki Pedro na si Jehova Dios—bakong tawo—an malinaw na naghayag kan mahalagang marhay na katotoohan na ini sa mga may tunay na pagtubod. Natabangan si Pedro na masabotan an saro sa pinakadakulang mga katotoohan na dai pa ihinahayag ni Jehova—kun siisay an haloy nang ipinanugang Mesiyas, o Cristo!—Mateo 16:16, 17.

An Cristong ini iyo an inaapod sa suanoy na hula na sarong gapo na hahaboan kan mga paratogdok. (Salmo 118:22; Lucas 20:17) Mantang nasa isip an siring na mga hula, ihinayag ni Jesus na maestablisar si Jehova nin kongregasyon sa mismong gapo, o dakulang gapo, na sinambit pa sana ni Pedro.d Dangan ipinagkatiwala nia ki Pedro an nagkapirang mahalagang marhay na pribilehio sa kongregasyon na iyan. Dai nia ilinangkaw si Pedro sa ibang mga apostol, arog kan hinona nin nagkapira, kundi tinawan nia ini nin mga paninimbagan. Itinao nia ki Pedro “an mga liabe kan kahadean.” (Mateo 16:19) Paninimbagan ni Pedro na an paglaom na makalaog sa Kahadean nin Dios mabukasan para sa tolong manlaenlaen na grupo nin katawohan—enot sa mga Judio, dangan sa mga Samaritano, asin ultimo sa mga Hentil, o mga bakong Judio.

Minsan siring, kan huri sinabi ni Jesus na an mga tinawan nin dakol maninimbag man nin dakol, asin an mga tataramon na iyan napatunayan na totoo sa nangyari ki Pedro. (Lucas 12:48) Padagos na naghayag si Jesus nin mahalagang marhay na mga katotoohan manongod sa Mesiyas, kaiba na an kasiertohan kan saiya mismong nagdadangadang na pagsakit asin kagadanan sa Jerusalem. Napurisaw si Pedro kan madangog an siring na mga bagay. Isiniblag nia si Jesus asin sinaway ini, na sinasabi: “Magin maboot ka sa saimong sadiri, Kagurangnan; dai ini noarin man mangyayari sa saimo.”—Mateo 16:21, 22.

Segurado na marahay an intension ni Pedro, kaya siertong nabigla sia sa reaksion ni Jesus. Sia tuminalikod ki Pedro, nagheling sa iba pang mga disipulo—na posibleng marhay na siring man an iniisip—asin nagsabi: “Dian ka sa likod ko, Satanas! Ika sarong singkogan sa sako, huli ta iniisip mo, bakong an mga kaisipan nin Dios, kundi an sa mga tawo.” (Mateo 16:23; Marcos 8:32, 33) An mga tataramon na iyan ni Jesus may praktikal na hatol para sa sato gabos. Madalion sanang togotan na an magin prioridad niato iyo an kaisipan nin tawo imbes na an diosnon na kaisipan. Kun totogotan niato iyan, dawa kun an gusto niato iyo na makatabang, tibaad dai niato tinutuyo na kita nagigin nang parasuportar kan katuyohan ni Satanas imbes na kan sa Dios. Pero, ano an nagin reaksion ni Pedro?

Siertong aram nia na dai sia inaapod ni Jesus bilang Satanas na Diablo sa ano man na literal na paagi. Total, an pagkaolay ni Jesus ki Pedro bakong arog kan pagkaolay nia ki Satanas. Ki Satanas, an sinabi ni Jesus: “Humale ka”; ki Pedro, an sabi nia: “Dian ka sa likod ko.” (Mateo 4:10) Dai isinikwal ni Jesus an apostol na ini na nahelingan nia nin dakulang karahayan, kundi itinanos Nia sana an salang kaisipan nia sa bagay na ini. Bakong depisil saboton na kinaipuhan ni Pedro na magpondo sa pagigin singkogan sa atubangan kan saiyang Kagurangnan asin mamugtak sa likod Nia bilang mapagsuportar na parasunod.

Si Pedro daw nakiargumento, naanggot, o nagraot an boot? Dai; mapakumbaba niang inako an pagtatanos. Sa siring, sia nagpaheling giraray nin kaimbodan. An gabos na nagsusunod ki Cristo mangangaipo nin pagtatanos kun beses. Kita orog na magigin dayupot ki Jesu-Cristo asin sa saiyang Ama, si Jehova Dios, solamente kun mapakumbaba niatong inaako an disiplina asin nakakanood dian.—Talinhaga 4:13.

Binalosan an Kaimbodan

Dai naghaloy, si Jesus may sinabi pang nakakabiglang mga tataramon: “Totoong ako nagsasabi sa saindo na igwa nin nagkapira sa mga uya digdi na sa ano man na paagi dai magnanamit nin kagadanan sagkod na dai nguna ninda maheling an Aki nin tawo na minadatong sa saiyang kahadean.” (Mateo 16:28) Daing duda na nagin interesado nanggad si Pedro sa mga tataramon na iyan. Ano an posibleng boot sabihon ni Jesus? Tibaad inisip ni Pedro na an mapuersang pagtatanos pa sana sa saiya nangangahulogan na mayo nin siring na espesyal na mga pribilehio na maabot sa saiya.

Minsan siring, pakalihis nin mga sarong semana iiniba ni Jesus si Santiago, Juan, asin Pedro sa “sarong halangkaw na bukid”—tibaad Bukid nin Hermon, na pira sanang kilometro an rayo. Posibleng marhay na banggi kaidto, huling linalabanan kan tolo an tungka. Alagad mantang namimibi si Jesus, may nangyari na nakahale nanggad kan tungka ninda.—Mateo 17:1; Lucas 9:28, 29, 32.

Naheling mismo ninda na nagbago si Jesus. An saiyang lalawgon nagliwanag, nagkinang, sagkod na iyan nagin siring kaliwanag kan saldang. An saiya man na gubing nagkikintab sa kaputian. Dangan may duwa na an itsura tawo na naheling na kaiba ni Jesus, an saro nagrerepresentar ki Moises asin an saro ki Elias. Nakipag-olay sinda sa saiya manongod sa “saiyang paghale na nakatalagang otobon nia sa Jerusalem”—minalataw na an saiyang kagadanan asin pagkabuhay liwat. Malinaw nanggad na sala si Pedro kan sabihon nia na dai mangyayari ki Jesus an siring na makologon na eksperyensia!—Lucas 9:30, 31.

Namatean ni Pedro na dapat siang makikabtang minsan paano sa ekstraordinaryong bisyon na ini. Garo baga binabayaan na ni Moises asin Elias si Jesus. Kaya si Pedro nagtaram: “Paratokdo, marahay na digdi lang kita, kaya magpatindog kita nin tolong tolda, saro para sa saimo, asin saro para ki Moises patin saro para ki Elias.” Siempre, an bisyonaryong representasyon na ini kan duwa sa haloy nang gadan na mga lingkod ni Jehova dai nagkakaipo nin mga tolda. Dai talaga aram ni Pedro an sinasabi nia. Pero, dai daw napaparani an boot nindo sa tawong iyan huli sa saiyang pagigin entusiastiko asin makikatood?—Lucas 9:33.

Sia, si Santiago, asin Juan nag-ako nin saro pang balos kan bangging iyan. Sa itaas ninda, may napormang dakulang panganoron asin iyan naglindong sa sainda sa bukid. Hale dian may nadangog na tingog—an tingog ni Jehova Dios! Sia nagsabi: “Iyo ini an sakong Aki, an pinili. Maghinanyog kamo sa saiya.” Dangan natapos an bisyon, asin sinda na sana an kaiba ni Jesus sa bukid.—Lucas 9:34-36.

Saro nanggad na balaog an bisyon na iyan para ki Pedro—asin para sa sato! Pakalihis nin mga dekada nagsurat sia dapit sa pribilehiong nakamtan nia kan bangging iyan, an magin saro sa “mga saksing nakaheling sa saiyang kamurawayan,” na aktuwal na naheling nin patienot si Jesus bilang sarong mamuraway na langitnon na Hade. An bisyon na iyan nagpatunay na tama an dakol na hula sa Tataramon nin Dios asin nagpakosog kan pagtubod ni Pedro na nag-andam sa saiya para sa mga pagbalong mapapaatubang pa sa saiya. (2 Pedro 1:16-19) Puede man iyan na magin totoo sa sato kun, arog ni Pedro, kita magdanay na maimbod sa Kagurangnan na ninombrahan ni Jehova na mangenot sa sato, na nakakanood sa saiya, inaako an disiplina asin pagtatanos nia, saka mapakumbabang nagsusunod sa saiya aroaldaw.

[Mga Nota sa Ibaba]

[Kahon/Ritrato sa pahina 28]

Siisay an Dakulang Gapo?

“Sinasabi ko sa saimo, Ika si Pedro, asin sa ibabaw kan dakulang gapong ini papatindogon ko an sakong kongregasyon.” (Mateo 16:18) An mga tataramon na iyan, na sinabi ni Jesus sa saiyang apostol na si Pedro, parateng sinasabot na si Pedro an magigin pundasyon kan Kristianong kongregasyon. Itinotokdo kan Iglesia Katolika na si Pedro ilinangkaw ni Jesus sa ibang apostol, na garo baga ginibo siang enot na papa. Huli kaini, sa Saint Peter’s Basilica sa Roma, an mga tataramon na iyan ni Jesus nakasurat nin malinaw sa lenguaheng Latin sa laog kan simbahan, na an mga letra mas halangkaw pa kisa sa tawo.

An boot daw sabihon ni Jesus si Pedro iyo an dakulang gapo na dian papatindogon ni Jesus an saiyang kongregasyon? Bako. Estudyare an tolong dahelan kun taano ta puede kitang makasegurado sa bagay na ini. Enot, yaon duman an ibang mga apostol, asin bakong arog kaiyan an pakasabot ninda sa mga tataramon ni Jesus. Kun si Pedro ilinangkaw ni Jesus sa atubangan ninda gabos, kun siring taano ta kan huri paorootro sindang nagdiskutiran kun siisay sa sainda an garo baga pinakadakula? (Marcos 9:33-35; Lucas 22:24-26) Ikaduwa, ipinaheling kan huri ni apostol Pablo na an dakulang gapo, bakong si Pedro, kundi si Jesu-Cristo. (1 Corinto 3:11; 10:4) Ikatolo, pakalihis nin mga dekada ipinaheling mismo ni Pedro na dai nia inisip na sia an dakulang gapo. Imbes, isinurat nia na si Jesu-Cristo an haloy nang ihinula na “gapong panganto” na pinili mismo nin Dios.—1 Pedro 2:4-8.

Pero, iiniinsistir nin nagkapira na huling an ngaran ni Pedro nangangahulogan na “Dakulang Gapo” (Rock), sia an dakulang gapo (rock-mass) na sinambit ni Jesus. Pero, an totoo, an ngaran ni Pedro bakong kapareho kan kahulogan kan mga tataramon na “dakulang gapo” na ginamit sa bersikulo man sanang ini. An ngaran ni Pedro nangangahulogan na “Sarong Pidaso nin Dakulang Gapo,” asin iyan noun na panglalaki; an mga tataramon na trinadusir na “dakulang gapo” noun na pambabae. Kun siring, paano dapat saboton an mga tataramon ni Jesus? Sia garo man sana nagsasabi ki Pedro: “Ika, an inapod ko na Pedro, o Dakulang Gapo (Rock), nasabotan mo kun siisay talaga an ‘dakulang gapo’ (rock-mass), an Cristo, na magseserbing pundasyon kan Kristianong kongregasyon.” Saro nanggad na pribilehio an nakamtan ni Pedro sa pagtabang na mahayag an siring na mahalagang katotoohan!

[Ritrato sa pahina 24, 25]

Si Pedro nagin maimbod dawa kinaipuhan siang itanos

[Ritrato sa pahina 26]

An kaimbodan ni Pedro binalosan paagi sa nakakaogmang bisyon