Sarong Mahalagang Leksiyon sa Kapakumbabaan

Pakatapos na maliwat an itsura ni Jesus asin paumayan an sarong aking lalaki na sinasaniban nin demonyo sa rehiyon nin Cesarea Filipos, nagpa-Capernaum si Jesus. An kaiba sana niya iyo an saiyang mga disipulo, tanganing dai ‘iyan maaraman’ kan mga tawo. (Marcos 9:30) Nagtao ini sa saiya nin urog pang pagkakataon na andamon an mga disipulo sa kagadanan niya asin sa gibuhon na gigibuhon ninda pagkatapos kaiyan. “An Aki nin tawo tatrayduron asin itatao sa kamot nin mga tawo,” an paliwanag niya, “saka gagadanon ninda siya, dangan sa ikatulong aldaw ibabangon siya.”—Mateo 17:22, 23.

Dai na iyan dapat magin bago sa mga disipulo. Bago kaini, sinabi na ni Jesus na gagadanon siya, pero habong maniwala ni Pedro. (Mateo 16:21, 22) Asin tulong apostol an nakahiling kan pagkaliwat kan itsura ni Jesus asin nakadangog kan pag-urulay manungod sa “paghali” niya. (Lucas 9:31) Nagin “grabe an kamunduan” ngunyan kan mga parasunod ni Jesus huli sa sinabi niya dawa ngani dai ninda lubos na naiintindihan. (Mateo 17:23) Pero, natatakot sindang maghapot pa sa saiya manungod diyan.

Dai nahaloy nag-abot sinda sa Capernaum, an pinakasentro kan gibuhon ni Jesus asin an sadiring banwa kan nagkapirang apostol. Duman, nagdulok ki Pedro an mga parakolekta nin buhis para sa templo. Tibaad gusto nindang purbaran na akusaran si Jesus nin dai pagbayad nin buhis, kaya naghapot sinda: “Nagbabayad kan duwang drakmang buhis [sa templo] an paratukdo nindo?”—Mateo 17:24.

“Iyo,” an simbag ni Pedro. Pagbalik sa harong, aram na ni Jesus kun ano an nangyari. Kaya imbes na halaton si Pedro na mag-istorya, naghapot si Jesus: “Ano sa paghuna mo, Simon? Kiisay nag-aako nin bayad o buhis an mga hadi kan daga? Sa mga aki ninda o sa ibang mga tawo?” Si Pedro nagsimbag: “Sa ibang mga tawo.” Kaya nagsabi si Jesus: “Kun siring, an mga aki libre sa buhis.”—Mateo 17:25, 26.

An Ama ni Jesus iyo an Hadi kan uniberso asin an Saro na sinasamba sa templo. Huli kaini, an Aki nin Diyos dai nin legal na obligasyon na magbayad nin buhis sa templo. “Pero tanganing dai kita makatao sa sainda nin bakong magayon na impresyon,” an sabi ni Jesus, “magduman ka sa dagat, magtunton ka nin banwit, tapos kuanon mo an inot na sirang magsubad, dangan pag binuka mo an nguso kaiyan, makakakua ka nin sarong sinsilyong pirak [sarong stater, o tetradrakma]. Kuana iyan asin ibayad mo sa sainda para sa sako asin sa saimo.”—Mateo 17:27.

Dai nahaloy nagkatiripon an mga disipulo asin igwa sindang hapot ki Jesus dapit sa kun siisay an magigin pinakaurog sa Kahadian. Kasuarin pa sana, an mga lalaking ini nagkatarakot na maghapot ki Jesus dapit sa maabot niyang kagadanan, pero ngunyan dai sinda natatakot na maghapot manungod sa saindang puturo. Aram ni Jesus an iniisip ninda. Dati na nindang pinagdidiskusyunan an manungod diyan mantang sinda kasunod niyang nagbabaklay papuli sa Capernaum. Kaya naghapot siya: “Ano an pinagdidiskusyunan nindo sa dalan?” (Marcos 9:33) Napasupog an mga disipulo kaya dai naggirirong, huling nagdidiriskusyunan sinda manungod sa kun siisay sa sainda an pinakaurog. Sa katapus-tapusi, ihinapot ninda ki Jesus an pinagdidiskusyunan ninda: “Siisay man nanggad an pinakaurog sa Kahadian kan kalangitan?”—Mateo 18:1.

Garo masakit paniwalaan na an mga disipulo magkakaigwa nin siring na diriskusyunan huling haros tulong taon na nindang nahihiling asin nadadangog si Jesus. Minsan siring, sinda bakong perpekto. Asin nagdakula sinda sa panahon kun sain an posisyon asin ranggo sa relihiyon pinapahalagahan na marhay. Saro pa, kasuarin pa sana, si Pedro pinanugaan ni Jesus nin nagkapirang “liyabe” kan Kahadian. Kaya posible daw na an pagmati niya mas nakakalabi siya? Tibaad arog man kaiyan an pagmati ni Santiago asin ni Juan, huling sinda nakahiling mismo kan pagkaliwat kan itsura ni Jesus.

Ano man an dahilan, huminiro si Jesus tanganing itanos an kaisipan ninda. Inapod niya an sarong aki, pinatindog ini sa tahaw ninda, asin sinabi sa mga disipulo: “Kun dai kamo magbago asin magin siring sa sadit na mga aki, dai nanggad kamo makakalaog sa Kahadian kan kalangitan. Kun siring, an siisay man na magpakumbaba arog kan sadit na aking ini iyo an pinakaurog sa Kahadian kan kalangitan; asin an siisay man na minaako sa sarong sadit na aking arog kaini sa ngaran ko minaako man sa sako.”—Mateo 18:3-5.

Kahanga-hanga nanggad na paagi nin pagtutukdo! Si Jesus dai naanggot sa mga disipulo ni inapod man sinda na mahanab o ambisyoso. Imbes, naggamit siya nin praktikal na halimbawa. An saradit na aki mayo nin halangkaw na posisyon o bako nanggad prominente. Kaya ipinahiling ni Jesus na kaipuhan kan mga disipulo na magkaigwa nin arog kaiyan na pagmansay sa saindang sadiri. Dangan tinapos ni Jesus an pagtatanos na ini sa saiyang mga parasunod paagi sa pagsabi: “Huli ta an saro na minagawing pinakahababa sa saindo iyo an nakakaurog.”—Lucas 9:48.