Sarong Aripompon, Sarong Pastor

“Kamo na nagsurunod sa sako matukaw man mismo sa doseng trono, na naghohokom sa doseng tribo nin Israel.”—MAT. 19:28.

 1. Paano trinatar ni Jehova an mga gikan ni Abraham, asin taano ta dai ini nangangahulogan na mayo talaga sia nin pakiaram kaidto sa gabos na iba pang tawo?

NAMOTAN ni Jehova si Abraham, kaya nagpaheling Sia nin maimbod na pagkamoot sa mga gikan ni Abraham. Sa laog nin labing 15 siglo, an nasyon nin Israel na naggikan ki Abraham ibinilang nia na saiyang piniling banwaan, an saiyang “espesyal na rogaring.” (Basahon an Deuteronomio 7:6.) Nangangahulogan daw iyan na talagang mayo nin pakiaram kaidto si Jehova sa mga tawo kan ibang mga nasyon? Dai man. Kan panahon na iyan, an mga bakong Israelita na nagmamawot na sumamba ki Jehova tinogotan na makisumaro sa saiyang espesyal na nasyon. An mga kombertidong ini, o mga proselito, minansay na kabtang kan nasyon. Dapat sindang trataron bilang mga tugang. (Lev. 19:33, 34) Asin kahagadan sa sainda na kuyogon an gabos na ley ni Jehova.—Lev. 24:22.

 2. Anong nakakabiglang mga tataramon an sinabi ni Jesus, na nagpapalataw nin anong mga hapot?

² Minsan siring, sinabi ni Jesus an nakakabiglang mga tataramon na ini sa mga Judio kan panahon nia: “An kahadean nin Dios hahaleon sa saindo asin itatao sa sarong nasyon na nagluluwas nin mga bunga kaiyan.” (Mat. 21:43) Sairisay an makompuesto sa bagong nasyon na ini, asin paano kita apektado ngonyan kan pagbabagong ini?

An Bagong Nasyon

3, 4. (a) Paano ipinamidbid ni apostol Pedro an bagong nasyon? (b) Sairisay an minakompuesto sa bagong nasyon na ini?

³ Ipinamidbid nin malinaw ni apostol Pedro an bagong nasyon na ini. Isinurat nia an minasunod na mga tataramon sa saiyang mga kapwa Kristiano: “Kamo ‘rasang pinili, grupo nin mga saserdote na hade, banal na nasyon, banwaan na magigin espesyal na pagsadiri, tanganing ipahayag nindo nin mahiwas an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag.” (1 Ped. 2:9) Siring kan ihinula, an mga Judio sa laman na nag-ako ki Jesus bilang an Mesiyas iyo an enot na mga miembro kan bagong nasyon na iyan. (Dan. 9:27a; Mat. 10:6) Kan huri, dakol na bakong Israelita an napabilang man sa nasyon na ini, huling si Pedro nagsabi pa: “Kamo kaidto bakong banwaan, alagad ngonyan banwaan na nin Dios.”—1 Ped. 2:10.

⁴ Sairisay an kinakaolay digdi ni Pedro? Sa kapinonan kan saiyang surat, sinabi nia: ‘Tinawan kita nin Dios nin bagong pagkamundag sa buhay na paglaom paagi sa pagkabuhay liwat ni Jesu-Cristo hale sa mga gadan, pasiring sa dai nalalapa asin daing digta patin dai napaparang mana. Iyan nakatagama sa kalangitan para sa saindo.’ (1 Ped. 1:3, 4) Kaya an bagong nasyon na ini kompuesto nin linahidan na mga Kristiano na igwa kan langitnon na paglaom. Sinda an “Israel nin Dios.” (Gal. 6:16) Sa sarong bisyon, naheling ni apostol Juan na an espirituwal na mga Israelitang ini may kabilangan na 144,000. Sinda “binakal hale sa katawohan bilang enot na mga bunga sa Dios asin sa Kordero” tanganing maglingkod bilang “mga saserdote” asin ‘mamahala bilang mga hade kaiba ni Jesus sa laog kan sangribong taon.’—Kap. 5:10; 7:4; 14:1, 4; 20:6; Sant. 1:18.

May Iba Pa daw na Pinanonongdan?

 5. (a) Sairisay an pinanonongdan kan mga tataramon na “Israel nin Dios”? (b) Taano an terminong “Israel” ta may iba pang pinanonongdan apuera sa parateng kahulogan kaiyan?

⁵ Kun siring, malinaw nanggad na an mga tataramon na “Israel nin Dios” sa Galacia 6:16 eksklusibong nanonongod sa linahidan na mga Kristiano. Minsan siring, igwa daw nin mga situwasyon na ginamit ni Jehova an nasyon nin Israel tanganing iladawan, o panongdan, an mga Kristiano na bakong linahidan? An simbag manonompongan sa mga tataramon na ini ni Jesus sa saiyang maimbod na mga apostol: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.” (Luc. 22:28-30) Ini mangyayari sa panahon kan “paglalang liwat,” o panahon kan paghaman giraray, durante kan Milenyal na Paghade ni Cristo.—Basahon an Mateo 19:28; nota sa ibaba.

6, 7. Sairisay an pinanonongdan kan mga tataramon na “doseng tribo nin Israel” sa konteksto kan Mateo 19:28 asin Lucas 22:30?

⁶ An 144,000 maglilingkod bilang langitnon na mga hade, saserdote, asin hokom durante kan Sangribong Taon na Paghade. (Kap. 20:4) Sairisay an saindang hohokoman asin pamamahalaan? Sa Mateo 19:28 asin Lucas 22:30, sinasabi sa sato na sinda maghohokom “sa doseng tribo nin Israel.” Sa kontekstong ini, sairisay an ilinaladawan kan “doseng tribo nin Israel”? Sinda nagrerepresentar sa mga may daganon na paglaom—an mga may pagtubod sa atang ni Jesus alagad dai kabilang sa grupo nin mga saserdote na hade. (An tribo ni Levi dai kabilang sa lista kan 12 tribo nin Israel sa laman.) An mga ilinaladawan kan 12 tribo nin Israel sa kontekstong ini iyo an mga mag-aako nin espirituwal na mga pakinabang sa paglilingkod kan 144,000 bilang mga saserdote. An mga bakong saserdote na benepisyaryong ini kabilang man sa banwaan nin Dios, asin namomotan saka inaako nia sinda. Tama sana na sinda iinagid sa saiyang banwaan kan suanoy.

⁷ Angay nanggad, pakatapos maheling ni apostol Juan an 144,000 na espirituwal na Israelita na permanenteng tinatatakan bago an dakulang kahorasaan, naheling man nia an dai mabilang na “dakulang kadaklan,” na “hale sa gabos na nasyon.” (Kap. 7:9) An mga ini makakaligtas sa dakulang kahorasaan pasiring sa Milenyal na Paghade ni Cristo. Duman makakaibanan ninda an binilyon na binuhay liwat. (Juan 5:28, 29; Kap. 20:13) An gabos na ini iyo an makompuesto sa simbolikong “doseng tribo nin Israel,” na hohokoman ni Jesus asin kan 144,000 na kaiba niang mamamahala.—Gibo 17:31; 24:15; Kap. 20:12.

 8. Paano ipinanganganino kan mga aktibidad sa taonan na Aldaw nin Pagbayad sa Kasalan an relasyon kan 144,000 sa iba pa sa katawohan?

⁸ An relasyon na ini kan 144,000 sa iba pa sa katawohan ipinanganino kan mga aktibidad sa taonan na Aldaw nin Pagbayad sa Kasalan. (Lev. 16:6-10) An enot na dapat gibohon kan halangkaw na saserdote iyo na mag-atang nin toro bilang dolot manongod sa kasalan “para sa saiyang sadiri asin sa saiyang pamilya.” Sa siring, an atang ni Jesus enot na iinaplikar sa saiyang pamilya nin mga katabang na saserdote, an mga maglilingkod kaiba nia sa langit. Siring man, sa suanoy na Aldaw nin Pagbayad sa Kasalan, duwang kanding an itinagama para sa mga kasalan kan iba pang Israelita. Sa kamugtakan na ini, na digdi an tribo nin mga saserdote naglaladawan sa 144,000, an iba pa sa mga Israelita naglaladawan sa gabos na may daganon na paglaom. Ipinapaheling kan aplikasyon na ini na an pananaram sa Mateo 19:28 na “doseng tribo nin Israel” dai nanonongod sa pinaniaki nin espiritu na mga katabang na saserdote ni Jesus, kundi sa gabos na iba pa na may pagtubod sa atang ni Jesus.a

 9. Sa bisyon ni Ezequiel dapit sa templo, sairisay an irinerepresentar kan mga saserdote asin kan bakong saserdoteng mga Israelita?

⁹ Estudyare an saro pang halimbawa. Tinawan si propeta Ezequiel nin detalyadong bisyon dapit sa templo ni Jehova. (Ezeq., kap. 40-48) Sa bisyon na iyan, an mga saserdote nagtatrabaho sa templo, na nagtatao nin instruksion asin nag-aako nin hatol asin pagtatanos hale ki Jehova. (Ezeq. 44:23-31) Sa iyo man sanang bisyon, an mga miembro kan manlaenlaen na tribo nagduman tanganing magsamba asin magdolot nin mga atang. (Ezeq. 45:16, 17) Kaya, sa kontekstong ini, an mga saserdote naglaladawan sa mga linahidan, mantang an mga Israelitang hale sa bakong saserdoteng mga tribo naglaladawan sa mga may daganon na paglaom. Idinodoon kan bisyon na an duwang grupo iribang nagtatrabaho na may pagkaoroyon, na dian an grupong saserdote an nangengenot sa dalisay na pagsamba.

10, 11. (a) Anong nakakapakosog sa pagtubod na kaotoban kan mga tataramon ni Jesus an naheling niato? (b) Anong hapot an minalataw manongod sa ibang mga karnero?

¹⁰ Sinambit ni Jesus an dapit sa “ibang mga karnero,” na dai makakaiba sa “toril” kan “sadangoton na aripompon” nin linahidan na mga parasunod nia. (Juan 10:16; Luc. 12:32) Sinabi nia: “Kaipuhan man na darahon ko an mga iyan, asin sinda maghihinanyog sa sakong tingog, asin sinda magigin sarong aripompon, sarong pastor.” Nakakapakosog nanggad sa pagtubod na maheling an kaotoban kan mga tataramon na idto! Duwang grupo nin mga tawo an pinagsaro—an sadit na grupo nin mga linahidan asin an dakulang kadaklan nin ibang mga karnero. (Basahon an Zacarias 8:23.) Minsan ngani an ibang mga karnero dai naglilingkod, sa simbolikong paagi, sa patyong nasa laog kan espirituwal na templo, sinda naglilingkod sa patyong nasa luwas kan templong iyan.

¹¹ Alagad kun ginagamit ni Jehova kun beses an bakong saserdoteng mga miembro kan suanoy na Israel tanganing iladawan an ibang mga karnerong ini, an boot sabihon daw kaiyan maninigo man makikabtang sa mga emblema sa Memorial an mga may daganon na paglaom? Pag-oolayan niato ngonyan an simbag sa hapot na ini.

An Bagong Tipan

12. Anong bagong areglo an ihinula ni Jehova?

¹² Si Jehova naghula nin bagong areglo para sa saiyang banwaan kan sabihon nia: “Iyo ini an tipan na gigibohon ko sa kamag-anakan nin Israel pakalihis kan mga aldaw na idto. . . . Ibubugtak ko sa laog ninda an sakong ley, asin sa saindang puso iyan isusurat ko. Asin ako magigin saindang Dios, asin sinda magigin sakong banwaan.” (Jer. 31:31-33) Paagi sa bagong tipan na ini, an panuga ni Jehova ki Abraham magkakaigwa nin mamuraway asin nagdadanay na kaotoban.—Basahon an Genesis 22:18.

13, 14. (a) Sairisay an mga partisipante sa bagong tipan? (b) Sairisay an mga benepisyaryo, asin paano sinda “nangangapot” sa bagong tipan na ini?

¹³ An bagong tipan na ini an pinanonongdan ni Jesus kan banggi bago sia magadan, kan sabihon nia: “An kopang ini nangangahulogan kan bagong tipan paagi sa halaga kan sakong dugo, na papaboloson para sa saindo.” (Luc. 22:20; 1 Cor. 11:25) An gabos daw na Kristiano kaiba sa bagong tipan na ini? Dai. An nagkapira, arog kan mga apostol na nag-inom sa kopang iyan kan bangging idto, mga partisipante sa bagong tipan.b May saro pang tipan na ipinakipagtipan sa sainda si Jesus—an mamahala kaiba nia sa saiyang Kahadean. (Luc. 22:28-30) Sinda magkakaigwa nin kabtang sa Kahadean ni Jesus.—Luc. 22:15, 16.

¹⁴ Paano man an mga mabubuhay sa daga sa irarom kan saiyang Kahadean? Sinda mga benepisyaryo kan bagong tipan. (Gal. 3:8, 9) Minsan ngani bakong mga partisipante, sinda “nangangapot” sa tipan na ini paagi sa pagkuyog sa mga kahagadan kaiyan, arog kan ihinula ni propeta Isaias: “An mga taga ibang daga na nakisumaro ki Jehova tanganing maglingkod sa saiya asin kamotan an ngaran ni Jehova, tanganing magin mga lingkod nia, an gabos na nag-ootob kan sabbath tanganing dai iyan malanghadan asin nangangapot sa sakong tipan, dadarahon ko man sinda sa sakong banal na bukid asin papagayagayahon ko sinda sa laog kan sakong harong na pamibian.” Dangan sinabi ni Jehova: “Huli ta an sadiri kong harong aapodon na harong na pamibian para sa gabos na banwaan.”—Isa. 56:6, 7.

Siisay an Maninigong Makikabtang?

15, 16. (a) Sa ano ikinonektar ni apostol Pablo an bagong tipan? (b) Taano an mga may daganon na paglaom ta dai maninigong makikabtang sa mga emblema sa Memorial?

¹⁵ An mga kaiba sa bagong tipan “igwa nin pagkapusoan sa paglaog sa banal na lugar.” (Basahon an Hebreo 10:15-20.) An mga ini an “mag-aako nin kahadean na dai matatanyog.” (Heb. 12:28) Kaya, kun siring, solamenteng an mga magigin hade asin saserdote sa langit kaiba ni Jesu-Cristo an maninigong uminom sa “kopa” na nagrerepresentar sa bagong tipan. An mga partisipanteng ini sa bagong tipan iyo an mga ipinanugang ipakasal sa Kordero. (2 Cor. 11:2; Kap. 21:2, 9) An gabos na iba pang nag-aatender sa Memorial kada taon mga magalang na nagmamasid, na dai nakikikabtang sa mga emblema.

¹⁶ Tinatabangan man kita ni Pablo na masabotan na an mga may daganon na paglaom dai nakikikabtang sa mga emblema sa Memorial. Sinabi nia sa linahidan na mga Kristiano: “Huli ta kada kumakan kamo kan tinapay na ini asin uminom kan kopang ini, padagos nindong ipinagbabalangibog an kagadanan kan Kagurangnan, sagkod na sia dumatong.” (1 Cor. 11:26) Noarin ‘madatong’ an Kagurangnan? Kun mag-abot na sia tanganing kuanon an pinakahuri sa saiyang linahidan na grupong nobya pasiring sa saindang langitnon na erokan. (Juan 14:2, 3) Malinaw nanggad, an taonan na pagselebrar kan Pamanggihan kan Kagurangnan igwa nin katapusan. An “mga natatada” sa banhi kan babae na yaon pa digdi sa daga padagos na makikikabtang sa pamanggihan na ini sagkod na akoon na ninda gabos an saindang langitnon na balos. (Kap. 12:17) Pero, kun an mga mabubuhay sagkod lamang digdi sa daga may deretsong makikabtang sa mga emblema, kun siring an pamanggihan na ini sa Memorial kaipuhan na magpadagos sagkod lamang.

“Sinda Magigin Nanggad Sakong Banwaan”

17, 18. Paano naotob an hula sa Ezequiel 37:26, 27?

¹⁷ Ihinula ni Jehova an pagkasararo kan saiyang banwaan paagi sa mga tataramon na ini: “Makikipagtipan ako sa sainda nin tipan nin katoninongan; sarong tipan na nagdadanay nin daing talaan an mapapasainda. Asin papamugtakon ko sinda asin papadakolon ko sinda patin ibubugtak ko sa tahaw ninda an sakuyang santuaryo sagkod sa panahon na daing talaan. Asin talagang mamumugtak sa sainda an sakuyang tabernakulo, asin ako magigin nanggad saindang Dios, asin sinda mismo magigin sakong banwaan.”—Ezeq. 37:26, 27.

¹⁸ An bilog na banwaan nin Dios may pribilehio na makinabang sa kaotoban kan makangangalas na panugang ini, an tipan na ini para sa Kristianong katoninongan. Iyo, si Jehova naggagarantiya nin katoninongan sa gabos niang makinuyog na lingkod. An bunga kan saiyang espiritu risang-risa sa sainda. An saiyang santuaryo, na digdi naglaladawan sa tunay na Kristianong pagsamba, yaon sa sainda. Sinda talagang nagin saiyang banwaan, huling binayaan ninda an gabos na porma nin idolatriya asin si Jehova na an solamenteng Dios na sinasamba ninda.

19, 20. Sairisay an kaiba sa inaapod ni Jehova na “sakong banwaan,” asin ano an pinapagin posible kan bagong tipan?

¹⁹ Nakakapukaw nanggad sa boot na maheling an pagsasaro na ini kan duwang grupo sa satong panahon! Minsan ngani mayo nin langitnon na paglaom an padakol nang padakol na dakulang kadaklan, ipinag-oorgolyo ninda na makaasosyar an mga igwa kan paglaom na iyan. Sinda nakisumaro sa Israel nin Dios. Paagi sa paggibo kaini, kaiba sinda sa mga inaapod ni Jehova na “sakong banwaan.” Naheheling niato sa sainda an kaotoban kan hulang ini: “An dakol na nasyon magigin nanggad kasaro ni Jehova sa aldaw na iyan, asin sinda magigin nanggad sakong banwaan; asin maerok ako sa tahaw mo.”—Zac. 2:11; 8:21; basahon an Isaias 65:22; Kapahayagan 21:3, 4.

²⁰ Paagi sa bagong tipan, pinagin posible ni Jehova an gabos na ini. Minilyon hale sa manlaenlaen na nasyon an nagin kabtang kan inooyonan na nasyon nin Dios. (Miq. 4:1-5) Determinado sindang padagos na mangapot sa tipan na iyan paagi sa pag-ako sa mga areglo kaiyan asin pagkuyog sa mga kahagadan kaiyan. (Isa. 56:6, 7) Sa paggibo kaini, nakakamtan ninda kaiba kan Israel nin Dios an abundang bendisyon nin nagpapadagos na katoninongan. Iyan logod an makamtan nindo—ngonyan asin sagkod lamang!

[Mga Nota sa Ibaba]

Nagigirumdoman daw Nindo?

• Sairisay an “doseng tribo nin Israel” na hohokoman kan 144,000?

• Ano an kabtang kan mga linahidan asin kan ibang mga karnero sa bagong tipan?

• An gabos daw na Kristiano maninigong makikabtang sa mga emblema sa Memorial?

• Anong pagkasararo an ihinula dapit sa satong panahon?

[Graph/​Mga Ritrato on page 25]

(Para sa aktuwal na format, hilingon an publikasyon

Dakol an naglilingkod ngonyan kaiba kan Israel nin Dios

7,313,173

4,017,213

1,483,430

373,430

1950 1970 1990 2009