Maimbod ki Cristo Asin sa Saiyang Maimbod na Oripon

‘An saiyang kagurangnan nonombrahan sia na mamahala sa gabos niang rogaring.’—MATEO 24:45-47.

1, 2. (a) Siisay an sinasabi kan Kasuratan na Poon niato? (b) Ano an nagpapaheling na aktibong pinapangenotan ni Cristo an Kristianong kongregasyon?

“DAI kamo magpaapod sa mga tawo na ‘mga poon’—saro sana an saindong poon, si Cristo!” (Mateo 23:10, The New Testament in Modern English) Paagi sa mga tataramon na ini, lininaw ni Jesus sa saiyang mga parasunod na mayo nin siisay man sa daga an magigin poon ninda. An sarong Poon ninda langitnon—si Jesu-Cristo mismo. Inako ni Jesus an posisyon na ini paagi sa pagnombra nin Dios. Si Jehova ‘binuhay sia liwat hale sa mga gadan asin ginibo siang payo kan gabos na bagay sa kongregasyon, na iyo an saiyang hawak.’—Efeso 1:20-23.

² Mantang si Cristo an “payo kan gabos na bagay” kun mapadapit sa Kristianong kongregasyon, ginagamit nia an saiyang autoridad sa gabos na nangyayari sa laog kan kongregasyon. Mayong pangyayari sa laog kan kongregasyon an ikinakatago sa saiya. Maingat niang minamasdan an espirituwal na kamugtakan kan kada grupo nin mga Kristiano, o kongregasyon. Ini malinaw na ipinapaheling sa kapahayagan na itinao ki apostol Juan sa pagtatapos kan enot na siglo C.E. Sa pitong kongregasyon, limang beses na sinabi ni Jesus na aram nia an saindang mga gibo, an saindang mga kakosogan, asin an saindang mga kaluyahan, asin nagtao sia nin konseho asin pagparigon sa boot huli kaiyan. (Kapahayagan 2:2, 9, 13, 19; 3:1, 8, 15) Yaon an gabos na dahelan na magtubod na pamilyar man si Cristo sa espirituwal na kamugtakan kan ibang kongregasyon sa Asia Minor, Palestina, Siria, Babilonya, Grecia, Italia, asin sa iba pa. (Gibo 1:8) Kumusta man ngonyan?

Sarong Maimbod na Oripon

 3. Taano ta angay na ikomparar si Cristo sa sarong payo asin an saiyang kongregasyon sa sarong hawak?

³ Pakabuhaya liwat sa saiya asin dai nahaloy bago sia sumakat sa saiyang Ama sa langit, sinabihan ni Jesus an saiyang mga disipulo: “An gabos na autoridad sa langit asin sa daga itinao na sa sako.” Sinabi man nia: “Uya! ako kaiba nindo sa gabos na aldaw sagkod sa pagtatapos kan sistema nin mga bagay.” (Mateo 28:18-20) Padagos siang makakaibanan ninda bilang saindang aktibong Payo. Sa mga surat sa mga Kristiano sa Efeso asin Colosas, iinagid ni apostol Pablo an Kristianong kongregasyon sa sarong “hawak,” na dian si Cristo iyo an Payo. (Efeso 1:22, 23; Colosas 1:18) An The Cambridge Bible for Schools and Colleges nagsasabi na an metaporang ini “nagsusuherir bako sanang nin mahalagang marhay na pagigin kasaro kan Payo, kundi na an kabotan kan Payo ginigibo man paagi sa mga miembro. Sinda mga instrumento Nia.” Arin na grupo an ginagamit ni Cristo bilang saiyang grupong instrumento poon kan sia tawan nin kapangyarihan sa Kahadean kan 1914?—Daniel 7:13, 14.

 4. Siring kan ihinula sa propesiya ni Malaquias, ano an nanompongan ni Jehova asin ni Cristo Jesus kan mag-abot sinda sa espirituwal na templo para sa pagsiyasat?

⁴ An propesiya ni Malaquias naghula na si Jehova, “an tunay na Kagurangnan,” kaiba kan saiyang “mensahero kan tipan,” an saiyang bago pa sanang patukawon sa trono na Aki, si Cristo Jesus, maabot sa paghokom tanganing siyasaton an Saiyang “templo,” o espirituwal na harong nin pagsamba. “An itinalaan na panahon” tanganing ponan an ‘paghokom sa harong nin Dios’ minalataw na nag-abot kan 1918.a (Malaquias 3:1; 1 Pedro 4:17) Angay na siniyasat an mga naghihingakong nagrerepresentar sa Dios asin sa saiyang tunay na pagsamba sa daga. Isinikwal an mga iglesia nin Kakristianohan, na dakol na siglo nang nagtotokdo nin mga doktrinang naglalapastangan sa Dios asin napalabot na marhay sa lagdoan na pangadan kan Guerra Mundial I. An sarong maimbod na natatada kan linahidan nin espiritung mga Kristiano binalo, dinalisay na garo sa kalayo, asin inaprobaran, na nagin para ki Jehova “banwaan na nagtatao nin dolot na regalo na may katanosan.”—Malaquias 3:3.

 5. Kaoyon kan propesiya ni Jesus mapadapit sa saiyang “presensia,” siisay an napatunayan na maimbod na “oripon”?

⁵ Kaoyon kan propesiya ni Malaquias, an midbidan kan grupong “oripon” kaiba sa tanda na kompuesto nin laen-laen na kabtang na itinao ni Jesus sa saiyang mga disipulo tanganing marekonoser ninda an panahon kan saiyang “presensia asin kan pagtatapos kan sistema nin mga bagay.” Si Jesus nagsabi: “Siisay man nanggad an maimbod asin mapagmansay na oripon na ninombrahan kan saiyang kagurangnan na mamahala sa saiyang mga domestiko, tanganing magtao sa sainda kan saindang kakanon sa tamang panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring. Totoong sinasabi ko sa saindo, Nonombrahan nia sia na mamahala sa gabos niang rogaring.” (Mateo 24:3, 45-47) “Sa pagdatong” tanganing siyasaton an “oripon” kan 1918, nanompongan ni Cristo an linahidan nin espiritung natatada kan maimbod na mga disipulo na poon kan 1879 ginagamit na an magasin na ini asin iba pang basado sa Bibliang mga publikasyon tanganing magtao nin espirituwal na “kakanon sa tamang panahon.” Rinekonoser nia sinda bilang saiyang grupong instrumento, o “oripon,” asin kan 1919 ipinaniwala sa sainda an pamamahala sa gabos niang rogaring sa daga.

Pamamahala sa mga Rogaring ni Cristo sa Daga

6, 7. (a) Sa anong iba pang termino nagtaram si Jesus manongod sa saiyang maimbod na “oripon”? (b) Ano an ipinaparisa sa paggamit ni Jesus kan terminong “mayordomo”?

⁶ Mga pirang bulan bago itao ni Jesus an saiyang propesiya manongod sa tanda kan saiyang presensia, kaiba an pag-eksister kan sarong “oripon” na nagrerepresentar sa saiya sa daga, nagtaram sia manongod sa “oripon” na ini sa medyo laen na mga termino na nagtaong liwanag manongod sa mga paninimbagan kan oripon. Si Jesus nagsabi: “Siisay man nanggad an maimbod na mayordomo, an sarong mapagmansay, na nonombrahan kan saiyang kagurangnan na mamahala sa saiyang grupo nin mga katabang tanganing padagos na magtao sa sainda nin kakanon sa tamang panahon? Sa katotoohan sinasabi ko sa saindo, Nonombrahan nia sia na mamahala sa gabos niang rogaring.”—Lucas 12:42, 44.

⁷ Digdi an oripon inaapod na mayordomo, sarong termino na trinadusir hale sa Griegong tataramon na nangangahulogan “namamahala sa harong o daga.” An grupong mayordomo bako sanang sarong grupo nin mga intelektuwal na nagpapaliwanag nin interesanteng mga punto hale sa Biblia. Apuera sa pagtao nin masustansiang espirituwal na kakanon “sa tamang panahon,” “an maimbod na mayordomo” nonombrahan man na mamahala sa bilog na grupo kan mga katabang ni Cristo asin aasignaran na mamahala sa intereses ni Cristo digdi sa daga, an “gabos niang rogaring.” Ano an kalabot digdi?

8, 9. Sa anong mga “rogaring” ninombrahan na mamahala an oripon?

⁸ Kaiba sa mga paninimbagan kan oripon an pagmanehar sa mga pasilidad na ginagamit kan mga parasunod ni Cristo tanganing makapagpadagos sa saindang Kristianong mga aktibidad, siring kan pambilog na kinaban na opisina prinsipal asin mga sangang opisina kan Mga Saksi ni Jehova, saka kan saindang mga lugar nin pagsamba—mga Kingdom Hall asin Assembly Hall—sa bilog na kinaban. Mas mahalaga, dinidirehiran man kan oripon an nakakaparigon sa espirituwal na mga programa sa pag-adal sa Biblia sa semanal na mga pagtiripon asin asamblea saka kombension sa panapanahon. Sa mga pagtiripon na ini, itinatao an impormasyon manongod sa kaotoban kan mga propesiya sa Biblia, asin itinatao an napapanahon na pagdirehir kun paano iaaplikar an mga prinsipyo sa Biblia sa pan-aroaldaw na buhay.

⁹ Kaiba man sa mga paninimbagan kan mayordomo an pagdirehir sa pinakaimportanteng gibohon na paghuhulit kan “maogmang baretang ini kan kahadean” asin paggibo nin “mga disipulo sa mga tawo kan gabos na nasyon.” Kalabot digdi an pagtokdo sa mga tawo na otobon an gabos na bagay na ipinagboot ni Cristo, an Payo kan kongregasyon, na gibohon durante kan panahon na ini kan katapusan. (Mateo 24:14; 28:19, 20; Kapahayagan 12:17) An gibohon na paghuhulit asin pagtotokdo nagbunga nin “sarong dakulang kadaklan” nin maimbod na kairiba kan linahidan na natatada. An “kawiliwiling mga bagay [na ini] kan gabos na nasyon” daing duda na kabilang sa mahalagang marhay na mga “rogaring” ni Cristo na pinapamahalaan kan maimbod na oripon.—Kapahayagan 7:9; Haggeo 2:7.

Sarong Representante na Namamahalang Grupo

10. Anong grupo na naggigibo nin mga desisyon an nag-eksister kan enot na siglo, asin may anong epekto sa mga kongregasyon?

¹⁰ Malinaw na kalabot sa magabat na mga paninimbagan kan maimbod na oripon an paggibo nin dakol na desisyon. Sa enot na Kristianong kongregasyon, an mga apostol asin kamagurangan sa Jerusalem an nag-akto bilang representante kan grupong oripon, na naggigibo nin mga desisyon para sa bilog na Kristianong kongregasyon. (Gibo 15:1, 2) An mga desisyon kan namamahalang grupong ini kan enot na siglo ipinapaabot sa mga kongregasyon paagi sa mga surat asin nagbibiaheng mga representante. Maogmang inako kan enot na mga Kristiano an klarong pagdirehir na ini, asin an saindang gikan sa boot na kooperasyon sa namamahalang grupo nagpaoswag nin katoninongan asin pagkasararo.—Gibo 15:22-31; 16:4, 5; Filipos 2:2.

11. Siisay an ginagamit ngonyan ni Cristo tanganing direhiran an saiyang kongregasyon, asin paano niato maninigong mansayon an grupong ini nin linahidan na mga Kristiano?

¹¹ Arog kan enot na mga panahon na Kristiano, sarong sadit na grupo nin mga paraataman na linahidan nin espiritu an minakompuesto sa Namamahalang Grupo kan mga parasunod ni Cristo sa daga ngonyan. Paagi sa saiyang “toong kamot” nin ginagamit na kapangyarihan, dinidirehiran ni Cristo, an Payo kan kongregasyon, an maimbod na mga lalaking ini mantang pinapamahalaan ninda an pang-Kahadean na gibohon. (Kapahayagan 1:16, 20) Sa estorya kan saiyang buhay, si Albert Schroeder, sarong haloy nang miembro kan Namamahalang Grupo na kasuarin pa sana nakatapos kan saiyang daganon na buhay, nagsurat: “An Namamahalang Grupo nagmimiting kada Mierkoles, na pinoponan an miting paagi sa pamibi asin hinahagad an pagdirehir kan espiritu ni Jehova. Ginigibo an tunay na paghihingoa tanganing seguradohon na an gabos na bagay na inaasikaso asin gabos na desisyon na ginigibo kaoyon kan Tataramon nin Dios an Biblia.”b Makakapagkompiar kita sa siring na maimbod na linahidan na mga Kristiano. Mapadapit sa sainda partikularmente, maninigong himateon niato an pagboot ni apostol Pablo: “Magin kamong makinuyog duman sa mga nangengenot dian sa tahaw nindo asin magin mapagpasakop, huli ta sinda nagbabantay sa saindong kalag.”—Hebreo 13:17.

Pagpaheling nin Tamang Paggalang sa Maimbod na Oripon

12, 13. Ano an sono sa Kasuratan na mga dahelan para sa pagpaheling nin paggalang sa grupong oripon?

¹² An pundamental na dahelan sa pagpaheling nin tamang paggalang sa grupong maimbod na oripon iyo na sa paggibo niato kaiyan, kita sa katunayan nagpapaheling nin paggalang sa Kagurangnan, si Jesu-Cristo. Si Pablo nagsurat manongod sa mga linahidan: “Sia na inapod kaidtong sia sarong talingkas na tawo oripon ni Cristo. Kamo binakal.” (1 Corinto 7:22, 23; Efeso 6:6) Kun siring, kun maimbod kitang nagpapasakop sa pagdirehir kan maimbod na oripon asin sa Namamahalang Grupo kaiyan, nagpapasakop kita ki Cristo, an Kagurangnan kan oripon. An pagpaheling niato nin tamang paggalang sa instrumentong ginagamit ni Cristo na mamahala sa saiyang mga rogaring sa daga sarong paagi na ‘hayag na rinerekonoser niato na si Jesu-Cristo iyo an Kagurangnan para sa kamurawayan nin Dios na Ama.’—Filipos 2:11.

¹³ An saro pang sono sa Kasuratan na dahelan sa pagpaheling nin paggalang sa maimbod na oripon iyo na an linahidan na mga Kristiano sa daga piguratibong inaapod bilang sarong “templo” na ineerokan ni Jehova “paagi sa espiritu.” Bilang siring, sinda “banal.” (1 Corinto 3:16, 17; Efeso 2:19-22) Sa grupong banal na templong ini ipinagkatiwala ni Jesus an saiyang mga rogaring sa daga, na nangangahulogan na may nagkapirang deretso asin paninimbagan sa laog kan Kristianong kongregasyon na para sana sa grupong oripon na ini. Sa dahelan na ini, minamansay kan gabos na nasa kongregasyon na sagradong paglilingkod ninda an pagsunod asin pagsuportar sa pagdirehir na itinatao kan maimbod na oripon asin kan Namamahalang Grupo kaiyan. Sa katunayan, ibinibilang kan “ibang mga karnero” na sarong tunay na pribilehio an pagtabang sa grupong oripon sa pag-asikaso sa intereses kan Kagurangnan.—Juan 10:16.

Pagtao nin Maimbod na Suporta

14. Siring kan iprinopesiya ni Isaias, paanong an ibang mga karnero naglalakaw sa likod kan grupong linahidan na oripon asin naglilingkod bilang “dai binabayadan na mga trabahador”?

¹⁴ An mapakumbabang pagpasakop kan ibang mga karnero sa linahidan na mga miembro kan espirituwal na Israel ihinula sa propesiya ni Isaias: “Iyo ini an sinabi ni Jehova: ‘An dai binabayadan na mga trabahador nin Egipto asin an mga negosyante nin Etiopia asin an mga Sabeo, haralangkaw na lalaki, madian ngani mismo saimo, asin sinda mapapasaimo. Sa likod mo malakaw sinda; madian sinda na nararamalan, asin maduko sinda sa saimo. Mamimibi sinda sa saimo, na nagsasabi, “Tunay nanggad na an Dios nasa saimo, asin mayo na nin iba; mayo na nin ibang Dios.”’” (Isaias 45:14) Sa simbolikong paagi, an ibang mga karnero ngonyan naglalakaw sa likod kan grupong linahidan na oripon asin kan Namamahalang Grupo kaiyan, na sinusunod an saindang pamomoon. Bilang “dai binabayadan na mga trabahador,” an ibang mga karnero gikan sa boot na ginagamit an saindang pisikal na kosog asin an saindang mga kayamanan bilang pagsuportar sa pambilog na kinaban na paghuhulit na iinasignar ni Cristo sa saiyang linahidan na mga parasunod sa daga.—Gibo 1:8; Kapahayagan 12:17.

15. Paano ihinuhula kan propesiya sa Isaias 61:5, 6 an relasyon sa pag-oltanan kan ibang mga karnero asin kan espirituwal na Israel?

¹⁵ An ibang mga karnero maogma asin nagpapasalamat sa paglilingkod ki Jehova sa pangangataman kan grupong oripon asin kan Namamahalang Grupo kaiyan. Rinerekonoser ninda an mga linahidan bilang mga miembro kan “Israel nin Dios.” (Galacia 6:16) Bilang piguratibong “mga estranghero” asin “mga taga ibang daga” na asosyado sa espirituwal na Israel, magayagaya sindang naglilingkod bilang “mga paraoma” asin “mga paraataman sa ubasan” sa pagdirehir kan mga linahidan, an “mga saserdote ni Jehova” asin ‘mga ministro nin Dios.’ (Isaias 61:5, 6) Maigot sindang nakikikabtang sa paghuhulit kan maogmang baretang ini kan Kahadean asin sa paggibo nin mga disipulo sa mga tawo kan gabos na nasyon. Itinatao ninda an saindang bilog na pusong tabang sa grupong oripon paagi sa pagpapastor asin pagtotokdo sa bagong masumpongan na mga arog-karnero.

16. Ano an nagmomotibar sa ibang mga karnero na magtao nin maimbod na pagsuportar sa maimbod asin mapagmansay na oripon?

¹⁶ Rinerekonoser kan ibang mga karnero na nakinabang sindang marhay sa maigot na paghihingoa kan maimbod na oripon sa pagtao sa sainda nin napapanahon na espirituwal na kakanon. Mapakumbaba nindang minimidbid na kun mayo an maimbod asin mapagmansay na oripon, kakadikit o mayo sindang aram sa mahalagang marhay na mga katotoohan sa Biblia, arog baga kan soberaniya ni Jehova, santipikasyon kan saiyang ngaran, Kahadean, bagong kalangitan asin bagong daga, kalag, kamugtakan kan mga gadan, asin tunay na midbidan ni Jehova, kan saiyang Aki, asin kan banal na espiritu. Huli sa lubos na pagpasalamat asin kaimbodan, mamomoton na sinusuportaran kan ibang mga karnero an linahidan na “mga tugang” ni Cristo sa daga durante kan panahon na ini kan katapusan.—Mateo 25:40.

17. Ano an naheling kan Namamahalang Grupo na kaipuhan na gibohon, asin ano an totokaron sa masunod na artikulo?

¹⁷ Huli kan saindang nagdidikit na kabilangan, an mga linahidan dai puedeng magin presente sa gabos na kongregasyon tanganing seguradohon an pamamahala sa mga rogaring ni Cristo. Bilang resulta, an Namamahalang Grupo nagnonombra nin mga lalaki na hale sa ibang mga karnero tanganing mangataman sa mga sangang opisina, mga distrito, mga sirkito, asin mga kongregasyon kan Mga Saksi ni Jehova. An sato daw na aktitud sa mga katabang na pastor na ini igwa nin koneksion sa satong kaimbodan ki Cristo asin sa saiyang maimbod na oripon? Totokaron ini sa masunod na artikulo.

[Mga Nota sa Ibaba]

Bilang Repaso

• Siisay an satong Poon, asin ano an nagpapaheling na aram nia an kamugtakan sa laog kan kongregasyon?

• Sa pagsiyasat sa “templo,” siisay an nanompongan na nagseserbi bilang maimbod na oripon, asin anong mga rogaring an ipinagkatiwala sa sainda?

• Ano an sono sa Kasuratan na mga dahelan para sa maimbod na pagsuportar sa maimbod na oripon?

[Mga Ritrato sa pahina 23]

Kaiba sa mga “rogaring” na dinidirehiran kan “mayordomo” an materyal na rogaring, espirituwal na mga programa, asin an paghuhulit

[Ritrato sa pahina 25]

An mga miembro kan ibang mga karnero nagsusuportar sa grupong maimbod na oripon paagi sa saindang maigot na paghuhulit