Arogon an Pagpapasensia ni Jehova

“Si Jehova bakong maluway kun dapit sa saiyang panuga, . . . kundi sia mapasensia.”​—2 PEDRO 3:9.

 1. Anong daing kaparehong balaog an iinaalok ni Jehova sa katawohan?

SI Jehova nag-aalok sa sato nin sarong bagay na dai ikakaalok nin siisay man. Sarong bagay iyan na labi-labi kanakakaakit asin mahalagang marhay, pero dai iyan mababakal ni maaako bilang bayad. An saiyang iinaalok iyo an balaog na buhay na daing katapusan​—para sa kadaklan sa sato, iyan an daing katapusan na buhay sa sarong paraisong daga. (Juan 3:16) Magigin dakulang kaogmahan nanggad iyan! Mayo na an mga bagay na nagigin dahelan nin grabeng kamondoan​—iriwal, kadahasan, kadukhaan, krimen, helang, asin pati kagadanan. An mga tawo mamumuhay sa lubos na katoninongan asin pagkasararo sa irarom kan mamomoton na pamamahala kan Kahadean nin Dios. Kanigoan an paghimuyawot niato para sa Paraisong iyan!​—Isaias 9:​6, 7; Kapahayagan 21:​4, 5.

 2. Taano ta dai pa hinahale ni Jehova an sistema nin mga bagay ni Satanas?

² Galaga man na inaantisipar ni Jehova an panahon na saiyang eestablisaron an Paraiso digdi sa daga. Total, mamomoton sia sa katanosan asin hustisya. (Salmo 33:5) Dai sia naoogmang magheling sa kinaban na indiperente o kontra sa saiyang matanos na mga prinsipyo, sarong kinaban na nagsisikwal sa saiyang autoridad asin nagmamaltrato sa saiyang banwaan. Pero, may marahay na mga dahelan kun taano ta dai pa sia minahiro tanganing haleon an maraot na sistema nin mga bagay ni Satanas. Kalabot sa mga dahelan na iyan an moral na mga isyu na may koneksion sa saiyang soberaniya. Sa pagresolber sa mga isyung ini, ipinapaheling ni Jehova an sarong partikularmenteng nakakaakit na kualidad, sarong kualidad na mayo sa dakol ngonyan​—an pagpapasensia.

 3. (a) Ano an kahulogan kan Griego asin Hebreong tataramon na trinadusir sa Biblia na “pasensia”? (b) Anong mga hapot an eestudyaran niato ngonyan?

³ Igwa nin Griegong tataramon na sa New World Translation tolong beses na trinadusir na “pasensia.” Iyan literal na nangangahulogan na “pagigin halaba nin espiritu” asin sa siring parateng tinatradusir na “pakatios” asin sarong beses na “pagpapasensia.” Katambay kan Griego sagkod Hebreong tataramon para sa “pasensia” an ideya nin pagpopogol asin pagigin maluway sa pagkaanggot. Paano kita nakikinabang sa pagpapasensia ni Jehova? Anong mga leksion an satong manonodan sa pagpapasensia asin pagpopogol ni Jehova asin kan saiyang maimbod na mga lingkod? Paano niato maaaraman na may limite an pagpapasensia ni Jehova? Helingon niato.

Estudyaran an Pagpapasensia ni Jehova

 4. May labot sa pagpapasensia ni Jehova, ano an isinurat ni apostol Pedro?

⁴ May labot sa pagpapasensia ni Jehova, si apostol Pedro nagsurat: “Dai logod nindo malingawan an sarong katotoohan na ini, mga namomotan, na an sarong aldaw ki Jehova garo sangribong taon asin an sangribong taon garo sarong aldaw. Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.” (2 Pedro 3:​8, 9) Mangnoha tabi an duwang punto na ipinahayag digdi na makakatabang sa sato na masabotan an pagpapasensia ni Jehova.

 5. Paanong an pagmansay ni Jehova sa panahon nakakaapektar sa saiyang mga paghiro?

⁵ An enot na punto iyo na an pagmansay ni Jehova sa panahon bakong arog kan pagmansay niato dian. Para sa saro na nabubuhay sagkod lamang, an sangribong taon garo sana sarong aldaw. Dai sia napopogolan o nagigipit nin panahon, alagad bako siang maluway sa paghiro. Huling igwa nin daing limiteng kadonongan, naaaraman nin eksakto ni Jehova an pinakatamang panahon tanganing humiro para sa kapakinabangan kan gabos na nanonongdan, asin mapasensia niang hinahalat na mag-abot an panahon na iyan. Minsan siring, dai kita maninigong magkonklusyon na si Jehova daing labot sa ano man na pagdusa na tibaad inaagihan kan saiyang mga lingkod mientras na dai pa Sia minahiro. Sia Dios na may “mamomoton na pagmalasakit,” an personipikasyon nin pagkamoot. (Lucas 1:​78; 1 Juan 4:8) Kaya niang remedyohan, nin lubos asin permanente, an ano man na danyos na tibaad ibinunga kan temporaryong pagtogot na ini sa pagdusa.​—Salmo 37:10.

 6. Ano an dai niato maninigong ikonklusyon manongod sa Dios, asin taano?

⁶ Siempre, bakong pasil na maghalat sa sarong bagay na hinihimuyawot nin saro. (Talinhaga 13:12) Sa siring, kun dai tolos inootob kan mga tawo an saindang mga panuga, tibaad magkonklusyon an iba na mayo sindang intension na otobon iyan. Kamangmangan nanggad kun iyan an iisipon sa Dios! Kun ipapamugtak niato na kaluwayan an pagpapasensia nin Dios, an pag-agi nin panahon pasil sanang magpangyari sa sato na magpadara sa pagduda asin pagkadesganar, asin namemeligro kitang tungkaon sa espirituwal. Mas maraot pa, tibaad ikalagalag kita kan mga tawong tumang sa sainda nagpatanid kaidto pa si Pedro​—mga paraolog-olog, an mga daing pagtubod. An mga iyan may pagtuyatuyang nagsasabi: “Haen man ining ipinanugang presensia nia? Tara, poon kan aldaw na an satong mga apoon magtorog sa kagadanan, an gabos na bagay pareho man sana poon kan kapinonan nin paglalang.”​—2 Pedro 3:4.

 7. Paano konektado an pagpapasensia ni Jehova sa saiyang kamawotan na magsolsol an mga tawo?

⁷ An ikaduwang punto na makukua niato sa mga tataramon ni Pedro iyo na si Jehova mapasensia huli ta mawot nia na an gabos makapagsolsol. An mga may katagasan nin payong nagsasayuma na tumalikod sa saindang maraot na mga dalan gagaradanon ni Jehova. Minsan siring, dai naoogma an Dios sa pagkagadan kan maraot. Imbes, ikinakaogma niang marhay na maheling an mga tawo na nagsosolsol, minatalikod sa saindang maraot na mga dalan, asin nagdadanay na buhay. (Ezequiel 33:11) Iyan an dahelan na padagos siang nagpapasensia asin ipinapahayag an maogmang bareta sa bilog na daga tanganing an mga tawo magkaigwa nin bastanteng oportunidad na mabuhay.

 8. Paano naheheling an pagpapasensia nin Dios sa pagtratar nia sa nasyon nin Israel?

⁸ Naheheling man an pagpapasensia nin Dios sa pagtratar nia sa suanoy na nasyon nin Israel. Sa laog nin dakol na siglo, tinios nia an saindang kasumbikalan. Paagi sa saiyang mga propeta, paorootro niang sinadol sinda: “Talikdan nindo an saindong maraot na mga dalan asin otobon nindo an sakong mga togon, an sakong mga reglamento, sono sa gabos na ley na ipinagboot ko sa saindong mga apoon asin ipinadara ko sa saindo paagi sa sakong mga lingkod na propeta.” Ano an nagin resulta? Makamomondo, an banwaan ‘dai naghinanyog.’​—2 Hade 17:​13, 14.

 9. Paano ipinabanaag kan pagpapasensia ni Jesus an pagpapasensia kan saiyang Ama?

⁹ Ultimo, isinugo ni Jehova an saiyang Aki, na daing kapagalan na nakiolay sa mga Judio na makipag-ulian sa Dios. Sangkap na ipinabanaag kan pagpapasensia ni Jesus an pagpapasensia kan saiyang Ama. Lubos na naaaraman na sia gagadanon sa dai na mahahaloy, si Jesus nagtangis: “Jerusalem, Jerusalem, an paragadan sa mga propeta asin paragapo sa mga isinugo sa saiya,​—makapirang binoot kong tiriponon an saimong mga aki, siring kan pagtipon kan guna sa saiyang mga siyo sa irarom kan saiyang mga pakpak! Alagad ta kamo huminabo kaiyan.” (Mateo 23:37) An nakakataros sa puso na mga tataramon na ini bakong mga tataramon nin sarong estriktong hokom na gustong-gustong magpadusa sa sarong tawo kundi mga tataramon nin sarong mamomoton na katood na mapasensia sa mga tawo. Kapareho kan saiyang Ama sa langit, gusto ni Jesus na magbakle an mga tawo asin makalibre sa paghokom na bakong paborable. An iba talagang naghimate sa mga patanid ni Jesus asin nakalibre sa grabeng paghokom na uminabot sa Jerusalem kan 70 C.E.​—Lucas 21:20-​22.

10. Sa anong paagi kita nakikinabang sa pagpapasensia nin Dios?

¹⁰ Bako daw na tunay na makangangalas an pagpapasensia nin Dios? Sa ibong kan grabeng kasumbikalan kan tawo, si Jehova nagtao sa lambang saro sa sato, saka sa minilyon na iba pa, kan oportunidad na mamidbid sia asin akoon an paglaom sa kaligtasan. “Ibilang nindo an pagpapasensia kan satong Kagurangnan na kaligtasan,” an surat ni Pedro sa mga kapwa Kristiano. (2 Pedro 3:15) Bako daw na nagpapasalamat kita na an pagpapasensia ni Jehova nagbukas kan dalan para sa kaligtasan niato? Bako daw na namimibi kita na padagos logod na magin mapasensia si Jehova sa sato mantang pinaglilingkodan niato sia sa aroaldaw?​—Mateo 6:12.

11. An pakasabot sa pagpapasensia ni Jehova magpapahiro sa sato na gibohon an ano?

¹¹ Kun nasasabotan niato kun taano ta mapasensia si Jehova, natatabangan kita na pasensiosong maghalat sa kaligtasan na itatao nia, na nungkang nagkokonklusyon na maluway sia sa pag-otob kan saiyang mga panuga. (Lamentacion 3:26) Minsan ngani padagos kitang namimibi na dumatong na logod an Kahadean nin Dios, nagtitiwala kita na naaaraman nin Dios an pinakatamang panahon na simbagon an pamibing iyan. Dugang pa, napapahiro kita na arogon si Jehova paagi sa pagpaheling nin diosnon na pagpapasensia sa pagtratar niato sa satong mga tugang asin sa satong mga hinuhulitan. Dai man niato mawot na malaglag an siisay man kundi gusto niatong maheling sindang magsolsol asin magkaigwa man kan kaparehong paglaom niato na buhay na daing katapusan.​—1 Timoteo 2:​3, 4.

Estudyaran an Pagpapasensia kan mga Propeta

12, 13. Kaoyon kan Santiago 5:​10, paano si propeta Isaias mapangganang nakapagpasensia?

¹² Paagi sa pag-estudyar sa pagpapasensia ni Jehova, natatabangan kitang apresyaron sagkod kultibaron an kualidad na iyan. Bakong pasil para sa bakong sangkap na mga tawo na kultibaron an pagpapasensia, alagad magigibo iyan. Makakanood kita sa mga lingkod nin Dios kan suanoy. Si disipulo Santiago nagsurat: “Mga tugang, gibohon na arogan sa pagtios nin karatan asin sa pagpapasensia an mga propeta, na nagtaram sa ngaran ni Jehova.” (Santiago 5:10) Nakakaranga asin nakakaparigon sa boot na maaraman na mapangganang naatubang kan iba an mga problema na kaipuhan niatong atubangon.

¹³ Halimbawa, seguradong kinaipuhan ni propeta Isaias an pagpapasensia sa saiyang asignasyon. Ipinarisa iyan ni Jehova paagi sa pagsabi sa saiya: “Lakaw, asin sabihan mo an banwaan na ini, ‘Magdangog kamo nin paorootro, alagad dai kamo makasabot; asin magheling kamo nin paorootro, alagad dai kamo magkamit nin ano man na kaaraman.’ Gibohang dai nag-aako an puso kan banwaan na ini, asin gibohang dai naghihimate an mismong mga talinga ninda, asin pastaha an mismong mga mata ninda, tanganing dai sinda makaheling paagi sa saindang mga mata asin paagi sa saindang mga talinga dai sinda makadangog, asin tanganing an sainda mismong puso dai makasabot asin tanganing dai talaga sinda bumalik asin makakua nin pagpaomay para sa sainda man sana.” (Isaias 6:​9, 10) Sa ibong kan dai paghimate kan banwaan, mapasensiang ipinahayag ni Isaias an nagpapatanid na mga mensahe ni Jehova sa laog nin dai mababa sa 46 na taon! Sa siring man na paagi, makakatabang sa sato an pagpapasensia na magtagal sa satong paghuhulit kan maogmang bareta, maski ngani dakol an dai naghihimate.

14, 15. Ano an nakatabang ki Jeremias na makaya an mga kasakitan asin panluluya nin boot?

¹⁴ Siempre, mantang isinasagibo kan mga propeta an saindang ministeryo, bako sanang an dai paghimate an kaipuhan nindang atubangon; nagtios sinda nin karatan. Si Jeremias ibinugtak sa mga pandog, ibinilanggo sa “harong nin mga ramal,” asin ihinulog sa sarong bobon. (Jeremias 20:​2; 37:​15; 38:6) Inagihan nia an pagmaltratong ini sa kamot kan mismong mga tawo na mawot niang tabangan. Pero, si Jeremias dai nagraot an boot, ni nagbalos man sia. Pasensioso siang nagtagal sa laog nin mga dekada.

¹⁵ An paglamag asin pag-olog-olog dai nagpasilensio ki Jeremias, asin an mga iyan dai man nagpapasilensio sa sato ngonyan. Siempre, kun beses tibaad panluyahan kita nin boot. Si Jeremias nakamate nin panluluya nin boot. “An tataramon ni Jehova nagin dahelan nin pagtuya asin pag-olog-olog sa sako sa bilog na aldaw,” an isinurat nia. “Asin ako nagsabi: ‘Dai ko na sia sasambiton, asin dai na ako noarin man magtataram pa sa saiyang ngaran.’ ” Dangan ano na an nangyari? Nagpondo daw si Jeremias sa paghuhulit? Sia nagpadagos: “Sa sakong puso [an tataramon nin Dios] nagin siring sa naglalaad na kalayo na tuminaros sa sakong mga tolang; asin ako napagal sa pagpogol kaiyan, asin dai ko na iyan natagalan.” (Jeremias 20:​8, 9) Mangnoha na kan magpokus sia sa pag-olog-olog kan mga tawo, nawaran sia nin kagayagayahan. Kan itao nia an saiyang atension sa kagayonan asin kahalagahan kan mensahe mismo, nakabalik an saiyang kagayagayahan. Dugang pa, si Jehova nasa kaibahan ni Jeremias “siring sa makangingirhat na makakamhan,” na nagpapakosog sa saiya tanganing ibalangibog an tataramon nin Dios na may kaigotan asin pagkapusoan.​—Jeremias 20:11.

16. Paano niato mapapagdanay an kagayagayahan sa satong paghuhulit kan maogmang bareta?

¹⁶ Nakanompong daw nin kagayagayahan sa saiyang trabaho si propeta Jeremias? Iyo nanggad! Sinabi nia ki Jehova: “An saimong mga tataramon nakua, asin iyan sakuyang kinakan; asin an saimong tataramon nagin para sa sako labi-labing kaogmahan asin kagayagayahan kan sakong puso; huli ta ako inapod sa saimong ngaran, O Jehova.” (Jeremias 15:16) Naggayagaya si Jeremias sa pribilehio nia na irepresentar an tunay na Dios asin ihulit an saiyang tataramon. Makakapaggayagaya man kita. Dugang pa, naggagayagaya kita, arog kan mga anghel sa langit, na sa bilog na kinaban dakolon an nag-aako sa mensahe kan Kahadean, nagsosolsol, asin naglalakaw sa dalan pasiring sa buhay na daing katapusan.​—Lucas 15:10.

An “Pakatagal ni Job”

17, 18. Sa anong paagi nakatagal si Job, asin ano an nagin resulta?

¹⁷ Pagkatapos na magkomento manongod sa mga propeta kan suanoy, si disipulo Santiago nagsurat: “Nadangog nindo an dapit sa pakatagal ni Job asin naheling an bunga na itinao ni Jehova, na si Jehova mamomoton na marhay sa kapadangatan asin maheherakon.” (Santiago 5:11) An Griegong tataramon na trinadusir digdi na “pakatagal” may kahulogan na kapareho kan tataramon na ginamit ni Santiago sa sinusundan na bersikulo para sa “pasensia.” Itinotokdo an pagkakalaen kan duwang tataramon, sarong iskolar an nagsurat: “An naenot (pasensia) pagpapasensia kun inaabuso kita nin mga tawo, an huri (pakatagal) pusoan na pagmamaigot sa masakit na mga kamugtakan.”

¹⁸ Naeksperyensiahan ni Job an makuring kasakitan. Inagihan nia an pagbagsak sa pinansial, an pagkagadan kan saiyang mga aki, asin an makologon na helang. Linabanan man nia an falsong mga sahot na pinapadusahan sia ni Jehova. Dai iyan tinios ni Job na daing girong; nanangis sia sa saiyang kamugtakan asin ipinasentido pa ngani nia na mas matanos sia kisa sa Dios. (Job 35:2) Minsan siring, nungka siang nawaran nin pagtubod, ni rinaot nia an saiyang integridad. Dai nia sinumpa an Dios arog kan sinabi ni Satanas na gigibohon nia. (Job 1:​11, 21) An resulta? “Binendisyonan [ni Jehova] an kasagkodan ni Job nin labi pa sa saiyang kapinonan.” (Job 42:12) Ibinalik ni Jehova sa dati an marahay na salud ni Job, dinoble an saiyang kayamanan, asin binalosan sia nin nakakakontento asin maogmang buhay sa kaibahan kan saiyang mga namomotan. An maimbod na pakatagal ni Job nagpangyari man sa saiya na mamidbid nin mas lubos si Jehova.

19. Ano an manonodan niato sa mapasensiang pakatagal ni Job?

¹⁹ Ano an manonodan niato sa mapasensiang pakatagal ni Job? Arog ni Job, kita tibaad maghelang o mag-agi nin iba pang kasakitan. Tibaad dai niato lubos na masabotan kun taano ta tinotogotan ni Jehova na mag-agi kita nin sarong partikular na pagbalo. Pero, segurado kita sa sarong bagay: Kun magdadanay kitang maimbod, bebendisyonan kita. Siertong babalosan ni Jehova an mga maigot na naghahanap sa saiya. (Hebreo 11:6) Si Jesus nagsabi: “An nakatagal sagkod sa katapusan iyo an maliligtas.”​—Mateo 10:22; 24:13.

“An Aldaw ni Jehova Madatong”

20. Taano ta makakasierto kita na madatong an aldaw ni Jehova?

²⁰ Minsan ngani mapasensia si Jehova, sia man makatanosan asin dai totogotan sagkod lamang an karatan. May limite an saiyang pagpapasensia. Si Pedro nagsurat: ‘An Dios dai nag-alangan sa pagkastigo sa suanoy na kinaban.’ Mantang si Noe asin an saiyang pamilya naingatan na buhay, an bakong diosnon na kinaban na idto nalantopan nin tubig. Nagpaabot man si Jehova nin paghokom sa Sodoma asin Gomorra, na ginibo sindang abo. An mga paghokom na ini nagtatao nin “panalmingan para sa mga bakong diosnon dapit sa mga bagay na maabot.” Manongod digdi, puede kitang makasierto: “An aldaw ni Jehova madatong.”​—2 Pedro 2:​5, 6; 3:10.

21. Paano niato puedeng ipaheling an satong pagpapasensia asin pakatagal, asin anong tema an eestudyaran niato sa sunod na artikulo?

²¹ Kun siring, arogon niato an pagpapasensia ni Jehova paagi sa pagtabang sa iba na makaabot sa pagsolsol tanganing tibaad makaligtas sinda. Arogon man niato an mga propeta paagi sa pasensiosong pagpahayag kan maogmang bareta sa ibong kan dai paghimate kan mga hinuhulitan niato. Dugang pa, makakasierto kita na bebendisyonan kita ni Jehova nin abunda kun, arog ni Job, tatagalan niato an mga pagbalo asin pagdadanayon niato an integridad. Yaon an gabos na dahelan na maggayagaya sa satong ministeryo kun narerealisar niato kun gurano kaabunda an mga bendisyon ni Jehova sa mga paghihingoa kan saiyang banwaan na ihulit an maogmang bareta sa bilog na daga. Maheheling niato ini sa sunod na artikulo.

Nagigirumdoman daw Nindo?

• Taano si Jehova ta nagpapasensia?

• Ano an manonodan niato sa pagpapasensia kan mga propeta?

• Paano si Job nagpaheling nin pakatagal, asin ano an nagin resulta?

• Paano niato naaaraman na may limite an pagpapasensia ni Jehova?

[Ritrato sa pahina 18]

Sangkap na ipinabanaag kan pagpapasensia ni Jesus an pagpapasensia kan saiyang Ama

[Mga Ritrato sa pahina 20]

Paano binalosan ni Jehova an pagpapasensia ni Jeremias?

[Mga Ritrato sa pahina 21]

Paano binalosan ni Jehova an pakatagal ni Job?