An Orog na Kamurawayan kan Harong ni Jehova

“‘Papanoon ko nin kamurawayan an harong na ini,’ an sabi ni Jehova nin mga hukbo.”​—HAGGEO 2:7.

 1. Paano konektado sa pagtubod asin gibo an banal na espiritu?

MANTANG naghaharongharong, an saro sa Mga Saksi ni Jehova nakanompong nin sarong babaeng Pentecostal na nagkomento, ‘Kami an igwa kan banal na espiritu, alagad ta kamo an nagtatrabaho.’ Sa mataktikang paagi, ipinaliwanag sa saiya na an saro na igwa kan banal na espiritu natural sanang mamomotibar na gumibo kan gibohon nin Dios. An Santiago 2:​17 nagsasabi: “An pagtubod, kun dai nin gibo, gadan sa saiya man sana.” Sa tabang kan espiritu ni Jehova, pinatalubo kan saiyang mga Saksi an makosog na pagtubod, asin ‘pinano nia nin kamurawayan an saiyang harong’ paagi sa pagpagibo sa sainda nin matanos na mga gibo​—sa pangenot an ‘paghuhulit kan maogmang baretang ini kan Kahadean sa bilog na ineerokan na daga para sa pagpatotoo sa gabos na nasyon.’ Kun kontento na si Jehova sa pagkahaman kan gibohon na ini, “dangan madatong an katapusan.”​—Mateo 24:14.

 2. (a) An satong pagkasibot na marhay sa gibohon ni Jehova magbubunga nin anong bendisyon? (b) Taano ta maninigo niatong ikaogma an ano man na garo baga ‘pagkaatraso’?

² Sa mga tataramon na ini ni Jesus, nasasabotan niato na an satong gibohon ngonyan dapat na nakasentro sa paghuhulit sa iba kan “mamuraway na maogmang bareta kan maogmang Dios,” na ipinaniwala sa sato. (1 Timoteo 1:11) Mientras na orog kitang maogmang nasisibot na marhay sa paglilingkod ki Jehova, garo mas marikas man na maabot an katapusan. Sa Habacuc 2:​2, 3, nababasa niato an mga tataramon ni Jehova: “Isurat mo an bisyon, asin itala mo iyan nin malinaw sa mga tabla, tanganing an nagbabasa kaiyan nin makosog magibo iyan nin marikas asin dirediretso. Huli ta an bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Minsan pa iyan maatraso, padagos iyan na halaton; huli ta sierto nanggad na iyan maootob. Dai iyan mahuhuri.” Iyo, “an bisyon” maootob “minsan pa iyan maatraso.” Sa panahon na ini kan ika-83 na taon kan pamamahala ni Jesus sa Kahadean, tibaad pinaghohona nin iba na kita nasa panahon nin pagkaatraso ngonyan. Pero dai daw kita maninigong maogma na dai pa minaabot an katapusan? Sa dekadang ini kan 1990, rinebokar an mga restriksion sa paghuhulit kan maogmang bareta, garo baga sa milagrosong paagi, sa Europa Oriental, mga parte nin Aprika, asin iba pang kadagaan. An garo baga ‘pagkaatraso’ nagtatao nin panahon na an dakol pang “karnero” matipon hale sa mga teritoryong ini na bago pa sanang mabukasan.​—Juan 10:16.

 3. Taano an satong binagong pakasabot sa “kapag-arakian na ini” ta maninigong animaron kita na mag-apretar sa gibohon nin Dios?

³ “Dai iyan mahuhuri,” sabi kan propeta. Sinabi ni Jesus na an presenteng maraot na kapag-arakian dai makalilihis sagkod na “an gabos na bagay na ini mangyari.” (Mateo 24:34) An satuya daw na binagong pakasabot sa saiyang mga tataramon nangangahulogan na bako nang gayong apretado an satong paghuhulit?a Ipinaheheling kan mga katotoohan na kabaliktaran kaiyan an totoo! An satong katemporanyong kapag-arakian pabugsok sa karatan asin malbersasyon na daing kaagid sa bilog na kasaysayan na nakaagi. (Ikomparar an Gibo 2:40.) Maninigo na apretado an satong gibohon. (2 Timoteo 4:2) An gabos na hula manongod sa kun noarin an dakulang kahorasaan nagpapaheling na iyan madatong nin bigla, tolos-tolos, patago​—garo parahabon. (1 Tesalonica 5:​1-4; Kapahayagan 3:​3; 16:15) “Huli kaini kamo man magin andam, huli ta sa oras na dai nindo pinaghohona, an Aki nin tawo madatong.” (Mateo 24:44) Mantang an daing Dios na kapag-arakian na ini nin katawohan nasa gati na nin pagkapara, tunay na dai niato bobooton na itapok an satong mahalagang marhay na paglaom na buhay na daing sagkod paagi sa pagbalik sa “paglabog sa lamaw” nin kinabanon na mga pandisturbo!​—2 Pedro 2:​22; 3:10; Lucas 21:​32-36.

 4. Huli sa anong situwasyon na nangaipo nin mas dakol na “kakanon sa igong panahon,” asin paano napanigoan an pangangaipong ini?

⁴ Arog kan ihinula ni Jesus, kan 1914 nagkaigwa nin “kapinonan kan kolog nin kasakitan” sa paglaog nin katawohan sa “pagtatapos kan palakaw nin mga bagay.” An mga kamondoan, kapahapahamak na mga pangyayari, asin katampalasanan duminakol sagkod sa kaaldawan na ini. (Mateo 24:​3-8, 12) Kadungan kaiyan, isinugo ni Jehova an linahidan na grupong fiel asin madonong na oripon na magtagama nin espirituwal na “kakanon sa igong panahon” para sa kairiba sa harong kan saindang Kagurangnan, si Cristo. (Mateo 24:​45-47) Gikan sa saiyang trono sa kalangitan, an Mesiyanikong Hadeng ini ngonyan nagdidirehir sa makangangalas na programa nin espirituwal na pagpakakan sa bilog na daga.

Abundang “Kakanon”

 5. Anong atension an itinatao sa pundamental na “kakanon”?

⁵ Isip-isipa an pag-andam nin “kakanon.” (Lucas 12:42) An pundamental na putahe sa menung Kristiano iyo an Tataramon nin Dios, an Biblia. Tanganing epektibong ikatokdo an Biblia, sarong pangenot na pangangaipo an pasil basahon, daing kasalasalang traduksion. Sa nag-aging mga taon progresibong napaninigoan an pangangaipong ini, nangorogna poon kan 1950 kan an New World Translation of the Christian Greek Scriptures iluwas sa Ingles. Pag-abot nin 1961 igwa na kan New World Translation kan bilog na Biblia, asin dai nahaloy nagluwas an mga edisyon sa ibang pangenot na mga lenguahe. An 3 tomo na ilinuwas kaidtong 1996 na taon nin paglilingkod ginibong 27 an total, na dian 14 an kompletong Biblia. Tanganing maasikaso an gibohon na ini sa Biblia, saka sa mga pantabang sa Biblia, an mga 1,174 nagdusay na Kristiano bilog na panahon na nagtatrabaho ngonyan sa pagtradusir sa 77 nasyon.

 6. Paano napanigoan kan Sosyedad an pangangaipo para sa mga publikasyon sa Biblia?

⁶ Nagsusuportar sa gibohon kan dakol na paratradusir na ini, an 24 nag-iimprentang sangang opisina kan Watch Tower Society padakol nang padakol an ginigibong publikasyon. Sa katuyohan na ini, an dugang na marikason na mga imprentahan na rotary padagos na iniinstalar sa mayor na mga sangang opisina. Bulan-bulan nagdadakol an produksion kan mga magasin na An Torrengbantayan asin Awake!, na nakaabot sa pinagsarong total na 943,892,500 na kopya, 13.4-porsientong pag-aumento para sa taon na iyan. An total na naprodusir na Biblia asin matagas an tutob na libro sa Estados Unidos, Brazil, Finlandia, Alemania, Italia, Hapon, Korea, asin Mejico sana 40 porsiento an iinaumento sa 1995 na nagin 76,760,098 kopya kan 1996. Dakula man an ikinakontribwir nin ibang sangang opisina sa kabilogan na aumento sa pagprodusir nin mga babasahon.

 7. Paano nagigin mas apretado ngonyan an Isaias 54:2?

⁷ An dakol sa pag-aumento kinaipuhan kaining mga taon nin 1990 huli sa paghale kan mga restriksion sa Mga Saksi ni Jehova sa Europa Oriental asin Aprika. Makosog an pagkagutom sa espirituwal na kakanon sa mga lugar na ini. Kun siring paorog nang paorog an pagkaapretado kan pangapodan: “Pahiwasa an lugar kan saimong tolda. Asin paignitan sa sainda an mga tahob kan saimong dakulang tabernakulo. Dai ka magduwaduwa. Palabaa an mga lubid kan saimong tolda, asin pasariga an mga taldok kan saimong tolda.”​—Isaias 54:2.

 8. Anong buka an palad na reaksion an nakatatabang na ikatao an pinansial na sustento?

⁸ Sa siring, kinaipuhan na pahiwason an mga pasilidad sa kadaklan kan 104 sangang opisina kan Sosyedad. Huli sa masakit na mga kamugtakan sa ekonomiya sa kadaklan na teritoryo na bagong mabukasan, an kadaklan kan gastos sa pagpahiwas na ini binabayadan kan mga kontribusyon sa pambilog na kinaban na gibohon hale sa mas may kayang kadagaan. Makaoogma, bilog na puso an reaksion nin mga kongregasyon asin indibiduwal, sa espiritu kan Exodo 35:​21: “Dangan sinda nagdaratong, an gabos na pinahiro kan saiyang puso, asin sinda nagdara, an gabos na pinukaw kan saiyang espiritu, nin kontribusyon ki Jehova para sa paggibo.” Inaaprobetsaran niato an oportunidad na ini na pasalamatan an gabos na nakikakabtang sa buka an palad na pagtataong ini.​—2 Corinto 9:11.

 9. Paano naootob ngonyan an Roma 10:​13, 18?

⁹ Durante kan 1996 an mga publikasyon kan Watch Tower Society tunay na nagpamuraway sa ngaran asin mga katuyohan ni Jehova sagkod sa kaporoporohi kan daga. Iyan arog nanggad kan ihinula ni apostol Pablo. Sa pagkotar kan hula ni Joel asin kan ika-19 Salmo, sia nagsurat: “‘An gabos na nag-aapod sa ngaran ni Jehova maliligtas.’ Alagad ta ako naghahapot, Nagpakadangog sinda, bako daw? Tara, sa katotoohan, ‘an saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.’” (Roma 10:​13, 18) Paagi sa siring na pagrukyaw kan mahalagang marhay na ngaran na Jehova, an saiyang banwaan nagkaigwa nin dakulang kabtang na mapano nin kamurawayan an saiyang harong nin pagsamba. Pero paano nagin mapanggana an proklamasyon na ini nangorogna durante kan 1996? Tabi siyasaton an tsart na yaon sa pahina 18 sagkod 21.

Pag-aani sa Bilog na Kinaban

10. Anong lataw na mga bagay an naririsa nindo sa aktibidad kan banwaan ni Jehova, na sinumaryo sa tsart sa pahina 18 sagkod 21?

¹⁰ Nungka na nagin mas mapuersa an mga tataramon ni Jesus na yaon sa Lucas 10:​2: “Totoong gayo na kadakol kan anihon, alagad ta kakadikit kan paraani. Kun siring makimaherak kamo sa Kagurangnan kan anihon na magsobol nin mga paraani sa saiyang anihon.” Naghihimate daw kamo sa pangapodan na iyan? An minilyon sa bilog na daga iyo. Ini pinatutunayan kan bagong pinakahalangkaw na kabilangan na 5,413,769 parahayag kan Kahadean na nagreport nin paglilingkod sa langtad durante kan 1996. Dugang pa, 366,579 bagong tugang na lalaki asin babae an nabautismohan. Pinahahalagahan niatong marhay ining “kawiliwiling mga bagay kan gabos na nasyon,” na nakikakabtang ngonyan sa ‘pagpano kan harong ni Jehova nin pagsamba nin kamurawayan’!​—Haggeo 2:7.

11. Taano ta kita gabos may dahelan na maggayagaya nin labi-labi?

¹¹ Makangangalas nanggad an mga report nin paghiwas sa mga langtad na bagong mabukasan. An iba daw sa sato nauuri sa mga nagkakamit ngonyan nin siring na pag-oswag? Al kontraryo, kita nakigagayagaya sa sainda. An gabos na nasyon saradit an kapinonan. An katemporanyong propeta ni Haggeo, si Zacarias, nagsurat: “Siisay an nagbasangbasang sa aldaw nin saradit na bagay?” (Zacarias 4:10) Labi-labi an satong kagayagayahan na sa kadagaan na establisado nang marhay an pagpatotoo, minilyon na ngonyan an parahayag kan Kahadean, asin parateng natatapos an teritoryo, kada semana pa ngani sa dakol na darakulang siudad. Igwa daw kita nin dahelan na manluya mantang itinatao ngonyan ni Jehova an oportunidad para sa kaligtasan sa mga lugar na dati dai nahuhulitan? Nungka! “An oma iyo an kinaban,” sabi ni Jesus. (Mateo 13:38) Kaipuhan na padagos na ikatao an lubos na patotoo, kun paanong an enot na mga disipulo nagtao nin lubos na patotoo sa pagtatapos kan Judiong palakaw nin mga bagay.​—Gibo 2:​40; 10:​42; 20:​24; 28:23.

Padagos sa Pag-abante

12. Ano an pan-enganyar sa sato na humiro nin “diretso paabante”? (Helingon man an kahon, “Pag-ani ‘Hale sa Poro kan Daga.’”)

¹² Iyo, kaipuhan na kita makisabay, na naghihiro nin “diretso paabante” kadungan kan langitnon na karuwahe nin mga anghel ni Jehova. (Ezequiel 1:12) Nasa isip niato an mga tataramon ni Pedro: “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta habo nia na an siisay man malaglag kundi boot nia na an gabos makapagsolsol.” (2 Pedro 3:9) An kaigotan logod kan satong mga tugang sa dukhang kadagaan na maninigong arogon makapahiro sa sato. An ano man na garo baga pagkaatraso sa biglang pag-abot kan Armagedon minatogot na an ginatos na ribo matipon sa kadagaan na ini saka an dakol pa sa mga teritoryong perming nahuhulitan. Dai kamo masala: “An dakulang aldaw ni Jehova harani na. Iyan harani na, asin igwa nin paghihidale na gayo kaiyan.” (Sofonias 1:14) Maninigo man kitang maghidale sa pagtatao nin lubos na pangultimong patotoo!

13, 14. (a) Ano an masasabi manongod sa pagwaras nin mga publikasyon durante kan 1996? (b) Anong espesyal na mga plano an puedeng gibohon nin mga kongregasyon kada taon, asin paano kamo nagpaplanong makikabtang?

¹³ Minsan ngani dai minalataw sa tsart kan paglilingkod an mga detalye, nagkaigwa nin risang gayong aumento sa pagwaras nin mga Biblia, libro, asin magasin kan nakaaging taon. Halimbawa, an ikinawaras na magasin sa bilog na kinaban may 19-porsientong pag-aumento, na 543,667,923 gabos na kopya an ikinawaras. An mga magasin niato pasil gamiton sa paghuhulit minsan saen​—sa mga kalye, sa mga parke, sa mga pondohan nin auto, sa mga lugar nin negosyo. Ipinaririsa nin mga report na sa pirang teritoryo na parateng nahuhulitan kan Kahadean, an mga tawong propesyonal hanga sa kualidad kan satong mga magasin asin nag-aako sinda nin mga pag-adal sa Biblia.

¹⁴ Taon-taon sa bulan nin Abril, an mga kongregasyon parateng nag-oorganisar nin espesyal na pagwaras nin magasin, na may bilog na aldaw na kampanya sa harong-harong asin sa pampublikong mga lugar. Makikakabtang daw digdi an saindong kongregasyon sa Abril 1997? May inandam na marahayon na mga luwas sa Abril kan An Torrengbantayan asin Awake!, asin an durungan na pag-atubang kaiyan sa bilog na kinaban siertong magigin kahangahanga! Sa isla nin Chipre, an mga kongregasyon, na ginagamit an sarabihon na “ipaabot an mensahe kan Kahadean sa gabos na mapupuede,” ginibo ngani bulan-bulan an siring na nakaiskedyul na pagwaras nin magasin, na naabot an bagong pinakahalangkaw na kabilangan na 275,359 ikinawaras sa laog kan taon, 54-porsientong pag-aumento.

An Huring mga Mensahe ni Haggeo

15. (a) Taano ta nagtao si Jehova nin dugang na mga mensahe paagi ki Haggeo? (b) Anong leksion an maninigong itao sa sato kan ikatolong mensahe ni Haggeo?

¹⁵ Isinugo ni Jehova si Haggeo, 63 na aldaw pakatawan nia kan saiyang ikaduwang mensahe, dara an ikatolong proklamasyon na marahay na isapuso niato ngonyan. Nagtaram si Haggeo na garo baga ibinubugtak kaidto kan mga Judio an pundasyon kan templo, na sa katotoohan ibinugtak ninda 17 taon bago kaini. Liwat naheling ni Jehova na kaipuhan na gumibo nin paglinig. An mga saserdote asin an banwaan nagpabaya kaya sinda maati sa pagheling ni Jehova. Posible daw na an iba sa banwaan ni Jehova nanluluya ngonyan, na napapalabot pa ngani sa daing bawal asin materyalistikong mga gibo kan kinaban? Apretado na kita gabos isapuso an pagpamuraway sa ngaran ni Jehova “poon sa aldaw na ini asin padagos,” na kompiado sa saiyang panuga: “Poon sa aldaw na ini ako matao nin bendisyon.”​—Haggeo 2:​10-​19; Hebreo 6:​11, 12.

16. Anong ‘pagyugyug’ an harani na, asin ano an ibubunga?

¹⁶ Kan aldaw man sanang idto, an tataramon ni “Jehova nin mga hukbo” uminabot ki Haggeo sa ikaapat asin ultimong beses. Ipinaaram nia kun ano an kalabot sa Saiyang ‘pagyugyug sa kalangitan asin sa daga,’ na sinasabi: “Ibabagsak ko nanggad an trono nin mga kahadean asin paparaon ko an kakosogan kan mga kahadean nin mga nasyon; asin ibabagsak ko an karuwahe asin an mga naglulunad dian, asin an mga kabayo saka an mga nangangarabayo dian magkakapurukan nanggad, an lambang saro paagi sa minasbad kan saiyang tugang.” (Haggeo 2:​6, 21, 22) Sa siring, an ‘pagyugyug’ makaaabot sa kulminasyon kaiyan kun biyo nang linigan ni Jehova an daga sa Armagedon. Sa panahon na iyan nagralaog na “an kawiliwiling mga bagay kan gabos na nasyon,” tanganing kumompuesto sa sarong nukleo nin sosyedad nin mga tawo para sa bagong kinaban. Kanigoan nanggad na mga dahelan na maggayagaya asin mag-omaw ki Jehova!​—Haggeo 2:7; Kapahayagan 19:​6, 7; 21:​1-4.

17. Paano si Jesus ibinugtak bilang “singsing na pantatak”?

¹⁷ Sa pagtatapos kan saiyang hula, si Haggeo nagsurat: “‘Sa aldaw na iyan,’ an sabi ni Jehova nin mga hukbo, ‘kukuanon taka, O Zorobabel . . . , asin tunay na ibubugtak taka bilang singsing na pantatak, huli ta ika an sakong pinili,’ an sabi ni Jehova nin mga hukbo.” (Haggeo 2:23) Si Cristo Jesus iyo ngonyan an antitipikong Mesiyanikong Hade asin Halangkaw na Saserdote, na pinagsaro sa kalangitan an mga katongdan na siblag na kinapotan ni Gobernador Zorobabel asin Halangkaw na Saserdote Josue sa daganon na Jerusalem. Siring sa opisyal na singsing na pantatak sa toong kamot ni Jehova, si Jesus an saro na nagin “Iyo” bilang instrumento ni Jehova sa pagpangyaring magkatotoo an dakol na “panuga nin Dios.” (2 Corinto 1:​20; Efeso 3:​10, 11; Kapahayagan 19:10) An bilog na makahulang mensahe kan Biblia nakasentro sa pagtao ni Jehova ki Cristo bilang Hade asin saserdoteng Paratubos.​—Juan 18:​37; 1 Pedro 1:​18, 19.

18. Paano magkakaigwa nin nakarerepreskong kaotoban an pantapos na “sabi ni Jehova nin mga hukbo”?

¹⁸ Tunay na sa kaaldawan niatong ini, an nakalalabi sa gabos na kamurawayan manonompongan sa makinang na espirituwal na templo ni Jehova! Asin sa dai na mahahaloy, pakatapos na paraon ni Jehova an bilog na palakaw ni Satanas, an Haggeo 2:​9 magkakaigwa pa nin nakaoogmang marhay na kaotoban: “‘Sa lugar na ini matao ako nin katoninongan,’ an sabi ni Jehova nin mga hukbo.” Katoninongan sa katapustapusi!​—sarong nagdadanay, lakop sa unibersong katoninongan, na garantisado kan “singsing na pantatak” ni Jehova, si Cristo Jesus, an “Prinsipe nin Katoninongan,” na manongod sa saiya nasusurat: “An kadakolan kan sa-prinsipeng pamamahala asin katoninongan magigin daing kasagkodan . . . An mismong kaigotan ni Jehova nin mga hukbo magibo kaini.” (Isaias 9:​6, 7) Sa bilog na panahon na daing sagkod an kamurawayan kan harong ni Jehova nin pagsamba mababanaag sa bilog na matoninong na rona kan saiyang soberaniya na lakop sa uniberso. Sagkod lamang logod na kita magdanay sa harong na iyan!​—Salmo 27:​4; 65:​4; 84:10.

[Nota sa Ibaba]

Ikapaliliwanag daw Nindo?

◻ Paano, ngonyan, ‘napapano nin kamurawayan’ an harong ni Jehova?

◻ Taano ta nungka na nagin apretado nin arog ngonyan an paghuhulit kan maogmang bareta?

◻ Anong pan-enganyar na apretadong maghulit an itinatao kan Report kan 1996 na Taon nin Paglilingkod?

◻ Paano si Cristo naglilingkod bilang “singsing na pantatak” ni Jehova?

[Kahon sa pahina 15]

Pag-ani “Hale sa Poro kan Daga”

SA Isaias 43:​6, nababasa niato an pagboot ni Jehova: “Dai ka magpogol. Daraha an sakuyang mga aking lalaki hale sa harayo, asin an sakuyang mga aking babae hale sa poro kan daga.” An tekstong ini nagkakaigwa nin pambihirang kaotoban ngonyan sa Europa Oriental. Halimbawa, helinga an dati Komunistang nasyon nin Moldova. May mga baryo na sagkod sa kabanga kan populasyon Saksi na ngonyan. Kaipuhan sindang magbiahe nin hararayo tanganing makanompong nin teritoryong huhulitan, alagad ginigibo ninda an paghihingoa! An dakol na parahayag sa mga kongregasyon na ini mga aki nin mga idinistiero sa Siberia kan enot na mga taon nin 1950. Ngonyan an pamilya ninda nangengenot sa gibong pag-ani. Sa 12,565 parahayag, 1,917 an nabautismohan kaining nakaaging taon. An 43 sa mga kongregasyon igwa nin mga 150 parahayag an kada saro, asin an mga sirkito nagdakol poon apat sagkod sa walo sa bagong taon nin paglilingkod.

Pambihira man an paghiwas sa Albania. Duman an nagkapirang maimbod na Saksi tinagalan an pinakamaisog na diktadura sa laog nin mga 50 taon. Ginadan an nagkapira sa sainda. Ipinagigirumdom kaini an panuga ni Jesus: “Dai ka matakot sa mga bagay na saimong titioson. Uya! Ibibilanggo kan Diablo an nagkapira sa saindo tanganing kamo lubos na mabalo . . . Patunayan mo na ika fiel sagkod sa kagadanan, asin ta itatao ko sa saimo an korona nin buhay.” (Kapahayagan 2:10; helingon man an Juan 5:​28, 29; 11:​24, 25.) Ano ngonyan an naheheling niato sa Albania? Tunay na risang marhay na kaotoban kan panuga ni Jehova na yaon sa Isaias 60:​22: “An sadit mismo magigin sangribo”! Kan 1990 sasarong parahayag an nagreport nin paglilingkod sa Albania. Minsan siring, an dagdag na “mga paraani” hale sa Italia asin iba pang kadagaan suminimbag sa pangapodan ni Jesus: “Kun siring paduman kamo asin gumibo kamo nin mga disipulo sa mga tawo . . . , na bautismohan nindo sinda.” (Mateo 28:19; Lucas 10:2) Kaidtong panahon kan Memorial kan kagadanan ni Jesus kan 1996, 773 nang parahayag an aktibo sa langtad, asin tinipon kan mga ini an 6,523 katawo sa saindang pagtiripon sa Memorial, labing walong doble sa kabilangan nin mga parahayag! May irineport na makangangalas na kabilangan nin mga nag-atender sa napapasuway na mga lugar. Minsan ngani mayo nin lokal na mga parahayag, an mga siudad nin Kukës asin Divjakë may mga nag-atender na 192 asin 230. An Krujë, na sasaro an parahayag, may 212 nag-atender. An 30 parahayag sa Korçë nag-arkila nin mga pasilidad para sa labing 300. Pakalaog kan kabilangan na iyan nin dusok sa auditoryum, kinaipuhan na sayumahan an 200 pa ta mayo na nin lugar. Tunay na sarong langtad na hinog na para sa pag-ani!

Hale sa Romania an report na ini: “Mantang kami naghaharongharong, nanompongan niamo an sarong tawo na an sabi saro sia sa Mga Saksi ni Jehova asin nag-iistar sa sarong sadit na banwaan na duman, sa pagkaaram niamo, mayo nin mga Saksi. Sinabi nia sa samo na apuera sa saiya may 15 pa katawo na sa laog nin dakol na taon nagtitiripon kun Huebes asin Domingo saka nagpoon na sindang maghulit sa harong-harong. Kan sumunod na aldaw nagduman kami sa banwaan na iyan. Naghahalat sa samo sa duwang kuarto an 15 lalaki, babae, asin aki na nag-ako nin 20 libro asin 20 kan pinakabagong magasin. Ipinaheling mi sa sainda kun paano an pagkondukta nin pag-adal sa Biblia. Nag-awit kami nin iriba asin sinimbag mi an pinakaimportante nindang mga hapot. An nangengenot sa grupo nagtuga: ‘Mga pirang aldaw na an nakaagi, namibi akong may luha ki Jehova na magsugo sa samo nin pastor, asin sinimbag an sakong pamibi.’ Naogma kaming marhay, asin kan paghale mi, siring sa ilo na sa katapustapusi nakanompong nin ama, sia nagsabi: ‘Tabi na dai nindo kami paglingawan. Magdigdi kamo asin songkoon nindo giraray kami!’ Ginibo niamo iyan, asin ngonyan pitong pag-adal sa Biblia an ginigibo sa banwaan na iyan. Sa dakol na bagong teritoryo, an gibohon makangangalas na minapoon paagi sa babasahon sa Biblia, na inaapresyar na marhay, asin ipinaheheling kaini na an gibohon gikan sa Dios.”

[Tsart sa pahina 18-21]

REPORT KAN 1996 NA TAON NIN PAGLILINGKOD KAN MGA SAKSI NI JEHOVAH SA BILOG NA KINABAN

(Hilingon an publikasyon)

[Mga retrato sa pahina 16, 17]

“An kawiliwiling mga bagay kan gabos na nasyon” tinitipon sa mga Isla kan Dagat (1), Amerika del Sur (2), Aprika (3), Asia (4), Amerika del Norte (5), asin Europa (6)