Nagigirumdoman daw Nindo?

Maingat daw nindong hinorophorop an dai pa sana nahahaloy na mga luwas kan An Torrengbantayan asin The Watchtower? Puedeng magin interesante para sa saindo na girumdomon an minasunod:

◻ Paano an saro ‘minadolok ki Jesus’ kaoyon sa saiyang pangagda sa Mateo 11:28?

Si Jesus nagsabi: “Kun an siisay man boot na maglakaw sa hudian ko, paindahan nia an saiyang sadiri asin pasanon an saiyang hariging pasakitan patin padagos na sumunod sa sako.” (Mateo 16:24) Huli kaini, an pagdolok ki Jesus nangangahulogan nin pagpasakop kan sadiring kabotan nin saro sa kabotan nin Dios asin ni Cristo, pag-ako nin pasan na paninimbagan asin padagos na paggibo kaiyan.​—w-BI 8/15, pahina 17.

◻ Taano ta “diit” sana an nakakukua kan ‘hayakpit na dalan pasiring sa buhay’ na nasambitan ni Jesus sa Mateo 7:​13, 14?

An piot na dalan may restriksion kan mga ley asin prinsipyo nin Dios. Huli kaini, iyan makaaakit sana sa saro na sinserong nagmamawot na ioyon an saiyang buhay sa mga pamantayan nin Dios. Minsan ngani garo baga kadakol kan bawal, an ‘hayakpit na dalan’ nagpapatalingkas sa saro sa lambang mahalagang bagay. An mga linderos kaiyan ibinugtak kan “sangkap na pagboot para sa katalingkasan.” (Santiago 1:25)​—w-BI 9/1, pahina 5.

◻ Paano mapatatalubo an pakamansay?

An pakamansay bakong basta na sana o natural na sanang nakakamtan. Alagad paagi sa pagpasensia, pamibi, odok na paghihingoa, madonong na kairiba, pag-adal asin paghorophorop sa Biblia, asin pagsarig sa banal na espiritu ni Jehova, mapatatalubo an pakamansay.​—w-BI 9/1, pahina 21.

◻ Paano puedeng magin puersa para sa ikararahay an pag-imon nin tawo?

Puedeng pahiroon kaiyan an saro na protehiran sa maraot na mga impluwensia an sarong namomotan. Saro pa, an mga tawo tamang makapaheheling nin pag-imon para ki Jehova asin sa pagsamba sa saiya. (1 Hade 19:​10)​—w-BI 9/15, pahina 8, 9.

◻ Ano an kahulogan kan ekspresyon sa Genesis 50:23 mapadapit sa mga makoapo ni Jose: “Sinda ipinangaki sa mga tuhod ni Jose”?

ni puedeng mangahulogan sana na minidbid ni Jose an mga aki bilang saiyang mga gikan. Iyan puede man na magparisa na sia may kapadangatan na nakikawat sa mga aki, na pinauurougdo sinda sa saiyang mga tuhod. Marahay na an mga ama ngonyan magpaheling nin kaparehong kapadangatan sa saindang mga aki.​—w-BI 9/15, pahina 21.

◻ Ano an mahalagang marhay para sa mapangganang pag-agoman asin buhay pampamilya?

Tanganing makamtan an siring karahay na mga resulta, an mga mag-agom dapat na perming enoton an kabotan nin Dios. Ginigibo iyan, an mga mag-agom naghihingoang magdanay na saro asin resolberan an saindang mga problema paagi sa pag-aplikar kan hatol kan Tataramon nin Dios. Sa siring nalilikayan ninda an gabos na klaseng kolog sa puso na ibinubunga kun iniignoro an kabotan nin Dios. (Salmo 19:​7-11)​—w-BI 10/1, pahina 11.

◻ Gurano kahalaga ngonyan kan diosnon na pakamate nin pag-apura?

An diosnon na pakamate nin pag-apura sarong mahalagang kabtang nin bilog na pusong paglilingkod ki Jehova. Iyan nagsasangga asin nakatatabang na tumangon an mga pagprobar kan Diablo na papangyarihon an mga lingkod nin Dios na ‘mapagal asin manluya sa saindang kalag.’ (Hebreo 12:3) Pinoprotehiran sinda kaiyan sa dai kinakaipuhan na pakikilabot sa kinaban asin sa materyalismo kaiyan, na itinotorohok an saindang isip sa mga bagay na nasa itaas​—an “tunay na buhay.” (1 Timoteo 6:19)​—w-E 10/1, pahina 28.

◻ Sa parabola dapit sa mga karnero asin kanding, noarin si Jesus minatukaw sa saiyang trono asin taano? (Mateo 25:​31-33)

Dai sia ipinaheheling kan parabola na nagtutukaw sa sentido nin pagin Hade. Kundi, sia minatukaw bilang Hokom. An paghokom na iyan bakong sarong bagay na nagpapadagos sa peryodo nin dakol na taon. Imbes, an parabola nagtotokdo sa ngapit na sa limitadong panahon si Jesus mapahayag asin magibo nin paghokom sa mga nasyon.​—w-BI 10/15, pahina 18, 19.

◻ Ano an “kapag-arakian” na parateng marhay na nasasambitan ni Jesus?

An terminong “an kapag-arakian na ini” iinaplikar ni Jesus sa magkakakontemporanyong mga tawo kaiba kan saindang “mga butang parakabit” na minakompuesto sa Judiong nasyon. (Mateo 11:16; 15:14; 24:34)​—w-BI 11/1, pahina 14.

◻ Sa ultimong kaotoban kan hula ni Jesus sa Mateo 24:​34-39, sa ano napanonongod an ekspresyon na “an kapag-arakian na ini”?

Minalataw na an pinanonongdan ni Jesus iyo an mga tawo digdi sa daga na nakaheheling sa tanda kan presensia ni Cristo alagad nasusudyang itanos an saindang mga dalan.​—w-BI 11/1, pahina 19, 31.

◻ Paano pinakinabangan kan mga tagasuanoy na Israel an areglong pailihan na mga siudad asin an mga restriksion dian?

Itinanom kaiyan sa isip kan mga Israelita na sinda maninigong dai magin pabaya o indiperente manongod sa buhay nin tawo. Idinoon man kaiyan an pangangaipo na magpaheling nin pagkaherak kun angay an paggibo kaiyan. (Santiago 2:13)​—w-BI 11/15, pahina 14.

◻ Ano an antitipikong siudad na pailihan?

Ini an probisyon nin Dios para sa pagprotehir sa sato sa kagadanan huli sa paglapas sa saiyang togon manongod sa kabanalan nin dugo. (Genesis 9:6)​—w-BI 11/15, pahina 17.

◻ Paano an satong Kristianong asosasyon nin magturugang makatatabang sa sato na ‘magkamit nin bagong kapangyarihan’? (Isaias 40:31)

Sa tahaw kan satong Kristianong mga tugang na lalaki asin babae, may nagkapira na tibaad napaaatubang sa kaparehong mga pangigipit asin pagbalo asin tibaad nakaeeksperyensia nin mga saboot na arog nanggad kan sa sato. (1 Pedro 5:9) Nakaaasegurar asin nakapakokosog sa pagtubod na maaraman na an satong inaagihan bakong bihira asin an satong mga saboot bakong palaen.​—w-BI 12/1, pahina 15, 16.