Dinalaw si Jesus nin mga Astrologo

May nagkapirang lalaki na nag-abot hali sa Sirangan. Mga astrologo sinda—mga tawo na pinag-aadalan an posisyon nin mga bituon, na naghihingako na sa paagi kaiyan masasabi ninda an kahulugan nin mga pangyayari sa buhay nin mga tawo. (Isaias 47:13) Kan nasa Sirangan pa sinda, may nahiling sindang sarong “bituon” asin sinundan ninda iyan nin ginatos na kilometro, bakong pasiring sa Betlehem kundi pa-Jerusalem.

Pag-abot kan mga astrologo duman, nagharapot sinda: “Hain an ipinangaki na hadi kan mga Judio? Huli ta nahiling mi an saiyang bituon kan yaon kami sa Sirangan, asin nagdigdi kami tanganing magtaong galang sa saiya.”—Mateo 2:1, 2.

Nadangog ni Hading Herodes kan Jerusalem an manungod digdi asin naribok siyang marhay. Kaya inapod niya an panginot na mga saserdote asin iba pang Judiong lider nin relihiyon para haputon kun sain mamumundag an Cristo. Nagsimbag sinda basado sa Kasuratan: “Sa Betlehem.” (Mateo 2:5; Mikas 5:2) Huli kaiyan, pasekretong ipinaapod ni Herodes an mga astrologo, asin sinabi sa sainda: “Lakaw kamo asin hanapon nindong marhay an aki, tapos pag nakua na nindo siya, baretaan nindo ako tanganing makaduman man ako asin makapagtaong galang sa saiya.” (Mateo 2:8) Pero an totoo, gusto niyang mahanap an aki para ipagadan!

Pagkahali kan mga astrologo, an “bituon” na nahiling ninda kan sinda nasa Sirangan nag-abante sa inutan ninda. Malinaw na bako ining ordinaryong bituon, kundi may saro na nasa likod kaiyan para giyahan sinda. Sinundan ini kan mga astrologo sagkod na magpundo iyan sa tangod mismo kan iniistaran ni Jose asin Maria kaiba an saindang sadit na aki.

Paglaog kan mga astrologo sa harong, nahiling ninda si Maria kaiba an sadit na aki—si Jesus. Dangan, nagruluhod sinda sa aki. Asin tinawan ninda ini nin mga regalo na bulawan, puting insenso, saka mira. Pagkatapos, kan mabalik na sinda ki Herodes, pinatanidan sinda nin Diyos paagi sa pangaturugan na dai na magbalik sa saiya. Kaya nagpuruli sinda sa saindang sadiring lugar paagi sa ibang dalan.

Sa hiling mo, kiisay hali an “bituon” na naggiya sa mga astrologo? Tandaan, dai kaini sinda giniyahan nin direkta pasiring ki Jesus sa Betlehem. Imbes, giniyahan nguna sinda kaini pa-Jerusalem, kun sain nakaulay ninda si Hading Herodes na gustong gadanon si Jesus. Asin nagibo kuta niya iyan kun an Diyos dai nakiaram asin dai nagpatanid sa mga astrologo na dai na magbalik ki Herodes para sabihon kun hain si Jesus. Malinaw na an kaiwal nin Diyos, si Satanas, an may kagustuhan na ipagadan si Jesus, kaya ginamit niya an paaging ini para hinguwahon na mautob an saiyang katuyuhan.