“Magpuka”—Taano ta Mahalagang Marhay Iyan?

“ANO an tanda kan saimong pagpadigdi, asin kan katapusan nin kinaban?” (Mat. 24:3) Bilang simbag sa hapot na iyan, si Jesus nagtao sa mga disipulo nin tanda na malinaw, detalyado, risang-risa, asin napapalaen, arog kan nasa Mateo kapitulo 24, Marcos kapitulo 13, saka Lucas kapitulo 21. Sinabi pa nia: ‘Magpuka kamo.’—Mat. 24:42.

Kun an tanda mismo risang-risa, taano ta itinao pa an sadol na ini? Estudyare an duwang posibleng dahelan. Enot, an mga bagay na nakakalingling tibaad magin dahelan na baliwalaon nin nagkapira an tanda, na minaresulta sa pagkawara nin espirituwalidad asin pagkapuka. Ikaduwa, minsan ngani aram nin sarong Kristiano na naootob an nagkapirang kabtang kan tanda, dai sia direktang apektado huling dai man iyan nangyayari sa saiya mismong lugar. Dangan, tibaad magrason sia na medyo haloy pa an “dakulang kahorasaan,” an kulminasyon kan hula ni Jesus, kaya dai pa kaipuhan na “magpuka.”—Mat. 24:21.

“Sinda Dai Nakaisi”

Ipinagirumdom ni Jesus sa mga parasunod nia an manongod sa mga katemporanyo ni Noe. Siertong naheling ninda an paghuhulit ni Noe, an pagtogdok sa dakulaon na arka, asin an kadahasan kaidto. Minsan siring, an kadaklan “dai nakaisi” o dai nagmangno. (Mat. 24:37-39) Lakop man ngonyan an siring na saboot dapit sa mga patanid. Halimbawa, malinaw an mga karatula sa kun gurano dapat karikas an pagmaneho nin saro, pero binabaliwala iyan nin dakol. Sa parate, napipiritan an mga autoridad na maglaag nin mga hump sa tinampo tanganing magluwayluway an mga drayber. Kaagid kaiyan, tibaad naheheling nin sarong Kristiano an tanda kan huring mga aldaw, alagad nakikikabtang pa man giraray sa mga aktibidad na nakakalingling sa saiya. Naeksperyensiahan ini ni Arielle, sarong tin-edyer na taga Solnopan na Aprika.

Mahilig si Arielle na magdalan o magheling sa telebisyon nin kawat na handball para sa mga babae. Nag-organisar an eskuelahan ninda nin sarong team; huli sa kamawotan niang magkawat, dai nia naisip na puedeng mameligro an espirituwalidad nia. Sia nagbali o nag-entra bilang goalkeeper. Ano an sunod na nangyari? Ipinaliwanag nia: “An nagkapira sa mga ka-team ko may kailusyon na nagdodroga asin nagsisigarilyo. Kinakantsawan ninda ako huling napapalaen ako, alagad sa boot ko kaya ko iyan. Dai ko inasahan na huli sa kawat na iyan dikit-dikit nang nagluluya an espirituwalidad ko. Puro na sana handball an nasa isip asin puso ko. Durante kan mga pagtiripon, parate kong naiisip an handball court. Naapektaran man an sakong personalidad bilang Kristiano. Dati mahilig sana akong magkawat, pero kan huri, mas gusto ko nang manggana. Nagparapraktis ako tanganing mapanigoan an sakong pagigin mapagkompetensia. Nag-orog an tension ko. Isinakripisyo ko pa ngani an pakikikatood huli sa handball.

“An pinakagrabe iyo na kan tawan nin penalty shot an samong kalaban sa sarong kawat. Kan andam na akong sagangon an bola, dai ko narisa na nakapamibi na palan ako ki Jehova na logod tabangan nia akong masagang iyan! Huli sa pangyayaring ini, narealisar ko kun gurano na kanaapektaran an espirituwalidad ko. Paano ko ikinabalik an sakong espirituwalidad?

“Nadalan ko na an satong DVD na Young People Ask—What Will I Do With My Life?a Nagdesisyon ako na sa ikaduwang pagkakataon seryoso ko nang dalanon iyan. Total, pareho an situwasyon mi ni André, an hoben na lalaki sa drama. Tinawan ko nin nangorognang atension an isinuherir kan magurang sa kongregasyon na gibohon ni André—basahon asin horophoropon an Filipos 3:8. Iyan an nakakombensir sa sako na maghale na sa team.

“Dakula nanggad na pagbabago ini! Nawara an pagigin mapagkompetensia asin an tension ko huli kaiyan. Nagin mas maogma ako asin mas dayupot sa Kristianong mga katood. Nagin mas makahulogan man an espirituwal na mga aktibidad. Nakapagkonsentrar ako sa mga pagtiripon asin ikinaogma ko na giraray iyan. Uminoswag man an sakong ministeryo. Ngonyan, regular akong nag-o-auxiliary payunir.”

Kun huli sa sarong bagay na nakakalingling nababaliwala mo na an tanda na itinao ni Jesus, gumibo nin seryosong mga lakdang, arog ni Arielle. Puede mong probaran an nagkapira sa minasunod na mga paagi. Konsultahon an Watch Tower Publications Index, na inapod na sarong mapa nin nakatagong kayamanan. Maheheling mo dian an mga reperensia na may marahay na sadol asin mga eksperyensia nin iba na personal na isinaysay kun paano ninda inatubang an mga sugot. Lubos na makinabang sa mga pagtiripon paagi sa pag-andam na marhay asin pagkua nin nota. Para sa nagkapira, nakakatabang an pagtukaw harani sa plataporma. Kun may partisipasyon an mga nagdadangog, pagmaigotan na magkomento tolos. Dugang pa, magdanay na puka sa espirituwal paagi sa pagkomparar kan bagong mga bareta sa mga aspekto kan tanda asin iba pang karakteristiko kan “magña huring aldao.”—2 Tim. 3:1-5; 2 Ped. 3:3, 4; Kap. 6:1-8.

‘Magin Andam Kamo’

An tanda kan huring mga aldaw nangyayari “sa bilog na kinaban.” (Mat. 24:7, 14) Minilyon an nakaistar sa mga lugar na apektadong gayo nin mga peste, kakulangan nin kakanon, linog, asin iba pang ihinulang pangyayari. Sa kabaliktaran, dakol na iba pa an nakaistar sa mga lugar na medyo toninong asin trangkilo. Kun nungka mo pang naeksperyensiahan an nagkapira sa mga aspekto kan tanda, iisipon mo daw na haloyon pa an dakulang kahorasaan? Bakong madonong iyan.

Halimbawa, horophoropon an ihinula ni Jesus manongod sa “magña gotom asin damat.” (Luc. 21:11) Enot, dai nia sinabi na sarabay na maaapektaran kaini an gabos na lugar o na parareho an magigin danyos kaiyan. Imbes, sinabi nia na mangyayari ini “sa manlaenlaen na lugar.” Kaya dai niato inaasahan na magkakaigwa nin parareho asin durungan na pangyayari sa gabos na lugar. Ikaduwa, dai naghaloy pagkatapos na sambiton ni Jesus an kakulangan nin kakanon, ipinarisa nia na an nagkapira sa mga parasunod nia kaipuhan na mag-ingat na dai magpangana sa pagkakan: “Magigñat kamo sa saindo man sana, tagñaning an saindong magña puso dai magñanaan nin magña kapasloan.” (Luc. 21:34) Huli kaini, dai aasahan nin gabos na Kristiano na maeeksperyensiahan ninda an gabos na aspekto kan tanda. Imbes, si Jesus nagsabi: “Kun mahiling na nindo na nangyayari na an magña bagay na ini, saboton nindo na harani na an kahadean nin Dios.” (Luc. 21:31) Huli sa modernong komunikasyon, naheheling niato an gabos na aspekto kan tanda, ano man an personal na naeeksperyensiahan niato sa satong lugar.

Girumdomon man na nagtalaan na si Jehova nin ‘aldaw asin oras’ na mapoon an dakulang kahorasaan. (Mat. 24:36) Dai na iyan mababago kan mga nangyayari sa daga.

Sinadol ni Jesus an mga Kristiano sa gabos na lugar: ‘Magin andam kamo.’ (Mat. 24:44) Kita maninigo na pirmeng magin andam. Siempre, dai kita makakapakikabtang sa teokratikong mga aktibidad sa bilog na aldaw asin sa gabos na panahon. Apuera kaiyan, dai niato aram kun ano an ginigibo niato oras na magpoon an dakulang kahorasaan. An nagkapira tibaad nasa oma o nagtatrabaho sa harong. (Mat. 24:40, 41) Kaya, ano an magigibo niato tangani kitang magin andam?

Si Emmanuel, Victorine, asin an anom nindang aking babae nakaistar sa sarong lugar sa Aprika na duman dai ninda naeeksperyensiahan an gabos na pangyayari na kabtang kan tanda. Kaya nagdesisyon sindang magkaigwa nin espirituwal na pag-orolay aroaldaw na makakatabang sa sainda na magin andam. Nagpaliwanag si Emmanuel: “Depisil na makakua nin panahon na kombenyente para sa gabos. Sa katapustapusi, napili mi an poon alas sais sagkod alas sais y media nin aga. Pakatapos pag-olayan an teksto kan aldaw, nag-aandam kami nin pirang parapo sa saro sa mga publikasyon na pag-aadalan kan kongregasyon sa laog kan semana.” An programa daw na ini nakatabang sa sainda na magpuka? Iyo nanggad! Si Emmanuel an parakoordinar kan grupo nin kamagurangan sa kongregasyon. Si Victorine parateng nag-o-auxiliary payunir asin dakol na an natabangan na mag-ako kan katotoohan. An mga aki ninda gabos maoswag na marhay sa espirituwal.

Sinasadol kita ni Jesus: “Magigñat kamo, magpuka.” (Mar. 13:33) Dai pagtogotan na lumuya an espirituwal na pagkapuka mo huli sa sarong bagay na nakakalingling. Imbes, tawan nin atension an marahay na sadol sa satong mga publikasyon asin pagtiripon, arog ni Arielle. Siring kan pamilya ni Emmanuel, pagmaigotan na may magibo kamo aroaldaw na nagpapatunay na kamo andam asin ‘puka.’

[Nota sa Ibaba]

[Ritrato sa pahina 4]

An aroaldaw na espirituwal na mga pag-orolay nakatabang ki Emmanuel asin sa pamilya nia na ‘magin andam’