‘Girumdumon Nindo an mga Nanginginot sa Saindo’

AN MGA tataramon na ini ni apostol Pablo, na nakasurat sa Hebreo 13:7, puwede man na itradusir: “Girumdumon nindo an mga namamahala sa saindo.” Puon kan Pentecostes 33 C.E., inutob kan maimbod na mga apostol kan Kagurangnan na Jesu-Cristo an katungdan na ini bilang sarong namamahalang grupo, na nanginot sa pagtao nin giya asin instruksiyon sa bagong maestablisar na Kristiyanong kongregasyon. (Gibo 6:2-4) Pag-abot kan mga taon 49 C.E., may iba pang nagin miyembro kan namamahalang grupo apuwera sa mga apostol ni Jesus. Kan desisyunan an isyu manungod sa pagturi, an namamahalang grupo kompuwesto kan “mga apostol asin kamagurangan sa Jerusalem.” (Gibo 15:1, 2) Paninimbagan ninda na tawan nin atensiyon an mga bagay na nakakaapekto sa mga Kristiyano sa gabos na lugar. Nagpadara sinda nin mga surat saka mga susundon, na nagpakusog sa mga kongregasyon saka nakatabang sa mga disipulo na magdanay na nagkakasararo sa isip asin gibo. An mga kongregasyon nagin makinuyog asin mapagpasakop sa paggiya kan namamahalang grupo, kaya bilang resulta, binendisyunan sinda ni Jehova asin nag-uswag.—Gibo 8:1, 14, 15; 15:22-31; 16:4, 5; Heb. 13:17.

² Pagkagadan kan mga apostol, nagpuon an grabeng apostasya. (2 Tes. 2:3-12) Arog kan ihinula ni Jesus sa saiyang parabula manungod sa trigo asin duot, an trigo (linahidan na mga Kristiyano) sinabwagan nin duot (bakong tunay na mga Kristiyano). Sa laog nin dakul na siglo, an duwang grupong iyan pinabayaan na sabay na magtalubo sagkod sa panahon nin aranihan, “an pagtatapos nin sarong sistema nin mga bagay.” (Mat. 13:24-30, 36-43) Kan mga panahon na iyan, an indibidwal na linahidan na mga Kristiyano padagos na igwang pag-uyon ni Jesus, pero mayong namamahalang grupo; warang malinaw na instrumento na ginagamit si Jesus digdi sa daga para magtao nin paggiya sa mga parasunod niya. (Mat. 28:20) Minsan siring, ihinula niya na magkakaigwa nin pagbabago sa panahon nin aranihan.

³ “Siisay man nanggad an maimbod asin mapagmansay na uripon?” Paagi sa hapot na iyan, pinunan ni Jesu-Cristo na magsaysay nin sarong parabula, o ilustrasyon, bilang parte kan “tanda” na itinao niya mapadapit sa “pagtatapos kan sistema nin mga bagay.” (Mat. 24:3, 42-47) Sinabi niya na an maimbod na uripon na ini magigin sibot sa pagtao sa mga lingkod nin Diyos nin espirituwal na kakanon “sa tamang panahon.” Sarong grupo nin mga lalaki—imbes na sarong indibidwal—an ginamit ni Jesus para manginot kaidtong inot na siglo. Kaya an maimbod na uripon na ginagamit ni Jesus sa pagtatapos kan sistema nin mga bagay bako man sarong indibidwal na tawo.

⁴ Siisay an ninombrahan ni Jesus na magpakakan sa mga parasunod niya? Angay sana na an gamiton niya linahidan na mga Kristiyano digdi sa daga. Inaapod sinda kan Bibliya na “mga saserdoteng naglilingkod bilang mga hadi” na isinugo para ‘“ipahayag sa gabos na lugar an kaumaw-umaw na mga kuwalidad” kan Saro na nag-apod sa sainda hali sa kadikluman pasiring sa saiyang makangangalas na liwanag.’ (1 Ped. 2:9; Mal. 2:7; Kap. 12:17) Gabos daw na linahidan digdi sa daga kabilang sa maimbod na uripon? Dai. Kan milagrosong pakakanon ni Jesus nin literal na kakanon an sarong grupo nin mga tawo na may mga 5,000 na lalaki, apuwera pa sa mga babayi asin mga aki, idinistribwir niya an kakanon sa mga disipulo, dangan idinistribwir iyan kan mga disipulo sa mga tawo. (Mat. 14:19) Pinakakan niya an dakul paagi sa nagkapira. Sa ngunyan, nagtatao siya nin espirituwal na kakanon sa arog man kaiyan na paagi.

⁵ Kaya “an maimbod na katiwala, an saro na mapagmansay,” kompuwesto nin sarong sadit na grupo nin linahidan na mga tugang na lalaki na direktang kaiba sa pag-andam asin pagtao nin espirituwal na kakanon sa panahon kan presensiya ni Cristo. (Luc. 12:42) Sa huring mga aldaw, an linahidan na mga tugang na minakompuwesto sa “maimbod asin mapagmansay na uripon” iribang naglilingkod sa headquarters. Sa ngunyan, an linahidan na mga tugang na ini an minakompuwesto sa Namamahalang Grupo kan Mga Saksi ni Jehova.

⁶ Ginagamit ni Cristo an grupong ini para magpublikar nin impormasyon manungod sa kautuban kan mga propesiya sa Bibliya asin magtao nin napapanahon na paggiya mapadapit sa kun paano iaaplikar an mga prinsipyo kan Bibliya sa aroaldaw na pamumuhay. An espirituwal na kakanon na ini idinidistribwir paagi sa lokal na mga kongregasyon kan Mga Saksi ni Jehova. (Isa. 43:10; Gal. 6:16) Kan mga panahon kan Bibliya, an sarong pinagkakatiwalaan na uripon, o katiwala, iyo an namamahala sa harong. Kaagid kaiyan, tinawan an maimbod asin mapagmansay na uripon nin paninimbagan na mamahala sa mga kapamilya sa pagtubod. Kaya an maimbod na uripon man an nag-aasikaso kan materyal na mga pagsadiri, paghuhulit, mga programa sa asembleya asin kumbensiyon, pagnombra nin mga paraataman na maglilingkod sa manlain-lain na katungdan sa organisasyon, saka pagprodusir nin mga literatura na basado sa Bibliya, na an gabos na iyan para sa kapakinabangan kan ‘mga lingkod sa harong.’—Mat. 24:45.

⁷ Kun siring, sairisay an ‘mga lingkod sa harong’? Sa simpleng pagtaram, sinda an mga pinapakakan. Kan primero, an gabos na lingkod sa harong mga linahidan. Pag-abot nin panahon, kaiba na sa mga lingkod sa harong an dakulang kadaklan nin “ibang mga karnero.” (Juan 10:16) An duwang grupong iyan nagkakakan kan espirituwal na kakanon na itinatao kan maimbod na uripon.

⁸ Sa panahon kan dakulang kasakitan, pag nag-abot na si Jesus para ideklarar asin isagibo an paghukom sa maraot na sistemang ini, nonombrahan niya an maimbod na uripon na “mamahala sa gabos niyang pagsadiri.” (Mat. 24:46, 47) An mga minakompuwesto sa maimbod na uripon mag-aako kan saindang balos sa langit. Kaiba kan iba pang kabilang sa 144,000, makakaibanan sinda ni Cristo na mamamahala sa langit. Minsan ngani sa panahon na iyan mayo na nin maimbod asin mapagmansay na uripon digdi sa daga, gigiyahan ni Jehova saka ni Jesus an mga sakop digdi sa daga kan Mesiyanikong Kahadian paagi sa mga ninombrahan na maglingkod bilang “mga pamayo.”—Sal. 45:16.

⁹ Kadakul kan dahilan na ‘girumdumon ta an mga nanginginot’ asin ipahiling an pagtitiwala sa sainda. Taano ta para iyan sa ikakarahay niyato? Sinabi ni apostol Pablo: “Binabantayan ninda kamo asin ibinibilang nindang kargo ninda kamo, na sa siring magibo ninda ini na may kaugmahan asin dai nagagabatan, huli ta makakadanyar ini sa saindo.” (Heb. 13:17) Mahalagang marhay na magin masinunod asin mapagpasakop kita sa paggiya kan mga nanginginot huling nagbabantay sinda sato para maprotektaran asin mapagdanay na makusog an satong espirituwalidad.

¹⁰ Arog kan nakasurat sa 1 Corinto 16:14, sinabi ni Pablo: “An gabos na ginigibo nindo, gibuhon nindo na may pagkamuot.” An mga desisyon na ginigibo ninda para sa banwaan nin Diyos nakabasar sa pinakanangungurog na kuwalidad na ini na pagkamuot. Mapadapit sa pagkamuot, sinasabi kan 1 Corinto 13:4-8: “An pagkamuot mapasensiya asin mabuot. An pagkamuot bakong maurihon. Dai iyan naghahambog, dai nagigin mapalangkaw, dai minagawi na mayong modo, dai nag-iisip kan sadiri sanang kapakanan, bako iyan arangguton. Dai kaiyan pigbibilang an mga maraot na ginibo sa saiya nin iba. Dai kaiyan ikinakaugma an karatan, kundi ikinakaugma an katotoohan. Kinakaya kaiyan an gabos na bagay, tinitiwalaan an gabos na bagay, linalauman an gabos na bagay, tinatagalan an gabos na bagay. An pagkamuot dai nuarin man mawawara.” Huling pagkamuot an basehan kan gabos na desisyon na ginigibo ninda para sa kapakinabangan kan mga lingkod ni Jehova, lubos kitang makakapagtiwala sa siring na paggiya. Saro pa, repleksiyon nanggad iyan kan pagkamuot ni Jehova.

¹¹ Arog kaidtong inot na siglo, an mga lalaking ginagamit ni Jehova na mamahala sa banwaan niya bakong mga perpekto. Pero bago pa kaiyan, naggamit na si Jehova nin mga tawong bakong perpekto para magibo an kabutan niya. Naggibo nin arka si Noe asin naghulit manungod sa maabot na paglaglag kan panahon niya. (Gen. 6:13, 14, 22; 2 Ped. 2:5) Pignombrahan si Moises na panginutan an banwaan ni Jehova paluwas sa Ehipto. (Ex. 3:10) Mga lalaking bakong perpekto an pinasabngan na magsurat kan Bibliya. (2 Tim. 3:16; 2 Ped. 1:21) Kaya an paggamit ni Jehova ngunyan nin bakong perpektong mga lalaki para manginot sa paghuhulit asin paggibo nin mga disipulo dai minapaluya sa pagtitiwala niyato sa organisasyon nin Diyos. Imbes, napapakusog kita huli ta aram niyato na kun daing suporta ni Jehova, nungkang magigibo kan organisasyon an gabos na ginigibo kaiyan. Paagi sa halawig na eksperyensiya asin dakul na kasakitan na inagihan kan maimbod na uripon, naipapahiling ninda na ginigiyahan sinda kan espiritu nin Diyos. Kadakul kan bendisyon na itinatao sa nahihiling na kabtang kan organisasyon ni Jehova ngunyan. Huli kaini, bilog na puso niyatong itinatao diyan an satong bilog na suporta asin tiwala.

¹² Ipinapahiling kan mga tinawan nin mga paninimbagan sa kongregasyon an pagtitiwala ninda paagi sa maugmang pag-ako asin maimbod na pag-utob sa mga obligasyon na kaiba sa pagnombra sa sainda. (Gibo 20:28) Bilang mga parabalangibog kan Kahadian, maigot kitang naghaharong-harong, nagdadalaw liwat, asin nagkokondukta nin mga pag-adal sa Bibliya. (Mat. 24:14; 28:19, 20) Tanganing lubos na makinabang sa abundang espirituwal na kakanon na itinatao kan maimbod na uripon, nag-aandam kita asin nag-aatender sa Kristiyanong mga pagtiripon, pati na sa mga asembleya saka kumbensiyon. Nakikinabang kitang marhay sa pagpakinurusugan nin buot pag kita nakikiasosyar sa satong mga tugang sa Kristiyanong mga pagtiripon na ini.—Heb. 10:24, 25.

¹³ Kun sinusuportaran ta an organisasyon paagi sa satong mga donasyon, ebidensiya iyan na nagtitiwala kita diyan. (Tal. 3:9, 10) Pag nahihiling niyato na nangangaipo nin materyal na tabang an satong mga tugang, minahiro tulos kita. (Gal. 6:10; 1 Tim. 6:18) Ginigibo niyato ini huli sa pagkamuot ta sa mga tugang, asin pirmi kitang alisto sa mga oportunidad na ipahiling ki Jehova asin sa organisasyon niya na pinapahalagahan ta an karahayan na inaako ta.—Juan 13:35.

¹⁴ Ipinapahiling ta man na nagtitiwala kita sa organisasyon paagi sa pagsuportar sa mga desisyon kaiyan. Kaiba digdi an mapakumbabang pagsunod sa instruksiyon kan mga ninombrahan na mangataman, arog kan mga paraataman nin sirkito asin mga elder sa kongregasyon. An mga tugang na ini kaiba sa “mga nanginginot,” na sa sainda dapat kitang magin makinuyog asin mapagpasakop. (Heb. 13:7, 17) Dawa kun dai niyato lubos na nasasabutan kun taano ta ginibo an sarong partikular na desisyon, aram niyato na pirming para sa ikakarahay ta an pagsuportar diyan. Bilang resulta, binebendisyunan kita ni Jehova huli sa pagkuyog ta sa saiyang Tataramon asin organisasyon. Sa siring, ipinapahiling ta an satong pagpasakop sa Kagurangnan, si Jesu-Cristo.

¹⁵ Tunay nanggad, igwa kita kan gabos na dahilan para magtiwala sa maimbod asin mapagmansay na uripon. Todo-todo an paghihinguwa ni Satanas, an diyos kan sistemang ini nin mga bagay, para rauton an ngaran asin organisasyon ni Jehova. (2 Cor. 4:4) Dai kamo magpabiktima sa maraot na mga taktika ni Satanas! (2 Cor. 2:11) Aram niya na “halipot na sana an saiyang panahon” bago siya ihulog sa bûngaw, asin desidido siyang italikod sa Diyos an pinakadakul na makakaya niya sa mga lingkod ni Jehova. (Kap. 12:12) Pero mantang urog na naghihinguwa si Satanas, lugod na urog man kitang rumani ki Jehova. Lugod na magtiwala kita ki Jehova asin sa instrumentong ginagamit niya para giyahan an saiyang mga lingkod ngunyan. Makakatabang iyan tanganing magkasararo kita bilang magturugang.