Sinda “Padagos na Nagsusunod sa Kordero”

“An mga ini iyo an padagos na nagsusunod sa Kordero saen man sia magduman.”​—KAP. 14:4.

 1. Ano an nagin saboot kan tunay na mga disipulo ni Jesus manongod sa pagsunod sa saiya?

KAN MGA duwa may kabangang taon na si Jesus sa saiyang ministeryo, sia “nagtotokdo [kaidto] sa pampublikong asamblea sa Capernaum.” Huling nakubhanan nin labi-labi sa diskurso nia, “dakol sa saiyang mga disipulo an nagbalik sa mga bagay na tinalikdan asin dai na naglakaw kaiba nia.” Kan hapoton ni Jesus an 12 apostol nia kun baga gusto man nindang maghale, si Simon Pedro nagsimbag: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan; asin kami nagtubod asin nakaaram na ika iyo an Banal nin Dios.” (Juan 6:48, 59, 60, 66-69) An tunay na mga disipulo ni Jesus dai nagpondo sa pagsunod sa saiya. Pakatapos na lahidan kan banal na espiritu, sinda padagos na nagpasakop sa paggiya ni Jesus.​—Gibo 16:7-10.

 2. (a) Siisay an “maimbod asin mapagmansay na oripon,” o “maimbod na mayordomo”? (b) Paanong an oripon nakagibo na nin marahayon na rekord nin ‘pagsunod sa Kordero’?

² Ano an masasabi manongod sa linahidan na mga Kristiano sa presenteng mga panahon? Sa hula ni Jesus manongod sa “tanda kan [saiyang] presensia asin kan pagtatapos kan sistema nin mga bagay,” an grupo kan mga parasunod nia sa daga na linahidan nin espiritu inapod nia na “maimbod asin mapagmansay na oripon,” o “maimbod na mayordomo.” (Mat. 24:3, 45; Luc. 12:42) Bilang sarong grupo, an grupong oripon nakagibo na nin marahayon na rekord nin ‘pagsunod sa Kordero saen man sia magduman.’ (Basahon an Kapahayagan 14:4, 5.) Sa espirituwal na paagi, an mga miembro kaiyan nagdadanay na birhen paagi sa dai ninda pagpadigta sa mga paniniwala asin kaugalean kan “Dakulang Babilonya,” an pambilog na kinaban na imperyo nin falsong relihion. (Kap. 17:5) Mayong putik na doktrina na “nakua sa saindang ngoso,” asin sinda nagdadanay na ‘mayo nin kanawayan’ kan kinaban ni Satanas. (Juan 15:19) Sa ngapit, an natatadang mga linahidan digdi sa daga “masunod” sa Kordero duman mismo sa langit.​—Juan 13:36.

 3. Taano ta mahalaga para sa sato na magtiwala sa grupong oripon?

³ Ninombrahan ni Jesus an maimbod asin mapagmansay na oripon na “mamahala sa saiyang mga domestiko,” an boot sabihon, an indibiduwal na mga miembro kan grupong oripon, “tanganing magtao sa sainda kan saindang kakanon sa tamang panahon.” Ninombrahan man nia an oripon na “mamahala sa gabos niang rogaring.” (Mat. 24:45-47) Kaiba sa mga “rogaring” na ini an nagdadakol na “dakulang kadaklan” nin ‘ibang karnero.’ (Kap. 7:9; Juan 10:16) Bako daw na an indibiduwal na mga miembro kan mga linahidan asin kan “ibang mga karnero” maninigong magtiwala sa oripon na ninombrahan na mamahala sa sainda? Dakol an dahelan kun taano ta maninigo kitang magtiwala sa grupong oripon. An duwang lataw na dahelan iyo an: (1) Si Jehova nagtitiwala sa grupong oripon. (2) Si Jesus nagtitiwala man sa oripon. Siyasaton niato an ebidensia na si Jehova Dios sagkod si Jesu-Cristo igwa nin lubos na kompiansa sa maimbod asin mapagmansay na oripon.

Si Jehova Nagtitiwala sa Oripon

 4. Taano ta puede kitang magkaigwa nin kompiansa sa espirituwal na kakanon na ipinapakakan kan maimbod asin mapagmansay na oripon?

⁴ Isip-isipa an nagpapagin posible sa maimbod asin mapagmansay na oripon na magtao nin napapanahon asin masustansiang espirituwal na kakanon. “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan,” an sabi ni Jehova. Sia nagsabi pa: “Magtatao ako nin sadol mantang ako nakaturuhok sa saimo.” (Sal. 32:8) Iyo, ginigiyahan ni Jehova an oripon. Kun siring, puede kitang magkaigwa nin lubos na kompiansa sa sono sa Kasuratan na pakarorop, pakasabot, asin paggiya na inaako niato hale sa oripon.

 5. Ano an nagpapaheling na an grupong oripon pinapakosog kan espiritu nin Dios?

⁵ An grupong oripon binebendisyonan man ni Jehova paagi sa saiyang banal na espiritu. Minsan ngani dai naheheling an espiritu ni Jehova, naheheling an ibinubunga kaiyan sa mga pinapahiro kaiyan. Isip-isipa an nagibo na kan maimbod asin mapagmansay na oripon sa pambilog na kinaban na pagpatotoo manongod ki Jehova Dios, sa saiyang Aki, asin sa Kahadean. An mga parasamba ki Jehova aktibong nagbabalangibog kan mensahe kan Kahadean sa labing 230 kadagaan asin grupo nin mga isla. Bako daw na iyan nagtatao nin dai manenegaran na ebidensia na an oripon pinapakosog kan espiritu nin Dios? (Basahon an Gibo 1:8.) Sa pagtao nin napapanahon na espirituwal na kakanon para sa banwaan ni Jehova sa bilog na kinaban, an grupong oripon dapat na gumibo nin mahahalagang marhay na desisyon. Sa paggibo asin pag-implementar kaiyan, an oripon nagpapaheling nin pagkamoot, kahoyoan, asin iba pang kabtang kan mga bunga kan espiritu.​—Gal. 5:22, 23.

6, 7. Sagkod saen nagtitiwala si Jehova sa maimbod na oripon?

⁶ Tanganing masabotan kun sagkod saen nagtitiwala si Jehova sa maimbod na oripon, horophoropon an ipinanuga nia sa mga miembro kaiyan. “An trumpeta matanog,” an isinurat ni apostol Pablo, “asin an mga gadan bubuhayon na dai na malalapa, asin kita maliliwat. Huli ta ining malalapaon kaipuhan na magsulot nin kadaihan nin kalapaan, asin ining mortal kaipuhan na magsulot nin imortalidad.” (1 Cor. 15:52, 53) An linahidan na mga parasunod ni Cristo, na maimbod na naglingkod sa Dios asin nagadan na may malalapaon na hawak nin tawo, bubuhayon liwat na labi pa kisa sa espiritung mga linalang na may buhay na daing katapusan. Sinda tatawan nin imortalidad​—buhay na daing katapusan asin pagigin dai nalalaglag. Dugang pa, sinda mag-aako nin kadaihan nin kalapaan, huling sinda tatawan nin hawak na dai nalalapa asin minalataw na nakakasustenir sa sadiri, an boot sabihon, dai nagdedepende sa ibang gikanan nin enerhiya siring kan saiyang ibang mga linalang, espiritu man o may pisikal na hawak. Ilinaladawan kan Kapahayagan 4:4 an mga binuhay liwat na ini na nakatukaw sa mga trono na may mga koronang bulawan sa saindang payo. An linahidan na mga Kristiano mag-aako kan kamurawayan bilang mga hade. Alagad bako sana iyan an ebidensia kan pagtitiwala nin Dios sa sainda.

⁷ “Nag-abot na an kasal kan Kordero asin nag-andam na kan saiyang sadiri an nobya nia. Iyo, itinogot sa saiya na gubingan sia nin makintab, malinig, pinong lino, huli ta an pinong lino nagrerepresentar sa matanos na mga gibo kan mga banal,” an sabi kan Kapahayagan 19:7, 8. Pinili ni Jehova an linahidan na mga Kristiano tanganing magin nobya kan Aki nia. An kadaihan nin kalapaan, imortalidad, pagigin mga hade, asin ‘pagpakasal sa Kordero’ mga balaog na nakakapukaw nanggad nin may pagkangirhat na paggalang! Iyan nakakapukaw sa boot na ebidensia kan kompiansa nin Dios sa mga linahidan, na “padagos na nagsusunod sa Kordero saen man sia magduman.”

Si Jesus Nagtitiwala sa Oripon

 8. Paano ipinapaheling ni Jesus na nagtitiwala sia sa saiyang mga parasunod na linahidan nin espiritu?

⁸ Ano an ebidensia na si Jesus lubos na nagtitiwala sa saiyang mga parasunod na linahidan nin espiritu? Kan huring banggi kan buhay ni Jesus sa daga, sia nanuga sa 11 maimbod na apostol nia. “Kamo an mga nagdanay na kadamay ko sa mga pagbalo sa sako,” an sabi nia sa sainda, “asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.” (Luc. 22:28-30) An gabos na 144,000 na linahidan na Kristiano magigin kabtang kan ipinakipagtipan kaidto ni Jesus sa 11 apostol nia. (Luc. 12:32; Kap. 5:9, 10; 14:1) Kun si Jesus dai nagtiwala sa sainda, makikipagtipan daw sia sa sainda tanganing sinda mamahalang kaiba nia sa Kahadean?

 9. Ano an mga kaiba sa ‘gabos na rogaring’ ni Cristo?

⁹ Dugang pa, ninombrahan ni Jesu-Cristo an maimbod asin mapagmansay na oripon na “mamahala sa gabos niang rogaring”​—an gabos na rogaring kan Kahadean sa daga. (Mat. 24:47) Kaiba sa mga rogaring na ini an mga pasilidad sa pambilog na kinaban na opisina prinsipal kan Mga Saksi ni Jehova, sa mga sangang opisina sa manlaenlaen na kadagaan, asin sa mga Assembly Hall patin Kingdom Hall sa bilog na kinaban. Kaiba man dian an paghuhulit kan Kahadean asin paggibo nin mga disipulo. Aasignaran daw nin siisay man an sarong tawo na dai nia pinagkakatiwalaan tanganing ingatan asin gamiton an mahahalagang bagay nia?

10. Ano an nagpapaheling na ginigiyahan ni Jesu-Cristo an linahidan na mga parasunod nia?

¹⁰ Kan sia madali nang magsakat sa langit, an binuhay liwat na si Jesus nagpaheling sa maimbod na mga disipulo nia asin nanuga sa sainda, na nagsasabi: “Uya! ako kaiba nindo sa gabos na aldaw sagkod sa pagtatapos kan sistema nin mga bagay.” (Mat. 28:20) Masasarigan daw an panugang ini? Sa nakaaging 15 taon, an bilang nin mga kongregasyon kan Mga Saksi ni Jehova sa bilog na kinaban nagdakol poon sa mga 70,000 sagkod sa labing 100,000​—na labing 40 porsientong pag-oswag. Asin kumusta man an bagong mga disipulo na nakadugang? Haros 4.5 milyones na disipulo an nabautismohan sa nakaaging 15 taon​—na an promedyo labing 800 kada aldaw. An pambihirang pagdakol na ini malinaw na ebidensia na ginigiyahan ni Cristo an linahidan na mga parasunod nia sa saindang mga pagtiripon kan kongregasyon asin na sinusuportaran nia sinda sa paggibo nin mga disipulo.

An Oripon Maimbod Asin Mapagmansay

11, 12. Paano ipinapaheling kan oripon mismo an kaimbodan asin pagigin mapagmansay?

¹¹ Mantang si Jehova Dios asin Jesu-Cristo lubos na nagtitiwala sa maimbod asin mapagmansay na oripon, bako daw na kita maninigo na iyo man? Total, ipinapaheling kan oripon mismo an kaimbodan sa paggibo kan iinasignar na gibohon. Halimbawa, an magasin na Torrengbantayan mga 130 taon nang ipinupublikar. An mga pagtiripon, asamblea, asin kombension kan Mga Saksi ni Jehova padagos na nagpapakosog sa sato sa espirituwal.

¹² An maimbod na oripon mapagmansay man huli ta iyan dai nagigin mapalangkaw, na garo ineenotan na si Jehova, ni nahuhuri sa pagkuyog mantang malinaw na an paggiya nin Dios dapit sa sarong bagay. Halimbawa, minsan ngani an mga namomoon sa falsong relihion silensiong nag-ooyon o hayag na nagkokonsinte na normal na sana an paslo asin bakong diosnon na gawe-gawe kan mga tawo sa kinaban, an oripon nagpapatanid dapit sa natatagong mga peligro sa maraot na sistema ni Satanas. An oripon nakakatao nin madonong asin napapanahon na mga patanid huling iyan binebendisyonan ni Jehova Dios asin Jesu-Cristo. Huli kaini, kita maninigo na lubos na magtiwala sa oripon. Pero, paano niato ikakapaheling na kita nagtitiwala sa maimbod asin mapagmansay na oripon?

‘Umiba’ sa mga Linahidan Mantang Sinusundan Ninda an Kordero

13. Segun sa hula ni Zacarias, paano posibleng ipaheling an pagtitiwala sa maimbod asin mapagmansay na oripon?

¹³ An libro sa Biblia na Zacarias nagtataram dapit sa “sampulong tawo” na nagdolok sa “sarong tawo na Judio” asin nagsabi: “Maiba kami sa saindo.” (Basahon an Zacarias 8:23.) Huling an terminong “saindo” ipinanonongod sa “sarong tawo na Judio,” sia nagrerepresentar sa sarong grupo nin mga tawo. Sa panahon niato, sia nagrerepresentar sa mga Kristiano na linahidan nin espiritu​—na kabtang kan “Israel nin Dios.” (Gal. 6:16) An “sampulong tawo hale sa gabos na lenguahe kan mga nasyon” nagrerepresentar sa dakulang kadaklan nin ibang karnero. Kun paanong an linahidan na mga Kristiano nagsusunod ki Jesus saen man sia magduman, an dakulang kadaklan ‘nag-iiba’ man sa maimbod asin mapagmansay na oripon. An mga kabilang sa dakulang kadaklan dai noarin man maninigong masupog na magpamidbid na sinda kairiba kan “mga may kabtang sa langitnon na pag-apod.” (Heb. 3:1) Si Jesus dai nasusupog na apodon an mga linahidan na “mga tugang.”​—Heb. 2:11.

14. Paano ikakatao an maimbod na suporta sa mga tugang ni Cristo?

¹⁴ Minamansay ni Jesu-Cristo na garo man sana pagsuportar sa saiya an maimbod na suporta na itinatao sa mga tugang nia. (Basahon an Mateo 25:40.) Kun siring, sa anong paagi na an mga may daganon na paglaom makakasuportar sa mga tugang ni Cristo na linahidan nin espiritu? Sa pangenot, paagi sa pagtabang sa sainda sa paghuhulit kan Kahadean. (Mat. 24:14; Juan 14:12) Mantang nagdidikit an bilang kan mga linahidan digdi sa daga sa nakaaging mga dekada, nagdadakol an bilang kan ibang mga karnero. Kun an mga may daganon na paglaom nakikikabtang sa pagpatotoo, na naglilingkod kun posible bilang bilog na panahon na mga ebanghelisador, sinusuportaran ninda an mga linahidan nin espiritu sa pag-otob kan asignasyon na paggibo nin mga disipulo. (Mat. 28:19, 20) Dai man dapat paglingawan an mga oportunidad na suportaran an gibohon na ini paagi sa pagtao nin pinansial na mga kontribusyon sa manlaenlaen na paagi.

15. Ano an maninigong reaksion kan indibiduwal na mga Kristiano sa napapanahon na espirituwal na kakanon hale sa oripon asin organisasyonal na mga desisyon kaiyan?

¹⁵ Bilang indibiduwal na mga Kristiano, paano niato minamansay an napapanahon na espirituwal na kakanon na itinatao kan maimbod na oripon paagi sa mga publikasyon na basado sa Biblia asin sa Kristianong mga pagtiripon? Kita daw mapagpasalamat na nagkakakan kaiyan asin tolos na nag-aaplikar kan satong nanonodan? Ano an reaksion niato sa organisasyonal na mga desisyon na ginigibo kan oripon? An andam na pagkuyog niato sa itinataong paggiya ebidensia kan satong pagtubod sa areglo ni Jehova.​—Sant. 3:17.

16. Taano ta an gabos na Kristiano maninigong maghinanyog sa mga tugang ni Cristo?

¹⁶ “An sakong mga karnero naghihinanyog sa sakong tingog,” an sabi ni Jesus, “asin midbid ko sinda, patin sinda nagsusunod sa sako.” (Juan 10:27) Totoo iyan sa linahidan na mga Kristiano. Kumusta man an mga ‘nag-iiba’ sa sainda? An siring na mga tawo dapat na maghinanyog ki Jesus. Dapat man sindang maghinanyog sa mga tugang nia. Total, ipinagkatiwala sa sainda an pangenot na paninimbagan na pag-asikaso sa espirituwal na ikakarahay kan banwaan nin Dios. Ano an kalabot sa paghinanyog sa tingog kan mga tugang ni Cristo?

17. Ano an kalabot sa paghinanyog sa grupong oripon?

¹⁷ An maimbod asin mapagmansay na oripon ngonyan irinerepresentar kan Namamahalang Grupo, na iyo an nangengenot sa paghuhulit kan Kahadean sa bilog na daga asin nagkokoordinar kaiyan. An mga miembro kan Namamahalang Grupo eksperyensiadong kamagurangan na linahidan nin espiritu. Sinda partikularmenteng ikakaladawan bilang “an mga nangengenot” sa sato. (Heb. 13:7) Sa pag-asikaso sa labing 7,000,000 na parabalangibog kan Kahadean sa bilog na kinaban sa labing 100,000 na kongregasyon, an linahidan na mga paraataman na ini “dakol an gigibohon sa gibohon kan Kagurangnan.” (1 Cor. 15:58) An paghinanyog sa grupong oripon nangangahulogan nin lubos na pakikikooperar niato sa Namamahalang Grupo kaiyan.

Binebendisyonan an mga Naghihinanyog sa Oripon

18, 19. (a) Paano binebendisyonan an mga naghihinanyog sa maimbod asin mapagmansay na oripon? (b) Ano an maninigo na magin determinasyon niato?

¹⁸ Poon kan nombrahan an maimbod asin mapagmansay na oripon, ‘dinadara kaiyan an dakol pasiring sa katanosan.’ (Dan. 12:3) Kaiba sa mga ini an mga may paglaom na makaligtas kun laglagon na an presenteng maraot na sistema nin mga bagay. Sarong bendisyon nanggad an matanos na kamugtakan na ini sa atubangan nin Dios!

¹⁹ Sa ngapit, kun ‘an banal na siudad, an Bagong Jerusalem [na kompuesto nin 144,000] maghilig na hale sa langit gikan sa Dios asin inandam siring sa nobya na sinamnohan para sa saiyang agom na lalaki,’ ano an maeeksperyensiahan kan mga naghihinanyog sa tingog kan oripon? “An Dios mismo magigin kaibanan ninda,” an sabi kan Biblia. “Asin papahidon nia an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.” (Kap. 21:2-4) Kun siring, maghinanyog nanggad kita sa Cristo asin sa mapagtitiwalaan na mga tugang nia na linahidan nin espiritu.

Ano an Nanodan Nindo?

• Ano an ebidensia na nagtitiwala si Jehova sa maimbod asin mapagmansay na oripon?

• Ano an nagpapaheling na si Jesu-Cristo lubos na nagtitiwala sa grupong oripon?

• Taano ta maninigo kitang magtiwala sa maimbod na mayordomo?

• Paano niato ipinapaheling na nagtitiwala kita sa oripon?

[Ritrato sa pahina 25]

Aram daw nindo kun sairisay an pinili ni Jehova na magin nobya kan Aki nia?

[Mga Ritrato sa pahina 26]

Ipinagkatiwala ni Jesu-Cristo sa maimbod asin mapagmansay na oripon an saiyang mga “rogaring”

[Ritrato sa pahina 27]

Kun nakikikabtang kita sa pagpatotoo, sinusuportaran niato an mga linahidan nin espiritu