Lakop sa Kinaban na Katiwasayan sa Pagsakop kan “Prinsipe nin Katoninongan”

Kapitulo 8: Pakikikabtang sa “Kaogmahan” kan “Prinsipe nin Katoninongan”

 1. (a) Huli sa anong dahelan na an sarong tawo nagbiyahe nin harayo? (b) Ano an ipinaririsa sa parabola ni Jesus, minsan ngani dai direktang isinabi?

Sa parabola ni Jesus manongod sa mga talento, an tawo na may sadiri kan walong talentong pirak dai nagbiyahe sa harayo para sana sa kaalingan arog baga kan pamamasyar. Igwa sia nin seryosong dahelan sa pagbiyahe; boot nia na kamtan an sarong bagay na mahalaga. Nagbiyahe sia, arog kan ipinaheheling kan parabola, tanganing kamtan an sarong “kaogmahan,” kaiba an “dakol na bagay.” (Mateo 25:21) Kaya kaipuhan siang magbiyahe nin harayo, na nagkakaipo nin halawig na panahon, tanganing makaduman sa saro na makatatao sa saiya kan kaogmahan na iyan.

 2. (a) Sa kaso ni Jesus, ano an ilinadawan kan pagbiyahe sa harayo kan tawong mayaman, asin kiisay sia nagduman? (b) Ano an dara sa pagbuwelta kan Kagurangnan?

² Mantang an mayaman na tawo sa parabola naglaladawan ki Jesu-Cristo, an pagbiyahe kan tawo sa harayo naglaladawan kan pagduman ni Jesus sa sarong Burabod kan espesyal na kaogmahan na linalaoman nia. Kun siring, kiisay sia nagduman? An Hebreo 12:2 nagsasabi sato: “Kita nagheheling nin maingat sa Poon na Ahente asin Parasangkap kan satong pagtubod, si Jesus. Huli kan kaogmahan na ibinugtak sa atubangan nia tinios nia an pasakitan na kahoy, hinamak an kasopganan, asin nagtukaw sa too kan trono nin Dios.” Iyo nanggad, si Jehova Dios an Burabod kan kaogmahan na iyan. Sa saiya nagduman si Jesus, na binayaan an saiyang maimbod na mga disipulo digdi sa daga na pinaniwalaan kan saiyang mga “talento.” An Kagurangnan nagbuwelta na igwa nin “dakol na bagay” na mayo sa saiya kan ipaniwala nia sa saiyang tolong oripon an walong talentong pirak. An mas enot na parabola na itinao ni Jesus, an parabola kan “sampulong mina,” espisipikong nagsasabi na an dara nia sa pagbuwelta “makahadeng kapangyarihan.”—Lucas 19:12-15.

 3. Anong klaseng panahon kaidto kan an Zacarias 9:9 magpoon na maotob kan enot na siglo C.E.?

³ Kun bagong ibugtak sa kapangyarihan, an hade may dahelan na mag-ogma, asin siring man an saiyang maimbod na mga sakop. Magigirumdoman niato an okasyon na an Aki nin Dios naglaog sa Jerusalem tanganing otobon an hula sa Zacarias 9:9. Manongod sa kaotoban kan hulang iyan, nasusurat: “An kadaklan sa mga tawo biniriklad sa dalan an saindang panluwas na mga gubing, mantang an iba nagpurutol nin mga sanga sa mga kahoy asin ibinurugtak iyan sa dalan. Kun manongod sa mga kadaklan, idtong mga naeenot sa saiya asin idtong mga nagsusunod padagos na nagkukururahaw: ‘Ligtasan, ipinakikimaherak niamo, an Aki ni David! Omawon sia na minadatong sa ngaran ni Jehova! Ligtasan sia, ipinakikimaherak niamo, sa kaitaasan!’ Ngonyan kan sia lumaog sa Jerusalem, an bilog na siudad naribok, na sinasabi: ‘Siisay ini?’”—Mateo 21:4-10; helingon man an Lucas 19:36-38.

 4. Pakatukaw bilang Hade, taano si Jesu-Cristo ta nagkaigwa nin espesyal na basihan sa pag-imbitar sa saiyang maimbod na “mga oripon” na lumaog sa sarong maogmang kamugtakan?

⁴ Kun siring, kun maogmang okasyon kaidtong ipresentar sana nia an saiyang sadiri sa mga taga-Jerusalem bilang an linahidan kan espiritu ni Jehova para sa paghade, gurano pa daw kaogma kan sia aktuwal na patukawon sa trono bilang Hade sa katapusan kan Mga Panahon nin mga Hentil kan 1914? Idto maogmahon nanggad na okasyon para sa saiya. Tunay na kaidto sia naglaog sa sarong kaogmahan na dai pa inagihan kan enot. Sa pakipagkuwenta, puwede niang sabihon sa mga disipulo na hinokoman niang “marahay asin maimbod”: “Nagin maimbod ka sa pira sanang bagay. Ipaniniwala ko sa saimo an dakol na bagay. Lumaog ka sa kaogmahan kan saimong kagurangnan.” (Mateo 25:21) Igwa na ngonyan nin bagong kaogmahan na dian puwedeng makikabtang an saiyang inooyonan na mga “oripon.” Kanigoan kadakulang balos!

 5. (a) Si apostol Pablo nagin ‘embahador’ para ki Cristo sa anong panahon? (b) Alagad ngonyan an linahidan na natatada “mga embahador” para ki Cristo pakalihis nin anong pangyayari?

⁵ Kan 1919 an linahidan na mga disipulo kan nagtutukaw na sa tronong Hade, si Jesu-Cristo, tunay na naglaog sa aprobadong kamugtakan, asin ini may kaibang labi-labing pag-ogma ninda. Kaidtong desinuwebeng siglo na an nakaagi si apostol Pablo nagsurat sa saiyang mga kapagtubod tanganing isabi sa sainda an saindang halangkaw na katongdan: “Kaya kami mga embahador na karibay ni Cristo.” (2 Corinto 5:20) Idto isinurat kan si Jesus magigin pa sanang paramana na may paglaom na mag-ako kan “kahadean kan kalangitan.” (Mateo 25:1) Kaya, kinaipuhan siang tumukaw sa too nin Dios asin maghalat duman sa aldaw nin inagurasyon. Alagad ngonyan, poon kan 1919, an aprobadong natatada “mga embahador” nang isinugo kan Saro na aktuwal na natutukaw na Hade. (Hebreo 10:12, 13) An bagay na ini espesyal na iinapod sa atension kan Internasyonal na mga Estudyante sa Biblia sa kombension sa Cedar Point, Ohio, kan 1922.

 6. An mga paghihingoa pakaguerra kan mga nag-ako kan “mga talento” enot para sa anong klaseng gibohon?

⁶ Kan 1919 ipinaniwala na sa sainda an katimbang kan “mga talento” kan natutukaw nang Hade, si Jesu-Cristo. Dinugangan kaini an saindang paninimbagan sa saindang natutukaw nang Hade. Poon sa kapinonan, an saindang mga paghihingoa pakaguerra para sa gibong “pag-ani,” an pagtipon sa grupong “trigo.” (Mateo 13:24-30) Mantang, arog kan sabi ni Jesus, an pag-ani “pagtatapos nin palakaw nin mga bagay,” an taon pakaguerra na 1919 iyo an itinalaan na panahon na pumoon an pag-aning ini kan arog-trigong “mga aki kan kahadean,” an maimbod na linahidan na natatada.—Mateo 13:37-39.

 7. (a) Sa anong klaseng panahon na an mga paraani naglaog kaiba kan saindang Kagurangnan? (b) Sa anong kamugtakan dinara ni Jehova an mga paraani, asin anong makahulang mga tataramon an itinataram ninda?

⁷ An pag-ani maogmang panahon para sa mga paraani, mantang an Kagurangnan kan pag-ani nakikipag-ogma sa sainda. (Salmo 126:6) An panahon nin pag-aning ini orog na pinaogma kan nagdadakol na ebidensia na an Kahadean nin Dios paagi ki Jesu-Cristo pinatindog sa kalangitan kan 1914 asin ibinalik ni Jehova an matanos na kamugtakan kan saiyang nagdusay na banwaan sa daga. Bilang sarong grupo, itinataram ninda an mga tataramon kan Isaias 61:10: “Siertong gayo na ako maggagayagaya ki Jehova. An sakong kalag mag-oogma sa sakong Dios. Huli ta ginubingan nia ako kan mga gubing nin kaligtasan; pinatos nia ako kan daing takyag na pan-ibabaw na gubing nin katanosan.”

Pagtipon sa “Dakulang Kadaklan” nin mga Makikikabtang sa “Kaogmahan”

 8. Anong kaogmahan na dai linaoman kan linahidan na natatada an mapapasainda sa katapusan kan pagtipon sa mga paramana kan Kahadean?

⁸ Dai aram kan linahidan na natatada na naglaog sa “kaogmahan” kan saindang Kagurangnan na sa paghinanapos kan pagtipon sa ultimong mga miembro kan mga paramana sa langitnon na Kahadean magkakaigwa nin saro pang kaogmahan, bagay na dai linalaoman. Ini an pagtipon sa sarong daganon na grupo na mag-iistar sa Paraisong daga sakop kan Milenyal na Paghade ni Jesu-Cristo. Siisay pa kundi an mga kabilang sa daganon na grupong ini an tamang imbitaran sa magigin enot na pagpapahayag nin impormasyon manongod sa sainda?

 9. Sairisay an espesyalmenteng inimbitaran na umatender sa kombension sa Washington, D.C., kan 1935, asin anong napapanahon na impormasyon an ihinayag sa sainda duman?

⁹ Kaya nangyari na, huli sa imbitasyon na ipinublikar sa The Watch Tower,a an ginatos na naghahanap nin relasyon ki Jehova, kaiba an banwaan na nagdadara kan saiyang ngaran, nag-atender sa kombension heneral kan mga Saksi ni Jehova sa Washington, D.C., Mayo 30 sagkod Hunyo 2, 1935. Sa kombension na idto napahiro sinda sagkod sa kairairaromi kan saindang puso na maaraman na an “dakulang kadaklan” na naheling sa bisyon sa Kapahayagan 7:9-17 sarong daganon na grupo.

10, 11. Para kiisay sa langit na ini seguradong nagin panahon nin espesyal na kaogmahan?

¹⁰ Segurado na nagin dakulaon na kaogmahan para sa Kaharohalangkaweng Dios, si Jehova, an kombension na idto sa Washington, D.C.! Segurado na idto nagin dakulaon man na kaogmahan para sa saiyang Aki bilang an Marahay na Pastor na mapoon nang tiponon an “ibang karnerong” ini sa “sarong aripompon”!—Juan 10:16.

¹¹ Mantang inaataman asin pinapastoran, sa piguratibong pagtaram, an mga miembro kan natatada asin kan nagdadakol na “kadaklan” kan “ibang karnero” nag-iiriba nin matoninong asin may pagkaminootan. An puso kan saindang “sarong pastor” segurado na minataba ngonyan sa kaogmahan huli sa pagkaigwa nin siring kadakulang “aripompon” sa paghinanapos kan “pagtatapos kan palakaw nin mga bagay.”

Mga Sugo kan “Prinsipe nin Katoninongan”

12, 13. (a) Siisay an inimbitaran na umiba sa linahidan na natatada sa pakikikabtang sa kaogmahan kan nagbuweltang Kagurangnan, asin ano an dahelan kaini? (b) An “dakulang kadaklan” nin “ibang karnero” naglilingkod sa intereses kan “Prinsipe nin Katoninongan” sa anong kapasidad?

¹² An mga arog-karnero na minakompuwesto sa “dakulang kadaklan” ngonyan may dakulang kabtang sa kaogmahan kan Kagurangnan, si Jesu-Cristo. Ini sa kadaklan huli sa saindang pagkaigwa nin aktibong kabtang sa pagtipon sa mga kaipuhan para sa pagkakompleto kan “dakulang kadaklan,” na dai tinatawan nin kabilangan sa Kapahayagan 7:9.

¹³ An gibong pagtitipon na dian nakikikabtang an “ibang karnero” nagin nang lakop sa kinaban, na dai kaya kan nagkakadikit na linahidan na natatada. Kaya, nadudugangan an pangangaipo na an nagdadakol na “ibang karnero” dumakula man nin padagos an pakikikabtang sa pagtipon pa sa mas dakol na “ibang karnero” na may daganon na paglaom. Kaya an “ibang karnero” naglilingkod bilang maimbod na mga sugo kan “Prinsipe nin Katoninongan.” Idinadagdag kan Talinhaga 25:13: “Siring sa lipot nin niyebe sa aldaw nin tig-ani an maimbod na sugo para sa mga nagsugo sa saiya, huli ta pinanunumbalik nia an kalag kan saiyang mga kagurangnan.”

14. (a) Ano an mamanahon kan simbolikong mga karnero sa parabola ni Jesus sa Mateo 25:31-46? (b) Paano inandam para sa sainda an Kahadean “poon pa kan lalangon an kinaban”?

¹⁴ Sa parabola kan mga karnero asin kanding, an simbolikong mga karnero iyo an sinasabihan kan Hadeng Jesu-Cristo: “Madia, kamong mga benendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.” (Mateo 25:31-46) Mamanahon ninda an daga na sakop kan Kahadean kan kalangitan sa laog kan Milenyo kan paghade ni Cristo. Poon kan panahon kan maimbod na si Abel, inaandam na ni Jehova an lugar na ini para sa kinaban nin mababalukat na katawohan.—Lucas 11:50, 51.

15, 16. (a) Anong “samno” nin hade, na sinabi ni Salomon, an yaon ngonyan sa Kagurangnan sa ibong kan saiyang paghade sa tahaw kan saiyang mga kaiwal? (b) Sa anong porma na an natutukaw nang Hade igwa kan “samnong” ini ngonyan? (c) Ano an ginibo kan mga minakompuwesto sa “samnong” ini?

¹⁵ An madonong na si Hadeng Salomon kan suanoy na Israel nagsurat: “Sa kadakolan nin banwaan yaon an samno nin sarong hade.” (Talinhaga 14:28) An makahadeng Kagurangnan ngonyan, si Cristo Jesus, na sarong opisyal na mas halangkaw nanggad sa daganon na si Hadeng Salomon, igwa nanggad kan “samnong” iyan kun manongod sa “kadakolan nin banwaan.” Ini totoo ngonyan pa bago pumoon an saiyang paghade nin sangribong taon, iyo, na sia naghahade sa tahaw kan saiyang daganon na mga kaiwal, na sa sainda si Satanas na Diablo iyo an mas makapangyarihan sa tawong hade na dai naheheling.—Mateo 4:8, 9; Lucas 4:5, 6.

¹⁶ An “samno” ngonyan na angay sa sarong halangkaw na opisyal na an ranggo hade manonompongan ngonyan sa nagdadakol niang “ibang karnero” na minakompuwesto sa “dakulang kadaklan.” Maogma sindang nagkukururahaw na magkairiba: “Utang niato an kaligtasan sa satong Dios, na nagtutukaw sa trono, asin sa Kordero.” (Kapahayagan 7:9, 10) Sinda nakakaeksperyensia na nin kaligtasan hale sa malalaglag na palakaw nin mga bagay, na “an dios” iyo si Satanas na Diablo. (2 Corinto 4:4) Sa piguratibong pagtaram, sainda nang “hinugasan an saindang mga gubing . . . sa dugo kan Kordero” asin pinaputi iyan tanganing magin daing mantsa sa atubangan ni Jehova Dios, an Hokom.—Kapahayagan 7:14.

17. (a) Ano pang kaligtasan an hinahalat kan “dakulang kadaklan”? (b) Ano an magigin pribilehiyo ninda sa Milenyal na Paghade kan “Prinsipe nin Katoninongan”?

¹⁷ Pero hinahalat ninda an kaligtasan na itatao nin Dios na maeeksperyensiahan ninda sa pinakadakulang kapangganahan ni Jehova sa “ralaban kan dakulang aldaw nin Dios na Makakamhan sa gabos” sa Har–Magedon. An saiyang makangangalas na kapangganahan duman magbubunga kan pagkabindikar kan saiyang unibersal na soberaniya, asin sinda magigin daganon na mga testigo huli ta sinda iingatan na buhay sa teribleng katapusan kan maraot na kinaban na ini. (Kapahayagan 16:14; 2 Pedro 3:12) Kanigoan kadakulang pribilehiyo! Kanigoan kadakulang kaogmahan an ihihiras kan “Prinsipe nin Katoninongan” sa nakaligtas na “dakulang kadaklan” kan saiyang maimbod na mga “ibang karnero”!

[Nota sa Ibaba]