Nakapasar sa Pagbalo ‘an Fiel na Oripon’!

“Nagdatong na an itinalaan na panahon na an paghokom magpoon sa harong nin Dios.”​—1 PEDRO 4:17.

 1. Ano an nanompongan ni Jesus kan siyasaton nia an “oripon”?

KAN Pentecostes 33 C.E., si Jesus nagnombrar nin sarong “oripon” tanganing magtao nin kakanon sa igong panahon sa saiyang “mga domestiko.” Kan 1914, pinatukaw si Jesus sa trono bilang Hade, asin dai na mahahaloy panahon na kaidto na siyasaton an “oripon” na iyan. Sa pankagabsan, nanompongan nia na an “oripon” nagin “fiel asin may diskresion.” Huli kaini, ninombrahan nia iyan “na mamahala sa gabos niang rogaring.” (Mateo 24:45-47) Minsan siring, igwa man nin maraot na oripon, na bakong fiel ni may diskresion.

“An Maraot na Oripon na Iyan”

2, 3. Saen hale “an maraot na oripon na iyan,” asin paano nangyari iyan?

² Sinambit ni Jesus an maraot na oripon pakatapos tolos na magtaram dapit sa “fiel asin may diskresion na oripon.” Sia nagsabi: “Kun an maraot na oripon na iyan magsabi sa saiyang puso, ‘Nag-aatraso an sakuyang kagurangnan,’ asin magpoon nang bugbogon an saiyang mga kapwa oripon asin magkakan patin mag-inom kaiba kan midbid na mga paraburat, an kagurangnan kan oripon na iyan madatong sa aldaw na dai nia linalaoman asin sa oras na dai nia aram, asin papadusahan sia nin makuri asin ibibilang sia sa mga parasaginsagin. Dian sia mananangis asin magraragot an saiyang mga ngipon.” (Mateo 24:48-51) An pananaram na “an maraot na oripon na iyan” dinadara an satong atension sa naenot na mga tataramon ni Jesus manongod sa fiel asin may diskresion na oripon. Iyo, an “maraot na oripon” dating mga miembro kan fiel na oripon.a Paano?

³ Bago kan 1914, an dakol na miembro kan fiel na grupong oripon makosog an paglaom na makaibahan an Nobyo sa langit kan taon na idto, alagad dai naotob an saindang mga linalaoman. Bilang resulta kaini asin kan iba pang mga pangyayari, dakol an nadesganar asin may pira na nagraot an boot. An nagkapira kaini ‘binugbog’ sa berbal na paagi an dating mga tugang ninda asin nakiibaiba sa “midbid na mga paraburat,” an mga grupong relihioso kan Kakristianohan.​—Isaias 28:1-3; 32:6.

 4. Ano an ginibo ni Jesus sa “maraot na oripon” asin sa gabos na nagpaheling kan kaparehong espiritu?

⁴ An dating mga Kristianong ini namidbid bilang an “maraot na oripon,” asin pinadusahan sinda ni Jesus “nin makuri.” Paano? Isinikwal nia sinda, asin nawaran sinda kan langitnon na paglaom ninda. Minsan siring, dai sinda linaglag tolos. Kinaipuhan nguna sindang magtios nin panahon nin pagtangis asin pagragot nin mga ngipon “sa kadikloman sa luwas” kan Kristianong kongregasyon. (Mateo 8:12) Poon kan enot na mga aldaw na idto, may pirang iba pang linahidan na indibiduwal na nagpaheling nin kaparehong maraot na espiritu, na nakiibaiba sa “maraot na oripon.” May nagkapira sa “ibang karnero” na inarog an saindang pagigin bakong fiel. (Juan 10:16) Naeksperyensiahan kan gabos na siring na kaiwal ni Cristo an iyo man sanang espirituwal na “kadikloman sa luwas.”

 5. Ano an nagin reaksion kan fiel asin may diskresion na oripon, na kabaliktaran kan “maraot na oripon”?

⁵ Minsan siring, an fiel asin may diskresion na oripon nag-agi man nin kaparehong mga pagbalo arog kan “maraot na oripon na iyan.” Minsan siring, imbes na rumaot an boot, sinda pinakarhay giraray. (2 Corinto 13:11) Kuminosog an saindang pagkamoot ki Jehova asin sa saindang mga tugang. Bilang resulta, sinda nagin “sarong harigi asin sulay kan katotoohan” durante kan maribok na “huring mga aldaw” na ini.​—1 Timoteo 3:15; 2 Timoteo 3:1.

May Diskresion Asin Mangmang na mga Daraga

 6. (a) Paano iinilustrar ni Jesus an pagigin may diskresion kan saiyang fiel na grupong oripon? (b) Bago kan 1914, anong mensahe an ibinalangibog kan linahidan na mga Kristiano?

⁶ Pakatapos na magtaram dapit sa “maraot na oripon na iyan,” si Jesus nagtao nin duwang parabola tanganing ipaheling kun taano ta an nagkapirang linahidan na Kristiano magigin fiel asin may diskresion mantang an iba dai.b Tanganing iilustrar an pagigin may diskresion, sia nagsabi: “An kahadean kan kalangitan magigin kaagid nin sampulong daraga na nagkua kan saindang mga ilawan asin nagruluwas sa pagsabat sa nobyo. An lima sa sainda mangmang, asin an lima may diskresion. Huli ta an mga mangmang nagkurua kan saindang mga ilawan alagad dai nagbalon nin lana, mantang an mga may diskresion nagbalon nin lana sa saindang mga lalagan kaiba kan saindang mga ilawan.” (Mateo 25:1-4) An sampulong daraga nagpapagirumdom sa sato kan linahidan na mga Kristiano bago kan 1914. Tinantsar ninda na mapaheling na kaidto an nobyo, si Jesu-Cristo. Huli kaini, sinda “nagruluwas” tanganing sabaton sia, na pusoan na ihinuhulit na “an itinalaan na mga panahon kan mga nasyon” matatapos kaidtong 1914.​—Lucas 21:24.

 7. Kasuarin asin taano ta garo man sana “nagtorog” an linahidan na mga Kristiano?

⁷ Tama sinda. An itinalaan na mga panahon kan mga nasyon talagang natapos kan 1914, asin nagpoon na magpunsionar an Kahadean nin Dios sa pamamahala ni Cristo Jesus. Alagad yaon iyan sa dai naheheling na kalangitan. Digdi sa daga, nagpoon na mamatean kan katawohan an ihinulang “herak man.” (Kapahayagan 12:​10, 12) Suminunod an sarong panahon nin pagbalo. Huling dai nasasabotan nin malinaw an mga bagay-bagay, nagsaboot an linahidan na mga Kristiano na “nag-aatraso an nobyo.” Huling ribaraw asin napapaatubang sa pagtumang kan kinaban, sa pankagabsan luminuya sinda asin haros napondo an organisadong paghuhulit sa publiko. Arog kan mga daraga sa parabola, sa espirituwal na pagtaram “nagtungka asin nagtorog” sinda, arog man kan ginibo kan bakong fiel na naghihingakong mga Kristiano pagkagadan kan mga apostol ni Jesus.​—Mateo 25:5; Kapahayagan 11:​7, 8; 12:17.

 8. Ano an dahelan kan pagkurahaw nin: “Uya na an nobyo!” asin panahon na kaidto na gibohon kan linahidan na mga Kristiano an ano?

⁸ Dangan kan 1919 may dai inaasahan na nangyari. Mababasa niato: “Kaidtong matanga na an banggi may nagkurahaw, ‘Uya na an nobyo! Paduman na kamo sa pagsabat sa saiya.’ Dangan an gabos na daraga nagburuhat asin inandam an saindang mga ilawan.” (Mateo 25:​6, 7) Sa mismong garo baga pinakamamondong kamugtakan, may pangapodan na magin aktibo! Kan 1918, si Jesus, “an mensahero kan tipan,” nagdatong sa espirituwal na templo ni Jehova tanganing siyasaton asin linigon an kongregasyon nin Dios. (Malaquias 3:1) Kan panahon na iyan, an linahidan na mga Kristiano kinaipuhan na lumuwas asin sabaton sia sa daganon na mga patyo kan templong iyan. Panahon nang ‘pasirangon ninda an liwanag.’​—Isaias 60:1; Filipos 2:​14, 15.

9, 10. Kan 1919, taano ta an nagkapirang Kristiano “may diskresion” asin an nagkapira “mangmang”?

⁹ Alagad halat nguna! Sa parabola, an nagkapira sa mga daraga igwa nin problema. Nagpadagos si Jesus: “An mga mangmang nagsabi sa mga may diskresion, ‘Tawe man kami kan saindong lana, ta mapaparong na an samong ilawan.’” (Mateo 25:8) Kun mayo nin lana, an mga ilawan dai magtatao nin liwanag. Sa siring, an lana nin ilawan nagpapagirumdom sa sato kan Tataramon nin katotoohan nin Dios asin kan saiyang banal na espiritu, na nagtatao nin kosog sa tunay na mga parasamba na magin mga paradara nin liwanag. (Salmo 119:130; Daniel 5:14) Bago kan 1919, maigot na hiningoa kan may diskresion na linahidan na mga Kristiano na mansayon an kabotan nin Dios para sa sainda, apisar kan saindang temporaryong pagluya. Huli kaini, kan dumatong an pangapodan na pasirangon an liwanag, andam sinda.​—2 Timoteo 4:2; Hebreo 10:​24, 25.

¹⁰ Minsan siring, an nagkapirang linahidan bakong andam na magsakripisyo o personal na maghingoa​—minsan ngani odok nindang minamawot na makaibanan an Nobyo. Kaya kan panahon nang magin aktibo sa paghuhulit kan maogmang bareta, bako sindang andam. (Mateo 24:14) Prinobaran pa ngani nindang paluyahon an saindang maigot na kairiba, na garo man sana hinahagadan sinda nin lana. Sa parabola ni Jesus, ano an simbag kan may diskresion na mga daraga? Sinda nagsabi: “Tibaad magkulang para sa samo asin sa saindo. Marahay pang pumaduman kamo sa mga nagtitinda kaiyan asin bumakal kan para sa saindo.” (Mateo 25:9) Kaagid kaiyan, an maimbod na linahidan na mga Kristiano kan 1919 habong gumibo nin ano man na mapaluya kan sainda mismong kapasidad na magdara kan liwanag. Sa siring, nakapasar sinda sa pagsiyasat.

11. Ano an nangyari sa mangmang na mga daraga?

¹¹ Nagkonklusyon si Jesus: “Mantang paduman [an mangmang na mga daraga] sa pagbakal, nagdatong an nobyo, asin an mga daragang andam naglaog kaiba nia sa punsion sa kasal; asin pininto an tata. Pagkatapos an ibang daraga nagdatong man, na an sabi, ‘Ginoo, ginoo, bukasi kami!’ Sa pagsimbag sia nagsabi, ‘Sinasabi ko saindo an katotoohan, Dai ko kamo midbid.’” (Mateo 25:10-12) Iyo, an nagkapira bakong andam para sa pag-abot kan Nobyo. Sa siring, dai sinda nakapasar sa pagsiyasat asin nawaran kan oportunidad na umatender sa langitnon na punsion sa kasal. Kanigoan kamakamomondo!

An Parabola kan mga Talento

12. (a) Ano an ginamit ni Jesus tanganing iilustrar an pagigin fiel? (b) Siisay an tawo na “nagduman sa ibang daga”?

¹² Pakatapos na iilustrar an pagigin may diskresion, iinilustrar naman ni Jesus an pagigin fiel. Sia nagsabi: “Iyan garo man sana kun an sarong tawo, na mabiahe na sa ibang daga, nag-apod kan saiyang mga oripon asin ipinaniwala sa sainda an saiyang mga rogaring. Asin sa saro sia nagtao nin limang talento, sa saro nin duwa, sa saro pa nin saro, sa lambang saro segun sa saiyang kakayanan, asin sia nagduman sa ibang daga.” (Mateo 25:​14, 15) An tawo sa parabola iyo si Jesus mismo, na “nagduman sa ibang daga” kan sia sumakat sa langit kan taon 33 C.E. Alagad bago sia nagsakat, ipinaniwala ni Jesus “an saiyang mga rogaring” sa saiyang fiel na mga disipulo. Paano?

13. Paano inandam ni Jesus an sarong dakulang langtad nin aktibidad asin inautorisaran an saiyang “mga oripon” na magnegosyo?

¹³ Durante kan saiyang ministeryo sa daga, pinonan ni Jesus na andamon an sarong dakulang langtad nin aktibidad paagi sa paghuhulit kan maogmang bareta kan Kahadean sa bilog na daga nin Israel. (Mateo 9:35-38) Bago sia “nagduman sa ibang daga,” ipinagkatiwala nia an langtad na iyan sa saiyang fiel na mga disipulo, na an sabi: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:18-20) Paagi sa mga tataramon na ini, inautorisaran ni Jesus an saiyang “mga oripon” na magnegosyo sagkod na sia dumatong, an “lambang saro segun sa saiyang kakayanan.”

14. Taano ta bakong gabos inaasahan na gumibo nin magkakaparehong pagnegosyo?

¹⁴ An pananaram na iyan nagpaparisa na bakong gabos na Kristiano kan enot na siglo igwa nin magkakaparehong mga kamugtakan o posibilidad. An nagkapira, arog ni Pablo asin ni Timoteo, libre na magkaigwa nin pinakalubos na posibleng kabtang sa paghuhulit asin pagtotokdo. An mga kamugtakan kan iba tibaad nakalimitar na marhay sa saindang libreng paghiro. Halimbawa, an nagkapirang Kristiano mga oripon, asin an iba herelangon, gurang na, o may mga paninimbagan sa pamilya. Siempre, an nagkapirang pribilehio sa kongregasyon bakong bukas para sa gabos na disipulo. An linahidan na mga babae asin an nagkapirang linahidan na lalaki dai nagtokdo sa kongregasyon. (1 Corinto 14:34; 1 Timoteo 3:1; Santiago 3:1) Pero, ano man an personal na situwasyon ninda, an gabos na linahidan na disipulo ni Cristo​—lalaki asin babae​—inasignaran na magnegosyo, na ginagamit nin tama an saindang mga oportunidad asin kamugtakan sa Kristianong ministeryo. Iyan man an ginigibo kan saindang mga kapareho sa presenteng aldaw.

Nagpoon Na an Panahon nin Pagsiyasat!

15, 16. (a) Kasuarin nagdatong an panahon na makipagkuenta? (b) Anong bagong mga oportunidad na ‘magnegosyo’ an itinao kaidto sa mga fiel?

¹⁵ Nagpapadagos an parabola: “Pakalihis nin haloy na panahon an kagurangnan kan mga oripon na idto nagdatong asin nakipagkuenta sa sainda.” (Mateo 25:19) Kan 1914​—haloy nanggad na panahon pakalihis kan 33 C.E.​—pinonan ni Cristo Jesus an saiyang presensia bilang hade. Pakalihis nin tolo may kabangang taon, kan 1918, nagdatong sia sa espirituwal na templo nin Dios asin inotob an mga tataramon ni Pedro: “Nagdatong na an itinalaan na panahon na an paghokom magpoon sa harong nin Dios.” (1 Pedro 4:17; Malaquias 3:1) Panahon na kaidto na makipagkuenta.

¹⁶ Ano an ginibo kan mga oripon, an linahidan na mga tugang ni Jesus, sa “mga talento” kan Hade? Poon kan 33 C.E., kabale an mga taon sagkod kan 1914, dakol an mahigos na nagtrabaho sa ‘negosyo’ ni Jesus. (Mateo 25:16) Dawa durante kan enot na guerra mundial, nagpaheling sinda nin makosog na pagmawot na maglingkod sa Kagurangnan. Kan panahon na iyan an mga fiel angay na tawan nin bagong mga oportunidad na ‘magnegosyo.’ Nagdatong na kaidto an panahon kan katapusan kan sistemang ini nin mga bagay. An maogmang bareta kaipuhan nang ihulit kaidto sa bilog na kinaban. “An anihon kan daga” kaipuhan nang anihon. (Kapahayagan 14:​6, 7, 14-16) Kaipuhan nang hanapon an ultimong mga miembro kan grupong trigo asin tiponon “an sarong dakulang kadaklan” nin ibang karnero.​—Kapahayagan 7:9; Mateo 13:24-30.

17. Paano ‘naglaog sa kagayagayahan kan saindang kagurangnan’ an fiel na linahidan na mga Kristiano?

¹⁷ Sarong magayagayang panahon an tig-anihan. (Salmo 126:6) Kun siring, angay sana na kaidtong 1919, kan pagkatiwalaan ni Jesus an saiyang fiel na linahidan na mga tugang nin dagdag na paninimbagan, sinabi nia: “Ika nagin fiel sa pira sanang bagay. Ipaniniwala ko sa saimo an dakol na bagay. Lumaog ka sa kagayagayahan kan saimong kagurangnan.” (Mateo 25:​21, 23) Apuera dian, dai niato kayang imahinaron an kagayagayahan kan Kagurangnan bilang bagong pinatukaw sa trono na Hade sa Kahadean nin Dios. (Salmo 45:​1, 2, 6, 7) Namamatean man kan fiel na grupong oripon an kagayagayahan na iyan paagi sa pagrepresentar sa Hade asin pagpaoswag kan intereses nia digdi sa daga. (2 Corinto 5:20) An saindang dakulang kaogmahan maheheling sa makahulang mga tataramon sa Isaias 61:10: “Siertong gayo na ako magpapakagayagaya ki Jehova. An sakong kalag maggagayagaya sa sakong Dios. Huli ta ginubingan nia ako kan mga gubing nin kaligtasan.”

18. Taano an iba ta dai nakapasar sa pagsiyasat, asin may anong resulta?

¹⁸ Makamomondo, an nagkapira dai nakapasar sa pagsiyasat. Mababasa niato: “An saro na nag-ako kan sarong talento uminatubang asin nagsabi, ‘Kagurangnan, midbid taka bilang tawong estrikto, na nag-aani ka sa dai mo sinabwagan asin nagtitipon ka sa dai mo pinagtahopan. Kaya ako natakot asin naghale patin itinago an saimong talento sa daga. Uya na an saimo.’” (Mateo 25:​24, 25) Kaagid kaiyan, an nagkapirang linahidan na Kristiano dai ‘nagnegosyo.’ Bago kan 1914 dai ninda entusiastikong ihiniras sa iba an saindang paglaom, asin habo nindang magpoon kaidtong 1919. Ano an reaksion ni Jesus sa saindang pagkadaing galang? Hinale nia an gabos nindang pribilehio. ‘Itinapok sinda sa kadikloman sa luwas na dian mangyayari an saindang pagtangis asin an pagragot kan saindang mga ngipon.’​—Mateo 25:​28, 30.

Nagpapadagos an Pagsiyasat

19. Sa anong paagi nagpapadagos an proseso nin pagsiyasat, asin ano an determinadong gibohon kan gabos na linahidan na Kristiano?

¹⁹ Siempre, an mayoriya kaidto kan mga magigin linahidan na oripon ni Cristo durante kan panahon kan katapusan dai pa naglilingkod ki Jehova kan ponan ni Jesus an saiyang pagsiyasat kan 1918. Nalipasan daw ninda an pagsiyasat? Dai nanggad. An proseso nin pagsiyasat nagpoon sana kan 1918/19 kan makapasar sa pagbalo an fiel asin may diskresion na oripon bilang sarong grupo. An indibiduwal na linahidan na mga Kristiano padagos na napapasairarom nin pagsiyasat sagkod na magin permanente an pagtatak sa sainda. (Kapahayagan 7:1-3) Sa pakarealisar kaini, an linahidan na mga tugang ni Cristo determinado na padagos na fiel na ‘magnegosyo.’ Determinado sindang magin may diskresion, na nagpapadanay nin abundang suplay na lana tanganing sumirang nin maliwanag an liwanag. Aram ninda na kun an lambang saro fiel na makaabot sa katapusan kan saiyang buhay, aakoon sia ni Jesus sa langitnon na erokan.​—Mateo 24:13; Juan 14:2-4; 1 Corinto 15:​50, 51.

20. (a) Ano an determinadong gibohon kan ibang karnero ngonyan? (b) Ano an narerealisar kan linahidan na mga Kristiano?

²⁰ Inarog kan dakulang kadaklan nin ibang karnero an saindang linahidan na mga tugang. Aram ninda na an saindang kaaraman dapit sa mga katuyohan nin Dios nagtatao nin dakulang paninimbagan. (Ezequiel 3:17-21) Huli kaini, sa tabang kan Tataramon asin banal na espiritu ni Jehova, pinagdadanay man nindang abunda an saindang suplay na lana paagi sa pag-adal asin pakikiasosyar. Asin pinasisirang ninda an saindang liwanag, na nakikikabtang sa paghuhulit saka pagtotokdo asin sa siring ‘nagnenegosyo’ kaiba kan saindang linahidan na mga tugang. Minsan siring, aram nin malinaw kan linahidan na mga Kristiano na an mga talento ipinagkatiwala sa saindang kamot. Dapat sindang manimbag sa kun paano inaasikaso an mga rogaring kan Kagurangnan digdi sa daga. Minsan ngani dikit sinda, dai ninda puedeng ipabaya sa dakulang kadaklan an saindang paninimbagan. Nasa isip ini, an fiel asin may diskresion na oripon padagos na nangengenot sa pag-asikaso kan negosyo kan Hade, na nagpapasalamat sa suporta kan dusay na mga miembro kan dakulang kadaklan. Rinerekonoser kan mga ini an paninimbagan kan saindang linahidan na mga tugang asin pribilehio para sa sainda na maglingkod sa irarom kan saindang pangangataman.

21. Anong sadol an aplikado sa gabos na Kristiano poon kaidtong bago an 1919 sagkod sa satong kaaldawan?

²¹ Sa siring, minsan ngani an duwang parabolang ini nagtatao nin liwanag dapit sa mga pangyayari kan 1919 o sa mga taon bago asin kasunod kaiyan, an mga prinsipyo kaiyan aplikado sa gabos na tunay na Kristiano durante kan huring mga aldaw. Paagi kaini, minsan ngani an sadol na itinao ni Jesus sa poro kan parabola kan sampulong daraga enot na aplikado sa linahidan na mga Kristiano bago kan 1919, an mga prinsipyo kaiyan aplikado pa man giraray sa lambang Kristiano. Kun siring, logod na isapuso niato gabos an mga tataramon ni Jesus: “Kun siring, magdanay kamong mapagbantay, huli ta dai nindo naaaraman an aldaw ni an oras.”​—Mateo 25:13.

[Mga Nota sa Ibaba]

Ikapaliliwanag daw Nindo?

• Kasuarin siniyasat ni Jesus an saiyang mga parasunod, asin ano an nanompongan nia?

• Taano an nagkapirang linahidan na Kristiano ta nagkaigwa kan espiritu kan “maraot na oripon na iyan”?

• Paano niato ikapaheheling na kita may diskresion sa espirituwal?

• Sa pag-arog sa fiel na linahidan na mga tugang ni Jesus, sa anong paagi kita padagos na ‘makapagnenegosyo’?

[Kahon sa pahina 16]

NOARIN AN PAGDATONG NI JESUS?

Sa Mateo kapitulo 24 asin 25, si Jesus sinasabing “madatong” sa magkakalaen na sentido. Dai nia kaipuhan na bumalyo nin lugar tanganing “dumatong.” Imbes, sia “minadatong” sa sentido nin pagtao kan saiyang atension sa katawohan o sa saiyang mga parasunod, na sa parate tanganing maghokom. Sa siring, kan 1914 sia “nagdatong” tanganing ponan an saiyang presensia bilang pinatukaw sa trono na Hade. (Mateo 16:28; 17:1; Gibo 1:11) Kan 1918 sia “nagdatong” bilang mensahero kan tipan asin nagpoon na hokoman an mga naghihingakong naglilingkod ki Jehova. (Malaquias 3:1-3; 1 Pedro 4:17) Sa Armagedon, sia “madatong” tanganing maghokom sa mga kaiwal ni Jehova.​—Kapahayagan 19:11-16.

An pagdatong (o, pag-abot) na nagkapirang beses na nasambitan sa Mateo 24:29-44 asin 25:31-​46 mangyayari sa “dakulang kahorasaan.” (Kapahayagan 7:14) Sa ibong na kampi, an pagdatong na nasambitan nin nagkapirang beses sa Mateo 24:45 sagkod 25:30 igwa nin koneksion sa paghokom nia sa naghihingakong mga disipulo poon kan 1918. Halimbawa, bakong rasonableng sabihon na an pagtao nin balos sa fiel na oripon, an paghokom sa mangmang na mga daraga, asin an paghokom sa hugakon na oripon, na itinago an talento kan Kagurangnan, mangyayari “pagdatong” ni Jesus sa dakulang kahorasaan. Mangangahulogan iyan na an dakol sa linahidan manonompongan na bakong fiel sa panahon na iyan asin sa siring kaipuhan na salidahan. Minsan siring, an Kapahayagan 7:3 nagpaparisa na an gabos na linahidan na oripon ni Cristo permanente nang ‘natatakan’ sa panahon na iyan.

[Ritrato sa pahina 14]

An “maraot na oripon” dai nag-ako nin mga bendisyon kan 1919

[Ritrato sa pahina 15]

An madonong na mga daraga andam kan dumatong an nobyo

[Ritrato sa pahina 17]

‘Nagnegosyo’ an fiel na mga oripon

An hugakon na oripon dai

[Mga Ritrato sa pahina 18]

An mga linahidan asin an “dakulang kadaklan” padagos na pinasisirang an saindang liwanag