Ano an Nagmomotibar sa Saindo na Maglingkod sa Dios?

“Mamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.”​—MARCOS 12:30.

1, 2. Anong nakaoogmang mga bagay an naootob may koneksion sa gibohon na paghuhulit?

AN TUNAY na halaga nin sarong kotse dai nadedeterminaran kan itsura sana kaiyan. An pinta puedeng magpagayon sa panluwas kaiyan, asin an magayon na porma puedeng makaakit sa mabakal; pero may orog na importansia an mga bagay na dai tolos naheheling​—an makina na nagpapadalagan sa kotse, kaiba an gabos na iba pang kasangkapan na nagkokontrol kaiyan.

² Kapareho iyan kan paglilingkod nin Kristiano sa Dios. An mga Saksi ni Jehova igwa nin kadakoldakol na diosnon na gibohon. Kada taon, labing sarong bilyon na oras an ginagamit sa paghuhulit kan maogmang bareta kan Kahadean nin Dios. Saro pa, minilyon na pag-adal sa Biblia an kinokonduktahan, asin ginatos na ribo an bilang kan mga nababautismohan. Kun kamo sarong parabalangibog kan maogmang bareta, may kabtang kamo​—dawa garo baga sadit—​sa nakaoogmang estadistikang ini. Asin makaseseguro kamo na “an Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”​—Hebreo 6:10.

3. Ano apuera sa mga gibo an maninigong magin mahalaga sa mga Kristiano, asin taano?

³ Alagad, an tunay na halaga kan satong paglilingkod​—bilang grupo o bilang indibiduwal—​dai nasosokol sa numero sana. Siring kan pagkasabi ki Samuel, “an tawo nagheheling sa luwas sana; alagad si Jehova, naheheling nia kun ano an puso.” (1 Samuel 16:7) Iyo, an mahalaga sa Dios kun ano kita sa laog. Totoo, mahalaga an mga gibo. An mga gibo nin diosnon na debosyon sinasamnohan an katokdoan ni Jehova asin inaakit an may posibilidad na magin mga disipulo. (Mateo 5:​14-16; Tito 2:10; 2 Pedro 3:11) Pero, dai ihinahayag kan satong mga gibo an bilog na estorya. An binuhay liwat na si Jesus igwa nin dahelan na mahadit manongod sa kongregasyon sa Efeso​—apisar kan saindang rekord nin marahay na mga gibo. “Aram ko an saimong mga gibo,” an sabi nia sainda. “Alagad ibinibilang ko ining tumang sa saimo, na binayaan mo an saimong pagkamoot kan enot.”​—Kapahayagan 2:​1-4.

4. (a) Sa anong paagi puedeng magin rituwal na ginigibo bilang obligasyon an satong paglilingkod sa Dios? (b) Taano ta kaipuhan an pagsiyasat sa sadiri?

⁴ Igwa nin peligro. Sa laog nin sarong peryodo nin panahon, an satong paglilingkod sa Dios puedeng magin arog sa rituwal na ginigibo bilang obligasyon. Arog kaini an pagkaladawan kaiyan nin sarong Kristiana: “Minaluwas ako sa paglilingkod, naduman sa mga pagtiripon, nag-aadal, namimibi​—pero ginibo ko iyan gabos sa automatikong paagi, na dai nakamamate nin ano man.” Siempre, dapat tawan nin komendasyon an mga lingkod nin Dios kun sinda naghihingoa minsan ngani nakamamateng “ilinalampog” o “mamondo.” (2 Corinto 4:9; 7:6) Alagad, kun an satong Kristianong rutina nagigin estangkado, dapat niatong siripon sa laog an makina, sabi ngani. Dawa an pinakamarahay na mga kotse nangangaipo nin panapanahon na mantension; sa kaagid na paagi, an gabos na Kristiano kaipuhan na gumibo nin regular na pagsiyasat sa sadiri. (2 Corinto 13:5) Puedeng maheling kan iba an satong mga gibo, pero dai ninda puedeng mamansayan kun ano an nagmomotibar sa satong mga hiro. Kaya, an kada saro sa sato maninigong mag-isip-isip sa hapot na: ‘Ano an nagmomotibar sa sako na maglingkod sa Dios?’

Mga Olang sa Tamang Motibasyon

5. Anong pagboot an isinabi ni Jesus na iyo an nangongorog sa gabos?

⁵ Kan hapoton kun arin sa mga pagboot na itinao sa Israel an nangongorog sa gabos, si Jesus nagkotar nin sarong pagboot na nakasentro, bakong sa panluwas na itsura, kundi sa panlaog na motibo: “Mamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:​28-30) Kaya ipinamidbid ni Jesus kun ano an maninigong magin nagpapahirong puersa sa likod kan satong paglilingkod sa Dios​—an pagkamoot.

6, 7. (a) Sa anong paagi tusong inaatake ni Satanas an pamilya, asin taano? (2 Corinto 2:11) (b) Paano puedeng makaapektar an paagi nin pagpadakula sa kaisipan nin saro manongod sa autoridad nin Dios?

⁶ Boot ni Satanas na olangon an satong kakayahan na pataluboon an mahalagang kualidad na pagkamoot. Tanganing magibo ini, an sarong paagi na saiyang ginagamit iyo an pag-atake sa pamilya. Taano? Huli ta dian napoporma an satong enot asin pinakanagdadanay na mga impresyon manongod sa pagkamoot. Aram na marhay ni Satanas an prinsipyo sa Biblia na an nanonodan sa pagkaaki puedeng magin mahalaga sa pagkaadulto. (Talinhaga 22:6) Tuso niang pinoprobaran na biribidon an satong ideya dapit sa pagkamoot sa amay na edad. Bilang “dios kan palakaw na ini nin mga bagay,” naheheling ni Satanas na naootob na marhay an saiyang mga katuyohan kun an dakol nagdadakula sa mga harong na bakong lugar na may pagkamoot kundi lugar nin ralaban na may kapaitan, kabangisan, asin rilibakan.​—2 Corinto 4:4; Efeso 4:​31, 32; 6:​4, nota sa ibaba; Colosas 3:21.

⁷ An librong Making Your Family Life Happy nagkomento na an paagi nin pag-asikaso nin ama sa saiyang kabtang bilang magurang “puedeng magkaigwa nin nagdadanay na epekto sa magigin kaisipan kan saiyang mga aki manongod sa autoridad, kapwa nin tawo asin nin Dios.”a An sarong Kristianong lalaki na pinadakula sa irarom kan autoritaryanismo nin maisog na ama nag-admitir: “Para sa sako, pasil an pagkuyog ki Jehova; orog na depisil an pagkamoot sa saiya.” Siempre, mahalaga an pagkuyog, huli ta sa pagheling nin Dios “an pagkuyog orog na marahay kisa sa pag-atang.” (1 Samuel 15:22) Pero ano an makatatabang sato na lumihis pa sa pagkuyog sana asin magpatalubo nin pagkamoot ki Jehova bilang an nagmomotibar na puersa sa likod kan satong pagsamba?

“Pinipirit Kami kan Pagkamoot na Yaon sa Cristo”

8, 9. Paano maninigong pukawon kan pantubos na atang ni Jesus an satong pagkamoot ki Jehova?

⁸ An pinakadakulang pampahiro sa pagpatalubo nin bilog na pusong pagkamoot ki Jehova iyo an pagpahalaga sa pantubos na atang ni Jesu-Cristo. “Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya.” (1 Juan 4:9) Oras na masabotan asin pahalagahan niato iyan, an aktong ini nin pagkamoot nakapupukaw nin reaksion na pagkamoot. “Kita namomoot, huli ta [si Jehova] enot na namoot sa sato.”​—1 Juan 4:19.

⁹ Boluntad na inako ni Jesus an saiyang asignasyon na maglingkod bilang Paraligtas sa tawo. “Paagi kaini namidbid niato an pagkamoot, huli ta an sarong iyan nagtao kan saiyang kalag para sa sato.” (1 Juan 3:16; Juan 15:13) An mapagsakripisyo sa sadiring pagkamoot ni Jesus maninigong pumukaw nin mapagpahalagang reaksion sa sato. Sa pag-ilustrar: Ipamugtak na ilinigtas kamo sa pagkalamos. Puede daw na basta na sana kamo pumuli, magpamara, asin lingawan na iyan? Siempre dai! Makakamate kamo nin utang na boot sa tawo na nagligtas sa saindo. Total, utang nindo sa tawong iyan an saindong buhay. Bako daw na arog man kaiyan an pagkakautang niato ki Jehova Dios asin ki Jesu-Cristo? Kun mayo an pantubos, an kada saro sa sato malalamos, sabi ngani, sa kasalan asin kagadanan. Imbes, huli sa dakulang aktong ini nin pagkamoot, igwa kita kan paglaom na mabuhay sagkod lamang sa sarong paraisong daga.​—Roma 5:​12, 18; 1 Pedro 2:24.

10. (a) Paano niato personal na ikakaaplikar an pantubos? (b) Paano kita pinipirit kan pagkamoot ni Cristo?

¹⁰ Maghorophorop sa pantubos. Personal na iaplikar iyan, arog kan ginibo ni Pablo: “Tunay na an buhay na ipinamumuhay ko ngonyan sa laman ipinamumuhay ko paagi sa pagtubod sa Aki nin Dios, na namoot sako asin itinao an saiyang sadiri para sa sako.” (Galacia 2:20) An siring na paghorophorop magpapalaad nin odok sa pusong motibasyon, huli ta nagsurat si Pablo sa mga taga-Corinto: “Pinipirit kami kan pagkamoot na yaon sa Cristo, huli ta . . . sia nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda asin binuhay liwat.” (2 Corinto 5:​14, 15) An The Jerusalem Bible nagsasabi na an pagkamoot ni Cristo “nangingibabaw sa sato.” Kun hinohorophorop niato an pagkamoot ni Cristo, kita napipirit, odok na napahihiro, napangingibabawan pa ngani. Tinotodok kaiyan an satong puso asin pinahihiro kita. Siring kan pagpakahulogan dian kan traduksion ni J. B. Phillips, “an pinakagikanan kan satong mga hiro iyo an pagkamoot ni Cristo.” An ano man na ibang klase nin motibasyon dai magpapaluwas nin nagdadanay na bunga sa sato, arog kan ipinaheling sa halimbawa kan mga Fariseo.

“Magmaan sa Lebadura kan mga Fariseo”

11. Iladawan an kaisipan kan mga Fariseo dapit sa relihiosong mga gibo.

¹¹ Hinale kan mga Fariseo an gabos na buhay sa pagsamba sa Dios. Imbes na idoon an pagkamoot sa Dios, idinoon ninda an mga gibo bilang pansokol sa espirituwalidad. An saindang pagigin preokupado sa detalyadong mga susundon ginibo sindang sagin matanos sa luwas, pero sa laog sinda “pano kan mga tolang nin mga gadan asin nin gabos na klaseng karigsokan.”​—Mateo 23:27.

12. Pakapaomayi ni Jesus sa sarong lalaki, paano ipinaheling kan mga Fariseo na sinda may katagasan an puso?

¹² Sa sarong pangyayari madinamayon na pinaomayan ni Jesus an sarong lalaki na an kamot alang. Siertong naogma nanggad an lalaking ini na maeksperyensiahan an biglaan na pag-omay nin helang na daing duwa-duwang nagin dahelan nin pisikal asin emosyonal na kapurisawan! Pero, an mga Fariseo dai nakipaggayagaya sa saiya. Imbes, pigparatatsaran ninda an sarong teknikal na bagay​—na si Jesus nagtao nin tabang sa Sabbath. Preokupado sa saindang teknikal na pag-interpretar sa Pagboot, biyong nalihisan kan mga Fariseo an tunay na kahulogan kan Pagboot. Bakong makangangalas na si Jesus “namomondo nin biyo sa katagasan kan saindang puso”! (Marcos 3:​1-5) Dugang pa, pinatanidan nia an saiyang mga disipulo: “Magmaan sa lebadura kan mga Fariseo asin Saduceo.” (Mateo 16:6) An saindang mga gawe asin ugale ibinuyagyag sa Biblia para sa satong pakinabang.

13. Anong leksion an yaon para sa sato sa halimbawa kan mga Fariseo?

¹³ Tinotokdoan kita kan halimbawa kan mga Fariseo na kaipuhan kitang magkaigwa nin makatanosan na punto-de-vista sa mga gibo. Iyo nanggad, mahalaga an mga gibo, huli ta “an pagtubod na daing gibo gadan.” (Santiago 2:26) Alagad, an bakong sangkap na mga tawo may tendensiang husgaran an iba sono sa saindang ginigibo imbes na sono sa kun ano man nanggad sinda. May mga panahon na tibaad husgaran pa ngani niato an satong sadiri sa siring na paagi. Tibaad mabangkag kita sa paggibo, na garo baga ini an solamenteng pansokol sa satong espirituwalidad. Puedeng malingawan ta na logod an kahalagahan nin pagsiyasat sa satong mga motibo. (Ikomparar an 2 Corinto 5:12.) Tibaad kita magin labi-labi kaestrikto sa pagsunod sa mga susundon na “sinasara an noknok alagad hinahalon an kamelyo,” na kinukuyog an letra kan pagboot mantang linalapas an katuyohan kaiyan.​—Mateo 23:24.

14. Paanong an mga Fariseo garo maating kopa o pinggan?

¹⁴ An dai nasabotan kan mga Fariseo iyo na kun an saro talagang namomoot ki Jehova, an mga akto nin diosnon na debosyon natural na sanang masunod. An espirituwalidad naghahale sa laog paluwas. Makosog na idinenunsiar ni Jesus an mga Fariseo huli sa saindang salang kaisipan dapit sa bagay na ini, na an sabi: “Herak man sa saindo, mga eskriba asin Fariseo, mga parasaginsagin! Huli ta linilinigan nindo an luwas kan kopa asin kan pinggan, alagad sa laog iyan parano nin pananamsam asin kapasloan. Butang Fariseo, linigan mo nguna an laog kan kopa asin kan pinggan, tanganing an luwas kaiyan magin malinig man.”​—Mateo 23:​25, 26.

15. Magsabi nin mga halimbawa na nagpapaheling na si Jesus nagheheling nin lihis sa mga itsura.

¹⁵ An panluwas na itsura nin sarong kopa, pinggan, o pati nin sarong edipisyo dai naghahayag kan gabos. An mga disipulo ni Jesus namungnan sa gayon kan templo sa Jerusalem, na inapod ni Jesus na “lungib nin mga parahabon” huli kan mga nangyayari sa laog. (Marcos 11:17; 13:1) An totoo sa templo totoo man sa minilyon na naghihingakong Kristiano, arog kan ipinaheheling kan rekord nin Kakristianohan. Sinabi ni Jesus na huhusgaran niang “mga paragibo nin katampalasanan” an ibang naggigibo nin mga “ngangalasan” sa saiyang ngaran. (Mateo 7:​22, 23) Sa kabaliktaran na marhay, sia nagsabi dapit sa sarong balo na nagkontribwir nin saditon na kantidad nin kuarta sa templo: “An dukhang balong ini nagbugtak nin labi kisa gabos na nagbugtak nin kuarta sa mga kaha . . . Sia, gikan sa saiyang kadaihan, nagbugtak kan gabos na yaon sa saiya, an saiyang bilog na pagbuhay.” (Marcos 12:​41-44) Bakong timbang na mga paghusgar? Bako man. Sa duwang situwasyon, ipinabanaag ni Jesus an punto-de-vista ni Jehova. (Juan 8:16) Hineling nia an mga motibo sa likod kan mga gibo asin naghusgar sono dian.

“Lambang Saro Sono sa Saiyang Kakayanan”

16. Taano ta dai niato kaipuhan na perming ikomparar an satong aktibidad sa kan sa ibang Kristiano?

¹⁶ Kun tama an satong mga motibo, dai kaipuhan na perming gumibo nin mga pagkomparar. Halimbawa, daing gayo nin marahay na nagigibo an may pakikompetensiang pagmamaigot na gumamit nin kaparehong oras sa ministeryo na ginagamit nin ibang Kristiano o pantayan an mga naginibo kan sarong iyan sa paghuhulit. Sinabi ni Jesus na mamotan si Jehova sa saindong bilog na puso, isip, kalag, asin kosog​—bakong kan sa iba. Iba-iba an mga kakayahan, kosog, asin kamugtakan nin kada saro. Kun itinotogot kan saindong situwasyon, momotibaron kamo nin pagkamoot na gumamit nin dakol na oras sa ministeryo​—tibaad bilang pambilog na panahon na payunir na ministro pa ngani. Alagad kun kamo nasasakitan sa helang, an oras na ginagamit nindo sa ministeryo tibaad mas dikit kisa mamawoton nindo. Dai kamo manluya. An kaimbodan sa Dios dai nasosokol sa oras. Sa pagkaigwa nin dalisay na mga motibo, magkakaigwa kamo nin dahelan na maggayagaya. Si Pablo nagsurat: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.”​—Galacia 6:4.

17. Sa saindong sadiring mga tataramon, isaysay sa halipot an parabola dapit sa mga talento.

¹⁷ Horophoropa an parabola ni Jesus dapit sa mga talento, na nasusurat sa Mateo 25:​14-30. An sarong tawo na maduman sa ibang daga inapod an saiyang mga oripon asin ipinaniwala sa sainda an saiyang mga rogaring. “Sa saro sia nagtao nin limang talento, sa saro nin duwa, sa saro pa nin saro, sa lambang saro sono sa saiyang kakayanan.” Kan bumalik an kagurangnan tanganing makipagkuenta sa saiyang mga oripon, ano an saiyang nanompongan? An oripon na tinawan nin limang talento nakatubo nin lima pang talento. Siring man, an oripon na tinawan nin duwang talento nakatubo nin duwa pang talento. An oripon na tinawan nin sarong talento itinalbong iyan sa daga asin mayong ginibo tanganing padakolon an kayamanan kan saiyang kagurangnan. Paano hinusgaran kan kagurangnan an situwasyon?

18, 19. (a) Taano ta dai ikinomparar kan kagurangnan an oripon na tinawan nin duwang talento sa oripon na tinawan nin limang talento? (b) Ano an itinotokdo sa sato kan parabola dapit sa mga talento kun manongod sa komendasyon asin mga pagkomparar? (c) Taano ta sinilotan an ikatolong oripon?

¹⁸ Enot, horophoropon niato an mga oripon na kanya-kanyang tinawan nin lima asin duwang talento. Sa kada saro kan mga oripon na ini, an kagurangnan nagsabi: “Marahay na gibo, marahay asin maimbod na oripon!” Sasabihon daw nia iyan sa oripon na may limang talento kun an sarong iyan nakatubo sana nin duwa? Nungka! Sa ibong na lado, dai nia sinabi sa oripon na nakatubo nin duwang talento: ‘Taano ta dai ka nakatubo nin lima? Tara, helinga an saimong kapwa oripon asin kun gurano an natubo nia para sa sako!’ Dai, an madinamayon na kagurangnan, na naglaladawan ki Jesus, dai naggibo nin mga pagkomparar. Saiyang iinasignar an mga talento “sa lambang saro sono sa saiyang kakayanan,” asin dai sia naglaom nin labi sa ikatatao kan kada saro. An duwang oripon nag-ako nin pantay na komendasyon, huli ta an duwa nagtrabaho nin bilog na kalag para sa saindang kagurangnan. Kita gabos may manonodan digdi.

¹⁹ Siempre, an ikatolong oripon dai tinawan nin komendasyon. An totoo, iinapon sia sa kadikloman sa luwas. Huling nag-ako nin saro sanang talento, dai man sia lalaoman na magprodusir nin arog kadakol kan sa oripon na igwa nin limang talento. Alagad, dai man lamang sia naghingoa! An silot sa saiya huli sa saiyang “maraot asin hugakon” na ugale sa puso, na nagpaheling nin kadaihan nin pagkamoot sa saiyang kagurangnan.

20. Ano an pagheling ni Jehova sa satong mga limitasyon?

²⁰ Linalaoman ni Jehova an kada saro sato na mamoot sa saiya sa bilog niatong kosog, pero nakaoogma nanggad sa puso na “aram niang gayo an satong kamugtakan, na ginigirumdom na kita kabokabo”! (Salmo 103:14) An Talinhaga 21:2 nagsasabi na “si Jehova nagsisiyasat sa mga puso”​—bakong sa estadistika. Sinasabot nia an ano man na mga limitasyon na bako kita an may kontrol, baga man iyan pinansial, pisikal, emosyonal, o iba pa. (Isaias 63:9) Kadungan kaiyan, linalaoman nia kita na lubos na gamiton an gabos na kakayahan na puedeng yaon sa sato. Si Jehova sangkap, pero sa pagtratar sa saiyang bakong sangkap na mga parasamba, dai sia naghahanap nin pagkasangkap. Sia makatanosan sa saiyang mga pagtratar asin realistiko sa saiyang mga linalaoman.

21. Kun an satong paglilingkod sa Dios minomotibar nin pagkamoot, anong marahay na mga resulta an masunod?

²¹ An pagkamoot ki Jehova sa satong bilog na puso, kalag, isip, asin kosog “orog na mahalaga kisa gabos na dolot na tinotong asin mga atang.” (Marcos 12:33) Kun kita minomotibar nin pagkamoot, kun siring gigibohon niato an gabos niatong makakaya sa paglilingkod sa Dios. Nagsurat si Pablo na kun an diosnon na mga kualidad, kabale an pagkamoot, “nasa saindo asin nagsusulwak, iingatan kamo kaiyan na dai magin inaktibo o daing bunga mapadapit sa tamang kaaraman kan satong Kagurangnan na Jesu-Cristo.”​—2 Pedro 1:8.

[Nota sa Ibaba]

Bilang Pagrepaso

◻ Ano an maninigong magin nagpapahirong puersa sa likod kan satong paglilingkod sa Dios?

◻ Paano kita pinipirit kan pagkamoot ni Cristo na maglingkod ki Jehova?

◻ Anong pagkapreokupado kan mga Fariseo an dapat niatong likayan?

◻ Taano ta bakong madonong na ipagparakomparar an satong paglilingkod sa kan sa ibang Kristiano?

[Mga retrato sa pahina 16]

Iba-iba an mga kakayahan, kosog, asin kamugtakan nin mga indibiduwal