Pinahiwas na mga Aktibidad sa Panahon kan Presensia ni Cristo
“Dangan an hade masabi sa mga yaon sa saiyang too, ‘Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.’”—MATEO 25:34.
1. Sa anong paagi na an pa·rou·siʹa ni Cristo nagin kaagid kan “mga aldaw ni Noe”?
PRESENSIA ni Cristo—an haloyon nang hinahalat na okasyon! An panahon na kaagid kan “mga aldaw ni Noe,” na isinabi ni Jesus may koneksion sa “pagtatapos kan palakaw nin mga bagay,” nagdatong kan taon 1914. (Mateo 24:3, 37) Alagad ano an magigin kahulogan kan presensia, o pa·rou·siʹa, ni Cristo para sa linahidan na natatada kan “maimbod asin madonong na oripon”? (Mateo 24:45) Tara, na sinda kaipuhan na orog na magin aktibo bilang mga paradara nin liwanag! May mangyayaring makangangalas na mga bagay! Mapoon an daing kaagid na pagtitipon.
2. Anong paglinig an nangyari bilang kaotoban kan Malaquias 3:1-5?
2 Pero enot an linahidan na mga Kristianong ini nagkakaipong linigan. Siring sa ihinula kan Malaquias 3:1-5, si Jehova Dios asin an saiyang “mensahero kan tipan,” si Jesu-Cristo, siniyasat an espirituwal na templo kan tigsoli nin 1918. Mapoon an paghokom sa “harong nin Dios.” (1 Pedro 4:17) Ihinula kan Malaquias 3:3: “Sia [si Jehova] matukaw bilang paradalisay asin paralinig nin pirak asin lilinigan an mga aking lalaki ni Levi; asin dadalisayon nia sinda na siring sa bulawan asin siring sa pirak.” Idto panahon nin pagdalisay asin paglinig.
3. Taano ta kaipuhan na mangyari an espirituwal na paglinig?
3 Sa pag-agi sa paghokom na ini, na natapos kan 1918, an natatada sa grupong oripon nalinigan sa kinabanon asin relihiyosong digta. Taano ta lininigan sinda ni Jehova? Huli ta napapalabot an saiyang espirituwal na templo. Ini an garo-templong areglo sa pagsamba ki Jehova basado sa pantubos na atang ni Jesu-Cristo. Boot ni Jehova na an saiyang templo nasa malinig na kamugtakan tanganing kun darahon dian an dakol na parasamba na may daganon na paglaom, makanompong sinda nin lugar na iginagalang an saiyang unibersal na soberaniya, pinapakangbanal an saiyang banal na ngaran, asin kinukuyog an saiyang matanos na mga pagboot. Sa siring, aapresyaron ninda si Jehova asin makiiiba sinda sa pagpahayag kan saiyang mamuraway na mga katuyohan.
Dagdag na mga Pribilehiyo
4, 5. (a) Paano an sarong hapot ni Jesu-Cristo nag-obligar sa kada saro sa grupong oripon ngonyan? (b) Sa anong mga paagi maninigong saboton an mga tataramon na “maimbod asin madonong na oripon” asin “saiyang mga domestiko”?
4 Kan 1919 an nalinigan na grupong oripon makatatanaw na sa daing ontok sa paghiwas na mga aktibidad. Kan 1914, si Jesu-Cristo, an saindang Kagurangnan, nagkamit na nin langitnon na Kahadean. Kan sia bumalik sa mga trabahador nia sa harong sa pagsiyasat sa gabos niang “domestiko,” sia nasasamnohan nin makahadeng dignidad, na mayo sa saiya kan sia yaon digdi sa daga. Ano an nanompongan nia? Sibot daw an grupong oripon sa pag-asikaso sa intereses kan Kagurangnan? Arog kan nakatala sa Mateo 24:45-47, si Jesus may ihinapot na nag-obligar sa kada linahidan na disipulo na siyasaton an saiyang personal na debosyon sa Mesiyas ni Jehova: “Siisay man nanggad an maimbod asin madonong na oripon na pinaniwalaan kan saiyang kagurangnan kan saiyang mga domestiko, tanganing magtao sainda kan saindang kakanon sa igong panahon? Maogma an oripon na iyan kun sa pagdatong kan saiyang kagurangnan makua siang naggigibo nin siring. Sa katotoohan sinasabi ko sa saindo, Paniniwalaan nia sia kan gabos niang rogaring.”
5 Malinaw na an paglaladawan ni Jesus sa maimbod na oripon na ini dai nakatatama sa siisay man na indibiduwal na tawo. Dai, pero ilinaladawan kaiyan an maimbod na linahidan na kongregasyon ni Cristo sa kabilogan, bilang sarong grupo. An mga domestiko iyo an linahidan na mga parasunod ni Cristo bilang indibiduwal. Aram ni Jesus na babakalon nia an mga linahidan na ini kan saiya mismong dugo, kaya tama sana na sa kabilogan apodon nia sindang saiyang oripon. An 1 Corinto 7:23 nagsasabi manongod sa sainda: “Kamo [nagtataram bilang kabilogan] binakal; umontok na kamo sa pagigin oripon nin mga tawo.” Isinugo ni Jesus an saiyang grupong oripon na pasirangon an saindang liwanag tanganing makadagka saka makagibo nin ibang disipulo asin progresibong pakakanon an saiyang mga domestiko paagi sa pagtao sa sainda kan saindang espirituwal na kakanon sa igong panahon.
6. Paano binalosan an oripon bilang resulta kan pagsiyasat ni Jesus?
6 Poon sa pagpopoon kan presensia ni Cristo sagkod sa 1918, an grupong oripon, sa ibong nin pagigin bakong popular, nin paglamag, asin nin kadikit pa nganing karibarawan, naghihingoang tumao nin napapanahon na kakanon sa mga domestiko. Ini an nanompongan kan Kagurangnan kan pumoon an saiyang pagsiyasat. Naogma an Kagurangnan na Jesus, asin kan 1919 ipinahayag niang maogma an maimbod na aprobadong grupong iyan nin oripon. Ano an makaoogmang balos sa oripon huli sa paggibo kan ipinagibo sa saiya kan saiyang Kagurangnan? Paglangkaw nin katongdan! Iyo, itinao an mas darakulang paninimbagan sa pagpaoswag sa intereses kan saiyang Kagurangnan. Mantang ngonyan langitnon nang Hade an Kagurangnan, tara, orog pang nagin mahalaga an saiyang mga rogaring sa daga.
7, 8. (a) Ano an ‘gabos na rogaring’ kan Kagurangnan? (b) Ano an hinahagad sa oripon sa pamamahala sa mga rogaring na ini?
7 Kun siring, ano an “gabos niang rogaring”? Ini an gabos na espirituwal na kayamanan digdi sa daga na nagin rogaring ni Cristo may koneksion sa saiyang autoridad bilang langitnon na Hade. Sierto nanggad na kaiba digdi an sugo na gumibo nin mga disipulo ni Cristo, na may makangangalas na pribilehiyo na maglingkod bilang mga representante kan napatindog nang Kahadean nin Dios sa gabos na nasyon sa kinaban.
8 An paglangkaw na iyan nin katongdan na mamahala sa gabos na rogaring kan Kagurangnan naghahagad na an grupong oripon magtao nin orog na panahon asin atension sa paghaman sa gibohon kan Kahadean asin, iyo, gumibo nin mas mahiwas na mga pasilidad para sa gibohon na iyan. Mas mahiwas ngonyan an teritoryong pagtatrabawohan kaiyan—an bilog na inierokan na daga.
Pagtipon sa mga Karnero
9. Ano an ibinunga kan paghiwas kan mga aktibidad kan oripon?
9 Kaya makinuyog na pinahiwas kan grupong maimbod asin madonong na oripon ni Cristo an mga aktibidad kaiyan. An resulta? Natipon an mga huri sa linahidan na 144,000. Dangan an bisyon ni Juan na nasusurat sa Kapahayagan 7:9-17 nagin makaoogma, nakapagagayagaya sa pusong katunayan. Partikularmente poon kan 1935 na naheling kan grupong oripon an padagos na pagkaotob kan bisyon na ini. Hale sa bilog na daga, an “dakulang kadaklan” nin minilyon nagsusurusuan ngonyan sa mga palibot kan espirituwal na templo ni Jehova bilang mga parasamba sa saiya. Sinabihan si Juan kan anghel ni Jehova na mayo nin tawong makabibilang sa dakulang kadaklan na ini. Iyan nangangahulogan na dai nin limite sa bilang nin mga tawo na ilalaog kan grupong oripon sa espirituwal na templo ni Jehova. Sagkod na bukas pa an dalan, magpapadagos an gibong pagtipon sa sainda.
10. Sa anong mamomoton na aktibidad nasisibot ngonyan an oripon?
10 An grupong maimbod na oripon may magabat na paninimbagan sa pag-ataman sa padagos an pagdakol na “ibang karnero,” na nakaaaram na an mga arog-karnerong ini hale sa gabos na nasyon namomotan na marhay kan Kagurangnan, si Jesus. An totoo sinda saiyang aripompon. (Juan 10:16; Gibo 20:28; 1 Pedro 5:2-4) Kaya may pagkamoot sa Kagurangnan asin sa mga karnero, an grupong oripon maogmang inaasikaso an espirituwal na mga pangangaipo kan dakulang kadaklan.
11-13. Anong angay na komento an isinabi kan presidente kaidto kan Watch Tower Society dapit sa aktibidad kan oripon?
11 Iyo, an mas dakulang kabtang kan sugo sa oripon na pagdara nin liwanag may labot sa pagtipon sa daganon na mga sakop na ini kan Kahadean nin Dios. Sa pagpaliwanag kan pahiwas nang pahiwas na mga aktibidad kan maimbod na oripon, si F. W. Franz, dating presidente kan Watch Tower Society, nagsabi bago sia nagadan kan Disyembre 1992:
12 “Perming ginagamit ni Jesu-Cristo an organisasyon nin paorog nang paorog kamakangangalas, sono sa 99 anyos na eksperyensia ko sa buhay. Bakong tawo sana an nagdidirehir sa organisasyon, kundi seguradong an Kagurangnan na Jesu-Cristo. Huli ta an nangyari mas mamuraway asin mas makangangalas kisa pinaghona niato. Ngonyan igwa kita nin organisasyon na huminiwas sa bilog na kinaban. Iyan nagtatrabaho sa Hemisperyo sa Amihanan asin Hemisperyo sa Timog, sa Sirangan asin sa Solnopan. Saro sanang persona an puwedeng gumibo kan pambihirang paghiwas na ini—an Aki nin Dios, na namamahala sa grupong maimbod asin madonong na oripon. Inootob nia an saiyang mga paninimbagan, asin iyan an dahelan kan makangangalas na paghiwas na ini na naheling niato.
13 “An bagay dai ginibo nin sarong tawo. Igwa kita nin organisasyon na teokratiko, asin iyan naghihiro sa teokratikong paagi, sa paaging ginigiyahan nin Dios. Mayo nin tawo, minsan an kagpundar sa Watch Tower Bible and Tract Society, na makaaako o masasabing kaggibo sa nahaman sa bilog na daga. Iyan makangangalas nanggad.” Bako daw na an gabos na kabilang sa dakulang kadaklan bilog na pusong oyon sa saboot na ini kan dating si Tugang na Franz? Iyo nanggad, sinda nagpapasalamat na marhay sa huminiwas na mga aktibidad kan maimbod na oripon.
Mga Sakop kan Kahadean
14, 15. (a) Ano an iinilustrar ni Jesus sa parabola kan mga talento (Mateo 25:14-30)? (b) Tamang-tama, ano an suminunod sa Mateo kapitulo 25?
14 Sa Mateo kapitulo 25, an ilustrasyon ni Jesus dapit sa mga karnero asin kanding ilinaladawan an dakulang pagtipon na ini sa daganon na mga sakop kan Kahadean nin Dios. Sa parabolang sinusundan kaiyan, an manongod sa mga talento, iinilustrar ni Jesus na an linahidan na mga disipulo na naglalaom na maghade kaiba nia sa saiyang langitnon na Kahadean kaipuhan na magtrabaho tanganing padakolon an saiyang mga rogaring digdi sa daga. Kaya tamang-tama na sa minasunod na parabola, ilinaladawan ni Jesus an hinahagad sa mga boot na magin sakop kan saiyang langitnon na Kahadean.
15 Mangnoha an komento nia sa Mateo 25:31-33: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding. Asin ibubugtak nia an mga karnero sa saiyang too, alagad an mga kanding sa saiyang wala.”
16. Paano tiniripon an mga nasyon asin pinagbulagbulag an mga tawo?
16 Si Jesus nagdatong sa saiyang kamurawayan kan 1914. Sa pag-enot sa paghiro, sia, kaiba an gabos niang anghel, suminalakay asin pinalayas an mga kaiwal niang demonyo sa langit. An suminunod sa saiyang parabola nakatatabang sato na masabotan na an pagtukaw ni Jesus sa mamuraway na trono nagrepresentar nin posisyon nin paghokom sa panahon kan saiyang presensia. An pagtipon sa gabos na nasyon sa atubangan nia nangangahulogan na si Jesus minahiro kun manongod sa mga nasyon bilang saiyang magigin aripompon, sa piguratibong pagtaram. Iyan aripompon na kompuwesto nin mga karnero asin kanding. Mantang tibaad kaipuhan an kabtang nin sarong aldaw na ibulag an mga karnero sa mga kanding sa literal na aripompon, mas halawig an lakop sa dagang pagbulagbulag nin mga tawo na may libreng kabotan. Ini huli ta an pagbubulagbulag basado sa hiro nin kada indibiduwal.
17. Taano ta seryoso ngonyan an kamugtakan para sa gabos na tawo?
17 Sa parabola, ibinugtak kan Pastor-Hade an mga arog-karnero sa saiyang too asin an mga arog-kanding sa saiyang wala. An lado sa too minaluwas na paghokom na may paborableng resulta—buhay na daing katapusan. An lado sa wala nagrerepresentar nin paghokom na bakong paborable—an daing katapusan na kalaglagan. An paghusgar kan Hade sa bagay may seryosong mga resulta.
18. Taano an pagigin dai naheheling kan Hade ta dai nagtatao nin sarahotan sa siisay man?
18 An pagigin dai naheheling kan naghahadeng Aki nin tawo sa panahon kan saiyang presensia, o pa·rou·siʹa, dai nagtatao nin sarahotan sa siisay man. Padakol nang padakol na arog-karnero ngonyan an minaiba sa grupong oripon sa paghuhulit kan maogmang bareta kan Kahadean nin Dios sa bilog na kinaban, na pinasisirang an saindang liwanag. Tunay na nakaabot na sa kaporoporohi kan daga an saindang pagpapatotoo.—Mateo 24:14.
19. Anong mga kuwalidad kan grupong karnero an iinilustrar sa parabola kan mga karnero asin kanding?
19 Taano ta babalosan kan Pastor-Hade an mga nasa grupong karnero nin maogmang ngapit? Huli sa saindang bilog na pusong pagsuportar sa paghuhulit kan Kahadean asin sa kabootan na ipinaheheling ninda sa saiyang linahidan na mga tugang, na ibinibilang ni Jesus na ginibo sa saiya mismo. Kun siring, an makahadeng Aki nin tawo nagsasabi sa sainda: “Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.”—Mateo 25:34; 28:19, 20.
Pagtabang sa Hade
20, 21. Anong ebidensia an itinatao kan mga karnero na sinda naninindogan sa lado kan Kahadean?
20 Mangnoha na kan agdahon kan Hade an mga karnerong ini na manahon an daganon na sakop kan Kahadean nin Dios, sinda napangalas. Sinda naghapot sa saiya: ‘Kagurangnan, kasuarin mi ginibo an gabos na ini sa saimo?’ Sia nagsimbag: “Sa katotoohan sinasabi ko sa saindo, Huli ta ginibo nindo iyan sa saro sa pinakasadangoton kan sakong mga tugang, ginibo nindo iyan sa sako.” (Mateo 25:40) Kan si Jesus magpaheling ki Maria Magdalena kan aldaw na sia binuhay liwat, sia nagtaram dapit sa saiyang espirituwal na mga tugang kan sia magsabi ki Maria Magdalena: “Paduman ka sa sakong mga tugang.” (Juan 20:17) Sa panahon kan saiyang dai naheheling na presensia, si Jesus igwa na sana nin kadikit na natatada sa saiyang 144,000 na espirituwal na tugang na buhay pa digdi sa daga.
21 Mantang si Jesus dai naheheling duman sa kalangitan, sa bako na sanang direktang paagi na ginigibo nin mga tawong arog-karnero an mamomoton na mga bagay na ini sa saiya. Sia naheheling sana ninda sa saiyang trono paagi sa saindang mga mata nin pagtubod. Inaapresyar ni Jesus an gabos nindang paghihingoa na tabangan an saiyang espirituwal na mga tugang, na magigin saiyang langitnon na kairibang paramana. An ginigibo sa saiyang mga tugang ibinibilang nia na ginibo mismo sa saiya. An mga arog-karnero tuyong naggigibo nin karahayan sa mga tugang ni Cristo ta sinda minimidbid nindang siring. Inaapresyar ninda na an espirituwal na mga tugang ni Jesus iyo an mga embahador kan Kahadean ni Jehova, asin boot nindang tumao nin espisipikong ebidensia na sinda naninindogan kaiba kan mga ini sa lado kan Kahadean na iyan.
22. Paano babalosan an grupong karnero? (Ikomparar an Kapahayagan 7:14-17.)
22 Patienot na natanaw ni Jehova na an grupong mga arog-karnerong ini malataw sa panahon kan presensia kan saiyang Aki, asin igwa sia nin itinatagama sa sainda na makangangalas na balos! An dakulang kadaklan magmamana kan mga bendisyon nin katoninongan digdi sa daga sa panahon kan maogmang Milenyal na Paghade kan Hade ni Jehova, si Jesu-Cristo.
23. Sa anong mga paagi na an mga karnero may pakaaram na tinatabangan an mga tugang kan Hade?
23 Kun kinokonsiderar niato an mga hula sa Biblia na minaaplikar sa panahon kan presensia ni Cristo, kaiba an parabola ni Jesus dapit sa mga karnero asin kanding, ano an naheheling niato? Ini: Bakong daing pakaaram asin nagkanorongod sanang paggibo nin karahayan sa saro sa espirituwal na mga tugang kan Hade an minagibo sa saro na karnero na may matanos na kamugtakan sa atubangan nin Dios asin kan saiyang Hade. An mga kabilang sa grupong karnero nakaaaram kan saindang ginigibo, minsan dai ninda naheheling an nagsasakop nang Hade paagi sa saindang literal na mga mata. Sinda naghihingoang tabangan an mga tugang kan Hade bako sanang sa materyal na paagi kundi pati sa espirituwal na paagi. Paano? Paagi sa pagtabang sa sainda sa paghuhulit kan maogmang bareta kan Kahadean nin Dios asin sa pangangadal sa Biblia sa paggibo nin mga disipulo para ki Cristo. Kaya ngonyan igwa nin labing apat na milyon na nagdadara nin liwanag na parabalangibog kan Kahadean nin Dios.
Pinahiwas na mga Aktibidad
24. Huli sa anong mamomoton na mga gibo na an grupong oripon nagin an pinakamaogmang banwaan digdi sa daga ngonyan?
24 Sarosaroon niato an nagkapira sa dakol na marahay na gibo kan grupong maimbod na oripon. Enot, an grupong oripon pinaniwalaan kan gabos na rogaring kan Kagurangnan—an intereses kan saiyang Kahadean digdi sa daga—asin an mga rogaring na ini padagos na nagdadakol. Ikaduwa, an grupong iyan pinakakakan nin espirituwal na kakanon bako sanang an linahidan na mga domestiko kundi pati an padakol nang padakol na dakulang kadaklan nin ibang karnero. Ikatolo, an grupong oripon nangengenot sa pagpalakop kan liwanag kan Kahadean. Ikaapat, an pinakadakulang pagpahiwas kaiyan nin mga aktibidad nasa pagtipon kan dakulang kadaklan nin ibang karnero, na ilinalaog sinda sa espirituwal na templo ni Jehova. Ikalima, an grupong oripon, na bilog na pusong suportado kan mga arog-karnero, nagtatagama nin pinahiwas na mga pasilidad para sa mga sanga sa bilog na daga, saka sa opisina prinsipal sa Estados Unidos. Huli sa mamomoton na mga gibong iyan an grupong oripon nagin an pinakamaogmang banwaan digdi sa daga ngonyan, asin pinaogma man ninda an minilyon pang ibang tawo. Ini gabos nagpapasalamat ki Jehova Dios asin ki Jesu-Cristo, na naggiya sa pinahiwas na mga aktibidad kan madonong na oripon!
25. Paano padagos na makasusuportar sa grupong oripon an mga karnero, na may tinatanaw na anong paglaom?
25 An grupong oripon naghihigos ngonyan nin orog kisa kasuarin man sa mga trabaho kaiyan na itinao nin Dios. Haros ubos na an natatadang panahon bago an pagputok kan “dakulang kahorasaan”! (Mateo 24:21) Mahalagang marhay na an mga karnero nin Dios na ini magdanay sa toong lado na may pabor kan saiyang Pastor-Hade! Kun siring, magpadagos logod an gabos na mahigos na sumuportar sa maimbod asin madonong na oripon. Sa paggibo sana kaini na sa haranihon nang panahon an gabos na arog-karnero makadadangog kan maogmang mga tataramon na: “Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.”
Masisimbag daw Nindo?
◻ Anong enot na paghohokom an suminunod sa pagpatukaw sa trono kan Hade?
◻ Paano nagkaigwa nin kaotoban sa modernong aldaw an Mateo 24:45-47?
◻ Kun dapit sa pinahiwas na mga aktibidad, ano an pinasasalamatan na marhay kan grupong oripon asin kan dakulang kadaklan?
◻ Paano naootob an Mateo 25:34-40 sa panahon kan pa·rou·siʹa?
[Ritrato sa pahina 16]
Ipinaniwala kan kagurangnan an gabos niang rogaring sa maimbod na oripon
[Ritrato sa pahina 18]
Si Jesus tuminukaw sa saiyang mamuraway na trono sa paghokom sa katawohan