Paano Niato Maninigong Trataron an Iba?

“Kun ano an boot nindong gibohon sa saindo nin mga tawo, iyo man an gibohon nindo sa sainda.”​—LUC. 6:31.

1, 2. (a) Ano an Sermon sa Bukid? (b) Ano an pag-oolayan niato sa artikulong ini asin sa kasunod?

TOTOO nanggad na si Jesu-Cristo an Dakulang Paratokdo. Kan an saiyang mga kaiwal sa relihion magsugo nin kalalakihan tanganing arestaron sia, an mga opisyal nagbalik na dai sia dara asin nagsabi: “Mayo pa nin ibang tawo na nagtaram nin arog kaini.” (Juan 7:32, 45, 46) An saro sa marahayon na mga diskurso ni Jesus iyo an Sermon sa Bukid. Nakarekord iyan sa kapitulo 5 sagkod 7 kan Ebanghelyo ni Mateo, asin an kapareho kaiyan na impormasyon isinaysay man sa Lucas 6:20-49.a

² Tibaad an pinakabantog na sinabi sa sermon na iyan iyo an inaapod sa parate na Bulawan na Reglamento sa Paggawe. Iyan may koneksion sa pagtratar niato sa iba. “Kun ano an boot nindong gibohon sa saindo nin mga tawo, iyo man an gibohon nindo sa sainda,” an sabi ni Jesus. (Luc. 6:31) Asin marahayon nanggad an mga ginibo nia para sa mga tawo! Pinaomayan ni Jesus an mga may helang asin binuhay pa ngani nia an mga gadan. Minsan siring, nangorognang maogma an mga tawo kun inaako ninda an maogmang bareta na itinotokdo nia sa sainda. (Basahon an Lucas 7:20-22.) Bilang Mga Saksi ni Jehova, naoogma kitang marhay na magpartisipar sa kaparehong aktibidad na paghuhulit kan Kahadean. (Mat. 24:14; 28:19, 20) Sa artikulong ini asin sa kasunod, pag-oolayan niato an mga tataramon ni Jesus manongod sa gibohon na ini saka an iba pang punto sa Sermon sa Bukid na konektado sa kun paano niato maninigong trataron an iba.

Magin Mahoyo

 3. Paano nindo tatawan nin kahulogan an kahoyoan nin boot?

³ Si Jesus nagsabi: “Maogma an mga mahoyo, huli ta mamanahon ninda an daga.” (Mat. 5:5) Sa Kasuratan, an kahoyoan nin boot mayong koneksion sa kaluyahan. Iyan kabootan na ipinapaheling niato bilang paghimate sa mga kahagadan nin Dios. An ugaleng ini maheheling sa paggawe niato sa satong kapwa. Halimbawa, kita ‘dai nagbabalos nin maraot sa maraot sa kiisay man.’​—Roma 12:17-19.

 4. Taano ta maogma an mga mahoyo?

⁴ An mga mahoyo maogma huli ta “mamanahon ninda an daga.” Si Jesus, na “mahoyo asin may kababaan an puso,” iyo an ‘ninombrahan na paramana kan gabos na bagay’ asin kun siring sia an pangenot na Paramana kan daga. (Mat. 11:29; Heb. 1:2; Sal. 2:8) Ihinula na an Mesiyanikong “aki nin tawo” magkakaigwa nin kairibang namamahala sa langitnon na Kahadean. (Dan. 7:13, 14, 21, 22, 27) Bilang “kaibang mga paramana ni Cristo,” an mahoyong 144,000 na linahidan magmamana man kan daga arog ni Jesus. (Roma 8:16, 17; Kap. 14:1) An iba pang mahoyo bebendisyonan nin buhay na daing katapusan sa daganon na rona kan Kahadean.​—Sal. 37:11.

 5. Ano an epekto sa sato kun nagpapaheling kita nin arog-Cristong kahoyoan?

⁵ Kun kita maisog, posibleng madepisilan an iba na magpasensia sa sato asin rarayoan ninda kita. Minsan siring, kun kita nagpapaheling nin arog-Cristong kahoyoan, naoogma sa sato an mga miembro kan kongregasyon asin napapakosog niato sinda sa espirituwal. An kahoyoan kabtang kan mga bunga na pinapatalubo sa sato kan puersa aktiba nin Dios kun kita ‘nabubuhay asin naglalakaw segun sa espiritu.’ (Basahon an Galacia 5:22-25.) Segurado na gusto niatong mapabilang sa mga mahoyo na ginigiyahan kan banal na espiritu ni Jehova!

Maogma Nanggad an mga Maheherakon!

 6. Ano an lataw na mga kualidad kan “mga maheherakon”?

⁶ Sa Sermon ni Jesus sa Bukid, sia nagsabi man: “Maogma an mga maheherakon, huli ta sinda papahelingan nin pagkaherak.” (Mat. 5:7) “An mga maheherakon” igwa nin mamomoton na pagmalasakit asin nagpapaheling nin maboot na konsiderasyon, pagkaherak pa ngani, sa mga daing sukat. Milagrosong pinaginhawa ni Jesus an mga nagsasakit huli ta sia “naherak,” o “napahiro nin pagkaherak.” (Mat. 14:14; 20:34) Kun siring, an pagkaherak asin konsiderasyon maninigong magpahiro sa sato na magin maheherakon.​—Sant. 2:13.

 7. An pagkaherak nagpahiro ki Jesus na gibohon an ano?

⁷ Kan si Jesus manuparan nin sarong kadaklan kan sia mapahingalo kutana, “sia napahiro nin pagkaherak sa sainda, ta garo sinda mga karnero na mayo nin pastor.” Bilang resulta, “sia nagpoon na magtokdo sa sainda nin dakol na bagay.” (Mar. 6:34) Naggagayagaya nanggad kita mantang ihinuhulit man niato sa iba an mensahe kan Kahadean asin sinasabi niato sa sainda an manongod sa dakulang pagkaherak nin Dios!

 8. Taano ta maogma an mga maheherakon?

⁸ An mga maheherakon maogma huli ta sinda ‘pinapahelingan nin pagkaherak.’ Kun tinatratar niato an mga tawo sa maheherakon na paagi, sa parate siring man kaiyan an saindang gigibohon sa sato. (Luc. 6:38) Dugang pa, si Jesus nagsabi: “Kun pinapatawad nindo an mga tawo sa saindang mga kasalan, papatawadon man kamo kan saindong langitnon na Ama.” (Mat. 6:14) An mga maheherakon sana an makakaeksperyensia kan kaogmahan na bunga nin kapatawadan nin mga kasalan asin pag-oyon nin Dios.

Kun Taano ta Maogma “an mga Mapagpatoninong”

 9. Paano kita mahiro kun kita mapagpatoninong?

⁹ Sa pagsambit sa saro pang dahelan na magin maogma, si Jesus nagsabi: “Maogma an mga mapagpatoninong, huli ta sinda aapodon na ‘mga aki nin Dios.’” (Mat. 5:9) An termino sa Griego na trinadusir digdi na “mapagpatoninong” sa literal nangangahulogan na “mga parapatoninong.” Kun kita mga parapatoninong, dai kita makonsinte o mapartisipar sa ano man na puedeng ‘magpasuruhay sa mga magkamiridbidan,’ siring baga nin pagpakaraot. (Tal. 16:28) Paagi sa tataramon asin gibo, magmamaigot kitang makipagkatoninongan sa mga tawo sa laog asin sa luwas kan Kristianong kongregasyon. (Heb. 12:14) Nangorognang gigibohon niato an satong pinakamakakaya tanganing magkaigwa kita nin matoninong na relasyon ki Jehova Dios.​—Basahon an 1 Pedro 3:10-12.

10. Taano ta maogma an “mga mapagpatoninong”?

¹⁰ Sinabi ni Jesus na maogma an “mga mapagpatoninong,” “huli ta sinda aapodon na ‘mga aki nin Dios.’” Huli sa pagtubod kan linahidan na mga Kristiano ki Jesus bilang an Mesiyas, sinda nag-aako nin “autoridad na magin mga aki nin Dios.” (Juan 1:12; 1 Ped. 2:24) Kumusta man an mapagpatoninong na “ibang mga karnero” ni Jesus? Sia an magigin saindang “Amang Daing Sagkod” durante kan saiyang Sangribong Taon na Paghade kaiba an saiyang langitnon na mga kapwa paramana. (Juan 10:14, 16; Isa. 9:6; Kap. 20:6) Sa katapusan kan saiyang Milenyal na Pamamahala, an siring na mga parapatoninong magigin daganon na mga aki nin Dios sa pinakalubos na paagi.—1 Cor. 15:27, 28.

11. Paano niato tatrataron an iba kun kita nagpapagiya sa “kadonongan hale sa itaas”?

¹¹ Tanganing magkaigwa kita nin dayupot na relasyon ki Jehova, “an Dios nin katoninongan,” dapat niatong arogon an saiyang mga kualidad, kaiba na an pagigin mapagpatoninong. (Fil. 4:9) Kun kita nagpapagiya sa “kadonongan hale sa itaas,” tatrataron niato an iba sa matoninong na paagi. (Sant. 3:17) Iyo, kita magigin maogmang mga parapatoninong.

“Pasiranga an Saindong Liwanag”

12. (a) Ano an sinabi ni Jesus manongod sa espirituwal na liwanag? (b) Paano niato mapapasirang an satong liwanag?

¹² Tinatratar niato an mga tawo sa pinakamarahay na paaging posible kun tinatabangan niato sinda na mag-ako nin espirituwal na liwanag gikan sa Dios. (Sal. 43:3) Sinabihan ni Jesus an saiyang mga disipulo na sinda an “liwanag kan kinaban” asin sinadol nia sinda na pasirangon an saindang liwanag tanganing maheling nin mga tawo an saindang “marahay na mga gibo” sa iba. Ini magbubunga nin espirituwal na kaliwanagan “sa atubangan nin mga tawo,” o para sa kapakinabangan nin katawohan. (Basahon an Mateo 5:14-16.) Ngonyan, pinapasirang niato an satong liwanag paagi sa paggibo nin marahay sa satong kapwa asin pagpartisipar sa paghuhulit kan maogmang bareta “sa bilog na kinaban,” an boot sabihon, “sa gabos na nasyon.” (Mat. 26:13; Mar. 13:10) Sarong pribilehio nanggad niato ini!

13. Kita naririparo huli sa ano?

¹³ “An siudad dai matatago kun namumugtak sa itaas nin bukid,” an sabi ni Jesus. An arin man na siudad na nasa bukid madaling maheling. Kaagid kaiyan, kita naririparo huli sa satong marahay na mga gibo bilang mga parabalangibog kan Kahadean asin huli sa mga kualidad na arog baga nin pagigin tama sana patin kabinian.​—Tito 2:1-14.

14. (a) Paano nindo ilaladawan an mga ilawan kan enot na siglo? (b) Sa anong paagi na dai niato itinatago an espirituwal na liwanag sa irarom nin “basket na takadan”?

¹⁴ Si Jesus nagtaram dapit sa pagsolo nin ilawan asin pagbugtak kaiyan, bakong sa irarom nin basket, kundi sa ibabaw nin bugtakan nin ilawan tanganing maliwanagan kaiyan an gabos na nasa harong. An ordinaryong ilawan kan enot na siglo sarong lalagan na gibo sa dalipay na may mitsang nagsusupsup nin likido (sa parate lana nin oliba) tanganing maglaad iyan. Huling sa parate ilinalaag an ilawan sa sarong bugtakan na kahoy o metal, “naliliwanagan kaiyan an gabos na nasa harong.” An mga tawo dai masolo nin ilawan asin ibubugtak iyan sa irarom nin “basket na takadan.” Habo ni Jesus na itago kan saiyang mga disipulo an saindang espirituwal na liwanag sa irarom nin piguratibong basket na takadan. Kaya dapat niatong pasirangon an satong liwanag, na nungkang tinotogotan an pagtumang o persekusyon na magin dahelan na itago o sadirihon niato an katotoohan sa Kasuratan.

15. May anong epekto sa nagkapirang tawo an satong “marahay na mga gibo”?

¹⁵ Pagkasambit ni Jesus kan nagliliwanag na ilawan, sinabihan nia an saiyang mga disipulo: “Kaagid kaiyan pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” Huli sa satong “marahay na mga gibo,” an nagkapira ‘nagpapamuraway’ sa Dios paagi sa pagigin mga lingkod nia. Iyan sarong dahelan nanggad tanganing kita padagos na ‘magliwanag siring sa mga ilaw sa kinaban’!​—Fil. 2:15.

16. Ano an kahagadan sa sato bilang “liwanag kan kinaban”?

¹⁶ Bilang “liwanag kan kinaban,” kahagadan sa sato na magpartisipar sa paghuhulit kan Kahadean asin paggibo nin mga disipulo. Alagad kahagadan man sa sato an saro pang bagay. “Padagos kamong maglakaw bilang mga aki nin liwanag,” an isinurat ni apostol Pablo, “huli ta an bunga kan liwanag gabos na klase nin karahayan asin katanosan patin katotoohan.” (Efe. 5:8, 9) Kaipuhan kitang magin nagliliwanag na mga halimbawa nin diosnon na paggawe. Iyo, dapat niatong himateon an hatol ni apostol Pedro: “Papagdanayon na marahay an saindong gawe-gawe sa tahaw nin mga nasyon, tanganing, sa bagay na ipinagtataram ninda kontra sa saindo na garo baga kamo naggigibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.” (1 Ped. 2:12) Alagad ano an maninigong gibohon kun naraot an relasyon nin mga magkapagtubod?

‘Makipagkatoninongan Ka sa Saimong Tugang’

17-19. (a) Ano an “regalo” na sinambit sa Mateo 5:23, 24? (b) Gurano kahalaga an pakipag-ulian sa sarong tugang, asin paano ini ipinaheling ni Jesus?

¹⁷ Sa Sermon ni Jesus sa Bukid, pinatanidan nia an saiyang mga disipulo tumang sa pagtanom sa boot nin grabeng kaanggotan asin pagduhagi sa sarong tugang. Imbes, dapat na tolos sindang magmaigot na makipagkatoninongan sa sarong tugang na nakolgan an boot. (Basahon an Mateo 5:21-25.) Maingat na mangnohon an hatol ni Jesus. Kun dinadara mo an saimong regalo sa altar asin dian magirumdoman mo na an saimong tugang igwa nin tumang sa saimo, ano an dapat mong gibohon? Dapat mong bayaan sa atubangan kan altar an saimong regalo dangan ika maduman sa saimong tugang tanganing makipagkatoninongan. Pagkatapos na gibohon iyan, puede kang bumalik tanganing idolot an saimong regalo.

¹⁸ An “regalo” sa parate sarong dolot na atang na tibaad dinadara nin saro sa templo ni Jehova. An mga atang na hayop mahalagang marhay, huli ta iyan ipinagboot nin Dios bilang kabtang kan pagsamba nin Israel segun sa Ley ni Moises. Alagad kun magirumdoman mo na an saimong tugang igwa nin tumang sa saimo, an paghusay sa problemang iyan mas mahalaga pa ngani kisa sa pagdolot kan saimong regalo. ‘Bayaan mo an saimong regalo sa atubangan kan altar, asin maghale ka,’ an sabi ni Jesus. “Makipagkatoninongan ka nguna sa saimong tugang, dangan, kun nakabalik ka na, idolot mo na an saimong regalo.” An pakipag-ulian sa sarong tugang mas mahalaga kisa sa paggibo sa sarong obligasyon na kahagadan kan Ley.

¹⁹ An sinabi ni Jesus dai nia ipinanongod sana sa partikular na mga dolot asin espesipikong mga paglapas. Kun siring, dapat na ioktaba nguna an ano man na dolot kun magirumdoman nin saro na an saiyang tugang igwa nin tumang sa saiya. Kun an dolot sarong buhay na hayop, iyan dapat na bayaan “sa atubangan kan altar” nin dolot na tinotong na nasa patyo kan mga saserdote sa templo. Kun maresolberan na an problema, mabalik an nakakolog nin boot asin gigibohon nia an pagdolot.

20. Taano ta maninigong makipaghusay tolos kita kun anggot kita sa sarong tugang?

²⁰ Sa punto de vista nin Dios, an relasyon niato sa satong mga tugang mahalagang kabtang nin tunay na pagsamba. An mga atang na hayop daing saysay ki Jehova kun an mga nagdodolot kaiyan bakong tama an pagtratar sa saindang kapwa. (Miq. 6:6-8) Huli kaini, sinadol ni Jesus an saiyang mga disipulo na ‘makipaghusay tolos.’ (Mat. 5:25) Kaagid kaiyan, si Pablo nagsurat: “Maanggot kamo nin grabe, alagad ta dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.” (Efe. 4:26, 27) Kun kita talagang naanggot na may makatanosan na dahelan, maninigo kitang makipaghusay tolos tanganing dai kita magdanay na anggot asin sa siring dai niato tinotogotan an Diablo na aprobetsaran kita.​—Luc. 17:3, 4.

Pirmeng Trataron an Iba na May Paggalang

21, 22. (a) Paano niato ikakaaplikar an hatol ni Jesus na pinag-olayan pa sana niato? (b) Ano an pag-oolayan niato sa sunod na artikulo?

²¹ An pagrepaso niato sa nagkapirang sinabi ni Jesus sa saiyang Sermon sa Bukid maninigong makatabang sa sato na trataron an iba na may kabootan asin paggalang. Minsan ngani kita gabos bakong sangkap, puede niatong ikaaplikar an hatol ni Jesus huli ta dai nia inaasahan sa sato an dai niato kayang gibohon, asin dai man iyan inaasahan sa sato kan satong langitnon na Ama. Paagi sa pamimibi, sinserong paghihingoa, asin bendisyon ni Jehova Dios, puede kitang magin mahoyo, maheherakon, asin mapagpatoninong. Ikakapabanaag niato an espirituwal na liwanag para sa kamurawayan ni Jehova. Dugang pa, puede kitang makipagkatoninongan sa satong tugang kun kinakaipuhan iyan.

²² Kaiba sa pagsamba na inaako ni Jehova an tamang pagtratar sa satong kapwa. (Mar. 12:31) Sa sunod na artikulo, pag-oolayan niato an iba pang sinabi sa Sermon sa Bukid na maninigong makatabang sa sato na padagos na gumibo nin marahay sa iba. Minsan siring, pagkatapos na horophoropon an nasambitan na mga punto hale sa daing kaparehong diskurso ni Jesus, puede niatong hapoton an satong sadiri, ‘Gurano karahay an pagtratar ko sa iba?’

[Nota sa Ibaba]

Ano an Isisimbag Nindo?

• Ano an boot sabihon nin pagigin mahoyo?

• Taano ta maogma an “mga maheherakon”?

• Paano niato mapapasirang an satong liwanag?

• Taano ta maninigo tolos kitang ‘makipagkatoninongan sa satong tugang’?

[Ritrato sa pahina 4]

An pagpahayag kan mensahe kan Kahadean sarong mahalagang marhay na paagi nin pagpasirang kan satong liwanag

[Ritrato sa pahina 5]

An mga Kristiano dapat na magin mga halimbawa nin diosnon na paggawe

[Ritrato sa pahina 6]

Gibohon an saimong pinakamakakaya na makipagkatoninongan sa saimong tugang