Binautismohan sa Ngaran Niisay Asin nin Ano?

“Kun siring, paduman kamo asin gumibo kamo nin mga disipulo . . . , na bautismohan nindo sinda sa ngaran kan Ama asin kan Aki patin kan banal na espiritu.”—MAT. 28:19.

1, 2. (a) Ano an nangyari sa Jerusalem kan Pentecostes 33 C.E.? (b) Taano an dakol sa mga tawo ta napahirong magpabautismo?

AN Jerusalem kaidto pano nin tawo hale sa dakol na lugar. Kan aldaw nin Pentecostes 33 C.E., sarong mahalagang kapiestahan an sineselebrar asin dakol na bisita an nakikikabtang dian. Alagad may pambihirang nangyari, asin pagkatapos kaiyan si apostol Pedro nagtao nin nakakapukaw sa boot na diskurso na nagkaigwa nin makangangalas na epekto. Mga 3,000 na Judio asin proselito an napahiro kan saiyang mga tataramon, nagsolsol, asin nagpabautismo sa tubig. Sa siring, nakadagdag sinda sa bagong maestablisar na Kristianong kongregasyon. (Gibo 2:41) An pagbautismo sa kadakol na tawo sa mga tiponan nin tubig sa palibot kan Jerusalem seguradong nagresulta sa darudakulang pagkaribok!

² Taano ta kadakol an nagpabautismo? Amay kan aldaw na iyan, “nagdatong hale sa langit an ribok na siring sa hagobohob nin makosog na doros.” Sa itaas na kuarto nin sarong harong, mga 120 disipulo ni Jesus an napano nin banal na espiritu. Pagkatapos kaiyan, may makidios na mga lalaki asin babae na nagtiripon asin nagngaralas na madangog an mga disipulo na ‘nagtataram nin manlaenlaen na tataramon.’ Kan madangog nin dakol an sinabi ni Pedro, kaiba na an saiyang deretso sa puntong komento manongod sa kagadanan ni Jesus, sinda “nagkarulugad sa puso.” Ano an maninigo nindang gibohon? Si Pedro nagsimbag: “Magsorolsol kamo, asin an lambang saro sa saindo magpabautismo sa ngaran ni Jesu-Cristo . . . , asin aakoon nindo an daing bayad na balaog kan banal na espiritu.”—Gibo 2:1-4, 36-38.

 3. Kan aldaw nin Pentecostes, ano an kinaipuhan na gibohon nin nagsosolsol na mga Judio asin proselito?

³ Isip-isipa an relihiosong kamugtakan kan mga Judio asin proselitong idto na nakadangog ki Pedro. Inako na ninda si Jehova bilang saindang Dios. Asin nanodan ninda sa Hebreong Kasuratan an manongod sa banal na espiritu, an aktibong puersa nin Dios na ginamit durante kan paglalang asin pagkatapos kaiyan. (Gen. 1:2; Hok. 14:5, 6; 1 Sam. 10:6; Sal. 33:6) Alagad orog pa dian an kaipuhan ninda. Mahalagang marhay na masabotan asin akoon ninda an paagi nin Dios sa pagliligtas—an Mesiyas, si Jesus. Huli kaini, itinampok ni Pedro na kaipuhan sindang ‘mabautismohan sa ngaran ni Jesu-Cristo.’ Nagkapirang aldaw bago kaiyan, si Pedro asin an iba pa pinagbotan kan binuhay liwat na si Jesus na bautismohan an mga tawo “sa ngaran kan Ama asin kan Aki patin kan banal na espiritu.” (Mat. 28:19, 20) May hararom na kahulogan iyan kan enot na siglo, asin sagkod ngonyan. Ano iyan?

Sa Ngaran kan Ama

 4. Kun dapit sa mga tawong igwa nin relasyon ki Jehova, anong pagbabago an nangyari?

⁴ Siring kan nasambitan, an mga naghimate sa diskurso ni Pedro nagsasamba na ki Jehova asin dati nang may relasyon sa saiya. Pinagmamaigotan na nindang sunodon an saiyang Ley, na iyo an dahelan kaya an mga taga ibang lugar nagduman sa Jerusalem. (Gibo 2:5-11) Minsan siring, an Dios may ginibo pa sanang dakulang pagbabago sa pagtratar nia sa mga tawo. Isinikwal nia an mga Judio bilang saiyang espesyal na nasyon; an pag-otob ninda kan Ley bako na an paagi tanganing kamtan an saiyang pag-oyon. (Mat. 21:43; Col. 2:14) Kun an mga naghihinanyog na iyan gusto nin nagpapadagos na relasyon ki Jehova, may iba pa sindang kaipuhan.

5, 6. Ano an ginibo nin dakol na Judio asin proselito kan enot na siglo tanganing magkaigwa nin relasyon sa Dios?

⁵ Siertong dai kaipuhan na rumayo sinda ki Jehova, an saindang Paratao nin Buhay. (Gibo 4:24) Kan panahon na idto orog kisa kasuarin man, masasabotan na kan mga naghihimate sa paliwanag ni Pedro na si Jehova sarong maboot na Ama. Isinugo nia an Mesiyas tanganing iligtas sinda asin andam siang magpatawad dawa sa mga tawong puede kaidtong sabihan ni Pedro: “Dapat maaraman nanggad kan bilog na kamag-anakan nin Israel na ginibo sia nin Dios na magin Kagurangnan sagkod Cristo, an Jesus na ini na saindong ipinako.” An totoo, an mga nag-aaplikar kan mga tataramon ni Pedro orog pa nganing nagkaigwa nin dahelan kan panahon na idto na pasalamatan an ginibo kan Ama para sa gabos na gustong magkaigwa nin relasyon sa Dios!—Basahon an Gibo 2:30-36.

⁶ Tunay nanggad, masasabotan na kan mga Judio asin proselitong idto na kalabot sa pagkaigwa nin relasyon ki Jehova an pagmidbid sa saiya bilang an Paratao nin kaligtasan paagi ki Jesus. Kun siring, masasabotan nindo kun taano ta nagsolsol sinda sa saindang mga kasalan, kaiba na an pagkaigwa nin kabtang sa paggadan ki Jesus, aram man ninda o dai. Asin masasabotan man na durante kan nagsurunod na aldaw “sinda nagpadagos sa pagdusay kan saindang sadiri sa katokdoan kan mga apostol.” (Gibo 2:42) Puede sinda asin gugustohon ninda na “dumolok na may katalingkasan sa pagtaram sa trono nin dai na kutana maninigong kabootan.”—Heb. 4:16.

 7. Sa anong paagi na an dakol nabago an pagmansay dapit sa Dios asin nabautismohan sa ngaran kan Ama?

⁷ Ngonyan, an minilyon na tawo na manlaenlaen an pinaghalean nakanood sa Biblia kan katotoohan manongod ki Jehova. (Isa. 2:2, 3) An nagkapira dating ateista o deista,a alagad nakombensir sinda na igwa nin Kaglalang asin na puede sindang magkaigwa nin makahulogan na relasyon sa saiya. An iba nagsamba sa tolo-sa-sarong dios o sa manlaenlaen na idolo. Nanodan ninda na si Jehova sana an makakamhan sa gabos na Dios, asin ngonyan inaapod na ninda sia sa saiyang personal na ngaran. Kaoyon iyan kan katunayan na sinabi ni Jesus na an saiyang mga disipulo maninigong bautismohan sa ngaran kan Ama.

 8. An mga mayo nin ideya sa kasalan na minana ki Adan kaipuhan na masabotan an ano manongod sa Ama?

⁸ Nanodan man ninda na nagmana sinda nin kasalan ki Adan. (Roma 5:12) Ini bagong bagay na kinaipuhan nindang akoon bilang totoo. An siring na mga tawo ikakaagid sa saro na may helang na dai nakakaaram na may helang sia. Tibaad may nagkapira siang sintomas, arog baga nin paminsanminsan na pagkolog. Pero, mantang mayo nin diagnosis dapit sa espesipikong helang nia, tibaad isipon nia na marahay man an salud nia. Minsan siring, bakong arog kaiyan an ipinapaheling kan katunayan. (Ikomparar an 1 Corinto 4:4.) Paano kun igwa na nin tamang diagnosis dapit sa helang nia? Bako daw na madonong na maghanap asin mag-ako sia nin midbid, probado, asin epektibong pagbolong? Kaagid kaiyan, kan manodan nin dakol an katotoohan manongod sa minanang kasalan, inako ninda an “diagnosis” kan Biblia asin nasabotan ninda na itinatao nin Dios an “bolong.” Iyo, an gabos na siblag sa Ama kaipuhan na dumolok sa Saro na “makakabolong” sa sainda.—Efe. 4:17-19.

 9. Ano an ginibo ni Jehova tanganing magin posible na magkaigwa nin relasyon sa saiya?

⁹ Kun ika nagdusay na kan saimong buhay ki Jehova Dios asin bautisado nang Kristiano, aram mo kun gurano nanggad karahay na magkaigwa nin relasyon sa saiya. Mapapahalagahan mo na ngonyan kun gurano kamamomoton an saimong Ama, si Jehova. (Basahon an Roma 5:8.) Minsan ngani si Adan asin Eva nagkasala sa saiya, an Dios an naggibo nin paagi tanganing an mga naggikan sa sainda—kaiba na kita—magkaigwa nin marahay na relasyon sa saiya. Sa paggibo kaiyan, kinaipuhan nin Dios na tioson an kolog na maheling an saiyang namomotan na Aki na magsakit asin magadan. Bako daw na an pakaaram kaini nakakatabang sa sato na midbidon an autoridad nin Dios asin kuyogon an saiyang mga pagboot huli sa pagkamoot? Kun dai mo pa nagigibo iyan, may mga dahelan ka na magdusay kan saimong sadiri sa Dios asin magpabautismo.

Sa Ngaran kan Aki

10, 11. (a) Gurano kadakula kan saindong utang na boot ki Jesus? (b) Ano an namamatean nindo sa pagkagadan ni Jesus bilang pantubos?

¹⁰ Pero, isip-isipa giraray an sinabi ni Pedro sa mga tawong idto. Idinoon nia an pag-ako ki Jesus, na direktang konektado sa pagigin binautismohan “sa ngaran . . . kan Aki.” Taano ta mahalagang marhay iyan kaidto, asin taano ta mahalagang marhay iyan ngonyan? Bueno, an pag-ako ki Jesus asin pagpabautismo sa ngaran nia nangangahulogan nin pag-ako sa saiyang papel sa pagkaigwa niato nin relasyon sa Kaglalang. Kinaipuhan na ibitay si Jesus sa hariging pasakitan tanganing haleon sa mga Judio an sumpa kan Ley; minsan siring, an saiyang kagadanan nagtao nin orog pang pakinabang. (Gal. 3:13) Itinao nia an atang na pantubos na kaipuhan kan bilog na katawohan. (Efe. 2:15, 16; Col. 1:20; 1 Juan 2:1, 2) Sa katuyohan na iyan, tinagalan ni Jesus an inhustisya, maraot na mga tataramon, grabeng pagpasakit, asin sa katapustapusi an kagadanan. Gurano kadakula kan saindong pagpapahalaga sa saiyang atang? Imahinara na ika sarong 12 anyos na aking lalaki na nakasakay sa Titanic, an barko na buminangga sa dakulaon na tipak nin yelo asin luminubog kan 1912. Prinobaran mong lumukso sa sarong lantsa-salbabida, alagad pano na iyan. Dangan may sarong lalaki sa lantsa-salbabida na hinadokan an saiyang agom, naglukso pabalik sa barko, asin inalsa ka pasiring sa lantsa-salbabida. Ano an mamamatean mo? Sierto nanggad na matanaw ka nin utang na boot sa saiya! Masasabotan mo an namatean nin sarong aki na talagang nakaeksperyensia kaiyan.b Pero, orog pa nanggad an ginibo ni Jesus para sa saimo. Nagadan sia tanganing magkamit ka nin daing katapusan na buhay.

¹¹ Ano an namatean nindo kan manodan nindo an ginibo kan Aki nin Dios para sa saindo? (Basahon an 2 Corinto 5:14, 15.) Posibleng marhay na nakamate kamo nin dakulang utang na boot. Nakatabang iyan na mapahiro kamo na idusay sa Dios an buhay nindo asin na ‘mabuhay bako na para sa saindo man sana, kundi para sa saiya na nagadan para sa saindo.’ An pagigin binautismohan sa ngaran kan Aki nangangahulogan nin pagmidbid sa ginibo ni Jesus para sa saindo asin pag-ako sa saiyang autoridad bilang “an Pangenot na Ahente nin buhay.” (Gibo 3:15; 5:31) Dati, mayo kamo nin relasyon sa Kaglalang, asin talagang mayo kamo nin balidong paglaom. Alagad paagi sa pagtubod sa pinabolos na dugo ni Jesu-Cristo asin pagpabautismo, igwa na kamo ngonyan nin relasyon sa Ama. (Efe. 2:12, 13) “Kamo na dating mga siblag asin mga kaiwal huli ta an saindong isip nasa mga gibong maraot,” an isinurat ni apostol Pablo, ‘ipinakipag-ulian na liwat ngonyan nin Dios paagi sa hawak na laman ni Jesus huli sa saiyang kagadanan, tanganing ikaatubang kamong banal asin daing kaninan.’—Col. 1:21, 22.

12, 13. (a) An pagigin binautismohan sa ngaran kan Aki maninigong magkaigwa nin anong epekto sa reaksion nindo kun may makakolog sa saindong boot? (b) Bilang Kristiano na binautismohan sa ngaran ni Jesus, ano an obligasyon nindo?

¹² Minsan ngani binautismohan kamo sa ngaran kan Aki, aram nanggad nindo an saindo mismong makasalan na mga inklinasyon. An pakaaram na iyan nakakatabang aroaldaw. Halimbawa, kun may makakolog sa saindong boot, ginigirumdom daw nindo na pareho kamong makasalan? Pareho nindo kaipuhan an pagpapatawad nin Dios, asin maninigo na pareho kamong magin mapagpatawad. (Mar. 11:25) Tanganing idoon an pangangaipong ini, nagtao si Jesus nin ilustrasyon: An sarong oripon pinatawad kan saiyang kagurangnan sa utang nia na sampulong ribong talento (60 milyones na denario). Pagkatapos kaiyan, habong patawadon kan oripon na iyan an kapwa nia oripon na may utang sa saiya na 100 na denario. Dangan idinoon ni Jesus an puntong ini: Dai papatawadon ni Jehova an saro na dai nagpapatawad sa saiyang tugang. (Mat. 18:23-35) Iyo, an pagigin binautismohan sa ngaran kan Aki nangangahulogan nin pag-ako sa autoridad ni Jesus asin pagmamaigot na sunodon an saiyang halimbawa saka mga katokdoan, kaiba na an pagigin andam na magpatawad sa iba.—1 Ped. 2:21; 1 Juan 2:6.

¹³ Huling bakong sangkap, dai nindo lubos na maaarog si Jesus. Minsan siring, kaoyon kan saindong bilog na pusong pagdusay sa Dios, gusto nindong maarog si Jesus sagkod sa pinakamakakaya nindo. Kalabot digdi an padagos na paghihingoang mahale an daan na personalidad asin ikasulog an bagong personalidad. (Basahon an Efeso 4:20-24.) Kun iginagalang nindo an sarong katood, posibleng marhay na magmamaigot kamo na makanood sa saiyang halimbawa asin marahay na mga kualidad. Kaagid kaiyan, gusto nindong makanood ki Cristo asin arogon sia.

14. Paano nindo ikakapaheling na minimidbid nindo an autoridad ni Jesus bilang langitnon na Hade?

¹⁴ May saro pang paagi na ikakapaheling nindo na saindong nasasabotan kun ano an kalabot sa pagigin binautismohan sa ngaran kan Aki. ‘Ipinasakop nin Dios an gabos na bagay sa irarom kan mga bitis ni Jesus, asin ginibo nia siang payo kan gabos na bagay sa kongregasyon.’ (Efe. 1:22) Sa siring, kaipuhan nindong igalang an paagi nin pagdirehir ni Jesus sa mga nagdusay ki Jehova. Ginagamit ni Cristo an bakong sangkap na mga tawo sa lokal na kongregasyon, partikularmente an mga lalaking maygurang sa espirituwal, an nombradong kamagurangan. An siring na mga lalaki ninombrahan para “sa pagpakarhay giraray kan mga banal, . . . para sa pagpakosog kan hawak kan Cristo.” (Efe. 4:11, 12) Dawa kun mapasala an bakong sangkap na tawo, kaya ni Jesus bilang Hade kan langitnon na Kahadean na asikasohon iyan segun sa saiyang panahon asin paagi. Naniniwala daw kamo dian?

15. Kun ika dai pa bautisado, anong mga bendisyon an malalaoman mo pagkatapos kan bautismo?

¹⁵ Sa giraray, an nagkapira dai pa nagdusay kan saindang sadiri ki Jehova asin dai pa nagpabautismo. Kun saro ka sa sainda, nasasabotan mo daw basado sa nasambitan sa enotan na an pagmidbid sa Aki iyo an rasonable asin mapag-apresyar na bagay na dapat mong gibohon? Huli sa pagigin binautismohan sa ngaran kan Aki, nakalinya kang mag-ako nin marahayon na mga bendisyon.—Basahon an Juan 10:9-11.

Sa Ngaran kan Banal na Espiritu

16, 17. Ano an kahulogan para sa saindo kan pagigin binautismohan sa ngaran kan banal na espiritu?

¹⁶ Ano an kahulogan kan pagigin binautismohan sa ngaran kan banal na espiritu? Siring kan nasambitan na, an mga nagdadangog ki Pedro kan aldaw nin Pentecostes nakakaaram na kan dapit sa banal na espiritu. Sa katunayan, naheheling mismo ninda an ebidensia na padagos na ginagamit nin Dios an banal na espiritu. Si Pedro saro sa mga ‘napano nin banal na espiritu asin nagpoon na magtaram nin manlaenlaen na tataramon.’ (Gibo 2:4, 8) An mga tataramon na “sa ngaran kan” dai pirmeng nanonongod sa ngaran nin sarong persona. Ngonyan, dakol na bagay an ginigibo “sa ngaran kan gobyerno,” na bako man persona. Iyan ginigibo paagi sa autoridad kan gobyerno. Kaagid kaiyan, minimidbid nin saro na binautismohan sa ngaran kan banal na espiritu na iyan bakong persona, kundi aktibong puersa ni Jehova. Asin an siring na bautismo nangangahulogan na minimidbid nin saro an papel kan banal na espiritu sa katuyohan nin Dios.

¹⁷ Bako daw na naaraman nindo an manongod sa banal na espiritu paagi sa pag-adal sa Biblia? Halimbawa, nasabotan nindo na an Kasuratan isinurat paagi sa pagpasabong kan banal na espiritu. (2 Tim. 3:16) Mantang kamo nag-ooswag sa espirituwal, posibleng marhay na mas nasasabotan nindo an katunayan na ‘an Ama sa langit nagtatao nin banal na espiritu sa mga naghahagad sa saiya,’ pati na sa saindo. (Luc. 11:13) Posibleng naheheling nindo na naghihiro sa saindong buhay an banal na espiritu. Sa ibong na lado, kun dai pa kamo binautismohan sa ngaran kan banal na espiritu, an pag-asegurar ni Jesus na an Ama nagtatao nin banal na espiritu nangangahulogan na may tunay na mga bendisyon na naghahalat sa saindo kun akoon na nindo an espiritung iyan.

18. Anong mga bendisyon an nakakamtan kan mga binautismohan sa ngaran kan banal na espiritu?

¹⁸ Risang-risa na ginigiyahan asin pinangengenotan man ngonyan ni Jehova an Kristianong kongregasyon paagi sa saiyang espiritu. An espiritung iyan nagtatabang man sa sato bilang mga indibiduwal sa aroaldaw na mga aktibidad niato. Kalabot sa satong pagigin binautismohan sa ngaran kan banal na espiritu an pagmidbid sa papel kaiyan sa buhay niato asin an may pagpapahalagang pakikikooperar sa espiritung iyan. Pero, an nagkapira tibaad mag-isip-isip kun paano niato maootob an pagdusay ki Jehova asin kun paano napapalabot an banal na espiritu. Iyan an sunod na pag-oolayan niato.

[Mga Nota sa Ibaba]

Nagigirumdoman daw Nindo?

• Ano an kalabot para sa saindo kan pagigin binautismohan sa ngaran kan Ama?

• Ano an kahulogan kan pagigin binautismohan sa ngaran kan Aki?

• Paano nindo ikakapaheling na saindong pinapahalagahan an kahulogan kan pagpabautismo sa ngaran kan Ama asin kan Aki?

• Ano an kahulogan kan pagigin binautismohan sa ngaran kan banal na espiritu?

[Mga Ritrato sa pahina 10]

Pagkatapos kan Pentecostes 33 C.E., an bagong mga disipulo nagkaigwa nin anong relasyon sa Ama?

[Credit Line]

Sa permiso kan Israel Museum, Jerusalem