Mga Hapot Hale sa mga Parabasa

Sinabihan ni Jesus an mga naghihinanyog sa saiya: “Dapat kamong magin sangkap, kun paanong an saindong langitnon na Ama sangkap.” Paano puedeng “magin sangkap” an mga tawo ngonyan?—Mat. 5:48.

Tanganing masimbag an hapot na ini, dapat tang masabotan kun paano ginagamit sa Biblia an mga tataramon na “sangkap” asin “pagkasangkap.” Sa Kasuratan, bakong gabos na ilinaladawan na “sangkap” absoluto (o lubos) an pagkasangkap. Siempre, si Jehova sana an may siring na absolutong pagkasangkap. An mga tawo o bagay puede sanang magin sangkap sa relatibong paagi. An mga termino sa Hebreo asin Griego sa Biblia na trinadusir na “sangkap” sa parate nangangahulogan na “bilog,” “maygurang,” o “daing sala” segun sa pamantayan na itinao nin sarong autoridad.

Si Adan asin Eva linalang na sangkap sa moral, espirituwal, asin pisikal. Sinda sangkap segun sa pamantayan na itinao kan saindang Kaglalang. Huli sa pagsuway, dai ninda naabot an pamantayan na ini, asin sa dahelan na iyan nawara ninda an pagkasangkap para sa sainda asin sa magigin mga aki ninda. Kaya paagi ki Adan ikinapamana sa katawohan an kasalan, pagkabakong sangkap, asin kagadanan.—Roma 5:12.

Minsan siring, arog kan lininaw ni Jesus sa Sermon sa Bukid, dawa an bakong sangkap na mga tawo puedeng magin sangkap sa relatibong paagi. Sa sermon na iyan, itinao nia an pamantayan para sa sangkap, o bilog na pagkamoot. Ini pagkamoot na siring kan ipinaheling nin Dios sa katawohan. Si Jesus nagsabi: “Padagos na kamotan an saindong mga kaiwal asin ipamibi an mga nagpepersegir sa saindo; tanganing mapatunayan nindo na kamo mga aki kan saindong Ama na nasa kalangitan, huling pinapasirang nia an saiyang saldang sa mga maraot asin marahay asin pinapaoranan nia an mga matanos asin bakong matanos.” (Mat. 5:44, 45) Paagi sa pagpaheling nin arog kaiyan na pagkamoot, maaarog kan mga disipulo ni Jesus an sangkap na halimbawa nin Dios.

Ngonyan, an Mga Saksi ni Jehova sa bilog na kinaban nagmamaigot na papagdanayon an siring na halangkaw na pamantayan nin pagkamoot sa iba. Gusto nindang tabangan an mga tawo—ano man an pinaghalean, rasa, asin relihion—na makaabot sa tamang kaaraman kan katotoohan sa Biblia. Sa 236 na kadagaan, an mga Saksi ngonyan nagkokondukta nin labing 7,000,000 na pag-adal sa Biblia.

“Kun namomoot kamo sa mga namomoot sa saindo, ano an balos sa saindo?” an hapot ni Jesus. “Bako daw na ginigibo man iyan kan mga parasingil nin buhis? Asin kun mga tugang sana nindo an tinitino nindo, anong pambihirang bagay an ginigibo nindo? Bako daw na ginigibo man iyan kan mga tawo kan mga nasyon?” (Mat. 5:46, 47) An tunay na mga Kristiano dai nagpapaheling nin pagpaorog sa mga may partikular na natapos na edukasyon o etnikong pinaghalean; ni nagpapaheling man sinda nin pagkamoot sa mga makakapaheling sana kaiyan sa sainda. Imbes, tinatabangan ninda an mga pobre asin may helang, saka an mga hoben asin gurang. Sa siring na mga paagi, maaarog nin mga Kristiano an pagkamoot ni Jehova asin huli kaiyan sinda nagigin sangkap sa relatibong paagi.

Makakamtan pa daw niato an pagkasangkap na nawara ni Adan? Iyo, paagi sa pagtubod sa atang na pantubos ni Jesus, biyong maaabot nin makinuyog na katawohan an pagkasangkap durante kan Milenyal na Paghade ni Cristo, kun ‘laglagon na kan Aki nin Dios an mga gibo kan Diablo.’—1 Juan 3:8.