“Dai Ikinasosopog an Maogmang Bareta”

“Dai ko ikinasosopog an maogmang bareta; iyan, sa katotoohan, iyo an kapangyarihan nin Dios para sa kaligtasan kan lambang saro na nagtutubod.”—ROMA 1:16.

 1. Paano parateng inaako an maogmang bareta, alagad paano minamansay kan daing pagtubod na mga tawo an maoginang bareta kan Kahadean nin Dios?

AN HINOHONA nin sarong tawo na maogmang bareta tibaad dai mansayon bilang maogmang bareta nin iba. Ordinaryo sana, an paradara nin maogmang bareta inaako na may kaogmahan, asin an talingang galagang magdangog nin mga bareta ikikiling sa saiya. Alagad, naghula an Biblia na an daing pagtubod na mga tawo sa kinaban dai mamansayon na may kaogmahan an maogmang bareta kan Kahadean nin Dios asin an mensahe nin kaligtasan kaini.—Ikomparar an 2 Corinto 2:15, 16.

 2. Ano an sinabi ni apostol Pablo dapit sa maogmang baretang ipinahayag nia, asin taano an mensaheng ipinahayag nia ta maogmang bareta sagkod ngonyan?

² Si apostol Pablo saro sa mga isinugo na magdara kan maogmang bareta sa publiko. Ano an namatean nia dapit sa saiyang gibohon? Sinabi nia: “Kaya ako galagang ipahayag man an maogmang bareta sa saindo na yaon sa Roma. Hull ta dai ko ikinasosopog an maogmang bareta.” (Roma 1:15, 16) Tanganing an bareta magin marahay pa ngonyan, haros 2,000 taon pakatapos na suratan ni apostol Pablo an mga Kristiano duman sa Roma, kaipuhan na iyan magin nagdadanay na maogmang bareta. Ini sa katotoohan, “daing katapusan na maogmang bareta.”—Kapahayagan 14:6.

3, 4. Taano ta sinabi ni apostol Pablo na dai nia ikinasopog an maogmang bareta?

³ Taano ta sinabi ni apostol Pablo na dai nia ikinasosopog an maogmang bareta? Taano ta ikinasopog nia kutana ini? Huli ta iyan bakong popular na mensahe, hull ta manongod iyan sa sarong lalaki na ipinako sa hariging pasakitan sa paaging siring sa dinuhaging kriminal, na sa gabos na panluwas na itsura ibinubugtak sia sa maraoton na kamugtakan nanggad. Sa laog nin tolo may kabangang taon, an lalaking ini napaduman sa Palestina na dara an maogmang bareta asin napaatubang sa makosog na pagtumang hale sa mga Judio, nangongorogna na an relihiyosong mga lider. Asin ngonyan si Pablo, na nagdadara kan ngaran kan tinuyang lalaking iyan, napaatubang sa kaagid na pagtumang.—Mateo 9:35; Juan 11:46-48, 53; Gibo 9:15, 20, 23.

⁴ Huli kan siring na pagtumang, si Pablo asin an saiyang kapuwa mga disipulo ni Jesu-Cristo tibaad minansay na may dapat ikasopog. Iyo nanggad, namomogol na ngonyan si Pablo sa bagay na dati nia mismong minansay bilang makasosopog. Personal na nakikabtang sia sa pagdara nin paglanghad sa mga parasunod ni Jesu-Cristo. (Gibo 26:9-11) Alagad nag-ontok na sia sa paaging iyan nin paggawe. Bilang resulta, sia, kairiba kan iba na nagin mga Kristiano, nagsakit nin maringis na paglamag.—Gibo 11:26.

 5. Paano ipinaliwanag ni Pablo an saiyang pahayag na dai nia ikinasopog an maogmang bareta?

⁵ Kun tinogotan nin sarong tawo na masopog sia bilang parasunod ni Jesu-Cristo, nagkakaigwa sia nin makatawong punto-de-vista kan mga bagay. Si apostol Pablo bakong siring kaiyan. Imbes, sa paliwanag na dai nia ikinasopog an maogmang bareta na saiyang ihinulit, sinabi nia: “Sa katotoohan, iyo an kapangyarihan nin Dios para sa kaligtasan kan lambang saro na nagtutubod.” (Roma 1:16) An kapangyarihan nin Dios bakong dahelan nin ikasosopog kun iyan naghihiro sa sarong disipulo ni Jesus para sa pagsagibo kan angay sa kaomawan na katuyohan kan mamuraway na Dios na sa saiya si Jesu-Cristo mismo sarong parasamba asin paraomaw.—Ikomparar an 1 Corinto 1:18; 9:22, 23.

An Maogmang Bareta Ibinabalangibog sa Bilog na Kinaban

6, 7. (a) Anong paninimbagan manongod sa maogmang bareta an pinagmamaigotan kan mga Saksi ni Jehova na isagibo, asin ano an resulta? (b) Minsan siring na nungka na mawot niatong pogolan kita kan takot sa pagtao nin patotoo, ano an tibaad kaipuhan kun minsan? (Helingon an nota sa ibaba.)

⁶ Siring ki Pablo, an mga Saksi ni Jehova ngonyan mga disipulo kan Saiyang pinamuraway na Aki, si Jesu-Cristo. Sa mga Saksi niang ini, ipinaniwala ni Jehova an kayamanan na ini kan “mamuraway na maogmang bareta.” (1 Timoteo 1:11) An mga Saksi ni Jehova dai nagkulang na isagibo an magabat na paninimbagan na ini, asin sinadol sindang dai ikasopog ini. (2 Timoteo 1:8) Mahalaga na nungka na togotan an takot o pagkasopog na makapogol sato sa pagtao nin patotoo asin sa pagpamidbid sato bilang mga Saksi ni Jehova.a

⁷ An siring na mapuso asin daing takot na pagpatotoo nagresulta na an ngaran kan Kaharohalangkaweng Dios ibalangibog sa bilog na daga asin an paghuhulit kan maogmang bareta kan saiyang Kahadean sa panbilog na kinaban na hiwas. Sinabi kan Aki nin Dios: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan,” asin nungka na an saiyang hula togotan na magkaigwa nin pagkasudya. (Mateo 24:14) An maogmang bareta ihinuhulit na ngonyan sa labing 210 na kadagaan, asin dai pa naabot an katapusan kan gibohon na paghuhulit. Dai ikinasosopog an maogmang bareta asin sa pag-atubang sa ngapit na may kapusoan, namimibi kita siring kan enot na mga disipulo ni Jesu-Cristo: “Asin ngonyan, Jehova, . . . itogot mo sa saimong mga oripon na padagos na magtaram kan saimong tataramon sa bilog na kapusoan.”—Gibo 4:29.

 8. Taano ta an mga Saksi ni Jehova maninigong dai manluya huli sa pagtumang sa gabos na nasyon sa daga?

⁸ Mantang totoo na an mga Saksi ni Jehova ikinaoongis asin tinutumang sa gabos na nasyon kan daga, kaotoban ini kan ihinula na magigin nagpapamidbid na tanda kan tunay na mga parasamba kan sarong nabubuhay asin tunay na Dios. (Juan 15:20, 21; 2 Timoteo 3:12) Kaya imbes na madisganar asin manluya an boot huli kaini, an mga parabalangibog kan maogmang bareta sinisierto liwat na igwa sinda nin banal na pag-oyon asin kairiba sa inoyonan na organisasyon kan Unibersal na Soberano, si Jehova.

 9. Taano ta mayong diperensia na an bilog na kinaban tumang sa sato?

⁹ Nungka na malingawan: Igwa kita kan tabang kan Kaharohalangkaweng Dios sa bilog na uniberso. Kaya, ano an diperensia kun an bilog na kinaban kairiba an gabos na relihiyosong sekta asin politikal na mga partido kaini tumang sa sato? An bilog na kinaban nagin tumang sa bugtong na Aki nin Dios, asin dai kita masosopog na manompongan sa kaagid na kamugtakan. Siring kan sinabi nia sa saiyang mga apostol: “Kun an kinaban naoongis sa saindo, aram na nindo na iyan naongis na nguna sa sako bago iyan naongis sa saindo. Kun kamo kabtang kan kinaban, an kinaban maoogma sa saiyang sadiri. Ngonyan huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo.”—Juan 15:18, 19.

10. Gikan sa anong paghahalean nangyari an grabeng paglamag sa mga Saksi, asin taano ta dai ninda ikinasosopog ini?

¹⁰ Sa siring an mga Saksi ni Jehova nagtagal nin paglamag sa bilog na kinaban alagad an pinakaprominente sa mga nasyon na binibilog kan inaapod na Kakristianohan. An siring na paglamag kan Kakristianohan dai nagpapatunay na an mga Saksi bakong mga Kristiano. Imbes, ini nagpapatotoo kan saindang paghihingako bilang tunay na mga Kristiano, mga Saksi kan Dios asin Ama ni Jesu-Cristo, na si Jehova. Huli ta sinda mga Saksi nin Dios, dai sinda nasosopog kun nagtitios sinda nin paglamag huli sa relihiyosong mga dahelan. Kun siring, an pagirumdom ni apostol Pablo sa enot na siglong mga Kristiano na dai masopog angay nanggad na aplikado sa mga Saksi ni Jehova ngonyan.—Helingon an Filipos 1:27-29.

An Pinakamarahay na Baretang Puwedeng Ibalangibog

11. Sa pag-ako kan ngaran na mga Saksi ni Jehova, taano ta dai kita nag-ontok na magin mga parasunod ni Jesu-Cristo?

¹¹ An mga Saksi ni Jehova mapusong gayo na inako an saindang ngaran bilang kaotoban kan panuga ni Jehova sa saiyang may tipan na banwaan sa Isaias 43:10. Alagad, dai ini nangangahulogan, na dai na ninda sinusunod si Jesu-Cristo. Si Jesus an saindang Lider, an sarong an arogan sinusunod ninda. Sia mismo saro sa mga saksi ni Jehova. Sa katotoohan, sia an nangengenot na Saksi ni Jehova.—1 Timoteo 6:13; Kapahayagan 1:5.

12. Anong klaseng bareta an ihinuhulit kan mga Saksi ni Jehova sa bilog na kinaban, asin taano?

¹² An mensahe na ihinuhulit kan mga Saksi ni Jehova na ini sa bilog na kinaban iyo an pinakamarahay na bareta na puwedeng ibalangibog kasuarin man. Mayong ibang gobyerno an magigin mas marahay para sa katawohan kisa sa Mesianikong Kahadean na inestablisar ni Jehova na mamahala sa kinaban nin katawohan, na tanganing balukaton iyan isinugo nia an saiyang bugtong na Aki. (Isaias 9:6, 7) An mga nag-eerok sa daga na sainda ihinuhulit an maogmang bareta kan Kahadean tinatawan nin oportunidad na akoon ini asin magpatunay na angay sa regalong buhay na daing sagkod sa pagkasangkap bilang tawo sa paraisong daga.

13. Taano ta makasisierto kita na an gobyerno kan Mesianikong Kahadean an magigin pinakamarahay, asin ano an dai ikinasosopog na irekomendar kan mga Saksi?

¹³ Sierto nanggad, kun andam an boot ni Jesus na magtios nin maringis na kagadanan tanganing balukaton idtong magigirx mga sakop nia, siertong tatawan nia sinda kan pinakamarahay na dai ikatatao nin iba pang gobyerno. Irenerekomendar niato sa gabos na linalang na tawo sa daga: Magin maimbod, masinunod na sakop kan gobyernong iyan. Dai niato ikinasosopog an gobyerno na sinsero niatong irenerekomendar sa bilog na katawohan. Dai kita masibog sa paghuhulit kan Kahadean, maski pa an paggibo kaini tibaad magdara nin paglamag sa sato. Siring ki apostol Pablo, an lambang saro sato nagsasabi: “Dai ko ikinasosopog an maogmang bareta.”

14. Sono ki Jesus, magigin gurano kalakop an paghuhulit kan Kahadean sa satong panahon?

¹⁴ Ihinula ni Jesus na an paghuhulit kan maogmang bareta kan Kahadean magigin panbilog na kinaban, asin ining mahiwas, dakula an sakop na hula angay sa siring na mensahe. (Marcos 13:10) Mayo siang pagduwaduwa sa paghula kan paghuhulit kan Kahadean ni Jehova sagkod sa pinakaharayo—iyo, sagkod sa kaporoporohi kan daga. (Gibo 1:8) Aram ni Jesus na an mga tawo manonompongan saen man, an saiyang maimbod na mga parasunod magibo nin sinserong pagmamaigot tanganing maabot sinda kan maogmang bareta kan Kahadean.

15, 16. (a) Sairisay an maninigong mapaabotan kan maogmang bareta? (b) Taano an gibohon na paghuhulit ta magigibo sa ibong nin paglamag kan organisasyon kan Diablo?

¹⁵ An mga nag-eerok sa daga ngonyan may bilang na rinibong milyones asin nakalakop sa gabos na kontinente asin darakulang isla kan kadagatan. Alagad, mayong kabtang kan ineerokan na daga an nagin harayoon na gayo para sa mga Saksi ni Jehova tanganing pagmaigotan na maabot ini kan maogmang bareta. An bilog na ineerokan na daga iyo an simbolikong tongtongan ni Jehova Dios. (Isaias 66:1) An mga linalang na tawo na nag-ookupar sa ano man na kabtang kan saiyang tongtongan maninigong maabot kan mensaheng ini nin kaligtasan.

¹⁶ An maogmang bareta ngonyan nakakapaogmang bareta kan sa-hadeng gobyerno na inestablisar na sa mga kamot kan Mesias. Aram ni Jesus na sa ibong kan pinakamaringis na paglamag sa kabtang kan organisasyon kan Diablo, an espiritu nin Dios magmomotibar sa tunay na mga parasunod kan Mesias na gibohon an bilog na makakaya tanganing “an maogmang baretang ini kan kahadean” bilang establisadong katotoohan “ihulit sa bilog na ineerokan na daga.”—Mateo 24:14.

Dai Ikinasosopog si Jesu-Cristo Asin si Jehova

17. (a) Sa ano daing ikinasosopog an tunay na mga parasamba? (b) Anong reglamento an ipinaliwanag ni Jesus sa Marcos 8:38, asin ano an kahalagahan kaini?

¹⁷ An Kaharohalangkaweng Dios dai nagduwaduwa na tawan an saiyang sadiri nin ngaran, Jehova; ni maninigong ikasopog kan saiyang maimbod na mga parasamba an ngaran na iyan. An tunay na mga parasamba maogma na maaraman asin mamidbid bilang mga nagtatao nin dai nababangang pagsamba asin pagsunod saiya. Manongod saiya, nagbugtak si Jesus nin reglamento, o prinsipyo, sa Marcos 8:38: “An siisay man na ikasopog ako asin an sakong mga tataramon sa parasambay asin makasalan na kapag-arakian na ini, ikakasopog man kan Aki nin tawo an sarong iyan kun mag-abot na sia sa kamurawayan kan saiyang Ama patin kan banal na mga anghel.” Sa kaagid na paagi, siisay man an ikasopog an Dios asin Ama kan Kagurangnan na si Jesu-Cristo, tama sanang ikasopog ni Jehova an sarong iyan. Asin an arin man na linalang na ikasopog ni Jehova huli kan saiyang bakong maimbod na paagi nin paggawe bakong angay na mag-eksister sa arin man na kabtang kan rona nin Dios sa langit o sa daga.—Lucas 9:26.

18. (a) Taano ta maninigong nakatanom sa satong puso asin isip an mga tataramon ni Jesus sa Mateo 10:32, 33? (b) Ano an nangyayari sa mga nagpapainda ki Jesus asin ki Jehova huh sa takot sa tawo? (Magtao nin mga halimbawa basado sa nota sa ibaba.)

¹⁸ Itanom sa satong puso asin isip an minasunod na mga tataramon ni Jesu-Cristo: “Kaya an siisay man na magmidbid sako sa atubang nin mga tawo, mimidbidon ko man sa atubang nin sakong Ama na nasa langit; alagad an siisay man na magpainda sa sako sa atubang nin mga tawo, papaindahan ko man sia sa atubang kan sakong Ama na nasa kalangitan.” (Mateo 10:32, 33; Lucas 12:8, 9 ) Sa kaagid na basehan, an siisay man na magpainda sa Dios asin Ama kan Kagurangnan na si Jesu-Cristo paiindahan man Nia. Dai sia ibibilang na angay na magin kabtang kan pamilya na dian si Jesu-Cristo an pangenot na Aki. Kun siring lalaglagon sia sa itinalaan na panahon nin Dios.b

19, 20. (a) Taano idtong mga namibi tanganing pakangbanalon an ngaran ni Jehova ta mayo nin ano man na dapat na ikasopog? (b) Ano an nagibo kan mayong takot na mga parabalangibog kan Kahadean, asin may anong pagtabang?

¹⁹ An modelong pamibi na itinokdo ni Jesus sa saiyang mga disipulo sisimbagon: “Ama niamo na nasa langit, pakangbanalon logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10 ) Kun mangyari na iyan, an mamomoton na mga disipulo ni Jesus mayo nang dapat na ikasopog. An ngaran ni Jehova sasambahon, pakakangbanalon, bako sanang kan minilyon na nabubuhay ngonyan na dai na kaipuhan pang magadan kundi siring man an rinibong milyones kan katawohan na aapodon nia hale sa saindang mga lolobngan durante kan saiyang sangribong taon na pamamahala sa Kahadean. Magkakaigwa sinda nin oportunidad na mabuhay sa sarong paraisong daga sagkod lamang.

²⁰ Mayong ikakasopog, an daing takot na mga parabalangibog na ini kan maogmang bareta kan Kahadean nahimong magibo an panglobong pagpatotoo sa ibong kan panbilog na dagang pagtumang huli ta igwa sinda nin labaw sa tawong kapangyarihan sa likod ninda—an pagtabang kan langitnon na mga anghel. Kaya, an mga Saksi ni Jehova “natatakot sa Dios asin pinamumuraway sia.”—Kapahayagan 14:6, 7.

Daing Ikakasopog na Natatakot sa Dios Asin Pinamumuraway Sia

21. Ano an dai ikinasopog na gibohon kan mga Saksi ni Jehova, asin may anong resulta?

²¹ An mga Saksi ni Jehova nagpatunay na dai sinda nasosopog na matakot sa Dios asin pamurawayon sia, minsan sa paggamit kan saiya mismong personal na ngaran, Jehova. Nagbunga ini nin dai ikataram na mga bendisyon para sainda. Nangyari an mga bendisyon na ini huli sa maimbod na kaotoban kan mga panuga kan Kaharohalangkaweng Dios. Kanigoan na pagbindikar ini sa saiya bilang an solamenteng nabubuhay asin tunay na Dios, an Soberano kan uniberso!

22. Taano an mga Saksi ni Jehova ta napaatubang sa bisyosong paglamag, alagad anong kagayagayahan an mapapasainda?

²² Sa nagdadangadang na ngapit, an sekular na mga gobyerno mabirik tumang sa relihiyosong mga pamamahala asin paparaon sinda gabos—kairiba an Kakristianohan—sa pag-eksister. (Kapahayagan 17:16, 17) Kaya, an mga Saksi ni Jehova mapapaatubang sa panahon nin bisyosong paglamag kan kinabanon na mga elemento. Dai sinda makahihimong makatagal asin makaligtas kun an daing katapusan na Dios mayo sa sainda. Alagad kairiba ninda sia, asin sa siring magkakaigwa sinda nin kagayagayahan na maheling an gabos na tumang sa Kristiano, tumang ki Jehova na mga kaiwal na pinara sa pag-eksister kan Dios na sa saiya an mga Saksi daing pagliliwat na nagsasamba. Dai sinda magkakaigwa nin ikakasopog huli sa pagpahayag asin paglaglag bilang mga kaiwal kan tunay na teokrasiya kundi makaeeksperyensia nin dai ikataram na kagayagayahan sa pagkanta ki Jehova: “Minsan poon sa panahon na daing katapusan sagkod sa panahon na daing katapusan ika iyo an Dios.”—Salmo 90:2.

23. Taano an mga Saksi ni Jehova ta mayong ano man na dapat ikasopog, asin ano an magigin resulta?

²³ Magpapamuraway sinda sa Dios, an Ama ni Jesu-Cristo, na paagi saiya an pamilya nin tawo tinubos tanganing magkaigwa nin buhay na daing katapusan sa pagkasangkap bilang tawo asin kaogmahan sa paraisong daga. Makapangyarihan nanggad na ipinaheling ni Jehova Dios an saiyang sadiri paagi ki Cristo Jesus! Kanigoan kagayon na ipinaheling ni Jehova an saiyang sadiri bilang madonong asin mamomoton na naggagamit, bakong abusero, kart saiyang makakamhan na kapangyarihan! Kaoyon kaini, mayo kita nin ano man na dapat ikasopog may koneksion saiya o sa saiyang bugtong na Aki, si Jesu-Cristo. Dai kita nasosopog na magin mga parabalangibog kan mamuraway na maogmang bareta, na nagpapaliwanag kan nandadaog sa gabos na kapangyarihan ni Jehova Dios paagi ki Cristo Jesus, na nagsabi sa pantapos na mga oras kan saiyang daganon na buhay: “Magin mapuso kamo! Nadaog ko an kinaban.” (Juan 16:33) Sa paggibo kaini, permi niatong sunudon an halimbawa ni apostol Pablo, na nungka ikinasopog an maogmang bareta. Kun gibohon niato iyan, an Makakamhan na Dios dai kita ikakasopog.

[Mga Nota sa Ibaba]

Mga Hapot Bilang Sumaryo

◻ Siring ki apostol Pablo, maninigong magkaigwa kita nin anong kaisipan dapit sa pagpahayag kan maogmang bareta, asin taano?

◻ Taano ta an mensahe na ibinabalangibog kan mga Saksi ni Jehova an pinakamarahay na bareta kasuarin man?

◻ Anong patanid an itinao ni Jesus manongod sa siisay man na ikakasopog sia sa pag-abot nia sa kamurawayan sa Kahadean?

◻ Ano an nangyayari sa mga nagpapainda ki Jesus asin ki Jehova?

◻ Ano an nagibo kan mga parabalangibog kan maogmang bareta na daing ikakasopog, asin taano?